SAJ SKUPO — SAR TE IKLJOVE KO KRAJO

Prifatin o bukja agjaar sar soj tane

Keda pohari bajrona o cene šaj ni na primetinaja adava, posebno ako ko isto vreme bajrona o plate da. Ama keda o cene bajrona taro jekh puti, a o plate ačhovena ista, šaj te ova sekirime hem te ovel amen stres, posebno ako valjani te grižina amen amare familijake.

Amen našti te čhinava o trošakija bašo životo te bajron. Ama ako prifatinaja akava fakti, ustvari adava šaj te koristinel amenge.

SOSKE TANO VAŽNO

E manušenge so haljona kaj nane len kontrola upro cene so bajrona polokho lenge...

te ačhoven smirime. Keda siem smirime razmislinaja pošukar hem anaja pošukar odluke.
te ciden pe taro lošna navike. Na primer, lošno navika šaj te ovel te na platinen pe smetke ili te trošinen pe pare bašo bukja so nane potrebna.
te na ovel akošibe ki familija bašo pare.
te arakhen način te ikljovel pe ko krajo e problemea. Adava značinela te trošinel pe pohari pare hem te odlučinel pe so čače valjani lenge.

SO ŠAJ TE KERE

Ov prilagodlivo. Keda o cene bajrona taro jekh puti, mudro tano ako šaj te trošina pohari pare hem te kina samo adava soj amenge potrebno. Nesave manuša trošinena poviše pare taro adava so isi len hem adava kerela lengiri situacija te ovel panda pophari. Agjaar ola samo umorinena pe. Ako isi tut familija normalno tano te sekirine tut sar te ane lenge adava soj lenge potrebno, sepak neka ovel tut ki godi akava: Tle familijake potrebno tano mangipe, vreme hem vnimanie poviše taro bilo so javer!

„Koj tumendar adalea so ka sekirinel pe šaj barem hari te prodolžinel plo životo?“ (Luka 12:25).

„Nikogaš ma sekirinen tumen bašo tajsutno dive soske o tajsutno dive isi le ple sekiracie, dovolno tano so sekova dive isi le ple problemija“ (Matej 6:34).

Ako trošinea poviše pare taro adava so isi tut, adava šaj te kerel tli situacija te ovel panda pophari.