SAJ SKUPO — SAR TE IKLJOVE KO KRAJO

Pametno trošin o pare

Adava so bajrona o cene kerela te ovel amenge popharo o životo. Ama na valjani te mislina kaj našti ništo te kera. Šaj isi nesave bukja so šaj te kere te ovel pošukar tli situacija.

SOSKE TANO VAŽNO

Ako barem hari na trudinea tut pametno te trošine o pare, adava šaj te anel tuke pobare finansiska problemija hem sekiracie. Čak ako isi tut hari pare, isi nesave bukja so šaj te kere te šaj te pomožinen tut pametno te trošine o pare.

SO ŠAJ TE KERE

Pružin te pre kobor soj dugačko ti čerga. Ako trošinea doborom kobor so isi tut, verojatno ka ovel tut pobari kontrola upri tli finansisko situacija hem ka ove spremno te platine ako iklilo nesavo trošako so na očekujngjan.

Ako planirinea kobor trošinea, a kobor zarabotinea, adava ka pomožinel tut te na trošine poviše pare taro adava so isi tut. Džikote kerea asavko plani šukar ka ovel te razmisline so čače tuke potrebno. Palo adava, de tutar sa te ikere tut ko adava plani hem ov spremno te menine le ako meninela pe tli plata ili o cene. Džangjola pe, ako sian ko brako tlo bračno partneri da valjani te ovel vklučimo ko odluke.

Predlog: Namesto te kine bukja kartičkaja, ako šaj platin keš. Nesave halile kaj agjaar isi len pobari kontrola upro pare so isi len. Pa čak, adava pomožinela lenge te na khuven ko dugija. Osven adava, odvojn tuke vreme te dikhe o izveštaija tari banka. Ka ovel tut pohari stres ako džanea kobor pare isi tut.

Nane sekogaš lokho te na trošine poviše pare taro adava so isi tut. Ama, jekh praktično hem šukar plani bašo adava sar te trošine te pare šaj but te pomožinel tuke. Isto agjaar, nane but te sekirine tut bašo pare.

„[Računin] o trošako“ (Luka 14:28).

De tutar sa te arakhe tli buti. So šaj te kere te šaj te arakhe tli buti? Ake nekobor predlogija: Dža ki buti ko vreme. Neka ovel tut pozitivno stavi sprema tli buti, ov spremno te pomožine e javerenge hem ov bukjarno. Sikav poštovanje. Iker tut ko pravilija hem de sa tutar te ove pošukar ko tle veštine.

Ma frde te pare ko nepotrebna bukja. Puč tut: „Dali često trošinava pare ko skupa bukja ili ko bukja so na valjani mange, pa čak soj mange štetna?“ Na primer, but manuša o pare so mučno zarabotinena frdena len ki droga, ko komari, ko pušibe ili ko but pijbe alkohol. Akala navike šaj te keren te našaven pumaro sastipe hem pumari buti.

„Srekjno tano o manuš so ka arakhel mudrost... Pošukar tano te dobine mudrost nego srebro“ (Izreki 3:13, 14).

Čhiv pare ki strana bašo itna situacie. Keda šaj, čhiv nešto ki strana bašo itna trošakija ili ako iklile nesave trošakija so na planiringjan. Adala pare šaj te pomožinen tut te na sekirine tut ako tu ili nekoj tari tli familija nasvaljovela, našavela pli buti ili ako slučinela pe nešto so na očekujngjan.

„O vreme hem o bukja so našti te predvidinen pe arakhena sekole manuše“ (Propovednik 9:11).

Idee sar te štedine pare

Počesto ker tuke hajbaske khere.

Ako često haja avrijal ili ako redovno kinea gotovo hajbe hem pijalokija, adava šaj but te koštinel tut. Džangjola pe, valjani te odvojne vreme hem te trudine tut te kere hajbaske khere. Ama agjaar šaj but te štedine. A agjaar tu ka kontrolirine kobor kvalitetno tano o hajbe so ka ha.

Razmislin šukar so valjani te kine.

Ker tuke spisako pazaribaske hem iker tut ki leste. Izbegin ki sig te kine bukja so na planiringjan.
Kin pobari količina taro nesave bukja keda ka arakhe len poeftino ako isi tut pare bašo adava. Sepak neka ovel tut ki godi kaj valjani te ovel tut than kote so ka šaj te čhive o bukja so šaj sigate te rumingjoven.
Razmislin dali šaj te kine poeftina bukja ako o kvaliteti tano šukar.
Kin onlajn te šaj te arakhe pošukar ponude te šaj te na le bukja kola so na planiringjan te le len hem te ovel tut pošukar kontrola upro adava kaj trošinea o pare. Ako ko than kote so živinea šaj te kine onlajn, dali adava ka ovel šukar opcija tuke?
Ako šaj rode popustija hem koristin kuponija. Sporedin o cene hem keda ka kine nesavo ured razmislin bašo adava kobor struja ka trošinel hem kobor ka oven o trošakija održibaske.

Šukar razmislin angleder te kine neve bukja.

Adala so kerena o telefonija hem o javera proizvodija nonstop ikalena neve modelija te šaj poviše te zarabotinen. Adaleske puč tut: „Dali čače valjani mange ponevo modeli? Ako oja, dali mora te kinav le odma? Hem, dali čače valjani mange o najnevo modeli?“

Popravin o bukja so rumisalile hem kin koristime bukja.

Održin o bukja so isi tut khere te šaj poviše te koristine len hem ako šaj popravin len keda ka rumingjoven. Isto agjaar, šaj te štedine pare ako kinea bukja so više koristingje len o javera.

Sadin tuke ovošje hem zelenčuk.

Dali šaj te kere tuke jekh tikni bavča kote so ka sadine ovošje hem zelenčuk? Agjaar šaj pohari te trošine pare hajbaske, tuke hem tle familijake, a šaj adava so sadinea te de le te šaj te dobine nešto javer, te bikine le ili te poklonine le.

„O planija okoleskere so trudinela pe sigurno anena korist“ (Izreki 21:5).

„Nonstop pratinaja o cene taro bukja so sekova dive koristinaja len. A isto agjaar, pazinaja kobor često koristinaja amare kartičke“(Majls, Anglija).

„Angleder te dža te pazarina, sar familija sekogaš keraja spisako e bukjencar soj amenge potrebna“(Džeremi, Amerika).

„Amen stalno pazinaja dali šaj te kina adava so mangaja te kina hem čhivaja pare ki strana ako iklile nesave trošakija so na planiringjem“(Jael, Izrael).

„Sikavgjem amare čhaven te popravinen o bukja namesto te kinen neve. Akava važinela hem bašo vrda hem bašo bukja so isi amen khere. Isto agjaar, me hem mi romni trudinaja amen te na kina o najneve modelija“(Džefri, Amerika).

„Isi amen pohari trošakija agjaar so sadinava zelenčuk hem agjaar so arakhava khanja. Čak šaj te pokloninav e javere manušenge taro mlo zelenčuk“(Hono, Mjanmar).

Jekh romni khedela razno zelenčuk tari pli bavča.