SAJ SKUPO — SAR TE IKLJOVE KO KRAJO

Ma našav tli nadež

Dali o trošako bašo životo ki tli phuv tano pobaro tari tli plata? Sekirimo li sian dali šaj te grižine tut tuke hem tle familijake? Ako oja, šaj na džanea so adžikerela tut ki idnina. Ama čak ko asavke phare situacie na valjani te našave tli nadež.

SOSKE TANO VAŽNO

Adalen so isi len nadež mangena te slučinen pe šukar bukja, ama lengiri nadež nane samo želba. I nadež motivirinela len te keren sa so šaj te šaj lengiri situacija te ovel pošukar. Na primer, nesave istražuvanja sikavena kaj e manušen so isi len nadež...

obično tane poizdržliva
prilagodinena pe
anena pomudra odluke kola so pomožinena lenge te ovel len pošukar sastipe hem pošukar životo

SO ŠAJ TE KERE

Prvo, doznajn sar i Biblija šaj te pomožinel tut panda avdive. Ki Biblija isi praktična predlogija kola so šaj te pomožinen tuke te ikljove ko krajo keda bajrona o cene. Akala predlogija šaj te pomožinen tuke te ovel tut pobari kontrola upro tlo životo hem te ove pospremimo te ikljove ko krajo e problemencar so ka aven.

„I sposobnost šukar te razmisline ka arakhel tut; adava so haljovea o bukja ka zaštitinel tut“ (Izreki 2:11).

Dujto, doznajn so vakerela i Biblija baši idnina. Keda ka haljove kobor vredinela i mudrost koja so arakhljola ki Biblija, šaj adava te pottikninel tut te džane nešto poviše bašo adava so vakerela i Biblija baši idnina. Na primer, ka dikhe kaj o Devel na samo so mangela te ovel tut idnina hem nadež nego kergja hem temeli baši adaja nadež (Eremija 29:11). A adava temeli tano e Devleskoro Carstvo.

SOJ E DEVLESKORO CARSTVO HEM SO KA KEREL?

E Devleskoro Carstvo tani vlada koja so ka vladinel upri celi phuv (Daniel 2:44; Matej 6:10). Keda ka vladinel akaja nebesno vlada nikoj poviše nane te cidel muke, nane te ovel čorolo, sarine ka živinen ko mir hem sekas ka ovel adava soj leske potrebno te šaj te ovel srekjno. Bašo akala bukja kerena lafi o sledna stihija:

„Ka ove srekjno hem šukar ka živine“ (Psalm 128:2).

„[O manuša so ka živinen keda ka vladinel e Devleskoro Carstvo] nane te keren buti džabe“ (Isaija 65:23).

„Ki phuv o giv but ka bijanel“ (Psalm 72:16).

Milionija manuša isi len doverba ko akala vetuvanja soske tane uverime kaj o Devel našti te hovavel (Tit 1:2). Soske tu da na istražinea i Biblija? I nadež baši koja so kerela lafi šaj te del tut andruno mir te šaj te ikljove ko krajo e ekonomska problemencar hem te ovel tut doverba kaj adžikerela amen pošukar idnina.