SAJ SKUPO — SAR TE IKLJOVE KO KRAJO
Ov darežlivo
Ako tuke pharo te kine o bukja so valjani tuke, šaj dikhjola tuke panda popharo te ove darežlivo. Ama adava so ka ove darežlivo ustvari ka pomožinel tuke te ikljove ko krajo e ekonomska problemencar. Šaj te štedine pare hem ko isto vreme te ove darežlivo.
SOSKE TANO VAŽNO
Keda daja e javerenge, čak keda adava tano hari, osetinaja amen srekjna hem šukar. Ustvari, o istražuvanja sikavena kaj keda daja, adava tano korisno bašo amaro fizičko hem emocionalno sastipe. Na primer, šaj te oven amen pohari sekiracie, stres, te anel ki normala amaro pritisok pa čak hem te oven amen pohari dukha ko telo. A šaj hem te kerel pošukar te sova.
Ako daja e javerenge, bizi razlika dali pare ili nešto javer, ka ovel amenge polokho te prifatina pomoš keda amenge ka valjani. O Havard, kova so živinela ki Anglija, vakerela: „Adaleske so trudinaja amen te ova darežliva hem te pomožina e javerenge, me hem mi romni na osetinaja amen doborom lošno keda amenge valjani pomoš“. Normalno, adala so dena taro vilo na očekujnena palo adava o javera da te keren lenge o isto. Sepak, šaj te keren peske čačutne amala kola so spremno ka pomožinen len keda ka valjanel lenge.
SO ŠAJ TE KERE
Delin e javerencar. Ako nane tut but ko materijalno pogled, sepak šaj nešto te de, čak ako adava nane nesavo posebno hajbe. O Dankan hem leskiri familija, kola so živinena ki Uganda, tane čorole, ama sepak mangena te delinen adava so isi len e javerencar. O Dankan vakerela: „O nedele, me hem mi romni kaninaja gostija hem na keraja nešto posebno hajbaske. Šukar osetinaja amen keda nakhavaja vreme e javerencar“.
Džangjola pe, keda dea e javerenge valjani te ove razumno. Sigurno na bi mangea te de doborom but, so ko krajo tle familija nane te oven la o bukja so valjanena lake (Jov 17:5).
Predlog: Keda ka vikine gostija, ker nešto ednostavno hajbaske ili šaj čak samo te de pijbaske. Ako isi tut nesave bukja so na valjani tuke, dali šaj te poklonine len nesave amalenge ili komšienge kola so šaj ka koristinen len hem ka ceninen len?
De ko javera načinija. Nesave taro najšukar poklonija tane bizo pare. Na primer, šaj te da amaro vreme hem amaro vnimanie agjaar so ka kera šukar bukja e javerenge. Čak jekh ljubezno lafi šaj te ovel poklon! Adaleske vaker e javerenge kobor but ceninea len ili mangea len.
Predlog: Šaj te pomožine nekaske okolu o kherutne bukja, te popravinel pe nešto khere ili te pazarinel pe. Pišin nesave amaleske kartička ili poraka, čak samo te vakere kaj mislinea ki leste.
Ako rodea načinija te ove darežlivo, ka ovel tut poispolnimo hem posrekjno životo.