Dekemvri

Jekh buti so najviše vooduševinela amen bašo Isus tani leskiri sposobnost te haljovel amare problemija so isi amen sar nesovršena manuša. Džikote sine ki Phuv, o Isus sine bahtalo okolencar soj bahtale hem rovela sine okolencar so rovena (Rim. 12:15). Na primer, otkeda sine ki služba, leskere 70 učenikija irangje pe bahtale. Ki adaja prilika „o sveti duh phergja e Isuse bahtalipaja“ (Luka 10:17-21). Ki jekh javer prilika, keda dikhlja kobor sine tažna o najpaše e Lazareskere adaleske so mulo, o Isus sine „but pogodimo hem tažno“ (Jovan 11:33). So pottikningja akale sovršeno manuše te sikavel doborom milost hem sočuvstvo sprema o nesovršena manuša? Najvažno buti sine adaja so mangela sine e manušen. O Isus sine posebno bahtalo „e manušikane čhavenge“ (Izr. 8:31). Leskoro mangipe sprema lende pottikningja le šukar te džanel o način sar razmislinena o manuša. O apostol Jovan vakergja: „Ov džanela sine so isi e manuše ko vilo“ (Jovan 2:25; w19.03 20, pas. 1-2).

O Satana lelja sa so sine e Jove, mudargja leskere slugen hem rumingja leskoro ugled. Ov napadingja leskere familija adalea so mudargja leskere deše čhaven. Palo adava nasvakergja le agjaar so kergja ko celo telo te oven le čirija so but dukhana. E Joveskiri romni sine phagji tari dukh hem adaleske vakerela leske sine te otkažinel pe taro sa, te del arman e Devle hem te merel. Korkori o Jov manglja te merel, ama ponadari da ačhilo besprekorno. Tegani o Satana probingja javer taktika. Ov koristingja e Joveskere trine amalen. Ola gele ko Jov hem divencar ačhile ki leste, ama ni najhari na utešingje le. Namesto adava, ola bizi žal napadingje le hem surovo kritikujngje le. Ola vakerena sine kaj o Devel kergja leske adala nevolje hem kaj ni najhari na ceninela leskiri besprekornost. Ola čak vakergje kaj o Jov tano lošno manuš kova so zaslužingja te slučinen pe leske sa adala strašna bukja! (Jov 1:13-22; 2:7-11; 15:4, 5; 22:3-6; 25:4-6; w19.02 4, pas. 7-8).

Šukar tano te ovel amen ispravno dar. Na primer, valjani te ovel amen dar te na razočarina e Jehova. Te ovel sine e Adame hem e Eva asavki dar, nane te buninen pe sine protiv o Jehova. Ama ola buningje pe. Otkeda kergje adava, ola ule grešnikija hem pumare čhavenge šaj sine te prenesinen samo grevo hem meribe. Tegani lengere jakhja phravdile, ili javere lafencar ule celosno svesna kaj tane grešnikija. Adaleske so ule svesna baši pli sostojba, dikhle kaj tane nangje, ladžandile hem učhargje pe (1. Moj. 3:7, 21). Iako valjani te ovel amen ispravno dar taro Jehova, na valjani previše te dara taro meribe, iako nasledingjem grevo hem meribe. O Jehova kergja nešto te šaj te dobina večno životo. Ako keraja grevo hem iskreno kainaja amen, o Jehova ka prostinel amenge. Ov kerela adava soske isi amen vera ki e Isuseskiri otkupno žrtva. Glavno način sar sikavaja vera ko Devel tano agjaar so daja lafi kaj ka služina leske hem krstinaja amen (1. Pet. 3:21; w19.03 5-6, pas. 12-13).

E Izraelcon sine len but pričine te sikaven blagodarnost. O Jehova oslobodingja len taro ropstvo hem mukhlja upro Egipkjanija deš nevolje. A keda o Egipkjanija gele pali lende te astaren len, o Jehova spasingja len agjaar so kergja i egipetsko vojska te tasljol ko Crveno more. O Izraelcija sine doborom blagodarna so giljavgje jekh gili baši pobeda te šaj te falinen e Jehova. Ama, dali palo adava ačhile blagodarna? Keda o Izraelcija arakhlile ko javera phare situacie, ola sigate bistergje sa o šukaripe so kergja lenge o Jehova. Adalea sikavgje kaj nane len cenenje (Ps. 106:7). Sar? Sa o Izraelcija počmingje te buninen pe protiv o Mojsej hem o Aron, a adalea ustvari žalinena pe sine protiv o Jehova (2. Moj. 16:2, 8). O Jehova sine razočarimo soske na sine blagodarna. Palo adava ov vakergja kaj celo adava pokolenie ka merel ki pustina, osven o Isus Navin hem o Halev (4. Moj. 14:22-24; w19.02 17, pas. 12-13).

O Isus na manglja te istakninel pe anglo javera agjaar so ka rodel e Gospodareskiri večera te kerel pe ko jekh komplicirano način. Adaleske, ple učenikonge vakergja kaj valjani jekh puti ko berš te ikeren e Gospodareskiri večera adalea so ka koristinen samo maro hem mol (Jovan 13:15; 1. Kor. 11:23-25). Akala ednostavna, ama soodvetna simbolija, sikavena amenge kaj o Isus na sine gordo manuš. Čače šaj te ova bahtale so o Isus, amaro Cari ko nebo, tano ponizno (Fil. 2:5-8). Sar šaj te ova ponizna sar o Isus? Agjaar so ka čhiva e javerengere potrebe anglo amare (Fil. 2:3, 4). Te setina amen panda jekh puti so ulo ki posledno rat taro e Isuseskoro životo ki Phuv. Ov džanlja kaj panda hari ka merel bare dukhencar, ama iako džanlja adava ov sine sekirimo bašo ple apostolija kolenge so ka ovel sine but pharo bašo leskoro meribe. Adaleske, ov koristingja adaja rat te sikavel len, te ohrabrinel len hem te kerel lengiri vera pozorali (Jovan 14:25-31). E Isuseskiri bari poniznost dikhela pe sine taro adava so e javerengere potrebe čhivela sine anglo ple. Čače, o Isus mukhlja amenge but šukar primer! (w19.01 21, pas. 5-6).

Dali kočingjovea tari dar sekova puti keda mislinea te vazde tlo vas? Ako oja, na osetinea tut samo tu agjaar. Ustvari, poviše džene amendar džinegde darana keda komentirinena. Asavki dar šaj te ovel šukar znako, soske sikavela kaj sian ponizno hem kaj dikhea e javeren sar pobare tutar. O Jehova but mangela i poniznost (Ps. 138:6; Fil. 2:3). Ama, ov isto agjaar mangela te faline le hem te ohrabrine tle phralen hem phenjen ko sostanokija (1. Sol. 5:11). Ov mangela tut hem ka del tuke i hrabrost so valjani tuke. Razmislin bašo nekobor bukja kolende so setinkerela amen i Biblija. Oj vakerela kaj sarine amen grešinaja. Ponekogaš ka vakera nešto so na valjani ili ka vakera nešto ko pogrešno način (Jak. 3:2). Ni o Jehova ni amare phralja hem phenja na adžikerena amendar te ova sovršena (Ps. 103:12-14). Ola tane amari duhovno familija hem čače mangena amen (Mar. 10:29, 30; Jovan 13:35). Ola haljovena kaj keda komentirinaja, nane sekogaš te vakera agjaar sar so mangaja (w19.01 8, pas. 3; 10, pas. 10-11).

Tumenge e ternenge nane sekogaš lokho te postapinen sprema adava so vakerela o avdisutno stiho, ama šaj te kerel pe adava. O Jehova mangela te ovel tumen uspešno hem bahtalo životo. Adalea so o Devel ka pomožinel tuke, tu šaj te ove uspešno na samo džikote sian terno nego ko celo tlo životo. Te šaj pošukar te haljova akava, ka kera lafi bašo adava so pomožingja e Izraelconge te osvojnen i Vetimi phuv. Save upatstvija dengja o Jehova e Izraelconge kratko angleder te khuven ki Vetimi phuv? Dali vakergja lenge te oven pošukar vojnikija ili te spreminen pe vojnake? Na! (5. Moj. 28:1, 2). Ov vakergja lenge te šunen le hem te ovel len doverba ki leste (Is. Nav. 1:7-9). Akava sovet e manušenge šaj izgledinela sine kaj na sine ispravno, ama ustvari adava sine o najšukar sovet e Izraelconge. O Jehova poviše puti pomožingja ple narodoske te pobedinel e Hanaancon (Is. Nav. 24:11-13). Te šaj te šune e Jehova valjani tuke vera, hem adaja vera anela sekogaš dži ko uspeh. Adava sine agjaar ko purano vreme, a agjaar tano avdive da (w18.12 22, pas. 3-4).

Nesave hristijanen smetingja nesavi promena ko haljojbe bašo nesavo biblisko stiho. A javera palem, šaj verujngje ko hovavne sikljojba e otpadnikongere hem e javerengere so vakerena hovajba amenge. Akala tane nekobor pričine soske nesave svesno cidingje pe taro Jehova hem taro sobranie (Evr. 3:12-14). Kobor pošukar ka ovel sine te ovel len doverba ko Isus, sar so sine e Petare. Javera sine cidime taro čačipe hari po hari, šaj čak bizo te primetinen so slučinela pe lenge. Asavke manuša tane sar jekh čamco kova so hari po hari o branija cidena le dur taro brego. I Biblija vakerela amenge te pazina nikogaš te na ova „cidime tari vera“ (Evr. 2:1). Obično, nekoj soj tano cidimo taro čačipe na kerela adava namerno. Ama, ov mukhela leskoro amalipe e Jehovaja te slabonel, a sar so nakhela o vreme šaj čak te našavel le (w18.11 10, pas. 5-6).

Mangea li te dobine poviše obuka te šaj te služine e Jehovaske ki pobari mera? Ako tano agjaar, šaj te de molba baši Škola bašo polnovremena objavitelija. Ki akaja škola duhovno zrela phralja hem phenja kola so više tane ki polnovremeno služba dobinena obuka te šaj e Jehovaskiri organizacija te koristinel len ki panda pobari mera. Okola so džana ki akaja škola valjani te oven spremna te služinen segde kote so ka oven bičhalde. Dali sian spremno ko akava način te kere poviše e Jehovaske? (1. Kor. 9:23). Sar sluge e Jehovaskere, amen siem pottiknime sekova dive te ova darežliva, šukar hem ljubezna e javerencar. Akava anela amenge bahtalipe, mir hem zadovolstvo (Gal. 5:22, 23). Bizi razlika save tane tle okolnostija, ka ove bahtalo sa džikote trudinea tut te ove darežlivo sar o Jehova hem sian leskoro skapoceno sorabotniko! (Izr. 3:9, 10; w18.08 26, pas. 16-18).

Nekoj šaj te pučel: „Dali isi nesavi pričina jekh Devleskoro sluga te razvedinel pe hem palem te prandinel pe?“ Primetin so vakergja o Isus: „Sekoj so ka razvedinel pe tari pli romni hem ka lel javere romnja, kerela preljuba sprema i prvo. Hem ako i romni razvedinela pe taro plo rom hem palo adava lela javere rome, kerela preljuba“ (Mar. 10:11, 12; Luka 16:18). Taro akava jasno dikhaja kaj o Isus poštujnela sine o brako hem mangela sine o javera da te keren adava. Ako nesavo rom razvedinela pe tari pli verno romni hem palem khuvela ko brako, ov kerela preljuba. Isto akava važinela ako jekh romni razvedinela pe taro plo verno rom. Akava tano agjaar soske korkori o razvod na značinela krajo bašo brako. Anglo e Devleskere jakhja ola ponadari da tane „jekh telo“. O Isus isto agjaar vakergja kaj ako jekh rom razvedinela pe tari pli romni so nane krivo, anela la ki opasnost te kerel preljuba. Sar? Ko adava vreme, jekh razvedimi džuvli šaj ka valjani sine palem te khuvel ko brako taro finansiska pričine. Adalea ustvari, oj ka kerel preljuba (w18.12 11, pas. 8-9).

E Avakume sine le andruno mir adaleske so kergja lafi e Jehovaja. Adava kergja le te ovel odlučno te adžikerel ko Jehova. O Avakum povtoringja pli odlučnost keda vakergja: „Mirno ka adžikerav o dive e nevoljakoro“ (Avak. 3:16). So šaj te sikljova tari odlučnost e Avakumeskiri? Prvo, nikogaš na valjani te čhinava te molina amen e Jehovaske, bizi razlika save problemija isi amen. Dujto, valjani te šuna so vakerela amenge o Jehova preku plo Lafi hem pli organizacija. Hem trito, valjani strplivo te adžikera ko Jehova hem te ovel amen doverba kaj ka cidel amare nevolje ko plo vreme. Ako džaja palo primer e Avakumeskoro, ka ovel amen andruno mir hem ka šaj te istrajna. Amari nadež ka pomožinel amenge te ova strpliva hem bahtale, bizi razlika save problemija isi amen. Uverime siem kaj amaro Dad soj ko nebo ka kerel nešto (Rim. 12:12; w18.11 18, pas. 11-12).

Sar dikhela o Jehova ko okola so sopkinena e javeren? O Isus vakergja: „Koj so ka sopkinel jekhe taro akale tiknen so isi len vera, pošukar ka ovel leske te čhiven leske ki men jekh baro bar hem te ovel frdimo ko more“ (Mar. 9:42). Akala tane but silna lafija! Džanaja kaj o Isus razmislinela isto sar plo Dad. Adaleske šaj te ova sigurna kaj o Jehova dikhela but seriozno ko adava keda nekoj ka sopkinel jekhe taro e Isuseskere sledbenikon (Jovan 14:9). Dali dikhaja ki akaja buti isto sar o Jehova hem o Isus? So sikavena amare postapke? Na primer, šaj svidžinela pe amenge nesavo stili urajbaskoro ili doteribaskoro. Ama, so ka kera ako adava so biringjem smetinela nesavenge ko sobranie ili čak šaj te kerel nekas te ovel le nemoralna misle? Dali o mangipe sprema amare phralja ka pottikninel amen te na urava amen ili te doterina amen ko asavko način? (w18.11 29, pas. 9-10).

Važno tano sekova jekh amendar te ovel besprekorno soske o Satana krivingja e Jehova hem amen. Adava buntovno angeli ulo Satana, kaljargja e Jehovaskoro anav adalea so vakergja kaj o Devel tano lošno, sebično hem nane česno Vladeteli. Žalno tano adava so o Adam hem i Eva ule tari e Satanaskiri strana hem buningje pe protiv o Jehova (1. Moj. 3:1-6). Ki gradina Eden sine len but prilike te bajraren plo mangipe bašo Jehova. Ama ko vreme keda o Satana protivingja pe, ola na mangena sine e Jehova celo vilea. Adaleske pojavingja pe panda jekh pučibe: Dali nesavo manuš ka ačhovel verno e Jehovaske adaleske so mangela le? Javere lafencar, dali o manuša šaj te oven besprekorna? Akava pučibe sine istaknimo ko slučaj e Joveskoro (Jov 1:8-11). Ov da sine nesovršeno sar amende hem grešinela sine. Ama, o Jehova mangela le sine baši leskiri besprekornost (w19.02 3-4, pas. 6-7).

O Isus vakergja jekh sporedba bašo trgovco so rodela sine biserija. Keda arakhlja jekh skapoceno biseri, ov odma bikingja sa so sine le te šaj te kinel le. Adava biseri pretstavinela sine o čačipe bašo e Devleskoro Carstvo. Preku akaja sporedba o Isus sikavgja kobor skapoceno ka ovel o čačipe okolenge so rodena le (Mat. 13:45, 46). Keda siklilem o čačipe — o čačipe bašo e Devleskoro Carstvo hem sa o javera skapocena čačipa tari Biblija — amen da siem sine spremna te žrtvujna sa te šaj te dobina le. Sa džikote ceninaja o čačipe, nikogaš nane te „bikina“ le (Izr. 23:23). Ama, žalno tano adava so nesave Devleskere sluge čhinavgje te ceninen o čačipe, pa čak mukhle le. Na mangaja nešto asavko te slučinel pe amencar! Valjani te šuna o sovet tari Biblija te živina sprema o čačipe (3. Jov. 2-4). Akava značinela amare životoja te sikava kaj o čačipe amenge najvažno taro sa (w18.11 9, pas. 3).

O Izraelcija na valjani sine te napadinen o Erihon. Namesto adava, ola valjani sine te phiren okolu i diz o naredna šov dive po jekh puti, a o eftato dive adava valjani sine te keren le efta puti. Šaj nesave vojnikija mislinena peske sine: „Soske džabe trošinaja amaro vreme hem sila?“ Ama o Jehova, o nevidlivo Vodači e Izraelcongoro, točno džanela sine so kerela. Adava so šungje o upatstvija kergja e Izraelcongiri vera pozorali hem na valjani sine te borinen pe protiv o vojnikija taro Erihon (Is. Nav. 6:2-5). So šaj te sikljova taro akava izveštaj? Šaj ponekogaš na haljovaja celosno soske e Jehovaskiri organizacija kerela o bukja ko nesavo nevo način. Na primer, šaj ko početok pučaja amen sine dali tano šukar te koristina elektronska uredija bašo lično proučibe, ki služba ili ko sostanokija. Akana verojatno haljovaja kobor tano važno te koristina len — džangjola pe, ako isi amen prilika te kera adava. Keda dikhaja o šukar rezultatija taro asavke promene, amari vera hem amaro jekhipa ovena pozorale (w18.10 17-18, pas. 8-9).

O Evreija, hem e Isuseskere učenikija, adžikerena sine o Mesija te rešinel lengere problemija. Šaj adaleske o manuša tari Galileja mangle o Isus te ovel lengoro cari. Sigurno mislinena sine kaj ov ka ovel najšukar vodači. Ov sine najšukar govorniko, šaj sine te sasljarel e nasvalen hem šaj sine te del hajbaske e bokhalenge. Otkeda o Isus dengja hajbaske otprilika 5.000 muršenge, o narodo sine vooduševimo. O Isus halilo so mangle o manuša te keren. I Biblija vakerela: „O Isus, adaleske so džanlja kaj mangena te aven, te astaren le hem te keren le cari, palem cidingja pe ki planina te ovel korkori“ (Jovan 6:10-15). O javer dive, o manuša verojatno smiringje pe. Tegani o Isus objasningja lenge kaj na alo te zadovolinel lengere materijalna potrebe nego te sikavel len bašo e Devleskoro Carstvo. Ov vakergja lenge: „Ma keren buti bašo hajbe so našavgjovela, nego bašo hajbe so ačhovela bašo večno životo“ (Jovan 6:25-27; w18.06 4, pas. 4-5).

O Isus haljovela sine sar osetinena pe adala so sine obeshrabrime hem slaba sar „gazimi trska“ ili „fitili so isi le but hari jag“. Adaleske sine ljubezno hem strplivo lencar (Mar. 10:14). Džangjola pe, našti te haljova hem te sikava e manušen sar o Isus. Ama, amari obzirnost ka dikhjol pe taro adava sar, keda hem kobor keraja lafi e manušencar ko podračje. Milionja manuša avdive tane „mučime hem otfrlime“ taro surova hem rumime biznismenija, političarija hem verska vodačija (Mat. 9:36). Akava kerela but manuša te na verujnen nikaske hem te na ovel len nisavi nadež. Adaleske tano but važno amare lafencar hem amare glasoja te sikava lenge kaj siem ljubezna hem kaj grižinaja amen lenge. But manuša mangena te šunen amen na samo adaleske so šukar koristinaja i Biblija nego isto agjaar so iskreno interesinaja amen baši lende hem poštujnaja len (w18.09 31, pas. 13-14).

Sar šaj te sikava kaj siem svesna kaj valjani amenge o Devel? Agjaar so ka proučina i Biblija, ka šuna e Devle hem i služba e Jehovaske ka čhiva la ko prvo than ko amaro životo. Akala bukja ka pomožinen amenge te ova bahtale. Ola ka bajraren amari vera kaj panda hari ka ispolninen pe e Devleskere vetuvanja (Tit 2:13). Ako mangaja te ačhova bahtale bizi razlika so slučinela pe amenge ko životo, mora ponadari da te kera pozoralo amaro amalipe e Jehovaja. O apostol Pavle pišingja: „Sekogaš oven bahtale ko Gospodari [o Jehova]. Hem palem vakerava, oven bahtale!“ (Fil. 4:4). Ako mangaja te ova paše amala e Jehovaja, valjani te ovel amen e Devleskiri mudrost (Izr. 3:13, 18). Ama, te šaj te ačhova bahtale, but tano važno ponadari da te primenina adava so sikljovaja tari Biblija. O Isus sikavgja kobor tano važno akava keda vakergja: „Ako džanena akala bukja, bahtale sien keda kerena len“ (Jovan 13:17; Jak 1:25). Ako mangaja te ova paše e Devlea hem te ačhova bahtale mora te kera adava (w18.09 16, pas. 4-6).

O Epafras džanela sine šukar e phralen hem but mangela len sine. O Pavle bašo Epafras vakergja kaj tano leskoro „zatvorsko amal“, so značinela kaj le da sine le ple problemija (Filim. 23). Ama, ov grižinela pe sine e javerenge hem kerela sine nešto te šaj te pomožinel lenge. O Epafras molinela pe sine ple phralenge hem phenjenge, čak spomninela len sine ko anava. Adava šaj te kera amen da. Asavke molitve isi len bari sila (2. Kor. 1:11; Jak. 5:16). Razmislin kaske šaj te moline tut hem te spomnine leskoro anav ki molitva. Šaj pendžarea nesave phralen ili familien taro tlo sobranie kola so arakhljovena ko phare situacie. Nesave lendar šaj valjani te anen phare odluke ili te borinen pe nesave iskušeniencar. Šaj isto agjaar te moline tut okolenge so mulo lendar nekoj paše, okolenge so sigende doživingje prirodno katastrofa ili vojna, ili okolenge so isi len finansiska problemija. Isi but phralja hem phenja kolenge so valjanena amare molitve! (w18.09 5, pas. 12-13).

Keda vakergja akala lafija o Isus ov na mislingja samo ko dejbe materijalna bukja. Šaj isto agjaar e manušenge te da ohrabruvanje, sovetija tari Biblija hem praktično pomoš (Dela 20:31-35). Ple lafencar hem postapkencar, o Pavle sikavgja amenge kobor tano važno darežlivo te sikava mangipe hem vnimanie e javerenge hem spremno te da amaro vreme hem sila baši lende. Adala so istražinena sar ponašinena pe o manuša isto agjaar ale dži ko zaklučok kaj o dejbe kerela e manušen bahtale. Sprema jekh naučno statija, o manuša vakerena kaj osetinena pe but pobahtale keda kerena šukar bukja bašo javera. O istražuvačija vakerena kaj keda pomožinaja e javerenge, amaro životo isi le smisla hem cel. Adaleske, ola but puti dena predlog o manuša te učestvujnen ki nesavi dobrovolno aktivnost soske agjaar ka oven posaste hem pobahtale. Ni hari na siem iznenadime so ale dži ko asavko zaklučok, soske amaro Stvoriteli so grižinela pe amenge, o Jehova, panda but angleder vakergja kaj o dejbe kerela amen bahtale (2. Tim. 3:16, 17; w18.08 19, pas. 17-18).

O proroštvo so vakergja o Isaija bašo Isus Hristos ohrabrinela amen hem dela amen nadež. O Isaija prorokujngja kaj o Isus „nane te sudinel sprema adava so dikhela, ni nane te del sovet sprema adava so šunela“ hem kaj „pravedno ka sudinel e čorolenge“ (Isa. 11:3, 4). Soske ohrabrinela amen akava? Adaleske so živinaja ko sveto kote so isi but predrasude hem o manuša kerena peske mislenje bašo javera sprema adava so dikhena. Čače valjani amenge sovršeno Sudija, o Isus, kova so nikogaš nane te sudinel amen sprema adava sar izgledinaja! Sekova dive keraja amenge mislenje bašo javera. Ama amen na siem sovršena sar o Isus, adaleske našti sovršeno te procenina e javeren. But puti upri amende vlijajnela adava so šaj te dikha. Ama, o Isus dengja amen zapoved te na sudina „sprema adava so dikhjola pe avrijaldan“, nego te sudina „pravedno“. Sprema akava, o Isus mangela te ova sar leste hem te na sudina e manušenge sprema adava sar izgledinena (w18.08 9, pas. 1-2).

Točno, na šunaja leskoro glaso direktno taro nebo. Ama, ov dengja plo Lafi, i Biblija, hem preku late sikavela amen. Isto agjaar, e Jehovaskoro duho pomožinela e verno hem razborito upravitele te del amenge duhovno hrana (Luka 12:42). Razmislin kobor but duhovno hrana dobinaja avdive — publikacie, statie ki amari internet-stranica, videoklipija hem audiosnimke taro amare publikacie. E Devleskoro Lafi uverinela amen kaj e Devle isi le kontrola upro bukja hem kaj ov ka popravinel sekoja šteta koja so o Satana hem akava sveto kergje la leskere slugenge. Adaleske, te ova odlučna šukar te šuna e Jehovaskoro glaso. Agjaar uspešno ka istrajna ko problemija so isi amen avdive hem ka ova spremna bašo adava so adžikerela amen ki idnina. I Biblija uverinela amen: „Valjani tumenge istrajnost, te šaj otkeda ka keren e Devleskiri volja, te dobinen adava soj vetimo“ (Evr. 10:36; w19.03 13, pas. 17-18).

O Mojsej vodinela sine e Izraelcon but vreme, adaleske o Isus Navin šaj pučela pe sine dali o narodo ka prifatinel le sar vodači (5. Moj. 34:8, 10-12). Jekh biblisko priračniko bašo Isus Navin 1:1, 2 pišinela: „Hem ko purano vreme hem avdive, najnesigurno hem najpharo vreme jekhe narodoske tano keda avela nevo vodači“. E Isus Navine sine le šukar pričine te sekirinel pe. Ama, sine le doverba ko Jehova hem odma postapingja sprema leskere upatstvija (Is. Nav. 1:9-11). Adaleske, o Jehova dengja le bereketi hem bičhalgja angeli te vodinel le hem e Izraelcon. Akava angeli najverojatno sine o Lafi — e Devleskoro prvobijamo Čhavo (2. Moj. 23:20-23; Jovan 1:1). O Jehova pomožingja e Izraelconge sigate te prilagodinen pe ki promena keda o Isus Navin ulo lengoro nevo vodači (w18.10 16-17, pas. 1-4).

O Jehova pendžarela okolen so spremno služinena leske hem pišinela lengere anava ko plo „lil e setibaskoro“. Ako mangaja amare anava te ačhoven pišime ko leskoro „lil e setibaskoro“, valjani te kera nešto. O Malahija vakergja kaj valjani te dara taro Jehova hem te razmislina bašo leskoro anav. Ako obožavinaja nekas javere, amaro anav ka ovel brišimo taro simbolično lil e životoskoro (2. Moj. 32:33; Otk. 3:5). Znači, nane dovolno samo te da lafi kaj ka kera e Jehovaskiri volja hem te krstina amen. Adava keraja le samo jekh puti, ama e Jehovaske služinaja sekogaš, celo životo. Sekova dive, sa džikote siem dživde, amare postapkencar valjani te sikava kaj siem poslušna e Jehovaske (1. Pet. 4:1, 2; w18.07 22-23, pas. 7-9).

Na ovaja zrela hristijanja samo adaleske so siem ko čačipe but berša. Mora te trudina amen te ova zrela. Valjani sa poviše te pendžara hem te haljova e Devleskoro Lafi. Adaleske valjani sekova dive te čitina i Biblija (Ps. 1:1-3). Keda keraja adava sekova dive, pošukar ka haljova e Jehovaskere zakonija hem načelija. Kova tano o najvažno zakoni e čačutne hristijanenge? Adava tano o zakoni e mangipaskoro. O Isus vakergja ple učenikonge: „Taro adava sarine ka džanen kaj sien mle učenikija, ako isi tumen mangipe maškar tumende“ (Jovan 13:35). Ki Biblija pišinela kaj o mangipe tano „carsko zakoni“ hem kaj ov „ispolninela o zakoni“ (Jak. 2:8; Rim. 13:10). Na siem iznenadime so o mangipe tano doborom važno, adaleske so ki Biblija pišinela kaj „o Devel tano mangipe“ (1. Jov. 4:8; w18.06 19, pas. 14-15).

Iako o Izraelcija buningje pe protiv o Jehova, o Mojsej sine adava so holjangja. Adaleske so na sine le samokontrola ki adaja situacija, vakergja nesave bukja bizo te razmislinel bašo posledice. O Mojsej čhinavgja te dikhel ko Jehova adaleske so mukhlja e javerengere postapke te len leskoro vnimanie. O prvo puti keda o narodo žalingja pe bašo pani, o Mojsej kergja adava soj ispravno (2. Moj. 7:6). Ama, ov šaj umoringja pe hem našavgja pli strplivost adaleske so o Izraelcija but berša sine buntovna. Ki akaja prilika šaj o Mojsej razmislinela sine samo bašo ple čuvstvija, namesto te dikhel sar te del i falba e Jehovaske. Ako o Mojsej, kova so sine verno proroko, mukhlja te ovel cidimo leskoro vnimanie hem grešingja, i isto buti šaj te slučinel pe amenge da. O Mojsej panda hari valjani sine te khuvel ki Vetimi phuv. Amen da siem but paše ko nevo sveto (2. Pet. 3:13). Sigurno nikoj amendar na mangela te našavel i prilika te khuvel ko nevo sveto. Ama, te šaj te khuva ko nevo sveto, mora ponadari da te dikha ko Jehova hem sekogaš te ova leske poslušna (1. Jov. 2:17; w18.07 12-13, pas. 14-16).

O Satana našti silaja te čhivel e manušen te keren nešto so na mangena (Jak. 1:14). But džene ko sveto ni na džanena kaj tane tari e Satanaskiri strana. Ama, keda nekoj ka šunel bašo čačipe valjani te birinel dali ka ovel tari e Jehovaskiri ili tari e Satanaskiri strana (Dela 3:17; 17:30). Ako siem odlučna te ova poslušna e Jehovaske, o Satana našti te kerel te na ova verna e Jehovaske (Jov 2:3; 27:5). Isi javera da bukja kola so o Satana hem o demonija našti te keren. Na primer, i Biblija nikogaš na vakerela kaj ola šaj te čitinen amare misle hem amaro vilo. Adava šaj te keren samo o Jehova hem o Isus (1. Sam. 16:7; Mar. 2:8). Ako daja amendar sa te kera lafi hem te postapina sar so mangela o Jehova, šaj te ova sigurna kaj o Jehova nane te mukhel o Beng te kerel amenge trajno šteta (Ps. 34:7). Valjani te pendžara amare dušmane, ama na valjani preterano te dara lestar. Iako siem nesovršena, šaj te pobedina e Satana adaleske so pomožinela amenge o Jehova! (Jak. 4:7; 1. Pet. 5:9; w18.05 20, pas. 15-17).

Zamislin tuke kaj planirinea te dža ko jekh posebno nastan ko nesavo dur than. Te šaj te rese dži adari, valjani te dža avtobusea. Ki avtobusko stanica isi but avtobusija. Valjani te ukle ko avtobusi so ka ingarel tut ko than kote so mangea te dža. Nane te ukle ko bilo savo avtobusi soske džanea kaj agjaar ka rese ko pogrešno than. O terne tane ki slično situacija soske o životo tano sar jekh patuvanje, ama na avtobusea. Ponekogaš ko životo isi but bukja so šaj te birinen, a adava šaj te buninel tumen. Ama, ako točno džanena kote mangena te džan, ka ovel tumenge polokho te anen o ispravna odluke. Ternalen, dali ko prvo than ko tumaro životo čhivena e Jehova? Akava značinela te šunen e Jehovaskoro sovet ko sa o odluke so valjani te anen len ko tumaro životo, sar na primer savi škola ka završinen, so buti ka keren, ili dali ka khuven ko brako hem ka ovel tumen čhave. Isto agjaar, značinela te trudinen tumen te ispolninen o duhovna celija, a adala tane celija so ka keren tumen popaše e Jehovaja. Ako tumenge najvažno te služinen e Jehovaske, šaj te oven sigurna kaj ov ka del tumen bereketija hem ka pomožinel tumenge te uspejnen (w18.04 27, pas. 1-3).

O Jeftaj ačhilo ple lafeste hem bičhalgja ple čhaja te služinel ko sveto šatori dži ko krajo taro lakoro životo (Sud. 11:30-35). Iako e Jeftajeske sine pharo, leskere čhajake sigurno sine panda popharo. Ama, oj spremno kergja adava so vetingja lakoro dad (Sud. 11:36, 37). Akava značingja kaj nikogaš nane te ovel ko brako ili te oven la čhave, hem nane te ovel prodolžimi e Jeftajeskiri familijarno loza. But valjangja lake uteha hem ohrabruvanje. I Biblija vakerela: „Ottegani ko Izrael ulo običaj sekova berš, štar dive ko berš, o čhaja taro Izrael te džan hem te ohrabrinen e Jeftajeskere čhaja, o Galadco“ (Sud. 11:39, 40). Lakoro primer setinkerela amen ko e Devleskere sluge avdive kola so nane ko brako adaleske so mangena te keren poviše ki služba bašo Jehova. Na zaslužinena li ola da te falina len hem te ohrabrina len? (1. Kor. 7:32-35; w18.04 17, pas. 10-11).

But angelija gele tari e Satanaskiri strana hem buningje pe protiv o Devel. Angleder o Potop, nesave lendar pele ko iskušenie e Satanaskoro te oven len seksualna odnosija džuvlencar. I Biblija opišinela akava ko simbolično način keda vakerela kaj o ažderi lelja pea jekh tretina taro zvezde (1. Moj. 6:1-4; Otk. 12:3, 4). Keda mukhle e Devleskere familija, ola biringje o Satana te kontrolirinel len. Na valjani te mislina kaj akala buntovnikija tane grupa so nane organizirimi. Ko nevidlivo duhovno sveto, o Satana kergja peske vlada koja so imitirinela e Devleskoro Carstvo. Ov korkori pes kergja pe cari hem organiziringja e demonen, dengja lenge mokj hem kergja len svetska vladetelija (Ef. 6:12). O Satana koristinela pli organizacija te kontrolirinel o manušikane vlade (w18.05 16, pas. 5-6).

Ponekogaš o Devel sikavela amenge plo mangipe agjaar so popravinela amen keda grešinaja, isto sar so kerela jekh dad. O David but ceninela sine o sovetija so avena sine taro Jehova. Ov hor razmislingja bašo adava sar o Jehova dikhela ko bukja hem trudinela pe sine te razmislinel sar leste. O David mukhlja e Devleskere misle te oblikujnel le te šaj te ovel pošukar manuš. Ako tu da kerea adava, ka mange poviše e Devle hem ka ovel tut pobari želba te ove leske poslušno. Isto agjaar, ka ove duhovno zrelo hristijani. Jekh phen, koja so vikinela pe Kristin, vakergja: „Keda istražinava hem keda razmislinava bašo adava so čitingjum, isi man čuvstvo kaj o Jehova adava pišingja le baš mange!“ Ako sian duhovno zrelo ličnost, tu ka dikhe ko sveto hem ki leskiri idnina agjaar sar so dikhela o Devel. O Jehova ka del tuke asavki mudrost hem sposobnost te procenine o bukja. Soske? Ov mangela tu te džane soj tano najvažno ko životo, te ane mudra odluke hem te na dara taro adava so ka anel tuke i idnina! (Isa. 26:3; w18.12 23, pas. 9-10).