Januari

E Timoteeskiri vera temelinela pe sine ko faktija kola so pomožingje leske te ovel popaše e Jehovaja. Keda proučinea i Biblija, tu da mora korkori logično te razmisline hem te ane zaklučok bašo adava so sikljovea bašo Devel. Najangle, valjani te uverine tut ko najhari trin osnovna čačipa. Prvo, valjani te uverine tut kaj o Jehova stvoringja sa (2. Moj. 3:14, 15; Evr. 3:4; Otk. 4:11). Dujto, mora te dokažine tuke kaj i Biblija tani haberi taro Devel bašo manuša (2. Tim. 3:16, 17). Hem trito, valjani te ove sigurno kaj e Jehova isi le organizirimo narodo kova so slavinela le agjaar soj vodimo taro Hristos, hem kaj adava narodo tane e Jehovaskere svedokija (Isa. 43:10-12; Jovan 14:6; Dela 15:14). Na rodela pe tutar te džane sekova detali baši Biblija. Tli cel keda proučinea valjani te ovel te koristine tli godi te šaj panda poviše te uverine tut kaj isi tut o čačipe (Rim. 12:1; w20.07 10, pas. 8-9).

Ko akava proroštvo kerela pe lafi bašo baro broj skakulcija kolen so isi manušikano muj hem phiravena „nešto sar zlatna krune“ ko šere (Otk. 9:7). Ko periodi taro pandž masek — kobor so prosečno živinela jekh skakulco — ola mučinena e „manušen [e Devleskere dušmanen] kolen so nane len e Devleskoro pečati ko pumaro čekat“ (Otk. 9:4). Akava but šukar opišinela e Jehovaskere pomazime slugen. Ola hrabro objavinena e Devleskere osude protiv akava lošno sveto, a adava ni hari na kerela te osetinen pe šukar okola so poddržinena le. Akava značinela kaj o skakulcija soj opišimo ko Joil 2:7-9 nane o ista skakulcija soj spomnime ko lil Otkrovenie. Ki Biblija, nesave simbole ponekogaš isi le različno značenje keda tano koristimo ko različno način. Na primer, ko Otkrovenie 5:5 bašo Isus vakerela pe „o lavi taro e Judaskoro pleme“, a ko 1. Petrovo 5:8 o Beng tano opišimo sar „lavi so vikinela keda tano bokhalo“ (w20.04 3, pas. 8; 5, pas. 10).

I Agara, e Sarajakiri sluginka, počmingja te postapinel nerazumno otkeda uli e Avraameskiri romni. Keda ačhili khamni počmingja te dikhel sar potele pestar e Saraja, kola so na sine la čhave. I situacija uli doborom lošno so čak i Agara našlja, adaleske so i Saraja počmingja te ponižinel la (1. Moj. 16:4-6). Sar nesovršena manuša šaj but sigate te mislina kaj i Agara sine jekh zlobno džuvli koja so dobingja adava so zaslužingja. Ama, o Jehova na dikhlja ki late agjaar. Ov bičhalgja lake angeli. Keda arakhlja la, o angeli pomožingja lake te meninel plo stavi hem dengja la bereketi. I Agara halili kaj o Jehova celo vreme dikhela la sine hem kaj tano svesno so slučinela pe lake. Oj vakergja leske: „Tu sian Devel so dikhela... okova so dikhela man“ (1. Moj. 16:7-13). So dikhlja o Jehova ki Agara? Ov sine svesno bašo adava kotar avela hem džanela sine sa so nakhlja. Iako o Jehova na opravdingja adava so i Agara na poštujnela sine e Saraja, šaj te ova sigurna kaj lelja ko predvid lakoro poteklo hem lakere okolnostija (w20.04 16, pas. 8-9).

O apostol Pavle vakergja kaj sa o čačutne hristijanja prastana ki jekh trka (Evr. 12:1). Sarine amen, bizi razlika dali siem terne ili phure, silna ili umorna, mora te istrajna dži ko krajo ako mangaja te dobina i nagrada so vetingja amenge o Jehova (Mat. 24:13). O Pavle šaj sine te del sovet e hristijanenge istrajno te prastan ki adaja trka, adaleske so korkori ov uspejngja te završinel la (2. Tim. 4:7, 8). Ama, soj tani ustvari i trka baši koja so kergja lafi o Pavle? O Pavle ponekogaš pišinela sine bašo bukja so kerena pe sine ko trke ki purani Grcija te šaj te sikavel važna pouke (1. Kor. 9:25-27; 2. Tim. 2:5). Ko nekobor prilike, ov sporedingja e hristijanengoro životo trkaja (1. Kor. 9:24; Gal. 2:2; Fil. 2:16). Amen khuvaja ki akaja „trka“ keda daja lafi e Jehovaske kaj ka služina leske hem ka krstina amen (1. Pet. 3:21). A ka resa dži ki cel keda ov ka del amen i nagrada — večno životo (Mat. 25:31-34, 46; 2. Tim. 4:8; w20.04 26, pas. 1-3).

„O Gospodari tano verno hem ov ka del tumen sila hem ka zaštitinel tumen taro okova soj Lošno“ (2. Sol. 3:3). Sar zaštitinela amen o Jehova? O Jehova dengja amen jekh voeno oprema koja so šaj te zaštitinel amen taro e Satanaskere napadija (Ef. 6:13-17). Akaja duhovno voeno oprema šaj celosno te zaštitinel amen. Ama, ka zaštitinel amen samo ako ponadari da uravaja sekova delo tari oprema. Na primer, o pojas e čačipaskoro pretstavinela o čačipa so arakhljovena ko e Devleskoro Lafi, ki Biblija. Soske valjani te phanda amen adava pojas? Te šaj te zaštitina amen taro Satana kova soj tano „o dad e hovajbaskoro“ (Jovan 8:44). Ov više milje berša hovavela hem „zavedinela celo sveto“ (Otk. 12:9). Ama, o čačipa so arakhljovena ki Biblija zaštitinena amen hem na mukhena te ova zavedime. Sar phiravaja adava simbolično pojas? Amen keraja adava agjaar so sikljovaja o čačipa bašo Jehova, agjaar so obožavinaja le duhoja hem čačipaja hem agjaar so mangaja ko sa te ova poštena (Jovan 4:24; Ef. 4:25; Evr. 13:18; w21.03 26-27, pas. 3-5).

Adaja phuv sine posebno adaleske so o narodo kova so živinela sine ki late služinela sine e čačutne Devleske, e Jehovaske. Taro 33 berš a.e., adaja „phuv“ nane više nesavo posebno than ki Phuv. Akava tano logično adaleske so e Jehovaskere sluge živinena ki celi Phuv. Avdive „i Šuži phuv“ tani o duhovno raj kote soj vklučime amare sostanokija hem o propovedibe preku kola so slavinaja e Jehova. Džikote trajnena o posledna dive, o severno cari but puti khuvgja ki „Šuži phuv“. Na primer, keda i nacističko Germanija sine o severno cari, posebno ki Dujto svetsko vojna, adava cari khuvgja ki „Šuži phuv“ agjaar so progoningja hem mudargja e Devleskere slugen. Pali Dujto svetsko vojna, keda o Sovetsko Sojuz ulo severno cari, ov da khuvgja ki „Šuži phuv“ agjaar so progoninela sine e Devleskere narodo hem silaja paldingja len dur taro lengere khera (w20.05 13, pas. 7-8).

Razmislin bašo nesave manuša so sine e Devleske amala panda angleder te merel o Isus. O Avraam sine manuš kole so sine le but bari vera. Poviše taro 1.000 berša palo leskoro meribe, o Jehova baši leste vakergja kaj tano leskoro amal (Isa. 41:8). Akava sikavela kaj ni o meribe našti te odvojnel e Jehova taro leskere paše amala. Ko e Devleskere misle, o Avraam tano dživdo (Luka 20:37, 38). Javer primer tano o Jov. Ki jekh prilika, keda sa o angelija sine khedime ko nebo, o Jehova sikavgja kaj isi le doverba ko plo sluga o Jov. Ov vakergja kaj o Jov tano „pravedno manuš hem bizi maana, kova so darala e Devlestar hem cidela pe taro lošnipe“ (Jov 1:6-8). A so mislinela sine o Jehova bašo Daniel, kova so verno služingja leske okolu 80 berš ki pagansko phuv? Ov trin puti bičhalgja angeli kova so uveringja leskere phure sluga kaj tano „e Devleskoro manglo manuš“ (Dan. 9:23; 10:11, 19). Šaj te ova sigurna kaj o Devel edvaj adžikerela te avel o dive keda ka vazdel ple mangle amalen kola so mule (Jov 14:15; w20.05 27, pas. 3-4).

Nekoj šaj šukar te pendžarel e Jehovaskere zakonija, pa čak hem but te ceninel len. Ama, dali ka šunel e Jehova adaleske so mangela le? Setin tut kaj i Eva džanela sine e Devleskoro zakoni, ama na sine la čačutno mangipe sprema o Devel. Isto slučaj sine e Adamea (1. Moj. 3:1-6). Sprema adava, nane dovolno te sikava e javeren samo bašo adava so rodela lendar o Devel hem bašo leskere pravedna merilija. Adava so rodela amendar o Jehova hem leskere merilija tane sekogaš bašo amaro šukaripe (Ps. 119:97, 111, 112). Ama, ako o interesentija na haljovena kaj o Jehova dengja o zakonija hem o merilija adaleske so mangela amen, šaj nane te dikhen agjaar ki lende. Adaleske, šaj te puča len: „So mislinea, soske o Devel rodela leskere sluge te keren akava? Ili, soske vakerela te na keren adava? So sikavela amenge akava baši leste?“ Ako pomožinaja e interesentenge te razmislinen bašo Jehova hem te ovel len iskreno cenenje bašo leskoro baro anav, najverojatno o čačipe ka khuvel lenge ko vilo. Agjaar ka zamangen na samo o zakonija nego e Devle da. Adava ka pomožinel lenge te bajroven ki vera hem ka del len sila te izdržinen o phare ispitija kola so ka oven len (1. Kor. 3:12-15; w20.06 10, pas. 10-​11).

Mora te ova strpliva adaleske so valjani vreme te šaj nekoj te sasljol ko duhovno pogled. But džene so sine neaktivna priznajnena kaj palem počmingje te služinen e Jehovaske čak otkeda o starešine hem o javera taro sobranie but puti posetingje len. I Nensi, jekh phen tari Jugoistočno Azija, pišingja: „But pomožingja man jekh paše amalin taro sobranie. Mangela man sine sar pli pobari phen. But puti vakerela mange sine bašo šuže momentija so nakhlem len zaedno. Strplivo šunela man sine džikote vakerava sine sar osetinava man, hem na mislinela pe sine dali te del man sovet. Sikavgja mange kaj tani čače amalin, spremno te pomožinel mange ko sekova vreme“. O sočuvstvo tano sar iljači ki rana. Ov šaj te sasljarel o povredime čuvstvija. Nesave neaktivna phralja hem phenja, kola so angleder but berša sine dukhavde nekastar taro sobranie, panda tane holjame bašo adava. Asavke čuvstvija šaj te oven posilna tari želba te iranen pe ko Jehova. Nesave šaj mislinena kaj postapingja pe lencar nepravedno. Sigurno but ka značinel lenge ako nekoj šunela len hem sikavela lenge kaj haljovela sar osetinena pe (w20.06 26, pas. 10-​11).

Keda sekova puti sprotivstavinea tut e iskušenienge, sar so nakhela o vreme polokho ovela te kere adava soj ispravno. Osven adava, ma bistre kaj o Satana tano adava so bešela palo rumimo stavi so isi e sveto bašo seksualna odnosija. Adaleske, keda odbinea te pere ko pritisok, tu pobedinea e Lošno Amen priznajnaja kaj o Jehova tano adava kole so isi pravo te odlučinel soj ispravno a soj pogrešno. Hem daja sa amendar te šaj te na kera grevo. Ama, ako slučinela pe te grešina, amen priznajnaja adava e Jehovaske ki molitva (1. Jov. 1:9). A ako keraja pharo grevo, rodaja pomoš taro starešine kolen so o Devel čhivgja len te grižinen pe amenge (Jak. 5:14-16). Sepak, na valjani te mukha ponadari da te mučinen amen o greške so kergjem len angleder. Soske? Adaleske so amaro Dad kova so grižinela pe amenge dengja ple Čhave sar otkupno žrtva te šaj te oven prostime amare grevija. Keda vakerela kaj ka prostinel okolenge so kainena pe bašo ple grevija, o Jehova čače mislinela adava. Znači, nane ništo so šaj te čhinavel amen te služina leske hem te ovel amen čisto sovest (1. Jov. 2:1, 2, 12; 3:19, 20; w20.07 22-23, pas. 9-10).

Angleder te počminel te stvorinel, o Jehova sine korkori. Ama adava na kergja te osetinel pe tažno. Leske na sine potrebno nikoj te šaj te ovel bahtalo. Sepak, o Devel manglja javera da te živinen hem te oven bahtale. Pottiknimo taro mangipe, o Jehova počmingja te stvorinel (1. Jov. 4:19). Najprvo, o Jehova stvoringja ple Čhave, e Isuse. Palo adava, zaedno ple čhavea, o Jehova stvoringja sa o javera bukja, sar na primer e angelen (Kol. 1:16). O Isus sine but bahtalo so šaj sine te kerel buti ple Dadea (Izr. 8:30). O angelija da sine bahtale. Ola sine adathe keda o Jehova hem leskoro Vešto Graditeli, o Isus, kergje o nebo hem i Phuv. Sar o angelija sikavgje kaj tane bahtale? Ola glasno slavingje e Jehova adaleske so kergja i Phuv, hem prodolžingje te slavinen le keda dikhle sa o javera bukja so kergja, a posebno e manušen (Jov 38:7; Izr. 8:31). Sa adava so stvoringja o Jehova sikavela leskoro mangipe hem leskiri mudrost (Ps. 104:24; Rim. 1:20; w20.08 14, pas. 1-2).

O Jehova kergja amen te manga hem te ova mangle. Adaleske keda nekoj mrzinela amen, osetinaja amen but lošno hem šaj čak daraja. Jekh phral pišinela: „Darandiljum hem osetingjum man ponižimo keda o vojnikija počmingje te khuven man, te vredžinen man hem te zakaninen pe mange adaleske so sium e Jehovaskoro svedoko“. Asavki omraza povredinela amen, ama na siem iznenadime. O Isus vakergja kaj o manuša ka mrzinen amen. Soske o sveto mrzinela e Isuseskere sledbenikon? Adaleske so isto sar o Isus, amen da na siem delo taro sveto (Jovan 15:17-19). Iako sikavaja poštovanje sprema o manušikane vlade, amen odbinaja te obožavina lende hem o simbolija so pretstavinena len. Amen obožavinaja samo e Jehova hem poddržinaja e Devleskoro pravo te vladinel upro manuša — pravo kova so o Satana hem leskoro potomstvo na priznajnena le (1. Moj. 3:1-5, 15). Amen propovedinaja kaj samo e Devleskoro Carstvo ka rešinel o manušikane problemija hem kaj adava Carstvo panda hari ka uništinel sa okolen so protivinena pe leske (Dan. 2:44; Otk. 19:19-21). Akava tano šukar haberi e krotka manušenge, ama lošno haberi okolenge soj lošna (w21.03 20, pas. 1-2).

O Jehova sikavela kaj ceninela e phenjen agjaar so dela len važno uloga ko sobranie. Ola sine pofalime baši lengiri mudrost, vera, revnost, hrabrost, darežlivost hem bašo lengere šukar bukja so kerena (Luka 8:2, 3; Dela 16:14, 15; Rim. 16:3, 6; Fil. 4:3; Evr. 11:11, 31, 35). Isto agjaar siem but bahtale so isi amen pophure ko sobranie. But džene taro akala pophure phralja hem phenja borinena pe različno nasvalipaja so anela o phuripe. Ama ola dena pestar sa te šaj te propovedinen hem trudinena pe te ohrabrinen hem te obučinen e javeren! Amen šaj but te sikljova lendar. Ola tane but šuže anglo e Jehovaskere hem amare jakhja (Izr. 16:31). Razmislin bašo amare terne da. Len isi len but problemija adaleske so bajrona ko akava sveto kote so vladinela o Satana o Beng hem kote so vlijajnena leskere rumime idee. Ama, amen siem but ohrabrime keda dikhaja sar amare terne komentirinena ko sostanokija, džana ki služba hem hrabro braninena pumare veruvanja. Ternalen, tumen isi tumen važno than ko e Jehovaskoro sobranie! (Ps. 8:2; w20.08 21-​22, pas. 9-​11).

Keda počminaja te propovedina hem te vakera kaj siem e Jehovaskere svedokija, šaj amari familija ka protivinel pe amenge, amare najpaše ka asan amenge hem o manuša nane te mangen te šunen adava so propovedinaja. Sar šaj te ove pohrabro? Prvo, mora te uverine tut kaj o Isus taro nebo vodinela o propovedibe (Jovan 16:33; Otk. 14:14-16). Javer buti, bajrar tli vera ko e Jehovaskoro vetuvanje kaj ka grižinel pe tuke (Mat. 6:32-34). Kobor pozorali kerea tli vera, doborom pohrabro ovea. Tu sikavgjan bari vera keda vakergjan tle najpašenge hem tle familijake kaj počmingjan te proučine i Biblija e Jehovaskere svedokoncar hem te dža ko lengere sostanokija! Sigurno kergjan bare promene ko tlo način sar ponašinea tut hem sar živinea te šaj te ikere e Jehovaskere pravedna merilija. Adaleske valjangja tuke vera hem hrabrost. Džikote ponadari da ovea hrabro, tu šaj te ove sigurno kaj „tuja tano o Jehova, tlo Devel, bilo kote te dža“ (Is. Nav. 1:7-9; w20.09 5, pas. 11-​12).

O cari o Asa dengja amen but šužo primer. Ov postapingja mudro agjaar so sine le celosno doverba ko Jehova. Ov služingja e Jehovaske hem ko pharo vreme hem keda sa sine mirno. Ko e Devleskoro Lafi pišinela: „O Asa služingja verno samo e Devleske celo vilea“ (1. Car. 15:14). O Asa sikavgja kaj služinela e Devleske agjaar so cidingja o idolopoklonstvo tari Juda. Baši leste i Biblija vakerela: „Ov cidingja o žrtvenikija taro tugja devela hem o uče thana obožavibaske, phaglja o sveta stubija hem čhingja o sveta direkija“ (2. Let. 14:3, 5). O Asa, isto agjaar cidingja ple baba e Maaha tari bari položba so sine la ko carstvo. Soske? Adaleske so pottikninela sine e narodo te klanjinel pe jekhe idoleske (1. Car. 15:11-13). Osven so cidingja o idolija e hovavne devlengere, o Asa kergja nešto poviše. Ov pomožingja e narodoske tari Juda palem te služinel e Jehovaske ko ispravno način. Adaleske o Devel dengja len mir. I Biblija vakerela kaj, ko periodi taro deš berš džikote vladinela sine o Asa, ki phuv sine mir (2. Let. 14:1, 4, 6; w20.09 14-15, pas. 2-3).

Sigurno nekogaš dengjem nekaske nesave vredna bukja te šaj te arakhel len amenge. Na primer, nekoj so džala nesavo vreme ki javer phuv, ponekogaš mukhela plo kher te arakhel le nesavo amal ili nekoj tari familija. Najčesto adava kerela le soske mislinela kaj adava amal ili familija šukar ka grižinel pe bašo kher. O apostol Pavle setinkergja e Timotee kaj leske tano dendo nešto soj but skapoceno — sine leske vakerdi e Devleskiri namera e manušencar. Osven adava, sine leske dendi i čest te propovedinel e Devleskoro lafi, ili o šukar haberi (2. Tim. 4:2, 5). O Pavle pottikningja e Timotee te arakhel adava soj leske dendo. Isto sar o Timotej, amenge da tano dendo nešto soj tano skapoceno. O Jehova pomožingja amenge te haljova o čačipa taro leskoro Lafi, i Biblija. Akala čačipa tane skapocena soske pomožinena amenge te ovel amen šukar odnos e Jehovaja hem vakerena sar šaj te ova čače bahtale. Keda prifatinaja akala čačipa hem živinaja sprema lende, oslobodime siem taro hovavne sikljojba hem šaj te ova moralno čista (1. Kor. 6:9-11; w20.09 26, pas. 1-3).

O interesenti valjani te dikhel kaj mangea o čačipa tari Biblija hem kaj verujnea ki lende Tegani leske da ka ovel pointeresno adava so sikljola. Ko nesave prilike šaj te vakere leske nesave konkretna bibliska načelija so pomožingje lično tuke. Agjaar ka haljol kaj ki Biblija isi praktična sovetija so šaj te pomožinen leske da. Džikote proučinea e interesentea vaker leske bašo nesave phralja hem phenja so sine len slična problemija sar leskere hem uspejngje te nakhaven len. Keda džaja ki leste šaj te le tuja nekas taro sobranie so ka vakerel leske sar i Biblija pomožingja leske lično. Pomožine e interesenteske te haljol kobor tano mudro te primeninel o bibliska načelija ko plo životo. Ako o interesenti tano ko brako, dali leskoro bračno partneri isto agjaar proučinela i Biblija? Ako na, vaker e bračno partnereske kaj ov da šaj te bešel tumencar keda proučinena. Ohrabrin e interesente te vakerel ple familijake ili amalenge adava so sikljola (Jovan 1:40-45; w20.10 16, pas. 7-9).

O Josif hem i Marija pomožingje e Isuseske te ovel le e Devleskiri milost soske šungje o sovetija so dengja o Jehova e roditelenge (5. Moj. 6:6, 7). Ola but mangle e Jehova, hem najvažno sine lenge te pomožinen pumare čhavenge da te ovel len asavko mangipe. O Josif hem i Marija čhivgje o duhovna bukja ko prvo than. Sigurno, ola sekova kurko džana sine ki sinagoga ko Nazaret, a sekova berš baši Pasha džana sine ko Erusalim (Luka 2:41; 4:16). Šaj džikote sine ko drumo ola koristinena sine o vreme te sikaven e Isuse hem e javere čhaven baši istorija e Jehovaskere narodoskiri, hem džikote patujnena sine šaj nakhena sine taro thana soj spomnime ko Spisija. Džikote i familija bajrola sine, sigurno na sine lenge lokho redovno te keren akava. Ama, o Jehova nagradingja len bašo lengoro trudo. Adaleske so o duhovna bukja sine lenge najvažna, sarine ki familija sine paše e Jehovaja (w20.10 28, pas. 8-9).

Ako sian kanimo te ove prisutno ko jekh biblisko kursi, ka ovel šukar ako angleder spreminea tut baši i tema so ka kerel pe lafi. O David, jekh specijalno pioneri, vakerela: „Ceninava keda mlo partneri soj mancar ki služba spreminela pe bašo kursi, tegani šaj te vakerel nešto soj korisno“. Osven adava, o interesenti verojatno ka primetinel kaj solduj džene sien šukar spremime hem adava ka ovel leske šukar primer. Čak ako na uspejnea temelno te spremine tut bašo materijali, šukar ka ovel te odvojne tuke vreme te dikhe o glavna misle tari tema. I molitva tani jekh važno delo ko jekh biblisko kursi. Adaleske, ako sian zamolimo te moline tut razmislin angleder so ka vakere. Tegani ka džane so te vklučine ko tle molitve (Ps. 141:2). I Hana, tari Japonija, setinela pe ko molitve jekhe phenjakere so prisustvujngja ko biblisko kursi džikote oj sine interesentka. Oj vakerela: „Primetingjum kaj oj sine but paše e Jehovaja hem me da mangljum te ovav sar late. Isto agjaar, osetingjum kaj mangela man keda spomningja mlo anav ko molitve“ (w21.03 9-10, pas. 7-8).

O Isus uveringja e apostol Pavle kaj ka resel ko Rim. Ama, nesave Evreija ko Erusalim planiringje te napadinen e Pavle hem te mudaren le. Keda o rimsko voeno zapovedniko o Klavdij Lisij doznajngja bašo lengoro plani, pomožingja e Pavleske. Sigate, o Klavdij dengja naredba jekhe grupa vojnikonge te zaštitinen e Pavle hem te ingarel le ki Cezareja. Adari, o upraviteli o Feliks dengja naredba te garaven e Pavle ki e Irodeskiri carsko palata. O Evreija so mangle te mudaren le adathe, našti sine te astaren le (Dela 23:12-35). Ama, o Fest sine čhivdo sar upraviteli ko than e Felikseske, kova so mangela sine te ugodinel e Evreenge. Ov pučlja e Pavle: „Mangea li te dža ko Erusalim hem adathe te sudinel pe tuke angli mande?“ O Pavle džanlja kaj šaj sine te ovel mudardo ko Erusalim. Ov vakergja: „Ka žalinav man anglo cezar!“ O Fest vakergja e Pavleske: „Ako mangea te žaline tut anglo cezar, ka dža anglo cezar!“ Panda hari, o Pavle valjani sine te ovel ko Rim — dur taro Evreija so mangena sine te mudaren le (Dela 25:6-12; w20.11 13, pas. 4; 14, pas. 8-​10).

Sekova jekh amendar ponekogaš osetinela pe krivo bašo nešto. Na primer, nekoj osetinela pe krivo bašo bukja so kergja len angleder te džanel o čačipe tari Biblija. Javera osetinena pe kriva bašo greške so kergje otkeda krstingje pe (Rim. 3:23). Džangjola pe, amen mangaja te postapina ispravno, ama „sarine amen but puti grešinaja“ (Jak. 3:2; Rim. 7:21-23). Iako keda osetinaja amen kriva nane amenge šukar, sepak adava šaj te ovel bašo amaro šukaripe. Soske? Adaleske so adava šaj te pottikninel amen te isprajna amen keda postapinaja pogrešno hem te ova odlučna te na kera palem o ista greške (Evr. 12:12, 13). Ama, šaj te osetina amen preterano kriva, ili javere lafencar, ponadari da te mučinel amen o čuvstvo kaj siem kriva iako kaingjem amen hem o Jehova sikavgja kaj prostingja amenge. Adava šaj te ovel but opasno (Ps. 31:10; 38:3, 4). Adaleske but tano važno te pazina amen te na pera ki zamka te osetina amen preterano kriva. O Satana ka ovel but bahtalo ako čhinavaja te služina e Jehovaske, iako o Jehova više prostingja amenge! (Sporedin 2. Korinkjanite 2:5-7, 11; w20.11 27, pas. 12-13.)

O pisateli taro akava psalm, kova so sine leviti, počmingja te zavidinel e lošna manušenge hem e čalmdžienge, na adaleske so kerena sine lošna bukja, nego bašo adava so izgledinela sine kaj lengoro životo tano pošukar taro leskoro (Ps. 73:2-9, 11-14). Izgledinela sine sar te phene isi len sa — barvalipe, šukar životo hem na sine len sekiracie. O leviti kova so pišingja akava psalm valjani sine te dikhel ko bukja sar so dikhela o Jehova. Keda kergja adava, ov više na sine obeshrabrimo, nego sine bahtalo. Ov vakergja: „Osven [o Jehova], ništo javer na valjani mange ki Phuv“ (Ps. 73:25). Amen da na valjani nikogaš te zavidina e lošna manušenge adaleske so izgledinela kaj isi len bahtalo životo. Lengoro bahtalipe ka našavgjovel hem nane te živinen večno (Prop. 8:12, 13). Ako zavidinaja lenge, ka ova obeshrabrime hem ka našava amaro amalipe e Jehovaja. Adaleske ako tu da nekogaš počminea te osetine tut sar o leviti, ker adava so ov kergja. Šun e Devleskoro ljubezno sovet hem družin tut okolencar so kerena e Jehovaskiri volja. Keda mangea e Jehova najviše taro sa, tegani ka arakhe čačutno bahtalipe hem ka ačhove ko drumo kova so ingarela ko „čačutno životo“ (1. Tim. 6:19; w20.12 19-20, pas. 14-16).

Keda vakerea e Jehovaske ki molitva so mučinela tut, ma bistre te blagodarine tut leske. Čak keda isi amen but problemija, šukar tano te razmislina bašo sa o bereketija so dobingjem lestar. Ama, so šaj te kere keda našti te arakhe ispravna lafija te vakere e Jehovaske sar osetinea tut? Ma bistre ka o Jehova ka odgovorinel ki tli molitva čak keda šaj samo te vakere: „Molinava tut pomožin mange!“ (2. Let. 18:31). Neka ovel tut doverba ki e Jehovaskiri mudrost, a na ki tli. Ko vreme taro proroko Isaija, o narodo tari Juda darana sine te na oven napadime taro Asircija. Adaleske so o manuša tari Juda na mangena sine o Asircija te osvojnen len, rodingje pomoš taro Egipkjanja (Isa. 30:1, 2). O Jehova predupredingja len kaj lengiri odluka ka ingarel len ki propast (Isa. 30:7, 12, 13). Preku o Isaija, o Jehova vakergja e narodoske sar ka oven čače bezbedna. Ov vakergja: „Ačhoven smirime hem sikaven doverba [ko Jehova], adava ka ovel tumari sila!“ (Isa. 30:15b; w21.01 3-4, pas. 8-9).

Sar nagrada bašo adava so ačhile verna, e Hristoseskere pomazime phralja ka oven carija hem sveštenikija zaedno lea ko nebo (Otk. 20:6). O Jehova, o Isus hem o angelija ka oven but bahtale keda sa o pomazanikija ka dobinen pumari nagrada upre ko nebo. Otkeda kerela lafi bašo akala 144.000 carija hem sveštenikija, o apostol Jovan dikhela nešto vozbudlivo — jekh „baro mnoštvo“ kova so preživinela o Armagedon. Akala duj grupe razlikujnena pe jekh jekhatar, adaleske so ko baro mnoštvo isi poviše manuša nego ko 144.000 hem lengoro broj nane odredimo (Otk. 7:9, 10). Ola tane uravde ko parne šeja, adava sikavela kaj tane bizi fleka taro e Satanaskoro sveto hem kaj ačhile verna e Devleske hem e Hristoseske (Jak. 1:27). Ola glasno vikinena adaleske soj tane spasime taro Jehova hem taro Isus, e Devleskoro bakhro. Ola isto agjaar ko pumare vasta isi len palmengere granke kova so sikavela kaj prifatinena e Isuse sar postavimo cari taro Jehova. (Sporedin Jovan 12:12, 13; w21.01 15-​16, pas. 6-7.)

Jekh murš te šaj te ovel šukar poglavari valjani te džal palo e Jehovaskoro primer hem e Isuseskoro, agjaar so ka sikljol lendar sar te koristinel plo avtoriteti. Na primer, te dikha jekh osobina — i poniznost. O Jehova tano najmudro sarinendar, sepak šunela ple slugengere predlogija (1. Moj. 18:23, 24, 32). O Jehova tano sovršeno, ama ov na očekujnela amen da te ova sovršena. Namesto adava, ov pomožinela e nesovršeno manušenge kola so služinena leske te oven uspešna (Ps. 113:6, 7). Ustvari, i Biblija vakerela kaj o Jehova tano adava so pomožinela amenge (Ps. 27:9; Evr. 13:6). O cari o David vakergja kaj ov šaj sine te kerel bare bukja samo adaleske so o Jehova sine ponizno hem pomožingja leske. Te dikha e Isuseskoro primer. Iako sine Gospodari hem Učiteli ple učenikonge, ov thovgja lengere pre. O Isus vakergja: „Dengjum tumen primer, tumen da te keren agjaar sar so kergjum me“ (Jovan 13:12-17). Iako sine le baro avtoriteti, o Isus na očekujngja te služinen leske. Namesto adava, ov služingja e javerenge (Mat. 20:28; w21.02 3-4, pas. 8-10).

Terne phraljalen tumen šaj te oven but korisna ko sobranie. But tumendar tane silna hem pherde energija. Tumen but kerena te šaj te pomožinen tumare phralenge hem phenjenge hem šaj mangena te oven sluga-pomošnikija. Ama, šaj mislinena tumenge kaj o javera dikhena tumen sar but terne hem kaj sien neiskusna te šaj te dobinen nesavi važno zadača. Iako sien terne, isi bukja so šaj te keren akana te šaj te stekninen i doverba hem o poštovanje e javerengoro taro sobranie. Dali tu sar terno manuš isi tu veštine kola so šaj te oven korisna e javerenge ko sobranie? Bute ternen isi len asavke veštine. Na primer, šaj primetingjan kobor nesave taro pophure tane blagodarna keda o terne sikavena lenge sar te koristinen pumare tabletija ili javera elektronska uredija baši pumari lično studija hem bašo sostanokija. Tu šaj but te pomožine e pophurenge adaleske so haljovea tut tari tehnologija. Ko sa so kerea, trudin tut te kere bahtalo tle nebesno Dade (w21.03 2, pas. 1, 3; 7, pas. 18).

Čak ako e romnja isi la pobaro obrazovanie taro plo rom, le isi le odgovornost te pomožinel ple familijake te obožavinen e Jehova, sar na primer redovno te ikeren i Familijarno rat (Ef. 6:4). Iako jekh romni mora te ovel podložno ple romeske, sepak oj tani odgovorno te ikerel pli vera zorali. Adaleske, oj mora te odvojnel peske vreme baši pli lično studija hem te razmislinel bašo adava so proučingja. Adava ka pomožinel lake ponadari da te mangel hem te poštujnel e Jehova hem te ovel bahtali džikote tani podložno ple romeske. O romnja soj tane podložna pumare romeske adaleske so mangena e Jehova, ka oven pobahtale hem pozadovolna taro adala so odbinena o poglavarstvo so vospostavingja le o Jehova. Akala podložna romnja tane primer hem e terne muršenge hem e terne džuvlenge. Osven adava, ola pomožinena te ovel šukar atmosfera, na samo ki familija nego isto agjaar ko sobranie da (Tit 2:3-5). Avdive, pobaro delo taro e Jehovaskere sluge tane džuvlja (Ps. 68:11; w21.02 13, pas. 21-23).

O Pavle dengja amen but šužo primer baši hrabrost hem baši istrajnost. Ponekogaš ov osetingja pe slabo. Ama, ov šaj sine te istrajnel adaleske so sine le doverba ko Jehova kaj ov ka del le i sila soj leske potrebno (2. Kor. 12:8-10; Fil. 4:13). Amen da šaj te ovel amen asavki sila hem hrabrost ako ponizno priznajnaja kaj valjani amenge e Jehovaskiri pomoš (Jak. 4:10). Šaj te ova sigurna kaj o nevolje so doživinaja len nane kazna taro Jehova. O učeniko o Jakov uverinela amen: „Nijekh, keda ka ovel ko iskušenie te na vakerel: ’O Devel iskušinela man‘. Soske, nijekh našti iskušinela e Devle lošnipaja, a ov da na iskušinela nikas lošnipaja“ (Jak. 1:13). Keda siem uverime ko akava, amen ovaja popaše amare mangle nebesno Dadea. O Jehova „na meninela pe“ (Jak. 1:17). Ov pomožingja e hristijanenge taro prvo veko keda sine len nevolje, a isto agjaar ka pomožinel amenge da avdive. Iskreno molin e Jehova te pomožinel tuke te dobine mudrost, vera hem hrabrost. Ov ka odgovorinel ko tle molitve (w21.02 31, pas. 19-21).

Tu šaj te ohrabrine jekhe interesente kova so avela ko sostanokija adalea so ka sikave leske lično interes (Fil. 2:4). Šaj te vakere leske kobor sian bahtalo keda dikhea o promene so kerela len. Isto agjaar, šaj te puče le bašo leskoro biblisko kursi, baši leskiri familija ili leskiri buti. Akala razgovorija šaj te keren tumen te oven popaše. Ama, pazin te na puče but lična pučiba kolencar so ka čhive le ki nezgodno situacija. Keda ovea leskoro amal tu pomožinea leske te napredujnel hem te krstinel pe. Džikote o interesenti napredujnela hem kerela promene, pomožin leske te osetinel pe sar delo taro sobranie. Adava šaj kerea le agjaar so ka ove gostoprimlivo (Evr. 13:2). Keda o interesenti ovela objaviteli, tu šaj te kanine le te dža lea ki služba. O Diego, jekh objaviteli taro Brazil, vakerela: „But phralja vikinena man sine te džav lencar ki služba. Adava sine najšukar način te zapoznajnav len pošukar. Agjaar šaj sine poviše te sikljovav hem uljum panda popaše e Jehovaja hem e Isusea“ (w21.03 12, pas. 15-16).

O Isus vakergja ple sledbenikonge te mangen pumare dušmanen (Mat. 5:44, 45). Adava nane lokho. Ama, šaj te kera adava adaleske so pomožinela amenge e Devleskoro sveti duh. Ko osobine so avena taro sveti duh tane vklučime o mangipe, isto agjaar strplivost, ljubeznost, šukaripe hem samokontrola (Gal. 5:22, 23). Akala osobine pomožinena amenge te istrajna keda o javera mrzinena amen. But manuša čhinavgje te protivinen pe amenge adaleske so lengoro rom, romni, čhave ili komšija so služinena e Jehovaske sikavgje akala šuže osobine. But protivnikija ule čak amare phralja hem phenja. Ako tuke pharo te mange okolen so mrzinena tut adaleske so služinea e Jehovaske, molin tut bašo sveti duh (Luka 11:13). Hem ov celosno uverimo kaj te ove poslušno e Devleske tano sekogaš o najšukar (Izr. 3:5-7). I omraza šaj te ovel but mokjno hem te dukhavel, ama o mangipe tano but posilno. O mangipe kovljarela o vilo okolengoro so protivinena pe amenge. Keda sikavaja mangipe, keraja bahtalo e Jehovaskoro vilo. Iako o protivnikija šaj ponadari da te mrzinen amen, sepak šaj te ova bahtale (w21.03 23, pas. 13; 24, pas. 15, 17).

O proroko o Joil ustvari prorokujngja jekh voeno napad (Joil 2:1, 8, 11). O Jehova vakergja kaj ka koristinel pli „bari vojska“ (e vavilonsko vojnikon) te šaj te kazninel e Izraelcon so na sine poslušna (Joil 2:25). Točna tane o lafija keda o Joil baši vavilonsko vojska vakerela „okova taro sever“ adaleske so oj napadingja e Izraele tari severno strana (Joil 2:20). Adaja vojska tani sporedimi skakulconcar kola soj organizirime ko baro broj. Baši lende, o Joil vakerela: „Sar silno manuš ko plo drom, [o vojnikija] džana angle... Sigate khuvena ki diz. Uklena ko khera. Khuvena sar čora taro džamija“ (Joil 2:8, 9). Šaj te zamisline tuke akava? Segde isi vojnikija. Nikoj nane kaj te garavel pe. Nikoj našti te spasinel pe tari vavilonsko vojska! Sar skakulcija, o Vaviloncija (ili o Haldejcija) napadingje o Erusalim ko 607 berš a.a.e. I Biblija vakerela: „O haldejsko cari na sine le milost ni terneske ni čhajake, ni phureske ni nekaske so nane le sila“ (2. Let. 36:17; w20.04 5, pas. 11-12).