Fevruari

Zapoznajn pošukar e phralen hem e phenjen. Ker lencar lafi angleder hem palo sostanok, džan zaedno ki služba hem ako šaj, vikin len ko gosto. Agjaar šaj ka doznajne baši lende nešto so na džanea. Na primer, šaj mislinea tuke kaj nesavi phen na mangela te družinel pe, a oj tani samo ladžutni. Šaj mislinea kaj nesavo phral tano materijalisti, ama ustvari, ov tano but darežlivo. Ili palem, ka doznajne kaj nesavi phen čhavencar, koja so često kasninela ko sostanok, isi la protivenje (Rim. 14:4). Normalno, na valjani te mešina amen „ko e javerengere bukja“ (1. Tim. 5:13). Sepak, šukar tano te džana nešto bašo amare phralja hem phenja ili bašo adava so doživingje ko životo. Adava šaj te pomožinel amenge te haljova len pošukar. Keda zapoznajnea pošukar nesave phrale ili phenja so šaj nervirinela tut, verojatno poviše ka haljove le. Točno tano kaj valjani te trudina amen te šaj pošukar te zapoznajna amare phralen hem phenjen. Sepak, keda šunaja o sovet tari Biblija te širina amare vile, džaja palo e Jehovaskoro primer, kova so mangela sa e manušen (1. Tim. 2:3, 4; 2. Kor. 6:11-13; w20.04 16-17, pas. 10-12).

I rat angleder te merel, o Isus potsetingja ple učenikon te mangen pe jekh jekhea. Ov džanlja kaj o samopožrtvuvano mangipe ka pomožinel lenge te ačhoven ko jekhipe hem te izdržinen i omraza so sikavela lenge sine o sveto. Te dikha o primer taro sobranie ko Solun. Panda taro početok keda ulo adava sobranie, o phralja hem o phenja sine progonime. Ama, ola ule primer bašo adava so verno istrajngje hem bašo mangipe so sikavgje (1. Sol. 1:3, 6, 7). O Pavle ohrabringja len ponadari da te sikaven mangipe čak ki pobari mera (1. Sol. 4:9, 10). O mangipe valjani sine te pottikninel len te utešinen adalen soj razočarime hem te poddržinen adalen soj slaba (1. Sol. 5:14). Ola šungje e Pavleskere sovetija hem adaleske ko plo dujto pismo, kova so pišingja le jekh berš pokasno, o Pavle šaj sine te vakerel lenge: „O mangipe so isi tumen jekh jekheske sa poviše bajrola“ (2. Sol. 1:3-5). Lengoro mangipe pomožingja lenge te izdržinen pharipa hem progonstvija (w21.03 22, pas. 11).

Ako mangaja te dobina o večno životo, mora te ikera amen ko bibliska načelija (Dela 20:24; 1. Pet. 2:21). Ama, o Satana hem okola so džana pali leste mangena te kera pojaver izbor, hem te čhiven amen palem te prasta lencar (1. Pet. 4:4). Adaleske, asana bašo način sar živinaja hem vakerena kaj o drumo kotar so ola džana tano pošukar, hem kaj ingarela dži ki sloboda. Ama, adava tano baro hovajbe (2. Pet. 2:19). Kobor tano važno te birina o ispravno drumo! O Satana mangela sekova jekh amendar te čhinavel te džal taro tesno drumo „so ingarela ko životo“, hem te počminel te džal taro buvlo drumo kotar so džana poviše manuša taro sveto. O buvlo drumo mangena le but džene hem ki leste polokhe džala pe. Ama, ov „ingarela ko uništuvanje“ (Mat. 7:13, 14). Te šaj te ačhova ko ispravno drumo hem te na mukha ništo te lel amaro vnimanie, mora te verujna ko Jehova hem te šuna le (w20.04 26, pas. 1; 27, pas. 5, 7).

Ko posledna berša, i Rusija hem lakere sojuznikija isto agjaar khuvgje ki „Šuži phuv“ (Dan. 11:41). Sar? Ko 2017 berš, i Rusija zabraningja i aktivnost e Jehovaskere narodoskiri hem čhivgja ko zatvor nesaven taro amare phralja hem phenja. Osven adava, zabraningja amare publikacie, maškar kola soj hem o Prevod Nov svet. Isto agjaar, lelja amendar amari podružnica ki Rusija hem nesave amare dvorane hem kongresna sale. Palo sa akala nastanija, ko 2018 berš, o Vodečko telo vakergja kaj i Rusija hem lakere sojuznikija tane o severno cari. Sepak, čak keda o vlastija progoninena len, e Jehovaskere sluge nane te borinen pe protiv nisavi vlada ili te probinen te meninen la. Namesto adava, šunaja o sovet tari Biblija te molina amen „sarinenge soj ki vlast“, posebno ako nesave lendar valjani te anen odluke bašo pravo slobodno te služinel pe e Jehovaske (w20.05 14, pas. 9).

Tumen o roditelija sigurno mangena tumare čhave te ačhoven ko čačipe. Te šaj te uverinen pe kaj isi len o čačipe, tumare čhaven valjani te ovel len lično amalipe e Devlea hem te oven sigurna kaj adava so sikavela i Biblija tano čače. Ako mangea te sikave tle čhaven o čačipe bašo Devel, tu mora te den len šukar primer agjaar so korkori vnimatelno ka istražine i Biblija hem ka odvojne vreme hor te razmisline baši late. Tegani ka šaj te sikave tle čhaven da te keren o isto. Slično sar so sikavea e interesenten, valjani te sikave tle čhaven da te istražinen agjaar so ka koristine sa adava so dela amen i organizacija bašo istražibe. Agjaar ka pomožine lenge te zamangen e Jehova hem te ovel len doverba ko „verno hem razborito robo“ kaste so ov koristinela te šaj te del amen duhovno hrana (Mat. 24:45-47). Nane dovolno te sikaven tumare čhaven samo bašo osnovna bibliska čačipa. Valjani te pomožinen lenge te gradinen zorali vera agjaar so ka sikaven len bašo „e Devleskere hor bukja“ sprema lengiri vozrast hem sposobnostija (1. Kor. 2:10; w20.07 11, pas. 10, 12-13).

Dali e Devle isi le paše amala ki Phuv avdive da? Oja. Milionja nesovršena manuša taro celo sveto. Te šaj nekoj te ovel amal e Jehovaja, mora te sikavel vera ki otkupno žrtva e Isuseskiri. Tegani, ov šaj te del lafi e Jehovaske kaj ka služinel leske hem te krstinel pe. Keda kerela akala važna čekorija, ov ovela delo taro javera milionja hristijanja kola so više tane paše amala e Jehovaja, i najbari ličnost ko univerzum! Sar šaj te sikava kaj but ceninaja amaro amalipe e Devlea? Isto sar o Avraam hem o Jov, kola so ačhile verna e Jehovaske poviše taro šel berš, amen da mora te ačhova verna bizi razlika kobor vreme služinaja leske ko akava purano sveto. Isto sar o Daniel, amen da mora te cenina amaro amalipe e Devlea poviše taro amaro životo (Dan. 6:7, 10, 16, 22). Adaleske so pomožinela amen o Jehova, amen šaj te izdržina sa o nevolje so ka oven amen, hem agjaar te ačhova paše amala lea (Fil. 4:13; w20.05 27, pas. 5-6).

O cari o David dikhlja jekhe prandime džuvlja sar nangjola. Ov džanela sine e Jehovaskoro zakoni: „Ma mang te ovel tli tle pašutneskiri romni“ (2. Moj. 20:17). Ama jasno tano kaj ov prodolžingja te dikhel e Vitsavea. I želba sprema late uli posilno tari želba te kerel i volja e Jehovaskiri. Iako but vreme manglja e Jehova hem hor poštujnela le sine, o David postapingja sprema pli sebično želba. Adaleske, ki adaja prilika postapingja pogrešno hem angja ladž e Jehovaskere anaveske. Osven adava, angja bare muke e manušenge so na sine kriva, maškar kolende so sine leskiri familija (2. Sam. 11:1-5, 14-17; 12:7-12). Otkeda o Jehova ukoringja e Davide, ov kaingja pe hem palem ulo paše amal lea (2. Sam. 12:13; Ps. 51:2-4, 17). O David na bistergja i dukh hem o nevolje kola so sine posledica taro adava so dozvolingja leskoro vilo te ovel podelimo. Dali o Jehova pomožingja leske palem te ovel le celo vilo? Oja. Pokasno ko e Devleskoro lafi sine pišimo kaj e Davideskoro vilo sine „celosno e Jehovaja, leskere Devlea“ (1. Car. 11:4; 15:3; w20.06 11, pas. 12-​13).

Ki Biblija, o mangipe so osetinela o Jehova sprema plo narodo tano sporedimo šelea. Ki savi smisla leskoro mangipe tano sar šelo? Razmislin baši akaja sporedba: Zamislin tuke kaj tasljovea ko more kote so isi bare branija hem nekoj frdela tuke pojas spasibaske. Sigurno ka ove leske blagodarno adaleske so adava ka pomožinel tuke te ačhove upro pani. Ama, o pojas nane te spasinel tut. O pani tano šudro hem nane te uspejne te ačhove dživdo ako na uklea ko čamco spasibaske. Nekoj valjani te frdel tuke šelo hem te vlečinel tut ko čamco. Sar so vakergja o Jehova o lafija taro avdisutno stiho, ov mangipaja cidela sine e Izraelcon kola so cidingje pe lestar. Avdive da e Devle isi le slična čuvstvija sprema okola so čhinavgje te služinen leske hem kola so tasljona ko problemija hem ko sekiracie. Leske tano važno te džanen kaj mangela len, hem ov kerela sa te šaj te vlečinel len ki peste e mangipaskere šelencar. O Jehova šaj te sikavel plo mangipe preku tute. Važno tano te uverina e neaktivna phralen hem phenjen kaj o Jehova mangela len hem kaj amen da mangaja len (w20.06 27, pas. 12-​13).

Keda sine mudardo o učeniko o Stefan, but hristijanja našle taro Erusalim hem gele ki Judeja hem ki Samarija. A nesave gele čak dži ko Kipar hem ki Antiohija (Dela 7:58 — 8:1; 11:19). Šaj samo te zamislina amenge kobor sine pharo e učenikonge. Sepak, bilo kote so gele ola revno propovedinena sine o šukar haberi hem formiringje sobranija ki Rimsko Imperija (1. Pet. 1:1). Ama palo akava, len sine len panda but popharo periodi. Na primer, okolu o 50 berš a.e., o rimsko imperatori, o Klavdij, dengja naredba sa o Evreija te džan peske taro Rim. Adaleske, o Evreija so ule hristijanja silaja sine terime te mukhen pumare khera hem te džan te selinen pe ko javera thana (Dela 18:1-3). Okolu o 61 berš a.e., o apostol Pavle pišingja kaj o manuša vredžinena sine bute hristijanen anglo javera, čhivena len sine ko zatvor hem čorena sine lengoro imot (Evr. 10:32-34). Hem isto sar o javera manuša, o hristijanja da sine čorole hem nasvale (Rim. 15:26; Fil. 2:25-27; w21.02 26-27, pas. 2-4).

Ako trudinaja amen te kera pozorali amari vera, o Satana hem okola upri kaste so ov vlijajnela ka našti te keren ništo so ka čhinavel amen te živina sprema o čačipe (2. Jov. 8, 9). Amen džanaja kaj o sveto ka mrzinel amen (1. Jov. 3:13). O Jovan setinkerela amen kaj „celo sveto tano ko vasta e Lošnoskere“ (1. Jov. 5:19). Sar so avela o krajo popaše, o Satana ovela sa poholjamo. Osven so koristinela indirektna napadija, sar soj o nemoral hem o hovajba taro otpadnikija, ov isto agjaar koristinela direktna napadija, javere lafencar surovo progonstvo. O Satana džanela kaj isi le samo kratko vreme te šaj te čhinavel o propovedibe hem te phagjel amari vera. Adaleske, ni hari na siem iznenadime so amari propovedničko aktivnost ko nesave phuvja tani ograničimi ili tani zabranimi. Sepak, amare phralja hem phenja ko adala phuvja na otkažinena pe. Adalea dokažinena kaj, bizi razlika sar ka napadinel amen o Satana, amen šaj te pobedina! (w20.07 24, pas. 12-13).

E Jehova sine le namera o manuša te živinen večno ki but šuži planeta koja so stvoringja la ov. Ama, keda o Adam hem i Eva buningje pe protiv lengoro grižlivo Dad, ola ule grešna hem mule. Isto agjaar, sa o manuša so avena lendar tane grešna hem merena (Rim. 5:12). So kergja o Jehova? Ov odma vakergja sar ka spasinel e manušen (1. Moj. 3:15). O Jehova odlučingja te del ple Čhave, e Isuse, sar otkupno žrtva te šaj e Adameskere hem e Evakere čhave te oven oslobodime taro grevo hem taro meribe. Agjaar ka šaj sine te del večno životo sekole manušeske so ka mangel te služinel leske (Jovan 3:16; 1. Kor. 15:21, 22). Keda o Jehova preku plo Čhavo ka voskresninel milionja manušen, šaj te očekujna kaj sarine nane te voskresninen ko isto vreme. Soske? Adaleske so, ako taro jekh puti bajrola o broj e manušengoro ki Phuv, tegani šaj te ovel haos. Ama, o Jehova sekogaš kerela o bukja ko organizirimo hem uredno način. Ov džanela kaj, te šaj te ovel trajno mir, mora te ovel redo (1. Kor. 14:33; w20.08 14, pas. 3; 15, pas. 5).

O interesenti valjani te haljol kaj mangaja te pomožina leske te služinel e Jehovaske hem te ovel leskoro Svedoko. Isi nekobor bukja so jekh interesenti valjani te kerel ako mangela te krstinel pe. Sar prvo, valjani te pendžarel e Jehova, te mangel le hem te ovel le vera ki leste (Jovan 3:16; 17:3). Palo adava, o interesenti valjani te ovel amal e Jehovaja hem e phralencar hem e phenjencar ko sobranie (Evr. 10:24, 25; Jak. 4:8). Sar so nakhela o vreme, o interesenti čhinavela te kerel bukja so na mangela len o Devel hem kainela pe bašo lošna bukja so kergja len (Dela 3:19). Osven adava, leskiri vera ka pottikninel le te kerel lafi e javerencar bašo čačipe (2. Kor. 4:13). Ko krajo, dela lafi e Jehovaske kaj ka služinel leske hem krstinela pe ko pani (1. Pet. 3:21; 4:2). Adava tano but radosno dive sarinenge! Džikote o interesenti kerela akala bukja te šaj te krstinel pe, često pofalin le hem ohrabrin le ponadari da te kerel akala bukja (w20.10 17-​18, pas. 12-​13).

Ako sporedinea tut e javerencar taro sobranie, šaj ka misline kaj na vredinea. Nesave ko sobranie šaj tane sposobna te sikaven e javeren, te organizirinen o bukja ili te utešinen hem te ohrabrinen e javeren. Šaj mislinea kaj tu našti te kere sa akala bukja doborom šukar sar ola so kerena. Akava sikavela kaj sian ponizno hem skromno (Fil. 2:3). Ama, mora te pazine. Ako stalno sporedinea tut e javerencar so isi len posebna talentija, šaj korkori tutar te razočarine tut. Sar so vakergja o apostol Pavle, šaj te osetine tut kaj o sobranie nane le nisavi korist tutar. Ko prvo veko, o Jehova preku plo sveti duh dengja nesave hristijanenge poklonija ili talentija. Ama, sa o hristijanja na dobingje ista poklonija (1. Kor. 12:4-11). Sepak, sekova hristijani sine skapoceno angli leste. Avdive nane amen asavke poklonija taro sveti duh. Ama amenge da važinela o isto načelo — sarinen nane amen o ista talentija, ama sarine siem skapocena anglo Jehova (w20.08 23, pas. 13-15).

Keda molinea tut baši hrabrost, o Jehova ka odgovorinel ko tle molitve hem nikogaš nane te mukhel tut (Dela 4:29, 31). Ov sekogaš ka poddržinel tut. Razmislin sar o Jehova pomožingja tuke keda sine tut problemija hem dengja tut sila te kere promene ko tlo životo. Sigurno, o Devel kova so vodingja ple narodo preku o Crveno More šaj te pomožinel tuke da te ove e Hristoseskoro učeniko (2. Moj. 14:13). Tute da šaj te ovel tut isto vera sar o psalmisti kova so vakergja o lafija taro avdisutno stiho. O Jehova isto agjaar šaj te pomožinel e neve objavitelenge te oven hrabra.Razmislin bašo iskustvo e phenjakoro Tomojo. Keda počmingja te propovedinel taro kher ko kher, i prvo stanarka so arakhlja la vikingja lake: „Na mangava ništo te ovel man e Jehovaskere svedokoncar!“ hem phanlja lake o udar. I Tomojo hrabro vakergja e phenjake so sine laja ki služba: „Šungjan li? Na valjangjum te vakerav nijekh lafi, ama i manušni pendžargja man kaj sium e Jehovaskoro svedoko. But sium bahtali!“ I Tomojo akana služinela sar opšto pioneri (w20.09 6, pas. 13-​14).

O Asa vakergja e narodoske kaj o Jehova tano adava so dengja len mir ki celo phuv (2 Let. 14:6, 7). Ama o Asa na mislinela sine kaj ko akava periodi valjani samo te uživinel. Namesto adava, ov počmingja te gradinel dizja, zidija, kule hem porte. O Asa vakergja e manušenge tari Juda: „I phuv panda tani amari“. Adalea manglja te vakerel kaj ki phuv koja so dengja len o Devel na sine dušmanja kola so ka čhinaven len slobodno te dvižinen pe hem te gradinen. Ov pottikningja e narodo te koristinel adava mirno periodi. O Asa isto agjaar koristingja akava mirno periodi te zajakninel ple vojska (2. Let. 14:8). Dali akava značinela kaj na sine le doverba ko Jehova? Na. O Asa džanlja kaj, sar cari, isi le dolžnost te spreminel e narodo bašo nevolje so šaj te aven ki idnina. Osven adava ov sine svesno kaj o mirno periodi ki Juda nane te trajnel zasekogaš, hem čače sine agjaar (w20.09 15, pas. 4-5).

Adaleske so jekh starešina grižinela pe bašo sobranie, ov šaj te čhivel pravilija te šaj te zaštitinel e Devleskere bakhren. Ama, isi bare razlike maškar i uloga jekhe starešinaskiri hem jekhe familijarno poglavareskiri. Na primer, o Jehova čhivgja e starešinen te oven sar sudie ko sobranie hem dengja len i odgovornost te ciden taro sobranie okolen so na kainena pe (1. Kor. 5:11-13). Tari javer strana, o Jehova dengja nesavo avtoriteti e familijarna poglavarenge so na dengja e starešinenge. Na primer, ov dengja avtoriteti e poglavarenge te čhiven pravilija ple familijake hem te grižinen pe te ikeren adala pravilija (Rim. 7:2). Jekhe poglavare isi le pravo te odlučinel ko kova vreme leskere čhave valjani te iranen pe khere. Isto agjaar, isi le avtoriteti te kazninel ple čhaven ako na ikerena pe ko adava pravilo (Ef. 6:1). Džangjola pe, jekh ljubezno poglavari prvo ka kerel lafi ple romnjaja angleder te anel pravilija ki familija, adaleske so ola o duj tane „jekh telo“ (Mat. 19:6; w21.02 16-18, pas. 10-13).

Jekh pričina soske o čačipa taro e Devleskoro Lafi tane skapocena tani adaleske so o Jehova otkrinela len samo e ponizna manušenge kola so „ispravno dikhena ko večno životo“ (Dela 13:48). Asavke manuša priznajnena kaj avdive „o verno hem razborito robo“ otkrinela amenge adala čačipa (Mat. 11:25; 24:45). Amen siem svesna kaj našti korkori te haljova len, a ola tane doborom skapocena so ništo javer našti te sporedinel pe lencar (Izr. 3:13). O Jehova isto agjaar dengja amen i čest te sikava e javeren o čačipe baši leste hem baši leskiri namera (Mat. 24:14). I poraka so propovedinaja la tani but skapoceno adaleske so pomožinela e manušenge te oven delo tari e Jehovaskiri familija hem dela len prilika te dobinen večno životo (1. Tim. 4:16). Bizi razlika dali propovedinaja ki pobari ili ki potikni mera, amen poddržinaja i najvažno buti so kerela pe ko amaro vreme (1. Tim. 2:3, 4). Amenge tani but bari čest te ova e Devleskere sorabotnikija! (1. Kor. 3:9; w20.09 27, pas. 4-5).

Džikote patujnela sine o apostol Pavle ko Rim, o Jehova but puti koristingja e phralen hem e phenjen te pomožinel leske. Na primer, duj verna amala e Pavleskere, o Aristarh hem o Luka, odlučingje te patujnen e Pavlea ko Rim. Ola dobrovolno rizikujngje pumare životija te šaj te oven e Pavlea, iako i Biblija na vakerela kaj o Isus vetingja lenge kaj ola ka resen bezbedno ko Rim, sar so vetingja e Pavleske. Pokasno, džikote patujnena sine ko adava opasno drumo, ola doznajngje kaj ka oven zaštitime. Keda resle ko pristanište tari diz Sidon, o Julij dozvolingja e Pavleske „te džal ko ple amala te šaj te grižinen pe leske“ (Dela 27:1-3). Pokasno, ki diz Puteoli, o Pavle hem o phralja so sine lea arakhle phralen kola so molingje e Pavle te ačhovel lencar efta dive. Džikote o phralja taro adala thana grižinena pe sine e Pavleske hem e phralenge so sine lea, o Pavle sigurno angja bari radost e phralenge taro adala dizja agjaar so vakerela sine lenge ohrabruvačka iskustvija. (Sporedin Dela 15:2, 3; w20.11 16, pas. 15-​17.)

Ako sian roditeli, sikav tle čhave te dikhen kaj tle lafencar hem tle postapkencar mangea e Jehova. O najskapoceno poklon so šaj te de e čhavenge tano te pomožine lenge te mangen e Jehova. Jekh taro najvažna bukja so valjani te sikave len tani redovno te proučinen i Biblija, te molinen pe, te džan ko sostanokija hem te džan ki služba (1. Tim. 6:6). Džangjola pe, tu mora te grižine tut tle čhavenge ko materijalno pogled (1. Tim. 5:8). Ama ma bistre kaj lengoro paše odnos e Devlea — a na o materijalna bukja — ka pomožinel lenge te preživinen o krajo akale purane svetoskoro hem te khuven ko e Devleskoro nevo sveto (Ezek. 7:19). Kobor siem bahtale keda dikhaja sar but roditelija anena šukar odluke kolencar so pomožinena pumare čhavenge te oven paše e Jehovaja! O čhave so bajrona ko asavke familie but puti ponadari da ikerena akala šukar duhovna navike hem keda bajrona na žalinena bašo adava! (Izr. 10:22; w20.10 28-​29, pas. 10-​11).

Ponekogaš, o apostol Petar, vakerela sine ili kerela sine bukja bizo te razmislinel hem pokasno perela sine pišmani bašo adava. Na primer, keda o Isus vakergja ple apostolenge kaj ka ovel mučimo hem ka merel, o Petar vakergja leske o lafija taro avdisutno stiho (Mat. 16:21-23). Tegani o Isus ispravingja e Petare. Keda o manuša ale te astaren e Isuse, o Petar bizo te razmislinel čhingja o kan jekhe manušeskoro so sine e prvosveštenikoskoro robo (Jovan 18:10, 11). O Isus palem ispravingja e apostole. Osven adava, o Petar vakergja kaj čak ako o javera apostolija otkažinena pe e Isusestar, ov nikogaš nane te kerel adava! (Mat. 26:33). Ama o Petar na sine doborom silno sar so mislingja. Pokasno ki isto rat, otkažingja pe e Isusestar trin puti. O Petar sine but obeshrabrimo, ov „iklilo avri hem but rungja“ (Mat. 26:69-75). Šaj pučela pe sine dali o Isus nekogaš ka prostinel leske. Sepak, o Petar na dozvolingja te ovel preterano obeshrabrimo. Pali adaja greška, ov ponadari da služinela sine e Jehovaske e javere apostolencar (Jovan 21:1-3; Dela 1:15, 16; w20.12 20, pas. 17-18).

Jekh familijarno poglavari šaj te sikavel poniznost ko but načinija. Na primer, ov na očekujnela sovršenstvo tari pli romni hem ple čhave. Ov šunela hem razmislinela bašo lengoro mislenje čak ako tano po različno taro leskoro. Osven adava, jekh ponizno rom spremno tano te pomožinel ko kher, čak keda o manuša kote so živinela dikhena ki adaja buti sar džuvlikani buti. Adava šaj te ovel but pharo. Soske? Jekh phen koja so vikinela pe Rejčel vakerela: „Adathar kotar so avava, ako jekh rom pomožinela ple romnjake te thovel o čare ili te čistinel khere, leskere komšie hem i familija ka mislinen kaj ov nane ’pravo murš‘, hem kaj našti te kontrolirinel ple romnja“. Ako asavko stavi isi e manušen kote so živinea, ma bistre kaj o Isus thovgja o pre ple učenikongere, iako adaja buti kerela la sine jekh robo. Jekh šukar poglavari na mangela o javera te mislinen baši leste kaj tano silno hem važno manuš. Namesto adava, ov mangela leskiri romni hem leskere čhave te osetinen pe šukar hem bahtale (w21.02 2, pas. 3; 4, pas. 11).

Te setina amen ko šuže bukja tano poklon taro Jehova. Ama, bizi razlika kobor sine amaro životo šužo angleder, o životo ko nevo sveto ka ovel panda pošužo. Iako javera šaj te povredinen amen, keda odlučinaja te prostina lenge šaj radosno te služina e Jehovaske. Ako osetinaja amen preterano kriva adava šaj te lel amari radost. Ama sar o Pavle, valjani te verujna kaj o Jehova prostingja amenge (1. Tim. 1:12-15). Amen šaj te živina zasekogaš. Ko nevo sveto nane te žalina bašo bukja so sine angleder. Bašo adava vreme, i Biblija vakerela: „Ko adava so sine poangle, nane te setinen tumen“ (Isa. 65:17). Samo razmislin: Nesave amendar kola so beršencar služinena e Jehovaske hem phurile, ko nevo sveto ka oven palem terne (Jov 33:25). Adaleske, te ova odlučna te na živina ko adava so sine poangle. Namesto adava te koncentririna amen ko nevo sveto hem te kera sa so šaj te resa adari! (w20.11 24, pas. 4; 29, pas. 18-19).

So adžikerela amen ki idnina? Džikote trajnela i bari nevolja, o Jehova ka zaštitinel amen ko duj načinija. Prvo, o Jehova ka zaštitinel ple verna slugen keda o carija e phuvjakere ka uništinen o Baro Vavilon, o svetsko carstvo e hovavne religijakoro (Otk. 17:16-18; 18:2, 4). Palo dava, ov ka zaštitinel ple narodo keda ka uništinel sa adava so ačhilo taro e Satanaskoro sveto ko Armagedon (Otk. 16:14, 16). Keda ačhovaja paše e Jehovaja, tegani o Satana našti te kerel amenge trajno šteta. Ustvari, ov tano adava so ka trpinel trajno šteta (Rim. 16:20). Adaleske, urav celo voeno oprema — hem nikogaš ma ikal la tutar! Ma probin korkori te borine tut protiv o Satana hem leskoro sveto. Pomožin tle phralenge hem phenjenge hem dža palo e Jehovaskoro vodstvo. Ako kerea agjaar, šaj te ove sigurno kaj tlo manglo nebesno Dad ka del tut sila hem ka zaštitinel tut (Isa. 41:10; w21.03 30, pas. 16-17).

Sar šaj te sikava amari doverba ko Jehova? Agjaar so ka primenina o upatstvija so dobinaja len lestar. Ki Biblija isi but izveštaija so sikavena kaj tano but važno te ačhova smirime hem te ovel amen doverba ko Jehova. Džikote proučinea akala izveštaija, dikh so pomožingja akale slugenge te ačhoven smirime keda o javera protivinena pe sine lenge. Na primer, o apostolija na darandile keda o evrejsko Sudsko sovet dengja naredba te čhinaven te propovedinen. Namesto adava, ola hrabro vakergje: „Mora poviše te šuna e Devle nego e manušen“ (Dela 5:29). Čak keda sine progonime o apostolija na sine ki panika. Soske? Adaleske so džanle kaj o Jehova tano tari lengiri strana. Ov sine zadovolno adalea so ola kerena sine. Adaleske, ola ponadari da propovedinena sine o šukar haberi (Dela 5:40-42). Slično, keda o učeniko o Stefan valjani sine te ovel mudardo, ov ačhilo doborom smirimo so leskoro liko dikhjola sine „sar o liko jekhe angeleskoro“ (Dela 6:12-15). Soske? Adaleske so sine sigurno kaj ugodinela e Jehovaske (w21.01 4, pas. 10-11).

Akava značinela kaj isi len čisto sovest hem kaj anglo e Jehovaskere jakhja tane pravedna (Isa. 1:18). Ola vetingje e Jehovaske kaj ka služinen leske, krstingje pe, sikavena vera ki e Isuseskiri žrtva hem paše tane e Jehovaja (Jovan 3:36; 1. Pet. 3:21). Adaleske, o Devel tano zadovolno lencar hem ola šaj te služinen leske dive hem rat akate ki Phuv (Otk. 7:15). Akana ola revno propovedinena bašo Carstvo hem kerena učenikija soske e Devleskoro Carstvo tano lenge najvažno taro sa (Mat. 6:33; 24:14; 28:19, 20). O baro mnoštvo kova so avela tari bari nevolja tano sigurno kaj o Devel ka grižinel pe lenge adaleske so „okova so bešela ko prestol ka phravel plo šatori maškar lende“. Konečno ka ispolninel pe o vetuvanje kova so adžikergje le o javera bakhre kaj o Devel „ka kosel sekoja asvin taro lengere jakhja (Otk 21:3, 4; w21.01 16, pas. 9-10).

Amen mangaja te ova delo tari e Jehovaskiri familija. hem sarine amen trudinaja amen te poštujna adalen kaske o Jehova dengja nesavo avtoriteti. I Biblija sikavela kaj o Jehova ceninela e džuvlen isto sar so ceninela e muršen. Na primer, oj vakerela kaj ko prvo veko o Jehova dengja sveti duh e džuvlenge isto sar so dengja e muršenge te šaj te keren čudija, sar soj te keren lafi ko različna čhibja (Dela 2:1-4, 15-18). Hem džuvlja hem murša tane pomazime taro sveti duh te vladinen zaedno e Hristosea (Gal. 3:26-29). Isto agjaar, hem o murša hem o džuvlja ka dobinen večno životo ki Phuv (Otk. 7:9, 10, 13-15). Osven adava, hem o murša hem o džuvlja isi len zadača te propovedinen o šukar haberi hem te sikaven e manušen (Mat. 28:19, 20). Na primer, ko lil Dela kerela pe lafi baši jekh phen, koja so vikinela pe sine Priskila, oj hem lakoro rom o Akila objasningje o čačipe pošukar e Apoloske — jekh manuš kova so sine šukar školujmo (Dela 18:24-26; w21.02 14, pas. 1; 15, pas. 4).

Tumen o starešine isi tumen važno odgovornost te pomožinen e objavitelenge te oven šukar propovednikija hem učitelija. Ako nekoj ladžala te vodinel o biblisko kursi džikote sian tu prisutno, tegani nudin tu te vodine. O starešine šaj but te ohrabrinen hem te motivirinen e objavitelen so vodinena bibliska kursija (1. Sol. 5:11). Iako šaj ko momenti na vodinaja biblisko kursi, amen šaj te pomožina nekaske te napredujnel duhovno. Bizo te kera but lafi, amen šaj amare šukar spremime komentarencar te poddržina e objavitele džikote vodinela o biblisko kursi. Amen šaj te ova amala e interesentencar keda avena ki dvorana hem te ova lenge šukar primer. O starešine ka ohrabrinen e interesenten agjaar so ka odvojnen lenge vreme. Isto agjaar, o starešine ka ohrabrinen e objavitelen so proučinena e interesentencar agjaar so ka obučinen len hem ka pofalinen len. Amen siem but bahtale keda šaj nešto te kera, čak ako adava tano hari, te šaj te pomožina nekaske te mangel e Jehova hem te služinel leske (w21.03 13, pas. 18-19).

Ko plo životo, o David dokažingja kaj tano odgovorno hem kaj e javeren šaj te ovel len doverba ki leste. Na primer, džikote sine terno, ov grižinela pe sine but ple dadeskere bakhrenge. Adaja sine jekh opasno zadača. O David pokasno vakergja e Sauleske: „Tlo sluga arakhela sine ple dadeskere bakhren, hem tegani alo jekh lavi, a javer puti mečka, hem lelja jekhe bakhre taro stado. Prastandiljum pali leste, khuvgjum le hem ikalgjum e bakhre taro leskoro muj“ (1. Sam. 17:34, 35). O David džanlja kaj tano odgovorno te grižinel pe e bakhrenge. O terne phralja šaj te džan palo e Davideskoro primer agjaar so ka den pestar sa te ispolninen bilo koja zadača soj lenge dendi. Panda sar terno, o David razvingja but paše amalipe e Jehovaja. Adava amalipe sine but považno tari e Davideskiri hrabrost ili leskiri sposobnost te bašalel ki harfa. O Jehova na sine samo e Davideskoro Devel, nego ov sine isto agjaar leskoro amal — leskoro paše amal. Terne phraljalen, i najvažno buti so šaj te keren tani te oven popaše tumare nebesno Dadea (w21.03 3, pas. 4-5).