Mart

Amen na biringjem te ova mrzime hem na uživinaja keda siem progonime baši amari vera. Tegani, soske šaj te ova bahtale keda o javera mrzinena amen? Te dikha trin pričine. Prvo, keda istrajnaja, o Devel tano zadovolno amendar (1. Pet. 4:13, 14). Dujto, amari vera tani ispitimi hem ovela pozorali (1. Pet. 1:7). Hem trito, ka dobina jekh skapoceno nagrada — večno životo! (Rim. 2:6, 7). Kratko otkeda o Isus voskresningja, o apostolija doživingje o bahtalipe bašo kova so ov kergja lafi. Ola sine bahtale, iako sine marde kaštencar hem sine lenge zabranimo te propovedinen. Soske sine bahtale? Adaleske so sine „dostojna te oven ladžakerde bašo [e Isuseskoro] anav“ (Dela 5:40-42). Lengoro mangipe sprema lengoro Gospodari sine pobaro nego i dar so sine len taro lengere dušmanja. Hem ola sikavgje pumaro mangipe adalea so ponadari da propovedingje o šukar haberi „bizo te čhinaven“. But phralja avdive ponadari da verno služinena iako isi len pharipa. Ola džanena kaj o Jehova nane te bistrel adava so kerena hem o mangipe so sikavena bašo leskoro anav (w21.03 25, pas. 18-​19).

E pomazime hristijanen nane len nebesno nadež keda bijangjovena. O Devel dengja len adaja nadež. Ola razmislinena baši pli nadež, molinena pe baši late hem edvaj adžikerena te dobinen pumari nagrada ko nebo. Ola na džanena savo ka ovel lengoro telo ko nebo (Fil. 3:20, 21; 1. Jov. 3:2). Ama, ola edvaj adžikerena te džan ko pumare thana ko nebesno Carstvo. E javere bakhren isi len nadež te živinen zasekogaš ki Phuv, a adaja tani jekh prirodno želba so isi sekole manuše. Ola edvaj adžikerena o dive keda ka pomožinen te kerel pe celi Phuv raj. Radujnena pe bašo dive keda ka šaj te gradinen pumare khera, te sadinen pumare bavče hem keda ola hem lengere čhave ka oven sovršeno saste (Isa 65:21-23). Isto agjaar, edvaj adžikerena te patujnen ko različna thana ki Phuv, te dikhen o planine, o šume hem o okeanija hem te istražinen sa o bukja so kergja len o Jehova. Ama, kerela len najbahtale adava so džanena kaj lengoro amalipe e Jehovaja ka ovel sa pozoralo (w21.01 18-19, pas. 17-18).

Otkeda o Vaviloncija napadingje hem uništingje i phuv, baši late šaj sine samo te vakerel pe: „Akava tano pusto than, bizo manuša hem bizi stoka. Dendi tani ko vasta e Haldejconge“ (Erem. 32:43). Okolu 200 berša otkeda o Joil dengja plo proroštvo, o Jehova koristingja e Eremija te prorokujnel panda nešto bašo akava napad. O Devel vakergja kaj o dušmanja temelno ka roden celi phuv te šaj te arakhen sa e Izraelcon kola so kergje lošnipe, hem kaj ka zarobinen len. „’Ake, ka bičhalav but ribarija‘, vakerela o Jehova, ’kola so ka astaren len. Palo adava ka bičhalav but lovdžije, hem ola ka astaren len ko sa o planine, ko sa o uče thana, hem ko sa o oštra karpe... Celosno ka kazninav len baši lengiri greška hem bašo lengoro grevo‘“. O Izraelcija so na kaingje pe ka našti sine nigde te garaven pe taro Vaviloncija — ni ko more ni ko šume (Erem. 16:16, 18; w20.04 5, pas. 12-13).

Ko jekh važno momenti taro plo životo, o Lot na šungja odma e Jehovaskere jasna upatstvija. Šaj te mislina amenge kaj o Lot na halilo seriozno adava so vakergja leske o Jehova, pa čak kaj na sine poslušno. Ama, o Devel na otkažingja pe lestar. I Biblija vakerela: „E Jehova sine le sočuvstvo baši leste“. Adaleske o angelija astargje le taro vas hem iklile tari diz (1. Moj. 19:15, 16). E Jehova šaj sine le poviše pričine soske te sikavel sočuvstvo e Loteske. O Lot šaj na mangela sine te džal peske kheral adaleske so darala sine taro manuša soj tane avrijal tari diz. Sine javera da bukja so šaj daravena le. O Lot verojatno šungja kaj ki jekh dolina so sine paše, duj carija pele ko hor dupke kola so sine pherde katranea (1. Moj. 14:8-12). Sar rom hem dad, o Lot sigurno sine sekirimo ple familijake. Osven adava, ov sine barvalo manuš, hem verojatno sine le šužo kher ko Sodom (1. Moj. 13:5, 6). Džangjola pe, nijekh taro akala bukja na sine izgovor te na šunel odma e Devle. Sar i te ovel, o Jehova na koncentriringja pe ki e Loteskiri greška, nego dikhela le sine sar pravedno manuš (2. Pet. 2:7, 8; w20.04 18, pas. 13-​14).

Ternalen, šaj ka valjani vreme okolenge so džanena tumen sar tikne te haljoven kaj barilen. Ama, oven sigurna kaj o Jehova na koncentririnela pe ko adava sar izgledinena. Ov džanela koj sien hem so šaj te keren (1. Sam. 16:7). Keren pozoralo tumaro amalipe e Devlea. O David kergja adava adalea so vnimatelno dikhela sine o bukja so kergja len o Jehova. Ov razmislinela sine so sikavena adala bukja bašo Jehova (Ps. 8:3, 4; 139:14; Rim. 1:20). Javer buti so šaj te keren tani te roden o Jehova te del tumen sila. Na primer, dali nesave tumare součenikija asana tumenge adaleske so sien e Jehovaskere svedokija? Ako agjaar, molinen tumen e Jehovaske te pomožinel tumenge te ikljoven ko krajo akale problemea. Primeninen o praktična sovetija so arakhljona ko leskoro Lafi hem ko amare publikacie hem videoklipija. Sekova puti keda dikhena sar o Jehova pomožinela tumenge te ikljoven ko krajo e problemencar, tumari doverba ki leste ka bajrol. Isto agjaar, keda o javera ka dikhen kaj isi tumen doverba ko Jehova, ka stekninen lengiri doverba (w21.03 4, pas. 7).

I molitva tani panda jekh skapoceno poklon so našti dikhela pe. O paše amala mangena te keren lafi maškar peste bašo adava so mislinena hem sar osetinena pe. Akava važinela hem bašo amaro amalipe e Jehovaja. Ov kerela amencar lafi preku plo Lafi, kote so vakerela amenge so mislinela hem sar osetinela pe. A amen vakeraja leske amare najhor misle hem najgaravde čuvstvija keda molinaja amen leske. Sar jekh amal so grižinela pe, ov na samo so šunela amare molitve nego isto agjaar odgovorinela ki lende. Ponekogaš adava kerela le sigate, ama ponekogaš valjani te molina amen poviše puti baši isto buti. Sepak, šaj te ova uverime kaj o Jehova ka odgovorinel amenge ko pravo vreme hem ko najšukar način. Džangjola pe, šaj nane te odgovorinel amenge sar so adžikeraja. Na primer, namesto te cidel nesavi nevolja ili iskušenie, šaj ka del amen sila hem mudrost te izdržina len (1. Kor. 10:13). Sar šaj te sikava blagodarnost baši molitva sar skapoceno poklon taro Devel? Jekh način tano agjaar so ka ova poslušna ko sovet te molina amen sekogaš (1. Sol. 5:17; w20.05 27-28, pas. 7-8).

Te šaj ma te sopkinen pe, o maratoncija dikhena angli peste hem na cidena pe jakhja taro drumo. Čak hem te perel, o trkači uštela hem ponadari da prastala. Namesto te mislinel ko adava so sopkingja le, leske tano najvažno te resel dži ki cel hem te dobinel i nagrada. Džikote prastaja i hristijansko trka, šaj te sopkina amen but puti agjaar so ka kera greške amare lafencar ili ponašibaja. Šaj amare phralja hem phenja da kola so prastana zaedno amencar te keren greške kolencar so ka povredinen amen. Akava na valjani te iznenadinel amen. Sarine siem nesovršena, hem sarine prastaja ko isto tesno drumo so ingarela ko životo. Adaleske sigurno ka slučinel pe te „gurina“ nekas ili nekoj te „gurinel“ amen, hem šaj tegani sekoj ka ovel le pričina te žalinel pe protiv nekaste (Kol. 3:13). Ama, namesto te mislina ko adava so sopkingja amen, te koncentririna amen ki nagrada so adžikerela amen hem ponadari da te prasta ki trka. Ako siem holjame hem ako na mangaja palem te ušta, nane te resa dži ki cel hem nane te dobina i nagrada. Osven adava, verojatno ka ova prečka e javerenge kola so trudinena pe te prastan ko tesno drumo so ingarela ko životo (w20.04 26, pas. 1; 28, pas. 8-9).

O proroko o Daniel opišingja jekh but baro kipi kaskere delija taro telo sine kerde taro različna metalija. Sekova delo pretstavinela sine vlada koja so sine la direktno vlijanie upro e Devleskoro narodo. Sa adala vlade vladingje ko različna vremija. O pre akale kipeskere sine kerde taro sastrn hem glina. Ola pretstavinena i posledno manušikani vlada — i anglo-amerikansko svetsko sila. Akava proroštvo sikavela kaj ola panda ka oven ki vlast keda e Devleskoro Carstvo ka uništinel sa o manušikane vlade. O apostol Jovan isto agjaar kerela lafi bašo nekobor svetska vlade kolen so sine vlijanie upro e Devleskoro narodo. Ko leskoro proroštvo, akala vlade tane pretstavime jekhe zveroja efta šerencar. O eftato šero pretstavinela e anglo-amerikansko svetsko sila. Akava tano važno soske oj tani o posledno šero taro zvero, pali late na pojavinela pe javer šero. O eftato šero akale zveroskoro panda ka ovel svetsko sila keda o Hristos, zaedno ple nebesno vojskaja, ka uništinel la zaedno sa e javere vladencar ko sveto (Otk. 13:1, 2; 17:13, 14; w20.05 14, pas. 11-12).

Akaja ednostavno izjava setinkerela amen ko jekh važno čačipe, a adava tano: taro Devel avela o životo, a isto agjaar lestar avela o mangipe. O Jehova mangela amen! Leskoro mangipe kerela te osetina amen bezbedna, bahtale hem zadovolna. O hristijanja našti birinena dali ka sikaven mangipe ili na. Adaja tani jekh zapoved (Mat. 22:37-40). Keda pendžaraja šukar e Jehova, šaj te ovel amenge lokho te šuna i prvo zapoved. O Jehova tano sovršeno, ov grižinela pe amenge hem ljubezno tano amencar. Ama, šaj te ovel amenge pharo te šuna i dujto zapoved. Soske? Amare phralja hem phenja taro sobranie — kola tane amare najpašutne — tane nesovršena. Adaleske, ponekogaš šaj nane te ponašinen pe amencar ko ljubezno način. O Jehova džanlja kaj ka ovel amenge pharo te šuna akaja zapoved, adaleske koristingja nesave manušen so pišingje i Biblija te sikaven amen soske valjani te sikava mangipe hem sar valjani te kera adava. Jekh taro adala manuša so pišingja asavke sovetija tano o apostol Jovan (1. Jov. 3:11, 12; w21.01 8, pas. 1-2).

Bizi razlika dali akana sigende počmingjem te služina e Jehovaske ili beršencar više služinaja leske, valjani te puča amen: „Dali borinava man keda o Satana probinela te podelinel mlo vilo?“ Na primer, so ka kere ako ki televizija ili ko internet ikljona slike so šaj te keren ki tute nemoralna misle? Šaj lokhe te vakere tuke kaj adava nane pornografija. Ama, dali šaj ko asavko način o Satana probinela te podelinel tlo vilo? Jekh asavki provokativno slika šaj te ovel sar jekh oštro tover kova so koristinela pe te šaj te pharavel pe jekh baro trupco kaš. Keda prvo puti khuvaja e toverea o trupco na odvojnela pe odma. Ama, otkeda o tover ka khuvel pohor ko trupco ko krajo ov ka odvojnel pe ko duj delija. Šaj li o slike so dikhaja len te oven sar adava tover? Adava so ko početok na dikhjola opasno šaj but sigate te podelinel nekaskoro vilo, a adava šaj te čhivel le te kerel grevo hem te čhinavel te ovel verno e Devleske. Adaleske ma dozvolin ništo so nane pristojno te khuvel ko tlo vilo. Trudin tut celo vilea te dara taro e Jehovaskoro anav! (w20.06 11-​12, pas. 14-15).

Valjani ponadari da te pomožina hem te ohrabrina okolen soj neaktivna čak otkeda ka arakha len. Isto sar o čhavo tari e Isuseskiri sporedba, lende da šaj isi len emocionalno dukh kolake so ka valjani poviše vreme te sasljol (Luka 15:17-24). Osven adava, adaleske so nesavo vreme sine ko e Satanaskoro sveto, verojatno tane slaba ko duhovno pogled. Mora te pomožina lenge te keren pozorali pumari vera ko Jehova. Ki sporedba bašo bakhro so našavdilo, o Isus vakergja kaj, keda o pastiri arakhlja le, čhivgja le ko pikje hem irangja le ko stado. Ov više trošingja vreme hem sila te šaj te arakhel akale bakhre. Sepak, sine leske jasno kaj ka mora te phiravel le adaleske so le na sine le dovolno sila te phirel korkori (Luka 15:4, 5). Šaj ka valjani te trošina vreme hem sila te šaj te pomožina nesave neaktivna phralenge hem phenjenge te borinen pe e problemencar kola so kerena te ovel lenge pharo palem te služinen e Jehovaske. Ama, adaleske so isi amen i pomoš taro e Jehovaskoro duho, taro leskoro Lafi hem taro publikacie so dobinaja len preku i organizacija, šaj te pomožina lenge te sasljoven ko duhovno pogled. Adaleske, ako o starešine zamolinena tut te proučine nekasaja taro neaktivna, ov spremno te pomožine (w20.06 28, pas. 14-​15).

Sekova jekh amendar valjani te sikavel mangipe soske adava tano i glavno buti pali koja soj pendžarde o čačutne hristijanja. Ama, isto agjaar, o Pavle vakergja: „Molinava man... sa poviše te džanen hem sa potemelno te haljoven o bukja“ (Fil. 1:9, Radosna Vest). Ako na keraja agjaar, upri amende lokhe šaj te vlijajnen o sikljojba so širinena len o „manuša so hovavena“, maškar kolende soj hem o otpadnikija (Ef. 4:14). Keda but taro učenikija ko prvo veko čhinavgje te džan palo Isus, o Petar ačhilo cvrsto uverimo kaj ko Isus tane „o lafija bašo večno životo“ (Jovan 6:67, 68). Iako ko adava vreme na halilo sa adava so vakerela sine leskoro Gospodari, o Petar ačhilo verno soske sine leske jasno koj tano o Hristos. Tu da šaj te ove pouverimo kaj adava so sikavela i Biblija tano čače. Ako kerea adava, tli vera ka ačhovel zorali bizi razlika so ka slučinel pe, hem ka šaj te pomožine e javerengiri da vera te ovel pozorali (2. Jov. 1, 2; w20.07 8, pas. 2; 13, pas. 18).

Te šaj te pomožina amare phralenge hem phenjenge te ačhoven ko čačipe, mora te ova sočuvstvitelna (1. Jov. 3:10, 11, 16, 17). Mora te manga amen na samo keda sa tano šukar nego isto agjaar keda isi problemija. Na primer, dali pendžarea nekas kastar so mulo nekoj soj leske paše, hem adaleske valjani leske uteha ili praktično pomoš? Dali šungjan kaj nesave amare phralja našavgje skoro sa so sine len ki prirodno katastrofa hem kaj valjani lenge pomoš te šaj palem te gradinen o dvorane ili pumare khera? Sikavaja kobor tano baro amaro mangipe hem sočuvstvo sprema amare phralja hem phenja, na samo adalea so vakeraja, nego soj najvažno, adalea so keraja baši lende. Keda sikavaja amenge mangipe, džaja palo primer amare nebesno Dadeskoro (1. Jov. 4:7, 8). Jekh važno način sar sikavaja mangipe tano agjaar so prostinaja jekh jekheske. Na primer, nekoj šaj ka povredinel amen, a palo adava ka izvininel pe amenge. Ka sikava mangipe ako prostinaja leske hem bistraja adava so kergja amenge (Kol. 3:13; w20.07 24, pas. 14-15).

Dali sekasaja so ka voskresninel, posebno ka proučinel pe i Biblija, slično sar so keraja avdive e manušencar? Dali adala so ka voskresninen ka oven delo taro sobranija hem dali ka oven sikavde sar te proučinen adalencar so ka voskresninen pali lende? Ka mora te adžikera hem te dikha. Sepak, džanaja kaj ko krajo taro milja berša so ka vladinel o Hristos, „i phuv ka ovel pherdi pendžaribaja bašo Jehova“ (Isa. 11:9). Iako ko adala milja berša ka ovel amen but buti, sa adava so ka kera ka anel amenge baro bahtalipe! Džikote trajnena o milja berša, sar narodo e Jehovaskoro, sarine amen ka valjani ponadari da te kera promene te šaj te ugodina leske. Adaleske, ka valjani te haljova adalen so ka voskresninen hem sočuvstvitelno ka pomožina lenge te meninen pumare pogrešna misle hem želbe hem te živinen sprema e Devleskere merilija (1. Pet. 3:8). Sigurno, adala so ka voskresninen ka dikhen kaj e Jehovaskoro narodo tano ponizno hem kaj ponadari da kerela promene te šaj te ugodinel e Jehovaske. Tegani, ola ka mangen te obožavinen e Jehova zaedno lencar (Fil. 2:12; w20.08 16, pas. 6-7).

Ako šunaja e Pavleskoro sovet hem ispitinaja amare postapke, šaj ka počmina te dikha kaj isi amen nesave sposobnostija so e javeren nane. Na primer, jekh starešina šaj nane le sposobnost sar govorniko ki bina, ama šaj te ovel but šukar ki služba te kerel učenikija. Ili, šaj nane doborom organizirimo sar o javera starešine, ama tano pendžardo sar grižlivo hem sočuvstvitelno pastiri kastar so o objavitelija osetinena pe slobodna te roden biblisko sovet. Ili šaj tano pendžardo sar gostoprimlivo phral (Evr. 13:2, 16). Keda siem svesna bašo amare jaka strane, tegani ka osetina amen šukar bašo adava so šaj te kera ko sobranie. Adava ka pomožinel amenge te na ova ljubomorna amare phralenge bašo sposobnostija so nane amen. Bizi razlika kova tano amaro than ko sobranie, sarinen valjani te ovel amen želba pošukar te kera amari služba hem te razvina amare sposobnostija (w20.08 24, pas. 16-18).

O Raterford ko 1935 berš, ko jekh kongres ko Vašington, SAD, ikergja jekh važno govor e naslovea „O baro mnoštvo“. Ko akava govor, o phral Raterford objasningja koj tane adala so pripadinena ko „baro mnoštvo“ soj tano spomnimo ko Otkrovenie 7:9. Dži tegani, o Istražuvačija e Biblijakere mislinena sine kaj akaja da grupa ka džal te živinel ko nebo, ama nane te oven carija zaedno e Isusea adaleske so sine pohari verna. O phral Raterford koristingja stihija te šaj te objasninel kaj o manuša taro baro mnoštvo nane birime te živinen ko nebo, ama ola tane o javera bakhre e Hristoseskere kola so ka preživinen i bari nevolja hem ka živinen večno ki Phuv (Otk. 7:14). O Isus vetingja: „Isi man javera da bakhre, kola so nane taro akava trlo. Lende da mora te anav, hem ola ka šunen mlo glaso, pa sarine ka oven jekh stado jekhe pastirea“ (Jovan 10:16). Akala javera bakhre tane e Jehovaskere svedokija kola soj verna hem isi len nadež te živinen zasekogaš ko raj ki Phuv (Mat. 25:31-33, 46; w21.01 14, pas. 1-2).

Amenge valjani samodisciplina ako mangaja te završina i zadača so isi amen te propovedina (Mat. 28:19, 20). Amen na nasledinaja i samodisciplina. Sar manuša obično mangaja te kera o bukja ko polokho način. Te šaj te ovel amen samodisciplina, prvo mora te ovel amen samokontrola. Adaleske valjani amenge pomoš te sikljova te kera o bukja so šaj nane amenge lokhe. O Jehova dela amen adaja pomoš preku plo sveti duh (Gal. 5:22, 23). E apostol Pavle sine le samodisciplina. Ama, ov priznajngja kaj valjani sine „te marel“ plo telo te šaj te kerel adava soj ispravno (1. Kor. 9:25-27). Ov pottikningja e javeren te oven samodisciplinirana hem te keren sa o bukja „pristojno hem sar soj o redo“ (1. Kor. 14:40). Mora but te trudina amen te šaj ponadari da te služina e Jehovaske, a ko adava tano vklučimo redovno te propovedina hem te sikava e javeren o šukar haberi (Dela 2:46; w20.09 6-7, pas. 15-​17).

Avdive ko but phuvja ko sveto šaj slobodno te propovedina. Dali tu da živinea ki asavki phuv? Ako oja, puč tut: „Sar koristinava akaja sloboda?“ Ko akala vozbudliva posledna dive, e Jehovaskiri organizacija tani zafatimi e najvažno bukjaja so postojnela — o propovedibe hem o sikajbe e manušen. E Jehovaskere narodo isi le but so te kerel ki akaja buti. Sar šaj te koristine o mirno periodi? (2. Tim. 4:2) Soske na ispitinea tle okolnostija te šaj te dikhe dali tu ili nekoj tari tli familija šaj te propovedinel ki pobari mera, pa čak te služinel sar pioneri? Akana nane vreme te kheda barvalipa ili materijalna bukja — bukja kolendar nane te ovel amen nisavi korist ki bari nevolja (Izr. 11:4; Mat. 6:31-33; 1. Jov. 2:15-17). But objavitelija siklile nevi čhib te šaj te pomožinen e javerenge te sikljon bašo Jehova. E Devleskiri organizacija poddržinela len adalea so dela biblisko literatura ko poviše taro 1.000 čhibja! (w20.09 16, pas. 9-​11).

Jekh šukar vojniko tano verno. Ov ka borinel pe sa ple silencar te šaj te zaštitinel e manušen so mangela len ili o bukja soj leske važna. O Pavle ohrabringja e Timotee te ačhovel verno samo e Devleske hem hor te poštujnel le (1. Tim. 4:7). Kobor posilno tano o mangipe hem amari vernost sprema o Jehova, doborom poviše ka manga te arakha o čačipe soj amenge dendo (1. Tim. 4:8-10; 6:6). Te šaj jekh šukar vojniko te ovel sekogaš spremno baši borba, mora te ovel le samodisciplina. O Timotej šaj sine te borinel pe protiv e Satanaskoro vlijanie adaleske so šungja e Pavleskoro sovet taro 2. Timotej 2:22. Ov boringja pe ple pogrešno želbencar, razvingja šuže osobine hem nakhavgja plo vreme e phralencar hem e phenjencar. Bašo adava valjani sine leske samodisciplina. Amenge da valjani akaja osobina te šaj te pobedina amare grešna želbe (Rim. 7:21-25). Osven adava, valjani amenge samodisciplina te šaj te huljava i purani ličnost hem te urava i nevi (Ef. 4:22, 24). A keda siem umorna palo jekh naporno dive, ponekogaš mora te terina amen te dža ko sostanok (Evr. 10:24, 25; w20.09 28, pas. 9-​11).

Valjani te ova strpliva keda pomožinaja e interesenteske te pherel o uslovija te krstinel pe. Ama, valjani te dikha dali isi le želba te služinel e Jehovaske. Dali dikhea kaj trudinela pe te šunel e Isuseskere zapovedija ili samo mangela te džanel interesna bukja tari Biblija? Redovno razmislin bašo adava sar napredujnela o interesenti. Na primer, dali vakerela so osetinela bašo Jehova? Dali molinela pe leske? (Ps. 116:1, 2). Dali uživinela džikote čitinela i Biblija? (Ps. 119:97). Dali redovno džala ko sostanokija? (Ps. 22:22). Dali kerela o potrebna promene ko plo životo? Dali počmingja te kerel lafi ple familijaja ili ple amalencar bašo adava so siklilo? (Ps. 9:1). A najvažno taro sa, dali mangela te ovel e Jehovaskoro svedoko? (Ps. 40:8). Ako o interesenti na kerela promene ko nesave taro akala bukja, trudin tut taktično te doznajne koja tani i pričina, a palo adava ker lea lafi ko jekh ljubezno ama otvoreno način (w20.10 18, pas. 14-​15).

E Isuseskoro Dad soj ko nebo sekogaš anela šukar odluke, a isto agjaar leskere roditelija ki Phuv angje mudra odluke. Ama, sar so bajrola sine, o Isus mora sine korkori te anel odluke (Gal. 6:5). Isto sar sarine amen, le da sine le slobodno volja. Šaj sine te birinel te ovel sebično hem ma te kerel e Devleskiri volja. Namesto adava, ov odlučingja te ačhol paše e Jehovaja. Keda o Isus halilo koja tani leskiri uloga ki e Devleskiri namera, ov odlučingja te prifatinel adaja zadača (Jovan 6:38). Džanlja kaj but džene ka mrzinen le. Iako adaja misla na sine leske prijatno, ov sepak odlučingja te ačhovel poslušno e Jehovaske. Otkeda krstingja pe ko 29 berš a.e., i najvažno buti ko životo sine leske te kerel adava so rodela sine lestar o Jehova (Evr. 10:5-7). Čak džikote merela sine ko stubo mučibaske, o Isus sine odlučno dži ko krajo te kerel i volja ple Dadeskiri (Jovan 19:30; w20.10 29, pas. 12; 30, pas. 15).

Dali džanea nesave phralen ili phenjen taro tlo sobranie so borinena pe nasvalipaja hem javere problemencar? Ili mulo nekoj taro lengere najpaše. Ako šunaja kaj nekaske valjani pomoš, šaj te roda taro Jehova te pomožinel amenge te vakera ili te kera nešto ljubezno. Amare lafija hem postapke šaj te oven o ohrabruvanje so valjani amare phraleske ili phenjake (1. Pet. 4:10). Ama, amen džanaja kaj šaj te ova hrabra soske o Jehova tano amencar. Ov pomožinela amenge preku o Isus hem o angelija. Isto agjaar, ako tano ko sklad leskere nameraja, o Jehova šaj te pomožinel amenge preku o manuša so isi len avtoriteti. Hem but džene amendar lično doživingje sar o Jehova koristinela plo sveti duh te pottikninel amare phralen hem phenjen te pomožinen amenge. Adaleske, sar o apostol Pavle, isi amen but pričine doverbaja te vakera: „O Jehova tano adava so pomožinela man, nane te darav. So šaj te kerel mange manuš?“ (Evr. 13:6, w20.11 17, pas. 19-​20).

E apostolen sine len jasna dokazija kaj o Jehova sine lencar. Ov dengja len mokj te keren čudija (Dela 5:12-16; 6:8). Ama, avdive o Jehova na del amen asavki mokj. Sepak, o Jehova preku plo Lafi, ljubezno uverinela amen kaj keda siem progonime baši pravednost, ov tano zadovolno amencar hem dela amen plo sveti duh (1. Pet. 3:14; 4:14). Adaleske na valjani te sekirina amen bašo adava so ka kera ako siem progonime ki idnina. Namesto adava, valjani te da sa amendar te bajrara amari doverba ko Jehova kaj ov ka poddržinel amen hem ka spasinel amen. Amen valjani te ovel amen doverba ko e Isuseskoro vetuvanje: „Ka dav tumen lafija hem mudrost kolaja so sa tumare protivnikija zaedno našti ka protivinen pe tumenge“. Ov isto agjaar vetingja amenge: „Preku tumari istrajnost ka spasinen tumare životija“ (Luka 21:12-19). Nikogaš ma bistre kaj o Jehova pamtinela o najtikne detalija bašo ple sluge so mule verna. Adaleske ov ka voskresninel len (w21.01 4, pas. 12).

O apostol Pavle na sine edinstveno so kergja lafi baši nadež ko voskresenie. E Devleskoro verno sluga o Jov isto agjaar kergja lafi bašo adava. Ov sine sigurno kaj o Devel ka setinel pe ki leste hem palem ka vazdel le ko životo (Jov 14:7-10, 12-15). O voskresenie e mulengoro tano jekh „osnovno sikljojbe“ koleste so verujnena o hristijanja (Evr. 6:1, 2). O Pavle podetalno kergja lafi bašo voskresenie ko 1. Korinkjanite, 15 poglavje. Adava so pišingja sigurno ohrabringja e hristijanen ko adava vreme. Bizi razlika kobor vreme verujnea ko voskresenie, akava poglavje ka ohrabrinel tut hem ka bajrarel tli nadež kaj o voskresenie sigurno ka ovel. O voskresenie e Isuseskoro dela amen garancija kaj ako nekoj taro amare mangle merela, ka voskresninel. O voskresenie e Isuseskoro sine delo taro „šukar haberi“ so objavingja le o Pavle e hristijanenge taro Korint (1. Kor. 15:1, 2). Ustvari, ov vakergja kaj ako jekh hristijani na verujnela ko adava voskresenie, tegani džabe isi le vera (1. Kor. 15:17; w20.12 2, pas. 2-4).

So pomožingja e apostol Petareske palem te osetinel pe šukar? O Petar setingja pe kaj o Isus poangle molingja pe leske te na otkažinel pe tari pli vera. O Jehova odgovoringja ki adaja molitva so avela sine taro vilo. Pokasno, o Isus lično pojavingja pe e Petareske, verojatno te šaj te ohrabrinel le (Luka 22:32; 24:33, 34; 1. Kor. 15:5). O Isus isto agjaar pojavingja pe sa e apostolenge otkeda ola celo rat gele te astaren mačhe ama na astargje ništo. Ki adaja prilika, o Isus dengja e Petareske šansa te sikavel kobor mangela e Isuse. O Isus prostingja ple mangle amaleske hem dengja le poviše odgovornostija (Jovan 21:15-17). Adava sar o Isus postapingja e Petarea sikavela kobor tano milostivo, isto sar plo nebesno Dad. Adaleske keda amen keraja greške, na valjani te mislina kaj o Jehova nikogaš nane te prostinel amenge. Valjani te ovel amen ki godi kaj o Satana mangela te mislina agjaar. Namesto adava, valjani te trudina amen te dikha korkori amen hem e javeren so grešingje amenge agjaar sar so dikhela amen amaro nebesno Dad, kova so sikavela amenge sočuvstvo hem mangipe (Ps. 103:13, 14; w20.12 20-21, pas. 17-19).

Šaj te sikljova taro primerija taro okola so na ačhile smirime hem so na sine len doverba ko Jehova. Adava so ka proučina akala lošna primerija ka pomožinel amenge te izbegina te kera ista greške so kergje len ola. Na primer, ko početok keda vladinela sine, o Asa rodela sine e Jehova keda sine le problemija. Ama pokasno ov na rodela sine pomoš taro Devel, namesto adava ov probingja korkori te rešinel ple problemija (2. Let. 16:1-3, 12). Ko početok, adava so pučlja e Sirijcon te pomožinen leske protiv o Izraelcija izgledinela sine sar šukar ideja. Ama akava mir na trajngja but vreme. O Jehova preku jekh proroko vakergja leske: „Adaleske so sine tut doverba ko sirisko cari, a na ko Jehova tlo Devel, i vojska taro sirisko cari našlja taro tle vasta“ (2. Let. 16:7). Amen da valjani te na mislina kaj šaj korkori te rešina amare problemija bizo te roda vodstvo taro Jehova preku leskoro Lafi. Čak keda valjani sigate te ana nesavi odluka, valjani te ovel amen doverba ko Jehova hem ov ka pomožinel amenge te ana ispravno odluka (w21.01 6, pas. 13-15).

Avdive, nesave taro e Jehovaskere svedokija tane bokhale adaleske so nane len dovolno pare te kinen peske hajbaske ili adaleske so isi gragjanska nemirija hem vojne. Javera tane ko zatvor baši pli vera. Ama, okola taro baro mnoštvo tane but bahtale soske džanena kaj otkeda ka ovel uništimo akava lošno sveto, len ka ovel len but duhovno hem fizičko hrana. Keda o Jehova ka uništinel e Satanaskoro lošno sveto, ov ka zaštitinel e bare mnoštvo tari pli holi koja so ka ovel sar „baro tatipe“. Otkeda ka završinel i bari nevolja, o Isus ka vodinel okolen so ka ačhoven ki Phuv ko „panja so dena [večno] životo“ (Otk. 7:17). Razmislin bašo akava: savi šuži nadež isi e bare mnoštvo. Milijarde manuša nikogaš nane te meren! (Jovan 11:26). O javera bakhre but tane blagodarna e Jehovaske hem e Isuseske baši akaja but šuži nadež so isi len! (w21.01 16-17, pas. 11-12).

Ki posledno rat taro plo životo ki Phuv, o Isus razmislingja bašo sa o predizvikija so ka oven leskere učenikon. Adaleske so manglja ple učenikon, ov molingja ple Dade te arakhel len taro o Lošno (Jovan 17:14, 15). O Isus džanlja kaj otkeda ka iranel pe ko nebo, o Satana o Beng ponadari da ka borinel pe protiv sa okola so mangena te služinen e Jehovaske. Jasno tano kaj e Jehovaskoro narodo valjani sine te ovel zaštitimo. Avdive valjani amenge e Jehovaskiri zaštita sar nikogaš angleder. Adaleske so o Satana sine frdimo taro nebo, ov „but tano holjamo“ (Otk. 12:12). Ov kergja nesave manuša te mislinen kaj služinena e Devleske keda progoninena amen (Jovan 16:2). A javera, kola so na verujnena ko Devel, progoninena amen adaleske so siem porazlična taro manuša ko sveto. Bizi razlika soske progoninena amen o manuša, amen na valjani te dara. Soske? O odgovor tano dendo ko avdisutno stiho (w21.03 26, pas. 1, 3).

Sa so kerela o Jehova, motivirimo tano taro mangipe. Ov sikavela kaj grižinela pe bašo sa amare potrebe. Adaleske so mangela amen, o Jehova dengja i otkupnina amenge. Isto agjaar, o Isus da but mangela amen adaleske so dengja plo životo baši amende (Jovan 3:16; 15:13). Ništo našti te čhinavel o mangipe so isi e Jehova hem e Isuse sprema ple verna sluge (Jovan 13:1; Rim. 8:35). Isto agjaar, sa so kerela jekh familijarno poglavari valjani te ovel motivirimo taro mangipe. Soske adava tano doborom važno? O apostol Jovan vakergja: „Koj na mangela ple phrale ili ple familija kaste so dikhela, našti te mangel e Devle kaste so na dikhela“ (1. Jov. 4:11, 20). Jekh rom kova so mangela ple familija hem so mangela te džal palo primer e Jehovaskoro hem e Isuseskoro, ka grižinel pe ple familijake ko duhovno, emocionalno hem materijalno pogled (1. Tim. 5:8). Ov ka sikavel hem ka vospitinel ple čhaven. Ov isto agjaar, ponadari da ka sikljol te anel odluke so ka falinen e Jehova hem ka oven korisna leskere familijake (w21.02 5, pas. 12-13).

Amaro nebesno Dad so mangela amen džanela kaj o lošna bukja so slučingje pe amenge šaj te keren te dikha negativno ki amende. Ama, isto agjaar, ov dikhela o šukar osobine ki amende, čak ako amen mislinaja kaj nane amen (1. Jov. 3:19, 20). Nekoj so trudinela pe te čhinavel te kerel nešto soj pogrešno šaj te obeshrabrinel pe ako kerela i isto greška. Normalno tano te osetina amen dži negde kriva keda grešinaja (2. Kor. 7:10). Ama, na valjani te dža ki krajnost hem te osudina amen, agjaar so ka mislina: „Na ovela man ništoske. O Jehova nikogaš nane te prostinel mange“. Ama, adava nane čače. Asavko negativno razmislibe šaj te kerel te čhinava te služina e Jehovaske. Namesto adava, rode e Jehova ki molitva hem rode lestar te prostinel tuke (Isa. 1:18). Keda ka dikhel kaj iskreno kainea tut, ov ka prostinel tuke. Isto agjaar, ker lafi e starešinencar. Ola strplivo ka pomožinen tuke palem te ove duhovno zoralo (Jak. 5:14, 15; w20.12 23, pas. 5-6).

O Isus poštujnela sine e džuvlen. Ov na sine sar o fariseija, kola so mislinena sine kaj o džuvlja nane doborom važna sar o murša. Ola na kerena sine e džuvlencar lafi ko thana kote so sine but manuša hem nikogaš na bi kerena sine lencar lafi bašo Spisija. Sprotivno lendar o Isus kerela sine lafi bašo važna čačipa hem džuvlencar hem muršencar (Luka 10:38, 39, 42). Isto agjaar, ov dozvolingja e džuvlenge te patujnen lea džikote propovedinela sine (Luka 8:1-3). Hem, o Isus dengja čest e džuvlenge te vakeren e apostolenge kaj ov voskresningja (Jovan 20:16-18). O apostol Pavle posebno naglasingja e Timoteeske te poštujnel e džuvlen. O Pavle priznajngja kaj e Timoteeskiri daj hem i baba sine o prva so sikavgje e Timotee bašo „sveta spisija“ (1. Tim. 1:5; 3:14, 15). Keda pišingja o pismo dži ko Rimjanja, o Pavle pozdravingja nesave phenjen agjaar so spomningja lengoro anav. O Pavle na samo so sine svesno bašo adava so kerena sine akala phenja, ov isto agjaar vakerela sine kobor ceninela adava so kerena ki služba (Rim. 16:1-4, 6, 12; Fil. 4:3; w21.02 15, pas. 5-6).