April

Dali borinea tut nesave problemea? Šaj nekoj ko sobranie povredingja tut (Jak. 3:2). Ili, tle kolege ili součenikija šaj asana tuke so služinea e Jehovaske (1. Pet. 4:3, 4). Ili palem, nekoj tari tli familija mangela te čhinavel tut te dža ko sostanokija ili te kere lafi e javerencar baši tli vera (Mat. 10:35, 36). Ako o problemi tano but pharo, šaj mislinea kaj pošukar tano te čhinave te služine e Jehovaske. Ama, šaj te ove sigurno kaj bizi razlika savo problemi isi tut, o Jehova ka del tut mudrost te ane šukar odluke hem sila te istrajne ki tli situacija. O Jehova manglja ki Biblija te oven pišime primerija so sikavena sar o nesovršena manuša iklile ko krajo e phare problemencar. Soske kergja adava? Te šaj amen te sikljova lendar. Adaleske o Jehova pottikningja e Pavle te pišinel akala lafija. Keda čitinaja akala izveštaija ola ohrabrinena amen hem dena amen nadež. Ama, nane dovolno samo te čitina i Biblija. Amen mora te dozvolina i Biblija te oblikujnel amare misle hem amaro vilo (w21.03 14, pas. 1-2).

Dali dikhea ko manuša kolenge so propovedinea sar giv kova soj tano reslo baši žetva? Ako oja, tegani adava ka vlijajnel upri tli služba. Sar? Prvo, ka propovedine panda porevnosno. Adaleske so e žetvakoro periodi tano kratko, na mangaja te našava vreme. Dujto, but ka ove bahtalo keda o manuša spremno ka šunen bašo šukar haberi. I Biblija vakerela: „O manuša tane bahtale ko vreme e žetvakoro“ (Isa. 9:3). Hem trito, ka dikhe ko sekova manuš sar nekoj so šaj te ovel učeniko e Hristoseskoro hem adaleske ka prilagodine tlo pristap sprema adava so interesinela le. Nesave taro e Isuseskere učenikija šaj mislingje kaj o Samarjanja nikogaš nane te oven leskere učenikija, ama ov na mislingja agjaar. Amen da valjani te dikha ko manuša taro amaro podračje sar o Isus. O apostol Pavle tano šukar primer bašo akava. Ov džanela sine nesave taro veruvanja e manušengere kolenge so propovedingja, sine proniklivo hem šaj sine te dikhel so interesinela len hem dikhela sine ki lende sar nekoj so šaj te ovel e Isuseskoro učeniko (w20.04 8-9, pas. 3-4).

Namesto te sudine ili te kritikujne e javerengere postapke, trudin tut te haljove sar osetinena pe. Samo o Jehova šaj celosno te haljovel amen. Adaleske, molin le te pomožinel tuke te dikhe e javeren sar so dikhela len ov, hem te džane sar te sikave lenge sočuvstvo. Našti te birina kola phralja hem phenja zaslužinena te haljova len, a kola na. Šaj nesave lendar isi len slična problemija sar so sine e Jona, e Ilija, e Agara hem e Lote, kola so korkori kergje peske o problemija. Ama, realno sarinen sine amen problemija kola so kergjem len amenge korkori. Adaleske, razumno tano soske o Jehova adžikerela amendar te sikava sočuvstvo e javerenge (1. Pet. 3:8). Keda šunaja e Jehova, keraja te ovel pozoralo o jekhipe ki amari posebno megjunarodno familija. Adaleske te ova odlučna te šuna šukar amare phralen hem phenjen, te zapoznajna len pošukar hem te sikava lenge sočuvstvo (w20.04 18-​19, pas. 15-17).

O Isus sine poslušno e Jehovaske ko sa, hem adalea dengja amenge sovršeno primer. Ka ova poslušna e Jehovaske, ako trudinaja amen ko sa te dža palo e Isuseskoro primer (Jovan 8:29). Te šaj te živina sprema o čačipe, mora te uverina amen kaj o Jehova tano o Devel e čačipaskoro. Javere lafencar, mora te verujna kaj sa adava so vakergja ko plo Lafi, i Biblija, tano čače. Osven adava, mora te ova cvrsto uverime kaj o Isus tano o vetimo Mesija. But džene avdive na verujnena kaj ov tano pomazimo sar Cari ko e Devleskoro Carstvo. O Jovan predupredingja kaj isi but manuša so hovavena, kola so šaj te zavedinen okolen so nane spremna te braninen o čačipe bašo Jehova hem bašo Isus (2. Jov. 7-11). Ov pišingja: „Koj tano hovavno ako na okova so na verujnela kaj o Isus tano o Hristos?“ (1. Jov. 2:22). O edinstveno način te na ova hovavde tano te proučina e Devleskoro Lafi. Samo agjaar ka šaj šukar te pendžara e Jehova hem e Isuse (Jovan 17:3). Hem samo tegani ka ova uverime kaj isi amen o čačipe (w20.07 21, pas. 4-5).

Nane te ova „bar sopkibaske“ amare phralenge hem phenjenge kola so prastana zaedno amencar ako na rodaja te keren o bukja ko amaro način, nego mukhaja sekogaš keda šaj te keren o bukja agjaar sar so ola mangena (Rim. 14:13, 19-21; 1. Kor. 8:9, 13). Ko akava način, na siem sar jekh doslovno trkači kova so probinela sa ple silencar te dobinel i nagrada. Akala trkačija grižinena pe samo peske — sar ola te pobedinen ki trka. Adaleske šaj ka probinen te gurinen e javere trkačen ki strana te šaj ola te oven anglal. Ama pojaver lendar, amen na natprevarinaja amen jekh jekhea (Gal. 5:26; 6:4). Namesto adava, mangaja te pomožina kobor so šaj poviše phralenge hem phenjenge te resen dži ki cel zaedno amencar hem te dobinen večno životo. Adaleske, trudinaja amen te primenina o sovet: „Ma dikhen samo tumenge te ovel šukar, nego isto agjaar e javerenge da“ (Fil. 2:4). O Jehova dela garancija ple slugenge kaj, ako završinena i hristijansko trka, ka dobinen nagrada — večno životo ko nebo ili ko raj ki Phuv (w20.04 28, pas. 10; 29, pas. 12).

Milionja hristijanja ka nakhen i „bari nevolja“ hem ka khuven ko nevo sveto. Adala so ka preživinen ki Phuv ka dikhen javer pobeda upro meribe keda ka voskresninen milijarde manuša kola so mule poangle. Razmislin kobor ka ova bahtale keda ka slučinel pe akava! (Dela 24:15). Sarine soj tane verna e Jehovaske ko sa, isto agjaar ka pobedinen o meribe so nasledingjem le. Ola ka šaj te živinen zasekogaš. Sekova hristijani soj tano akana dživdo valjani te ovel blagodarno bašo akala utešna lafija so pišingja len o Pavle e Korinkjanenge bašo voskresenie. Isi amen šukar pričine te ova poslušna ko sovet so dengja le o Pavle te ova „zafatime ki buti e Gospodareske“ (1. Kor. 15:58). Ako siem verna hem revno propovedinaja, šaj te dikha angle ko jekh bahtalo životo so ka ovel ki idnina. Adava životo ka ovel but pošužo nego so šaj akana te zamislina amenge. Sigurno adava ka ovel amenge dokaz kaj amaro trudo na sine džabe (w20.12 13, pas. 16-17).

Izgleda o proroštvija taro Ezekiel 38:10-23; Daniel 2:43-45; 11:44 — 12:1 hem Otkrovenie 16:13-16, 21 kerena lafi bašo isto vremensko periodi hem bašo ista bukja. Ako tano agjaar, tegani šaj te adžikera kaj ka slučinen pe o bukja bašo kola so ka kera lafi akana. Nesavo vreme otkeda ka počminel i bari nevolja, „o carija taro celo sveto“ ka kheden pe zaedno, javere lafencar ka keren koalicija taro sa o narodija (Otk. 16:13, 14). Ki Biblija baši akaja koalicija vakerela pe „Gog tari phuv Magog“ (Ezek. 38:2). Akaja koalicija ka napadinel e Devleskere narodo hem ka probinel te uništinel le celosno. Ki jekh vizija bašo adava vreme, o apostol Jovan dikhlja sar upro e Devleskere dušmanja perela but bari kukudik. Akaja simbolično kukudik šaj ka ovel pharo haberi baši osuda kova so ka objavinel e Devleskoro narodo hem adava ka kerel o Gog taro Magog te napadinel e Devleskere slugen te šaj celosno te uništinel len (Otk. 16:21; w20.05 15, pas. 13-14).

E Devleskiri sila tani poklon so valjani te cenina le. Ovaja panda poblagodarna bašo sveti duh isto agjaar keda razmislinaja bašo sa adava so kerela pe avdive preku leste. Angleder te džal ko nebo, o Isus vakergja ple učenikonge: „Ka priminen sila keda o sveti duh ka avel upri tumende, hem ka oven mle svedokija... ko najdur thana ki phuv“ (Dela 1:8). Adaleske so pomožinela o sveti duh, okolu ofto tekvaš milionja manuša tari celi Phuv počmingje te služinen e Jehovaske. Osven adava, živinaja ko duhovno raj adaleske so e Devleskoro duho pomožinela amen te razvina but šuže osobine, sar soj mangipe, radost, mir, strplivost, ljubeznost, šukaripe, vera, te na holjanel pe sigate hem samokontrola. Akala tane, ustvari „osobine so avena taro sveti duh“ (Gal. 5:22, 23). O sveti duh čače tano skapoceno poklon! (w20.05 29, pas. 10, 13)

Isi amen nekobor pričine te mislina kaj okola so ka dodžakeren adalen so ka voskresninen ka šaj te pendžaren len. Na primer, ako razmislinaja bašo adava sar o Jehova voskresningja e manušen ko purano vreme, šaj te očekujna kaj ov ka vazdel e mulen agjaar sar so sine kratko angleder te meren. Ola ka izgledinen, ka keren lafi hem ka razmislinen ko isto način. Setin tut kaj o Isus sporedingja o meribe e sojbaja, a o voskresenie sar o uštibe taro sojbe (Mat. 9:18, 24; Jovan 11:11-13). Keda nekoj uštela taro sojbe, ov izgledinela isto hem kerela lafi sar angleder te sovel, hem na našavela pli memorija. Razmislin bašo e Lazareskoro primer. Ov sine mulo štar dive, hem leskoro telo počmingja te raspadinel pe. Ama keda o Isus voskresningja le, leskere phenja odma pendžargje le, hem ov sigurno na bistergja len (Jovan 11:38-44; 12:1, 2; w20.08 14, pas. 3; 16, pas. 8).

Ko nesave načinija o pomazanikija hem o javera bakhre tane slična. O Jehova na mangela jekhe grupa poviše tari javer. Leske solduj grupe tane skapocena. Džanaja adava adaleske so i cena so platingja te šaj te kinel e pomazanikon hem e javere bakhren tani isto — o životo leskere najmangle čhaveskoro. I razlika maškar o duj grupe tani adaja so isi len različno nadež. Ama, solduj grupe valjani te ačhoven verna e Devleske hem e Hristoseske (Ps. 31:23). Hem ma bistre, o Jehova dela plo sveti duh sekole jekheske sprema leskere potrebe, bizi razlika dali tano pomazaniko ili taro javera bakhre. O Jehova dengja sa ple slugenge jekh but šuži nadež baši idnina (Erem. 29:11). I Spomen-svečenost bašo e Isuseskoro meribe dela prilika sekole jekheske te slavinel e Devle hem e Hristose bašo sa adava so kergje te šaj te dobina večno životo. I Spomen-svečenost tano najvažno sostanok kova so o čačutne hristijanja ikerena le sekova berš (w21.01 18, pas. 16; 19, pas. 19).

O pobaro delo taro adala soj tane prisutna ki Spomen-svečenost isi len nadež te živinen ki Phuv. Tegani, soske tane prisutna ola da? Adava šaj te sporedinel pe e manušencar kola tane prisutna ko bijav taro lengoro amal. Ola mangena te sikaven pumaro mangipe hem pumari poddrška e bračno pareske. Slično agjaar, o javera bakhre tane prisutna ki Spomen-svečenost adaleske so mangena te sikaven pumaro mangipe hem te poddržinen e Hristose hem leskere pomazanikon. Isto agjaar, adalea ola sikavena kaj ceninena e Isuseskiri žrtva preku koja šaj te živinen zasekogaš ki Phuv. Javer pričina soske o javera bakhre tane prisutna ki Spomen-svečenost tani adaleske so mangena te oven poslušna ki e Isuseskiri zapoved. Keda o Isus kergja i prvo Spomen-svečenost ple verna apostolencar, ov vakergja lenge: „Keren akava te setinen tumen ki mande“ (1. Kor. 11:23-26). Adaleske, o javera bakhre ponadari da tane prisutna ki Spomen-svečenost sa džikote isi pomazanikija ki Phuv (w21.01 17, pas. 13-14).

Ako čače mangaja nekas, adava valjani te sikava le amare postapkencar. (Sporedin Jakov 2:17, 26.) Na primer, o Jehova mangela amen (1. Jov. 4:19). Preku o šuže lafija soj pišime ki Biblija ov vakerela kaj mangela amen (Ps. 25:10; Rim. 8:38, 39). Ama, amen siem uverime kaj o Devel mangela amen na samo adalea so vakerela amenge, nego adalea so kerela. O Jehova mukhlja leskoro manglo čhavo te cidel muke hem te merel baši amende (Jovan 3:16). Adaleske amen siem sigurna kaj o Jehova mangela amen. Amen sikavaja kaj mangaja e Jehova hem e Isuse adalea so siem lenge poslušna (Jovan 14:15; 1. Jov. 5:3). O Isus dengja amen zapoved te manga amen jekh jekhea (Jovan 13:34, 35). Na valjani samo lafencar te vakera amare phralenge hem phenjenge kaj mangaja len, nego adava valjani isto agjaar te sikava le amare postapkencar (1. Jov. 3:18; w21.01 9, pas. 6; 10, pas. 8).

Okola soj pomazime e sveti duhoja isi len nadež kaj ka oven e Isusea zasekogaš, hem kaj ka vladinen zaedno lea ko e Devleskoro Carstvo. Ola čače ka oven e Hristosea — ka dikhen le, ka keren lea lafi hem ka nakhaven zaedno vreme lea (Jovan 14:2, 3). Ama, ov ka sikavel mangipe hem griža okolenge da so isi len nadež te živinen večno ki Phuv. Iako nane te dikhen e Isuse, ola ka oven sa popaše amala lea džikote uživinena ko čačutno životo kova so ov hem o Jehova ka del len (Isa. 9:6, 7). Keda prifatinaja e Isuseskiri pokana te ova leskere amala, amen dobinaja but bereketija. Panda akana osetinaja leskoro mangipe hem leskiri pomoš. Osven adava, isi amen prilika te živina večno. Hem najvažno taro sa, ako siem amala e Isusea, ka ovel amen o najbaro barvalipe so šaj — paše amalipe leskere Dadea, e Jehovaja. Čače tani bari čest te ova e Isuseskere amala! (w20.04 25, pas. 15-16).

O pismo so pišingja le o apostol Pavle sine dži ko pomazime hristijanja ko Korint, so ka voskresninen sine te živinen ko nebo. Adala hristijanja sine „birime taro Devel te oven ko jekhipe e Hristos Isusea, vikime te oven sveta“. Isto agjaar, o Pavle spomningja „okolen so mule ko jekhipe e Hristosea“ (1. Kor. 1:2; 15:18; 2. Kor. 5:17). Ko jekh javer pismo, o Pavle pišingja kaj okola soj tane „ko jekhipe [e Isusea] ko leskoro meribe“ ka oven „ko jekhipe lea ko voskresenie slično sar leskoro“ (Rim. 6:3-5). O Isus voskresningja sar duhovno ličnost hem gelo ko nebo. Agjaar ka ovel sa okolencar soj tane „ko jekhipe e Hristosea“, a adala tane sa o pomazime hristijanja. O Pavle pišingja kaj o Hristos sine voskresnimo sar „o prvo taro adala so mule“ (1. Kor. 15:20). O Isus sine o prvo so sine voskresnimo taro mule sar duhovno ličnost hem dobingja večno životo (w20.12 6, pas. 15-16).

O pomazanikija so merena akana, odma voskresninena ko nebo. Akava potvrdinena e apostol Pavleskere lafija soj pišime ko 1. Korinkjanite 15:51, 52. Otkeda ka voskresninen, akala phralja e Hristoseskere ka oven but bahtale. I Biblija vakerela amenge so ka keren ko nebo adala so ka meninen pe „ko momenti“. O Isus vakerela lenge: „Okova so ka pobedinel hem ka ikerel pe ko mle delija sa dži ko krajo, ka dav leske i vlast upro narodija, sar me so dobingjum vlast taro mlo Dad, ov da ka vodinel e manušen železno palkaja hem ka phagjel len sar phuvjale čare“ (Otk. 2:26, 27; w20.12 12, pas. 14-15).

Adalea so o Isus tano „o prvo“, o apostol Pavle manglja te vakerel kaj javera da manuša palo Isus ka voskresninen te živinen ko nebo. O apostolija hem o javera soj tane „ko jekhipe e Hristosea“ ka oven voskresnime te živinen ko nebo sar o Isus (1. Kor. 15:18). Keda o Pavle pišingja e Korinkjanenge, o voskresenie ko nebo okolenge soj „ko jekhipe e Hristosea“ panda na počmingja. Namesto adava, o Pavle otkrinela kaj adava ka ispolninel pe ki idnina. Ov vakergja: „Sekoj ko plo redo: O Hristos sar prvo, a palo adava adala so pripadinena e Hristoseske džikote trajnela leskiri prisutnost“ (1. Kor. 15:23; 1. Sol. 4:15, 16). Avdive amen živinaja ki adaja prorokujmi „prisutnost“ e Hristoseskiri. O apostolija hem o javera pomazime hristijanja kola so mule mora sine te adžikeren dži e Hristoseskiri prisutnost te šaj te dobinen i nebesno nagrada hem te oven ko „jekhipe [e Isusea] ko voskresenie slično sar leskoro“ (Rim. 6:5; w20.12 5, pas. 12; 6, pas. 16-17).

O apostol Pavle mislinela sine ki nekaste so voskresninela nebesno teloja, sar duhovno ličnost (1. Kor. 15:43, 44). Keda o Isus sine ki Phuv, sine le telesno telo. Ama keda voskresningja, ov „ulo duho kova so dela životo“ hem irangja pe ko nebo. Slično agjaar, o pomazanikija da voskresninena teloja kolea so šaj te živinen ko nebo. O Pavle objasningja: „Sar so siem slična okolea soj tano kerdo tari phuv, agjaar siem slična okolea soj ko nebo“ (1. Kor. 15:45-49). Važno tano te džana kaj o Isus na voskresningja manušikane teloja. O Pavle vakergja: „O telo hem o rat našti te nasledinen e Devleskoro carstvo“ ko nebo (1. Kor. 15:50). O apostolija hem o javera pomazanikija nane te voskresninen ko nebo telesno teloja hem ratea (w20.12 10, pas. 10-12).

O Devel vodingja nesaven taro e Isuseskere prva učenikija te pišinen bašo voskresenie ko nebo. O apostol Jovan objasningja: „Akana siem e Devleskere čhave, ama panda nane otkrimo so ka ova. Džanaja kaj, keda ov ka sikavel pe amenge, ka ova sar leste“ (1. Jov. 3:2). Znači o pomazime hristijanja na džanena sar ka ovel lengoro životo ko nebo otkeda ka voskresninen. Ama, ola ka dikhen e Jehova keda ka dobinen pumari nagrada. I Biblija dengja nesave informacie bašo adava. O pomazanikija ka oven e Hristosea keda ov „ka uništinel sekoja vlada hem sekoja vlast hem sila“ hem keda ka ovel uništimo „o posledno dušmani, o meribe“. Ko krajo, o Isus hem okola so ka vladinen lea, ka podložinen peste hem sa o bukja e Jehovaske (1. Kor. 15:24-28). Adava ka ovel but šužo vreme! (w20.12 8, pas. 2).

Sa e verna hristijanen so nane len nadež te živinen ko nebo e Hristosea, isto agjaar isi len nadež ko voskresenie. I Biblija vakerela kaj o apostol Pavle hem o javera kola so džana ko nebo tane okola so isi len delo ko prvo voskresenie (Otk. 20:6). Akava sikavela kaj ka ovel panda jekh voskresenie. Adava tano ko sklad adalea ko so verujnela sine o Jov (Jov 14:15). „Adala so pripadinena e Hristoseske džikote trajnela leskiri prisutnost“ ka oven ko nebo e Isusea keda ka uništinel sa o vlade hem sarinen so isi len avtoriteti hem mokj. Čak „o posledno dušmani, o meribe“ ka ovel uništimo. Sigurno, sarine okola so ka voskresninen ko nebo nikogaš nane te meren (1. Kor. 15:23-26). Okola so isi len nadež te živinen ki Phuv šaj te ovel len nadež temelimi ko adava so vakergja o Pavle ko avdisutno stiho. Džangjola pe kaj nijekh nepravedno manuš našti te džal ko nebo, adaleske akala lafija sikavena kaj ki idnina ka ovel voskresenie ki Phuv (w20.12 6, pas. 18-19).

Šaj te puča amen: „Sar šaj te ovav sigurno kaj o Jehova na otkažingja pe mandar?“ Adava so pučea tut akava pučibe, sikavela kaj o Jehova šaj te prostinel tuke. Angleder but berša, ki Stražarsko kula pišinela sine: „Šaj but puti keraja i isto greška. Šaj adava te ovel jekh lošno navika koja isi la hor koreno ki amende panda angleder te počmina te služina e Devleske... Ma mislin kaj kergjan grevo kova so o Jehova nikogaš nane te prostinel le. O Satana mangela baš agjaar te razmisline. Adava so mučinea tut hem so žalinea baši isto greška so kerea la, sikavela kaj na sian lošno manuš hem kaj o Jehova šaj te prostinel tuke. Ponadari da ponizno hem iskreno molin tut e Jehovaske te prostinel tuke, te pomožinel tuke te ovel tut čisto sovest hem te del tut sila te na kere i isto greška“. Angleder te ovel hristijani, o Pavle kergja nekobor seriozna greške. Ov na bistergja adava so kergja (1. Tim. 1:12-15). Ama, ov dikhela sine ki otkupnina sar poklon so o Devel dengja lično leske. Ko asavko način, o Pavle na pelo ki zamka te osetinel pe ponadari da krivo bašo sa so kergja, namesto adava koncentriringja pe te del e Jehovaske plo najšukar (w20.11 27, pas. 14; 29, pas. 17).

O Satana koristinela but bukja te šaj te čhivel amen te postapina pogrešno. Lokho tano te mislina amenge kaj akala bukja nane doborom lošna. Na primer, šaj te mislina: „Pa, bašo akava nane te ovav isklučimo. Znači nane doborom strašno“. Asavko razmislibe tano but pogrešno. Ka ovel pošukar te puča amen: „Dali o Satana koristinela akava iskušenie te šaj te podelinel mlo vilo? Ako postapinava sprema mle pogrešna želbe, dali ka anav ladž e Jehovaskere anaveske? Dali akava ka kerel man popaše mle Devlea ili ka cidel man podur lestar?“ Razmislin bašo akala pučiba. Molin tut baši mudrost te šaj te odgovorine tuke iskreno, bizo te hovave tut. Ako kerea akava agjaar čače ka zaštitine tut. Šaj te pomožinel tuke odlučno te sprotivstavine tut bašo iskušenie, isto sar o Isus, keda vakergja e Bengeske: „Cide tut, Satano!“ (Mat. 4:10). Sa so keraja bašo Jehova tano džabe ako amaro vilo tano podelimo (w20.06 12-​13, pas. 16-​17).

Amen ponizno prifatinaja e Jehovaskere merilija adaleske so siem svesna kaj ov sekogaš džanela soj amenge najšukar (Ef. 4:22-24). I poniznost pottikninela amen te čhiva e Devleskiri volja angleder amari hem te dikha ko javera sar pošukar amendar. Adaleske, siem šukar amala e Jehovaja hem amare phralencar hem phenjencar (Fil. 2:3). Ama, ako na pazinaja, šaj te vlijajnen amenge o manuša taro e Satanaskoro sveto kola soj gorda hem sebična. Izgleda ki asavki opasnost sine hem nesave taro prvo veko a.e., soske o apostol Pavle pišingja e hristijanenge ko Rim: „Vakerava sekaske tumendar te na mislinel baši peste poviše taro adava so valjani te mislinel, nego te mislinel baši peste razumno“. Akate o Pavle priznajngja kaj sekova jekh amendar valjani dži ki nesavi mera te ovel le šukar mislenje baši peske. Sepak, i poniznost ka pomožinel amenge te dikha uramnoteženo ki amende hem ka pomožinel amenge te na ova gorda (w20.07 2, pas. 1-2).

Ko vreme keda sine o Asa cari, o periodi keda sine mir završingja. Jekh bari vojska taro jekh milioni vojnikija ale tari Etiopija te napadinen len. Lengoro zapovedniko o Zara, sine sigurno kaj ka pobedinel e Juda ple vojskaja. Ama, e Asa, sine le doverba ko plo Devel, o Jehova, a na ki pli vojska. Ov molingja pe: „Pomožin amen, Jehova, amaro Devel, soske isi amen doverba ki tute hem ko tlo anav iklilem protiv akava mnoštvo“ (2. Let. 14:11). Iako i etiopsko vojska sine skoro duj puti pobari, o Asa džanlja kaj o Jehova tano posilno hem kaj šaj te pomožinel ple narodoske. A o Jehova na razočaringja le — i etiopsko vojska sine pobedimi (2. Let. 14:8-13). Iako na džanaja ki idnina so ka ovel sekole jekhea amendar, džanaja kaj o mirno periodi ko kova so uživinena avdive e Devleskere sluge nane te trajnel but vreme. Ustvari, o Isus vakergja kaj leskere učenikija ka oven mrzime taro sa o narodija (Mat. 24:9; w20.09 18, pas. 14-​16).

Nikoj amendar na mangela te ovel vredžimo. So šaj te slučinel pe ako o dušmanja vredžinena amen hem ako adava but voznemirinela amen? Šaj te obeshrabrina amen (Izr. 24:10). Tegani, sar valjani te dikha ko asavke vredžiba? Šukar tano te ovel amen isto stavi sar o apostol Pavle, kova so vakergja: „Uživinava... ko vredžiba“. Ustvari o vredžiba hem o protivibe tane dokaz kaj siem čačutne učenikija e Hristoseskere (1. Pet. 4:14). O Isus vakergja kaj leskere sledbenikija ka oven progonime (Jovan 15:18-20). Akava isto slučingja pe ko prvo veko. Ko adava vreme, o manuša upro kola so vlijajngja i grčko kultura dikhena sine e hristijanen sar prosta hem kaj na vredinena. Slično stavi sine hem e Evreen. Na primer, nesave lendar dikhena sine e Petare hem e Jovane sar obična manuša so nane len bari škola (Dela 4:13). Adaleske so na sine len nisavo političko vlijanie hem nisavi voeno mokj, o hristijanja dikhjona sine sar slaba hem o manuša na poštujnena len sine. Dali o prva hristijanja dozvolingje o negativno stavi lengere protivnikongoro te čhinavel len te služinen e Devleske? Na (w20.07 14-15, pas. 3-4).

O apostol Jovan mangela sine but ple phralen hem grižinela pe sine lenge te ovel len zorali vera. Leskoro mangipe hem i griža jasno dikhena pe ko sovetija so dengja len ko ple trin pismija. Čače siem bahtale so džanaja kaj o murša hem o džuvlja kola so ka vladinen zaedno e Isusea tane isto agjaar pherde mangipa hem griža sar o Jovan! (1. Jov. 2:27). Te haljova seriozno o sovet so dengja le. Te ova odlučna te živina sprema o čačipe agjaar so ka ova poslušna e Jehovaske ko sa so keraja. Proučin leskoro Lafi hem neka ovel tut doverba ki leste. Razvin zorali vera ko Isus. Ma dozvolin te pere ko vlijanie e manušikane ideenge hem ko hovajba so širinena o otpadnikija. Borin tut protiv o pritisok te živine dvolično životo hem te kere grevo. Trudin tut te živine sprema e Jehovaskere uče moralna merilija. Osven adava, te pomožina amare phralenge te ačhoven zorale ki vera agjaar so ka prostina okolenge so ka dukhaven amen hem ka pomožina okolenge so valjani pomoš. Agjaar, iako ka oven amen pharipa, ponadari da ka živina sprema o čačipe (w20.07 24-25, pas. 15-17).

O Jehova mangipaja dengja sekole ple verno slugaske than ko leskoro sobranie. Iako isi amen različna uloge, sarine siem skapocena hem jekh jekheske siem potrebna. O apostol Pavle istakningja kaj nikoj amendar našti te vakerel javere Jehovaskere slugaske: „Na valjanea mange“ (1. Kor. 12:21). Te šaj te ovel mir ko sobranie, mora te cenina amen jekh jekhea hem zaedno te sorabotina (Ef. 4:16). Keda sorabotinaja ko jekhipe, sekoj ka osetinel pe manglo hem o sobranie ka ovel pozoralo. Sa o starešine ko sobranie tane imenujme taro e Jehovaskoro sveti duh. Ama, sekole jekhe lendar isi le različna sposobnostija (1. Kor. 12:17). Nesave lendar šaj tane neve hem nane len dovolno iskustvo sar o javera starešine. Javera šaj našti te keren but adaleske soj phure ili isi len problemija sastipaja. Sepak, nikoj taro starešine na valjani te mislinel kaj bilo kova javer starešina nane potrebno. Namesto adava, sekova starešina valjani te šunel o sovet e Pavleskoro soj pišimo ko Rimjanite 12:10 (w20.08 26, pas. 1-2; 27, pas. 4).

O Jehova vodinela amen ko drumo so ingarela ko životo preku pli organizacija soj tele ki Phuv. Keda e Devleskiri organizacija dela amen neve objasnuvanja bašo bibliska sikljojba ili dela amen upatstvija bašo moralna merilija, amen spremno prifatinaja len hem primeninaja len. Ama, sar reagirinaja keda i organizacija kerela promene kola so vlijajnena ko javera aspektija taro amaro životo, sar soj o bikibe e dvoranengoro? Amen ponadari da ka ova bahtale ako na bistraja kaj sa so keraja tano bašo Jehova hem kaj ov vodinela pli organizacija (Kol. 3:23, 24). O cari o David dengja šužo primer keda dengja taro plo barvalipe te šaj te gradinel pe o hrami. Ov vakergja: „Koj sium me hem soj tano mlo narodo te šaj dobrovolno te da tuke akava? Tutar avela sa, hem dengjem tuke adava so dobingjem le taro tle vasta“ (1. Let. 29:14). Keda daja prilogija, amen da daja e Jehovaske adava so avela taro leskere vasta. Sepak, o Jehova but ceninela o vreme, i sila hem o pare so trošinaja len bašo aktivnostija so kerela len leskiri organizacija (2. Kor. 9:7; w20.11 22-23 pas. 14-16).

Sar e Jehovaskere svedokija, amaro uspeh na zavisinela taro adava kobor manušenge ka pomožina te oven e Jehovaskere svedokija (Luka 8:11-15). Ako ponadari da propovedinaja o šukar haberi hem sikavaja e javeren, o Jehova dikhela amen sar uspešna ko adava. Soske? Adaleske so ponadari da keraja adava so mangela o Jehova hem leskoro Čhavo (Mar. 13:10; Dela 5:28, 29). Adaleske so o krajo e svetoskoro tano paše, amende avdive isi amen panda jekh pričina te propovedina. Ačhilo but hari vreme te propovedinel pe o šukar haberi so ka spasinel životija. Ma adžiker hem ma mislin kaj valjani te oven tut sovršena okolnostija te šaj tu da te učestvujne ki akaja but važno buti. Panda akana bajrar tli želba te propovedine, sikljov poviše baši Biblija, ov hrabro hem neka ovel tut samodisciplina. Propovedin tu da o šukar haberi zaedno e manušencar soj tane poviše taro ofto milionja ko celo sveto hem tu da ka dobine bahtalipe taro Jehova (Neem. 8:10; Luka 5:10). Ov odlučno te propovedine kobor so šaj poviše hem te istrajne džikote o Devel na vakerela kaj o propovedibe tano završimo (w20.09 7, pas. 18-​20).

Amen na smejnaja te dozvolina te manga te ovel amen poviše ko materijalno pogled. „O hovavno barvalipe“ šaj te kerel te našava amaro mangipe sprema o Jehova, pohari te cenina e Devleskoro Lafi hem ma te ovel amen želba te kera e javerencar lafi baši Biblija (Mat. 13:22). Ako mangaja te arakha adava so o Jehova dengja le amenge, valjani sigate te reagirina keda ka dikha nesavi opasnost. Amen valjani angleder te razmislina so šaj te kera ako taro jekh puti pojavinena pe angli amende nemoralna ili nasilna scene, ili materijali taro otpadnikija. Akava šaj te ovel džikote siem ko internet ili džikote dikhaja televizija. Ako angleder siem spremna bašo asavke situacie, ka šaj sigate te reagirina te šaj te ačhova čista anglo e Jehovaskere jakhja hem agjaar ka zaštitina amaro amalipe lea (Ps. 101:3; 1. Tim. 4:12). Mora te arakha o skapocena bukja so dengja len amenge o Jehova — o but šuže bibliska čačipa hem i čest te sikava e javeren baši lende. Agjaar ka ovel amen čisto sovest, ka ovel amen smisla ko životo hem ka ova bahtale so šaj te pomožina e javerenge te pendžaren e Jehova (w20.09 30, pas. 16-​19).

Dali sian krstimo? Ako oja, tegani javno sikavgjan anglo javera kaj isi tut vera ko Jehova hem kaj mangea te služine leske sar delo tari leskiri organizacija. O Jehova vodinela ple organizacija ko sklad ple nameraja hem meriloncar. Taro način sar kerela adava, dikhjona leskere but šuže osobine. Te dikha trin lendar. Prvo, „o Devel nane pristrasno“ (Dela 10:34). Taro mangipe o Jehova dengja ple Čhave sar otkupno žrtva sarinenge (1. Tim. 2:6; Jovan 3:16). O Jehova koristinela ple narodo te propovedinel o šukar haberi okolenge so mangena te šunen. Ko asavko način, ov pomožinela kobor so šaj poviše manušenge te ovel len korist tari otkupnina, ili javere lafencar te oven spasime. Dujto, o Jehova tano Devel bašo redo hem mir (1. Kor. 14:33, 40). Adaleske, šaj te očekujna kaj adala so služinena leske kerena adava ko organizirimo način hem ko mir. Trito, o Jehova tano o Najbaro Učiteli (Isa. 30: 21). Adaleske, leskiri organizacija trudinela pe te sikavel e javeren bašo leskoro Lafi — hem ko sobranie hem ki služba (w20.10 20, pas. 1-3).