Dekemvri

Ponekogaš šaj te ovel amenge pharo te haljova nešto so vakerela i Biblija ili šaj o Jehova na odgovorinela ko amare molitve ko način sar so očekujngjem amen. Adava šaj te kerel te sumnina amen. Ako na keraja nešto protiv adava, o sumnje ka slabonkeren amari vera hem ka ruminen amaro amalipe e Jehovaja (Jak. 1:7, 8). Hem adava šaj te kerel čak te našava amari nadež baši idnina. O apostol Pavle sporedingja amari nadež baši idnina sar jekh kotva (Evr. 6:19). Jekh kotva ikerela o brodi ko jekh than čak keda isi silno bura hem agjaar na mukhela o brodi te khuvel ko bare bara. I kotva tani zakačimi ko brodi jekhe sindžirea. Ama, ako o sindžiri čhingjola tegani i kotva nane korisno. Sar i ’rgja so oštetinela o sindžiri, agjaar o sumnje so nane rasčistime slabonkerena amari vera. Keda isi le protivibe, jekh manuš so sumninela pe šaj te našavel pli vera kaj e Jehovaskere vetuvanja nane te ispolninen pe. Ako našavaja amari vera, amen našavaja amari nadež. Asavko manuš šaj nikogaš nane te ovel bahtalo! (w21.02 30, pas. 14-15).

O Avraam mora sine strplivo te adžikerel ko Jehova. Verojatno le sine le poviše taro 70 berš keda zaedno ple familijaja mukhlja o Ur (1. Moj. 11:31 — 12:4). A palo adava, okolu 100 berš živingja ko šatorija hem patujnela sine ki hanaansko phuv. O Avraam mulo keda sine le 175 berš (1. Moj. 25:7). Ama na reslja te dikhel sar o Jehova ispolninela plo vetuvanje kaj adaja phuv ka nasledinen la leskere potomcija. A isto agjaar, na reslja te dikhel sar sine čhivde o temelija tari „i diz“, ili taro e Devleskoro Carstvo. Sepak, i Biblija vakerela kaj o Avraam mulo „phuro hem zadovolno“ (1. Moj. 25:8). Iako e Avraame sine le but problemija, leskiri vera sine zorali hem ov sine spremno te adžikerel o Jehova te ispolninel plo vetuvanje. So pomožingja leske te istrajnel? Adava so o Jehova zaštitingja le celo leskoro životo hem ponašinela pe sine lea sar leskoro amal (1. Moj. 15:1; Isa. 41:8; Jak. 2:22). Isto sar o Avraam, amen da adžikeraja i diz so isi la čačutne temelija (Evr. 11:10). Ama, amen na adžikeraja oj te ovel gradimi. E Devleskoro Carstvo sine vospostavimo 1914 berš hem više celosno vladinela ko nebo (Otk. 12:7-10). Amen adžikeraja isto agjaar te vladinel upri celi Phuv (w20.08 4-5, pas. 11-​12).

Te šaj te šuna šukar e javeren, valjani te ova ponizna hem strpliva. Isi amen najhari trin pričine soske tano šukar te kera adava. Prvo, nane te sigjara te kera amenge negativno mislenje bašo javera. Dujto, ka haljova sar osetinela pe amaro phral ili phen hem soske kerela nešto, a adava ka pomožinel amenge te ova posočuvstvitelna. Hem trito, ka mukha te vakerel sar osetinela pe, soske agjaar šaj ka haljol nesave bukja baši peste. Ponekogaš korkori amen na haljovaja amare čuvstvija sa džikote na vakeraja len ko glaso. Nesave phralenge hem phenjenge nane lokho te keren lafi bašo ple čuvstvija, adaleske so šaj doživingje nešto angleder ili asavko tano lengoro mentaliteti ili karakter. Šaj ka valjanel lenge vreme te šaj te ovel len doverba ki amende hem te vakeren amenge sar čače osetinena pe. Ama, ako siem strpliva sar o Jehova, ka šaj te ovel len doverba ki amende. Ko krajo, keda ka oven spremna te keren amencar lafi bašo ple čuvstvija, valjani šukar te šuna len (w20.04 15-​16, pas. 6-7).

O mačhe obično arakhljona ko thana kote so o pani odgovorinela lenge hem kote so isi but hajbaske. Dali tano važno ko kova vreme jekh ribari ka džal te astarel mačhen? Jekh misioneri kova so živinela ko jekh ostrov ko Tihi Okean doznajngja kaj isi odredimo vreme keda najšukar tano te astaren pe mačhe. Jekh phral taro adava ostrov vikingja le te džal lea te astaren mačhe. O misioneri vakergja: „Ka arakha amen ko enja o saati sabajle“. A o phral odgovoringja leske: „Na haliljan man šukar. Amen ka dža keda tano o najšukar vreme te astaren pe mačhe, a na ko vreme keda amenge odgovorinela“. Slično sar o ribarija, e Isuseskere učenikija taro prvo veko džana sine ko thana kote so sine manuša, hem adava ko vreme keda šaj sine te arakhen len adathe. Na primer, e Isuseskere sledbenikija propovedinena sine ko hrami hem ko sinagoge, taro kher ko kher hem ko ploštadija (Dela 5:42; 17:17; 18:4). Amen da valjani te džana keda hem kote šaj te arakha e manušen taro amaro podračje. Adaleske valjani te ova prilagodliva (1. Kor. 9:19-23; w20.09 4, pas. 8-9).

Jekh način sar te ova amala e Hristosea tano agjaar so ka poddržina sa adava so kerela e Jehovaskiri organizacija. Ovaja popaše e Isusea sar poglavari e sobranieskoro keda sorabotinaja okolencar so čhivgja len te grižinen pe amenge (Ef. 4:16). Na primer, akana trudinaja amen sa amare dvorane te koristinen pe najšukar so šaj. Adaleske, nesave sobranija sine spojme javerencar. Agjaar, i organizacija uspejngja te štedinel but taro dobrovolna prilogija. Ama, akava značinela sine kaj nesave phralja hem phenja ka valjani te prilagodinen pe ko neve okolnostija. Adala objavitelija beršencar verno služingje ko jekh isto sobranie hem ule but paše e phralencar hem e phenjencar taro adava sobranie. Ama akana tane zamolime te služinen ko javer sobranie. O Isus sigurno tano but bahtalo keda dikhela sar adala verna sluge spremno poddržinena akaja odluka! (w20.04 24, pas. 14).

O severno hem o južno cari ponadari da borinena pe maškar peste adaleske so sekoj lendar mangela te ovel i najmokjno vlada ko sveto. Na primer, razmislin so slučingja pe pali Dujto svetsko vojna, keda o Sovetsko Sojuz hem leskere sojuznikija počmingje te vlijajnen ko pobaro delo tari Evropa. Adalea, o severno cari čhivgja e južno care te kerel e javere phuvjencar jekh voeno sojuz, pendžardo sar NATO. O severno hem o južno cari ponadari da trošinena but pare te šaj te ovel len i najmokjno vojska. Osven adava, o severno cari borinela pe sine ple protivnikoja agjaar so poddržinela sine vojne hem buntija ko teritorie taro nesave phuvja ki Afrika, Azija hem Južno Amerika. Ko posledna nekobor berša, i Rusija hem lakere sojuznikija širingje pli mokj ko celo sveto. Isto agjaar, o severno cari borinela pe ple protivnikoja preku kompjuterska napadija. O solduj carija krivinena pe jekh jekhea kaj koristinena opasna kompjuterska programe te šaj te keren peske šteta ko ekonomsko hem političko pogled. Hem, sar so prorokujngja o Daniel, o severno cari ponadari da napadinela e Devleskere narodo (Dan. 11:41; w20.05 13, pas. 5-6).

Ko vreme e Isaijaskoro, o Jehova pučlja ple narodo: „Šaj li i daj te bistrel ple maksme?“ A palo adava vakergja: „Čak oj da te bistrel le, me tut nane te bistrav tu“ (Isa. 49:15). O Devel retko sporedinela pe dajaja. Ama, ki akaja prilika ov kergja adava. O Jehova koristingja i vrska so isi maškar i daj hem o čhavo te sikavel kobor but mangela ple slugen. But phenja sigurno ka složinen pe jekhe phenjaja so vikinela pe Jasmin, koja so vakergja kaj keda isi tut čhavo „tu povrzinea tut lea ko posebno način hem adaja vrska trajnela celo životo“. O Jehova primetinela čak keda jekh taro leskere čhave čhinavela te džal ko sostanokija hem ki služba. But taro akala mangle phralja hem phenja kola so ule neaktivna, iranena pe ko sobranie, hem amen siem but bahtale bašo adava! O Jehova mangela te iranen pe, a o isto mangaja amen da (1. Pet. 2:25; w20.06 18, pas. 1-3).

O najskapocena bukja našti te dikhen pe jakhencar. Ki pli Propoved ki gora, o Isus kergja lafi bašo barvalipe ko nebo kova soj but poskapoceno taro bilo savo materijalno barvalipe. Povrzimo akalea, ov vakergja: „Kote tano tlo barvalipe, adari ka ovel tlo vilo“ (Mat. 6:19-21). Javere lafencar, amaro vilo ka pottikninel amen te roda adava soj amenge najvažno, ili najvredno. Amen khedaja amenge „barvalipe ko nebo“ agjaar so keraja sa so šaj te ovel amen šukar anav ko Devel. O Isus objasningja kaj adava barvalipe našti nikoj ni te čorel le amendar, a ni te uništinel le. O apostol Pavle pottikningja amen te „dikha... adava so na dikhela pe“ (2. Kor. 4:17, 18). Ko adava barvalipe so na dikhela pe tane vklučime o šuže bukja so ka oven amen ko e Devleskoro nevo sveto. Dali dikhaja sar šaj te sikava kaj siem blagodarna bašo sa akala bukja? (w20.05 26, pas. 1-2).

Adava so o Mojsej sikavgja e Izraelcon, dengja len sila hem ohrabringja len, isto sar jekh sitno bršim so osvežinela i čar. Sar šaj amen da te sikava e javeren ko jekh asavko način? Keda propovedinaja taro kher ko kher, ili svedočinaja ko prometna thana, šukar tano te koristina i Biblija te šaj sikavaja e manušenge e Devleskoro anav, Jehova. Osven adava, šaj te da len nešto taro amare publikacie, te sikava lenge but šuže videoklipija hem te sikava lenge amari internet-stranica koja so falinela e Jehova. Džikote siem ki buti, ki škola ili džikote patujnaja, isi amen prilika te kera lafi e javerencar bašo amaro manglo Dad hem te vakera lenge savo tano ov. Keda keraja nekasaja lafi baši leskiri but šuži namera bašo manuša hem i Phuv, pomožinaja lenge te dikhen e Jehova javere jakhencar. Adalea so vakeraja lenge o čačipe bašo amaro šukar Dad, amen učestvujnaja ko adava te slavinel pe leskoro sveto anav. Agjaar pomožinaja lenge te haljoven kaj sine lenge vakerde but hovajba bašo Devel. Adava so vakeraja e javerenge tari Biblija šaj te del len bari sila hem te osvežinel len (Isa. 65:13, 14; w20.06 10, pas. 8-9).

Kola osobine mora te oven amen te šaj te pomožina okolenge so mangena te iranen pe ko Jehova? Te dikha so šaj te sikljova tari e Isuseskiri sporedba bašo čhavo so gelo peske kheraldan (Luka 15:17-24). Ko krajo o čhavo halilo kaj grešingja hem odlučingja te iranel pe khere. O dad iklilo te adžikerel le hem silno gušingja le hem agjaar sikavgja leske kobor but mangela le. Ama e čhave mučinela le sine i sovest hem mislinela sine kaj na zaslužinela više te dikhel le sar plo čhavo. O dad sikavgja sočuvstvo keda leskoro čhavo iskreno vakergja leske sar osetinela pe, a palo adava kergja nešto kolea so sikavgja kaj tano bahtalo so irangja pe khere. Ov primingja le sar plo manglo čhavo. Adaleske dengja le šuže šeja hem kergja gozba ki leskiri čest. O Jehova tano sar o dad ki adaja sporedba. Ov mangela amare neaktivno phralen hem phenjen, hem mangela ola te iranen pe ki leste. Ako džaja palo leskoro primer, ka šaj te pomožina lenge te iranen pe. Ama, akava rodela amendar strplivost, sočuvstvo hem mangipe (w20.06 25-26, pas. 8-9).

O Isus vakergja kaj nesave ka prifatinen o čačipe „bahtalipaja“, ama keda lengiri vera ka ovel ispitimi, oj ka slabonel hem ka sopkinen pe (Mat. 13:3-6, 20, 21). Asavke šaj na halile kaj okola so ka sledinen e Isuse ka oven len pharipa (Mat. 16:24). Ili, šaj mislingje, kaj ako ovena hristijanja, nane te oven len nisave sekiracie hem pharipa, nego samo bereketija. Ama, ko avdisutno sveto našti te na oven amen problemija. O okolnostija šaj te meninen pe, hem adaleske nesavo vreme amaro bahtalipe šaj te tiknjol (Ps. 6:6; Prop. 9:11). Pobaro delo taro amare phralja hem phenja sikavena kaj tane uverime kaj arakhle o čačipe. Sar? Agjaar so lengiri vera na slabonela ako nesavo phral povredinela len, ili palem, phagjela o bibliska načelija (Ps. 119:165). Sekova puti keda isi len ispit, lengiri vera ovela posilno, a na poslabo (Jak. 1:2-4). Amen mora te gradina asavki zorali vera (w20.07 8, pas. 1; 9, pas. 4-5).

Angleder te počmine te čitine i Biblija, molin tut e Jehovaske te pomožinel tuke te dikhe savi korist šaj te ovel tut taro adava so čitinea. Na primer, ako rodea sovet sar šaj te rešine nesavo problemi, molin e Jehova te pomožinel tuke te arakhe načelija ko leskoro Lafi so ka vodinen tut (Fil. 4:6, 7). O Jehova dengja amen sposobnost te zamislina amenge o bukja. Adaleske keda čitinea jekh Biblisko izveštaj, zamislin tuke so slučinela pe hem kaj tu sian adaja ličnost kolake so čitinea. Trudin tut te dikhe o bukja so ov ili oj dikhlja len hem te osetine adava so osetinena sine ola. Ako kerea agjaar, ka ovel tut pobari korist taro biblisko izveštaj. Isto agjaar, hor razmislin. But tano važno vnimatelno te razmisline bašo adava so čitinea, hem sar šaj adala informacie te primenine len ko tlo životo. Adava ka pomožinel tuke te povrzine o misle hem pošukar te haljove adava so čitinea. Te čitine i Biblija bizo te razmisline tano sar te dikhe o delija tari jekh složuvalka ko astali bizo te spojne len. Keda razmislinea, sar te phene spojnea o delija tari složuvalka te šaj te dobine celo slika (w21.03 15, pas. 3-5).

O apostol Pavle šaj sine te koncentririnel pe ko vreme so sine poangle, hem te razmislinel kaj, te na ovel sine doborom revno ki služba šaj nane sine te ovel phanlo ko zatvor. Šaj sine te ovel holjamo ple sorabotnikonge tari Azija so mukhle le. Hem šaj sine te čhinavel te ovel le doverba ko ple javera amala. Ama, o Pavle na kergja adava. Čak keda o Pavle džanela sine kaj panda hari ka merel, ov na bistergja kaj najvažno taro sa tano te anel pe falba e Jehovaske. Ov ponadari da razmislinela sine sar šaj te ohrabrinel e javeren. Sine le doverba ko Jehova agjaar so redovno molinela pe sine. O Pavle na koncentriringja pe ko adala phralja so mukhle le. Namesto adava, ov vakergja kaj sine but blagodarno so leskere amala ljubezno poddržingje le hem pomožingje leske. Osven adava, o Pavle ponadari da proučinela sine e Devleskoro Lafi (2. Tim. 3:16, 17; 4:13). A soj najvažno, le sine le celosno doverba kaj o Jehova hem o Isus mangena le sine (w21.03 18, pas. 17-​18).

Ko dujto veko a.e., ko čačutno hristijansko sobranie počmingje te khuven sa poviše hovavne hristijanja. Ola sikavena sine hovavne idee hem garavena sine o čačipa taro e Devleskoro Lafi. Taro adava vreme pa sa dži ko krajo taro 19 veko, e Devle na sine le pli organizacija ki Phuv. O hovavne hristijanja barile sar divo čar hem adaleske sine but pharo te džanel pe kola sine o čačutne hristijanja (Mat. 13:36-43). Soske tano važno te džana akava? Adaleske so ko Daniel 11 poglavje sikavela kaj o severno hem o južno cari našti te oven carija ili vlade kola so sine ki vlast taro dujto veko a.e. dži ki dujto polovina taro 19 veko. Ko adava periodi na sine organizirimi grupa taro Devleskere sluge kolen so šaj sine te napadinen. Ama, ko krajo taro 19 veko, o severno hem o južno cari palem pojavingje pe (w20.05 3, pas. 5).

O Joil prorokujngja kaj i izraelsko phuv ka ovel uništimi taro baro broj skakulcija so hana sa angli peste! (Joil 1:4). Beršencar haljovaja sine kaj akava proroštvo kerela lafi bašo adava kaj e Jehovaskoro narodo ka propovedinel sar baro broj skakulcija kolen so nikoj hem ništo našti te čhinavel len. Mislinaja sine kaj amaro propovedibe tano baro mučibe e „phuvjake“, javere lafencar e manušenge upro kola so silno vlijajnena o verska vodačija. Ama, ako isi amen ki godi celo kontekst, dikhaja kaj valjani pojaver objasnuvanje. Primetin savo vetuvanje dengja o Jehova bašo baro broj skakulcija kola so ka keren šteta: „Okole taro sever [e skakulcon] ka paldav le dur tumendar“ (Joil 2:20). Ako o skakulcija pretstavinena e Jehovaskere svedokon kola so šunena i zapoved e Isuseskiri te propovedinen hem te sikaven e manušen, soske o Jehova bi mangela te paldel len? (Ezek. 33:7-9; Mat. 28:19, 20). Jasno tano kaj na sine le namera te paldel ple verna slugen, nego nekas soj dušmani leskere narodoske (w20.04 3, pas. 3-5).

So valjani te kera ako mislinaja kaj o Jehova na odgovorinela odma ko amare molitve? Valjani ponadari da te molina amen e Devleske. Amen na dosadinaja e Jehova keda rodaja lestar mudrost hem ov nane te holjanel amenge. Amaro nebesno Dad dela darežlivo keda molinaja le baši mudrost te izdržina ko iskušenija (Ps. 25:12, 13). Ov dikhela amare nevolje, sikavela amenge sočuvstvo hem spremno tano te pomožinel amenge. Sigurno akava kerela amen te ova pobahtale! Ama, sar o Jehova dela amen mudrost? Preku plo Lafi (Izr. 2:6). Te šaj te dobina adaja mudrost, mora te proučina i Biblija hem amare publikacie. Ama, nane dovolno samo te proučina, nego mora hem te živina sprema e Devleskere mudra sovetija. O Jakov pišingja: „Ma šunen samo o lafi, nego živinen sprema leste“ (Jak. 1:22). Keda primeninaja e Devleskere sovetija, tegani panda poviše ka trudina amen te kera mir, ka ova porazumna hem pomilostiva (Jak. 3:17). Akala osobine pomožinena amenge te ova bahtale džikote istrajnaja ko iskušenie (w21.02 29, pas. 10-11).

Jekh interesenti verojatno šaj pošukar te napredujnel hem te krstinel pe ako pomožinena leske o javera taro sobranie. Sekova objaviteli šaj te pomožinel e interesentenge te oven delo taro sobranie. Jekh pionerka phenela: „Jekh izreka vakerela kaj valjani celo gav te šaj te bajrarel pe jekhe čhave. Isto akava važinela keda kerena pe učenikija. Valjani celo sobranie te šaj te anel pe nekas ko čačipe“. Te šaj jekh čhavo te ovel zrelo manuš leske valjani te pomožinen leskere roditelija, javera ki familija, o amala hem o učitelija ki škola. Ola kerena adava adalea so ohrabrinena e čhave hem sikavena le važna pouke. Slično agjaar, o objavitelija šaj te ohrabrinen, te den sovet hem šužo primer e interesentenge hem agjaar ka pomožinen lenge te napredujnen hem te krstinen pe (Izr. 15:22). Soske jekh objaviteli kova so proučinela e interesentea valjani te ovel bahtalo keda o javera ko sobranie pomožinena e interesenteske? Adaleske so ola da šaj te pomožinen e interesenteske duhovno te napredujnel (w21.03 8, pas. 1-3).

Sa o hristijanja, terne hem phure, mora te borinen pe protiv o pritisok te živinen dvolično životo. O apostol Jovan istakningja kaj našti te živina sprema o čačipe hem ko isto vreme te živina nemoralno (1. Jov. 1:6). Ako mangaja o Jehova te dikhel amen sar ple amala, na smejnaja nikogaš te bistra kaj leskere jakhja tane sekogaš upri amende. Ustvari, na postojnela tajno grevo, soske o Devel dikhela sa so keraja (Evr. 4:13). Na smejnaja te dikha ko grevo sar so dikhela o sveto. Ko leskoro vreme, o otpadnikija vakerena sine kaj nekoj šaj namerno te grešinel hem sepak te ačhol šukar amal e Devlea. Avdive da živinaja maškar manuša kolen so isi len slično stavi. But džene vakerena kaj verujnena ko Devel, ama na prifatinena adava so ov vakerela bašo grevo, posebno ako kerela pe lafi bašo seksualno nemoral. Adava so e Devleske tano grevo ola dikhena le sar lično izbor hem kaj ako nekoj mangela, šaj te živinel agjaar (w20.07 22, pas. 7-8).

Dali tu da braninea e phenjen keda isi len asavki potreba? Razmislin bašo akava primer. Nesave objavitelija dikhena kaj jekh phen kaskoro rom nane e Jehovaskoro svedoko avela kasno ko sostanokija hem džala peske odma samo so ka završinel i programa. Isto agjaar dikhena kaj but retko anela ple čhaven pea. Adaleske nesave objavitelija počminena te kritikujnen la soske mislinena kaj valjani te ovel la cvrsto stavi hem te ovel pouporno keda kerela pe lafi bašo lakere čhave. Ama ola na džanena kaj i phen kerela sa so šaj. Oj našti te kerel o bukja sar oj so mangela hem te anel o konečna odluke bašo lakere čhave. Ako falinea e phenja bašo adava so kerela hem vakerea e javerenge kobor but trudinela pe te služinel e Jehovaske, šaj te čhinave e javeren te kritikujnen la. O starešine džanena kaj o Jehova očekujnela lendar te ponašinen pe šukar e phenjencar (Jak. 1:27). Adaleske trudinena pe te oven razumna sar o Isus agjaar so na čhivena pravilija ko situacie keda bi ovela pošukar te sikaven ljubeznost hem haljojbe (Mat. 15:22-28). Adalea so grižinena pe lenge, o starešine pomožinena e phenjenge te osetinen kaj o Jehova hem leskiri organizacija mangela len (w20.09 24-​25, pas. 17-​19).

O proroko o Daniel sine celo plo životo ponizno sluga e Devleskoro kova so sekogaš rodela sine vodstvo taro Jehova. Na primer, keda o Jehova koristingja le te vakerel so značinela o suno e Navuhodonosoreskoro, o Daniel na falingja korkori pes bašo adava. Namesto adava ov skromno dengja i falba hem i čest e Jehovaske (Dan. 2:26-28). So sikljovaja taro akava? Ako e phralenge svidžinena pe amare govorija ili ako isi amen šuže iskustvija ki služba, bašo sa adava valjani te falina e Jehova. Valjani skromno te priznajna kaj, bizi leskiri pomoš, našti te kera akala bukja (Fil. 4:13). Ako keraja akava, tegani amen džaja palo e Isuseskoro šužo primer. O Isus sine svesno kaj našti te kerel ništo bizo Jehova (Jovan 5:19, 30). Ov nikogaš na manglja te lel i vlast ple nebesno Dadeskiri. Ko Filipjanite 2:6 pišinela kaj o Isus „nikogaš na mislingja te lel e Devleskoro than hem te ovel jekh lea“. O Isus sine svesno bašo ple granice hem poštujnela sine o avtoriteti ple Dadeskoro (w20.08 11, pas. 12-​13).

Nesave taro okola so prastana ko drumo so ingarela ko životo, mučinena pe problemencar kola so o javera našti te dikhen len hem šaj nane ni te haljoven len. Ako tu te da isi tut asavke predizvikija hem dikhea kaj o javera na haljovena tut, šaj te ohrabrine tut taro primer e Mefivosteeskoro (2. Sam. 4:4). Ov sine invalidi, hem ki jekh prilika e Davide sine le pogrešno mislenje baši leste hem na sine lea pravedno. Sepak, na mukhlja adava te vlijajnel upri leste hem te ovel negativno nego ceninela sine o šuže bukja so slučingje pe leske. Sine blagodarno bašo šukaripe so kergja leske o David (2. Sam. 9:6-10). Adaleske, keda o David angja pogrešno osuda baši leste, o Mefivostej trudingja pe te dikhel i celo situacija. Na mukhlja e Davideskiri greška te kerel ki leste lošna čuvstvija hem misle, hem na kergja krivo e Jehova bašo adava. O Mefivostej mislinela sine ko adava so šaj te kerel te šaj te poddržinel adale kas so o Jehova čhivgja te ovel cari (2. Sam. 16:1-4; 19:24-30). O Jehova mukhlja leskoro but šukar primer te ovel pišimo ki Biblija te šaj amen te sikljova lestar (Rim. 15:4; w20.04 26, pas. 3; 30, pas. 18-​19).

Nesave ko sobranie služinena sar misionerija, specijalna pionerija ili opšta pionerija. Ola posvetingje celo plo životo ko propovedibe. Iako pobaro delo lendar nane len but ko materijalno pogled, o Jehova dela len but bereketija (Mar. 10:29, 30). Amen but mangaja akale phralen hem phenjen, hem blagodarna siem soj tane delo taro e Devleskoro sobranie! Dali o imenujme phralja hem okola so služinena polnovremeno tane o edinstvena so isi len than ko sobranie? Sigurno na! Sekova jekh so objavinela o šukar haberi tano važno e Jehovaske hem e sobranieske (Rim. 10:15; 1. Kor. 3:6-8). Ustvari, jekh taro najvažna celija e sobranieskere tani te keren pe učenikija amare Gospodareske, e Isus Hristoseske (Mat. 28:19, 20; 1. Tim. 2:4). Sarine soj tane delo taro sobranie, hem o krstime hem o nekrstena objavitelija, trudinena pe o propovedibe te čhiven le ko prvo than ko plo životo (Mat. 24:14; w20.08 21, pas. 7-8).

Sar so sikavela o avdisutno stiho, keda isi amen problemija, o Isus tano amencar. Ustvari, leskere lafija dena amen sila. Soske? Adaleske so ponekogaš tano pharo te istrajnel pe. Na primer, keda merela nekoj taro amare mangle, mora te ikljova ko krajo e dukhaja na samo nekobor dive, adava šaj te trajnel nekobor berša da. Nesave borinena pe phuripaja. A javera doživinena phare dive soske tane ki depresija. Sepak, istrajnaja adaleske so džanaja kaj o Isus tano amencar „ko sa o dive“, čak ko najphare dive ko amaro životo (Mat. 11:28-30). E Devleskoro Lafi uverinela amen kaj o Jehova pomožinela amenge preku ple angelija (Evr. 1:7, 14). Na primer, o angelija pomožinena amenge keda propovedinaja o „šukar haberi bašo Carstvo“ e manušenge tari sekoja nacija, pleme hem čhib (Mat. 24:13, 14; Otk. 14:6; w20.11 13-​14, pas. 6-7).

Mangaja o interesenti te haljovel kaj adava so sikljovela tano taro e Devleskoro Lafi (1. Sol. 2:13). Sar šaj te kera adava? Džikote proučinena, ohrabrin le te kerel lafi bašo adava so sikljola. Namesto sekogaš te objasnine leske o bibliska stihija, puč le ov te vakerel sar halilo o stiho. Pomožin le te haljovel sar lično leske tano korisno e Devleskoro Lafi. Puč le pučiba te šaj te dikhe sar haljovela o stihija so čitinela len hem sar vlijajnena upri leste (Luka 10:25-28). Na primer, puč le: „Sar akava stiho pomožinela tuke te dikhe jekh taro e Jehovaskere osobine?“ „Sar šaj te pomožinen tuke o bukja so sikliljan len akana tari Biblija?“ „So mislinea bašo adava so sikliljan?“. Nane najvažno kobor džanela o interesenti baši Biblija, nego dali mangela hem dali primeninela adava so sikljovela. Mukh i Biblija te sikavel le. Mora te ove ponizno ako mangea te ove pošukar keda sikavea e javeren (w20.10 15, pas. 5-6).

Šaj te ova sigurna kaj o propovedibe bašo Carstvo ka završinel ko vreme. Te dikha so ulo e Noeske ko dive. O Jehova dokažingja kaj ov sekogaš kerela o bukja ko najšukar vreme. Okolu 120 berš angleder, o Jehova odlučingja keda ka ovel o Potop. But berša pokasno, o Jehova vakergja e Noeske te gradinel i arka. Izgleda 40 ili 50 berša angleder te avel o Potop, o Noe kerela sine but buti. Iako o manuša na šunena le sine, ov ponadari da propovedinela sine sa džikote o Jehova na vakergja leske kaj tano vreme te khuven ki arka. Tegani, točno ko vreme, „o Jehova phanlja o udar“ (1. Moj. 6:3; 7:1, 2, 16). Panda hari o Jehova ka anel krajo bašo propovedibe. Palo adava, ov ka uništinel e Satanaskoro sveto hem ka kerel nevo sveto kova so ka ovel pherdo manušencar so ka šunen e Devle. Dži tegani, te ova sar o Noe hem javera kola so na mukhle te odmorinel pe lengoro vas. Ponadari da te ačhova koncentririme ko propovedibe, te ova strpliva hem te ovel amen zorali vera ko e Jehovaskere vetuvanja (w20.09 13, pas. 18-​19).

Ako nane jasno kaste isi avtoriteti, e Jehovaskiri familija nane te ovel organizirimi hem nane te ovel bahtali. Na primer, nikoj nane te džanel koj valjani te anel konečna odluke hem koj valjani te kerel adava so odlučingja pe. Ako o poglavarstvo tano jekh šukar buti, tegani soske but džuvlja avdive osetinena pe kaj tane maltretirime? Adava tano adaleske so but murša na mangena te šunen e Jehovaskere merilija baši familija, namesto adava ola džana palo pumare običaija ili tradicie. Ili ponašinena pe lošno pumare romnjencar, te šaj ola te osetinen pe šukar. Na primer, jekh rom šaj te dominirinel upri pli romni te šaj te osetinel pe po važno hem te dokažinel e javerenge kaj ov tano „pravo murš“. Ov šaj mislinela kaj našti te čhivel la silaja te mangel le, ama šaj te kerel oj te daral lestar. Hem ov šaj te koristinel i dar sar način te kontrolirinel la. Skroz tano pogrešno keda jekh murš razmislinela hem postapinela ko asavko način. Ov na poštujnela e romnja sar so valjani hem adava tano sprotivno taro adava so mangela o Jehova (Ef. 5:25, 28; w21.02 3, pas. 6-7).

Keda sian sekirimo bašo jekh problemi, molin e Jehova te pomožinel tuke. O Jehova šaj te odgovorinel ko tle molitve adalea so ka del tut mir „kova soj upreder sekoja [manušikani] misla“ (Fil. 4:6, 7). O Jehova ka del tut mir preku plo sveti duh (Gal. 5:22). Keda molinea tut e Jehovaske vaker leske sa so isi tut ko vilo. Ov konkretno. Vaker leske kova tano o problemi hem objasnin sar osetinea tut bašo adava. Ako šaj te rešine o problemi rode lestar mudrost hem sila te džane sar te kere adava. Ako našti te rešine o problemi, rode e Jehovastar te pomožinel tuke te na sekirine tut preterano. Keda konkretno molinea tut baši nesavi buti, sar so nakhela o vreme ka šaj pošukar te dikhe sar o Jehova odgovorinela ko tle molitve. Ako o Jehova na odgovorinela tuke odma otkeda molingjan tut, ma otkažin tut. O Jehova osven so mangela te ova konkretna, ov isto agjaar mangela te ova uporna (Luka 11:8-10; w21.01 3, pas. 6-7).

Avdive ko hristijanska sobranija isi bračna parija hem nesave lendar ili len čhave. Ama, isi hem but phralja hem phenja kola so nane ko brako. Sar valjani te dikha ki lende? Valjani te ovel amen sar e Isuseskoro stavi. Džikote sine ki Phuv, o Isus na khuvgja ko brako. Ov ačhilo bekjari hem posvetingja plo vreme hem vnimanie ki pli zadača. O Isus nikogaš na vakergja kaj nekoj valjani te khuvel ko brako ili te ačhol korkori te šaj te ovel hristijani. Ama, vakergja kaj nesave hristijanja ka odlučinen te na khuven ko brako (Mat. 19:12). O Isus poštujnela sine adalen so nane ko brako. Ov na mislinela sine kaj okola soj ko brako tane pošukar taro okola soj korkori ili kaj falinela nešto ko životo okolenge soj korkori. Isto sar o Isus, o apostol Pavle na sine ženimo džikote kerela sine pli služba. O Pavle nikogaš na vakergja kaj tano pogrešno o hristijanja te khuven ko brako. Sine svesno kaj adaja tani lično buti (w20.08 28, pas. 7-8).

O apostol Jovan živingja but berša, hem ko životo slučingje pe leske but vozbudliva bukja. Le sine le isto agjaar but pharipa ko životo so šaj sine te slabonkeren leskiri vera. Ama, ov dengja pestar sa te šaj te ikerel e Isuseskere zapovedija, sar soj te mangel e phralen hem e phenjen. Adaleske, o Jovan sine sigurno kaj o Jehova hem o Isus mangena le sine hem kaj ola ka den le sila te šaj te izdržinel sekoja nevolja (Jovan 14:15-17; 15:10). O Satana hem leskoro sveto našti sine te čhinaven e Jovane te mangel ple phralen hem ple phenjen hem adava te sikavel na samo lafencar nego postapkencar da. Sar o Jovan, amen da živinaja ko sveto kote so vladinela o Satana, kova so nikas na mangela (1. Jov 3:1, 10). Ov našti te čhinavel amen te manga amare phralen hem e phenjen džikote amen na dozvolinaja leske te kerel adava. Te ova odlučna te manga amare phralen hem e phenjen, te sikava lenge adava amare lafencar hem te dokažina lenge kaj mangaja len amare postapkencar. Ako sikavaja asavko mangipe ka ova radosna so siem delo taro e Jehovaskiri familija hem ka ovel amen bahtalo životo (1. Jov. 4:7; w21.01 13, pas. 18-19).

O životo ko akava sveto kote so vladinela o Satana šaj te ovel but pharo hem ponekogaš na džanaja so te kera (2. Tim. 3:1). Ama, na valjani te ova zagrižime ili te dara. O Jehova džanela taro so nakhaja, keda valjani amenge pomoš ov vetinela kaj ka ikerel amen ple silno desno vastea (Isa. 41:10, 13). Sigurna siem kaj o Jehova ka pomožinel amenge hem kaj i Biblija ka del amen sila te izdržina ko bilo savo problemi. Amare videoklipija, audio drame hem i rubrika „Te ovel tumen sar lengiri vera“ pomožinena o bibliska nastanija te oven amenge porealna. Angleder te dikhe, te šune ili te čitine akala izveštaija, molin e Jehova te pomožinel tuke te arakhe važna pouke so šaj te primenine len. Zamislin tuke kaj tu sian ko than taro glavno liko, razmislin so kergje akala verna sluge e Jehovaskere hem sar ov pomožingja lenge te nakhaven o problemija. Tegani, primenin o pouke ki tli situacija. Isto agjaar, ov blagodarno e Jehovaske so sekogaš pomožinela tuke, hem sikav kaj ceninea adaja pomoš agjaar so ka rode prilike te ohrabrine hem te poddržine e javeren (w21.03 19, pas. 22-​23).

Ako sien ko brako hem mangena te oven tumen čhave, pučen tumen: „Dali siem ponizna manuša kola so mangena e Jehova hem leskoro Lafi? Dali o Jehova bi birinela sine amen te grižina amen bašo jekh skapoceno nevo životo?“ (Ps. 127:4). Ako sien više roditelija, pučen tumen: „Dali sikavava mle čhaven kaj tano but važno te oven bukjarne?“ (Prop. 3:12, 13). „Dali kerava sa so šaj te zaštitinav len taro razna opasnostija ko kola so šaj te arakhljoven?“ (Izr. 22:3). Našti te zaštitine tle čhaven taro sa o problemija. Ama, šaj hari po hari te spremine len bašo problemija so ka aven hem te sikave len te roden sovet taro e Devleskoro Lafi (Izr. 2:1-6). Na primer, ako nekoj taro tle pašutne čhinavela te služinel e Jehovaske, pomožin tle čhavenge te haljoven tari Biblija soske tano važno te ačhoven verna e Jehovaske (Ps. 31:23). A ako merela nekoj taro najpašutne, sikav tle čhavenge bibliska stihija so ka pomožinen lenge te ikljon ko krajo e dukhaja hem te arakhen uteha hem mir (2. Kor. 1:3, 4; 2. Tim. 3:16; w20.10 27, pas. 7).