Noemvri

Adaleske so na džanaja sa o bukja, šaj te mislina amenge kaj o Jona sine manuš koleste so našti te verujnel pe, pa čak kaj nane verno. Ov dobingja zadača lično taro Jehova te vakerel osuda baši Ninevija. Ama, namesto te šunel le, o Jona uklilo ko brodi so džala sine ki javer strana te šaj te našel „dur taro Jehova“ (Jona 1:1-3). Dali tu bi dea sine e Jonaske panda jekh šansa te popravinel pli greška? Verojatno na. Ama, o Jehova mislingja kaj akava proroko zaslužinela dujto šansa (Jona 3:1, 2). E Jonaskiri molitva, džikote sine ko e mačheskoro vogi, sikavela amenge savo manuš sine ov (Jona 2:1, 2, 9). Akaja molitva e Jonaskiri — kova so sigurno često molinela pe sine — pomožinela amenge te na dikha ki leste samo sar manuš so našlja tari pli zadača. Leskere lafija sikavena amenge kaj sine ponizno, blagodarno hem odlučno te ovel poslušno e Jehovaske. Na čudinela amen adava so o Jehova na koncentriringja pe ki leskiri greška! Namesto adava, ov šungja leskiri molitva hem ponadari da koristingja le sar proroko. But tano važno sekova starešina te šunel angleder te del sovet! (w20.04 15, pas. 4-6).

O učenikija taro prvo veko prifatingje o hristijanska sikljojba hem sine len doverba kaj o sveti duh ka pomožinel lenge te haljoven e Devleskoro Lafi. Ola proučinena sine te šaj te uverinen pe kaj akala sikljojba temelinena pe ko Pismija (Dela 17:11, 12; Evr. 5:14). Na gradingje pli vera samo ko čuvstvija hem ko emocie, hem na služinena sine e Jehovaske samo adaleske so sine lenge šukar te družinen pe ple e phralencar hem e phenjencar. Namesto adava, sine len zorali vera adaleske so šukar pendžarena sine e Devle (Kol. 1:9, 10). O čačipa taro e Devleskoro Lafi na meninena pe (Ps. 119:160). Na primer, ola na meninena pe ako nesavo phral vredžinela amen ili kerela seriozno grevo. Isto agjaar, na meninena pe keda doživinaja nevolje. Adaleske valjani šukar te pendžara o bibliska sikljojba hem te ova uverime kaj ola tane čačutne. Agjaar, keda ka arakhljova ko ispit, amari vera koja so temelinela pe ko biblisko čačipe ka ovel sar zorali kotva koja so ikerela o brodi ko jekh than čak keda isi silno bura (w20.07 9, pas. 6-7).

Keda keraja nešto leskere phralenge, o Isus ko adava dikhela sar ka phene adava kergjem le lično leske (Mat. 25:34-40). O glavno način sar poddržinaja e pomazanikon tano agjaar so daja sa amendar te šaj te propovedina hem te sikava e javeren, sprema i zapoved so dengja o Isus (Mat. 28:19, 20). Samo adaleske so pomožinena len o „javera bakhre“, e Hristoseskere phralja šaj te keren akaja aktivnost koja so avdive sa poviše bajrola ko celo sveto (Jovan 10:16). Ako tu da sian ki akaja grupa, sekogaš keda sian ki služba sikavea tlo mangipe na samo sprema o pomazime hristijanja nego hem sprema o Isus. Šaj te kera amenge amalipe e Jehovaja hem e Isusea agjaar so ka koristina amare materijalna sredstvija te šaj te poddržina i aktivnost koja so ola vodinena la avdive (Luka 16:9). Na primer, šaj te da dobrovolna prilogija baši aktivnost so kerela pe ko celo sveto adalea so ka da materijalno pomoš e phralenge soj pogodime taro prirodna katastrofe ili taro javera katastrofe. Šaj te da prilogija te učharen pe o trošakija ko amaro sobranie, a isto agjaar šaj lično te da okolenge kaske so džanaja kaj valjani materijalno pomoš (Izr. 19:17; w20.04 24, pas. 12-​13).

Sar o severno cari na sikavgja nisavo obzir sprema „o Devel ple dadengoro“? O Sovetsko sojuz manglja te uništinel o religie hem adaleske probingja te lel i mokj taro tradicionalna verska institucie. Te šaj te kerel adava, i sovetsko vlada panda taro 1918 berš počmingja te anel odluke kola so dozvolinena sine e školenge te sikaven ateistička idee. A ko savo način akava severno cari slavingja „e Devle e tvrdinengoro“? Te šaj te bajrarel pli mokj, o Sovetsko sojuz trošingja but pare te šaj te bajrarel pli vojska hem te kerel nuklearno oružje. Ko krajo, o severno hem o južno cari khedingje dovolno oružje kolea so šaj sine te mudaren pe milijarde manuša! O severno cari poddržingja e južno care ki jekh but važno buti. Ola sorabotinena sine te šaj te „čhiven i odvratno buti koja so uništinela“ — o Obedineta nacie (Dan. 11:31; w20.05 6-7, pas. 16-17).

Koj šaj te pomožinel te arakhen pe o neaktivna phralja hem phenja? Sa o objavitelija taro sobranie, maškar kola soj hem o starešine, o pionerija hem lengiri familija. Dali isi tut amal ili nekoj tari familija so ulo neaktivno? Dali arakhljan nesave neaktivno phrale ili phenja džikote sian sine ki služba taro kher ko kher, ili džikote sian sine ki služba ko prometna thana? Vaker leske kaj ako mangela nekoj te posetinel le, ka ovel tuke milo te de leskiri adresa ili leskoro telefonsko broj e starešinenge taro tlo sobranie. Jekh starešina so vikinela pe Tomas vakergja: „Najangle pučava e phralen hem e phenjen kola so šaj džanena kaj živinena okola soj neaktivna taro amaro sobranie. Ili palem, pučava e objavitelen dali pendžarena nekas so čhinavgja te avel ko sostanokija. Palo nesavo vreme, keda ka džav te posetinav e neaktivna phralen hem phenjen, pučava bašo lengere čhave hem familija. Angleder nesave taro akala phralja hem phenja anena sine pumare čhaven ko sostanokija, a nesave taro čhave šaj nesavo vreme sine objavitelija. Lenge da šaj te pomožinel pe te iranen pe ko Jehova“ (w20.06 24, pas. 1; 25, pas. 6-7).

Taro sa o suštestvija ki Phuv, samo e manušen isi sposobnost te sikljoven moralna pouke adalea so šaj te pamtinen hem te analizirinen o bukja so slučingje pe lenge angleder. Adaleske, šaj te menina amaro način sar razmislinaja hem amaro način sar živinaja, hem te ova pošukar manuša (1. Kor. 6:9-11; Kol. 3:9, 10). Ustvari, amen šaj te školujna amari sovest te kerel razlika maškar adava soj ispravno, a soj pogrešno (Evr. 5:14). Šaj te sikljova te sikava mangipe, sočuvstvo hem milost, hem te sikljova te sikava e Jehovaskere pravedna merilija. Šaj te sikava kaj ceninaja o poklon so šaj te pamtina agjaar so ka trudina amen nikogaš te na bistra sar o Jehova pomožingja amenge hem utešingja amen angleder. Adava ka kerel pozorali amari doverba kaj ov ki idnina da ka pomožinel amen (Ps. 77:12; 78:4, 7). Isto agjaar, ka sikava cenenje ako pamtinaja o šukar bukja so o javera kerena len amenge hem ako siem lenge blagodarna bašo adava. O istražuvačija otkringje kaj o blagodarna manuša tane pobahtale (w20.05 23-24, pas. 12-13).

Zamislin sar osetinela pe sine o Mojsej keda sine ki planina Horiv hem keda dikhlja e Jehovaskiri slava sar nakhlja angli leste. Akava verojatno sine o najčudesno nešto so doživingja nesavo manuš angleder te avel o Isus Hristos ki Phuv. O Mojsej šungja akala lafija, kola verojatno vakergja len jekh angeli: „Jehova! Jehova! Devel soj milostivo hem sočuvstvitelno, na holjanela sigate, pherdo tano šukaripe hem čačipe, sikavela verno mangipe bute milja manušenge, prostinela greške, pogrešna postapke hem grevo“ (2. Moj. 33:17-23; 34:5-7). O Mojsej šaj mislinela sine ki akaja situacija keda spomningja e Jehovaskoro anav ko avdisutno stiho. Keda razmislinaja bašo anav Jehova, šukar tano isto agjaar hor te razmislina bašo adava savi ličnost tano ov. Adava so ka razmislina bašo e Devleskere osobine, sar soj leskiri mokj, mudrost, pravda hem mangipe, šaj te pottikninel amen panda poviše te poštujna le (Ps. 77:11-15; w20.06 8-9, pas. 3-4).

O Isus vakergja kaj o mangipe ka ovel i glavno buti pali koja so ka oven pendžarde leskere učenikija (Jovan 13:34, 35). Ama, te šaj te ovel tut zorali vera, isi panda nešto so valjani te kere. Na valjani te prifatine o čačipe samo adaleske so dikhea kaj e Jehovaskere sluge sikavena mangipe jekh jekheske. Soske? Adaleske so, ako tli vera temelinela pe samo ko adava mangipe, lokhe ka našave la. Na primer, so ako nesavo phral, čak šaj nesavo starešina ili pioneri, kerela nesavo seriozno grevo? Ili so ako nesavo phral ili phen povredinela tut? So ako nekoj ovela otpadniko hem počminela te vakerel kaj nane amen o čačipe? Asavke bukja šaj te sopkinen tut hem te čhinaven tut te služine e Jehovaske. Znači, ako mangea te gradine tuke zorali vera, oj mora te temelinel pe ko tlo lično odnos e Devlea. Ako temelinela pe samo ko adava sar ponašinena pe o javera manuša, tli vera nane te ovel stabilno. Osven adava, na valjani te gradine tli vera samo kovle materijalencar, sar soj o čuvstvija hem o emocie. But tano važno hor te proučine i Biblija, te haljove adava so sikljovea, hem te istražine te šaj te uverine tut kaj adava so sikljovea tano o čačipe bašo Jehova (Rim. 12:2; w20.07 8, pas. 2-3).

Isi but iskustvija kola so sikavena kaj o angelija pomožinena amen te arakha e neaktivna phralen hem phenjen kola so but mangena te iranen pe ko Jehova (Otk. 14:6). Na primer, o Silvio taro Ekvador iskreno molingja e Jehova te pomožinel le palem te služinel leske. Džikote molinela pe sine, duj starešine zvoningje ko leskoro udar. Panda tari adaja prvo poseta, ola spremno počmingje te den le i potrebno pomoš te šaj te iranel pe ko Jehova. Ako pomožinaja e phralenge hem e phenjenge soj duhovno slaba te iranen pe ko Jehova, amen da ka ova but bahtale. Primetin so vakerela jekh pioneri kova so posebno trudinela pe te pomožinel okolenge soj neaktivna: „Ponekogaš edvaj ikerava man te na rovav taro bahtalipe! But sium bahtalo keda razmislinava kaj o Jehova spasingja panda jekhe ple mangle bakhre taro e Satanaskoro sveto, hem kaj man sine man čest te sorabotinav e Jehovaja“. Ako cidingjan tut taro Jehova, ov uverimo kaj ov panda mangela tut. O Jehova edvaj adžikerela te irane tut hem ka adžikerel tut phravde vastencar (w20.06 29, pas. 16-​18).

O Jehova, amaro „Najbaro Učiteli“, dengja amen primerija ko plo Lafi te šaj te sikavel amen (Isa. 30:21). Amen sikljovaja agjaar so razmislinaja bašo bibliska izveštaija ko kola tane spomnime manuša so sikavgje osobine kola so mangela len o Devel. Isto agjaar, amen sikljovaja keda dikhaja so ulo okolencar so na sikavgje akala šuže osobine (Ps. 37:37; 1. Kor. 10:11). Razmislin bašo adava so ulo e careske e Sauleske. Ko početok ov sine jekh skromno terno manuš. Sine svesno bašo ple ograničuvanja, pa čak na manglja te prifatinel pobare odgovornostija (1. Sam. 9:21; 10:20-22). Ama, sar nakhela sine o vreme o Saul ulo arogantno hem kerela sine bukja so na sine le pravo te kerel. Počmingja te ponašinel pe agjaar kratko otkeda ulo cari. Ki jekh situacija, ov na sine strplivo džikote adžikerela sine e proroko e Samoile hem dengja žrtva so tharela pe iako na sine le pravo te kerel adava. Sar posledica taro adava, o Saul našavgja e Jehovaskiri milost, a ko krajo našavgja o carstvo (1. Sam. 13:8-14). Ka ova mudra ako sikljovaja taro akava predupreduvačko primer hem izbeginaja te kera bukja so nane amen pravo te kera (w20.08 10, pas. 10-​11).

Preku o Hristos, o Jehova čhivgja „manuša dende sar poklon“ ko plo sobranie (Ef. 4:8). Akala manuša tane o členija taro Vodečko telo hem lengere pomošnikija, o členija taro Odborija e podružnicengere, o pokrainska nadglednikija, o instruktorija taro teokratska škole, o starešine hem o sluga-pomošnikija ko sobranie. Sa akala phralja tane imenujme taro sveti duh te šaj te grižinen pe e Jehovaskere slugenge kola tane skapocena hem te zajakninen o sobranie (1. Pet. 5:2, 3). O phralja soj tane imenujme taro sveti duh grižinena pe bašo različna odgovornostija. Isto sar o različna delija ko telo, sar soj o vasta hem o pre, so sorabotinena zaedno te šaj o telo te funkcionirinel, agjaar o phralja soj tane imenujme taro sveti duh sorabotinena zaedno bašo šukaripe e sobranieskoro. Ola na rodena o javera te den len slava bašo adava. Namesto adava, ola trudinena pe te izgradinen hem te zajakninen pumare phralen hem phenjen (1. Sol. 2:6-8). But siem blagodarna e Jehovaske bašo akala nesebična, duhovna zrela phralja! (w20.08 21, pas. 5-6).

Jekh pričina soske propovedinaja tani adaja so manuša tane „mučime hem otfrlime“ hem isi len bari potreba te džanen o čačipe bašo Carstvo (Mat. 9:36). O Jehova mangela različna manuša šukar te džanen o čačipe hem te oven spasime (1. Tim. 2:4). Keda razmislinaja sar adava so propovedinaja šaj te pomožinel e manušenge te spasinen pe, ka ova pottiknime te propovedina. Amen spasinaja e manušengoro životo (Rim. 10:13-15; 1. Tim. 4:16). Isto agjaar, valjani i ispravno oprema te šaj te propovedina, hem te džana sar ispravno te koristina la. O Isus vakergja ple učenikonge sar te propovedinen o šukar haberi. Ov vakergja lenge so valjani te len pea, kote te propovedinen hem so te vakeren (Mat. 10:5-7; Luka 10:1-11). Avdive te šaj te ova uspešna ko propovedibe, e Jehovaskiri organizacija dengja amen glavna publikacie službake. Isto agjaar, amen siem obučime sar te koristina akala publikacie. Akaja obuka pomožinela amenge te osetina amen posigurna hem pošukar te sikava e manušen (2. Tim. 2:15; w20.09 4, pas. 6-7, 10).

Zamislin tuke kobor sine bahtalo o apostol Jovan keda šungja kaj okola kolenge so pomožingja te doznajnen o čačipe ponadari da verno služinena e Jehovaske! Adala verna hristijanja, kolen so o Jovan dikhela len sine sar ple duhovna čhave, soočingje pe bute problemencar. Adaleske, ov but trudingja pe te kerel pozorali lengiri vera. Isto sar leste, amen da siem bahtale keda amare čhave ili okola so sikavgjem len bašo čačipe dena zavet e Jehovaske hem istrajno služinena leske (3. Jov. 3). Okolu 98 berš a.e., vodimo taro e Jehovaskoro sveti duh, o Jovan pišingja trin pismija. Lencar manglja te pottikninel e verna hristijanen te na našaven pli vera ko Isus hem ponadari da te živinen sprema o čačipe. O Jovan sine sekirimo bašo lošno vlijanie so sine e hovavne učitelen upro sobranija (1. Jov. 2:18, 19, 26). Adala otpadnikija vakerena sine kaj pendžarena e Devle, ama na ikerena sine e Jehovaskere zapovedija (w20.07 20, pas. 1-3).

Isi amen vera ki poraka so propovedinaja la hem adaleske but mangaja te vakera la so šaj poviše manušenge. Isi amen doverba ko vetuvanja so arakhljona ko e Devleskoro Lafi (Ps. 119:42; Isa. 40:8). Dikhaja sar ispolninena pe ko amaro vreme o bibliska proroštvija. Dikhaja sar bute manušengoro životo ovela pošukar keda počminena te ikeren o bibliska sovetija. Akala dokazija kerena amen te ova posigurna kaj o šukar haberi bašo Carstvo valjani te šunen le sarine. Isto agjaar isi amen vera ko Jehova, kastar so avela i poraka so propovedinaja la, hem ko Isus, kole so o Jehova dengja le vlast te ovel Cari ko Carstvo. Bizi razlika so ka slučinel pe amenge, o Jehova sekogaš ka ovel amari zaštita hem sila (Ps. 46:1-3). Osven adava, isi amen doverba kaj o Isus taro nebo vodinela o propovedibe agjaar so koristinel pli sila hem i vlast so dengja le o Jehova (Mat. 28:18-20). I vera kerela te ova panda posigurna kaj o Jehova ka nagradinel amaro trudo (w20.09 12-13, pas. 15-​17).

Ponekogaš, keda e phenjen isi len nesave posebna problemija isi len potreba nekoj te braninel len (Isa. 1:17). Na primer, jekhe udovica ili razvedime phenja isi la potreba nekoj te pomožinel lake ko nesave bukja kola so angleder kerela len sine lakoro rom. Nesave pophure phenjake šaj ka valjani pomoš te kerel lafi e doktorencar. A nesavi phen koja so služinela sar pioneri a ko isto vreme kerela javera da teokratska zadače, šaj isi la potreba nekoj te braninel la keda o javera kritikujnena la adaleske so na nakhavela but vreme ki služba sar o javera pionerija. Te dikha e Isuseskoro primer. O Isus spremno braninela sine ple duhovna phenjen keda nekoj na haljola len sine. Na primer, ov braningja e Marija keda i Marta kritikujngja la (Luka 10:38-42). A braningja la ki javer da prilika keda o javera holjangje lake adaleske so mislingje kaj angja jekh pogrešno odluka (Mar. 14:3-9). O Isus halilo soske i Marija kergja adava hem pofalingja. Ov čak prorokujngja kaj adava šukaripe so kergja leske ka ovel vakerdo „segde kaj so ka propovedinel pe o šukar haberi“ (w20.09 24, pas. 15-​16).

Jekh šukar pastiri sine svesno kaj o bakhre šaj te našavgjoven. Ako jekh bakhro ikljola taro stado, o pastiri na kazninela le sine. Te dikha savo primer dengja amen o Jehova adalea sar pomožingja nesave ple slugenge kola so nesavo vreme cidingje pe lestar adaleske so darandile ili sine obeshrabrime. Ki jekh prilika, o proroko o Jona na šungja e Jehova hem na kergja i zadača so dengja le. Ama, o Jehova na vazdingja odma ple vasta taro plo sluga. Sar šukar pastiri, o Jehova spasingja le hem dengja le i potrebno sila te šaj te kerel pli zadača (Jona 2:7; 3:1, 2). Pokasno o Jehova koristingja jekh dudum te šaj te pomožinel e Jonaske te haljovel kobor vredinela sekova manušikano životo (Jona 4:10, 11). So šaj te sikljova taro akava? O starešine na smejnena sigate te otkažinen pe taro okola so ule neaktivna. Namesto adava, valjani te probinen te haljoven soske nesavo bakhro cidingja pe taro stado. A keda nekoj ka iranel pe ko Jehova, ola ponadari da sikavena leske mangipe hem grižinena pe leske (w20.06 20-​21, pas. 10-​12).

Otkeda pelo o Sovetsko Sojuz ko 1991 berš, e Devleskoro narodo so sine teli leskiri vlast nesavo vreme sine slobodno. O Daniel opišinela adaja sloboda sar „tikni pomoš“. Nesavo vreme o phralja šaj sine slobodno te propovedinen, hem bašo kratko vreme o broj e objavitelengoro ulo but pobaro ko phuvja kola so sine delo taro Sovetsko Sojuz. Ama, bašo nekobor berš, i Rusija hem lakere sojuznikija ule o severno cari. Valjanena trin bukja te šaj jekh vlada te ovel severno ili južno cari: 1) mora te ovel la direktno vlijanie upro e Devleskere sluge, 2) ple postapkencar mora te sikavel kaj tani dušmani e Jehovaske hem leskere narodoske, hem 3) mora te borinel pe baši vlast e protivničko carea. I Rusija hem lakere sojuznikija direktno vlijajngje upro e Devleskoro narodo agjaar so zabraningje i propovedničko aktivnost hem počmingje te progoninen amare phralen hem phenjen. Adale postapkencar sikavena kaj mrzinena e Jehova hem leskere narodo. Ola probinena te oven but posilna taro južno cari, i anglo-amerikansko svetsko sila (w20.05 12-13, pas. 3-4).

Adaleske so amari cel tani te pomožina e manušenge te oven e Hristoseskere učenikija, valjani te sikava len ko najšukar način. Amen redovno sikavaja milionja manušen bašo čačipa so arakhljona ki Biblija. Amen mangaja o bibliska čačipa. Adaleske šaj mangaja but te kera lafi e manušencar baši lende. Ama, bizi razlika dali vodinaja o Proučibe i Stražarsko kula, o Proučibe i Biblija ki dvorana ili biblisko kursi, na valjani te kera but lafi. Adaleske so amari cel tani te sikava e manušen tari Biblija, valjani te sikava samokontrola hem te na vakera e interesenteske sa so džanaja bašo nesavo biblisko stiho ili nesavi tema (Jovan 16:12). Razmislin kobor bukja pendžarea sine tari Biblija keda krstingjan tu hem kobor džanea akana. Tegani šaj haliljan samo o osnovna bibliska čačipa (Evr. 6:1). Valjangje tuke berša te sikljove adava so džanea akana. Adaleske ma trudin tut taro jekh puti te sikave e interesente sa adava so džanea (w20.10 14-​15, pas. 2-4).

O Jehova biringja but šukar roditelija e Isuseske (Mat. 1:18-23; Luka 1:26-38). O iskrena lafija e Marijakere kola tane pišime ki Biblija sikavena kobor but mangela sine e Jehova hem leskoro Lafi (Luka 1:46-55). A o način sar reagiringja o Josif ko e Jehovaskere upatstvija sikavela kaj mangela sine e Devle hem spremno sine te ugodinel leske (Mat. 1:24). Primetin kaj o Jehova na biringja o Isus te bijangjovel ki barvali familija. I žrtva so dengje o Josif hem i Marija otkeda bijandilo o Isus sikavela kaj sine čorole (Luka 2:24). Len sigurno na sine but materijalna bukja, posebno ako laja ko predvid kaj sine len najhari efta čhave (Mat. 13:55, 56). O Jehova zaštitingja ple Čhave taro nesave opasnostija, ama na zaštitingja le taro sa o problemija (Mat. 2:13-15). Na primer, nesave taro e Isuseskere najpašutne na verujnena sine kaj ov tano o Mesija (Mar. 3:21; Jovan 7:5). Osven adava, sigurno sine leske but pharo keda mulo leskoro očuvo o Josif (w20.10 26-​27, pas. 4-6).

Dali nekogaš osetingjan tut korkori hem na sine nikoj te pomožinel tut te istrajne keda sine tut problemija? But džene osetingje pe agjaar, čak o verna sluge e Jehovaskere (1. Car. 19:14). Ako tu da osetingjan tut nekogaš agjaar, ma bistre e Jehovaskoro vetuvanje: „Nikogaš nane te mukhav tut hem nane te iranav tuke mlo dumo“. Adaleske sigurno šaj te vakera: „O Jehova tano adava so pomožinela man, nane te darav“ (Evr. 13:5, 6). O apostol Pavle pišingja akala lafija e hristijanenge so živinena sine ki Judeja okolu o 61 berš a.e. Leskere lafija setinkerena amen ko adava so pišingja o psalmisti ko Psalm 118:5-7. O Pavle džanlja kaj o Jehova tano leskoro Pomošniko adaleske so o Jehova pomožingja leske but puti angleder. Na primer, duj berš angleder te pišinel plo pismo dži ko Evreija, o Pavle preživingja jekh opasno bura džikote patujnela sine brodea (Dela 27:4, 15, 20). Ko adala berša o Jehova pomožingja e Pavleske ko različna načinija (w20.11 12, pas. 1-2).

Soske nane mudro stalno te mislina kaj amaro životo porano sine pošukar? Adaleske so adava šaj te kerel te setina amen samo ko šukar bukja, a te bistra o lošna. Na primer, razmislin bašo Izraelcija. Otkeda gele peske taro Egipet, ola sigate bistergje kobor sine lenge pharo adathe. Namesto adava, mislinena sine samo ki šuži hrana so sine len adari. Ola vakerena sine: „But šukar setinaja amen ko mačhe so haja sine bizo pare ko Egipet, hem ko krastavice, ko bostanja, ki praza, ki purum hem ki sir!“ (4. Moj. 11:5). Ama dali čače hana sine „bizo pare“? Na. O Izraelcija skupo platingje bašo adava. Ko adava vreme, ola sine but mučime sar robija ko Egipet (2. Moj. 1:13, 14; 3:6-9). Ama, pokasno bistergje sa adala muke. O Izraelcija žalinena sine palo purane dive namesto te mislinen ko šuže bukja so kergja lenge o Jehova otkeda iklile taro Egipet. E Jehovaske na svidžingja pe lengoro stavi (4. Moj. 11:10; w20.11 25, pas. 5-6).

Ponekogaš razmislinaja ko adava kaj o životo tano kratko hem kaj tano pherdo nevolje (Jov 14:1). Adaleske ponekogaš adava kerela amen te osetina amen obeshrabrime. But sluge e Jehovaskere ko purano vreme osetingje pe agjaar. Nesave čak mangle te meren (1. Car. 19:2-4; Jov 3:1-3, 11; 7:15, 16). Ama sekogaš o Jehova — o Devel koleste so sine len doverba — utešingja len hem dengja len sila. Lengere iskustvija sine pišime te šaj te utešinen amen hem te sikljova lendar (Rim. 15:4). E Josifeskoro životo celosno meningja pe bašo kratko vreme. Na sine više khere ple dadea kova so but mangela le sine. Ulo jekh robo ko Egipet, kova so kerela sine buti ko jekh manuš so na pendžarela sine e Jehova (1. Moj. 37:3, 4, 21-28; 39:1). Palo nesavo vreme, e Petefrijaskiri romni obviningja e Josife kaj ov manglja te silujnel la. O Petefri na trudingja pe te doznajnel dali adava tano čače. Namesto adava, frdingja e Josife ko zatvor kote so sine phanlo ko sindžirija (1. Moj. 39:14-20; Ps. 105:17, 18). Sigurno e Josife sine le pričina te osetinel pe obeshrabrimo! (w20.12 16-17, pas. 1-4).

O Isus vakergja kaj akaja tani jekh taro najvažna bukja bašo kola so valjani te molina amen. Ama, so značinena e Isuseskere lafija? Leskere lafija šaj isto agjaar te prevedinen pe sar „tlo anav neka ovel sveto“. Ama, nesave šaj te pučen pe: „Ako e Jehovaskoro anav više tano sveto, tegani soske o Isus ki pli molitva spomningja ’neka ovel sveto‘“? Te šaj te odgovorina ko akava pučibe, valjani te razmislina bašo adava so, ustvari, pretstavinela jekh anav. O anav nane samo lafi so šaj te pišinel pe ili te vakerel pe. I Biblija vakerela: „Pošukar tano te birine šukar anav nego baro barvalipe“ (Izr. 22:1; Prop. 7:1). Soske o anav tano doborom važno? Adaleske so ki leste tano vklučimo o ugled, javere lafencar so mislinena o javera bašo adava manuš. Znači, nane važno sar pišinela pe o anav ili sar vakerela pe, nego so mislinena hem so osetinena o javera keda ka šunen ili ka dikhen adava anav. Keda vakerena hovajba bašo Jehova, o manuša probinena te ruminen leskoro ugled, hem adalea te anen ladž leskere anaveske (w20.06 3, pas. 5-7).

Ponekogaš šaj doborom te sekirina amen bašo problemija, so našti te mislina ko javera bukja. Na primer, šaj te sekirina amen kaj nane te zarabotina dovolno pare te šaj te kina adava so valjani amenge, ili kaj ka nasvaljova hem ka našti te dža ki buti, pa šaj čak te našava la. Isto agjaar šaj sekirinaja amen kaj nane te ova verna keda ka ova ko iskušenie te na šuna e Devleskoro zakoni. Panda hari o Satana ka pottikninel e manušen te napadinen e Devleskere narodo, adaleske šaj sekirinaja amen bašo adava so ka kera keda o manuša ka napadinen amen. Šaj pučea tut: „Dali tano pogrešno te sekirinav man bašo asavke bukja?“ Džanaja kaj o Isus vakergja ple učenikonge: „Ma sekirinen tumen“ (Mat. 6:25). Dali akava značinela kaj ov očekujnela amendar te na sekirina amen bašo ništo? Sigurno na! Ma bistre kaj nesave taro e Jehovaskere verna sluge ko purano vreme isto agjaar sine sekirime, sepak o Jehova mangela len sine (1. Car. 19:4). Ustvari, o Isus manglja te ohrabrinel amen. Ov na mangela te ova doborom sekirime so ka bistra te čhiva i služba bašo Devel ko prvo than ko amaro životo (w21.01 3, pas. 4-5).

O rom ka odgovorinel hem anglo Devel hem anglo Isus bašo način sar postapinela ple romnjaja hem ple čhavencar (1. Pet. 3:7). Sar Najbaro poglavari, e Jehova isi le avtoriteti te anel pravilija bašo adava sar valjani leskere čhave te ponašinen pe, hem te kazninel adalen so na ikerena pe ko adala pravilija (Isa. 33:22). Sar poglavari ko sobranie, e Isuse da isi le pravo te kerel isto adava ko sobranie (Gal. 6:2; Kol. 1:18-20). Isto sar o Jehova hem o Isus, o poglavari tari jekh hristijansko familija isi le avtoriteti te anel odluke baši pli familija (Rim. 7:2; Ef. 6:4). Ama, leskoro avtoriteti tano ograničimo. Na primer, leskere pravilija valjani te temelinen pe ko načelija so arakhljona ko e Devleskoro lafi (Izr. 3:5, 6). Hem jekh familijarno poglavari nane le avtoriteti te anel pravilija okolenge so nane delo tari leskiri familija (Rim. 14:4). Isto agjaar, keda leskere čhave ili čhaja bajrona hem na živinena više ko isto kher, ola ponadari da ka poštujnen le, ama ov nane te ovel više lengoro poglavari (Mat. 19:5; w21.02 2-3, pas. 3-5).

Jekh važno način sar jekh familijarno poglavari sikavela kaj mangela ple familija tano agjaar so grižinela pe bašo lengere materijalna potrebe. Ama, panda považno tano te grižinel pe bašo lengere duhovna potrebe (Mat. 5:3). Džikote o Isus visinela sine ko stubo, ov manglja te ovel sigurno kaj e Marijake nekoj ka grižinel pe. Angleder te merel, o Isus pučlja e apostol Jovane dali šaj te grižinel pe e Marijake (Jovan 19:26, 27). Jekh phral kova tano familijarno poglavari šaj isi le but važna odgovornostija. Ov valjani te ovel vredno ko than kote so kerela buti te šaj ple ponašibaja te anel slava e Jehovaske (Ef. 6:5, 6; Tit 2:9, 10). A isto agjaar, šaj služinela ko sobranie sar starešina ili sar sluga-pomošniko, adaleske valjani te grižinel pe bašo sobranie hem baši grupa propovedibaske. A ko isto vreme, važno tano redovno te proučinel i Biblija ple romnjaja hem ple čhavencar. Ola but ka ceninen adava so ov trudinela pe te grižinel pe bašo lengere fizička, emocionalna hem duhovna potrebe (Ef. 5:28, 29; 6:4; w21.01 12, pas. 15, 17).

Keda i Biblija kerela lafi baši jekh sposobno romni, vakerela kaj oj šaj te vodinel o kherutne bukja, te kinel hem te bikinel imot hem te kerel biznis (Izr. 31:15, 16, 18). Oj nane robo kole so nane le pravo te vakerel plo mislenje. Namesto adava, lakere rome isi le doverba ki late hem šunela lakere predlogija (Izr. 31:11, 26). Keda jekh rom ko asavko način sikavela kaj poštujnela ple romnja, oj ka mangel te ovel leske podložno. So šaj te sikljoven o romnja. Iako o Isus kergja but bukja, ov na osetingja pe ponižimo adaleske so sine podložno e Jehovaske (1. Kor. 15:28; Fil. 2:5, 6). Slično agjaar, jekh sposobno romni koja so džala palo e Isuseskoro primer, nane te osetinel pe ponižimi ako tani podložno ple romeske. Oj ka poddržinel ple rome na samo adaleske so mangela le, nego prvenstveno adaleske so mangela e Jehova hem poštujnela le. Ama, jekh podložno romni nane te poddržinel ple rome keda ov ka rodel latar te postapinel sprotivno taro nesavo biblisko zakoni ili načelo (w21.02 11, pas. 14-15; 12, pas. 19).

O mangipe sprema o Devel sekogaš pomožingja e Jehovaskere slugenge te istrajnen keda isi len progonstvo. Na primer, keda o mokjno evrejsko sudsko sovet zapovedingja e apostolenge te čhinaven te propovedinen, o mangipe sprema o Devel pottikningja len poviše te šunen e Devle nego e manušen (Dela 5:29; 1. Jov. 5:3). Akava baro mangipe sprema o Devel pomožinela amare phralenge te ačhoven verna iako tane progonime taro surova hem mokjna vlastija. Namesto te ova obeshrabrime, amenge tano čest te istrajna keda o sveto mrzinela amen (Dela 5:41; Rim. 5:4, 5). O protivibe tari amari familija šaj te ovel jekh taro najpharo ispit. Keda dikhena kaj mangaja te sikljova bašo Jehova, nekoj tari familija šaj mislinela kaj siem zavedime. Javera šaj te mislinen kaj delindilem. (Sporedin Mar. 3:21.) Ola šaj čak nasilno te protivinen pe amenge. Asavko protivibe na valjani te iznenadinel amen. O Isus vakergja: „E manušeskere dušmanja ka oven leskere kherutne“ (Mat. 10:36; w21.03 21, pas. 6-7).

Keda sian ki služba ko nesavo biblisko kursi, šun vnimatelno džikote o objaviteli so vodinela i studija hem o interesenti kerena lafi. Tegani ka ove spremno te vakere nešto ko ispravno momenti. Džangjola pe, mora šukar te procenine i situacija. Na primer, nane te kere but lafi hem te čhinave e objavitele so vodinela o kursi džikote objasninela nešto ili te počmine te kere lafi baši javer tema. Ama, ako vakerea jekh kratko komentari, dea jekh sporedba ili pučea nesavo pučibe, šaj te pomožine te haljol pe i glavno misla. Ponekogaš šaj ka misline kaj nane tut više so te dodajne baši tema, ama ako pofalinea e interesente hem sikavea leske lično interes tu pomožinea leske te napredujnel. Ako tano soodvetno, kratko vaker e interesenteske sar zapoznajngjan o čačipe, sar nakhavgjan jekh predizvik ili sar pomožingja tuke o Jehova ko tlo životo (Ps. 78:4, 7). Tlo iskustvo šaj te ovel baš adava so valjani te šunel o interesenti. Adava šaj te kerel leskiri vera te ovel pozorali ili te ohrabrinel le ponadari da te napredujnel hem te krstinel pe (w21.03 10, pas. 9-10).

Koj čače zaslužinela i čest bašo uspeh so isi amen ki služba? O Pavle dengja o odgovor ko akava keda vakergja akala lafija e hristijanenge ko Korint: „Me sadingjum, o Apolo čhivgja pani, ama o Devel kergja te bajrol. Adaleske, nane najvažno okova so sadinela, a ni okova so čhorela pani, nego o Devel, kova so kerela te bajrol“ (1. Kor. 3:6, 7). Isto sar o Pavle, amen da valjani te da i čest e Jehovaske bašo sa o šukar rezultatija so isi amen ki služba. Sar šaj te sikava kaj ceninaja i čest te sorabotina e Devlea, e Hristosea hem e angelencar? (2. Kor. 6:1). Agjaar so revno ka trudina amen te vakera o šukar haberi e javerenge. Osven so sejnaja o seme e čačipaskoro, mora hem te čhora leske pani. Keda nekoj ka sikavel interes, mangaja te da sa amendar te šaj palem te posetina le te šaj te počminel biblisko kursi. Džikote proučinaja nekasaja, but siem bahtale keda dikhaja sar o Jehova pomožinela leske te meninel plo razmislibe hem ple čuvstvija (w20.05 30-31, pas. 14, 16-18).