Oktomvri

Keda pendžaraja e Isuse, tegani ka razmislina hem ka postapina sar leste. Hem kobor pošukar haljovaja sar razmislinela o Isus hem kobor poviše amen korkori razmislinaja sar leste, doborom popaše amala ka ova lea. Na primer, sine leske považno te pomožinel e javerenge nego te ugodinel peske (Mat. 20:28; Rim. 15:1-3). Adaleske so sine le asavko stavi, ov sine samopožrtvuvano hem spremno prostinela sine. Na vredžinela pe sine sigate keda o manuša kerena sine lošno lafi baši leste (Jovan 1:46, 47). Hem na dozvolingja i greška nekaskiri so kergja la angleder te vlijajnel upro leskoro stavi sprema adava manuš (1. Tim. 1:12-14). O Isus vakergja: „Taro adava sarine ka džanen kaj sien mle učenikija, ako isi tumen mangipe maškar tumende“ (Jovan 13:35). Šukar tano te puče tut: „Dali džava palo primer e Isuseskoro agjaar so kerava sa so šaj te ovav šukar amal mle phralenge hem phenjenge?“ (w20.04 24, pas. 11).

Iako živinaja ko sveto kova soj pherdo manušencar so kaljarena hem meljarena e Jehovaskoro anav, tut isi tu prilika hrabro te branine e Jehovaskoro anav hem te vakere e javerenge kaj tano sveto, pravedno, šukar hem pherdo mangipaja. Šaj te sikave kaj poddržinea le sar tlo Vladeteli. Osven adava, šaj te pomožine e manušenge te haljoven kaj samo e Jehovaskoro vladibe tano pravedno, hem kaj samo ov ka anel čačutno mir hem bahtalipe sa e bukjenge so stvoringja (Ps. 37:9, 37; 146:5, 6, 10). Keda sikavaja e javeren bašo bibliska čačipa, but puti istakninaja kaj e Jehova isi le pravo te vladinel upro sa. Ama, iako tano važno te sikava len bašo e Devleskere zakonija, amari glavno cel tani te pomožina lenge te zamangen amare Dade, e Jehova, hem te oven leske verna. Adaleske, valjani te istaknina leskere but šuže osobine, javere lafencar te pomožina lenge te dikhen i ličnost koja so bešela palo anav Jehova (Isa. 63:7). Ako sikavaja e javeren ko asavko način, ka pomožina lenge te zamangen e Jehova hem te oven leske poslušna adaleske so mangena te ačhoven leske verna (w20.06 6, pas. 16; 7, pas. 19).

I manušikani godi tani kerdi ko jekh čudesno način. Panda džikote siem sine ko vogi amare dajake, amari godi razvinela pe sine sprema jekh plani kova so o Jehova angleder kergja le, hem milje javera neve mozočna kletke stvorinena pe sine ki sekoja minuta! O istražuvačija proceninena kaj i godi jekhe vozrasno manušeskiri — koja soj phari samo okolu 1,5 kg. — tani kerdi skoro taro 100 milijarde kletke kola so vikinena pe nevronija. Jekh taro čudesna sposobnostija amare gogjakiri tani te kera lafi. Te šaj te vakera sekova lafi, i godi mora ko isto vreme te kontrolirinel o dvižibe okolu 100 muskulengoro kola tane delo tari amari čhib, amaro krlo, amaro muj hem amaro kolin. A te šaj te haljovel pe adava so vakeraja, sa akala muskulija mora te funkcionirinen precizno hem zaedno. O rezultatija taro jekh istražibe baši amari sposobnost te sikljova čhibja kola so sine objavime ko 2019 berš, sikavgje kaj o bebija šaj te pendžaren lafija hem te reagirinen ki lende. Akava istražibe poddržinela o zaklučok bute istražuvačengoro — kaj panda keda bijangjovaja isi amen sposobnost te pendžara lafija hem te sikljova čhibja. Sigurno amari sposobnost te kera lafi tani poklon taro Devel (w20.05 22-23, pas. 8-9).

O Avraam sine spremno te mukhel plo udobno životo ki diz Ur. Soske? Adaleske so adžikerela sine „i diz so isi la čačutne temelija“ (Evr. 11:8-10, 16). I diz so adžikerela la sine o Avraam tani e Devleskoro Carstvo. O cari tano o Isus Hristos, a zaedno lea ka vladinen o 144.000 pomazime hristijanja. O Pavle vakergja kaj akava Carstvo tani „i diz e dživde Devleskiri, o nebesno Erusalim“ (Evr. 12:22; Otk. 5:8-10; 14:1). O Isus sikavgja ple učenikon te molinen pe te avel adava Carstvo te šaj te kerel pe e Devleskiri volja hem ko nebo hem ki Phuv (Mat. 6:10). Dali o Avraam džanela sine sa o detalija bašo e Devleskoro Carstvo? Na. Vekoncar akala detalija sine „sveto tajna“ (Ef. 1:8-10; Kol. 1:26, 27). Sepak, o Avraam džanlja kaj nesave taro leskere potomcija ka oven carija soske o Jehova vetingja leske adava (1. Moj. 17:1, 2, 6; w20.08 2-3, pas. 2-4).

Mora te otfrlina o idee so širinena len o otpadnikija. Panda otkeda sine kerdo o hristijansko sobranie, o Beng koristinela sine bute manušen kola so vakerena hovajba te šaj te čhivel sumnje ki godi e Devleskere verna slugenge. Adaleske, valjani te džana sar te procenina soj čačipe, a soj hovajbe. Amare dušmanja šaj te širinen hovajba preku internet ili socijalna mreže te šaj te keren poslabo amari doverba ko Jehova hem amaro mangipe sprema amare phralja. Ma verujn ko adala hovajba, ola avena taro Satana! (1. Jov. 4:1, 6; Otk. 12:9). Te šaj te sprotivstavina amen ko e Satanaskere napadija, valjani te bajrara amari doverba ko Isus hem ki uloga so isi le ki e Devleskiri namera. Isto agjaar, valjani te ovel amen doverba ko „verno hem razborito robo“ — i edinstveno grupa manuša koja so o Jehova koristinela la avdive te šaj te vodinel pli organizacija (Mat. 24:45-47). Šaj te kera pozorali amari doverba agjaar so redovno ka proučina e Devleskoro Lafi. Tegani amari vera ka ovel sar kaš kaskere korenija tane hor ki phuv. O apostol Pavle pišingja nešto slično ko avdisutno stiho (w20.07 23-24, pas. 11-12).

Adaleske so siem nesovršena but puti sigate keraja amenge mislenje bašo javera sprema adava sar izgledinena (Jovan 7:24). Ama, našti te doznajna but baši nekaste samo taro adava so dikhaja. Na primer, čak jekh but šukar hem iskusno doktori nane te džanel sa bašo jekh pacienti samo ako dikhela le. Mora šukar te šunel le te šaj te džanel save simptomija isi le, sar osetinela pe ili save problemija sastipaja sine le angleder. O doktori šaj ka mangel te kerel hem rendgen-snimka te šaj te dikhel o andrune organija. Ako na kerela adala bukja, tegani šaj te del le pogrešno dijagnoza. Slično, amen da našti te haljova celosno amare phralen hem phenjen samo ako dikhaja len avrijaldan. Mora te trudina amen te dikha adava so na dikhjola odma — save tane andraldan. Džangjola pe, amen našti te čitina e manušengere vile. Sepak, šaj te da amendar sa te šaj te dža palo leskoro primer. Ov šunela adalen soj služinena leske. Osven adava, lela ko predvid lengere okolnostija hem o bukja kola so doživingje angleder. Isto agjaar, sikavela lenge sočuvstvo (w20.04 14-​15, pas. 1-3).

Valjani te trudina amen te ova ponizna soske okola soj tane gorda na dikhena ki peste razumno. O gorda manuša tane sebična hem sekogaš tane spremna te akošen pe. Lengoro način sar razmislinena hem sar postapinena but puti dukhavela e javeren, a isto agjaar kerela šteta lenge da. Ako na meninena plo način sar razmislinena, o Satana ka korjakerel lengiri godi hem ka ruminel lengere misle (2. Kor. 4:4; 11:3). E ponizno manuše isi le razumno mislenje baši peske. Ov dikhela realno hem uramnoteženo ki peste, hem priznajnela kaj ko but bukja o javera tane pošukar lestar (Fil. 2:3). Osven adava, džanela kaj „o Devel protivinela pe okolenge soj gorda, a okolenge soj ponizna sikavela šukaripe so na zaslužinena le“ (1. Pet. 5:5). Okola so dikhena razumno ki peste na mangena o Jehova te ovel lenge dušmani. Te šaj te ačhova ponizna, mora te primenina akava sovet tari Biblija: „Huljaven i purani ličnost hem lakere postapke, a uraven tumen i nevi ličnost“. Valjani te proučina e Isuseskoro primer hem te da amendar sa te šaj te dža pali leste (Kol. 3:9, 10; 1. Pet. 2:21; w20.07 7, pas. 16-17).

Amenge tani bari čest te ova delo taro e Jehovaskoro sobranie! Amen siem ko jekh duhovno raj kova tano pherdo bahtale manušencar so mangena o mir. Kova tano tlo than ko sobranie? O apostol  Pavle sporedinela o sobranie e manušikane teloja, a sekole jekhe ko sobranie sporedinela le sar delija taro telo (Rim. 12:4-8; 1. Kor. 12:12-27; Ef. 4:16). Jekh pouka so šaj te sikljova la tari e Pavleskiri sporedba tani kaj sekova jekh amendar isi le važno than ki e Jehovaskiri familija. O Pavle počmingja akaja sporedba e lafencar: „Isto sar so ko jekh telo isi amen but delija, ama sa o delija nane len isto uloga, agjaar amen da, iako siem but, jekh telo siem ko jekhipe e Hristosea, a sar poedincija phanle siem jekh jekhea“ (Rim. 12:4, 5). So manglja te vakerel o Pavle akalea? Iako isi amen različna uloge ko sobranie, sekova jekh amendar tano skapoceno (w20.08 20, pas. 1-2; 21, pas. 4).

Tumen so sien roditelija, sar šaj te džan palo leskoro primer? Keda tano soodvetno, pučen e čhaven te den predlog bašo adava sar te keren nesavi buti. Hem keda šaj, prifatinen lengere predlogija. O Jehova isto agjaar sikavela kaj tano strplivo, čak keda jekh leskoro sluga sumninela pe ko leskere odluke. O Jehova sine spremno te šunel e Avraame kova so sine sekirimo keda šungja kaj o Jehova odlučingja te uništinel o Sodom hem o Gomor (1. Moj. 18:22-33). Osven adava, setin tut sar o Devel postapingja e Avraameskere romnjaja, e Saraja. Ov na vredžingja pe ili na holjangja keda i Sara asandili bašo adava so vetingja lake o Jehova kaj ka ačhol khamni ko phure berša (1. Moj. 18:10-14). Namesto adava, ov sikavgja lake poštovanje. Tumen so sien roditelija ili starešine, so šaj te sikljoven taro Jehova? Sar reagirinena keda tumare čhave ili nesave phralja taro sobranie na soglasinena pe tumare odlukencar? Dali odma braninena tumen hem vakerena lenge kaj ola nane ko pravo? Ili, trudinena tumen te haljoven soske razmislinena agjaar? Keda okolen so isi len nesave odgovornostija džana palo e Jehovaskoro primer, adava šukar vlijajnela upro familie hem o sobranija (w20.08 10, pas. 7-9).

Keda prvo puti počmingjem te družina amen e Jehovaskere svedokoncar, šaj siem sine spremna te prifatina pomoš javerendar. Siem sine svesna kaj ko duhovno pogled siem sine sar „tikne čhave“ hem kaj isi but te sikljova (1. Kor. 3:1, 2). Ama, sar tano akana? Ako više beršencar služinaja e Jehovaske hem dobingjem pobaro iskustvo, šaj na siem više doborom spremna te prifatina pomoš, posebno taro okola so nane ko čačipe poviše vreme amendar. Sepak, na smejnaja te bistra kaj o Jehova but puti koristinela amare phralen hem phenjen te šaj te kerel amen pozorale (Rim. 1:11, 12). Ako mangaja te dobina sila taro Jehova, valjani te prifatina pomoš taro amare phralja hem phenja. O uspeh na zavisinela tari nekaskiri fizičko sila, obrazovanie, barvalipe, kotar avela ili savi položba isi le ko opštestvo. Namesto adava, ov halilo kaj, ako tano ponizno hem ako isi le doverba ko Jehova, ka šaj te kerel but šukar bukja. Te prodolžina sarine verno te služina e Devleske agjaar so 1) ka ovel amen doverba ko Jehova, 2) ka sikljova taro bibliska primerija hem 3) ka prifatina pomoš taro amare phralja hem phenja. Tegani, kobor hem te mislina kaj siem slaba, o Jehova ka pomožinel amenge te ova silna! (w20.07 14, pas. 2; 19, pas. 18-19).

Valjani te ova strpliva keda propovedinaja amare familijake. O načelo taro Propovednik 3:1, 7 šaj te pomožinel amenge ko adava. Adathe pišinela kaj isi vreme „te čutinel pe hem vreme te kerel pe lafi“. Amare šukar ponašibaja, šaj te svedočina amare familijake bizo lafija. Tari javer strana, mora sekogaš te ova spremna te vakera lenge bašo Jehova (1. Pet. 3:1, 2). Amen mora revno te propovedina hem te sikava e javeren, ama sekogaš valjani te ova strpliva sa e manušencar, a adava značinela amare familijaja da. Šaj te sikljova te ova strpliva taro primer e verna manušengoro ko purano vreme hem e verna manušengoro ko avdisutno vreme. O Avakum edvaj adžikerela sine te avel o krajo e lošnipaske, ama ov sikavgja strplivost keda vakergja: „Ko mlo stražarsko than ka tergjovav“ (Avak. 2:1). O apostol Pavle vakergja kaj mangela te završinel pli služba hem te dobinel pli nebesno nagrada. Ama, ov strplivo ponadari da ’svedočingja temelno bašo šukar haberi‘ (Dela 20:24; w20.09 12, pas. 12-​14).

Iako samo e Jehova isi le pobari vlast lestar, o Isus na mislinela kaj tano najvažno. Isto sar o Isus, e Devleskere ponizna sluge kerena ki e Jehovaskiri organizacija te ovel mangipe — osobina pali koja so pendžarena pe o čačutne hristijanja (Luka 9:48; Jovan 13:35). So ako mislinea tuke kaj isi problemija ko sobranie hem kaj na rešinena pe sar so valjani? Namesto te žaline tut, šukar tano te sikave poniznost agjaar so ka poddržine okolen so predvodinena (Evr. 13:17). So ka pomožinel tuke ko adava? Puč tut: „Dali o problemija so dikhava čače tane doborom bare so valjani te oven rešime? Dali akana tano vreme te rešinen pe? Dali me sium adava so valjani te rešinel len? Hem, te ovav iskreno, dali čače mangava te arakhav o jekhipe ko sobranie ili te istakninav man?“ E Jehovaske but považno tano nekoj te ovel ponizno nego te ovel sposobno. Osven adava, považno leske o jekhipe nego sa te završinel pe sigate hem efikasno. Adaleske, de tutar tlo najšukar te šaj te služine leske „sekogaš ponizno“. Agjaar ka kere te ovel pozoralo o jekhipe ko sobranie (Ef. 4:2, 3; w20.07 4-5, pas. 9-11).

O Isus ceninela sine i pomoš taro verna džuvlja so služinena sine leske adalea so isi len (Luka 8:1-3). Ov sikavela len sine važna čačipa baši e Devleskiri volja. Na primer, ov vakergja lenge kaj ka merel hem ka ovel voskresnimo (Luka 24:5-8). Ov spremingja akale džuvlen, isto sar so spremingja e apostolen, bašo nevolje so adžikerena len sine (Mar. 9:30-32; 10:32-34). Hem iako o apostolija našle keda astargje e Isuse, nesave džuvlja so služingje lea sine uzi leste keda mulo ko stubo (Mat. 26:56; Mar. 15:40, 41). Nesave verna džuvlja sine o prva so dikhle e Isuse keda voskresningja. Ov vakergja adale džuvlenge te džan te vakeren e apostolenge kaj ov uštilo taro mule (Mat. 28:5, 9, 10). Osven adava, šaj sine džuvlja da maškar o učenikija so sine pomazime sveti duhoja ki Pedesetnica 33 berš a.e. Ola da dobingje o poklon te keren lafi ko razna čhibja hem te vakeren e javerenge bašo „mokjna bukja so kergja o Devel“ (Dela 1:14; 2:2-4, 11; w20.09 23, pas. 11-​12).

Keda pomožinaja e manušenge te oven e Hristoseskere učenikija, učestvujnaja ko delo so spasinela životija! Kotar džanaja adava? Keda o Isus dengja i zapoved koja tani pišimi ko Matej 28:19, 20, ov vakergja: „Džan hem keren učenikija... hem krstinen len“. Kobor tano važno o krstibe? Ako mangaja te živina večno, mora te krstina amen. Okola so mangena te krstinen pe valjani te verujnen kaj šaj te oven spasime samo adaleske so o Isus dengja plo životo sar žrtva hem sine voskresnimo. Adaleske o Petar vakergja e phralenge hem e phenjenge: „O krstibe... akana spasinela tumen da... preku o voskresenie e Isus Hristoseskoro“ (1. Pet. 3:21). Sprema akava, keda jekh nevo interesenti krstinela pe, ov šaj te nadinel pe kaj ka živinel večno. Te šaj te kera učenikija, valjani šukar te sikava e manušen (2. Tim. 4:1, 2). Soske? Adaleske so o Isus dengja amen i zapoved: „Džan hem keren učenikija... sikaven len“. O apostol Pavle pottikninela amen te istrajna ko adava, soske agjaar ka spasina hem amen hem okolen so šunena amen (w20.10 14, pas. 1-2).

O apostol Petar zamanglja o propovedibe. Adalea so pomožingja leske o Jehova, o Petar ulo but šukar propovedniko (Dela 2:14, 41). I najvažno pričina soske propovedinaja tani adaleske so mangaja e Jehova. Amaro mangipe sprema o Jehova ka pomožinel amenge te vakera e javerenge baši leste iako mislinaja kaj na siem dovolno sposobna te kera adava. Keda o Isus vikingja e Petare te ovel ribari so astarela manušen, ov vakergja leske: „Ma dara!“ (Luka 5:8-11). O Petar na darandilo taro adava so bi šaj sine te ovel ako ulo leskoro učeniko. Namesto adava, ov sine vooduševimo keda dikhlja sar o Isus pomožingja lenge te astaren bute mačhen. Ov džanlja kaj o Isus kergja jekh čudo hem adaleske ov na osetingja pe sposobno te sorabotinel lea. Isto sar o Petar, šaj tu da daraja. Šaj sekirinea tut keda razmislinea bašo sa adava so valjani te kere te šaj te ove e Isuseskoro učeniko. Ako tano agjaar, bajrar tlo mangipe sprema o Jehova, o Isus hem tle pašutne, hem agjaar ka ove motivirimo te prifatine e Isuseskiri pokana te astare manušen (Mat. 22:37, 39; Jovan 14:15; w20.09 3, pas. 4-5).

Amen spremno trošinaja amaro vreme, sila hem materijalna bukja te šaj te arakha adalen „so ispravno dikhena ko večno životo“ (Dela 13:48). Keda keraja akava, amen džaja palo e Isuseskoro primer. Ov vakergja: „Mlo hajbe tano te kerav i volja okoleskiri so bičhalgja man hem celosno te završinav i buti so dengja la mange“ (Jovan 4:34; 17:4). Adaja tani amari bari želba. Mangaja te završina i zadača so sine amenge dendi (Jovan 20:21). Hem mangaja o javera da, kote soj tane vklučime o neaktivna da, te istrajnen zaedno amencar ki akaja zadača (Mat. 24:13). Čače, nane lokho te kerel pe adava so zapovedingja amenge o Isus te kera. Ama, akaja zadača na keraja la korkori. O Isus vetingja kaj ka ovel amencar. Keda keraja učenikija amen siem „e Devleskere sorabotnikija“ hem siem „ko jekhipe e Hristosea“, adaleske o Jehova hem o Isus ka pomožinen amenge (1. Kor. 3:9; 2. Kor. 2:17). Tari adaja pričina šaj te uspejna ko adava. Isi amen bari prednost hem čest te ispolnina akaja zadača hem te pomožina e javerenge te keren isto adava! (Fil. 4:13; w20.11 7, pas. 19-​20).

But puti o odluke so anena o roditelija beršencar vlijajnena upro čhave. Ako anena lošna odluke, e čhaven ka ovel len problemija. Ama, ako anena mudra odluke, pomožinena pumare čhavenge te ovel len bahtalo životo. Džangjola pe, o čhave da mora te anen šukar odluke. I najšukar odluka so nekoj šaj te anel la tani te služinel amare nebesno Dadeske, e Jehovaske, kova so grižinela pe amenge (Ps. 73:28). E Isuseskere roditelija — o Josif hem i Marija — sine odlučna te pomožinen pumare čhavenge te služinen e Jehovaske. O odluke so angje len sikavgje kaj adava sine lenge najvažno ko životo (Luka 2:40, 41, 52). O Isus da angja šukar odluke so pomožingje leske te ispolninel pli uloga ki e Jehovaskiri namera (Mat. 4:1-10). Keda barilo, o Isus sine šukar, verno hem hrabro manuš. Sekova roditeli so mangela e Jehova bi dičinela pe sine hem bi ovela sine bahtalo asavke čhavea! (w20.10 26, pas. 1-2)

Razmislin bašo akala trin primerija. Jekh pophuri phen razmislinela bašo šukar vremija keda sine terni. Iako o životo akana tano popharo, oj ponadari da kerela sa so šaj bašo Jehova (1. Kor. 15:58). Sekova dive oj zamislinela sar živinela zaedno ple familijaja hem ple amalencar ko raj. Jekh javer phen setinela pe kaj nekoj taro sobranie povredingja la, ama odlučingja te na ikerel holi bašo adava (Kol. 3:13). Jekh phral setinela pe ko greške so kergja len angleder, ama dela pestar sa te ačhovel verno e Jehovaske akana (Ps. 51:10). So isi len zaedničko akale trine hristijanen? Iako sarine ola setinena pe ko adava so ulo poangle, ola na razmislinena stalno bašo adala bukja. Namesto adava, ola dikhena „pravo angle“ ko adava so avela ki idnina. Soske tano važno adava? Keda nekoj stalno iranela pe palal, našti te džal pravo. Amen da našti celosno te služina e Jehovaske ako stalno mislinaja ko adava so sine poangle (Luka 9:62; w20.11 24, pas. 1-3).

O Golijat kova so sine silno vojniko, dikhela sine e Davide sar slabo. Akava obučimo vojniko sine but pobaro hem sine le pošukar oružje. But pojaver lestar, o David sine samo jekh terno čhavo bizo iskustvo kova so na dikhjola sine spremno borbake. Ama, e Davide sine le doverba ki e Jehovaskiri sila, hem o Jehova pomožingja leske te mudarel ple dušmane e Golijate (1. Sam. 17:41-45, 50). O David mora sine te soočinel pe panda jekhe problemea kova so šaj kerela le sine te osetinel pe slabo. Ov verno služingja e Sauleske, kole so o Jehova čhivgja le te ovel cari upro Izrael. Ko početok, o cari o Saul poštujnela sine e Davide. Ama pokasno, adaleske so sine gordo, ov ulo ljubomorno e Davideske. O Saul ponašinela pe sine but lošno e Davidea, pa čak probingja te mudarel le (1. Sam. 18:6-9, 29; 19:9-11). Iako o Saul ponašinela pe sine nepravedno lea, o David ponadari da sikavela sine poštovanje sprema akava cari so sine čhivdo taro Jehova (1. Sam. 24:6). E Davide sine le doverba kaj o Jehova ka del le i potrebno sila te istrajnel ko akava pharo ispit (Ps. 18:1, natpis; w20.07 17, pas. 11-13).

Adaleske so pobaro delo taro proroštvo bašo severno hem južno cari više ispolningja pe, šaj te ova sigurna kaj ka ispolninel pe o javer da delo. Te šaj te haljova o proroštvo soj pišimo ko 11 poglavje taro lil Daniel, valjani te ovel amen ki godi kaj kerela lafi samo bašo vladetelija ili vlade kolen so sine len direktno vlijanie upro e Devleskoro narodo. Iako e Devleskoro narodo tano but hari keda ka sporedinel pe sa e narodoncar ko sveto, ola but puti tane napadime taro adala vlade. Soske? Adaleske so i glavno cel e Satanaskiri hem celo leskere svetoskiri tani te uništinen okolen so služinena e Jehovaske hem e Isuseske (1. Moj. 3:15; Otk. 11:7; 12:17). Isto agjaar, o proroštvo taro Daniel mora te odgovorinel e javere proroštvoncar taro e Devleskoro Lafi. Ustvari, šaj točno te haljova adava so ov prorokujngja samo ako sporedinaja le javere stihoncar tari Biblija (w20.05 2, pas. 1-2).

But manuša avdive isi len pumaro veruvanje bašo adava so ovela e manušencar palo meribe. Ama, so vakerela i Biblija bašo adava? Keda nekoj merela, leskoro telo kirnjola. Ama, okova so stvoringja o univerzum šaj te voskresninel adale manuše hem te del le telo savo so valjani leske (1. Moj. 1:1; 2:7). O apostol Pavle koristingja jekh sporedba koja so sikavela kaj o Devel na valjani te voskresninel e manuše isto teloja. Razmislin bašo „zrno“ ili „seme“ taro jekh rastenie. Keda adava seme tano sadimo ki phuv, ov počminela te bajrol hem ovela jekh nevo rastenie. Adava nevo rastenie tano pojaver taro tikno seme. O Pavle koristingja akaja sporedba te šaj te sikavel kaj amaro Stvoriteli šaj sekaske „te del telo savo so mangela“. O Pavle isto agjaar vakergja kaj isi nebesno telo hem phuvjalo telo. So mislingja akalea? Ki phuv isi telesno telo, a ko nebo isi duhovno telo, sar so isi e angelen (1. Kor. 15:36-41; w20.12 9-10, pas. 7-9).

Sarine amen mangaja te ovel amen jekh mirno životo. Nikoj na mangela te oven le sekiracie. Ama, ponekogaš osetinaja amen but sekirime hem šaj pučaja amen adava so o David pučlja ko avdisutno stiho. Isi but bukja so kerena te osetina amen sekirime, hem šaj nane amen kontrola upro nesave taro adala bukja. Na primer, amen našti te čhinava te bajron sekova berš o cene baši hrana, bašo šeja hem bašo trošakija ko kher. Isto agjaar nane amen kontrola upro adava kobor puti amare kolege ili součenikija ka čhiven amen ko iskušenie te ova nečesna ili te kera nemoral. Našti te čhinava o kriminal so isi ko than kote so živinaja. Amen isi amen problemija adaleske so pobaro delo taro manuša na anena odluke sprema e Devleskere načelija. O Satana, o devel akale svetoskoro, džanela kaj o sekiracie taro životo ko akava sveto, čhinavena e manušen te služinen e Jehovaske (Mat. 13:22; 1. Jov. 5:19). Na iznenadinela amen so o sveto tano pherdo stresna situaciencar! (w21.01 2, pas. 1, 3).

O apostol Jovan pottikningja amen te na mrzina amare phralen hem e phenjen. Ako na šunaja akava sovet, dozvolinaja o Satana te vlijajnel upri amende (1. Jov. 2:11). Akava slučingja pe nesave hristijanenge ko krajo taro prvo veko. Ko adava vreme o Satana kerela sine sa te šaj e Devleskoro narodo te mrzinel pe jekh jekhea hem te odvojnel pe. Keda o Jovan pišingja ple pismija, ko sobranie sine manuša kola so sikavgje isto duho sar e Satanaskoro. Na primer, o Diotref kergja te oven podelbe ko sobranie (3. Jov. 9, 10). Ov na poštujnela sine e patuvačko nadglednikon so sine bičhalde taro vodečko telo. Ov čak manglja te frdel taro sobranie okolen so sikavgje gostoprimlivost okole manušenge so ov na mangela len sine. Adava sine but arogantno! O Satana avdive da probinela te odvojnel e Devleskere narodo. Na valjani nikogaš te dozvolina te mrzina amare phralen hem te odvojna amen lendar (w21.01 11, pas. 14).

ki Prvo svetsko vojna, i germansko hem i britansko vlast progoninena sine e Devleskere slugen kola so na mangena sine te borinen pe ki vojna. Osven adava, i amerikansko vlada čhivgja ko zatvor okolen so predvodinena sine ki propovedničko aktivnost. Akale progonstvoja ispolningja pe o proroštvo soj pišimo ko Otkrovenie 11:7-10. Palo adava, ko 1933 berš hem posebno ki Dujto svetsko vojna, o severno cari bizi nisavi milost napadingja e Devleskere slugen. O Hitler hem leskere sledbenikija zabraningje i aktivnost so kerela la sine e Devleskoro narodo. O protivnikija mudargje okolu 1.500 Jehovaskere slugen hem nekobor milje sine bičhalde ko koncentraciona logorija. Osven adava, o severno cari meljargja o svetilište hem čhinavgja „i žrtva so dela pe sekova dive“ agjaar so zabraningja i propovedničko aktivnost (Dan. 11:30b, 31a). O Hitler, o vodači e nacističko partijakoro, čak vetingja kaj ka mudarel sekole jekhe taro e Devleskere narodo soj ki Germanija (w20.05 6, pas. 12-13).

Keda sikavaja mangipe taro vilo jekh jekheske, amen zaštitinaja o sobranie taro natprevaruvačko duho. Setin tut kaj o Jonatan na sine ljubomorno e Davideske hem na mangela sine te ovel cari namesto leste (1. Sam. 20:42). Sarine amen šaj te dža palo e Jonataneskoro primer. Ma ov ljubomorno bašo e phralengere sposobnostija, nego „ponizno dikh e javeren sar pobare tutar“ (Fil. 2:3). Neka ovel tut ki godi kaj sekova jekh amendar šaj te pomožinel ko sobranie. Ako siem ponizna ka šaj te dikha o šukar osobine ko amare phralja hem phenja hem ka ovel amen korist taro lengoro verno primer (1. Kor. 12:21-25). Keda sikavaja mangipe taro vilo jekh jekheske, amen pomožinaja amare phralenge hem phenjenge te služinen e Jehovaske ko jekhipe. Dokažinaja kaj amen siem e Isuseskere sledbenikija, hem adava kerela o iskrena manuša te mangen te služinen e Jehovaske. Soj najvažno taro sa, amen falinaja e Jehova, amare ’Dade soj pherdo milost hem e Devle sekole utehakoro‘ (2. Kor. 1:3; w21.01 24, pas. 14; 25, pas. 16).

Avdive da nesave manuša na poštujnena amen hem asana amenge adaleske so mislinena kaj siem prosta hem kaj na vredinaja. Soske? Adaleske so nane amen ista stavija sar lende. Trudinaja amen te ova ponizna, krotka hem poslušna. Tari javer strana, o manuša ko sveto ceninena okolen soj tane gorda, arogantna hem buntovna. Osven adava, amen na mešinaja amen ki politika hem na džaja ki vojska. Adaleske so siem porazlična taro manuša ko sveto avdive, ola mislinena kaj na vredinaja ništo (Rim. 12:2). Bizi razlika sar dikhela amen o sveto, o Jehova preku amende kerela bare bukja. Adaleske so dela plo vodstvo, kerela pe i najbari propovedničko aktivnost ki manušikani istorija. Avdive leskere sluge objavinena o najprevedime hem o najpečatime spisanija ko sveto, hem koristinena i Biblija te šaj te pomožinen milionja manušenge te ovel len pošukar životo. Sa akava kerela o Jehova (w20.07 15, pas. 5-6).

O Isus tano podložno e Jehovaske, ama sigurno na adaleske so nane inteligentno ili so nane le sposobnostija. Adava so sikavela sine e manušen ko ednostavno hem jasno način sikavela kaj ov tano but inteligentno (Jovan 7:45, 46). O Jehova džanlja kaj o Isus tano but sposobno hem dozvolingja leske te kerel zaedno lea buti keda o Jehova stvoringja sa soj ko nebo hem ki Phuv (Izr. 8:30; Evr. 1:2-4). Otkeda o Isus voskresningja, o Jehova dengja le sa i vlast ko nebo hem ki Phuv (Mat. 28:18). Iako e Isuse isi le but sposobnostija, ov sepak rodela vodstvo taro Jehova. Soske? Adaleske so mangela ple Dade. E poglavaren valjani te ovel len ki godi kaj o Jehova na rodela i romni te ovel podložno ple romeske adaleske so mislinela kaj oj na vredinela doborom sar o murš. Akava dikhela pe taro adava so biringja hem muršen hem džuvlen te vladinen zaedno e Isusea (Gal. 3:26-29). O Jehova sikavgja doverba ko plo Čhavo adalea so dengja le avtoriteti. Slično agjaar, jekh mudro rom dela ple romnjake odredeno avtoriteti (w21.02 11, pas. 13-14).

E Devleskoro Lafi tano sar ajna. Ov pomožinela amenge te dikha so valjani te kera pošukar hem sar valjani te kera adava (Jak. 1:23-25). Na primer, otkeda proučinaja e Devleskoro Lafi, amen haljovaja kaj valjani te kera promene ko amaro karakter. Adalea so pomožinela amenge o Jehova, amen sikljovaja te ova krotka keda o manuša ili nesavo problemi nervirinela amen. Akana šaj pošukar te razmislina hem te ana pošukar odluke (Jak. 3:13). But tano važno te džana šukar i Biblija! Ponekogaš sikljovaja so na valjani te kera, odkeda kergjem jekh greška. Pošukar način te dobina mudrost tano te sikljova taro e javerengere šukar postapke hem taro lengere greške. Adaleske o Jakov ohrabrinela amen te dikha o primerija taro manuša soj pišime ki Biblija, sar soj o Avraam, i Raav, o Jov hem o Ilija (Jak. 2:21-26; 5:10, 11, 17, 18). Adala verna sluge e Jehovaskere šaj sine te oven bahtale iako trpingje nevolje. Akala primerija baši istrajnost sikavena amenge kaj amen da šaj te kera adava ako o Jehova pomožinela amen (w21.02 29-30, pas. 12-13).

O objaviteli so vodinela o biblisko kursi isi le glavno odgovornost te pomožinel e interesenteske te haljol e Devleskoro Lafi. Ako o objaviteli kaninela tut te dža lea, tegani tu sar leskoro partneri ki služba valjani te pomožine leske (Prop. 4:9, 10). Ama, so šaj konkretno te kere te šaj te pomožine e objavitele džikote vodinela o biblisko kursi? Spremin tut bašo biblisko kursi. Prvo, puč e objavitele so proučinela e interesentea te vakerel tuke nešto bašo interesenti: „Šaj li te vakere mange nešto bašo interesenti? Koja tema ka proučinen hem so mangea te istaknine tari adaja tema? Isi li nešto so valjani ili na valjani te kerav ili te vakerav keda proučinena? Sar šaj te ohrabrinav e interesente te napredujnel?“ Džangjola pe, o objaviteli nane te vakerel tuke privatna informacie bašo interesenti, ama adava so ka vakerel ka ovel tuke korisno. Jekh misionerka, i Džoi, vakerela: „Akala informacie pomožinena okoleske soj mancar ki služba te mangel te pomožinel e interesenteske hem te razmislinel so ka vakerel džikote proučinaja“ (w21.03 9, pas. 5-6).

Ponekogaš, o manuša mrzinena amen adaleske so živinaja sprema e Devleskere pravedna merilija. Akala merilija skroz razlikujnena pe taro akale svetoskere rumime moralna merilija. Na primer, but manuša avdive otvoreno odobrinena o odvratna nemoralna postapke, sar so sine ko Sodom hem Gomor, dizja kola so uništingja len o Jehova (Juda 7). Adaleske so ikeraja amen ko bibliska moralna načelija, but manuša asana amenge hem vakerena kaj na siem tolerantna (1. Pet. 4:3, 4). So ka pomožinel amenge te istrajna keda o manuša mrzinena hem vredžinena amen? Valjani te ovel amen silno vera kaj o Jehova ka pomožinel amenge. Sar jekh štiti, amari vera šaj te ačhavel „sa o jagale strele e Lošnoskere“ (Ef. 6:16). Ama, osven i vera valjani amenge isto agjaar mangipe. Soske? Adaleske so o mangipe „na holjanela lokheste“. Ov učharela hem trpinela sa o bukja so šaj te dukhaven amen (1. Kor. 13:4-7, 13). O mangipe sprema o Jehova, o mangipe sprema amare phralja hem phenja hem čak o mangipe sprema amare dušmanja ka pomožinel amenge te istrajna keda o javera mrzinena amen (w21.03 20-​21, pas. 3-4).

Ponekogaš, amen sikavaja kaj mangaja amare phralen hem e phenjen adalea so na keraja nesave bukja. Na primer, na holjanaja sigate keda ola ka vakeren nešto. Razmislin bašo adava so ulo džikote o Isus živinela sine ki Phuv. Ov vakergja ple učenikonge kaj valjani te han leskoro telo hem te pien leskoro rat te šaj te dobinen životo (Jovan 6:53-57). Akala lafija doborom šokiringje bute dženen so but taro leskere učenikija gele peske. Ama, e Isuseskere verna amala ačhile lea. Ola da na halile e Isuseskere lafija hem adaleske sine iznenadime. Sepak, na mislingje kaj o Isus vakergja nešto pogrešno hem na holjangje. Namesto adava, len sine len doverba ki leste soske džanena sine kaj ov vakerela o čačipe (Jovan 6:60, 66-69). But tano važno te na holjana sigate keda amare amala ka vakeren nešto. Pošukar, te da len prilika te objasninen amenge so mislinena adalea so vakerena (Izr. 18:13; w21.01 11, pas. 13).