Septemvri

O Petar koristingja hari pojaver lafija keda citiringja e Joileskoro proroštvo (Dela 2:16, 17). Namesto te počminel e lafencar „palo adava“, kola so koristingja len o Joil, o Petar vakergja „ko posledna dive“. Ko akava kontekst, e lafencar „posledna dive“ mislinela pe ko periodi angleder te oven uništime o Erusalim hem o hrami. Ko adava vreme, e Devleskoro duho sine dendo „različna manušenge“. Akava sikavela kaj nakhlja but vreme angleder te ispolninel pe e Joileskoro proroštvo. Otkeda o Devel dengja plo duho upro hristijanja taro prvo veko, i propovedničko aktivnost barili but hem sar so nakhlja o vreme širingja pe ko celo sveto. Dži ko 61 berš tari a.e., keda pišingja plo pismo dži ko Kološanja, o apostol Pavle šaj sine te vakerel kaj o šukar haberi propovedinela pe „maškar sa o stvorime bukja soj telo nebo“ (Kol. 1:23). Keda o Pavle vakergja „sa o stvorime bukja“, mislingja ko sa o thana kote so ov hem o javera šaj sine te patujnen. Adaleske so pomožinela amen e Jehovaskoro mokjno sveti duh, avdive i propovedničko aktivnost kerela pe ki panda pobari mera — sa „dži ko krajo e phuvjakoro“! (Dela 13:47; w20.04 6-7, pas. 15-16).

O Jehova mangela sekole jekhe amendar, čak okolen so cidingje pe taro leskoro stado (Mat. 18:12-14). O Devel vetingja kaj ka rodel ple bakhren so našavdile hem kaj ka pomožinel lenge te sasljoven ko duhovno pogled. Isto agjaar, vakergja kola bukja ka kerel. O ista bukja kerena sine o pastirija ko Izrael keda ka našavgjovel sine nesavo bakhro (Ezek. 34:12-16). Najangle o pastiri džala sine te rodel e bakhre. Bašo adava valjani sine vreme hem trudo. Palo adava, keda ka arakhel sine e bakhre, iranela le sine ko stado. Ako sine povredimo ili bokhalo, o pastiri mangipaja grižinela pe sine leske agjaar so ka phandel leskere rane, ka lel le ko vasta hem ka del le te hal. O starešine, kola so grižinena pe bašo „e Devleskoro stado“, valjani te keren o ista bukja te šaj te pomožinen sekaske so cidingja pe taro sobranie (1. Pet. 5:2, 3). Ola rodena len, pomožinena lenge te iranen pe ko sobranie hem sikavena lenge mangipe agjaar so dena len i pomoš so valjani lenge te šaj te sasljoven ko duhovno pogled (w20.06 20, pas. 10).

Dali o Isus mislingja kaj o simbolična nive tane resle baši žetva adaleske so adžikerela sine poviše manuša te oven leskere sledbenikija? Ni najhari. I Biblija prorokujngja kaj samo hari manuša ka verujnen ki leste (Jovan 12:37, 38). Osven adava, o Isus šaj sine te čitinel o vile e manušengere hem džanela sine kaj poviše lendar nane te prifatinen adava so vakerela (Mat. 9:4). Sepak, koncentriringja pe ko adala hari džene so ka verujnen ki leste, hem revnosno propovedinela sine sarinenge. Adaleske so amen našti te čitina e manušengere vile, na smejnaja te ana sudo bašo nesavo podračje ili nesavo manuš. Šukar tano te mislina ko adava so šaj te ovel lendar jekh dive. Na valjani te bistra adava so vakergja o Isus ple učenikonge. O nive tane resle baši žetva. O manuša šaj te meninen pe hem te oven e Hristoseskere učenikija. O Jehova tano uverimo ko adava, hem asavke manušen dikhela len sar skapocena (Agej 2:7). Ako dikhaja e javeren sar so dikhena len o Jehova hem o Isus, ka trudina amen te doznajna ko so verujnena hem so interesinela len. Ki lende nane te dikha samo sar jabandžie, nego sar manuša so šaj te oven amare phralja hem phenja! (w20.04 13, pas. 18-​19).

Taro e Devleskoro Lafi jasno dikhjola kaj mora te zamanga e Isuse hem te bajrara amaro mangipe sprema leste te šaj te kera e Jehova bahtalo. Jekh buti so ka pomožinen amenge te ova amala e Isusea tani te pendžara le. Akava šaj te kera agjaar so ka čitina o bibliska lila Matej, Marko, Luka hem Jovan. Džikote razmislinaja bašo e Isuseskoro životo taro akala bibliska izveštaija, ki amende ka bajrol o mangipe hem o poštovanje sprema leste. Na primer, iako sine lengoro Gospodari, ov na ponašinela pe sine ple učenikoncar sar robija. Namesto adava, ov vakerela sine lenge so mislinela hem sar osetinela pe. O Isus osetinela sine lengiri dukh hem rovela sine lencar (Jovan 11:32-36). Čak leskere protivnikija priznajngje kaj tano amal okolenge so prifatingje leskoro haberi (Mat. 11:19). Keda ponašinaja amen e javerencar sar o Isus so ponašingja pe ple učenikoncar, tegani isi amen pošukar amalipe lencar hem siem pobahtale. Osven adava, amaro mangipe hem cenenje sprema leste bajrola panda poviše (w20.04 22, pas. 9-​10).

Dži ko 1870 berš, i Britanija uli najbari imperija ki Phuv, hem sine i najmokjno voeno sila. E Danieleskoro proroštvo kerela lafi baši jekh tikni šing koja so pobedingja javere trine šingen. Adaja tikni šing pretstavinela e Britanija, a o javera trin šinga pretstavinena e Francija, e Španija hem e Holandija (Dan. 7:7, 8). Skoro dži ko krajo tari Prvo svetsko vojna, i Britanija sine o južno cari. Ko adava isto vreme, o Soedineta Amerikanska Države ule i najbarvali phuv ko sveto hem počmingje paše te sorabotinen e Britanijaja. Džikote trajnela sine i Prvo svetsko vojna, o SAD hem i Britanija kergje voeno sojuz hem ule but mokjna. Ko adava vreme, i Britanija hem o Soedineta Države — kola so angleder sine britansko kolonija — ule i anglo-amerikansko svetsko sila. Sar so prorokujngja o Daniel, akava „cari“ khedingja „posebno bari hem mokjno vojska“. Džikote trajnena o posledna dive, i anglo-amerikansko svetsko sila celo vreme tani o južno cari (w20.05 4, pas. 7-8).

Ki Phuv isi pani ko tečno oblik adaleske so amari planeta tani dur taro Kham točno kobor so valjani. Keda bi ovela sine samo hari popaše dži leste, sa o pani ka isparinel hem i Phuv ka ovel sine pusto hem nane te ovel sine životo ki late. A keda bi ovela sine samo hari podur taro Kham, sa o pani ka smrznonel sine hem amari Phuv ka ovel sine učhardi ivea hem mrazoja. Ama, adaleske so o Jehova čhivgja i Phuv ko sovršeno than, o kružno tek e panjeskoro šaj te ikerel o životo ki Phuv. O Kham takjarela o pani taro okeanija hem taro javera thana kote so isi pani. O pani isparinela hem agjaar ovena oblakija. Sekova berš, tari Phuv isparinela but poviše pani nego so isi ko sa o ezerija ki celo Phuv. Akava pani ačhovela ki atmosfera okolu deš dive angleder te perel sar bršim ili iv. Ko krajo, o pani iranela pe ko okeanija hem ko morija, hem o kružno tek povtorinela pe. O Jehova kergja akava kružno tek te šaj sekogaš te ovel pani ki Phuv. Akava tano dokaz kobor ov tano mudro hem mokjno (Jov 36:27, 28; w20.05 22, pas. 6).

O Isus pottikningja amen sekogaš te molina amen bašo sveti duh (Luka 11:9, 13). Preku plo duho, o Jehova dela amen sila — čak „sila, koja so nakhavela i normalno“ (2. Kor. 4:7). Adaleske so pomožinela amen e Devleskoro duho, šaj te izdržina sekoja nevolja koja so ka ovel amen. Isto agjaar, o sveti duh šaj te pomožinel amen te kera amare zadače so isi amen ki e Devleskiri organizacija hem šaj te pomožinel amen te ova pošukar ko amare talentija. Svesna siem kaj sekova uspeh so isi amen ki služba bašo Devel nane adaleske so amen siem but sposobna, nego adaleske so ov pomožinela amen preku plo sveti duh. Sar šaj te sikava cenenje bašo akava poklon? Agjaar so ka molina amen o sveti duh te pomožinel amenge te otkrina sekoja pogrešno misla ili želba ko amaro vilo (Ps. 139:23, 24). Ako dikhaja kaj isi amen asavke misle ili želbe, tegani valjani te molina e Devle te koristinel plo sveti duh te šaj te del amen i sila so valjani amenge te borina amen lencar. Agjaar o Jehova ka dikhel kaj siem odlučna te na kera nešto so šaj te čhinavel le te pomožinel amen ple sveti duhoja (Ef. 4:30; w20.05 29, pas. 10-12).

Keda braninaja e Jehovaskoro anav, amen džaja palo e Isuseskoro primer. O Isus objavingja e javerenge ple Dadeskoro anav. Sar? Osven so koristingja o anav Jehova, o Isus sikavgja e manušen savo tano čače o Jehova. Na primer, ov sikavgja kaj tano hovajbe adava so vakergje o fariseija, kola pretstavinena sine e Jehova sar surovo, šudro hem Devel bizi milost kova so but rodela e javerendar. O Isus pomožingja e manušenge te haljoven kaj leskoro Dad tano strplivo, razumno, pherdo mangipaja hem spremno te prostinel. Osven adava, ov pomožingja lenge te zapoznajnen e Jehova agjaar so sovršeno sikavgja leskere osobine ko sa so kerela sine (Jovan 14:9). Isto sar o Isus, amen da šaj te vakera e javerenge adava so džanaja bašo Jehova, hem agjaar te pomožina lenge te ovel len hor poštovanje sprema leskoro anav. Šaj te vakera lenge kobor šukar Devel tano ov hem kobor but mangela amen. Agjaar ka sikava kaj o iftire kola so o dušmanja širinena len baši leste tane hovajba. Amare lafencar hem postapkencar sikavaja e javerenge savo čače tano o Jehova. Amen slavinaja adava anav agjaar so pomožinaja e manušenge te otfrlinen o hovajba bašo Devel (w20.06 6, pas. 17-​18).

O socijalna mreže šaj te oven korisna. Na primer, preku lende šaj te ova ko kontakt e familijaja hem e amalencar. Ama, dali primetingjan kaj o manuša čhivena nesave bukja ko socijalna mreže te šaj te istakninen korkori peste? Sar te phene mangena te vakeren: „Dikh man, dikh man!“ Nesave čak čhivena nepristojna hem bezobrazna komentarija ko ple slike ili ko slike so čhivena o javera. Akava tano sprotivno tari poniznost hem taro sočuvstvo kolende so pottikninela amen i Biblija (1. Pet. 3:8). Ako koristinea socijalna mreže, puč tut: „Dali taro mle komentarija, slike ili videoklipija o javera šaj te mislinen kaj falinava man? Dali bašo adava nesave šaj te oven ljubomorna?“ E hristijanen nane len potreba te keren pe važna, a ni palem o javera te dikhen len sar but važna. Ola tane poslušna ko biblisko sovet taro avdisutno stiho. I poniznost ka pomožinel amen te na ova sar o manuša ko sveto kola soj tane gorda hem mangena te oven nekoj hem nešto ko e javerengere jakhja (1. Jov. 2:16; w20.07 6, pas. 14-15).

Angleder te ovel e Hristoseskoro učeniko, o Pavle sine jekh terno drsko manuš kova so progoninela sine e Isuseskere sledbenikon (Dela 7:58). Korkori o Isus čhinavgja e Pavle, kova so tegani sine pendžardo sar Savle, ponadari da te napadinel e hristijansko sobranie. Ov kergja lea lafi taro nebo hem korjargja le. Te šaj sine palem te dikhel, o Pavle mora sine te rodel pomoš baš taro okola so progoninela len sine. Ov ponizno prifatingja pomoš taro jekh učeniko so vikinela pe sine Ananija, kova so pomožingja leske palem te dikhel (Dela 9:3-9, 17, 18). Iako pokasno sine le važno uloga ko hristijansko sobranie, o Pavle nikogaš na bistergja i pouka so dengja le o Isus džikote džala sine ko Damask. Ov ačhilo ponizno, hem spremno prifatingja i pomoš taro ple phralja hem phenja. O Pavle priznajngja kaj ola pomožingje leske hem kergje le te ovel pozoralo (Kol. 4:10, 11; w20.07 18-19, pas. 16-17).

Iako o Jehova tano Semokjno, ov isto agjaar dela odgovornostija e javerenge. Na primer, ov čhivgja e Isuse te ovel Cari ko leskoro Carstvo, hem ka del odredimi vlast e 144.000 manušenge so ka vladinen zaedno e Isusea. Džangjola pe, o Jehova obučingja e Isuse te šaj te ovel Cari hem Prvosvešteniko (Evr. 5:8, 9). Ov isto agjaar, obučinela okolen so ka vladinen zaedno leskere Čhavea. Ama otkeda ka del len adaja zadača, o Jehova nane te proverinel len celo vreme te dikhel sar kerena la. Namesto adava, isi le doverba kaj ola ka keren sa adava so ov rodela lendar (Otk. 5:10). Ako amaro nebesno Dad — kaske so na valjani nisavi pomoš e javerendar — dela odgovornostija e javerenge, kobor poviše valjani amen te kera adava! Na primer, dali sian poglavari ki familija ili starešina ko sobranie? Dža palo primer e Jehovaskoro agjaar so ka de zadače e javerenge hem nane te kontrolirine len stalno baši sekoja buti. Ako trudinea tut te postapine sar o Jehova, na samo so ka ovel završimi i buti, nego ka šaj te obučine e javeren hem te pomožine lenge te ovel len pobari doverba ki peste (Isa. 41:10; w20.08 9, pas. 5-6).

Sar mangela o Jehova te dikha ko leskere bakhre so našavdile? O Isus dengja amen šukar primer bašo akava. Ov džanlja kaj sa e Jehovaskere sluge tane leske skapocena. Adaleske kergja sa so šaj te pomožinel e „bakhrenge soj našavde taro e Izraeleskoro kher“ te iranen pe ko Devel (Mat. 15:24). Osven adava, sar šukar pastiri, o Isus dengja pestar sa te šaj te na našavel nijekhe taro e Jehovaskere bakhre (Jovan 6:39). O apostol Pavle pottikningja e starešinen ko sobranie taro Efes te džan palo e Isuseskoro primer. Ov vakergja lenge: „Mora te keren but buti sar asavke so pomožinena okolenge soj slaba, hem te ikeren ki godi o lafija taro o Gospodari o Isus, kova so korkori vakergja: ,Poviše isi bahtalipe keda dela pe nego keda lela pe‘“ (Dela 20:17, 35). Taro akava jasno dikhjola kaj e starešinen isi len posebno odgovornost ko akava pogled. O Salvador, jekh starešina tari Španija, vakerela: „Keda razmislinava bašo adava kobor o Jehova grižinela pe bašo ple bakhre so našavdile, adava pottikninela man te kerav sa so šaj te pomožinav lenge. Džanava kaj o Jehova adžikerela te grižinav man lenge“ (w20.06 23, pas. 15-​16).

O Jehova strplivo ka adžikerel te nakhen o milja berša te šaj te ova sovršena. Dži tegani, ov tano spremno te prostinel amare grevija. Adaleske amen da valjani te dikha o šukar osobine ko javera hem te ova lencar strpliva. O Isus hem o angelija but sine bahtale keda sine stvorimi i Phuv. Ama zamislin tuke kobor ka oven bahtale keda i Phuv ka ovel pherdi sovršena manušencar kola so mangena e Jehova hem služinena leske. Isto agjaar, zamislin tuke kobor ka oven bahtale okola so ka džan ko nebo te vladinen zaedno e Hristosea keda ka dikhen kobor korist ka ovel e manušen taro sa adava so kergje ola baši lende (Otk. 4:4, 9-11; 5:9, 10). Hem mislin ko adava savo ka ovel o životo keda ka rova tari radost namesto tari dukh, keda o nasvalipe, o žalibe hem o meribe nane više te oven. Dži tegani, ov odlučno te ove sar tlo Dad o Jehova kova so isi le mangipe, mudrost hem strplivost. Ako kerea adava, ka ove bahtalo bizi razlika save problemencar borinea tut (Jak. 1:2-4). Čače but siem blagodarna bašo adava so vetingja o Jehova kaj „ka voskresninel okolen soj pravedna hem okolen so nane pravedna“! (Dela 24:15; w20.08 19, pas. 18-​19).

I Biblija tani skapoceno poklon taro amaro Dad soj ko nebo. Ov pottikningja verna muršen te pišinen la adaleske so but mangela ple čhaven ki Phuv. Preku plo Lafi, o Jehova dela amen odgovor bašo najvažna pučiba, sar soj: Kotar avaja? Koja tani i smisla e životoskiri? Savi idnina adžikerela amen? Adaleske so mangela sa leskere čhave te doznajnen o odgovor taro akala pučiba, ko vekija so nakhle o Jehova pottikningja nesave manušen te prevedinen i Biblija ko but čhibja. Avdive, i celo Biblija ili delija latar tane prevedime ko poviše taro 3.000 čhibja! Oj tani o najprevedimo hem najpečatimo lil ki manušikani istorija. Šaj te sikava kaj ceninaja i Biblija agjaar so ka čitina la sekova dive, ka razmislina hor bašo adava so sikljovaja hem ka da sa amendar te primenina adava. Osven adava, sikavaja e Devleske kaj siem leske blagodarna bašo leskoro Lafi adalea so keraja sa so šaj te vakera o haberi kobor so šaj poviše manušenge (Ps. 1:1-3; Mat. 28:19, 20; w20.05 24-25, pas. 15-16).

O proroko o Eremija valjani sine te propovedinel ko podračje kote so nikoj na mangela sine te šunel le. Ov sine doborom razočarimo so mangela sine te otkažinel pe. Ama na kergja adava. Soske? „E Jehovaskoro lafi“ sine sar jag andre ki leste hem našti sine te ikerel la ki peste! (Erem. 20:9). Amen da šaj te ova sar leste ako pheraja amare misle hem amaro vilo adalea so vakerela e Devleskoro Lafi. Akaja tani panda jekh pričina soske valjani sekova dive te proučina i Biblija hem hor te razmislina baši late. Agjaar ka ova pobahtale hem ka ova pouspešna ki služba (Erem. 15:16). Adaleske, keda sian obeshrabrimo, molin tut e Jehovaske. Ov ka pomožinel te dikhe ispravno ko tle greške, ki tli nesovršenost ili ko tlo nasvalipe. Ka pomožinel tuke te ovel tut ispravno stavi sprema tle zadače hem ka pomožinel tuke pozitivno te dikhe ki služba. Hem soj najvažno phrav tlo vilo tle nebesno Dadeske. Ov ka pomožinel tuke te borine tut keda sian obeshrabrimo (w20.12 27, pas. 20-21).

Nesave phenjenge, o sostanokija tane jekh taro hari prilike so isi len te oven zaedno e phralencar hem e phenjencar. Adaleske mangaja te koristina adala prilike te kera te osetinen pe šukar, te kera lencar lafi hem te sikava lenge kobor tane amenge važna. Isto sar o Isus, amen da šaj te odvojna amenge vreme te družina amen amare phenjencar (Luka 10:38-42). Na primer, šaj te kanina len ko gosti ili negde te phira lencar. Keda siem zaedno, mangaja te kera lafi bašo bukja so ohrabrinena (Rim. 1:11, 12). E starešinen valjani te ovel len o isto stavi sar so sine e Isuse. Ov džanlja kaj nekaske šaj te ovel pharo te na ovel ko brako, ama jasno vakergja kaj o trajno bahtalipe na zavisinela ni dali nekoj tano ko brako ni dali isi le čhave (Luka 11:27, 28). Namesto adava, ka ova trajno bahtale ako čhivaja i služba bašo Jehova ko prvo than (Mat. 19:12). Posebno o starešine valjani te ponašinen pe e džuvlencar sar lengere duhovna phenja hem daja. Šukar tano o starešine te odvojnen peske vreme angleder ili palo sostanok te keren lafi e phenjencar (w20.09 21-​22, pas. 7-9).

Ko Izrael, o zemjodelco sejnela sine o seme ki sredina taro oktomvri hem khedela sine o plodija ki sredina taro april (Mar. 4:28). Ka ova mudra ako amen da sikavaja strplivost sar o zemjodelco. Ama, akava šaj te ovel pharo.Obično o nesovršena manuša mangena odma te dikhen o rezultatija tari pumari buti. Ama, ako mangaja ki amari bavča te bajron rastenija hem te oven len plodija valjani stalno te grižina amen lenge. Mora te randa, te sadina, te ikala i štetno čar hem te vadina. Slično agjaar, ako mangaja te kera učenikija, valjani but te trudina amen. Valjani amenge vreme te otkornina taro interesentija o predrasude hem te sikljon te grižinen pe e javerenge. Ako siem strpliva nane te obeshrabrina amen keda o manuša nane te šunen amen. Ama, isto agjaar valjani te ova strpliva keda nesave manuša mangena te šunen hem te sikljoven. Našti silaja te terina jekhe interesente te ovel le vera. Ponekogaš, čak e Isuseskere učenikija na halile odma so značinena sine leskere lafija (Jovan 14:9). Ma te bistra kaj amen šaj te sadina hem te vadina, ama o Devel kerela te bajrol (1. Kor. 3:6; w20.09 11, pas. 10-​11).

Sarine mangaja o interesentija te napredujnen hem jekh dive te krstinen pe. Jekh važno način sar šaj te pomožina lenge tano te ohrabrina len te aven ko amare sostanokija. But puti o interesentija kola so odma počminena te aven ko sostanokija sigate napredujnena. Nesave objavitelija objasninena e interesentenge kaj ko sostanokija ka sikljoven but javera bukja baši Biblija so nane te sikljoven ko biblisko kursi. Čitin Evreite 10:24, 25 zaedno e interesentea, hem objasnin leske savi korist ka ovel le ako avela ko sostanokija. Ov vooduševimo džikote vakerea leske so sikliljan sigende ko sostanok. Keda ka dikhel sar osetinea tut, adava šaj te pottikninel le te mangel te avel. Adava so ka dikhel hem ka šunel ko prvo sostanok sigurno ka ovel but pošukar taro adava so dži akana dikhlja hem šungja ko javera thana kote so khedena pe javera religie (1. Kor. 14:24, 25). Ka zapoznajnel javeren kola soj tane šukar primer hem kola so ka pomožinen leske te napredujnel hem te krstinel pe (w20.10 10-11, pas. 14-15).

E Devleskoro duho ka pomožinel tuke te primenine sa adava so čitinea hem so sikljovea tari Biblija. Molin tut sar o psalmisti, kova so vakergja: „Sikav man Jehova bašo tlo drumo! Ka džav ko tlo čačipe. Pomožin mange celo vilea te darav taro tlo anav!“ (Ps. 86:11). Adaleske ponadari da le i duhovno hrana koja so o Jehova dela la amenge preku plo Lafi hem preku pli organizacija. Džangjola pe, tli cel nane tani samo te džane poviše bukja. Namesto adava, valjani o čačipe te ovel ko tlo vilo hem te primenine adava ko tlo životo. E Jehovaskoro duho šaj te pomožinel tuke te kere adava. Isto agjaar, valjani te ohrabrine tle phralen hem phenjen (Evr. 10:24, 25). Soske? Adaleske so ola tane tli duhovno familija. Molin tut o Jehova te pomožinel tuke ple sveti duhoja te de iskrena komentarija ko sostanokija hem te de tlo najšukar keda isi tut nesavo učestvo ki programa. Agjaar ka sikave e Jehovaske hem leskere Čhaveske kaj mangea lengere skapocena „bakhren“ (Jovan 21:15-17). Šun tle Najbare Učitele agjaar so ka sikljove taro sa o informacie so dela amen ov (w20.10 24-​25, pas. 15-​17).

So kergja o Isus keda leskere apostolija sine obeshrabrime? Kratko palo leskoro voskresenie, o Isus vakergja nesave učenikonge: „Ma daran! Džan, vakeren mle phralenge [kaj voskresningjum]“ (Mat. 28:10a). O Isus na otkažingja pe taro ple apostolija. Iako ola mukhle le, ov ponadari da vikinela len sine ’mle phralja‘. Isto sar o Jehova, o Isus da sine milostivo hem prostinela sine (2. Car. 13:23). Slično agjaar, amen da grižinaja amen okolenge so čhinavgje te džan ki služba. Ola tane amare phralja hem phenja, hem amen but mangaja len! Amen na bistraja sa so kergje poangle akala phralja hem phenja bašo Jehova. Nesave soj tane akana neaktivna, služingje e Jehovaske beršencar (Evr. 6:10). Čače but falinena amenge! (Luka 15:4-7). Te ohrabrina e neaktivna objavitelen te aven palem ko sostanokija. Hem keda jekh neaktivno ka avel ki dvorana, amen valjani te dža ki leste hem ljubezno te pozdravina le (w20.11 6, pas. 14-​17).

O Jakov hem o Jovan ale ko Isus zaedno pumare dajaja hem rodingje lestar nešto so e Isuse na sine le vlast te del len. O Isus odma vakergja lenge kaj leskoro nebesno Dad tano adava so odlučinela koj ka bešel tari e Isuseskiri desno hem levo strana ko Carstvo (Mat. 20:20-23). O Isus sikavgja kaj tano svesno bašo ple granice. Ov sine skromno. Nikogaš na kergja nešto bašo kova so o Jehova na dengja le vlast (Jovan 12:49). Sar šaj te dža palo e Isuseskoro šužo primer? Šaj te ova skromna sar o Isus ako ikeraja amen ko sovet soj tano dendo ko avdisutno stiho. Adaleske, keda nekoj ka rodel amendar sovet, na mangaja te terina len te prifatinen amare idee ili te vakera lenge i prvo buti so ka avel amenge ki godi. Namesto adava, valjani te sikava lenge o sovetija so dela len i Biblija hem amare publikacie. Agjaar sikavaja kaj siem svesna kaj na džanaja sa. Keda keraja akava, amen siem skromna soske priznajnaja kaj e Jehovaskere sovetija tane sekogaš pošukar taro amare (Otk. 15:3, 4; w20.08 11-​12, pas. 14-​15).

So valjani te ovel tut ki godi ako mislinea kaj valjani te de sovet nesave amaleske? Angleder te kere lea lafi, puč tut: „Dali šaj sium prepravedno?“ O prepravedno manuš sudinela e javerenge sprema ple merilija, a na sprema e Jehovaskere, hem šaj na sikavela milost. Otkeda šukar ka razmisline soske mangea te de sovet tle amaleske hem panda mislinea kaj valjani te kere adava, jasno vaker leske kova tano o problemi hem puč le nekobor pučiba te šaj te pomožine leske korkori te haljovel soske adava so kergja tano pogrešno. Keda dea sovet, adava valjani te temelinel pe ki Biblija. Ma bistre kaj tlo amal bašo ple postapke nane odgovorno angli tute, nego anglo Jehova (Rim. 14:10). Koristin i mudrost so arakhljovela ko e Devleskoro Lafi, hem ov sočuvstvitelno sar o Isus (Izr. 3:5; Mat. 12:20). Soske? Adaleske so o Jehova ka postapinel amencar isto sar amen so postapinaja e javerencar (Jak. 2:13; w20.11 21, pas. 13).

Dali bi mangea o manuša te sudinen tuke sprema adava savi boja isi tut ki koža, sar izgledinea ili kobor kile isi tut? Verojatno na. Kobor tano utešno so džanaja kaj o Jehova na kerela peske mislenje baši amende sprema adava so dikhjola pe samo jakhencar! Na primer, keda dikhlja e Jeseeskere čhaven, o Samoil na dikhlja adava so dikhlja o Jehova. O Jehova vakergja akale prorokoske kaj jekh taro e Jeseeskere čhave ka ovel cari ko Izrael. Ama, kova čhavo? Keda dikhlja e najbare čhave, e Elijave, o Samoil vakergja: „Sigurno anglo Jehova tergjola leskoro pomazaniko!“ O Elijav čače izgledinela sine sar cari. Ama, o Jehova vakergja e Samoileske: „Ma dikh adava sar izgledinela, ni adava soj tano učo, soske me otfrlingjum le“. So sikljovaja taro akava? O Jehova vakergja: „O manuš dikhela adava so dikhjola pe jakhencar, a o Jehova dikhela adava so isi ko vilo“ (1. Sam. 16:1, 6, 7). Šukar tano te postapina amare phralencar hem e phenjencar agjaar sar ov so postapinela amencar (w20.04 14, pas. 1; 15, pas. 3).

Džikote džala sine ki Galileja, o Isus nakhlja taro nive kote so verojatno bajrola sine jačmen (Jovan 4:3-6). Valjani sine te nakhen okolu štar masek te šaj te khedel pe o jačmen. Adaleske šaj sine čudno keda o Isus vakergja: „Vazden tumare jakhja hem dikhen o nive, ola tane resle baši žetva!“ (Jovan 4:35, 36). So manglja te vakerel adalea? Verojatno, o Isus kerela sine lafi baši jekh simbolično žetva — žetva taro manuša. Razmislin so ulo kratko angleder te vakerel akala lafija. Iako o Evreija na mangena sine te ovel len ništo e Samarjanencar, o Isus propovedingja jekhe Samarjankake hem oj sikavgja interes bašo adava so šungja. Ustvari, baš keda vakergja kaj o nive tane „resle baši žetva“, jekh grupa Samarjanja kola so šungje baši leste tari džuvli, avena sine te šaj te vakerel lenge nešto poviše (Jovan 4:9, 39-42). Jekh biblisko istražuvači bašo akava izveštaj pišingja: „Adava so akala manuša odma ale ki leste sikavela kaj ola sine sar reslo giv baši žetva“ (w20.04 8, pas. 1-2).

Amare sostanokija pomožinena amenge pošukar te koristina amare „voena“ veštine agjaar so pomožinena amenge pošukar te propovedina hem te sikava. Na primer, sikljovaja sar delotvorno te koristina amare glavna publikacie službake. Adaleske spremin tut šukar bašo sostanokija. Džikote trajnela o sostanok, šun vnimatelno hem palo sostanok primenin adava so sikliljan. Ako kerea adala bukja, tu ka ove „šukar vojniko e Hristos Isuseskoro“ (2. Tim. 2:3). Isto agjaar, isi amen poddrška taro milionja mokjna angelija. Razmislin bašo adava so šaj samo jekh angeli te kerel! (Isa. 37:36). A akana razmislin so šaj jekh mokjno vojska angelija te kerel. Nijekh manuš ili demoni našti te pobedinel e Jehovaskere mokjno vojska. O Jehova tano Semokjno hem adaleske keda ov tano amencar amen sekogaš ka ova posilna taro amare protivnikija, bizi razlika kobor džene tane (Sud. 6:16). Pamtin akala bukja keda nekoj taro tle kolege, součenikija ili familija so nane e Jehovaskere svedokija obeshrabrinena tut pumare lafencar ili postapkencar. Ma bistre, na sian korkori ki akaja borba. Tu sledinea e Jehovaskoro vodstvo hem adaleske ov poddržinela tut (w21.03 29, pas. 13-14).

O apostol Pavle izgleda citiringja o stiho taro Isaija 22:13, kova so kerela lafi bašo stavi so sine e Izraelcon. Namesto te oven popaše e Jehovaja, ola mangena sine te zadovolinen pumare želbe. Ustvari, e Izraelcongoro stavi sine „avdive sian akate, tajsa šaj te mere“, stavi kova so tano voobičaeno avdive da. Adava so džanaja kaj o Jehova ka voskresninel e mulen, valjani te vlijajnel upro adava kasaja družinaja amen. O phralja ko Korint valjani sine te izbeginen te družinen pe adalencar so na verujnena sine ko voskresenie. Adaja tani pouka amenge da avdive: Ako često družinaja amen amalencar so mangena akana samo te zadovolinen pumare želbe, lošno ka vlijajnen upri amende. Ako jekh hristijani nakhavela but vreme asavke manušencar, šaj te našavel plo šukar stavi hem navike. Ustvari, asavke manuša šaj te čhiven amen te kera grevo, ili te kera bukja so o Devel mrzinela len. Adaleske, o Pavle ohrabringja amen: „Osvestinen tumen adalea so ka keren adava soj ispravno, hem ma grešinen“ (1. Kor. 15:33, 34; w20.12 9, pas. 3, 5-6).

Akava stiho opišinela o način sar o Jehova organiziringja ple familija ko nebo hem ki Phuv. Ko poglavarstvo tane vklučime duj važna bukja — o avtoriteti hem i odgovornost. O Jehova tano „o poglavari“ hem le isi le o najbaro avtoriteti. Adaleske sa leskere čhave, hem o angelija hem o manuša, tane odgovorna angli leste (Rim. 14:10; Ef. 3:14, 15). O Jehova dengja e Isuseske avtoriteti upro sobranie, ama o Isus tano odgovorno anglo Jehova bašo način sar postapinela amencar (1. Kor. 15:27). O Jehova isto agjaar dengja avtoriteti e romeske upri romni hem upro čhave. Sar šaj jekh rom te ovel šukar poglavari ki pli familija? Ov prvo valjani te haljol so očekujnela lestar o Jehova. Isto agjaar, valjani te džanel soske o Jehova dengja o poglavarstvo. Hem, soj najvažno, valjani te džal palo e Jehovaskoro hem e Isuseskoro primer. Soske sa akava tano doborom važno? Adaleske so o Jehova e familijarno poglavarenge dengja nesavo avtoriteti hem očekujnela lendar te koristinen le ko šukar način (Luka 12:48b; w21.02 2, pas. 1-3).

Šukar tano te dža palo e Jehovaskoro primer adalea so ka birina te bistra nesave bukja. Iako o Jehova sovršeno pamtinela, ov odlučinela te bistrel nesave bukja. Na primer, ako kainaja amen, o Devel odlučinela te prostinel amenge hem te bistrel o greške so kergjem len (Ps. 25:7; 130:3, 4). Ov mangela amen da te postapina agjaar e javerencar keda lenge žal so grešingje amenge hem povredingje amen (Mat. 6:14; Luka 17:3, 4). Šaj te sikava cenenje baši amari čudesno godi adalea so ka da čest okoleske so dengja la amenge sar poklon. Nesave koristinena pli godi te šaj korkori te odlučinen soj ispravno a soj pogrešno. Ama, adaleske so o Jehova stvoringja amen, razumno tano te očekujna kaj leskere merilija tane pošukar taro bilo save merilija kola so amen šaj te čhiva amenge (Rim. 12:1, 2). Keda živinaja sprema leskere merilija, isi amen mir (Isa. 48:18). Osven adava, jasno amenge koja tani i smisla bašo adava soske postojnaja — te da čest hem te slavina amare Stvoritele hem Dade, hem te kera le bahtalo (Izr. 27:11; w20.05 24, pas. 13-14).

Sar šaj taro vilo te manga amare phralen hem phenjen avdive? Keda pendžaraja len pošukar, polokho amenge te haljova len hem te manga len taro vilo. Šaj te ova lencar amala iako tane amendar pophure ili poterne, ili isi len javer kultura. Ma bistre, o Jonatan sine okolu 30 berš pophuro taro David, ama sepak sine lea paše amal. Isi li nekoj ko tlo sobranie soj pophuro ili poterno tutar kasaja so šaj te ove amal? Keda kerea adava, tu sikavea kaj mangea sa e phralen (1. Pet. 2:17). Dali adava so mangaja e phralen taro vilo značinela kaj sarinencar ka ova paše ko sobranie? Adava našti te očekujna. Normalno tano te ova nekasaja popaše adaleske so interesinena amen ista bukja. O Isus vikinela sine sa ple apostolen „amala“, ama sine but paše e Jovanea (Jovan 13:23; 15:15; 20:2). Sepak o Isus na postapinela sine pošukar e Jovanea nego e javerencar (Mar. 10:35-40; w21.01 23, pas. 12-13).

Džikote sine ki Atina, o apostol Pavle na vakergja ko isto način i poraka e manušenge so na sine Evreija sar e Evreenge ki sinagoga. Ov šukar dikhela sine okolu peste hem primetingja kaj isi len nesave religiozna običaija (Dela 17:23). Palo adava, trudingja pe te arakhel nešto zaedničko maškar o čačipe taro e Devleskoro Lafi hem o način sar ola poštujnena pumare devlen. O Pavle sine spremno te prilagodinel plo pristap. Ov vakergja e Atinjanenge kaj i poraka so vakerela la tani taro „nepoznato Devel“ koleske so kergje žrtveniko hem kole poštujnena le sine ko nesavo način. Iako akala manuša na džanena sine o sveta spisija, o Pavle na vazdingja ple vasta lendar. Namesto adava, dikhela len sine sar giv kova soj tano reslo baši žetva hem prilagodingja o način sar propovedingja lenge. Isto sar o Pavle, šukar primetin i okolina. Probin te dikhe nesave bukja kola so ka pomožinen tuke te haljove ko so verujnena o manuša taro tlo podračje. Sar izgledinela o kher? Dali šaj taro anav, izgled, šeja ili o način sar kerela lafi o stanari te dikhe tari koja religija tano? (w20.04 9-​10, pas. 7-8).