Januari

O Isus hrabro osudinela sine e religiozna vodačen taro adava vreme, adaleske so na sikavena sine e manušen te obožavinen e Jehova ko ispravno način. Na primer, ov osudinela sine e licemerna fariseen kola so poviše grižinena pe sine sar ka thoven pumare vasta nego sar ka grižinen pe pumare roditelenge (Mat. 15:1-11). Iako o religiozna vodačija sine holjame e Isuseske adaleske so vakergja adala bukja, o Isus na čhinavgja te vakerel o čačipe. O Isus isto agjaar otkringja kaj nesave religiozna sikljojba tane pogrešna. Ov na vakergja kaj sa adava ko so verujnena o religie tano prifatlivo e Devleske. Namesto adava, ov vakergja kaj but manuša ka džan ko buvlo drumo kova so ingarela ko uništuvanje, a samo nekobor ka oven ko tesno drumo kova so ingarela ko životo (Mat. 7:13, 14). O Isus jasno vakergja kaj nesave manuša ka vakeren kaj služinena e Devleske, ama ustvari ola nane te služinen leske. Ov predupredingja: „Arakhen tumen taro hovavne prorokija, kola so avena tumende ko bakhrane mortika, a andraldan tane sar bokhale ruva. Taro lengere plodija ka pendžaren len“ (Mat. 7:15-20; w21.05 9, pas. 7-8).

I Ana sine ko brako jekhe levitea so vikinela pe Elkana, kova so but mangela la sine. Ama le sine le javer da romni, i Fenina. Ov mangela sine poviše e Ana nego e Fenina. Ama e Fenina sine la čhave, a e Ana na sine la. Adaleske i Fenina stalno vredžinela la sine „te šaj te voznemirinel la“. Sar osetinela pe sine i Ana? Oj sine but razočarimi! „Rovela sine hem na hala sine“. Sepak, i Biblija na vakerela kaj i Ana irangja lošnipaja. Namesto adava, ki molitva vakergja e Jehovaske sa so sine la ko vilo hem sine la doverba kaj ov ka pomožinel la (1. Sam. 1:2, 6, 7, 10). So sikljovaja taro e Anakoro primer? Ako nekoj mangela te natprevarinel pe tuja ko nešto, ma bistre kaj na valjani te dokažine e javerenge kobor vredinea. Ma mukh adava te čhivel tut te natprevarine tut. Namesto te irane lošnipaja, probin te ove ko mir adale manušea (Rim. 12:17-21). Čak ako ov na meninela pe, tut ka ovel tut andruno mir hem ka ove bahtalo (w21.07 17, pas. 13-14).

Adaleske so o Juda Iskariot ulo alčno, ov kergja nešto but lošno hem izdajngja e Isuse. Ama, o Juda na sine sekogaš lošno manuš (Luka 6:13, 16). E Isuse sine le doverba ki leste, adaleske čhivgja le te ovel odgovorno baši kutija e parencar. Ama palo nesavo vreme, o Juda počmingja te čorel, iako but puti šungja e Isuseskere predupreduvanja baši alčnost (Mar. 7:22, 23; Luka 11:39). O Juda sikavgja kaj tano alčno ki jekh situacija kratko angleder o Isus te ovel mudardo. O Isus hem leskere učenikija, a isto agjaar i Marija hem lakiri phen i Marta, sine gostija ko Simon so sine le lepra. Džikote hana sine maro, i Marija uštili hem čhorgja upro e Isuseskoro šero mirislivo maslo kova so koštinela sine but pare. O Juda hem o javera učenikija holjangje. O javera učenikija šaj mislingje peske kaj adala pare ka ovel sine pošukar te koristinen pe ki služba. Ama, e Juda sine le javer motivi. Ov sine čor hem mangela sine te čorel pare tari kutija (Jovan 12:2-6; Mat. 26:6-16; Luka 22:3-6; w21.06 18, pas. 12-13).

Dali ponekogaš isi tut čuvstvo kaj isi tut but odgovornostija, hem našti resea sa te završine? Ako tano agjaar, tegani tu šaj te haljove e Pavle. Ov sine sekirimo na samo bašo jekh sobranie nego bašo „sa o sobranija“ (2. Kor. 11:23-28). Dali isi tut nesavo hronično nasvalipe kova so lela tli radost? E Pavle stalno mučinela sine „karo ko telo“, šaj nesavo problemi sastipaja, kova so mangela sine o Jehova te cidel le lestar (2. Kor. 12:7-10). Dali ponekogaš osetinea tut obeshrabrimo adaleske so sian nesovršeno? Agjaar o Pavle da osetingja pe ponekogaš. Ov korkori peske vakergja kaj tano „žalibaske“ adaleske so mora sine stalno te borinel pe te kerel adava soj ispravno (Rim. 7:21-24). Iako sine le različna problemija o Pavle ponadari da služingja e Jehovaske. So dengja le sila te kerel adava? Iako sine svesno baši pli nesovršenost, le sine le silno vera ki otkupnina (w21.04 22, pas. 7-8).

Keda o sovršeno manuš o Adam grešingja, ov našavgja i prilika te živinel večno, ama na samo ov nego isto agjaar leskere idna čhave. E Adame na sine le izgovor bašo adava so kergja. Ov odlučingja te kerel grevo. Ama, sar i tano leskere čhavencar? Ola na sine ni bijame keda o Adam grešingja (Rim. 5:12, 14). O Adam zaslužingja te merel bašo adava so kergja. Ama, šaj li sine o Jehova te kerel nešto te šaj e Adameskere čhave te živinen večno? Oja! Kratko otkeda grešingja o Adam, o Jehova postepeno otkringja sar ka spasinel e Adameskere čhaven taro grevo hem taro meribe (1. Moj. 3:15). Preku i otkupnina, amen šaj te ova paše amala e Jehovaja iako siem nesovršena. Preku i otkupnina, o bukja so kergja len o Beng ka oven celosno uništime (1. Jov. 3:8). Hem preku late, e Jehovaskiri prvobitno namera e Phuvjaja ka ovel ispolnimi. Celo Phuv ka ovel raj (w21.04 14, pas. 1; 19, pas. 17).

Jekh baro mnoštvo taro murša hem džuvlja taro but phuvja hem taro različna čhibja khedingje pe ko Erusalim. Adava dive slučingja pe nešto posebno. Taro jekh puti nesave Evreija počmingje te keren lafi ko čhibja taro narodija so ale ko Erusalim! Adava but iznenadingja adale manušen, ama panda poviše iznenadingja len adava so vakergje lenge o Evreija hem o apostol Petar. Akala manuša siklile kaj ola šaj te oven spasime ako sikavena vera ko Isus Hristos. Akaja poraka pogodingja lengere vile. Adava doborom vlijajngja upri lende so pučle: „So valjani te kera?“ O Petar vakergja lenge: „Sekova jekh tumendar neka krstinel pe“ (Dela 2:37, 38). Palo adava slučingja pe nešto but šukar. Adava dive krstingje pe okolu 3.000 manuša, hem ule e Isuseskere učenikija. Adava sine o početok tari bari zadača so zapovedingja la o Isus ple sledbenikonge — te keren učenikija. Leskere sledbenikija panda kerena adaja zadača (w21.06 2, pas. 1-2).

Šaj živinaja ko podračje kote soj pharo te počminel pe biblisko kursi. Nesave manuša na mangena te šunen o šukar haberi, pa čak protivinena pe. So šaj te pomožinel amenge te ačhova pozitivna ko asavko podračje? Na valjani te bistra kaj e manušengoro životo šaj sigate te meninel pe ko akava nesigurno sveto, hem okola so angleder na mangena sine te šunen šaj akana mangen (Mat. 5:3). Nesave so odbinena sine te čitinen amari literatura, pokasno prifatingje te proučinen. Isto agjaar, džanaja kaj o Jehova tano o Gospodari e žetvakoro (Mat. 9:38). Ov mangela ponadari da te sadina hem te čhiva pani, ama ov tano adava so kerela te bajrol. Hem kobor ohrabrinela amen adava so džanaja kaj čak ako ko momenti našti te vodina nesavo biblisko kursi, o Jehova nagradinela amaro trudo, a na o rezultati! (w21.07 6, pas. 14).

O Jehova dengja e manušenge i sposobnost te oven len čhave, hem i odgovornost te sikaven len te mangen le hem te služinen leske. Iako o Jehova dengja e angelenge but šuže sposobnostija, ov na dengja len i sposobnost te oven len čhave. Adaleske, ov blagodarno baši prednost so isi tut te bajrare čhaven. E roditelenge tani dendi i važno odgovornost, te den len opomene hem te „vospitinen len agjaar sar so vakerela o Jehova“ (Ef. 6:4; 5. Moj. 6:5-7). Te šaj te pomožinel e roditelenge, e Jehovaskiri organizacija dela but bukja so temelinena pe ki Biblija, sar soj publikacie, videoklipija, muzika hem internet statie. Akava sikavela kaj amaro nebesno Dad hem leskoro Čhavo but mangena amare ternen (Luka 18:15-17). O Jehova tano bahtalo keda e roditelen isi len doverba ki leste hem dena pestar sa te šaj te grižinen pe pumare čhavenge. Asavke roditelija pomožinena pumare čhavenge jekh dive te oven delo tari e Jehovaskiri familija, hem te ačhoven ki late večno! (w21.08 5, pas. 9).

Nesave manuša mislinena kaj te ovel tut vera značinela te verujne ko nešto bizo dokaz. Ama, sprema i Biblija, adaja nane čačutni vera. I Biblija objasninela kaj i vera temelinela pe ko jasno dokaz. Adaleske, iako našti te dikha e Jehova, e Isuse hem o Carstvo, amen isi amen dokaz kaj ola postojnena (Evr. 11:3). Jekh naučniko so ulo e Jehovaskoro svedoko vakerela: „Amen verujnaja ko bukja kolende so isi amen temeli hem na ignoririnaja o naučna dokazija“. Šaj te puča amen: „Ako isi jasna dokazija kaj isi Stvoriteli, tegani soske but manuša na verujnena kaj o Devel stvoringja o životo?“ Nesave manuša nikogaš korkori na ispitingje o dokazija. O Robert, kova so akana tano jekh taro e Jehovaskere svedokija, vakerela: „Adaleske so ki škola nikogaš na spomninela pe sine i ideja bašo stvoribe, me mislinava sine kaj o životo na ulo preku stvoribe. Ama keda sine man 22 berš doznajngjum tari Biblija logična hem uverliva dokazija kaj o Devel stvoringja sa“ (w21.08 15, pas. 4-5).

Amen šaj te doznajna nešto bašo e Jehovaskoro šukaripe agjaar so ka čitina i Biblija agjaar so ka šuna e javeren keda raskažinena bašo adava sar dobingje bereketija. Ama, najšukar ka haljova kobor tano šukar o Jehova ako amen korkori „probinaja“ kobor tano šukar. Na primer šaj mangaja te služina e Jehovaske ki polnovremeno služba, ama te šaj te kera adava ka valjani te poednostavina amaro životo. Džanaja e Isuseskoro vetuvanje kaj ako čhivaja o Carstvo ko prvo than o Jehova ka del amen adava so valjani amenge, ama amen korkori nikogaš na doživingjem te ispolninel pe upri amende akava vetuvanje (Mat. 6:33). Sepak, adaleske so isi amen doverba ko akala lafija so vakergja len o Isus, amen trudinaja amen pohari te trošina pare, kratinaja taro amaro rabotno vreme hem koncentririnaja amen ki služba. Keda keraja agjaar dikhaja taro lično iskustvo kaj o Jehova čače grižinela pe bašo amare potrebe. Agjaar amen „probinaja“ e Jehovaskoro šukaripe (w21.08 26, pas. 2).

Dali isi isto problemi avdive da? Oja. But sveštenikija mangena te prifatinen sar členija ko ple crkve manušen soj tane važna, barvale hem kolen so o sveto dikhela len sar mudra. Ola dozvolinena asavke manušenge te oven delo tari lengiri crkva iako kerena bukja kola so o Jehova mrzinela len. Adala religiozna vodačija ponižinena adalen soj tane revna e Jehovaske hem soj tane moralno čista, adaleske so poviše manuša taro akava sveto mislinena kaj ola nane važna. Sar so vakergja o Pavle o Devel prifatinela okolen soj tane „ponižime e javerendar“ (1. Kor. 1:26-29). E Jehovaske, sa leskere verna sluge tane skapocena. Sar šaj te na ova hovavde taro svetovno razmislibe? (Mat. 11:25, 26). Ma dozvolin te vlijajnel upri tute adava sar dikhela o sveto e Devleskere narodo. Haljov kaj o Jehova koristinela samo e ponizna manušen te keren leskiri volja (Ps. 138:6). Hem, razmislin bašo adava kobor but bukja ov kergja preku o manuša kolenge so o sveto mislinela kaj nane mudra hem intelegentna (w21.05 8, pas. 1; 9, pas. 5-6).

O apostol Pavle sine blagodarno baši pomoš so dobingja la taro phralja. Ov ponizno prifatinela sine pomoš taro phralja hem taro phenja (Fil. 2:19-22). Tumen o pophure, šaj te sikaven tumari blagodarnost e ternenge taro tumaro sobranie ko poviše načinija. Ako mangena te pomožinen tumenge bašo prevoz, pazaribe ili bašo javera bukja, prifatinen lengiri pomoš. Ma bistren kaj adava tano jekh način sar o Jehova sikavela tumenge mangipe. Šaj ka oven iznenadime kobor paše amala šaj te oven okolencar so pomožinena tumenge. Sekogaš, trudinen tumen te pomožinen e ternenge duhovno te napredujnen, hem vakeren lenge kaj sien but bahtale so dikhena kaj ola mangena ki pobari mera te služinen ko sobranie. Nakhaven lencar vreme hem vakeren lenge o iskustvija taro tumaro životo. Keda kerena agjaar, ka sikaven kaj sien blagodarna e Jehovaske bašo terne so isi ko sobranie (Kol. 3:15; Jovan 6:44; 1. Sol. 5:18; w21.09 11-12, pas. 12-13).

O Jehova mangela amare phralen hem phenjen. Ama amenge šaj nane sekogaš lokho te manga len hem te sikava lenge adava. Akava šaj te ovel pharo soske avaja taro različna kulture hem barilem ko različna okolnostija. Osven adava, sarine amen keraja greške kolencar so šaj te nervirina e javeren hem te razočarina len. Sepak, sarine šaj te trudina amen te bajrara o mangipe ki amari duhovno familija. Sar? Agjaar so ka sikava mangipe amare phralenge hem phenjenge isto sar amaro Dad (Ef. 5:1, 2; 1. Jov. 4:19). O sočuvstvitelno manuš dikhela sar te pomožinel lenge hem te utešinel len. O način sar o Isus postapinela sine e manušencar, sikavgja e Jehovaskoro sočuvstvo sprema lende (Jovan 5:19). Keda ki jekh prilika dikhlja baro mnoštvo, „e Isuseske pelo žal baši lende, soske sine mučime hem otfrlime sar bakhre bizo pastiri“ (Mat. 9:36). Na samo so e Isuse sine le sočuvstvo sprema lende, nego ov kergja da nešto te šaj te pomožinel lenge. Ov sasljargja e nasvalen hem pomožingja okolenge so sine „umorna hem so sine len pharipe“ (Mat. 11:28-30; 14:14; w21.09 22, pas. 10-11).

O Jehova mangela te ovel milostivo. O apostol Pavle pišingja kaj o Devel tano „barvalo ki milost“. Ko akava kontekst, o Pavle kerela sine lafi kaj o Devel tano milostivo soske dela nebesno nadež ple nesovršena slugenge, soj tane pomazime (Ef. 2:4-7). Ama o Jehova na sikavela milost samo e pomazanikonge. O psalmisti o David pišingja: „O Jehova tano šukar sarinencar, hem leskiri milost dikhela pe ko sa so kergja“ (Ps. 145:9). Adaleske so o Jehova mangela e manušen, ov sikavela milost sekogaš keda dikhela kaj isi pričina te kerel adava. Nikoj na džanela pošukar taro Isus kobor o Jehova mangela te sikavel milost. Ola sine but vreme zaedno ko nebo angleder o Isus te avel tele ki Phuv (Izr. 8:30, 31). Ko but situacie, ov dikhlja sar leskoro Dad sikavgja milost e grešna manušenge (Ps. 78:37-42). Ov but puti kerela sine lafi baši akaja šuži osobina so isi leskere Dade (w21.10 8-9, pas. 4-5).

O Jehova lično odgovoringja taro nebo ki adaja molitva hem vetingja kaj ka proslavinel plo anav. Džikote sine ki Phuv, o Isus proslavingja ple Dadeskoro anav (Jovan 17:26). Adaleske, razumno tano te očekujnel pe kaj e čačutne hristijanenge tano čest te koristinen e Devleskoro anav hem te vakeren le e javerenge. Ko prvo veko a.e., kratko otkeda sine kerdo o hristijansko sobranie, o Jehova „počmingja te khedel manušen taro javera narodija so ka phiraven leskoro anav“ (Dela 15:14). Adale hristijanenge sine bari prednost so šaj sine te koristinen e Devleskoro anav hem te vakeren le e javerenge. Ola koristinena sine e Devleskoro anav ki služba hem keda pišinena sine o bibliska lila. Agjaar, ola sikavgje kaj tane narodo bašo e Devleskoro anav (Dela 2:14, 21). Avdive da, e Jehovaskere svedokija sikavena kaj tane narodo bašo e Jehovaskoro anav (w21.10 20-21, pas. 8-10).

E Devleskoro verno mangipe ačhola večno. Akava tano spomnimo 26 puti ko Psalm 136. Ko prvo stiho pišinela: „Oven blagodarna e Jehovaske, soske tano šukar — soske leskoro verno mangipe ačhola večno“ (Ps. 136:1). Ko sekova stiho taro 2 dži ko 26 povtorinena pe o lafija „soske leskoro verno mangipe ačhola večno“. Džikote čitinaja akala stihija taro Psalm, vooduševime siem taro but načinija sar o Jehova sikavela plo verno mangipe bizo te čhinavel. O lafija „soske leskoro mangipe ačhola večno“ uverinena amen kaj e Devleskoro mangipe sprema leskoro narodo na meninela pe. Kobor tano ohrabruvačko adava so džanaja kaj o Jehova na otkažinela pe sigate taro ple sluge. Namesto adava, ov privrzinela pe okolencar so služinena leske hem ačhola lencar posebno keda isi len problemija. Adava so džanaja kaj o Jehova ačhola amencar, kerela amen te ova bahtale hem dela amen i sila koja so valjani amenge te šaj te ikljova ko krajo e problemencar hem ponadari te služina leske (Ps. 31:7; w21.11 4, pas. 9-10).

Dali ponekogaš sekirinea tut keda razmislinea bašo nastanija so ka slučinen pe? Sar na primer, o uništibe e hovavne religijakoro, o napad taro Gog taro Magog hem i vojna Armagedon. Dali nekogaš pučea tut, keda ka slučinen pe akala strašna nastanija, dali me ka šaj me te ačhovav verno? Ako ale tuke asavke misle ki godi, but ka pomožinen tuke e Isuseskere lafija soj pišime ko avdisutno stiho. O Isus vakergja ple učenikonge: „Te na ovel tumenge pharo ko vilo. Verujnen ko Devel“. I zorali vera ka pomožinel amenge te ova hrabra, bizi razlika so ka slučinel pe. Adava so ka razmislina sar postapinaja panda avdive keda amari vera tani ispitimi ka pomožinel amenge te izdržina ko ispitija so ka oven amen ki idnina. Agjaar ka džana ko kola podračja taro amaro životo valjani te kera pozorali amari vera. Sekova puti keda istrajnaja ko nesavo ispit, amari vera ovela pozorali. Akava ka pomožinel amenge te istrajna ko nevolje so ka oven ki idnina (w21.11 20, pas. 1-2).

O apostol Pavle ohrabringja e Timotee, a isto agjaar sa e hristijanen, te keren celosno pumari služba (2. Tim. 4:5). Ama, ponekogaš isi nesave predizvikija. Na primer, razmislin bašo phralja hem phenja kola so živinena ko phuvja kote o propovedibe tano ograničimo ili čak zabranimo. E Jehovaskoro narodo mora te borinel pe različna problemencar hem adava šaj te obeshrabrinel le. Na primer, but džene lendar mora te keren but buti, te šaj te grižinen pe bašo osnovna potrebe pumare familienge. Ola šaj mangena te keren poviše ki služba, ama nane len sila ko krajo taro kurko. Javera šaj but hari te keren ki služba bašo Devel, adaleske so isi len hronično nasvalipe ili tane phure hem adaleske našti ikljovena kheraldan. Nesave mislinena kaj na vredinena ništo anglo e Jehovaskere jakhja. Bizi razlika save tane amare okolnostija, o Jehova šaj te del amen sila te ikljova ko krajo amare problemencar hem ponadari da te služina leske najšukar so šaj sprema amare okolnostija (w21.05 20, pas. 1-3).

Ponekogaš o javera ka probinen te ubedinen amen te kera nešto soj pogrešno anglo Jehova. Ako kerena adava, valjani te ana jekh but važno odluka. Te dikha jekh delo taro načelo so arakhljovela ki 3. Mojseeva 19:19. Adathe pišinela: „Ma uraven šeja soj tane kerde taro duj različna materijalija“. Akaja zapoved pomožingja e Izraelconge te razlikujnen pe taro javera nacie. Adaleske so na siem više telo e Mojseeskoro zakoni, amen šaj te urava šeja taro različna materijalija, sar soj pamuko hem poliester, volna hem svila. Ama na mangaja te ova sar o manuša so na verujnena hem na ikerena pe ko bibliska merilija. Džangjola pe, amen mangaja amare familija hem mangaja te sikava mangipe e javerenge. Ama keda anaja važna odluke ko amaro životo, tegani siem spremna te razlikujna amen taro javera. Adava tano but važno, soske ako mangaja te ova sveta anglo Devel (2. Kor. 6:14-16; 1. Pet. 4:3, 4; w21.12 5, pas. 14; 6, pas. 16).

O drumo so ingarela dži ko životo šaj te arakhel pe. O Isus vakergja: „Ako ačhovena mle lafende, čače sien mle učenikija, hem ka džanen o čačipe, hem o čačipe ka oslobodinel tumen“ (Jovan 8:31, 32). Pofalno tano adava so na kergjan i isto buti koja so poviše džene kerena la. Namesto adava, tu rodingjan o čačipe, počmingjan hor te proučine e Devleskoro Lafi hem doznajngjan so rodela ov amendar hem šungjan e Isuseskere sikljojba. Tu doznajngjan kaj o Jehova očekujnela amendar te otfrlina o sikljojba tari hovavni religija hem te čhinava te učestvujna ko praznikija so avena latar. Isto agjaar haliljan kaj nane lokho te kere promene ko tlo životo te šaj te kere e Jehovaskiri volja (Mat. 10:34-36). Ama tu istrajngjan, adaleske so mangea tle nebesno Dade hem mangea te kere le bahtalo. Sigurno ov tano but zadovolno tutar (Izr. 27:11; w21.12 22, pas. 3; 23, pas. 5).

O Mojsej tano šukar primer soske prifatingja ukor otkeda kergja seriozno greška. Ki jekh prilika, ov but holjangja hem na dengja čest e Jehovaske. Adaleske, e Mojseeske na sine dozvolimo te khuvel ki Vetimi phuv (4. Moj. 20:1-13). Keda rodingja taro Jehova te meninel pli odluka, o Jehova vakergja leske: „Dosta, ma spomnin mange više adava“ (5. Moj. 3:23-27). O Mojsej na holjangja. Namesto adava, ov prifatingja e Jehovaskiri odluka hem o Jehova ponadari da koristingja le te šaj te vodinel e Izraelcon (5. Moj. 4:1). O Mojsej prifatingja sovet hem ov tano šukar primer palo kova so valjani te dža. O Mojsej sikavgja kaj prifatingja e Jehovaskoro sovet adalea so ačhilo verno iako našavgja i prednost koja so but mangela la sine. Isi amen korist keda džaja palo primer asavke verna manušengere, sar soj o Mojsej (Izr. 4:11-13). But phralja hem phenja kergje baš adava (w22.02 11 pas. 9-10).

Evendaske ko 32 berš a.e., e Isuseskoro šukar amal o Lazar nasvalilo hem mulo (Jovan 11:3, 14). O Isus but mangela sine e Lazare hem leskere duje phenjen e Marija hem e Marta. Keda i Marta šungja kaj o Isus avela, oj prastandili te dikhel le. Zamislin tuke samo lakiri dukh džikote vakerela sine: „Gospodare, te ove sine tu akate, mo phral nane te merel sine“ (Jovan 11:21, 32, 33). E Isuse sigurno dukhandilo but keda dikhlja kobor sine phagje tari dukh i Marija hem e Marta so mulo lengoro phral. Ako mulo tutar nekoj so mangea le, o Jehova haljovela sar osetinea tut. O Isus sovršeno sikavela sine ple Dadeskere osobine (Evr. 1:3). Keda rungja, o Isus sikavgja sar osetinela pe o Jehova keda merela nekoj (Jovan 14:9). Ako mulo nekoj tutar kas so mangea, šaj te ove sigurno kaj o Jehova na samo so tano svesno baši tli dukh nego isto agjaar but tano leske žal baši tuke. Ov mangela te sasljarel tlo phago vilo (Ps. 34:18; 147:3; w22.01 15, pas. 5-7).

Ako odvojnea tuke vreme te kere lafi e Jehovaja, te šune le hem te razmisline baši leste, tegani ka ovel tut bari korist. Prvo, ka šaj te ane pošukar odluke. I Biblija vakerela amenge kaj „koj džala mudra manušencar, mudro ka ovel“ (Izr. 13:20). Dujto, ka ove pošukar učiteli. Jekh taro najvažna celija so isi amen keda proučinaja i Biblija jekhe interesentea tano te pomožina leske te ovel paše e Jehovaja. So poviše molinaja amen amare nebesno Dadeske, doborom pobaro ka ovel amaro mangipe sprema leste. A adava ka pomožinel amenge pošukar te sikava amare interesente te mangel e Jehova. Baš adava kergja o Isus. Ov istakningja ple Dadeskere šuže osobine a adava but pomožingja leskere učenikonge isto agjaar te mangen e Jehova (Jovan 17:25, 26). Trito, tli vera ka ovel pozorali. So slučinela pe keda molinea e Jehova bašo vodstvo, uteha ili poddrška? Sekova puti keda o Jehova odgovorinela ki tli molitva tli vera ovela pozorali (1. Jov. 5:15; w22.01 30, pas. 15-17).

O Jehova pottikninela amen te cida amendar o pogrešno razmisluvanje hem o lošna navike soske but mangela amen hem mangela te uživina ko životo (Isa. 48:17, 18). Ov džanela kaj okola so na borinena pe protiv o pogrešna želbe kerena šteta peske, hem e javerenge. Le dukhala le keda dikhela adava.Šaj nesave taro amare amala hem familija ko početok ka asan amenge adaleske so mangaja te kera promene ki amari ličnost (1. Pet. 4:3, 4). Šaj ka vakeren amenge kaj isi amen pravo te kera so mangaja hem kaj na valjani te dozvolina o javera te vakeren amenge so te kera. Ama ustvari, okola so na prifatinena e Jehovaskere merilija ni hari nane nezavisna, soske ola dozvolinena o sveto kova soj vodimo taro Satana te oblikujnel len (Rim. 12:1, 2). Sarine amen mora te odlučina dali ka ikera amari purani ličnost, koja soj tani oblikujmi taro grevo hem taro sveto e Satanaskoro, ili ka dozvolina o Jehova te promeninel amen hem te ova i najšukar ličnost so šaj te ova panda akana (Isa. 64:8; w22.03 3, pas. 6-7).

Keda razmislinaja bašo adava so čitinaja taro e Devleskoro Lafi adava ka pomožinel amenge te ovel amen ispravno stavi bašo amare problemija. Te dikha sar i Biblija pomožingja jekhe phenjake koja so sine but tažno adaleske so mulo lakoro rom. Jekh starešina dengja la predlog te čitinel o izveštaj bašo Jov, soske lestar šaj te sikljol korisna pouke. Keda kergja adava, lakiri prvo reakcija sine te kritikujnel e Jove adaleske so pogrešno razmislingja. Ko ple misle oj predupredingja le: „Jov! Ma mislin samo ko tle problemija, ma ov negativno!“ Ama, tegani halili kaj lakoro stavi tano slično sar e Joveskoro. Adava pomožingja lake, te na koncentririnel pe previše ko ple problemija hem adava dengja la sila te ikljol ko krajo e dukhaja so našavgja ple rome. Javer način sar o Jehova zajakninela e hristijanen tano preku o phralja hem o phenja taro sobranie. O Pavle pišingja kaj edvaj adžikerela sine zaedno te ohrabrinel pe ple duhovna phralencar hem phenjencar (Rim. 1:11, 12; w21.05 22, pas. 10-11; 24, pas. 12).

E Izraelconge taro purano vreme sine vakerdo: „Trin puti ko berš neka aven sa o murša anglo Jehova, tumaro Devel, ko than kova so ov ka birinel“ (5. Moj. 16:16). Ola valjani sine te mukhen pumare khera hem pumare nive bizo nekoj te zaštitinel len. O Jehova vetingja lenge: „Nikoj nane te mangel te lel tli phuv džikote ka ikljove trin puti ko berš anglo Jehova, tlo Devel“ (2. Moj. 34:24). Adaleske so e Izraelcon sine len celosno doverba ko Jehova, ola džana sine ko adala praznikija hem sine len bari korist taro adava. Na primer, siklile poviše bašo e Jehovaskoro zakoni, razmislingje kobor šukar sine o Jehova lencar hem uživingje te oven zaedno okolencar kola so isto agjaar mangena sine e Jehova. Amende da ka ovel amen korist ako keraja žrtve te šaj te ova prisutna ko amare sostanokija. O Jehova tano bahtalo keda spreminaja amen te da kratka hem smislovna komentarija (w22.03 22, pas. 9).

O Jehova obučingja e Isuse ki idnina te ovel amaro Prvosvešteniko. O Isus lično dikhlja kobor tano pharo te ačhovel pe poslušno e Devleske keda isi but bare ispitija. Leske sine doborom pharo so molinela pe sine glasno hem asvencar. Adaleske so o Isus cidingja but bare muke, ov haljola amare potrebe hem šaj te pomožinel amenge keda siem ko iskušenija. Amen siem but blagodarna e Jehovaske so dengja amen jekh milostivo Prvosvešteniko kova so haljovela amare slabostija! (Evr. 2:17; 4:14-16; 5:7-10). O Jehova dozvolingja o Isus te cidel but bare muke te šaj te odgovorinel pe ko jekh važno pučibe: Šaj li o manuša te ačhoven verno e Jehovaske čak keda isi len phare iskušenija? O Satana vakerela na! Sprema leste o manuša služinena e Devleske taro sebična pričine hem kaj na mangena čače e Jehova (Jov 1:9-11; 2:4, 5). O Isus ačhilo verno hem dokažingja kaj o Satana tano hovavno (w21.04 16-17, pas. 7-8).

Angleder te krstinel pe, jekh interesenti valjani te primeninel adava so sikljovela tari Biblija. Keda o interesenti primeninela adava so sikljovela, ov ovela sar „o mudro manuš“ tari e Isuseskiri sporedba kova so hor randela te šaj te gradinel plo kher ko zoralo bar (Mat. 7:24, 25; Luka 6:47, 48). Pomožin e interesenteske te kerel promene ko životo (Mar. 10:17-22). O Isus džanlja kaj ka ovel pharo jekhe barvale manušeske te bikinel sa so isi le (Mar. 10:23). Sepak, o Isus vakergja akale manušeske te kerel asavki bari promena ko plo životo. Soske? Adaleske so o Isus mangela le sine. Ponekogaš šaj na ohrabrinaja e interesente te primeninel adava so sikljovela adaleske so mislinaja kaj panda nane spremno te kerel adaja promena (Kol. 3:9, 10). Ama, so posigate ka kere otvoreno lafi lea baši buti so valjani te meninel, doborom posigate ov ka šaj te počminel te kerel adaja promena. Ako kerea lea lafi bašo adava tu sikavea kaj grižinea tut leske (Ps. 141:5; Izr. 27:17; w21.06 3, pas. 3, 5).

O apostol Petar kerela lafi bašo šukar primer so mukhlja o Isus adaleske so istrajngja keda sine le nevolje. Ama, isi panda but javera načinija sar šaj te dža palo e Isuseskoro primer (1. Pet. 2:18-25). Čače, celo e Isuseskoro životo — sa adava so vakergja hem so kergja — tano amenge primer te sledina le. Sar nesovršena manuša, šaj li čače te sledina e Isuseskoro primer? Oja, šaj. Amen našti sovršeno te dža palo e Isuseskoro primer. Ama, ako sar nesovršena manuša daja amendar sa te dža palo leskere čekorija, tegani primeninaja o lafija taro apostol Jovan kova so vakergja: „Te živina sar so živingja [o Isus]“ (1. Jov. 2:6). Ako džaja palo e Isuseskere čekorija, tegani ka ova popaše e Jehovaja. Soske šaj te vakera adava? O Isus mukhlja but šužo primer bašo adava sar šaj amare životoja te ugodina e Devleske (Jovan 8:29). Adalea so ka dža palo e Isuseskere čekorija, amen ka kera e Jehovaskiri volja. Hem, šaj te ova sigurna kaj amaro nebesno Dad ka ovel paše okolencar so but trudinena pe te oven leskere amala (Jak. 4:8; w21.04 3, pas. 4-6).

O Jehova dikhela amare šuže osobine, dikhela save manuša šaj te ova ki idnina hem pomožinela amenge te ova popaše lea. Ako ačhovaja verna leske, ov ka ačhovel paše amencar zasekogaš (Jovan 6:44). Ako siem uverime kaj o Jehova mangela amen hem poddržinela amen, ka ova motivirime te služina leske najšukar so šaj, čak keda amaro životo tano pharo. Ama, ako sumninaja amen kaj o Jehova mangela amen, tegani amari „sila ka slabonel“ (Izr. 24:10). Hem ako siem obeshrabrime hem mislinaja kaj o Jehova na mangela amen, tegani ka ovel amenge pharo te borina amen protiv e Satanaskere napadija (Ef. 6:16). Nesave verna phralja hem phenja taro amaro vreme počmingje te mislinen kaj o Jehova na mangela len hem na grižinela pe lenge, hem adaleske lengiri vera uli poslabo. So valjani te kera ako počminaja te mislina kaj o Devel na mangela amen? Amen mora odma te otfrlina asavke misle! Molin e Jehova te pomožinel tuke te cide tutar „o misle so sekirinena tut“ hem te del tut „o mir taro Devel“ kova so ka arakhel tlo vilo hem tle misle (Ps. 139:23; Fil. 4:6, 7). Hem ma bistre, na borinea tut samo tu asavke negativna mislencar (w21.04 20, pas. 1; 21, pas. 4-6).

Sar uljan jekh taro e Jehovaskere svedokija? Šaj „o šukar haberi“ šungjan le taro tle roditelija, taro tle kolege ili taro tle součenikija, ili šaj nekoj alo ko tlo udar te propovedinel tuke (Mar. 13:10). Palo adava, nekoj odvojngja but vreme hem trudo te šaj te proučinel tuja i Biblija. Hem džikote proučinea sine, počmingjan te zamange e Jehova hem dikhljan kaj ov da mangela tut. O Jehova angja tut ko čačipe hem adaleske so sian e Hristoseskoro učeniko isi tut nadež bašo večno životo (Jovan 6:44). Sigurno sian blagodarno adaleske so o Jehova pottikningja nekas te sikavel tut bašo čačipe hem so prifatingja tut te ove leskoro sluga. Adaleske so džanaja o čačipe, isi amen čest te pomožina e javerenge te aven ko drumo so ingarela ko životo. Šaj amenge polokho te propovedina taro kher ko kher, ama pharo amenge te nudina hem te vodina biblisko kursi nekasaja (w21.07 2, pas. 1-2).