Fevruari

O Jehova iskreno interesinela pe bašo ple slugengoro šukaripe. Ov tano paše sekole jekhea amendar hem primetinela keda siem tažna ili keda siem obeshrabrime (Ps. 145:18, 19). Te dikha sar o Jehova grižingja pe ple prorokoske e Ilijaske. Akava verno manuš živingja ko pharo vreme tari izraelsko istorija. Mokjna manuša taro Izrael kola so na mangle e Jehova, progoningje leskere slugen hem posebno mangle te mudaren e Ilija (1. Car. 19:1, 2). Isto agjaar, o Ilija mislingja kaj tano edinstveno proroko so služinela e Jehovaske (1. Car. 19:10). Hem, adava da šaj kergja le te osetinel pe panda poviše obeshrabrimo. O Devel odma kergja nešto te pomožinel e Ilijaske. O Jehova bičhalgja jekhe angele te uverinel ple proroko kaj ov nane korkori — sine panda javera Izraelcija kola so verno služinena e Jehovaske (1. Car. 19:5, 18). O Isus ljubezno uveringja ple učenikon kaj ka dobinen jekh bari duhovno familija (Mar. 10:29, 30). Hem o Jehova, amaro nebesno Dad, vetinela kaj ka pomožinel okolenge so mangena te služinen leske (Ps. 9:10; w21.06 8-9, pas. 3-4).

But džene spotakninena pe adaleske so koristinaja i Biblija te sikava lenge kaj nesave religiozna sikljojba tane pogrešna. O sveštenikija sikavena pumare sledbenikon kaj o Devel kazninela e lošna manušen ko pekol. Ola koristinena adava hovavno sikajbe te šaj te kontrolirinen e manušen. Sar e Jehovaskere sluge, kola so obožavinena e Devle e mangipaskoro, amen otkrinaja adava hovavno sikajbe. O sveštenikija isto agjaar sikavena kaj i duša na merela. Ako akava sikajbe tano čače, tegani nikoj na valjani te voskresninel. Amen dokažinaja kaj akava sikajbe nane tari Biblija. Iako but religie sikavena e manušen te verujnen ki sudbina, amen sikavaja e manušen kaj isi amen slobodno volja hem kaj sekoj šaj te birinel dali ka služinel e Devleske. Sar reagirinena o religiozna vodačija keda amen otkrinaja kaj tane hovavne učitelija? Često, ola tane but holjame! Ako mangaja o čačipe amen mora te verujna hem te šuna adava so vakerela o Devel (Jovan 8:45, 46). Sprotivno taro Satana, amen nikogaš nane te otfrlina o čačipe. Amen nikogaš nane te kera nešto so nane ko sklad adalea so verujnaja (Jovan 8:44). O Jehova rodela ple narodostar te keren adava so kergja o Isus, te „mrzinen o lošnipe“ hem te „ikeren pe ko adava soj šukar“ (Rim. 12:9; Evr. 1:9; w21.05 10, pas. 10-11).

So valjani te kera ako primetinaja kaj ulem gorda ili alčna? Šaj te promenina amen. O apostol Pavle vakergja kaj adala so o Beng „astargja len dživde“ ki zamka šaj te našen latar (2. Tim. 2:26). Nikogaš ma te bistra kaj o Jehova tano posilno taro Satana. Adaleske, ako prifatinaja e Jehovaskiri pomoš, šaj te naša tari sekoja zamka ili stapica so postavingja la o Beng. Džangjola pe, najšukar tano nikogaš te na pera ko e Satanaskere zamke — te ova gorda ili alčna. Ko adava šaj uspejnaja samo ako pomožinela amenge o Devel. Čak okola so služingje but vreme e Jehovaske sepak ule gorda ili alčna. Adaleske, molin e Jehova sekova dive te pomožinel tuke te preispitine tle misle hem tle postapke (Ps. 139:23, 24). Nikogaš ma dozvolin te ove gordo ili alčno! But milje berša, o Satana tano lovdžija. Ama panda hari, ov ka ovel phanlo hem palo adava uništimo (Otk. 20:1-3, 10). Amen edvaj adžikeraja te avel adava dive. Dži tegani, pazin tut taro e Satanaskere zamke. Trudin tut but te na ove gordo ili alčno. Ov rešimo te protivine tut e Bengeske, hem ov ka našel tutar (w21.06 19, pas. 15-​17).

O Jehova tano bahtalo keda nekoj prifatinela o čačipe tari Biblija hem vakerela e javerenge bašo adava so siklilo (Izr. 23:15, 16). Ov tano sigurno but bahtalo keda dikhela sar leskoro narodo avdive revno propovedinela hem sikavela e javeren! Na primer, ko 2020 službeno berš, iako sine i pandemija, vodingje pe 7.705.765 bibliska kursija kolendar so 241.994 džene dengje lafi e Jehovaske kaj ka služinen leske hem krstingje pe. A akala neve učenikija isto agjaar ka vodinen bibliska kursija hem ka keren učenikija (Luka 6:40). Šaj te ova uverime kaj o Jehova tano bahtalo keda pomožinaja e javerenge te oven učenikija. Te kerel pe učenikija nane lokho, ama o Jehova šaj te pomožinel amenge te sikava e javeren te mangen le. Šaj li te čhiva amenge cel te ovel amen barem jekh biblisko kursi? Ako koristinaja sekoja prilika te nudina biblisko kursi, šaj ka iznenadina amen taro rezultatija (w21.07 6-7, pas. 14-16).

O cari o David dengja baro prilog taro plo barvalipe te šaj te poddržinel o gradibe e hrameskoro (1. Let. 22:11-16). Slično, keda nane te ovel amen više sila te učestvujna ko gradežna teokratska objektija, šaj ponadari da te poddržina akala proektija agjaar so ka da dobrovolna prilogija sprema amare okolnostija. Isto agjaar, šaj te pomožina e ternenge amare iskustvoja so stekningjem le. Razmislin isto agjaar bašo primer kova so dengja le o apostol Pavle baši darežlivost. Ov vikingja e Timotee te džal lea ki misionersko služba, hem o Pavle sikavgja akale terne sar te propovedinel hem te sikavel (Dela 16:1-3). Ov obučingja e Timotee te ovel šukar propovedniko hem učiteli (1. Kor. 4:17). Palo adava, o Timotej koristingja adava so siklilo te šaj te obučinel e javeren (w21.09 12, pas. 14-​15).

So šaj te sikljova taro Apolo hem taro apostol Pavle? O solduj džene pendžarena sine but šukar o spisija. O solduj sine poznata sar šukar učitelija hem kaj kergje but učenikija. Ama na sine ljubomorna jekh jekheske (Dela 18:24). Ustvari, nesavo vreme otkeda gelo peske taro Korint, o Pavle molingja le palem te iranel pe adari (1. Kor. 16:12). O Apolo koristingja ple sposobnostija ko šukar način te šaj te vakerel o šukar haberi hem te ohrabrinel ple phralen. Isto agjaar, šaj te ova sigurna kaj o Apolo sine ponizno manuš. Na primer, i Biblija na vakerela kaj ov vredžingja pe keda o Akila hem i Priskila potočno objasningje leske e Devleskoro drumo (Dela 18:24-28). O Pavle sine svesno kobor o Apolo šukar kerela sine pli služba. Ama ov na sine sekirimo bašo adava dali o manuša ka mislinen kaj o Apolo tano pošukar lestar. Ov sine ponizno, skromno hem razumno. Adava šaj te dikha le taro sovet so dengja le e phralenge ko Korint (1. Kor. 3:4-6; w21.07 18-19, pas. 15-​17).

O Adam hem i Eva namerno grešingje protiv o Devel, adaleske zaslužingje te oven cidime tari leskiri familija. Ama sar tano lengere čhavencar? Adaleske so o Jehova mangela e manušen ov dengja prilika okolenge soj poslušna te oven delo tari leskiri familija. Ov kergja adava agjaar so dengja ple mangle Čhave sar žrtva amenge (Jovan 3:16). Preku adaja žrtva, o Jehova šaj sine isto agjaar te posvojnel 144.000 verna manušen sar ple čhave (Rim. 8:15-17; Otk. 14:1). Isto agjaar, milionja javera verna manuša tane poslušna e Devleske. Len isi len nadež kaj ko krajo taro milja berša, palo posledno ispit, celosno ka oven delo tari e Devleskiri familija (Ps. 25:14; Rim. 8:20, 21). Ola panda akana vikinena e Jehova ple Stvoritele, „amaro Dad“ (Mat. 6:9). O voskresnime da ka ovel len prilika te sikljoven so očekujnela lendar o Jehova. Okola so ka birinen te šunen leskoro vodstvo isto agjaar ka oven delo tari leskiri familija (w21.08 5, pas. 10-11).

O apostol Pavle uspejngja ki pli zadača te propovedinel. Leske i služba sine beršencar najvažno ko životo. Ov propovedingja „javno hem taro kher ko kher“ (Dela 20:20). Ustvari ov koristinela sine sekoja prilika te šaj te propovedinel. Na primer, džikote adžikerela sine ple sorabotnikon ki Atina, ov propovedingja nesave poznata manušenge hem nesave lendar ule vernikija (Dela 17:16, 17, 34). Čak keda sine phanlo, o Pavle propovedingja okolenge so sine lea (Fil. 1:13, 14; Dela 28:16-24). O Pavle koristingja plo vreme najšukar so šaj. Ov često lela sine pea javeren ki služba. Na primer, ko plo prvo misionersko patuvanje ov lelja e Marko, a ko dujto e Timotee (Dela 12:25; 16:1-4). O Pavle dengja plo naj šukar te sikavel len sar te vodinen jekh sobranie, sar te oven šukar pastirija hem šukar učitelija (1. Kor. 4:17; w22.03 27, pas. 5-6).

Nesave na verujnena kaj isi Stvoriteli soske vakerena kaj verujnena samo ko adava so šaj te dikhen. Ama ustvari ola verujnena ko nesave bukja so našti te dikhen len, a isi len dokaz kaj čače postojnela sar na primer i gravitacija. I vera soj spomnimi ki Biblija vklučinela dokazija bašo bukja so postojnena iako našti te dikha len (Evr. 11:1). Valjani vreme hem trudo te šaj korkori te ispitina o dokazija, ama but manuša na mangena te keren adava. Jekh manuš kova so korkori na ispitinela o dokazija šaj te mislinel peske kaj nane Devel. Nesave naučnikija otkeda ispitingje o dokazija, uveringje pe kaj o Devel stvoringja o univerzum. Ko početok, ola šaj mislinena peske sine kaj nane Stvoriteli soske ko fakulteti nikogaš na kerela pe sine lafi bašo stvoribe. Sepak, ola akana doznajngje bašo Jehova hem zamangle le. Ustvari, sarine amen mora te bajrara amari vera ko Devel bizi razlika kobor siem školujme (w21.08 14, pas. 1; 15-16, pas. 6-7).

O Isus koristingja jekh sporedba bašo jekh buntovno čhavo, te šaj te del amen jekh slika bašo adava kobor but o Jehova mangela te sikavel milost. Ki sporedba, o čhavo gelo peske kheraldan hem trošingja plo imot agjaar so živingja nemoralno (Luka 15:13). Palo nesavo vreme, ponizno halilo pli greška, kaingja pe bašo ple postapke hem irangja pe khere. Sar reagiringja leskoro dad? O Isus vakergja: „Džikote [o čhavo] panda sine dur, leskoro dad dikhlja le hem pelo leske žal, prastandilo, gušingja le hem čumingja le“. O dad na ponižingja ple čhave. Namesto adava, ov sikavgja leske milost hem prostingja leske hem palem primingja le khere. O buntovno čhavo but grešingja, ama leskoro dad prostingja leske soske ov kaingja pe. O milostivo dad tari sporedba pretstavinela e Jehova. Agjaar, o Isus ko jekh posebno način sikavgja ple Dadeskiri spremnost te prostinel e grešnikonge kola so iskreno kainena pe (Luka 15:17-24; w21.10 8, pas. 4; 9, pas. 6).

Avdive but religiozna vodačija kergje sa samo te šaj te garaven e Devleskoro lično anav. Ola cidingje le taro pumare bibliska prevodija, a ko nesave slučaija zabraningje te koristinel pe ko lengere crkve. Jasno tano kaj samo e Jehovaskere svedokija poštujnena e Devleskoro anav sar so valjani. Amen najviše keraja e javerencar lafi bašo e Devleskoro anav tari bilo koja javer religiozno grupa. Adaleske, daja amendar sa, te šaj te živina sprema amaro anav — Jehovaskere svedokija (Isa. 43:10-12). Pečatingjem poviše taro 240 milionja primerokija taro Prevod Nov svet e Biblijakoro, kova so koristinela e Jehovaskoro anav ko thana kotar so o javera prevodija cidingje le. Isto agjaar, isi amen bibliska publikacie kola so koristinena e Jehovaskoro anav ko poviše taro milja čhibja (w21.10 20-​21, pas. 9-10).

Obožavinaja e Jehova keda pomožinaja amare phralenge kolenge so valjani pomoš. O Jehova dengja lafi kaj ka del bereketi e Izraelconge so pomožingje e čorolenge (5. Moj. 15:10). Sekova puti keda keraja šukaripe e phraleske kaske so valjani pomoš, o Jehova dikhela ko adava sar ka phene leske keraja le adava (Izr. 19:17). Na primer, keda o hristijanja taro Filipi dengje poklon e Pavleske keda sine phanlo, ov dikhlja ko adava sar prifatlivo žrtva hem sar nešto soj prijatno e Devleske (Fil. 4:18). Razmislin bašo phralja hem phenja taro tlo sobranie hem puč tut: Dali valjanela nekaske pomoš? O Jehova tano bahtalo keda dikhela kaj koristinaja amaro vreme, sila, veštine hem materijalna bukja te šaj te pomožina okolenge kaske so valjani pomoš. Ov dikhela ko adava sar delo taro amaro obožavibe (Jak. 1:27). O čačutno obožavibe rodela vreme hem trudo. Ama nane pharo te kerel pe adava (1. Jov. 5:3). Soske? Adaleske so keraja adava taro mangipe sprema o Jehova hem amare phralja (w22.03 24, pas. 14-15).

Te šaj te sikava sočuvstvo amare phralenge hem phenjenge, prvo mora te razmislina taro so nakhena. Na primer, jekh phen šaj tani seriozno nasvali. Oj šaj nikogaš na žalinela pe bašo adava, ama ka ovel lake but milo ako nekoj pomožinela lake. Šaj te puča amen: Šaj li te pomožina lake agjaar so ka kera lake hajbaske, ili ka čistina lake okolu o kher? Ili, šaj nesavo phral ačhilo bizi buti. Šaj li te pomožina leske, agjaar so ka da le hari pare džikote arakhela javer but, bizo te vakera leske kaj tane amendar? Amen valjani te sikava sočuvstvo amare phralenge hem phenjenge angleder te roden amendar pomoš. Isto sar o Jehova, amen da šaj te kera o prvo čekori. Ov mukhela te ikljol o kham sekova dive bizo te roda lestar adava hem sekas isi korist taro kham, a na samo okola soj blagodarna. Adalea so dela amen o bukja so valjanena amenge, o Jehova sikavela kaj mangela amen. Amen but mangaja e Jehova soske tano ljubezno hem darežlivo (w21.09 22-​23, pas. 12-​13).

E Devleskoro verno mangipe pottikninela le te prostinel. Keda o Jehova dikhela kaj jekh grešniko kainela pe hem kaj čhinavela e lošna postapkencar, leskoro verno mangipe pottikninela le te prostinel leske. O psalmisti o David bašo Jehova vakergja: „Na postapinela amencar spored amare grevija hem na iranela amenge adava so zaslužinaja bašo amare greške“ (Ps. 103:8-11). O David taro lično iskustvo džanlja kobor pharo tovar šaj te ovel i lošno sovest. Ama ov isto agjaar dikhlja kaj o Jehova tano „spremno te prostinel“. So pottikninela e Jehova te prostinel? O odgovor arakhljovela ko avdisutno stiho. Oja baš sar so vakergja o David ki molitva, o Jehova prostinela soske tano pherdo verno mangipe sprema okola so rodena lestar te prostinel lenge. Keda grešinaja, ispravno tano — čak šukar tano — te osetina amen kriva bašo adava so kergjem. Adava šaj te pomožinel amenge te kaina amen hem te isprajna amare lošna postapke (w21.11 5, pas. 11-​12).

O Jehova mangela plo anav hem mangela sekova jekh te poštujnel le (Isa. 42:8). Ama ko posledna šov milja berša leskoro anav tano ladžakerdo (Ps. 74:10, 18, 23). O Beng, so značinela „klevetniko“, vakergja kaj o Devel na dela e Adameske hem e Evake adava so valjani lenge (1. Moj. 3:1-5). Ottegani o Jehova tano krivimo kaj na dela e manušenge adava so čače valjani lenge. E Isuse mučinela sine adava so leskere Dadeskoro anav sine ladžakerdo. Samo e Jehova isi le pravo te vladinel ko nebo hem ki Phuv, hem ov vladinela ko najšukar način (Otk. 4:11). Ama o Beng probingja te hovavel e angelen hem e manušen te šaj te mislinen kaj e Devle nane le pravo ko adava. Panda hari akava problemi ka rešinel pe jekh puti zasekogaš. E Jehovaskoro pravo te vladinel ka ovel opravdimo keda ka dokažinel kaj samo leskoro Carstvo ka anel čačutno mir hem sigurnost (w21.07 9, pas. 5-6).

Normalno tano jekh poglavari te mangel te grižinel pe leskere familija te ovel la hajbaske, urajbaske hem than živibaske. Ako isi tut finansiska problemija, sigurno nane tuke lokho. Ama, kobor hem te oven phare tle okolnostija, tu ponadari da šaj te koristine akava vreme te šaj te bajrare tli vera. Molin tut e Jehovaske džikote čitinea o lafija e Isuseskere soj pišime ko Matej 6:25-34, hem razmislin baši lende. Razmislin bašo primerija taro amaro vreme kola so sikavena kaj o Jehova grižinela pe okolenge soj tane zafatime ko teokratska aktivnostija (1. Kor. 15:58). Ako kerea agjaar, ka bajrare tli doverba kaj o Jehova ka grižinel pe tuke isto sar so grižingja pe e javerenge ko slična okolnostija. Ov na samo so džanela so valjani tuke, nego ov isto džanela sar te del tut adava. Keda dikhea sar o Jehova pomožinela tuke ko životo, adava kerela tli vera te ovel po zorali hem tegani ka šaj te izdržine o pobare problemija so ka aven ki idnina (w21.11 20, pas. 3; 21, pas. 6).

But hristijanja doživingje protivibe hem sine len različna iskušenija. Sepak, iako sine phure, ola ponadari da propovedinena sine hem istrajnena sine adaleske so i otkupnina kergja lengiri vera pozorali. Te dikha o primer taro apostol Jovan. Verojatno poviše taro 60 berš, ov verno propovedingja o čačipe bašo Hristos hem baši otkupnina. Keda sine le skoro 100 berš, i rimsko vlada mislingja kaj tano doborom opasno so bičhalgja le sar zatvoreniko ko ostrov Patmos. A so kergja pogrešno? Kergja lafi bašo Devel hem svedočingja bašo Isus (Otk. 1:9). O Jovan dengja but šužo primer baši vera hem baši istrajnost. Ko bibliska lila kola so pišingja len o apostol Jovan, ov istakningja kobor but mangela sine e Isuse hem kobor sine blagodarno baši leskiri žrtva. Ko akala lila poviše taro 100 puti kerela pe lafi baši otkupnina ili bašo šukar bukja so dobinaja len tari otkupnina (1. Jov. 2:2). Jasno tano kaj o Jovan but ceninela sine i otkupnina (w21.04 17, pas. 9-10).

O Jehova očekujnela sine taro plo narodo te ponašinel pe šukar okolencar so sine fizički ograničime. Na primer, ov vakergja e Izraelconge te na den arman nekas soj kašuko. Ko adava sine vklučimi i zakana ili te vakerel pe nešto lošno leske. Adava sine čače lošno te kerel pe nekaske soj kašuko! Ov našti sine te šunel so vakerela pe baši leste, hem adaleske našti sine te braninel pe. Isto agjaar, ki 3. Mojseeva 19:14 o Devel vakergja ple slugenge „te na čhiven prečka anglo korolo“. Ko jekh lil kova so kerela lafi bašo manuša so sine len fizička ograničuvanja pišinela: „Ko purano Blizok Istok o javera but puti ponašinena pe sine lencar surovo hem maltretirinena len sine“. Šaj nesavo lošno manuš ka čhivel sine nešto anglo korolo manuš te šaj te povredinel le ili te asal leske. Kobor lošno sine adava! Preku akaja zapoved o Jehova pomožingja ple narodoske te dikhel kaj valjani te sikavel sočuvstvo okolenge soj fizički ograničime (w21.12 8-9, pas. 3-4).

O Jakov but darala sine hem sekirinela pe sine kaj leskoro phral panda ikerela holi. Adaleske ov molingja pe e Jehovaske taro vilo baši akaja buti. Palo adava bičhalgja but poklonija e Isaveske (1. Moj. 32:9-15). Ko krajo keda dikhlja e Isave, o Jakov sikavgja leske poštovanje. Ov na klanjingja pe ple phraleske jekh puti ili duj puti, nego efta puti. Adaleske so o Jakov sine ponizno ov šaj sine te smirinel pe lea (1. Moj. 33:3, 4). Sikljovaja nešto važno taro adava so kergja o Jakov angleder te dikhel ple phrale hem sar postapingja keda dikhlja le. O Jakov ponizno rodingja pomoš taro Jehova. Palo adava, ov postapingja sprema pli molitva agjaar so dengja plo najšukar te šaj te smirinel pe ple phralea. Keda dikhle pe, o Jakov na manglja te diskutirinel e Isavea bašo adava koj sine ko pravo a koj na. Namesto adava, leskiri cel sine te smirinel pe lea. Sar šaj tu te dža palo e Jakoveskoro primer? (Mat. 5:23, 24; w21.12 25, pas. 11-​12).

Keda razmislinea bašo adava kaj o Isus mulo te šaj te oven prostime tle grevija šaj vakerea tuke: „Me na zaslužinava akava“. Soske šaj te osetine tut agjaar? Amaro nesovršeno vilo šaj te čhivel amen te mislina kaj na vredinaja hem kaj na zaslužinaja nekoj te mangel amen (1. Jov. 3:19). Keda počminaja agjaar te mislina valjani te setina amen kaj o Devel tano „pobaro taro amare vile“. Kobor te oven silna adala negativna čuvstvija ola nane posilna taro e Jehovaskoro mangipe sprema amende hem tari leskiri želba te prostinel amenge. But tano važno te uverina amen ko akava. Te šaj te kera adava, valjani redovno te proučina leskoro Lafi, redovno te molina amen hem redovno te družina amen amare phralencar hem phenjencar. Soske tano važno te kera akala bukja? Agjaar ka šaj pošukar te zapoznajne e Jehova hem te dikhe kobor šuže osobine isi le hem kobor mangela tut. Adava so sekova dive ka čitine nešto tari Biblija hem hor ka razmisline bašo adava šaj te pomožinel tuke te isprajne tle stavija hem te oslobodine tut taro negativna čuvstvija, a agjaar ka šaj porealno te dikhe ko bukja (2. Tim. 3:16; w21.04 23-24, pas. 12-13).

Te šaj te razvina zorali vera, valjani te kera poviše nego samo te džana nešto. Valjani hor te razmislina bašo adava so sikljovaja. Dikh so kergja o pisateli taro Psalm 77. Ov sine sekirimo soske mislingja kaj o Jehova otkažingja pe lestar hem taro javera Izraelcija. Našti sine čak rakjate te sovel taro akala misle (stihija 2-8). So kergja bašo adava? Ov vakergja e Jehovaske: „Ka razmislinav bašo adava so kerea, hor ka razmislinav bašo tle postapke“ (stiho 12). Džangjola pe, o psalmisti sine svesno bašo sa adava so kergja o Jehova baši leske hem bašo plo narodo angleder. Ama ov ponadari da pučela pe sine: „Dali o Devel bistergja te ovel milostivo, ili leskiri holi kergja te čhinavgjovel leskiri milost?“ (stiho 9). O psalmisti hor razmislinela sine bašo e Jehovaskere postapke hem bašo adava kobor sikavgja pli milost hem sočuvstvo (stiho 11). Sar osetingja pe palo adava? Ov sine uverimo kaj o Jehova nane te mukhel ple narodo (stiho 15) (w22.01 30-31, pas. 17-​18).

So osetinela o Jehova sprema ple verna sluge kola so mule? Ov edvaj adžikerela palem te dikhel len! (Jov 14:15). Zamislin samo kobor falinela e Jehovaske leskoro amal o Avraam (Jak. 2:23). Ili o Mojsej, kasaja so kerela sine „muj mujea“ lafi (2. Moj. 33:11). Hem kobor samo mangela te šunel e Davide hem e javere psalmisten sar giljavena pumare but šuže falbena gilja! (Ps. 104:33). Iako leskere amala mule, ov na bistergja len (Isa. 49:15). Ov pamtinela sekova detali baši lende. Jekh dive, ov ka iranel len ko životo hem palem ka šunel lengere iskrena molitve hem ka prifatinel lengoro obožavanje. Ako mulo tutar nekoj so mangea le, akala lafija šaj te utešinen tut. Keda slučingja pe i pobuna ki Edensko gradina, o Jehova džanlja kaj o uslovija ki Phuv ka oven sa pološna. Ov mrzinela o lošnipe, i nepravda hem o nasilstvo so isi avdive ko sveto (w21.07 10, pas. 11; 12, pas. 12).

Keda sikavaja mangipe, amen isto agjaar sikavaja kaj ceninaja i otkupnina. Soske? Adaleske so o Isus dengja plo životo na samo amenge nego isto agjaar amare phralenge hem phenjenge. Ako sine spremno te merel baši lende, tegani jasno tano kaj ola vredinena but anglo leskere jakhja (1. Jov. 3:16-18). Amen sikavaja kaj mangaja amare phralen hem phenjen adalea sar ponašinaja amen lencar (Ef. 4:29, 31 — 5:2). Na primer, amen pomožinaja lenge keda tane nasvale ili keda doživinena phare nevolje, sar soj o prirodna katastrofe. Ama, so valjani te kera keda amare phralja hem phenja taro sobranie kerena ili vakerena nešto so povredinela amen? Dali ponekogaš tuke pharo te prostine? (3. Moj. 19:18). Ako tano agjaar, primenin akava sovet: „Trpinen tumen jekh jekhea hem celo vilea prostinen tumenge čak keda nekoj ka vredžinel tumen. Sar o Jehova spremno so prostingja tumenge agjaar keren tumen da“ (Kol. 3:13). Sekova puti keda prostinaja amare phraleske ili phenjake amen sikavaja amare nebesno Dadeske kaj čače ceninaja i otkupnina (w21.04 18, pas. 12-13).

Šaj but trudinaja amen ki služba, hem šaj pomožingjem bute dženenge te napredujnen te krstinen pe. Ama džanaja kaj adava šaj te kera le samo adaleske so o Jehova pomožinela amen. Taro Apolo hem taro apostol Pavle sikljovaja panda jekh buti — so poviše odgovornostija isi amen ko sobranie, doborom poviše šaj te kera te ovel mir. But siem blagodarna keda o starešine hem o sluga-pomošnikija kerena te ovel mir hem jekhipe ko sobranie agjaar so keda dena sovet koristinena e Devleskoro Lafi. Ola na mangena o javera te dikhen ki lende sar važna manuša, nego pomožinena lenge te šunen e Isuse hem te džan palo leskoro primer (1. Kor. 4:6, 7). Sekole jekhe amendar isi le nesave sposobnostija hem talentija kola so dengja le o Devel. Šaj mislinaja amenge kaj adava so keraja nane važno. Ama ma bistre, isto sar so sekoja cigla tani važno te šaj te kerel pe jekh šužo kher, agjaar o tikne bukja so keraja len tane važna te šaj te ovel jekhipe ko sobranie. Sarine valjani but te trudina amen te šaj te cida amen taro natprevaruvačko duho. Te ova odlučna te da amendar sa te kera te ovel mir hem jekhipe ko sobranie (Ef. 4:3; w21.07 19, pas. 18-​19).

Šaj te ove uverimo kaj palem šaj te dikhe tle manglen. Adava so o Isus rungja džikote utešinela sine ple amalen tano dokaz kaj ov edvaj adžikerela te voskresninel e mulen! (Jovan 11:35). Tu šaj te utešine okolen so mulo lendar nekoj. O Isus na samo so rungja e Martaja hem e Marijaja, nego ov isto agjaar šungja len hem utešingja len (Jovan 11:25-27). Amen da šaj te kera o isto. O Den, jekh starešina kova so živinela ki Avstralija, vakerela: „Otkeda muli mli romni, valjani sine mange pomoš. Poviše bračna parija sine spremna dive hem rat te šunen man. Angli lende šaj sine slobodno te vakerav so mučinela man hem na sine mange nezgodno te rovav. Osven adava, pomožingje mange ko praktično način agjaar so thovena sine mo vrda, pazarinena sine mange hem kerena sine hajbaske keda našti sine me te kerav adava. Hem but puti molinena pe sine mancar. Ola sikavgje kaj tane čačutne amala hem phralja ‘ko phare dive’ “ (Izr. 17:17; w22.01 16, pas. 8-9).

O Jehova mangela amenge o najšukar (Izr. 4:20-22). Keda dela amen sovet preku plo Lafi, preku bibliska publikacie ili preku nesavo zrelo hristijani, ov sikavela amenge plo mangipe (Evr. 12:9, 10). Koncentririn tut ko sovet, a na ko način sar tuke dendo. Ponekogaš šaj te mislina amenge kaj o sovet na sine vakerdo baš ko najšukar način. Džangjola pe, sekova jekh so dela sovet valjani te pazinel sar kerela adava te šaj o javer polokhe te prifatinel le (Gal. 6:1). Ama keda priminaja sovet valjani te razmislina bašo adava so šaj te sikljova taro sovet, čak keda mislinaja kaj okova so dengja amen sovet šaj sine te kerel adava ko pošukar način. Šaj te puča amen: „Čak ako na svidžinela pe mange o način sar dobingjum o sovet, dali isi nešto so šaj te primeninav? Šaj li te na koncentririnav man ko greške okoleskere so dela man o sovet hem te dikhav so šaj te sikljovav?“ Ka ovel mudro ako rodaja način sar te primenina bilo kova sovet so dobinaja le (w22.02 12 pas. 13-14).

O Jehova džanela kaj ka valjanel amenge vreme hem trudo te šaj te cida amendar o pogrešna misle hem o lošna navike (Ps. 103:13, 14). Ama preku plo Lafi, plo duho, hem pli organizacija, o Jehova dela amen i mudrost, i sila hem i poddrška so valjani amenge te šaj te menina amen. Koristin i Biblija te šaj šukar te ispitine tut. E Devleskoro Lafi tano sar jekh ajna. Šaj te pomožinel tuke te ispitine sar razmislinea, sar kerea lafi hem sar postapinea (Jak. 1:22-25). O Jehova šaj najšukar te pomožinel tuke, soske džanela so isi tut ko vilo (Izr. 14:10; 15:11). Adaleske, neka ovel tut navika sekova dive te moline tut hem te proučine leskoro Lafi. Ov uverimo kaj e Jehovaskere merilija tane najšukar. Sa so rodela amendar o Jehova te kera tano amare šukaripaske. Okola so živinena sprema leskere merilija dikhena šukar ki peste, isi len smisla ko životo hem tane čače bahtale (Ps. 19:8-11; w22.03 4, pas. 8-​10).

Obožavinaja e Jehova keda gradinaja hem održinaja o thana kote so obožavinaja le. I Biblija vakerela kaj o keribe o sveto šatori hem o bukja so namestingje andre ko šatori sine sveto služba (2. Moj. 36:1, 4). O Jehova avdive da dikhela sar sveto služba keda gradinena pe dvorane hem teokratska objektija. Nesave phralja hem phenja nakhavena but vreme ko akala aktivnostija. Amen but ceninaja lengoro trudo ki akaja važno buti so kerena la bašo Carstvo. Hem džangjola pe, ola isto agjaar propovedinena. Nesave lendar mangena čak te oven pionerija. O starešine šaj te sikaven kaj poddržinena i izgradba ako mukhena akala phralja hem phenja te oven pionerija ako ispolninena sa o uslovija. Bizi razlika dali šaj te učestvujna ki izgradba ili na, sarine amen šaj te da amaro delo agjaar so ka ikera čista o objektija hem ka održina len (w22.03 22, pas. 11-12).