Mart

„O bakhre“ tari sporedba so arakhljola ko Matej 25:31-36 pretstavinena e pravednikon taro posledna dive kolen so isi nadež te živinen ki Phuv. Ola verno poddržinena e Hristoseskere phralen kola soj tane panda ki Phuv agjaar so pomožinena len te propovedinel pe hem te kerel pe učenikija ko celo sveto (Mat. 24:14; 28:19, 20). Sekova berš, nekobor kurke angleder i Spomen-svečenost, o javera bakhre sikavena kaj poddržinena e Hristoseskere phralen agjaar so celosno učestvujnena ko posebna akcie te kaninen e manušen ki Spomen-svečenost. Isto agjaar, ola pomožinena te keren pe sa o potrebna podgotovke te šaj te ikerel pe i Spomen-svečenost ko sa o sobranija ko celo sveto. O javera bakhre tane bahtale so šaj te poddržinen e Hristoseskere phralen ko asavko način. Ola džanena kaj o Isus dikhela ko sa adava so kerena leskere pomazime phralenge sar te phene leske kerena le (Mat. 25:37-40; w22.01 22, pas. 11-12).

Amen šaj te sikava sar e Isuseskere osobine hem te ponašina amen e javerencar sar ov so ponašinela pe sine. Na primer, sine leske žal bašo jekh leprozno manuš, sikavgja sočuvstvo jekhe romnjake koja so sine but nasvali, hem sikavgja sočuvstvo e manušenge so mulo lendar nekoj paše. Keda sledinaja e Isuseskoro primer amen sledinaja e Jehovaskoro da primer (Mar. 1:40, 41; 5:25-34; Jovan 11:33-35). Kobor poviše trudinaja amen te ova sar o Jehova, doborom popaše ovaja lea. Ako džaja palo e Isuseskere čekorija nane te dozvolina akava lošno sveto te lel amaro vnimanie. Ki posledno rat taro plo životo akate ki Phuv, o Isus šaj sine te vakerel: „Me pobedingjum o sveto!“ (Jovan 16:33). Akale lafencar ov mislingja ko adava kaj na dozvolingja o razmislibe, o celija hem o postapke e manušengere taro akava sveto te vlijajnen upri leste. O Isus nikogaš na bistergja i pričina soske sine bičhaldo ki Phuv — te slavinel e Jehova. A sar tano amencar? Ko akava sveto, isi but bukja so šaj te len amaro vnimanie hem te čhinaven amen te služina e Jehovaske. Ama, ako isto sar o Isus, ponadari da koncentririnaja amen te kera e Jehovaskiri volja, amen da isto agjaar „ka pobedina“ o sveto (1. Jov. 5:5; w21.04 3-4, pas. 7-8).

O apostol Pavle džanlja e Isuseskoro vetuvanje kaj „sekoj so ka verujnel [ko Isus] ka dobinel večno životo“ (Jovan 3:16; Rim. 6:23). O Pavle sigurno sine maškar okola so sikavgje vera ki otkupnina. Ov sine uverimo kaj o Jehova tano spremno te prostinel čak okolenge so kergje seriozno grevo ako iskreno kainena pe (Ps. 86:5). Isto agjaar, o Pavle sine uverimo kaj i otkupnina tani dokaz kaj o Devel but mangela le. Primetin o utešna lafija ko krajo taro stiho ko Galatite 2:20. Ov vakergja: „E Devleskoro Čhavo manglja man hem dengja plo životo mange“. O Pavle na mislingja kaj tano doborom lošno so našti te mangel le o Devel. Ov na vakergja peske: „Haljovava soske o Jehova šaj te mangel mle phralen, ama man našti te mangel“. Sprotivno adalestar, o Pavle pišingja e hristijanenge ko Rim: „O Hristos mulo amenge panda džikote siem sine grešnikija“ (Rim. 5:8). Čače, ništo našti te čhinavel e Devle te mangel amen! O Pavle sine celosno uverimo kaj o Devel but mangela amen. Ov džanlja kobor sine strplivo o Jehova e Izraelconcar (w21.04 22, pas. 8-10).

Keda proučinea e interesentea, pomožin leske te mangel e Jehova. Sar šaj te kere adava? Rode prilike te sikave e interesente bašo e Jehovaskere osobine. Pomožin leske te dikhel kaj o Jehova tano bahtalo Devel hem kaj pomožinela okolen so mangena le (1. Tim. 1:11; Evr. 11:6). Sikav leske kaj ka ovel le korist ako primeninela adava so sikljovela, hem objasnin leske kaj o Jehova agjaar sikavela kaj mangela le (Isa. 48:17, 18). So poviše o interesenti mangela e Jehova doborom poviše ka mangel te kerel o potrebna promene. Te šaj te napredujnel hem te krstinel pe, o interesenti valjani te kerel žrtve. Nesave interesentija šaj valjani te keren žrtve ko materijalno pogled. But interesentija šaj ka valjani te čhinaven te oven amala okolencar so na mangena e Jehova. Javera šaj tane otfrlime tari pumari familija koja so na mangela e Jehovaskere svedokon. O Isus vetingja kaj okola so džana pali leste nane te oven razočarime. O Jehova ka nagradinel len agjaar so ka del len jekh duhovno familija koja so mangela len (Mar. 10:29, 30; w21.06 4, pas. 8-9).

O apostol Pavle sporedingja i zadača te kerel pe učenikija e bukjaja so kerela la jekh zemjodelco, kova so kerela poviše nego samo te sadinel. Ov vakergja e Korinkjanenge: „Me sadingjum, o Apolo čhivgja pani... a tumen sien e Devleskiri niva“ (1. Kor. 3:6-9). Sar rabotnikija ki e „Devleskiri niva“, amen sadinaja o seme keda propovedinaja, a čhivaja pani keda sikavaja. Isto agjaar hajlovaja kaj o Jehova tano adava so kerela o seme te bajron. Isi amen bari čest so šaj te propovedina hem te sikava e javeren o čačipe! Akaja zadača čače kerela amen bahtale. O apostol Pavle, kova so pomožingja bute dženenge taro Solun te oven učenikija, vakergja sar osetingja pe: „Soj tani amari nadež, ili bahtalipe, ili kruna kolaja so dičinaja amen anglo amaro Gospodari o Isus ko vreme tari leskiri prisutnost? Na sien li tumen adava? Oja tumen sien amari slava hem bahtalipe“ (1. Sol. 2:19, 20; Dela 17:1-4; w21.07 3, pas. 5; 7, pas. 17).

O Jehova vikingja sekole jekhe amendar ki peste (Jovan 6:44). Razmislin so značinela akava: Džikote o Jehova ispitinela sine milijarde manušen ko sveto, ov dikhlja nešto skapoceno ki tute. Dikhlja iskreno srce so šaj te mangel le (1. Let. 28:9). O Jehova džanela tut, haljovela tut hem mangela tut. Akava but ohrabrinela amen! O Jehova but grižinela pe tuke hem isto agjaar grižinela pe sa tle duhovna phralenge hem phenjenge. Te šaj te pomožinel amenge te haljova akava, o Isus sporedingja e Jehova jekhe pastirea. Ako taro šel bakhre, jekh bakhro našavgjola, so ka kerel o pastiri? Ov ka „mukhel e enjavardešuenja bakhren ki planina hem ka džal te rodel okole so našavdilo“. Keda o pastiri ka arakhel e bakhre ov nane te holjanel leske so našavdilo, namesto adava ka ovel bahtalo. So sikljovaja taro akava? Sekova jekh bakhro tano važno e Jehovaske. O Isus vakergja: „Mo Dad kova soj ko nebo na mangela te merel ni jekh taro akala tikne“ (Mat. 18:12-14; w21.06 20, pas. 1-2).

Keda razmislinaja bašo adava kobor o Devel mangela amen, tegani amaro mangipe sprema leste bajrovela hem amaro amalipe lea ovela pozoralo (Rim. 8:38, 39). Pottiknime siem te dža palo e Isuseskoro primer (1. Pet. 2:21). Nekobor dive angleder i Spomen-svečenost čitinaja bibliska izveštaija bašo posledno kurko taro e Isuseskoro životo ki Phuv, bašo leskoro meribe hem voskresenie. A ki rat keda tani i Spomen-svečenost, o govor setinkerela amen ko e Isuseskoro mangipe sprema amende (Ef. 5:2; 1. Jov. 3:16). Džikote čitinaja bašo e Isuseskere žrtve hem razmislinaja bašo adava, siem pottiknime „te živina agjaar sar so živinela sine ov“ (1. Jov. 2:6). Ovaja panda poodlučna te ačhova ko e Devleskoro mangipe (Juda 20, 21). Ačhovaja ko e Devleskoro mangipe agjaar so keraja sa so šaj te ova leske poslušna, te slavina leskoro sveto anav hem te kera le bahtalo (Izr. 27:11; Mat. 6:9; 1. Jov. 5:3). I Spomen-svečenost pottikninela amen te ova panda poodlučna sekova dive te živina ko način kolea so vakeraja e Jehovaske: „Mangava večno te ačhovav ko tlo mangipe!“ (w22.01 23, pas. 17; 25 pas. 18-19).

O Jehova dengja amen slobodno volja. Amen šaj te birina so ka kera amare životoja. Amaro Devel tano bahtalo keda birinaja te služina leske (Ps. 84:11; Izr. 27:11). Šaj te koristina amari slobodno volja te ana javera da šukar odluke. Šaj te dža palo e Isuseskoro primer, agjaar so ka birina te čhiva e javerengere potrebe anglo amare. Jekh dive keda ov hem leskere učenikija sine but umorna, gele ko jekh mirno than kote so mangle te odmorinen pe. Ama na uspejngje, soske jekh baro mnoštvo arakhlja len hem ola edvaj adžikerena sine o Isus te sikavel len. Keda dikhlja len na holjangja lenge nego pelo leske žal. So kergja ov? „Ov počmingja te sikavel len bašo but bukja“ (Mar. 6:30-34). Keda amen da sar o Isus koristinaja amaro vreme hem sila te šaj te pomožina e javerenge, slavinaja amare nebesno dade (Mat. 5:14-16; w21.08 3, pas. 7-8).

O Jehova mangela o bukja te oven različna. Akava džanaja soske ov stvoringja različna rastenija, životne čak amen stvoringja amen različna. Adaleske so sekova jekh amendar tano posebno, o Jehova nikogaš na sporedinela amen e javerencar. Ov dikhela adava so isi tut andre ko vilo (1. Sam. 16:7). Ov isto agjaar džanela tle jaka hem tle slaba strane hem sar bariljan. Na rodela tutar poviše taro adava so šaj te de. Amen valjani te dikha ki amende isto sar o Jehova. Tegani ka ova razumna hem nane te mislina kaj siem pošukar e javerendar ili palem kaj na vredinaja (Rim. 12:3). Džangjola pe, šaj te ovel amenge korisno ako džaja palo šukar primer nesave phraleskoro ili phenjakoro kova soj šukar ki služba (Evr. 13:7). Tegani, šaj te sikljova lestar ili latar sar te ova pošukar ki amari služba (Fil. 3:17). Sepak, isi razlika maškar adava te dža palo nekaskoro šukar primer hem te koristine adava primer te šaj te sporedine tut lea (w21.07 20, pas. 1-2).

Šaj te bajrare tli vera ko Stvoriteli agjaar so vnimatelno ka dikhe e životnen, o rastenija hem o zvezde (Ps. 19:1). So poviše istražinea bašo asavke bukja, doborom poviše ka uverine tut kaj o Jehova tano o Stvoriteli. Keda istražinea o stvorime bukja, primetin so šaj te sikljove lendar bašo amaro Stvoriteli (Rim. 1:20). Na primer, o kham takjarela hem dela svetlina, nešto soj but potrebno bašo životo. Sepak, nesave taro zrakija so avena taro kham šaj te oven e manušenge but štetna. Ama, amen siem lendar zaštitime. Sar? Amare phuvja isi la plo štiti, adava tano jekh sloj taro gasi ozon kova soj okolu i phuv hem zaštitinela la taro štetna zrakija. So posilna ovena akala štetna zrakija, doborom poviše ozon stvorinela pe. So mislinea, dali sa akava ulo slučajno, ili isi jekh ljubezno hem inteligentno Stvoriteli kova so stvoringja sa akava? (w21.08 17, pas. 9-10).

Otkeda nekoj ka krstinel pe, amen ponadari da mora te manga le hem te poštujna le (1. Jov. 4:20). Sar šaj te kera adava? Agjaar so ka ovel amen doverba ki leste. Na primer, ako našti te haljova soske kergja nesavi buti, nane te mislina amenge kaj kergja le adava taro pogrešna ili sebična motivija. Namesto adava, ka sikava čest amare phraleske agjaar so ka dikha le sar pobaro amendar (Rim. 12:10; Fil. 2:3). Ustvari, valjani te ova milostiva hem ljubezna sa e manušencar. Ako mangaja te ova maškar okola so šaj večno te vikinen e Jehova „mo Dad“, mora te primenina adava so sikljovaja tari Biblija. Na primer, o Isus vakergja kaj valjani te ova milostiva hem ljubezna sa e manušencar, čak amare dušmanencar (Luka 6:32-36). Akava ponekogaš šaj te ovel pharo. Adaleske, mora te razmislina hem te postapina sar o Isus. Keda daja amendar sa te ova poslušna e Jehovaske hem te dža palo e Isuseskoro primer, sikavaja amare nebesno dadeske kaj mangaja večno te ova delo tari leskiri familija (w21.08 6, pas. 14-15).

Sikljov te ovel tut doverba ko Jehova. Ov vetinela kaj ka del amen but bereketija ako isi amen doverba ki leste hem ako daja le amaro najšukar. Ki Biblija isi but primerija taro manuša kola so dengje pestar sa ki služba bašo Jehova. Ko but slučaija, o Jehova dengja bereketija akale verna slugenge samo otkeda ola prvo kergje nešto te šaj te sikaven pli doverba ki leste. Na primer, čak otkeda o Avraam mukhlja plo kher hem „gelo bizo te džanel kaj džala“, o Jehova dengja le bereketi (Evr. 11:8). Čak otkeda o Jakov boringja pe e angelea, dobingja bereketi (1. Moj. 32:24-30). Kratko angleder o Izraelcija te khuven ki Vetimi phuv, prvo mora sine o sveštenikija te khuven ki reka Jordan te šaj sa o Izraelcija te nakhen latar (Is. Nav. 3:14-16). Isto agjaar, šaj but te sikljove taro primerija e verna slugengere taro amaro vreme kola so sikavgje doverba ko Jehova hem bajrargje pli služba (w21.08 29-30, pas. 12-14).

Tumen o pophure phralja džanena sar kerena pe sine o bukja angleder, ama isto agjaar haljovena kaj valjani te prilagodinen tumen ko neve okolnostija. Tumen o pophure so sigende krstingjen tumen, šaj isto agjaar te pomožinen e ternenge ko but načinija. O poterne ka uživinen te šunen tumare iskustvija hem o bukja so siklilen ko tumaro životo. Ako sien darežliva agjaar so ka obučinen e javeren bašo bukja so siklilen len ko tumaro životo, o Jehova ka del tumen but bereketija (Luka 6:38). Keda tumen o pophure ka oven paše e ternencar, tegani ka šaj te pomožinen jekh jekheske (Rim. 1:12). Sekole jekhe isi le nešto korisno so e javere nane le. E phuren isi len mudrost hem iskustvo kola so stekningje len ko plo životo. A e poternen isi len sila. Keda o terne hem o phure sorabotinena sar amala, ola anena slava amare nebesno Dadeske hem tane bereketi sarinenge ko sobranie (w21.09 8, pas. 3; 13, pas. 17-​18).

Soske bute Evreenge smetingja o način sar sine mudardo o Isus? Sprema lende, adava so o Isus mulo ko stubo kergja te izgledinel kaj ov tano kriminalco hem grešniko, a na Mesija (5. Moj. 21:22, 23). Nesave Evreija so spotakningje pe taro Isus, na halile kaj ov na sine krivo, kaj ov sine pogrešno obvinimo hem kaj lea postapingje nepravedno. Adalenge so sudingje e Isuse, na sine važno i pravda. O sudie taro Evrejsko Sudsko sovet sigate khedingje pe te osudinen le hem na ikergje pe ko zakoni (Luka 22:54; Jovan 18:24). Namesto nepristrasno te šunen o obvinenija hem o dokazija protiv o Isus, adala sudie čak mangle te arakhen „hovavno svedoštvo protiv o Isus te šaj te mudaren le“ (Mat. 26:59; Mar. 14:55-64). Isto agjaar, otkeda o Isus voskresningja, akala nepravedna sudie platingje but pare e rimsko vojnikon so arakhena sine leskoro grobo te šaj te hovaven soske o grobo sine čučo (Mat. 28:11-15; w21.05 11, pas. 12-13).

O Jehova keda mangela šaj te čhivel krajo akale lošno svetoske, ama amen da isi amen korist tari leskiri strplivost. E Adameskere hem e Evakere čhave bijangjovena nesovršena. Sepak, o Jehova mangela len hem grižinela pe lenge hem vetingja kaj ka anel krajo akale svetoske (1. Jov. 4:19). Ov odredingja o vreme keda ka čhivel krajo sa e manušikane mukenge. E Jehovaskoro mangipe valjani te pottikninel amen da te istrajna sa džikote valjani. O Jehova tano sovršeno primer baši istrajnost. O Isus gelo palo ple Dadeskoro primer hem keda sine ki Phuv ov istrajngja vredžiba, ladž hem meribe ko stubo mučibaske (Evr. 12:2, 3). E Jehovaskoro primer baši istrajnost sigurno dengja sila e Isuseske te istrajnel, a šaj te del sila amenge da (w21.07 12-13, pas. 15-17).

Amaro nebesno Dad sekova dive prostinela amenge (Ps. 103:10-14). O Isus isto agjaar sikavgja milost hem prostingja ple učenikonge, iako sine nesovršena. Čak sine spremno te del plo životo sar žrtva te šaj amare grevija te oven prostime (1. Jov. 2:1, 2). O mangipe so isi amen maškar amende ovela posilno keda spremno prostinaja (Ef. 4:32). Džangjola pe kaj ponekogaš šaj te ovel amenge pharo te prostina e javerenge, adaleske mora but te trudina amen. I statija „Spremno prostinen jekh jekheske“, so arakhljola ki Stražarsko kula, pomožingja jekhe phenjake te kerel adava. Oj vakerela: „Akaja statija objasninela kaj adava so prostinea e javerenge, na značinela kaj prifatinea lengiri pogrešno postapka ili kaj na povredingje tut. Ama keda prostinea lenge, tu na sian više lenge holjamo hem isi tut andruno mir“. Keda spremno prostinaja amare phralenge hem phenjenge sikavaja kaj mangaja len hem kaj džaja palo primer amare Dadeskoro, e Jehovaskoro (w21.09 23-24, pas. 15-16).

O Isus mangela sine o čačipe, javere lafencar o čačipe bašo Devel hem baši leskiri namera. Ov živingja sprema adava čačipe, hem vakergja le e javerenge (Jovan 18:37). E Isuseskere sledbenikija isto agjaar but mangle o čačipe (Jovan 4:23). Ustvari, o apostol Petar bašo hristijanstvo vakergja kaj tano o „drumo e čačipaskoro“ (2. Pet. 2:2). Adaleske so but mangena sine o čačipe, o hristijanja taro prvo veko otfrlingje o religiozna idee, tradicie hem o lično mislenje kola so na sine sprema o čačipe (Kol. 2:8). Slično, avdive o čačutne hristijanja trudinena pe te živinen sprema o čačipe agjaar so pazinena lengoro veruvanje hem o način sar živinena te temelinel pe ko e Devleskoro Lafi (3. Jov. 3, 4). E Jehovaskere svedokija na vakerena kaj ola sekogaš celosno haljovena sa tari Biblija. Ponekogaš, kergje greške ko način sar objasningje nesavo biblisko sikljojbe ili ko način sar organiziringje o sobranija. Keda halile adava, ola kergje o potrebna promene (w21.10 21-22, pas. 11-​12).

Ko biblisko vreme, o dizja sine opkolime zidoncar kola so zaštitinena sine e manušen taro dušmanja. Slično agjaar, e Jehovaskoro verno mangipe tano sar jekh zido okolu amende kova so dela amen duhovno zaštita taro opasnostija kola so šaj te ruminen amaro amalipe lea. Osven adava, o Jehova privlekujnela amen ki peste adaleske so isi le verno mangipe (Erem. 31:3). O psalmisti o David koristinela isto agjaar javer sporedba te šaj te sikavel sar o Devel zaštitinela ple narodo. Ov pišingja: „O Devel tano mlo sigurno than garajbaske, o Devel kova so sikavela mange verno mangipe“. Ov isto agjaar bašo Jehova vakerela: „Ov tano mlo verno mangipe hem mli tvrdina, mlo sigurno than garajbaske hem mlo spasiteli, mlo štiti hem okova kaste so garavava man“ (Ps. 59:17; 144:2). Soske o David sporedingja e Jehovaskoro verno mangipe sar than garajbaske hem sar tvrdina? Bizi razlika kote živinaja, sa džikote siem leskere sluge, o Jehova ka zaštitinel amen taro sa so valjani te šaj te arakha amaro skapoceno amalipe lea (w21.11 6, pas. 14-15).

Ki jekh prilika, keda o Isus hem leskere učenikija sine ko more, uli jekh bari bura (Mat. 8:23-26). O Isus koristingja adaja prilika te šaj te pomožinel ple učenikonge te haljoven kaj valjani te keren pozorali pumari vera. O branija sine doborom bare, so o brodi počmingja te phergjol pani, ama o Isus sovela sine mirno. Keda o učenikija darandile hem vazdingje e Isuse te šaj te spasinel len, ov vakergja lenge: „Soske darana, doborom li hari vera isi tumen?“ Dali soočinea tut jekhe bare buraja? Šaj isi tut problemija adaleske so doživingjan prirodno katastrofa. Ili šaj isi tut nesavo seriozno nasvalipe kova so peljargja tut hem na džanea so te kere. Šaj ponekogaš sekirinea tut, ama ma mukh i sekiracija te kerel te na ovel tut doverba ko Jehova. Ov lea popaše agjaar so ka moline tut leske taro vilo. Bajrar tli vera agjaar so ka razmisline sar o Jehova pomožingja tuke (Ps. 77:11). Šaj te ove sigurno kaj ov nane te mukhel tut — ni akana a ni ki celi večnost (w21.11 22, pas. 7, 10).

Nekoj šaj te mislinel peske kaj sa džikote tano poslušno ki akaja zapoved te na lel nešto so nane leskoro, ov ikerela pe ki zapoved. Ama ov šaj ko javer način te čorel. Na primer, jekh trgovco kova so koristinela hovavne vage hem merke te šaj te hovavel ple mušterien, ov ustvari čorela lendar. Ki 3. Mojseeva 19:13 vakerela: „Ma iskoristin tle pašutne“. Znači ako nekoj nane pošteno ki buti so kerela la, ov ustvari čorela. Iako i oftoto zapoved jasno vakerela kaj o čoribe tano pogrešno, o detalija soj tane pišime ki 3. Mojseeva pomožinena amenge te haljoven sar šaj te primenina o načelo so bešela pali adaja zapoved. Šukar tano amen da te razmislina bašo adava sar dikhela o Jehova ko hovajbe hem ko čoribe. Šaj te puča amen: „Keda razmislinava baši 3. Mojseeva 19:11-13, dali dikhava kaj isi nešto so valjani te meninav ko mlo životo, posebno ko mo način sar kerava buti?“ (w21.12 9-10, pas. 6-8).

Ko tle lična molitve razmislin bašo konkretna greške so kergjan adava dive, hem tegani molin e Jehova te prostinel tuke. Džangjola pe, ako kergjan jekh seriozno grevo tegani isto agjaar valjani te rode pomoš taro starešine. Ola ka šunen tut hem ka den tu sovet taro e Devleskoro Lafi. Ola ka molinen pe tuja hem ka roden o Jehova te prostinel tuke te šaj palem te ove paše lea (Jak. 5:14-16). Isto agjaar, ka pomožinel tuke adava so ka razmisline baši otkupnina. Šaj tano tuke pharo keda razmislinea kobor bare muke cidingja e Devleskoro Čhavo. Ama, kobor poviše razmislinea baši e Isuseskiri žrtva, doborom poviše bajrola tlo mangipe sprema leste hem sprema leskoro Dad. Sekova berš amen bajraraja poviše amari blagodarnost baši otkupnina adalea so prisustvujnaja ki Spomen-svečenost bašo e Isuseskoro meribe hem adalea so revno kaninaja e javeren te oven prisutna amencar. O Jehova dengja amen bari čest te sikava e javeren bašo leskoro Čhavo (w21.04 18-19, pas. 13-16).

Razmislin so kergja o Isus keda dikhlja bute manušen so ale te dikhen le ki planina. Ov sigurno sine but umorno adaleske so molingja pe celo rat. Ama keda dikhlja adale bare mnoštvo žalingja e čorolen hem e nasvalen so sine maškar lende. Hem na samo so sasljargja len, nego isto agjaar ikergja lenge jekh taro najohrabruvačka govorija — i Propoved ki gora (Luka 6:12-20). O Isus isto agjaar odvojngja vreme e javerenge čak keda valjani sine te ovel korkori. Šaj li te zamisline tuke sar osetingja pe o Isus keda doznajngja kaj leskoro amal, o Jovan Krstitel, sine mudardo? I Biblija vakerela: „Keda šungja [kaj o Jovan mulo], o Isus gelo čamcoja ko jekh pusto than te šaj te ovel korkori“ (Mat. 14:10-13). Ama jekh baro mnoštvo reslja ko adava than angleder ov te resel athe (Mar. 6:31-33). Ov halilo kaj o manuša sine duhovno bokhale hem valjani sine lenge uteha, adaleske o Isus sine spremno odma te pomožinel lenge (Luka 9:10, 11; w22.02 21, pas. 4, 6).

So valjani te kera ako halilem kaj povredingjem amare phrale ili phenja? Amen valjani te molina amen e Jehovaske taro vilo. Na primer, šaj te molina le te pomožinel amenge te smirina amen amare phralea. Isto agjaar, valjani te odvojna amenge vreme te ispitina amen. Na primer, šaj te puča amen: „Dali sium spremno te priznajnav kaj grešingjum, te izvininav man hem te smirinav man mle phralea? Sar ka osetinen pe o Jehova hem o Isus ako dikhena kaj me kerava o prvo čekori te smirinav man mle phralea ili phenjaja?“ Amare odgovorija šaj te pottikninen amen te šuna e Isuse hem te ova ponizna keda keraja lafi amare phralea ili phenjaja te šaj te smirina amen. Lengoro razgovor ka završinel sine but lošno. Keda džaja ko amaro phral te smirina amen lea valjani te sikava poniznost (Ef. 4:2, 3). Amen valjani te kera lafi okolea so povredingjem le hem te pomožina leske te na ovel više holjamo amencar. Ma bistre, te smirine tut tle phrale tano but považno nego te dokažine koj tano ko pravo a koj na (1. Kor. 6:7; w21.12 26, pas. 3-​16).

O Isus sine tažno adaleske so džanlja kaj but Evreija nane te mangen te prifatinen o šukar haberi bašo Carstvo. Ov džanlja kaj bašo adava o Erusalim ka ovel uništimo hem okola Evreija so ka preživinen adava uništuvanje ka oven robija (Luka 21:20-24). Hem čače, baš sar so vakergja o Isus, pobaro delo taro manuša otfrlingje le. Sar reagirinena poviše manuša ko haberi bašo Carstvo ko than kote so živinea? Ako samo hari džene prifatinena o čačipe, so šaj te sikljove taro e Isuseskere asva? E Jehovaske o manuša tane važna. E Isuseskere asva setinkerena amen ko adava kobor o Jehova mangela e manušen. Ov „na mangela nikoj te ovel uništimo nego sarinen te ovel len prilika te kainen pe“ (2. Pet. 3:9). Avdive, amen sikavaja kaj mangaja amare pašutnen agjaar so sekogaš trudinaja amen te pomožina lenge te sikljoven bašo šukar haberi bašo Carstvo (Mat. 22:39; w22.01 16 pas. 10-12).

Tli vera ka ovel pozorali džikote razmislinea bašo adava so o Jehova više kergja ple narodoske hem so tuke lično kergja. Soj najvažno, tlo mangipe sprema o Jehova ka bajrol. Poviše taro sa o javera osobine, o mangipe tano adava so ka pottikninel tut te ove poslušno e Jehovaske, te kere žrtve, te šaj te kere leskiri volja hem te istrajne ko nevolje (Mat. 22:37-39; 1. Kor. 13:4, 7; 1. Jov. 5:3). Ništo nane poskapoceno taro paše amalipe e Jehovaja (Ps. 63:1-7). Ma bistre kaj i molitva, o proučibe hem o razmislibe tane delo taro amaro obožavanje. Slično sar o Isus, rode mirno than kote so šaj te nakhave vreme e Jehovaja. Cide tutar sa so šaj te lel tlo vnimanie. Molin e Jehova te pomožinel tuke te koncentririne tut keda odvojnea tuke vreme bašo duhovna aktivnostija. Ako šukar koristinea tlo vreme akana, o Jehova ka del tut večno životo ko e Devleskoro nevo sveto (Mar. 4:24; w22.01 31, pas. 18-20).

Amare misle vlijajnena upro amare postapke. Baš adaleske o Isus pottikningja amen te otfrlina misle kola so šaj te čhiven amen te kera pharo grevo (Mat. 5:21, 22, 28, 29). Sigurno mangaja te kera e Jehova bahtalo hem adaleske tano važno sigate te otfrlina sekoja pogrešno misla koja so ka pojavinel pe amenge ki godi. O Isus vakergja: „Sa so ikljola taro muj avela taro vilo“ (Mat. 15:18). Adava sar keraja lafi otkrinela but bašo adava save siem andraldan. Adaleske, puč tut: „Dali sium spremno sekogaš te vakerav o čačipe čak keda džanava kaj adava šaj te kerel mange problemija? Ako sium ko brako, dali pazinava te na flertujnav nekasaja taro sprotivno pol? Dali izbeginava te koristinav bezobrazna lafija? Dali kerava lafi ko jekh smirimo način keda nekoj nervirinela man?“ Ka ovel šukar ako razmislinea bašo akala pučiba. Ako trudinea tut te na koristine nasilna, hovavne hem bezobrazna lafija, ka ovel tuke polokho te huljave i purani ličnost (w22.03 5, pas. 12-14).

Okola so rodena sovet namesto te adžikeren te avel nekoj te del len sovet, obično poviše ka napredujnen ko duhovno pogled taro okola so na rodena sovet. Adaleske, namesto te adžikere o javera te den tut sovet, rode tu sovet. Keda šaj te roda sovet taro amare phralja hem phenja? Razmislin bašo akala situacie: 1) Jekh phen vikinela jekhe iskusno phenja te džal laja ko biblisko kursi hem palo adava rodela latar sovet bašo adava sar šaj pošukar te sikavel ki služba. 2) Jekh phen so nane ko brako mangela te kinel peske pantolke, adaleske pučela jekhe zrelo phenja te vakerel lake iskreno so mislinela bašo pantolke. 3) Jekh phral so valjani prvo puti te ikerel javno predavanje zamolinela jekhe iskusno govorniko te šunel le hem te vakerel leske nesavo sovet sar šaj te ovel pošukar. Čak nesavo phral so beršencar ikerela govorija šaj te rodel sovet taro iskusna govornikija hem palo adava te primeninel o sovet so dobinela (Izr. 19:20; w22.02 13, pas. 15-17).

O Jehova mangela amen hem grižinela pe amenge, isto sar so manglja hem grižingja pe ple Čhaveske džikote sine akate tele ki Phuv (Jovan 5:20). Ov grižingja pe leske ko duhovno, emocionalno hem fizičko pogled. Hem o Jehova anglo javera jasno sikavgja kaj mangela ple Čhave hem kaj tano lestar zadovolno (Mat. 3:16, 17). O Isus džanlja kaj leskoro manglo nebesno Dad sekogaš ka poddržinel le hem adaleske nikogaš na osetingja pe korkori. Slično sar o Isus, sarine amen osetingjem e Jehovaskoro mangipe ko but načinija. Razmislin samo: O Jehova privlečingja amen ki peste hem dengja amen duhovno familija koja so kerela amen bahtale hem ohrabrinela amen keda siem sekirime (Jovan 6:44). Ov isto agjaar sekogaš dela amen duhovno hrana koja so kerela amen zorale. Čak pomožinela amenge te grižina amen bašo amare materijalna potrebe (Mat. 6:31, 32). Keda razmislinaja kobor o Jehova mangela amen, amaro mangipe sprema leste bajrola (w21.09 22, pas. 8-9).

Savo životo sine tut angleder te proučine i Biblija e Jehovaskere svedokoncar? But džene amendar na mangena ni te setinen pe bašo adava. Najverojatno o razmisluvanje taro akava sveto but vlijajngja upro tlo stavi hem tli ličnost, bašo adava soj ispravno a soj pogrešno. Ako akava sine slučaj tuja da tegani sian sine „bizi nadež hem bizo Devel“ (Ef. 2:12). Ama otkeda počmingjan te proučine i Biblija, doznajngjan kaj isi tut jekh nebesno Dad kova so but mangela tut. Haliljan kaj ako mangea te kere bahtalo e Jehova hem ako mangea te ove delo tari leskiri familija taro verna sluge, ka valjani te kere bare promene ko tlo životo hem ko tlo razmisluvanje. Hem kaj ka valjani te sikljove te živine sprema leskere uče merilija (Ef. 5:3-5). Amaro Stvoriteli hem nebesno Dad, o Jehova, isi le pravo te odlučinel sar valjani te ponašinen pe okola soj tane delo tari leskiri familija. Hem adaleske očekujnela amendar panda angleder te krstina amen te „huljava i purani ličnost hem lakere postapke“ (w22.03 2, pas. 1-3).

O javera bakhre tane bahtale so šaj te oven prisutna ki Spomen-svečenost hem ola da razmislinena baši pumari nadež. Ola tane bahtale so šaj te šunen o govor ki Spomen-svečenost, soske ko adava govor istakninela pe so ka keren o Hristos hem o 144.000 bašo verna manuša džikote trajnena o 1.000 berša. O Cari, o Isus Hristos, ka vodinel okolen so ka vladinen taro nebo te pomožinen i Phuv te kerel pe raj hem te pomožinen e manušen te oven sovršena. Čače tano nešto posebno e milionja manušenge soj tane prisutna ki Spomen-svečenost te šunen sar ki idnina ka ispolninen pe o bibliska proroštvija, sar soj okola so arakhljona ko Isaija 35:5, 6; 65:21-23; hem ko Otkrovenie 21:3, 4. Adava so zamislinena peste hem pumare manglen ko adava nevo sveto, kerela lengiri nadež baši idnina pozorali hem kerela len te oven odlučna nikogaš te na čhinaven te služinen e Jehovaske (Mat. 24:13; Gal. 6:9; w22.01 21, pas. 5-7).

Soj tani i otkupnina? I cena koja o Isus platingja la te šaj te iranel adava so o Adam našavgja le (1. Kor. 15:22). Soske valjani amenge i otkupnina? Adaleske so e Jehovaskoro merilo baši pravda rodela sine te del pe životo bašo životo (2. Moj. 21:23, 24). O Adam našavgja plo sovršeno manušikano životo. Te šaj te zadovolinel pe e Devleskiri pravda, o Isus dengja sar žrtva plo sovršeno manušikano životo (Rim. 5:17). Agjaar ov ulo o „Večno Dad“ sa okolengoro so sikavena vera ki otkupnina (Isa 9:6; Rim. 3:23, 24). O Isus sine spremno te del plo životo sar žrtva adaleske so but mangela sine ple nebesno Dade hem amen. (Jovan 14:31; 15:13) Adaleske so sine le asavko mangipe, ov sine odlučno te ačhol verno dži ko krajo hem te kerel ple Dadeskiri volja. Agjaar, e Jehovaskiri prvobitno namera bašo manuša hem baši Phuv ka ovel ispolnimi (w21.04 14, pas. 2-3).