April

O Isus sikavgja amenge baro mangipe agjaar so spremno dengja plo životo amenge (Jovan 15:13). Nikogaš našti ki isto mera te irana e Jehovaske hem e Isuseske bašo mangipe so sikavgje le amenge. Ama šaj te sikava kaj siem blagodarna agjaar so sekova dive ka živina sar o Jehova so mangela (Kol. 3:15). O pomazanikija but ceninena i otkupnina soske preku late isi len but šuži nadež (Mat. 20:28). Adaleske so verujnena ki e Hristoseskiri žrtva, o Jehova dikhela ki lende sar pravedna hem posvojngja len sar ple čhave (Rim. 5:1; 8:15-17, 23). O javera da bakhre tane blagodarna baši otkupnina. Adaleske so isi len vera ki e Hristoseskiri žrtva, šaj te ovel len čisto sovest anglo Devel hem te ovel len nadež kaj ka nakhen i bari nevolja (Otk. 7:13-15). O solduj grupe sikavena pumari blagodarnost baši otkupnina agjaar so sekova berš tane prisutna ki Spomen-svečenost (w22.01 23, pas. 14-15).

E Isuseske sine najpharo i pričina soske osudingje le te merel. Ov sine pogrešno obvinimo kaj na sikavela poštovanje sprema o Devel ili sprema e Devleskoro anav (Mat. 26:64-66). E Isuse mučinela sine i misla kaj o manuša obvininena le kaj ov na poštujnela e Devle hem nadinela pe sine kaj leskoro Dad nane te dozvolinel leske te ovel ponižimo ko asavko način (Mat. 26:38, 39, 42). O Isus mora sine te ovel obesimo ko stubo te šaj te oslobodinel e Evreen tari jekh arman (Gal. 3:10). Lenge sine dendi arman adaleske so vetingje kaj ka ikeren e Devleskoro zakoni, ama na kergje adava. Osven so zaslužingje te meren adaleske so sine e Adameskere čhave, upri lende sine isto agjaar adaja arman (Rim. 5:12). Ko e Devleskoro zakoni pišinela sine kaj ako jekh manuš kerela grevo so zaslužinela meribe, ov valjani sine te ovel mudardo. Palo adava ko nesave slučaija e manušeskoro mulo telo sine obesimo ko stubo. A adava značinela sine kaj adava manuš dendo tano arman taro Devel (5. Moj. 21:22, 23; 27:26). Znači, adalea so sine o Isus kovimo ko stubo, ov lelja upri peste i arman so sine dendi e Evreenge te šaj ola te oven oslobodime latar. Agjaar, len da šaj sine te ovel len korist tari e Isuseskiri žrtva iako ola otfrlingje le (w21.04 16, pas. 5-6).

Zamislin tuke save sine o posledna dive taro e Isuseskoro životo ki Phuv. O rimska vojnikija margje le bizi nisavi milost (Mat. 26:52-54; Jovan 18:3; 19:1). Ola marena le kamšikoja kolea so čhinena leskere masa. Pokasno, dena le ko plo ratvalo dumo te phiravel jekh pharo stubo taro kaš. O Isus počminela te phiravel akava stubo dži ko than kote so valjani te ovel mudardo, ama palo kratko vreme o rimska vojnikija zapovedinena javere manušeske te phiravel o stubo leske ko than (Mat. 27:32). Keda resela o Isus ko than kote so valjani te merel, o vojnikija kovinena leskere vasta hem leskere pre ko stubo. Keda o Isus tano ko stubo, i težina taro leskoro telo kerela te čhingjon o rane so isi le taro šajke. Leskere amala hem leskiri daj rovena, ama o evrejska vodačija asana e Isuseske (Luka 23:32-38; Jovan 19:25). O Isus cidela muke nekobor saatija. Adaleske soj tano obesimo, leskoro srce hem leskere plukja na funkcionirinena šukar hem sa popharo tano leske te dišinel. O Isus džanela kaj sine verno hem kratko angleder te merel ov molinela pe e Jehovaske posledno puti. Tegani teljarela plo šero hem predajnela plo životo (Mar. 15:37; Luka 23:46; Jovan 10:18; 19:30). Adava čače sine jekh bavno, ponižuvačko meribe, kova so but dukhala! (w21.04 16, pas. 4).

O Isus kergja ple 11 apostolencar duj sojuzija ili dogovorija — o nevo sojuz hem o sojuz bašo Carstvo (Luka 22:20, 28-30). Preku akala sojuzija, adala apostolija hem ograničimo broj javera manuša šaj te oven carija hem sveštenikija ko nebo (Otk. 5:10; 14:1). Adaleske soj tane vklučime ko akala duj sojuzija, samo o pomazanikija so ačhile ki Phuv šaj te len taro maro hem tari mol ki Spomen-svečenost. O Jehova dengja len jekh but šuži nadež. Ola šaj te uživinen ko besmrtno životo ko nebo, te vladinen zaedno hem e Isus Hristosea hem e javere pomazanikoncar kola so voskresningje, a soj najvažno, ka šaj te dikhen e Jehova! (1. Kor. 15:51-53; 1. Jov. 3:2). O pomazanikija tane svesna kaj mora te ačhoven verna dži ko pumaro meribe (2. Tim. 4:7, 8; w22.01 21, pas. 4-5).

Duj kriminalcija sine kovime ko stubo uzo Isus (Luka 23:40, 41). Jekh lendar irangja pe ko Isus hem vakergja leske: „Setin tut ki mande keda ka ove Cari“ (Luka 23:42). O Isus šaj sine te del nadež adale kriminalcoske adaleske so džanlja kaj leskoro Dad tano milostivo (Ps. 103:8; Evr. 1:3). O Jehova mangela te prostinel amenge hem te sikavel amenge milost. Ama, adava ka kerel le samo ako čače amenge žal bašo lošna bukja so kergjem len hem ako sikavaja vera ki otkupno žrtva so dengja la o Isus Hristos (1. Jov. 1:7). Nesavenge šaj pharo tano te verujnen kaj o Jehova šaj te prostinel lengere greške. Ako tu da nekogaš osetinea tut agjaar razmislin bašo akava: Kratko angleder te merel o Isus sikavgja milost jekhe kriminalcoske kova samo so počmingja te sikavel vera. Kobor poviše ka sikavel o Jehova milost ple verna slugenge! (Ps. 51:1; 1. Jov. 2:1, 2; w21.04 9, pas. 5-6).

Adalea so ačhilo verno dži ko meribe, o Isus ispolningja but bukja. Prvo, ov dokažingja kaj o Satana tano hovavno. O Isus sikavgja kaj jekh sovršeno manuš šaj te ačhovel verno e Jehovaske bizi razlika so kergja leske o Satana. Dujto, o Isus dengja plo životo sar otkupnina. Adaleske so dengja plo životo sar žrtva, e nesovršena manušen šaj te ovel len jekh amalipe e Devlea hem nadež bašo večno životo. Hem trito, o Isus dokažingja kaj o Jehova tano pravedno vladeteli hem čistingja ple Dadeskoro anav tari ladž. Te živina sekova dive sar te phene adaja tani amari posledno šansa te ačhova verna! Tegani, čak ako meraja, šaj te vakera: „Jehova, dengjum mandar sa te šaj te ačhovav verno, te dokažinav kaj o Satana tano hovavno, te čistinav tlo anav tari ladž hem te poddržinav tlo pravo te vladine“ (w21.04 12, pas. 13-14).

O Isus sine lažno obvinimo hem osudimo bašo nešto so na kergja. Akana o manuša asana leske, surovo mučinena le hem kovinena leskere vasta hem pre šajkencar ko stubo. Čak keda dišinela hem kerela lafi isi le dukha. Ama, mora te kerel lafi soske isi nešto važno te vakerel. Amen šaj te sikljova važna pouke taro e Isuseskere posledna lafija! Ola setinkerena amen kaj valjani te prostina e javerenge hem kaj valjani te ovel amen doverba kaj o Jehova ka prostinel amenge. Isi amen prednost te ova delo tari jekh but šuži duhovno familija taro phralja hem phenja kola tane spremna te pomožinen amenge. Ama, na valjani te ladža te roda lendar pomoš. Džanaja kaj o Jehova ka pomožinel amenge te izdržina sekova problemi. Isto agjaar, dikhaja kobor tano važno sekova dive te živina sar te phene adava tano o posledno dive so šaj te dokažina amari vernost, uverime kaj amaro životo tano sigurno ko e Jehovaskere vasta (w21.04 8, pas. 1; 13, pas. 17).

Ako džaja palo e Isuseskere čekorija amen ka šaj te živina večno. Keda jekh terno barvalo manuš pučlja so valjani te kerel te šaj te dobinel večno životo, o Isus odgovoringja leske: „Ov mlo učeniko“ (Mat. 19:16-21). Nesave Evreenge kola so na verujnena sine kaj ov tano o Hristos, o Isus vakergja lenge: „Me bakhre avena pali mande. Me dava len večno životo“ (Jovan 10:24-29). Amen sikavaja vera ko Isus adalea so primeninaja adava ov so sikavgja hem keraja adava so ov kergja. Ako keraja adava, amen ka šaj te živina večno (Mat. 7:14). Te šaj te dža palo e Isuseskere čekorija ko sa mora angleder šukar te pendžara le. Te pendžarel pe e Isuse tano nešto so mora te kera le postojano. Amen mora sa pošukar hem pošukar te zapoznajna le — te sikljova bašo leskere osobine, bašo leskoro način sar razmislinela hem bašo merilija sprema kola so vodinela pe. Bizi razlika kobor vreme džanaja o čačipe, amen mora ponadari da te trudina amen šukar te pendžara e Jehova hem leskere Čhave (w21.04 4, pas. 9-​10).

Verojatno o apostol Pavle ponekogaš osetinela pe sine but lošno keda razmislinela sine bašo bukja so kergja len angleder te ovel hristijani. Ov vakergja baši peste kaj tano „o najbaro grešniko“, a adava na iznenadinela amen (1. Tim. 1:13). Angleder te džanel o čačipe o Pavle but progoningja e hristijanen ko različna dizja, agjaar so nesaven čhivgja ko zatvor hem glasingja te oven mudarde (Dela 26:10, 11). Šaj li te zamisline tuke sar o Pavle osetingja pe keda šaj arakhlja nesave terne hristijane kaskere roditelija sine mudarde adaleske so ov odobringja adava? O Pavle kaingja pe bašo ple greške, ama ov sine svesno kaj našti te meninel adava so ulo. Ov verujngja kaj o Isus mulo baši leste hem adaleske sine uverimo keda pišingja: „O Devel sikavgja mange šukaripe so na zaslužinava le hem adaleske sium apostoli“ (1. Kor. 15:3, 10). So šaj te sikljova taro akava? Valjani te ove uverimo kaj o Isus mulo tuke hem dengja tut prilika te ove paše e Devlea (Dela 3:19). E Devleske tano važno so keraja akana hem so ka kera ki idnina, a na o greške so kergjem len poangle (Isa. 1:18; w21.04 23, pas. 11).

Iako ko e Isuseskoro vreme but Evreija na očekujngje o Mesija te merel, dikh so vakergja jekh proroštvo taro e Devleskoro Lafi: „Ov dengja plo životo hem sine čhivdo maškar o grešnikija. Ingargja o grevo bute manušengoro hem sine posredniko e grešnikonge“ (Isa. 53:12). Adaleske, e Evreen na sine len pričina te spotakninen pe keda o Isus sine mudardo sar grešniko. Avdive amen šaj te na spotaknina amen ako doznajnaja o faktija. Ki pli Propoved ki gora, o Isus predupredingja okolen so šunena le sine kaj nesave „ka vakeren razna lošna, hovavne bukja protiv lende“ (Mat. 5:11). Akala hovajba avena taro Satana. Ov vlijajnela upro o protivnikija te širinen zlobna hovajba bašo okola so mangena o čačipe (Otk. 12:9, 10). Amen mora te otfrlina o hovajba so vakerena len amare protivnikija. Nikogaš ma te dozvolina asavke hovajba te daraven amen ili te slabonkeren amari vera (w21.05 11, pas. 14; 12, pas. 16).

Pomožin e interesenteske te ovel le doverba ko Jehova. O Isus uveringja ple učenikon kaj o Jehova ka pomožinel lenge adaleske so mangela len sine (Mat. 10:19, 20, 29, 30). Vaker e interesenteske kaj o Jehova ka pomožinel leske da. Šaj te pomožine leske te ovel le doverba ko Jehova agjaar so zaedno lea ka moline tut bašo leskere celija. O Frančišek, kova so živinela ki Polska, vakerela: „O phral so proučinela sine mancar često spomninela sine mle celija ko ple molitve. Keda dikhljum sar o Jehova odgovorinela ko leskere molitve, odma počmingjum me da te molinav man. Osetingjum kaj o Jehova pomožingja mange keda valjangjum te rodav slobodna dive tari buti te šaj te džav ko sostanokija hem ko kongres“. E Jehovaske tane but važna o interesentija. Ov džanela kobor trudinena pe o objavitelija te pomožinen e manušenge te oven lea paše hem adaleske but mangela len (Isa. 52:7). Iako ko momenti šaj na vodinea biblisko kursi, sepak šaj te pomožine e interesentenge te krstinen pe agjaar so sian prisutno ko bibliska kursija so vodinena javera objavitelija (w21.06 7, pas. 17-​18).

Ka sikava kaj ceninaja e Devleskoro Lafi agjaar so sekova dive ka čitina le. Valjani te odvojna amenge vreme te čitina hem te proučina i Biblija, a na te kera adava samo ako isi amen vreme. Ako redovno proučinaja, tegani ka ikera amari vera zorali. Različno taro mudra hem but školujme manuša taro akava sveto, amari vera temelinela pe ko e Devleskoro Lafi (Mat. 11:25, 26). Adaleske so proučinaja e Devleskoro Lafi, amen džanaja soske o uslovija ki Phuv tane doborom lošna hem so ka kerel o Jehova bašo adava. Adaleske, te ova odlučna te kera zorali amari vera hem te pomožina so poviše manušenge te ovel len vera ko amaro Stvoriteli (1. Tim. 2:3, 4). Hem ponadari da te ova spremna te adžikera o vreme keda sekova jekh ki Phuv ka slavinel e Jehova hem ka vakerel o lafija taro Otkrovenie 4:11: „Mokjno Jehova, tu sian amaro Devel hem zaslužinea sarine te slavinen tut... soske tu kergjan sa o bukja“ (w21.08 19, pas. 18-​20).

Sar pastirija, e starešinen isi len odgovornost te den sovet keda valjani. Ola valjani te den praktično sovet kova so o javera šaj lokhe te prifatinen le hem te primeninen le (Izr. 27:9). O starešine mangena e phralen hem phenjen. Ponekogaš adava mangipe sikavena le agjaar so dena nekaske sovet kova so džala ko pogrešno drumo (Gal. 6:1). Ama angleder jekh starešina te kerel lafi nekasaja, šaj te razmislinel bašo nesave bukja kola so o Pavle spomningja len bašo mangipe: „O manuš kova so isi le mangipe tano strplivo hem ljubezno... Sa učharela, sa verujnela, ko sa nadinela pe, sa trpinela“(1. Kor. 13:4, 7). Adava so jekh starešina hor ka razmislinel bašo akala bibliska stihija ka pomožinel leske te dikhel taro kola pričine dela sovet hem te kerel adava ko jekh ljubezno način. Ako okova so dobinela o sovet osetinela kaj o starešina grižinela pe leske, ka ovel pospremno te prifatinel o sovet (w22.02 14 pas. 3; 15 pas. 5).

O Jehova stvoringja e angelen hem e manušen sovršena, bizi nisavi maana. Ama tegani o angeli o Satana, so značinela „protivniko“, buningja pe protiv o Jehova. Ov ubedingja e sovršena manušen, e Adame hem e Eva, te buninen pe protiv leste. Javera da angelija hem manuša isto agjaar buningje pe. E Jehova sine le pravo so osetingja pe izneverimo. Ama ov istrajngja hem ponadari da ka istrajnel, sa džikote na avela o vreme te uništinel sa okolen so buninena pe. Tegani o Jehova hem leskere verna sluge na ka valjani više te istrajnen o lošna bukja taro akava sveto! O Satana obviningja e Jove hem sa e javere verna slugen e Jehovaskere kaj obožavinena le taro sebična pričine (Jov 1:8-11; 2:3-5). Ov kerela adava avdive da (Otk. 12:10). Amen šaj te pomožina te dokažinel pe kaj o Satana tano hovavno agjaar so ka istrajna ko amare nevolje hem ka ačhova verna e Jehovaske soske mangaja le (w21.07 9, pas. 7-8).

O apostol Pavle koristingja sporedba koja so sikavela amenge kobor tano važno te kera promene ki amari ličnost. Ov pišingja kaj mora te kovina amari purani ličnost „ko stubo“ (Rim. 6:6). O Isus sine spremno te ovel kovimo ko stubo te šaj te kerel e Jehovaskiri volja. Slično, ako mangaja te kera e Jehovaskiri volja, valjani spremno te mudara amare stavija hem postapke kola so mrzinela len. Ako keraja adava tegani ka ovel amen čisto sovest hem i nadež večno te živina (Jovan 17:3; 1. Pet. 3:21). O Jehova nane te meninel ple merilija te šaj amenge te ovel šukar. Namesto adava, amen siem adala so valjani te menina amen hem te ikera leskere merilija (Isa. 1:17, 18; 55:9). Čak otkeda ka krstine tut, valjani ponadari da te borine tut protiv o pogrešna želbe. Molin tut baši e Jehovaskiri pomoš, hem neka ovel tut doverba ko leskoro duho a na ki tli sila (Gal. 5:22; Fil. 4:6). Valjani but te trudina amen ako mangaja te huljava amari purani ličnost hem te na urava la više (w22.03 6, pas. 15-​17).

O Jehova vetinela amenge kaj ako čhivaja leskoro Carstvo ko prvo than hem živinaja sprema leskere pravedna merilija, ov ka grižinel pe te ovel amen hajbaske, urajbaske hem than živibaske (Mat. 6:33). Ako isi amen doverba ko akava vetuvanje, nane te mislina kaj o materijalna bukja taro sveto ka zaštitinen amen hem ka keren amen bahtale. Džanaja kaj čačutno mir šaj te ovel amen samo ako keraja e Jehovaskiri volja (Fil. 4:6, 7). Čak ako šaj te kina but bukja, mora te razmislina dali čače isi amen vreme hem sila te koristina len hem te održina len. Dali previše povrzingjem amen e bukjencar so isi amen? Te na bistra kaj o Devel očekujnela te kera amaro delo ki leskiri familija. Adava značinela kaj valjani te ova zafatime ki služba bašo Jehova hem kaj na valjani te dozvolina nešto javer te lel amaro vnimanie. Sigurno nijekh amendar na mangela te ovel sar o manuš kova so poviše manglja o materijalna bukja nego te džal palo Isus. Adaleske, našavgja i prilika te služinel e Jehovaske hem te ovel posvojmo sar jekh taro leskere čhave (Mar. 10:17-22; w21.08 6, pas. 17).

Džikote proučinea i Biblija, tli cel valjani te ovel pošukar te pendžare e Jehova. Agjaar ka sikljove bašo leskere osobine, hem ka dikhe kaj adala ista osobine šaj te arakhen pe ko bukja so stvoringja len. Keda sikljovaja baši lende, ovaja pouverime kaj o Devel čače postojnela (2. Moj. 34:6, 7; Ps. 145:8, 9). So poviše sikljovea bašo Jehova, doborom poviše tli vera hem tlo mangipe sprema leste ka bajron hem tumaro amalipe ka ovel pozoralo. Ker e javerencar lafi baši tli vera ko Devel. Ama so ako nekoj kaske so propovedinea sumninela pe dali isi Devel a tu na džanea so te vakere? Probin te arakhe biblisko odgovor ko amare publikacie, hem palo adava ker lea lafi. Šaj isto agjaar te puče poiskusno objavitele te pomožinel tuke te arakhe odgovor. Bizi razlika dali o javer ka prifatinel o odgovor ili na, tut ka ovel tut korist taro adava so istražingjan. Tli vera ka ovel pozorali (w21.08 18, pas. 14-15).

Te šaj te kera e Jehovaskiri volja, na valjani te otkažina amen taro sa amare udobnostija (Prop. 5:19, 20). Ama, ako na keraja poviše ki služba bašo Jehova samo adaleske so na mangaja te kera žrtve, šaj te kera i isto greška sar o manuš tari e Isuseskiri sporedba kova so kergja peske udobno životo, a na manglja te razmislinel bašo Devel (Luka 12:16-21). Keda isi amen problemija amen molinaja amen e Jehovaske te del amen mudrost, te šaj te džana sar te rešina adala problemija (Izr. 3:21). O Jehova dela amen bereketija ko but načinija. Šaj te sikava kobor ceninaja adala bereketija agjaar so ka kera sa so šaj te slavina le (Evr. 13:15). Adava šaj te kera le agjaar so ka probina neve načinija te bajrara amari služba hem agjaar ka da prilika e Jehovaske te del amen panda poviše bereketija. Sekova dive te roda načinija ’te probina hem te dikha kobor tano šukar o Jehova‘ (Ps. 34:8). Tegani ka ova sar o Isus, kova so vakergja: „Mlo hajbe tano te kerav i volja okoleskiri so bičhalgja man hem celosno te završinav i buti so dengja la mange“ (Jovan 4:34; w21.08 30-31, pas. 16-19).

O Satana mangela te ova gorda. Ov džanela kaj ako dozvolinaja amenge te ova gorda, ka ova sar leste hem ka našava i možnost te dobina o večno životo. Adaleske o apostol Pavle predupredingja kaj nekoj šaj te ovel previše gordo hem te dobinel i isto osuda sar o Beng (1. Tim. 3:6, 7). Adava šaj te slučinel pe sekaske amendar, bizi razlika dali siem neve ko čačipe ili služinaja e Jehovaske but berša. O gorda manuša tane sebična. O Satana probinela te kerel amen sebična agjaar so poviše ka koncentririna amen ki amende, namesto ko Jehova, posebno keda isi amen problemija. Na primer, dali nekogaš nekoj krivingja tut bašo nešto so na kergjan? Ili, dali nekoj postapingja tuja nepravedno? O Satana mangela te holjane e Jehovaske ili te phralenge. Hem ov mangela te misline kaj o problemi šaj te rešine le samo ako kerea o bukja ko tlo način, namesto te šune o vodstvo so dela tut o Jehova ko plo Lafi (Prop. 7:16, 20; w21.06 15, pas. 4-5).

O proroko o Agej dobingja jekh važno zadača taro Jehova. O Agej verojatno sine maškar okola so ko 537 berš a.a.e. taro Vavilon irangje pe ko Erusalim. Kratko otkeda resle ko Erusalim, akala verna manuša čhivgje o temeli e Jehovaskere khereskoro, ili e hrameskoro (Ezra 3:8, 10). Ama kratko palo adava, ola obeshrabringje pe hem čhinavgje te gradinen o hrami soske o manuša okolu lende protivinena pe sine lenge (Ezra 4:4; Agej 1:1, 2). Adaleske, ko 520 berš a.a.e. o Jehova vakergja e Ageeske te pomožinel e narodo te ovel palem revno hem te završinel o hrami (Ezra 6:14, 15). I cel tari e Ageeskiri poraka sine te bajrarel e Evreengiri vera ko Jehova. O lafija „o Jehova zapovedniko e vojskengoro“ sigurno but ohrabringje len. E Jehova isi le avtoriteti upri but bari vojska taro angelija, adaleske e Evreen valjani sine te ovel len doverba ki leste ako mangena sine te uspejnen (w21.09 15, pas. 4-5).

Avdive e Jehovaskere svedokija taro celo sveto uživinena ko čačutno mangipe hem jekhipe. Nijekh javer organizacija nane sar amende doborom paše. Amen siem sar jekh familija, iako avaja tari različno kultura ili rasa. Adava dikhela pe ko amare kongresija hem sostanokija. Akava pomožinela amenge panda poviše te ova uverime kaj obožavinaja e Jehova ko jekh prifatlivo način (Jovan 13:34). I Biblija pottikninela amen: „Te ovel tumen baro mangipe jekh jekheske“ (1. Pet. 4:8). Jekh način sar sikavaja asavko mangipe tano agjaar so prostinaja amenge hem trpinaja amen jekh jekhea. Isto agjaar, rodaja prilike te sikava darežlivost hem gostoprimlivost sarinenge ko sobranie, čak okolenge kola so šaj povredingje amen (Kol. 3:12-14). Asavko mangipe tano čače o najbaro dokaz bašo čačutne hristijanja (w21.10 22, pas. 13-14).

Dali šaj o isklučibe te pomožinel nekaske te meninel pe hem te kainel pe? Oja šaj. But džene so kerena sine seriozna grevija, vakerena kaj o isklučibe pomožingja lenge te haljoven kobor but grešingje, te kainen pe, te meninen plo način sar odnesinena pe hem te iranen pe ko Jehova (Evr. 12:5, 6). Te dikha jekh primer. Jekh pastiri primetinela kaj jekh taro leskere bakhre nasvalilo. Ov džanela kaj te šaj te sasljarel e bakhre taro adava nasvalipe, valjani te odvojnel le taro javera bakhre. Ama, o bakhre nane životne so mangena te oven korkori. Dali akava značinela kaj o pastiri tano preterano strogo hem lošno so odvojnela akale bakhre? Sigurno kaj na. Ov džanela kaj ako mukhela e nasvale bakhre te ovel maškar o javera bakhre, tegani ola da ka nasvaljoven. Adalea so odvojnela le, ov zaštitinela celo stado (w21.10 10, pas. 9-10).

Isi amen bari čest so šaj te ova delo tari jekh familija soj ko celo sveto, kote so sarine mangena pe. Mangaja so poviše džene zaedno amencar te obožavinen amare Devle. Adaleske, valjani te pazina ma te kera nešto so ka čhivel e javeren te mislinen lošno amare Dadeske e Jehovaske, ili leskere narodoske. Sekogaš trudinaja amen te postapina šukar, te šaj o manuša te mangen te služinen e Jehovaske. Adaleske so šunaja amare nebesno Dade, ponekogaš nesave šaj te kritikujnen amen, ili čak te progoninen amen. So ako daraja te kera e javerencar lafi bašo amaro veruvanje? Šaj te ova sigurna kaj o Jehova hem leskoro Čhavo ka pomožinen amenge. O Isus vakergja ple učenikonge kaj na valjani te sekirinen pe bašo adava sar ka keren lafi ili so ka phenen. Soske na? O Isus objasningja: „Soske ko adava momenti ka džanen so te vakeren, soske na kerena korkori lafi, nego o duho tumare Dadeskoro kerela lafi preku tumende“ (Mat. 10:19, 20; w21.09 24, pas. 17-​18).

O Mojsej koristingja jekh slično sporedba te šaj te sikavel kaj o Jehova zaštitinela amen sar jekh than garajbaske . Ov pišingja: „O Devel tano than garajbaske panda taro purane vremija, leskere večna vasta tane teli tute“ (5. Moj. 33:27). So sikavena amenge bašo Jehova o lafija „leskere večna vasta tane teli tute“? Keda o Jehova tano amaro than garajbaske, osetinaja amen sigurna. Ama, ponekogaš isi dive keda siem obeshrabrime hem nane amen sila te tergjova ko pre. So ka kerel o Jehova ko asavke dive? (Ps. 136:23). Ov ka čhivel ple vasta teli amende, ljubezno ka vazdel amen hem ka pomožinel amenge palem te ušta ko pre (Ps. 28:9; 94:18). Adava so džanaja kaj o Jehova sekogaš poddržinela amen, pomožinela amenge te na bistra kaj ov dela amen bereketi ko duj načinija. Prvo, bizi razlika kote živinaja džanaja kaj o Jehova sekogaš ka zaštitinel amen. Dujto, amaro manglo nebesno Dad but grižinela pe amenge (w21.11 6 pas. 15-​16).

O Isus džanlja kaj i nepravda ka čhivel ko ispit leskere učenikongiri vera. Te šaj te pomožinel lenge te istrajnen, ov vakergja lenge jekh sporedba koja soj tani pišimi ko lil Luka. O Isus ki adaja sporedba kergja lafi baši jekh udovica koja so uporno molinela sine jekhe nepravedno sudija baši pravda. Oj sine sigurno kaj lakiri upornost ka isplatinel pe. Hem čače, ko krajo o sudija šungja la. So sikljovaja amen taro akava? O Jehova nane nepravedno. Adaleske o Isus vakergja: „Nane li o Devel te kerel leskere birime te dobinen pravda, okola so rodena le dive hem rat?“ (Luka 18:1-8). Palo adava o Isus vakergja: „Keda ka avel o manušikano čhavo, dali ka arakhel asavki vera ki Phuv?“ Keda doživinaja nepravda, valjani te sikava kaj isi amen zorali vera sar adaja udovica, agjaar so ka ova strpliva hem istrajna. Ako isi amen asavki vera, šaj te ova sigurna kaj porano ili pokasno, o Jehova ka pomožinel amenge. Isto agjaar, valjani te verujna kaj e molitva isi la sila (w21.11 23 pas. 12; 24, pas. 14).

Ternalen, dali ponekogaš mislinena kaj e Jehovaskere merilija but ograničinena tumen? Baš adava mangela te mislinen o Satana. Ov mangela te dikhen ko okola soj tane ko buvlo drumo, soske izgledinela kaj ola sar te phene uživinena ko pumaro životo. Ov šaj te koristinel tle součenikon ili adava so dikhea ko internet te šaj te čhivel tut te misline kaj propuštinea nešto. O Satana mangela te misline kaj e Jehovaskere merilija na mukhena tut celosno te uživine ko životo. Ama ma bistre, o Satana na mangela okola soj tane ko „buvlo drumo“ te dikhen kaj ingarela len akava drumo (Mat. 7:13, 14). Ama tari javer strana, o Jehova dengja tut jasno slika bašo adava savi namera isi le tuja ako ačhovea ko „tesno drumo“ so ingarela dži ko životo (Ps. 37:29; Isa. 35:5, 6; 65:21-23; w21.12 23, pas. 6-7).

Džanaja kaj valjani te prostina, soske adava tano ispravno, ama šaj te ovel amenge pharo te kera adava. Ponekogaš o apostol Petar da šaj osetingja pe agjaar (Mat. 18:21, 22). So šaj te pomožinel amen? Prvo, razmislin bašo adava kobor but o Jehova prostinela tuke (Mat. 18:32, 33). Amen na zaslužinaja te prostinel amenge, ama ov spremno kerela adava (Ps. 103:8-10). Isto agjaar, siem „dužna te manga amen jekh jekhea“. Adaleske, nane amen izbor dali ka prostina ili na, amen siem dužna te prostina amare phralenge hem phenjenge (1. Jov. 4:11). Dujto, razmislin so slučinela pe keda prostinaja: Šaj te pomožina okoleske so grešingja amenge, ka arakha o jekhipe ko sobranie, ka zaštitina amaro amalipe e Jehovaja hem ka cida o pharipe taro amare pikje (2. Kor. 2:7; Kol. 3:14). Ko krajo, molin tut e Jehovaske, soske ov rodela amendar te prostina. Ma mukh o Satana te ruminel tlo šukar amalipe e phralencar hem e phenjencar (Ef. 4:26, 27). Valjani amenge e Jehovaskiri pomoš te šaj te ikera o mir ko sobranie (w21.06 22, pas. 11; 23, pas. 14).

O David našela sine te šaj te spasinel plo životo, soske o Saul, o mokjno izraelsko cari mangela sine te mudarel le. Keda e Davideske valjani sine hajbaske ov gelo ki diz Nov, kote so rodingja samo pandž mare (1. Sam. 21:1, 3). Pokasno, ov hem leskere manuša garavgje pe ki jekh peštera (1. Sam. 22:1). Sar arakhlilo o David ki asavki situacija? O Saul sine but ljubomorno e Davideske soske o manuša mangena le sine hem falinena le sine adaleske so pobedingja ko but vojne. O Saul isto agjaar džanlja kaj adaleske so na sine poslušno o Jehova otfrlingja le te ovel cari ko Izrael hem kaj o Jehova biringja e Davide te ovel o sledno cari (1. Sam. 23:16, 17). Ama o Saul panda sine cari hem sine le bari vojska hem but manuša kola so poddržinena le sine. Adaleske o David mora sine te našel te šaj te spasinel plo životo. Dali o Saul čače mislingja peske kaj šaj te džal protiv e Devleskiri namera te kerel e Davide cari? (Isa. 55:11). I Biblija na dela o odgovor. Ama ko jekh šaj te ova sigurna, o Saul korkori čhivgja pe ki jekh opasno situacija. Okola so borinena pe protiv o Devel sekogaš našavena! (w22.01 2, pas. 1-2).

O Isus dengja pestar sa ki služba. Ov sikavgja kaj mangela e manušen agjaar so koristinela sine sekoja prilika te šaj te sikavel len (Luka 19:47, 48). So pottikningja le te kerel adava? Le sine le sočuvstvo sprema lende. Ponekogaš, le hem leskere učenikon na sine len čak vreme te han maro soske but džene mangena sine te šunen le (Marko 3:20). Hem keda jekh manuš manglja te kerel e Isusea rakjate lafi, ov sine spremno te kerel adava. Pobaro delo taro manuša kola so ko početok šungje e Isuse na ule leskere učenikija, ama sarine ola dobingje temelno svedoštvo. Avdive, amen mangaja te da sarinenge prilika te šunen o šukar haberi (Dela 10:42). Te šaj te uspejna ko adava, amen šaj ka valjani te kera promene ki amari služba. Namesto te ikera amen ko jekh raspored amenge so odgovorinela, valjani te ova spremna te prilagodina amen te svedočina ko vreme keda verojatno ka arakha poviše manušen. Ako keraja agjaar, šaj te ova sigurna kaj o Jehova ka ovel bahtalo (w22.01 17 pas. 13-14).

Avdive bute dženenge tano pharo te sikaven doverba sprema okola so isi len nesavo avtoriteti. Ola but puti dikhena sar o vlade hem o zakonija zaštitinena e barvalen hem okolen so isi len mokj, a tari javer strana tane nepravedna sprema o čorole. Isto agjaar, but religiozna vodačija kerena lošna bukja hem adava kergja but manuša te našaven pumari doverba ko Devel. Adaleske keda proučinaja i Biblija nekasaja, valjani te pomožina leske te ovel le doverba ko Jehova hem ko phralja kaste so čhivgja te predvodinen. Džangjola pe, na valjani samo interesentija te sikljoven te ovel len doverba ko Jehova hem ki leskiri organizacija. Čak okola so beršencar tane ko čačipe na smejnena te bistren kaj e Jehovaskoro način sar kerela o bukja tano sekogaš najšukar. Ponekogaš slučinela pe nešto so šaj te čhivel ko ispit amari doverba ko Jehova (w22.02 2, pas. 1-2).