Maj

Te šaj pošukar te pendžara e Isuse, o Jehova vklučingja ko plo Lafi o štar evangelija — Matej, Marko, Luka hem Jovan. Akala štar lila sodržinena jekh istorisko izveštaj bašo e Isuseskoro životo hem služba. Ola vakerena amenge so vakergja o Isus, so kergja hem sar osetinela pe sine. Akala štar lila pomožinena amenge „šukar te dikha“ o primer e Isuseskoro. Ola sodržinena o trage kola so o Isus mukhlja len pali peste. Adaleske keda proučinaja o evangelija amen šaj pošukar hem pošukar te pendžara e Isuse. Agjaar, ka šaj ko sa te dža palo e Isuseskere čekorija. Te šaj te ovel amen celosno korist taro evangelija, mora te kera nešto poviše nego samo te čitina len. Valjani te odvojna amenge vreme šukar te proučina len hem hor te razmislina baši lende. (Sporedin Isus Navin 1:8.) Ker o izveštaija taro evangelija te oven tuke porealna. Dikh, šun hem osetin adava so slučingja pe ko adala izveštaija. Ko adava ka pomožinel tuke ako istražinea ko publikacie so dela len e Jehovaskiri organizacija (w21.04 4-5, pas. 11-13).

Vekoncar angleder te avel o Isus ki Phuv, o Jehova otkringja ko plo Lafi kaj o Mesija ka ovel izdajmo 30 srebrenikonge (Zah. 11:12, 13). Adava so ka izdajnel le ka ovel jekh taro leskere paše amala (Ps. 41:9). Isto agjaar, o proroko o Zaharija pišingja: „Khuv e pastire hem neka našen o bakhre taro stado“ (Zah. 13:7). Namesto te spotakninen pe taro akala nastanija, i vera e iskreno manušengiri valjani sine te ovel pozorali keda dikhle sar ispolningje pe akala proroštvija upro Isus. Dali isi isto problemi avdive da? Oja. Ko amaro vreme nekobor pendžarde Svedokija, čhinavgje te služinen e Jehovaske ule otpadnikija hem probingje javeren da te ciden pea. Ola širinena negativna izveštaija, informacie so ekvaš tane točna hem hovajba bašo e Jehovaskere svedokija ko novine, ko radio, ki televizija hem ko internet. Ama, o iskrena manuša na spotakninena pe taro adava. Namesto adava, ola džanena kaj i Biblija angleder prorokujngja kaj ka slučinen pe asavke bukja (Mat. 24:24; 2. Pet. 2:18-22; w21.05 11, pas. 12; 12-13, pas. 18-19).

I Biblija vakerela kaj leskoro narodo ka haljol pošukar o čačipe sar so ka nakhel o vreme (Kol. 1:9, 10). O Jehova otkrinela o čačipe hari pohari hem valjani strplivo te adžikera i svetlina e čačipaskiri te ovel sa posilno. Keda o Vodečko telo haljovela kaj valjani te kerel pe promena ko nesavo haljojbe ili ko način sar kerena pe sine nesave bukja, ola odma kerena adaja promena. But crkve avdive kerena promene ko ple sikljojba te šaj te ugodinen e manušenge hem te oven popaše e svetoja. Ama e Jehovaskere svedokija kerena promene te šaj te oven popaše e Devlea hem te obožavinen le isto sar so obožavingja le o Isus (Jak. 4:4). Amen na keraja promene adaleske so o manuša taro sveto meningje plo stavi, nego adaleske so haljovaja pošukar i Biblija. Amen mangaja o čačipe! (1. Sol. 2:3, 4; w21.10 22, pas. 12).

So šaj te kere ako osetinea tut korkori? Razmislin bašo adava sar o Jehova pomožinela tuke (Ps. 55:22). Akava ka pomožinel tuke te ovel tut ispravno stavi baši tli situacija. Isto agjaar, razmislin bašo adava sar o Jehova pomožinela e phralenge hem e phenjenge so osetinena pe korkori (1. Pet. 5:9, 10). O Hiroši, kova so but berša sine korkori ko čačipe, vakerela: „Adava so džanaja kaj sarine amen daja amaro najšukar te služina e Jehovaske, šaj te ohrabrinel okolen maškar amende soj tane korkori ko čačipe“. Isto agjaar, redovno molin tut, čitin i Biblija hem dža ko sostanokija. Mora te vakere e Jehovaske točno sar osetinea tut. Jekh taro najvažna bukja tano redovno te čitine e Devleskoro Lafi hem te razmisline bašo konkretna izveštaija so istakninena e Jehovaskoro mangipe sprema tute. Nesave hristijanja pamtinena stihija soj tane but utešna, sar na primer Psalm 27:10 hem Isaija 41:10. O javera šunena audio snimke taro materijali proučibaske keda spreminena pe bašo sostanokija ili keda čitinena i Biblija. Adava pomožinela lenge te na osetinen pe doborom osamena (w21.06 9-10, pas. 5-8).

Dali tugujnea adaleske so mulo tutar nekoj paše? Odvojn tuke vreme te kere pozorali tli vera ki nadež bašo voskresenie, agjaar so ka čitine bibliska izveštaija bašo okola so voskresningje. Dali tuke žal adaleske so nekoj tari tli familija tano isklučimo? Proučin te šaj te uverine tut kaj e Devleskoro ukor tano sekogaš najšukar. Bizi razlika savo problemi isi tut, dikh ko adava sar prilika te kere pozorali tli vera. Phrav e Jehovaske tlo vilo ki molitva. Namesto te cide tut, ačhov paše tle phralencar hem tle phenjencar (Izr. 18:1). Učestvujn ko aktivnostija so ka pomožinen tuke te istrajne, čak ako džikote kerea adava osetinea bari dukh hem rovela pe tuke (Ps. 126:5, 6). Ponadari da čitin i Biblija, dža ko sostanokija hem ki služba. Hem ponadari da razmislin bašo but šuže bereketija kola so o Jehova vetingja len tuke. Džikote dikhea sar o Jehova pomožinela tuke, tli vera ki leste ka bajrol panda poviše (w21.11 23, pas. 11; 24, pas. 17).

Ko savo način e Isuseskere učenikija tane sar „tikne“? E svetoske avdive tane važna o barvale, o poznata manuša hem okola so isi len baro avtoriteti. Ama obično maškar i Isuseskere učenikija nane asavke manuša. Adaleske o sveto mislinela kaj nane važna hem dikhela len sar „tikne“ (1. Kor. 1:27-29). Ama o Jehova na dikhela ki lende agjaar. Soske o Isus kergja lafi bašo „akala tikne“? Leskere učenikija pučle le: „Koj čače tano najbaro ko Carstvo soj ko nebo?“ (Mat. 18:1). Bute Evreenge ko adava vreme o avtoriteti hem o anav sine but važno. Jekh istražuvači vakerela: „E manušenge taro adava vreme najvažno buti ko životo sine te dobinen čest e javerendar, te oven poznata hem o javera te dikhen šukar ki lende“. O Isus džanlja kaj but Evreija mangena sine te oven považna hem pošukar taro javera. Adaleske, leskere učenikija valjani sine but te trudinen pe te čhinaven te razmislinen agjaar (w21.06 20, pas. 2; 21, pas. 6, 8; 22, pas. 9).

O apostol Pavle dengja šukar primer e starešinenge. Na primer, ov dengja sovet e phralenge taro Solun keda valjani sine. Sepak, ko pismo so pišingja lenge, o Pavle prvo pofalingja len bašo adava so kerena pottiknime tari vera, bašo lengoro trudo pottiknimo taro mangipe hem baši lengiri istrajnost. Ov isto agjaar razmislingja bašo lengere okolnostija agjaar so vakergja lenge kaj tano svesno kaj lengoro životo nane lokho hem kaj ola verno istrajnena ko progonstvija (1. Sol. 1:3; 2. Sol. 1:4). Ov čak vakergja lenge kaj tane primer e javere hristijanenge (1. Sol. 1:8, 9). Sigurno sine but bahtale so dobingje asavki pofalba taro Pavle! Sa akava sikavela kaj o Pavle but mangela sine e phralen. Adaleske ov šaj sine ko solduj pismija te del korisno sovet e phralenge taro Solun (1. Sol. 4:1, 3-5, 11; 2. Sol. 3:11, 12; w22.02 15 pas. 6).

Preku o hovavne religiozna vodačija o Satana vakerela kaj o Jehova tano surovo hem krivo bašo muke so cidena o manuša. Nesave čak vakerena kaj keda nesavo čhavo merela, o Devel lelja le soske valjangje leske poviše angelija ko nebo. Akalea ni hari na poštujnena e Devle. Ama amen džanaja kaj o Jehova tano Dad pherdo mangipaja. Nikogaš na keraja krivo e Devle keda isi amen pharo nasvalipe ili keda merela amendar nekoj so mangaja le. Namesto adava amen verujnaja kaj o Devel jekh dive ka sasljarel sa o nasvalipa hem ka vazdel e mulen. Adaleske, sarinenge so mangena te šunen vakeraja kaj o Jehova tano pherdo mangipe. Tegani o Jehova ka šaj te odgovorinel okoleske so asala leske (Izr. 27:11). O Jehova tano sočuvstvitelno Devel. Ov tano but tažno keda dikhela kaj mučinaja amen, bizi razlika dali adava tano taro progonstvo, nasvalipe ili nesovršenost (Ps. 22:23, 24). O Jehova haljola amari dukh. Ov mangela te čhinavel la hem ka kerel adava. (Sporedin 2. Moj. 3:7, 8; Isa. 63:9; w21.07 9-10, pas. 9-10.)

Panda hari o poslušna manuša ka dobinen i najbari čest — večno te mangen hem te obožavinen e Jehova! O Isus ka rešinel sa o problemija kola so ule adaleske so o Adam hem i Eva odlučingje te mukhen e Jehovaskere familija. O Jehova ka voskresninel milionja manušen hem ka del len prilika te ovel len večno životo hem sovršeno sastipe ko raj ki Phuv (Luka 23:42, 43). Keda o manuša so služinena e Jehovaske ka oven sovršena, sarine ka dobinen i slava baši koja so pišingja o David. Ako sian jekh taro „baro mnoštvo“, tegani isi tut but šuži nadež (Otk. 7:9). O Devel mangela tut hem mangela te ove delo tari leskiri familija. Adaleske de tutar sa te kere leskiri volja. Sekova dive neka oven tuke ki godi hem ko vilo e Devleskere vetuvanja. Cenin i prednost so isi tut te obožavine amare nebesno Dade, hem i nadež te slavine le zasekogaš! (w21.08 7, pas. 18-19).

O proroko o Eremija propovedingja poviše taro 40 berš, iako o manuša na mangle te šunen le hem protivinena pe sine leske. Ov doborom sine obeshrabrimo taro lengoro „asajbe hem vredžiba“ so manglja čak te otkažinel pe tari pli zadača (Erem. 20:8, 9). Ama o Eremija na otkažingja pe! So pomožingja leske te prodolžinel hem te ovel bahtalo ki služba? Ov koncentriringja pe ko duj važna bukja. Prvo, o Eremija vakerela sine e narodoske haberi kova so dela len sine nadež (Erem. 29:11). Dujto, o Jehova biringja le te kerel lafi leske ko anav (Erem. 15:16). Amen da avdive vakeraja haberi kova so dela nadež e manušenge, hem phiravaja e Jehovaskoro anav sar leskere Svedokija. Keda koncentririnaja amen ko akala bukja, amen šaj te ova bahtale, bizi razlika sar ka reagirinen o manuša. Adaleske, ma obeshrabrin tut, ili ma otkažin tut ako ola na napredujnena doborom sigate kobor so očekujngjan. Te šaj te kera učenikija, valjani te ova strpliva (Jak. 5:7, 8; w21.10 27, pas. 12-13).

Bizi razlika kobor vreme služinaja e Jehovaske amen mora ponadari da te bajrara hem te ikera amari vera zorali. Soske? Ako na pazinaja, amari vera šaj te slabonel. Sar so dikhlem, i vera temelinela pe ko dokazija bašo bukja so postojnena a našti te dikhen pe. A adava so našti te dikha, šaj sigate te bistra. Adaleske o Pavle vakergja kaj, ako nane amen vera, o grevo šaj lokhe te čhivel amen ki stapica. Tegani sar šaj te izbegina adaja stapica? (2. Sol. 1:3). Prvo, redovno molin e Jehova te del tut plo sveti duh. Soske? I vera tani osobina koja so avela taro sveti duh (Gal. 5:22, 23). Amen našti te bajrara amari vera ko Stvoriteli hem te ikera la zorali bizo leskoro sveti duh. Ako redovno molinaja e Jehova bašo leskoro duho, ov ka del le amenge (Luka 11:13). Šaj čak konkretno te molina le te del amen „poviše vera“ (Luka 17:5). Isto agjaar, redovno proučin e Devleskoro Lafi (Ps. 1:2, 3; w21.08 18-19, pas. 16-18).

O pophure šaj te oven but korisna ki e Jehovaskiri organizacija. Iako šaj nane više silna sar angleder, len isi len baro iskustvo so stekningje le beršencar. O Jehova šaj ponadari da but te koristinel len ko različna načinija. Na primer, e Mojsee sine le okolu 80 berš keda počmingja te služinel sar proroko hem vodači e Izraelcongoro. Keda e Daniele šaj sine le poviše taro 90 berš, o Jehova ponadari da koristinela le sine sar proroko. Slično, o Jovan keda pišingja o lil Otkrovenie šaj sine le okolu 90 berš. „O pravedno hem verno“ manuš, o Simeon, kratko tano spomnimo ki Biblija, ama o Jehova džanela sine koj tano hem nagradingja le adalea so dengja le i prednost te dikhel e Isuse sar bebe hem te prorokujnel baši leste hem baši leskiri daj (Luka 2:22, 25-35; w21.09 3-4, pas. 5-7).

O roditelija valjani te pazinen ma te sporedinen jekhe čhave e javerea, hem te na roden lendar poviše taro adava so šaj te keren. Ako o roditelija kerena adava ola šaj te obeshrabrinen pumare čhaven (Ef. 6:4). Jekh phen so vikinela pe Sačiko, vakerela: „Mi daj mangela sine te nakhav o ispitija bizi ni jekh greška, ama adava našti sine te kerav. Nakhle but berša otkeda završingjum e školaja, ama me ponadari da nekogaš pučava man, iako dava mandar sa dali adava tano dovolno e Jehovaske“. O cari o David vakergja kaj na rodela bukja kola soj leske „but bare“, ili bukja kola so našti te kerel len. Adaleske so sine ponizno hem skromno, ov sine zadovolno hem sine le andruno mir (Ps. 131:2). So šaj o roditelija te sikljoven taro e Davideskere lafija? O roditelija šaj te oven ponizna hem skromna agjaar so nane te očekujnen previše pestar, a ni taro pumare čhave. Ola šaj te pomožinen pumare čhavenge te ovel len doverba ki peste agjaar so ka pomožinen lenge te čhiven peske razumna celija sprema ple okolnostija hem sposobnostija (w21.07 21-22, pas. 5-6).

Na valjani te bistra kaj o Jehova sekole jekheske dengja slobodno volja. Akava značinela kaj šaj te birina dali ka šuna le ili na. Nesave čhaven na sine len roditelija so sine lenge šukar primer. Ama, ola odlučingje te služinen e Jehovaske hem ačhile leske verna. A javeren sine len roditelija kola so but trudingje pe te sikaven len te mangen e Jehova, ama keda barile mukhle o čačipe. Znači sekova jekh amendar mora te odlučinel dali ka služinel e Jehovaske (Is. Nav. 24:15). Adaleske, ako tumare čhave čhinavgje te služinen e Jehovaske, na valjani te mislinen kaj tumen sien kriva! Ponekogaš o roditeli mukhela o čačipe, pa čak ple familija (Ps. 27:10). Akava šaj te ovel but strašno e čhavenge kola so poštujnena sine pumare roditelen. Ternalen, ako jekh taro tumare roditelija tano isklučimo, but amenge žal! Oven sigurna kaj o Jehova da džanela kobor tumenge pharo. Ov mangela tumen hem ceninela tumari vernost. Ma bistren kaj tumen na sien odgovorna bašo tumare roditelengere odluke (w21.09 27, pas. 5-7).

Keda nekoj tano isklučimo, šaj te sporedina le jekhe nasvale bakhrea kova so šaj te zarazinel o stado. Ov tano nasvalo ki duhovna smisla (Jak. 5:14). Isto sar nesave fizička nasvalipa so šaj te oven but zarazna, slično o duhovno nasvalipa šaj te ovel but zarazno. Adaleske, ko nesave slučaija okova soj duhovno nasvalo mora te odvojnel pe, javere lafencar te ovel isklučimo taro sobranie. Asavko ukor sikavela e Jehovaskoro mangipe sprema okola soj verna taro leskoro stado, hem šaj te pomožinel e grešnikoske te haljol po grevo hem te kainel pe. Džikote tano isklučimo, šaj te ovel prisutno ko sostanokija, kote so šaj duhovno te hraninel pe hem palem te kerel pli vera zorali. Ov ponadari da šaj te dobinel literatura koja so šaj te proučinel la hem te dikhel o JW Broadcasting^®. Hem keda o starešine ka dikhen kaj ov kerela promene, ola šaj te den le sovet hem te pomožinen leske te ovel palem e Jehovaskoro svedoko (w21.10 10, pas. 9, 11).

Avdive, amen obožavinaja e Jehova sar o hristijanja taro prvo veko. Na primer, organizirime siem ko slično način sar adala hristijanja, isi amen pokrainska nadglednikija, starešine hem sluga pomošnikija (Fil. 1:1; Tit 1:5). Hem sar lende, amen da poštujnaja e Jehovaskere zakonija bašo seks hem brako, baši svetost e rateskiri hem mangaja te zaštitina o sobranie taro grešnikija so na kainena pe (Dela 15:28, 29; 1. Kor. 5:11-13; 6:9, 10; Evr. 13:4). E Devleskoro Lafi jasno vakerela amenge kaj isi samo „jekh vera“ koja soj prifatimi taro Devel (Ef. 4:4-6). Koja bari čest isi amen so siem delo taro e Jehovaskoro narodo, hem so džanaja o čačipe bašo Jehova hem baši leskiri namera. Adaleske, ponadari da ov cvrsto uverimo kaj arakhljan o čačipe (w21.10 22-23, pas. 15-17).

O cari o Josafat soočingja pe bare problemea. Jekh bari vojska taro Amoncija, Moavcija hem manuša taro planinsko podračje taro Seir, zakaningje pe leske, leskere familijake hem leskere narodoske (2. Let. 20:1, 2). So kergja o Josafat? Ov rodingja pomoš taro Jehova hem sila. E Josafateskiri ponizno molitva soj pišimi ko 2. Letopisi 20:5-12, sikavela amenge kobor bari doverba sine le ko Jehova. O Jehova odgovoringja e Josafateske preku jekh leviti so vikinela pe sine Jaziel. O Jehova vakergja leske o lafija taro avdisutno stiho. Adaleske so sine le bari doverba ko Devel, o Josafat kergja agjaar sar so sine leske vakerdo. Keda ov hem o narodo gele ki borba, na čhivgja ko prvo redo e najvešta vojnikon, nego e peačen kola so na sine len nisavo oružje. O Jehova ikergja pe ko plo lafi so dengja le e Josafateske — ov pobedingja e dušmanen (2. Let. 20:18-23; w21.11 15-16, pas. 6-7).

Sar so dikhlem angleder, keda isi amen nevolje, šaj te ova sigurna kaj o Jehova ka poddržinel amen te šaj te ačhova leske verna (2. Kor. 4:7-9). Šaj te ova sigurna kaj o Jehova sekogaš ka sikavel amenge plo verno mangipe, soske i Biblija vakerela: „E Jehovaskiri jakh tani upro okola so darana lestar, upro okola so adžikerena leskoro verno mangipe“ (Ps. 33:18-22). Angleder te počmina te služina e Jehovaske, o Devel sikavgja amenge mangipe sar sa e manušenge ko celo sveto. Ama sar leskere sluge, amen isto agjaar isi amen korist taro leskoro verno mangipe. Adava mangipe pottikninela le te zaštitinel amen ple vastencar. Ov sekogaš ka ikerel amen paše uzi peste hem ka ispolninel pli but šuži namera amencar. Ov mangela večno te ova leskere amala (Ps. 46:1, 2, 7). Adaleske, bizi razlika save nevolje isi amen, o Jehova ka del amen i sila so valjani amenge te šaj te ačhova leske verna (w21.11 7, pas. 17-18).

Poviše džene amendar džanaja nekas so beršencar ikergja holi ple kolegaja, součenikoja ili nekasaja tari pli familija. Setin tut kaj e Josifeskere phralja ikergje holi sprema leste, hem ko krajo ikalgje la upri leste (1. Moj. 37:2-8, 25-28). Ama o Josif na ponašingja pe lencar lošno. Le sine le prilika te iranel lenge bašo adava so kergje leske, ama ov sepak sikavgja lenge milost. Na ikergja holi sprema lende. Namesto adava, ov postapingja sprema o sovet so pokasno sine pišimo ki 3. Mojseeva 19:18 (1. Moj. 50:19-21). O hristijanja kola so mangena te keren e Devleskiri volja valjani te džan palo e Josifeskoro primer kova so prostingja ple phralenge namesto te ikerel holi sprema lende hem te iranel lenge. Adava vakergja le o Isus da ki pli najpendžardi molitva keda vakergja kaj valjani te prostina okolenge so grešingje amenge (Mat. 6:9, 12). Isto agjaar o apostol Pavle dengja sovet e hristijanenge: „Ma odmazdinen tumen, me mangle“ (Rim. 12:19; w21.12 11, pas. 13-14).

Kasno rakjate ko 14 Nisan 33 berš a.e., o Isus gelo ki Getsemansko gradina. Adathe vakergja e Jehovaske sa so pašljola leske ko vilo (Luka 22:39-44). Ko adava pharo vreme, o Isus asvencar molinela pe sine hor taro vilo (Evr. 5:7). Bašo so molingja pe o Isus ki adaja posledno rat angleder te merel? Molingja pe baši sila te šaj te ačhol verno e Jehovaske hem te kerel leskiri volja. O Jehova šungja ple Čhaveskiri muka džikote molinela pe sine hem bičhalgja leske jekh angeli te šaj te del le sila. O Isus sine svesno baši bari odgovornost koja so sine le — te posvetinel ple Dadeskoro anav. O Jehova šunela sine keda o Isus taro vilo molinela pe sine leske. Soske? Adaleske so e Isuseske sine najvažno te ačhovel verno ple Dadeske hem te posvetinel leskoro anav. Ako amenge da tano najvažno te kera o isto e Jehovaske, tegani ka odgovorinel ko amare da molitve (Ps. 145:18, 19; w22.01 18, pas. 15-17).

But džene avdive spotakninena pe adaleske so siem neutralna ki politika. Ola očekujnena amendar te glasina ko izborija. Ama, ako amen birinaja manuše te vladinel amencar, tegani odbinaja e Jehova (1. Sam. 8:4-7). O manuša isto agjaar mislinena kaj valjani te gradina škole hem bolnice hem te kera javera bukja so ka pomožinen e manušenge. Ola spotakninena pe adaleske so amen koncentririnaja amen ko propovedibe, a na te rešina o problemija so isi ko sveto. Sar šaj te na spotaknina amen? (Mat. 7:21-23). Amen glavno valjani te koncentririna amen te kera adava so zapovedingja amenge o Isus. Na valjani te dozvolina i politika hem o problemija taro akava sveto te len amaro vnimanie. Amen mangaja e manušen hem grižinaja amen bašo lengere problemija. Ama, amen džanaja kaj najšukar šaj te pomožina lenge adalea so ka sikava len bašo e Devleskoro Carstvo hem ka pomožina lenge te oven paše amala e Jehovaja (w21.05 7, pas. 19-20).

Iako but vladetelija taro narodija avdive vakerena kaj služinena e Devleske, ola na mangena te otkažinen pe tari pli mokj hem avtoriteti. Isto sar o vladetelija ko e Isuseskoro vreme, o avdisutne da vladetelija protivinena pe e Jehovaskere Pomazanikoske, agjaar so napadinena leskere verna sledbenikon (Dela 4:25-28). So kerela o Jehova? O Psalm 2:10-12 dela amen o odgovor: „Adaleske, tumen o carija, postapinen razumno! Prifatinen o ukor, tumen o sudie tari phuv! Daran taro Jehova hem služinen leske, hor poštujnen le bahtalipaja! Poštujnen e čhave te šaj o Devel te na holjanel hem te na meren, soske leskiri holi šaj sigate te thabljol. Bahtale tane sa okola so o Devel lenge than garajbaske“. O Jehova ljubezno mukhela akale protivnikonge vreme te šaj te anen i ispravno odluka. Ola panda šaj te promeninen pe hem te prifatinen e Jehovaskoro Carstvo. Ama ačhilo panda hari vreme (Isa. 61:2). Nikogaš dži akana na sine doborom itno o manuša te džanen o čačipe hem te birinen te služinen e Jehovaske (w21.09 15-16, pas. 8-9).

O Pavle manglja te istakninel kaj valjani te ova zadovolna e materijalna bukjencar so isi amen (Fil. 4:12). I najvažno buti so isi amen tano amaro amalipe e Devlea, a na nesavi materijalno buti so isi amen (Avak. 3:17, 18). Razmislin bašo adava so vakergja o Mojsej e Izraelconge otkeda nakhle 40 berš ki pustina: „O Jehova, tlo Devel, dengja tut bereketi ko sa so kergjan... Akala 40 berš, o Jehova, tlo Devel sine tuja, hem ništo na falingja tuke“ (5. Moj. 2:7). Ko adala 40 berš, o Jehova dengja e Izraelconge mana te šaj te ovel len hajbaske. Lengere šeja — o ista šeja kolencar so iklile taro Egipet — nikogaš na pharavdile (5. Moj. 8:3, 4). O Jehova ka ovel bahtalo ako sikljovaja te ova zadovolna. Ov mangela te ova blagodarna čak bašo tikne bukja so dobinaja len hem te dikha ki lende sar poklon lestar (w22.01 5, pas. 10-11).

Tumen o roma šaj but te sikljoven taro Josafat. Isi tumen odgovornost te grižinen tumen tumare familijake. Adaleske, dena tumendar sa te šaj te zaštitinen len hem te grižinen tumen lenge. Keda isi tumen problemija, šaj mislinena kaj sien dovolno sposobna korkori te rešinen len. Ama, na valjani te ovel tumen doverba ki tumari sila. Namesto adava, molinen tumen e Jehovaske baši pomoš keda sien korkori. Isto agjaar, taro vilo molinen tumen zaedno tumare romnjencar. Roden vodstvo taro Jehova agjaar so ka proučinen i Biblija hem o publikacie kola so avena tari e Devleskiri organizacija, hem primeninen o sovetija so arakhena len adathe. O javera šaj nane te složinen pe tumencar keda ka anen odluke so temelinena pe ki Biblija. Šaj ka vakeren tumenge kaj o pare hem o bukja so šaj te kinen len tane najšukar zaštita tle familijake. Ama ma bistren o primer taro cari o Josafat (2. Let. 20:1-30). Le sine le doverba ko Jehova hem adava sikavgja le ple postapkencar. O Jehova na mukhlja adale verno manuše, a nane te mukhel ni tumen (Ps. 37:28; Evr. 13:5; w21.11 15 pas. 6; 16, pas. 8).

O Devel kergja amen sprema plo liko, adaleske očekujnaja o javera te postapinen pravedno amencar hem e javerencar (1. Moj. 1:26). Ama, adaleske so siem nesovršena šaj pogrešno te dikha ko bukja čak keda mislinaja kaj džanaja sa o informacie. Na primer, setin tut kobor sine razočarimo o Jona keda o Jehova sikavgja milost e manušenge tari Ninevija (Jona 3:10 — 4:1). Ama razmislin so slučingja pe adaleske so o Jehova sikavgja lenge milost. Poviše taro 120.000 Ninevijcija kola so kaingje pe sine spasime. Sprema adava, o Jona sine adava so pogrešno proceningja e manušen, a na o Jehova. O Jehova nane dužno te objasninel e manušenge soske anela nesave odluke. Točno tano adava kaj o Jehova angleder dozvolingja ple slugenge te vakeren plo mislenje bašo nesave odluke so angja len ili so mangela sine te anel len (1. Moj. 18:25; Jona 4:2, 3). Ponekogaš čak objasningja soske angja nesave odluke (Jona 4:10, 11). Sepak, e Jehovaske na valjani amari dozvola — ni angleder te anel nesavi odluka a ni palo adava (Isa. 40:13, 14; 55:9; w22.02 3-4, pas. 5-6).

Amen ponašinaja amen sar najtikne keda dikhaja e javeren sar pobare amendar (Fil. 2:3). So poviše trudinaja amen te razmislina agjaar doborom pohari ka spotaknina e javeren. Sa amare phralja hem phenja tane pošukar ko nešto amendar. Adava lokhe šaj te dikha le keda koncentririnaja amen ko lengere šukar osobine. Valjani te primenina o sovet kova so o apostol Pavle dengja le e phralenge taro Korint: „So kerela tut pošukar taro javer, hem soj adava so isi tut a na primingjan le? A ako primingjan le soske falinea tut sar te phene na primingjan le?“ (1. Kor. 4:7). Adaleske nikogaš na bi mangaja o javera te falinen amen ili te dikhen ki amende sar pobare. Na primer, jekh phral kova so ikerela but šukar govorija, ili jekh phen kola so isi la but bibliska kursija, valjani sekogaš te del i falba e Jehovaske bašo adava so šaj te kerel (w21.06 22, pas. 9-10).

Bute Svedokonge ovela sa popharo hem popharo te arakhen e manušen khere. Nesave objavitelija živinena ko thana ili zgrade kote so isi obezbeduvanje. Adathe šaj isi čuvari kova so na mukhela te khuvel nikoj andre ako nane le pokana taro stanari. Javera objavitelija našti arakhena bute manušen khere ili isi len podračje kote so živinena hari manuša. Ola šaj patujnena but vreme te šaj te arakhen jekhe stanare, a ov šaj nane ni khere. Ako isi amen asavke predizvikija, na valjani te otkažina amen. Trudin tut te arakhe e manušen ko različno vreme. Ka arakha poviše manušen ako propovedinaja ko vreme keda ola najverojatno tane khere. Ko krajo, sekova jekh nekogaš valjani te iranel pe khere! But phralja hem phenja propovedinena paloručko ili akšameske adaleske so šaj te arakhen poviše manušen. Isto agjaar, o stanarija ko adava vreme verojatno tane poopuštime hem pospremna te keren amencar lafi (w21.05 15, pas. 5, 7).

Dali isi isto problemi avdive da? Oja. But džene tane razočarime taro e Jehovaskere svedokija adaleske so na slavinena lencar zaedno o proslave so nane ko sklad e Biblijaja, sar na primer o bijando dive ili o Božiko. Javera holjanena keda e Jehovaskere svedokija na slavinena lencar o nacionalna praznikija ili keda na kerena o običaija parujbaske so nane ko sklad e Biblijaja. Adala so spotakninena pe taro e Jehovaskere svedokija taro akala pričine, šaj čače verujnena kaj o Devel prifatinela lengoro način sar obožavinena le. Ama, ola našti te ugodinen leske ako poviše mangena o tradicie taro akava sveto namesto o čista sikljojba so arakhljona ko e Devleskoro Lafi (Mar. 7:8, 9). Sar šaj te na spotaknina amen? Valjani but te manga e Jehovaskere zakonija hem leskere načelija (Ps. 119:97, 113, 163-165). Keda mangaja e Jehova, ka otfrlina sa o tradicie so ov na prifatinela len. Nane te dozvolina ništo te ovel považno taro amaro mangipe sprema o Devel (w21.05 6, pas. 15-16).

Sar šaj te primenina o sovet taro apostol Pavle? Valjani ponadari da amari vera te kera zorali adalea so redovno ka proučina, stalno ka molina amen, hem ka ova zafatime ki služba koja so dengja la amenge o Jehova (2. Tim. 4:4). Ako isi amen vera, tegani nane te dara keda šunaja lošna informacie bašo e Jehovaskere svedokija (Isa. 28:16). Amaro mangipe sprema o Jehova, sprema leskoro Lafi hem sprema amare phralja hem phenja ka pomožinel amenge te na spotaknina amen taro adala so čhinavena te služinen e Jehovaske. Ko e Isuseskoro vreme but džene spotakningje pe hem otfrlingje le. Ama, but javera džene prifatingje le. Maškar lende sine najhari jekh členi taro evrejsko Sudsko sovet hem čak „but sveštenikija“ (Dela 6:7; Mat. 27:57-60; Mar. 15:43). Avdive da milionja manuša na spotakninena pe. Soske? Adaleske so ola džanena hem mangena o čačipa so arakhljona ki Biblija. E Devleskoro Lafi vakerela: „Baro mir isi okolen so mangena tlo zakoni, ništo našti te spotakninel len“ (Ps. 119:165; w21.05 13, pas. 20-21).

O apostol Pavle džanlja kaj sa so kergja ki služba bašo Jehova na kergja le ple silaja, nego e Devleskere silaja. Preku plo sveti duh, o Jehova dengja e Pavleske sila te kerel pli služba, iako sine le progonstvo, sine phanlo hem sine le javera problemija. E Timoteeske, kova so sine e Pavleskoro poterno sorabotniko, isto agjaar valjangja leske sila taro Devel te šaj te kerel pli služba. O Timotej džala sine e Pavlea ko misionerska patuvanja. Osven adava, o Pavle bičhalgja le ko javera da patuvanja te posetinel hem te ohrabrinel e phralen ko javera sobranija (1. Kor. 4:17). O Timotej šaj mislingja kaj nane doborom sposobno bašo adava. Hem, šaj adaleske o Pavle vakergja leske: „Nikoj na valjani te na poštujnel tut adaleske so sian terno“ (1. Tim. 4:12). Adava vreme e Timotee sine le „karo ko telo“ — često sine nasvalo (1. Tim. 5:23). Ama, o Timotej džanlja kaj e Jehovaskoro sveti duh ka del le sila te šaj te propovedinel o šukar haberi hem te služinel ple phralenge (2. Tim. 1:7; w21.05 21, pas. 6-7).

O načelo so arakhljola ko Jakov 1:19 posebno važinela okolenge so dena sovet. Ov pišingja: „Sekova manuš valjani te ovel spremno te šunel, a pohari te kerel lafi, hem te na holjanel sigate“. Jekh starešina šaj te mislinel peske kaj džanela sa so slučinela pe. Ama dali tano adava agjaar? Ko Izreki 18:13 pišinela: „Koj odgovorinela angleder te šunel, adava tano leske glupost hem ladž“. Ako mangaja te džana taro so nakhela nekoj, najšukar tano lično te puča le. Adava značinela te šuna le angleder te kera lafi. O starešine šaj te pučen: „Sar nakhea? Sar šaj te pomožinav tuke?“ Ako o starešine odvojnena peske vreme te doznajnen so slučinela pe e phralencar hem e phenjencar, tegani ka šaj pošukar te pomožinen lenge hem te ohrabrinen len. Te de korisno sovet na značinela samo te čitine nekobor bibliska stihija hem te vakere so valjani te kerel pe. Amare phralja hem phenja valjani te osetinen kaj grižinaja amen lenge, kaj haljovaja len hem kaj mangaja te pomožina lenge (w22.02 17 pas. 14-15).