Juni

O životo tano but pharo e udovicakoro hem izgleda nane la dovolno pare te kinel peske osnovna bukja živibaske. Ama, oj džala ko jekh taro kase hem bizo nekoj te primetinel mukhela duj tikne pare, kola so edvaj šungjona keda perena ki kasa. O Isus džanela kaj oj mukhlja duj lepte — o najtikne pare so koristinena pe sine ko adava vreme. Adale parencar našti sine te kinel pe ni i najeftino čirikli hajbaske. O Isus tano but vooduševimo tari akaja udovica. Adaleske, ov vikinela ple učenikon, sikavela lenge e udovica hem vakerela lenge: „Akaja čoroli udovica mukhlja poviše taro sa o javera“. Palo adava objasninela: „Sarine ola [posebno o barvale manuša] mukhle taro adava so sine len poviše, ama oj taro plo čorolipe dengja sa so sine la živibaske“ (Marko 12:43, 44). Keda akaja verno udovica dengja o posledna pare adava dive, oj sikavgja kaj isi la doverba ko Jehova kaj ov ka grižinel pe lake (Ps. 26:3; w21.04 6, pas. 17-18).

Džikote o Isus sine ki Phuv, le sine le pozitivno stavi sprema i služba hem manglja leskere sledbenikija da te ovel len o isto stavi (Jovan 4:35, 36). Keda ov sine ple učenikoncar ola revno propovedinena sine (Luka 10:1, 5-11, 17). Ama, keda astargje hem mudargje e Isuse, leskere učenikija nesavo vreme našavgje pumari želba te propovedinen (Jovan 16:32). Otkeda o Isus voskresningja, ov ohrabringja len te koncentririnen pe ko propovedibe. Hem, otkeda ov irangja pe ko nebo, ola propovedingje doborom revno so lengere dušmanja žalingje pe sar so pišinela ko avdisutno stiho. O Isus vodingja e hristijanen taro prvo veko keda propovedinena sine, hem o Jehova pomožingja lenge. Adaleske but manuša prifatingje lengiri poraka. Na primer, ki Pedesetnica 33 berš a.e., krstingje pe okolu 3.000 manuša hem o broj e učenikongoro bajrovela sine sa poviše (Dela 2:41; 6:7). Ama, o Isus prorokujngja kaj but poviše manuša ka prifatinen o šukar haberi ko posledna dive (Jovan 14:12; Dela 1:8; w21.05 14, pas. 1-2).

Dali setinea tut ko momenti keda haliljan kaj arakhljan o čačipe tari Biblija? Mislingjan kaj sekova jekh ka mangel te prifatinel o bukja kolende so tu počmingjan te verujne. Sian sine uverimo kaj o šukar haberi tari Biblija ka del len pobahtalo životo akana, hem but šuži nadež baši idnina (Ps. 119:105). Adaleske, tu vakergjan sa te amalenge hem te familijake bašo čačipa so sikliljan len. Ama so ulo? Sian sine iznenadimo adaleske so but džene odbingje te šunen adava so vakergjan lenge. Na valjani te ova iznenadime keda o javera odbinena o haberi so propovedinaja le. Ko e Isuseskoro vreme pobaro delo taro manuša odbingje te šunen le, iako kerela sine čudija kolencar so sikavela sine kaj isi le e Devleskiri poddrška. Na primer, o Isus voskresningja e Lazare — jekh čudo kova so leskere protivnikija našti sine te vakeren kaj na slučingja pe. Sepak o evrejska verska vodačija na prifatingje e Isuse sar Mesija. Ola čak mangle te mudaren e Isuse hem e Lazare (Jovan 11:47, 48, 53; 12:9-11; w21.05 2, pas. 1-2).

Trudin tut te dža redovno ko sostanokija. I programa ka ohrabrinel tut hem isto agjaar, pošukar ka zapoznajne e phralen hem e phenjen. Ov amal e manušencar taro sobranie so šaj te sikljove lendar. Ola šaj te oven poterne tutar ili pophure ili te aven taro javera kulture. I Biblija vakerela amenge kaj i mudrost šaj te arakhel pe maškar o pophure (Jov 12:12). A o pophure da šaj te sikljon taro verna terne ko sobranie. O David sine but poterno taro Jonatan, ama adava na čhinavgja len te oven paše amala (1. Sam. 18:1). O David hem o Jonatan pomožingje jekh jekheske te služinen e Jehovaske ko but phare situacie (1. Sam. 23:16-18). I Irina, jekh phen koja soj tani korkori ko čačipe, vakerela: „Amare phralja hem phenja šaj čače te oven amenge amari duhovno familija. O Jehova šaj te koristinel len te pomožinen amenge keda amenge potrebno“. Tle amala mangena te ohrabrinen tut hem te poddržinen tut, ama tu valjani te vakere lenge sar šaj te keren adava (w21.06 10-11, pas. 9-11).

O Isus vakergja lenge jekh primer bašo jekh cari hem leskoro robo. O cari prostingja baro dugo e roboske kova so ov nikogaš našti sine te iranel le, pokasno adava isto robo na manglja te prostinel but potikno dugo javere roboske. Ko krajo o cari frdingja ko zatvor akale robo so na sine milostivo. Adava so kergja o robo na angja šteta samo leske, nego e javerenge da. Prvo, bizi nisavi žal „frdingja e javere robo ko zatvor džikote na irangja leske o dugo“. Dujto, voznemiringja e javere robon kola so dikhle adava. O Isus vakergja: „Keda o javera robija dikhle so slučingja pe, but razočaringje pe“ (Mat. 18:30, 31). Slično, amare postapke vlijajnena upro javera. So šaj te slučinel pe ako nekoj na ponašinela pe amencar šukar hem amen na mangaja te prostina leske? Prvo, ka dukhava le adalea so nane te manga te prostina leske hem ka sikava leske kaj na mangaja le. Dujto, ka čhiva e javeren taro sobranie ki nezgodno situacija keda ka primetinen kaj na siem ko mir adale phralea ili phenjaja (w21.06 22, pas. 11-12).

O manuša sine stvorime sprema e Devleskoro liko, ama o Satana mangela te čhivel len te keren nemoralna bukja. Keda o Devel ko e Noeskoro vreme „dikhlja kaj o lošnipe e manušengoro ki phuv tano baro... pelo pišmani so kergja e manuše ki Phuv hem dukhandilo le ko vilo“ (1. Moj. 6:5, 6, 11). Dali ottegani o sveto ulo pošukar? Dikhjola pe kaj na! E Satanaske tano but milo keda dikhela sar o manuša kerena nemoral na samo manušencar taro isto pol, nego hem manušencar taro sprotivno pol (Ef. 4:18, 19). Ov tano posebno bahtalo keda šaj te čhivel nekas so obožavinela e Jehova te kerel seriozno grevo. Adaleske so o Satana vladinela upri phuv, na samo so „o manuš vladinela upro manuš ki leskiri šteta“, nego isto agjaar na grižinela pe šukar e Phuvjake hem e životnenge sar so rodingja o Jehova (Prop. 8:9; 1. Moj. 1:28). Savo tano o rezultati? Nesave naučnikija vakerena kaj e manušengere postapke šaj te anen dži ko adava jekh milioni vrste životne hem rastenija te oven uništime bašo nekobor berša (w21.07 12, pas. 13-14).

Ama, nesave sluge e Devleskere preterano osetinena pe kriva bašo greške so kergje len angleder. Lengoro vilo so osudinela len vakerela lenge kaj o Jehova nikogaš našti te prostinel lenge — bizi razlika kobor kainena pe. Ako borinea tut asavke čuvstvoncar, ka pomožinel tuke adava so ka haljove kaj o Jehova tano spremno te sikavel verno mangipe ple slugenge. O Jehova ka pomožinel amen te ovel amen čisto sovest hem bahtale te služina leske soske o „rat e Isuseskoro, leskere Čhaveskoro, čistinela amen taro sekova grevo“ (1. Jov. 1:7). Ako sian obeshrabrimo baši nesavi nesovršenost, setin tut kaj o Jehova tano spremno hem edvaj adžikerela te prostinel e grešnikoske so kainela pe. Primetin sar o psalmisti o David povrzingja o verno mangipe e prostibaja: „Sar soj o nebo poučo tari phuv agjaar tano baro leskoro verno mangipe sprema okola so darana lestar. Kobor soj dur o istok taro zapad doborom dur ov cidela amendar amare greške“ (Ps. 103:11, 12; w21.11 5-6, pas. 12-13).

O hristijanska roma mora te poštujnen pumare romnjen (1. Pet. 3:7). Adava značinela te sikavel pe lenge posebno vnimanie hem cenenje. Na primer, jekh rom poštujnela ple romnja agjaar so sikavela kaj tani leske važno. Na rodela latar poviše taro adava so šaj te del hem isto agjaar, na sporedinela la javere džuvlencar. Sar ka osetinel pe i romni ako o rom sporedinela la e javerencar? E Rozakoro rom, kova so nane e Jehovaskoro svedoko, često sporedinela la e javere džuvlencar. Leskere gruba lafija kergje na samo te osetinel pe kaj na vredinela nego isto agjaar te sumninel pe dali o Jehova čače mangela la. Oj vakerela: „Valjani stalno te uverinav man kaj o Jehova ceninela man“. Ama, jekh rom soj Svedoko sikavela kaj poštujnela ple romnja. Ov tano svesno kaj ako kerela agjaar adava ka vlijajnel šukar upro leskoro odnos e romnjaja hem upro leskoro amalipe e Jehovaja. Jekh rom so poštujnela ple romnja, falinela la hem vakerela lake kaj mangela la (w21.07 22, pas. 7-8).

Dali ka razočarine tut ako adžikerea paketi so čače valjani tuke, a na resela ko vreme keda očekujnea le? Ama ako doznajnea kaj isi šukar pričine soske na reslja, verojatno ka ove strplivo hem spremno ka adžikere. Ko Izreki 13:11 pišinela bašo jekh primer kova so sikavela kobor tano važno te ova strpliva. Athe phenela: „O barvalipe so sigate dobinela pe našavgjovela, a o barvalipe so khedela pe hari po hari ka bajrol sa poviše“. So sikljovaja taro akava stiho? Jekh mudro manuš na sigjarela, ov kerela o bukja strplivo hem tegani isi le šukar rezultatija. O Izreki 4:18 vakerela amenge kaj „o drumo e pravednikongoro tano sar jekh silno sabalutni svetlina, koja so ovela sa posilno hem posilno sa džikote na phravgjola o dive“. Akala lafija jasno sikavena kaj o Jehova hari po hari otkrinela pli namera ple narodoske. Ama akava stiho isto agjaar pomožinela amenge te haljova o način sar jekh hristijani duhovno napredujnela. Te šaj nekoj duhovno te napredujnel valjani leske vreme (w21.08 8, pas. 1, 3-4).

So popaše avela o krajo akale svetoskoro, doborom poviše buti isi amen (Mat. 24:14; Luka 10:2; 1. Pet. 5:2). Sarine amen mangaja te služina e Jehovaske so šaj poviše. But džene bajrarena pli služba. Nesave mangena te služinen sar pionerija. Javera mangena te služinen ko Betel ili ki izgradba ko teokratska objektija. Hem but phralja trudinena pe te ispolninen o uslovija te šaj te služinen sar sluga-pomošnikija ili starešine (1. Tim. 3:1, 8). O Jehova tano but bahtalo keda dikhela kaj leskoro narodo tano spremno te služinel leske! (Ps. 110:3). Dali sian obeshrabrimo adaleske so panda na ispolningjan nesavi tli duhovno cel? Ako oja, molin tut e Jehovaske hem vaker leske so mučinela tut (Ps. 37:5-7). Isto agjaar, šaj te puče nesave zrela phralen te den tut predlogija bašo adava sar te ove pošukar ko tle zadače hem palo adava, trudin tut te primenine lengoro sovet. Ako kerea agjaar, tegani ka šaj te ispolnine tli cel (w21.08 20, pas. 1; 21, pas. 4).

I udovica i Ana, sine la 84 berš, ama „nikogaš na propuštinela sine te džal ko hrami“. Adaleske o Jehova nagradingja la agjaar so oj ki jekh prilika dikhlja e Isuse keda sine bebe. O Simeon hem i Ana sine but skapocena e Jehovaske (Luka 2:36-38). Ko amaro vreme, but pophure sluge tane šukar primer e poternenge. Amen but ka ohrabrina amen ako odvojnaja lenge vreme, pučaja len pučiba hem ako šunaja len džikote vakerena amenge o šuže iskustvija so doživingje len ki e Jehovaskiri organizacija. Amare pophure phralja hem phenja tane but važna ki e Jehovaskiri organizacija. Ola dikhle sar o Jehova ko različna načinija dengja bereketi ple organizacijake hem lenge. Ola siklile but važna pouke taro greške so kergje len ko pumaro životo. Dikh ki lende sar „izvor tari mudrost“ hem sikljov taro lengoro iskustvo (Izr. 18:4). Ako odvojnea tuke vreme pošukar te zapoznajne len, tli vera ka bajrol (w21.09 3, pas. 4; 4, pas. 7-8; 5, pas. 11, 13).

E Jehovaskoro narodo šaj te koristinen pumare sposobnostija kolenge so o Isaija vakergja kaj tane sar „o thud e narodongoro“ (Isa. 60:5, 16). Akala skapocena murša hem džuvlja koristinena ple veštine hem sposobnostija te propovedinel pe ko 240 phuvja hem te prevedinel pe literatura ko poviše taro milja čhibja. Ko akala posledna dive, o tresibe e narodongoro terinela e manušen te anen odluka. Dali ka poddržinen e Devleskoro Carstvo, ili ka ovel len doverba ko vlade akale svetoskere? Akaja tani jekh odluka koja so sekova jekh valjani te anel la. Iako e Jehovaskere sluge tane poslušna e vladenge ko phuvja kote so živinena, ola tane celosno neutralna keda kerela pe lafi baši politika akale svetoskiri (Rim. 13:1-7). Ola džanena kaj samo o Carstvo ka rešinel e manušengere problemija, a adava Carstvo nane delo taro akava sveto (Jovan 18:36, 37; w21.09 17-18, pas. 13-14).

Keda nekoj kas so mangea cidela pe taro Jehova, but tano važno te zajaknine tut hem tle familija. Sar šaj te kere adava? Šaj te dobine sila taro Jehova agjaar so redovno ka čitine e Devleskoro lafi, ka razmisline bašo adava so čitinea hem agjaar so ka ove redovno ko sostanokija. I Džoana, kolakoro dad hem phen mukhle o čačipe, vakerela: „Osetinava man po smirimi keda čitinava bašo bibliska ličnostija sar soj i Avigeja, i Estira, o Jov, o Josif hem o Isus. Lengere primerija pherena mi godi hem mo vilo pozitivna mislencar kola so lokhjarena mi dukh. Keda sian razočarimo, ma čhinav te moline tut e Jehovaske. Molin le te pomožinel tuke te dikhe ki situacija sar ov so dikhela hem te pomožinel tuke te haljove o bukja hem „te sikavel tut bašo drumo kova so valjani te dža“ (Ps. 32:6-8). Džangjola pe, šaj te ovel tuke but pharo te vakere e Jehovaske sar osetinea tut. Ama o Jehova haljovela tli dukh ko vilo. Ov pottikninela tut te vakere leske sa so isi tuke ko vilo (2. Moj. 34:6; Ps. 62:7; w21.09 28, pas. 9-10).

Pali Pasha ko 32 berš a.e., o apostolija o Petar, o Jakov hem o Jovan dikhle jekh posebno vizija. Ki jekh uči planina, verojatno delo tari planina Hermon, o Isus preobrazingja pe angli lende „leskoro muj svetingja sar kham, a leskere šeja ule parne sar svetlina“ (Mat. 17:1-4). O apostolija šungje o Devel sar vakerela: „Akava tano mlo manglo Čhavo, kova so kerela man bahtalo. Leste šunen le“. O način sar živingje akala trin apostolija pali akaja vizija sikavgja kaj ola šungje e Isuse. Amen da mangaja te dža palo lengoro primer. Amen siem blagodarna so o Jehova mangipaja dela amen upatstvija preku o „poglavari e sobranieskoro“, o Isus Hristos (Ef. 5:23). Amen da te ova odlučna „te šuna le“ isto sar o apostolija o Petar, o Jakov hem o Jovan. Ako keraja agjaar ka oven amen but bereketija panda akana hem ki idnina ka ovel amen večno bahtalipe (w21.12 22, pas. 1; 27, pas. 19).

Jekh hristijani taro Korint živinela sine nemoralno ple dadeskere romnjaja. O apostol Pavle vakergja e Korinkjanenge te isklučinen le. Adale manušeskere nemoralna postapke vlijajngje upro javera taro sobranie. Nesave lendar čak ni na dikhena sine ko adava sar seriozno grevo! (1. Kor. 5:1, 2, 13). Nesavo vreme pokasno, o Pavle šungja kaj akava manuš čače kainela pe sine! O Pavle vakergja e starešinenge: „Spremno prostinen leske hem utešinen le“. Primetin soske o Pavle vakergja te keren adava: „Te šaj te na peravel le i but bari žal“. O Pavle žalingja akale manuše so kaingja pe. Ov na manglja te dikhel akale manuše doborom obeshrabrimo tari žal bašo adava so kergja so ka čhinavel te rodel te prostinel pe leske (2. Kor. 2:5-8, 11). Slično sar o Jehova, o starešine mangena te sikaven milost. Ola dena strogo ukor keda adava tano potrebno ama isto agjaar sikavena milost sekogaš keda šaj. Ako o starešine ni hari na ukorinena okolen so grešinena, tegani adava nane milost, nego popustlivost (w21.10 11-12, pas. 12-15).

O povredime čuvstvija šaj te sporedina len doslovno ranencar, nesave rane tane tikne a javera pobare. Na primer, džikote spreminaja hajbaske šaj hari te čhina amen ko naj. Adava šaj but te dukhal, ama palo jekh ili duj dive šaj ni nane te setine tut kote čhingjan tut. Slično, nekoj šaj te vakerel ili te kerel nešto kolea so ka povredinel amen, ama adaleske so nane doborom seriozno amen posigate prostinaja leske. Ama ako i rana tani pohor, tegani šaj ka valjani te dža ko doktori te šaj te sivel pe hem te phandel pe zavojea. Ako celo vreme pipinaja ki rana tegani verojatno nane te sasljol hem ka ovel pološno. Žalno tano adava so nekoj šaj te kerel nešto slično keda tano but povredimo. Ov šaj celo vreme te razmislinel bašo adava kobor but o javer povredingja le. Ama okola so ikerena holi kerena peske šteta. But pošukar tano te šuna o sovet so arakhljola ko avdisutno stiho (w21.12 12, pas. 15).

Te pretpostavina kaj jekh starešina mislinela kaj jekh objaviteli na uravela pe ili na doterinela pe baš primerno. O starešina šaj te pučel pe: „Dali isi man biblisko pričina te vakerav nešto?“ Adaleske soj tano svesno kaj na valjani te vakerel plo lično mislenje, ov šaj te pučel javere starešina ili nesave zrelo objavitele bašo adava. Ola šaj zaedno te razmislinen bašo e Pavleskoro sovet bašo urajbe hem doteribe (1. Tim. 2:9, 10). O Pavle istakningja nekobor opšta načelija bašo adava kaj jekh hristijani valjani te uravel pe pristojno hem skromno. Ama o Pavle na dengja spisako taro adava so smejnela nekoj te uravel a so na. Ov džanlja kaj e hristijanen isi len pravo te uraven pe sprema plo lično vkus sa džikote adava tano ko sklad e biblisko načeloncar. Znači o starešine valjani te razmislinen bašo adava dali o objaviteli tano skromno hem pristojno. Mudro tano te na bistra kaj duj hristijanja šaj te anen različna odluke hem o solduj te oven ispravna. Na valjani te ubedina e javere objavitelen te prifatinen amaro mislenje bašo adava soj ispravno a soj pogrešno (w22.02 16 pas. 9-10).

Isi amen šukar pričine te sikava verno mangipe jekh jekheske. Kola tane nesave lendar? Primetin sar akala bibliska izreke odgovorinena ko akava pučibe: „Ma dozvolin o verno mangipe hem i vernost te mukhen tut... tegani ka arakhe milost anglo Devel hem anglo manuša hem ka ove pendžardo sar gogjaver manuš“. „O manuš so isi le verno mangipe kerela šukaripe korkori peske.“ „Koj rodela i pravednost hem o verno mangipe ka arakhel životo“ (Izr. 3:3, 4; 11:17, fus. ; 21:21). Akala izreke spomninena trin pričine soske valjani te sikava verno mangipe. Prvo, keda sikavaja verno mangipe ovaja skapocena anglo Devel. Dujto, keda sikavaja verno mangipe keraja šukaripe amenge. Na primer, keraja pozoralo amaro amalipe e javerencar. Hem trito, keda sikavaja verno mangipe ka dobina bereketija ki idnina hem večno životo. Čače isi amen šukar pričine te šuna e Jehovaskoro sovet: „Sikaven verno mangipe hem milost jekh jekheske“ (w21.11 8, pas. 1-2).

Ma obeshrabrin tut ako o nevolje so sine tut, ili so isi tut akana, sikavgje tuke kaj tli vera nane dovolno zorali. Dikh ko adava sar prilika te kere tli vera pozorali. Molin tut taro vilo e Jehovaske, posebno keda isi tut jekh baro problemi. Dikh sar o Jehova šaj te grižinel pe tuke preku i familija hem preku o phralja hem o phenja. Keda dozvolinea e Jehovaske te pomožinel tuke te istrajne ko problemija so isi tut akana, ka ove panda po uverimo kaj ov ka pomožinel tuke te istrajne ko nevolje so ka oven tut ki idnina. O Isus pomožingja ple učenikonge te dikhen kote valjani lenge poviše vera. Ama ov nikogaš na sumningja pe kaj ola verno ka istrajnen ko ispitija so ka oven len ki idnina (Jovan 14:1; 16:33). Ov sine sigurno kaj jekh „baro mnoštvo manuša“ ka preživinen i bari nevolja adaleske so isi len zorali vera (Otk. 7:9, 14). Ka ove maškar lende ako dea tutar sa te šaj te koristine sekoja prilika te kere zorali tli vera panda avdive! (Evr. 10:39; w21.11 25, pas. 18-19).

Amen avdive na očekujnaja o Jehova te kerel čudo te šaj te zaštitinel amen, ama džanaja kaj sekova jekh so isi le doverba ko Jehova nane te trpinel trajno šteta. Panda hari, amari doverba ki e Jehovaskiri sposobnost te zaštitinel amen ka ovel čhivdi ko ispit. Keda o Gog taro Magog — koalicija taro sa o narodija — ka napadinel e Devleskere narodo, šaj ka mislina amenge kaj amaro životo tano ki opasnost. Ama tegani ka ovel but važno te ova uverime kaj o Jehova šaj te spasinel amen hem kaj ka kerel adava. O narodija ki amende ka dikhen sar bakhre kolen so nikoj nane te zaštitinel len (Ezek. 38:10-12). Nane te ovel amen oružje hem nane te ova obučime vojnake. O narodija ka mislinen peske kaj ka šaj lokheste te pobedinen amen. Ola nane te dikhen kaj e Jehovaskere angelija ikerena straža okolu amende hem spremna tane te zaštitinen amen. Ama amen džanaja adava soske isi amen vera. O narodija našti te dikhen len soske nane len vera ko Devel. Kobor samo ka oven iznenadime keda i nebesno vojska ka borinel pe amenge (Otk. 19:11, 14, 15; w22.01 6, pas. 12-13).

Sa amare phralja hem phenja tane važna e Jehovaske, adaleske valjani te oven amenge da važna. Valjani te da sa amendar te šaj te zaštitina len hem te grižina amen lenge. Ako halilem kaj dukhavgjem ili vredžingjem nekas, na valjani te ponašina amen sar ka phene ništo na slučingja pe, hem te mislina amenge kaj tane but osetliva hem kaj mora te bistren adava so ulo. Soske šaj nekoj te vredžinel pe? Nesave phralja hem phenja osetinena pe potele e javerendar soske barile ko pojaver okolnostija. A javera soj tane neve ko čačipe panda na halile kaj mora te prostinen e javerenge keda ka grešinen lenge. Bizi razlika koja tani i pričina, valjani te trudina amen te ikera o mir. Isto agjaar, ako nekoj sigate vredžinela pe, valjani te haljovel kaj mora te trudinel pe te na ovel doborom osetlivo. Ako kerela agjaar ka ovel bahtalo hem ka ovel ko mir e javerencar (w21.06 21, pas. 7).

O Isus haljovela sar osetinea tut. Keda siem sekirime but tano važno te ovel amen amal kova so haljovela amen, posebno ako doživingja o ista bukja sar amende. O Isus tano baš asavko amal. Ov džanela sar tano keda osetinea tut slabo hem keda valjani tuke pomoš. Ov haljovela amare slabostija, hem ka del amen i pomoš koja so valjani amenge „ko pravo vreme“ (Evr. 4:15, 16). Isto sar o Isus so prifatingja pomoš taro jekh angeli ki Getsemansko gradina, amen da valjani spremno te prifatina pomoš koja so avela taro Jehova, bizi razlika dali avela taro publikacie, videoklipija, govor ili tari jekh ohrabruvačko poseta taro starešina ili zrelo amal (Luka 22:39-44).O Jehova ka del tut o „mir taro Devel“ hem ka kerel tut pozoralo. Keda molinaja amen ka dobina o „mir taro Devel kova soj upreder sekoja misla“ (Fil. 4:6, 7; w22.01 18-19, pas. 17-19).

O Jehova sekogaš kerela adava soj ispravno. Ama, ponekogaš šaj te ovel amenge pharo te ovel amen doverba ko manuša kaste so ov mukhlja te predvodinen. Šaj pučaja amen dali o phralja so isi len nesavo avtoriteti ki e Jehovaskiri organizacija čače postapinena sprema e Jehovaskere upatstvija, ili kerena ola sar so mislinena? Ama e Jehova isi le doverba ko manuša kaste so ov čhivgja te predvodinen ki leskiri organizacija hem ko sobranie. Adaleske, ako nane amen doverba ko phralja so predvodinena našti te vakera kaj isi amen doverba ko Jehova. Avdive o Jehova vodinela pli organizacija soj ki Phuv preku „o verno hem razborito robo“ (Mat. 24:45). Slično sar o vodečko telo ko prvo veko, o robo nadgledinela e Devleskere narodo ko celo sveto hem dela upatstvija e starešinenge. A o starešine, trudinena pe te primeninen adala upatstvija ko sobranija. Amen sikavaja kaj isi amen doverba ko e Jehovaskoro vodstvo agjaar so šunaja o upatstvija kola so dobinaja len preku i organizacija hem o starešine (w22.02 4, pas. 7-8).

Amen siem but bahtale hem isi amen bari čest so siem e Jehovaskere svedokija. But siem bahtale keda šaj te pomožina nesavenge „so ispravno dikhena ko večno životo“ te oven učenikija (Dela 13:48). Osetinaja amen isto sar o Isus. Ov sine but bahtalo keda leskere učenikija irangje pe tari služba hem vakergje leske kobor šuže iskustvija sine len (Luka 10:1, 17, 21). O apostol Pavle pottikningja e Timotee: „Pazin šukar sar živinea hem sar sikavea“. Isto agjaar vakergja leske: „Kerindor adava ka spasine hem tut hem adalen so šunena tut “ (1. Tim. 4:16). Znači, amari služba spasinela životija. Pazinaja šukar sar živinaja, soske poddržinaja e Devleskoro Carstvo. Sekogaš mangaja te postapina ko način kova so anela slava e Jehovaske. Hem sikavaja kaj verujnaja ko šukar haberi kova so propovedinaja le (Fil. 1:27). Isto agjaar, pazinaja sar sikavaja agjaar so spreminaja amen angleder te dža ki služba, hem rodaja vodstvo taro Jehova angleder te svedočina e javerenge (w21.10 24, pas. 1-2).

Okole so isi le i „nevi ličnost“ razmislinela hem postapinela sar o Jehova. A sar uravela nekoj i nevi ličnost? Agjaar so sikavela o osobine so avena taro sveti duh hem dozvolinela akava duho te vlijajnel upro leskere misle, čuvstvija hem postapke. Na primer, ov mangela e Jehova hem leskere narodo (Mat. 22:36-39). Asavko manuš ačhovela bahtalo čak keda isi le pharipa (Jak. 1:2-4). Ov kerela mir (Mat. 5:9). Ov tano strplivo hem ljubezno e javerencar (Kol. 3:13). Ov na samo so mangela adava soj tano šukar, nego isto agjaar kerela le da (Luka 6:35). Ple postapkencar sikavela kaj isi le silno vera ko plo nebesno Dad (Jak. 2:18). Ov ačhovela smirimo keda o javera provocirinena le hem sikavela samo kontrola keda tano iskušimo (1. Kor. 9:25, 27; Tit 3:2). Te šaj te urava i nevi ličnost valjani te razvina sa o osobine soj spomnime ko Galatite 5:22, 23, hem o javera osobine soj spomnime ko javera stihija ( w22.03 8-9, pas. 3-4).

O starešine džana palo e apostol Pavleskoro primer na samo agjaar so džana ki služba taro kher ko kher, nego isto agjaar soj tane spremna te propovedinen ki sekoja prilika (Ef. 6:14, 15). Sar o Pavle, o starešine šaj te koristinen o vreme keda tane ki služba te šaj te obučinen e javeren hem e sluga-pomošnikon (1. Pet. 5:1, 2). Ama o starešine na valjani te oven doborom zafatime e zadačencar so nane te ovel len vreme baši služba. Te šaj te oven uramnotežena, o starešine ponekogaš ka valjani te odbinen nesave zadače (Mat. 28:19, 20). Otkeda ka razmislinen hem ka molinen pe bašo adava, ola šaj ka haljon kaj ako prifatinena poviše zadače šaj nane te ovel len vreme bašo považna bukja. Na primer, nane te ovel len vreme baši familijarno rat, revno te propovedinen ili te sikaven pumare čhaven te propovedinen. Šaj te oven sigurna kaj o Jehova haljola kaj mangena te oven uramnotežena ko sa o bukja (w22.03 27, pas. 4, 7; 28, pas. 8).

Dali sine tut hari dar angleder te ove e Jehovaskoro svedoko? Šaj mislingjan kaj nikogaš ka našti te propovedine taro kher ko kher ili šaj daraja sine kaj tli familija ili tle amala ka protivinen pe tuke. Ako oja, tegani tu šaj te haljove sar osetinela pe o interesenti. O Isus vakergja kaj šaj te pojavinel pe asavki dar. Ama, ov pottikningja ple sledbenikon te na mukhen i dar te čhinavel len te služinen e Jehovaske (Mat. 10:16, 17, 27). Postepeno sikav e interesente te propovedinel. E Isuseskere učenikija šaj darana sine keda valjangje te džan te propovedinen. Ama, o Isus pomožingja lenge agjaar so vakergja lenge kote te propovedinen hem so te vakeren (Mat. 10:5-7). Sar šaj te dža palo e Isuseskoro primer? Pomožin e interesenteske te haljol kote šaj te propovedinel. Na primer, šaj te puče le dali džanela nekas kaske so ka ovel korisno te džanel nesavo konkretno biblisko čačipe. Tegani pomožin leske te spreminel so te vakerel agjaar so ka sikave leske ko ednostavno način te propovedinel baši adaja tema (w21.06 6, pas. 15-16).

„Bašo samo nekobor minutija, o dukjane hem o purane khera počmingje te peren. Sarine sine ki panika. But manuša vakergje kaj trajngja okolu duj minutija. A mange sar te phene trajngja saatencar.“ Akala tane lafija taro manuša so preživingje o zemjotres ko Nepal, so sine ko 2015 berš. Ama, avdive slučinela pe jekh but po javer tresibe. O Jehova tresinela sa e narodon ko sveto. O proroko o Agej pišingja: „Agjaar vakerela o Jehova e vojskengoro: ’Panda jekh puti — hem adava panda hari — ka tresinkerav o nebo hem i phuv ‘ “ (Agej 2:6). O tresibe bašo kova so kerela lafi o Agej, nane sar o doslovno zemjotres kova so anela samo šteta. Namesto adava, akava tresibe kerela te oven šukar bukja. O Jehova vakerela amenge: „Ka tresinkerav sa e narodon, hem ka aven o skapocena bukja taro sa o narodija, hem ka pherav mlo kher slavaja“ (w21.09 14, pas. 1-3).

Te šaj te ove nekasaja šukar amal valjani redovno hem iskreno te kere lea lafi. Adava isto agjaar važinela bašo amaro amalipe e Jehovaja. Keda ki molitva vakeraja sar osetinaja amen, bašo so razmislinaja hem so mučinela amen, amen sikavaja kaj isi amen doverba ki leste hem kaj džanaja kobor but mangela amen (Ps. 94:17-19; 1. Jov. 5:14, 15). Družin tut e phralencar hem e phenjencar. Ola tane poklon taro Jehova (Jak. 1:17). Amaro nebesno Dad sikavela kaj grižinela pe amenge agjaar so dengja amen jekh duhovno familija taro phralja hem phenja kola so sikavena „mangipe ko sekova vreme“ (Izr. 17:17). Ko plo pismo dži ko Kološanja, o apostol Pavle spomningja nekobore hristijanen kola so „pomožingje leske hem utešingje le“ (Kol. 4:10, 11). Čak e Isuseske valjani sine poddrška taro leskere amala, hem angelija hem manuša (Luka 22:43). Keda keraja lafi jekhe zrelo hristijanea bašo amare problemija adava na značinela kaj siem duhovno slaba, nego adava šaj te zaštitinel amen (w21.04 24-25, pas. 14-16).

So valjani te kere ako jekh phral ili phen na ponašingja pe tuja šukar? De tutar sa te šaj te ikere o mir. Vaker e Jehovaske ki molitva sar osetinea tut. Molin le te pomožinel okoleske so povredingja tut hem te pomožinel tuke te dikhe o šukar osobine so isi le — osobine kola so o Jehova mangela ki leste (Luka 6:28). Ako našti te bistre so kergja tuke to phral, razmislin sar šaj ko najšukar način te kere lea lafi. Sekogaš tano pošukar te razmislina kaj o phral na manglja namerno te povredinel amen (Mat. 5:23, 24). Keda kerea lea lafi ma mislin kaj isi le lošna namere. So ako na mangela te smirinel pe tuja? Ponadari da ov strplivo lea. Ma otkažin tut taro tlo phral (Kol. 3:13). A soj najvažno, ma ačhov lea holjamo soske adava šaj te ruminel tlo amalipe e Jehovaja. Nikogaš ma mukh nešto te spotakninel tut. Keda keraja agjaar, tegani sikavaja e Jehovaske kaj mangaja le najviše taro sa (Ps. 119:165; w21.06 23, pas. 15).