Juli

O isklučibe tano jekh način sar o Jehova vospitinela amen. Akava tano bašo sarinengoro šukaripe, hem bašo šukaripe okoleskoro so grešingja. Nesave taro sobranie šaj te vakeren kaj o starešine grešingje so isklučingje nekas. Ama ma bistre, asavke manuša obično na mangena te vakeren o lošna bukja so kergja len adava so grešingja. Amen na džanaja sa o detali. Adaleske, te ovel amen doverba kaj o starešine dengje pestar sa te šaj te primeninen o bibliska načelija hem te sudinen „e Jehovaske ko anav“ (2. Let. 19:6). Adalea so poddržinena e starešinengiri odluka te isklučinen tumare mangle, tumen šaj te pomožinen leske te iranel pe ko Jehova. I Elizabet vakerela: „Sine amenge but pharo te na kera lafi amare čhavea kova so sine vozrasno. Ama otkeda irangja pe, ov priznajngja kaj zaslužingja te ovel isklučimo. Pokasno, ov vakergja kaj but siklilo taro adava so sine isklučimo“ (w21.09 28-29, pas. 11-12).

Razmislin baši čoroli udovica. Sigurno oj manglja te del poviše e Jehovaske. Ama, oj kergja adava so šaj te kerel — dengja e Jehovaske plo najšukar. Hem o Isus džanlja kaj lakoro prilog sine skapoceno leskere Dadeske. Akaja tani jekh važno pouka amenge: O Jehova tano zadovolno keda daja leske amaro najšukar — amari služba so keraja leske celo vilea hem celo dušaja (Mat. 22:37; Kol. 3:23). O Jehova tano bahtalo keda dikhela kaj keraja sa so šaj. Akava, isto agjaar važinela bašo vreme hem sila so odvojnaja baši služba e Jehovaske. Amen mangaja te da amaro najšukar te učestvujna ki služba hem te ova prisutna ko sostanokija. Sar šaj te primenine i pouka taro izveštaj baši udovica? Razmislin bašo phralja so ka ohrabrinen pe adalea so ka setinkere len kaj o Jehova tano bahtalo so trudinena pe te keren adava so šaj. Šaj džanea nesave pophure phenja so šaj osetinela pe krivo ili kaj nane korisno adaleske soj tani nasvali ili nane la sila te kerel poviše ki služba sar poangle (w21.04 6, pas. 17, 19-​20).

O Jehova džanela keda tano najšukar te čhivel krajo akale lošno svetoske. Adaleske soj tano strplivo, but manuša šaj sine te zapoznajnen le. Hem akana baro mnoštvo taro milionja manuša obožavinena le. Ola tane blagodarna e Jehovaske so istrajngja doborom vreme te šaj te bijangjoven, te zapoznajnen le, te mangen le hem te den lafi kaj ka služinen leske. Keda milionja manuša ka dobinen pli nagrada adaleske so istrajngje dži ko krajo, tegani ka dikhel pe kaj o Jehova šukar kergja so istrajngja. Iako o Satana kergja te ovel but pharipe hem muke, sepak o Jehova ponadari da tano „bahtalo Devel“ (1. Tim. 1:11). Amen da šaj te ačhova bahtale džikote strplivo adžikeraja o Jehova te slavinel plo sveto anav, te opravdinel plo pravo te vladinel, te anel krajo e lošnipaske hem sa e problemenge so isi amen avdive. Adaleske, te ova odlučna te istrajna hem nikogaš ma te bistra kaj amaro Dad soj ko nebo isto agjaar istrajnela (w21.07 13, pas. 18-19).

But džene taro prvo veko na verujngje ko Isus. Lenge ov samo sine jekhe čorole stolareskoro čhavo. Hem ov sine taro Nazaret, diz kolake so but manuša mislinena sine kaj nane doborom važno. Čak o Natanael, kova so pokasno ulo e Isuseskoro učeniko, ko početok vakergja: „Šaj li nešto šukar te ikljol taro Nazaret?“ Ov šaj mislingja ko proroštvo soj pišimo ko Mihej 5:2, kote so vakerela kaj o Mesija valjani sine te ovel bijamo ko Vitleem, a na ko Nazaret. O proroko o Isaija prorokujngja kaj e Isuseskere dušmanja nane te interesinen pe but bašo e Mesijaskoro poteklo (Isa. 53:8). Ako adala manuša odvojnena peske sine vreme te istražinen poviše informacie bašo akava, ola ka doznajnen sine kaj o Isus sine bijamo ko Vitleem hem kaj ov potekninela taro cari o David (Luka 2:4-7). Znači o Isus sine bijamo ko than so sine prorokujmo ko Mihej 5:2. Tegani, so sine o problemi? O manuša but sigate osudingje le. Na sine len sa o informacie hem adaleske ola spotakningje pe (w21.05 2-3, pas. 4-6).

Ki Biblija isi šukar primerija taro okola so sine nagradime adaleske so prifatingje sovet. Asavko primer tano o Jov. Iako sine le ispravno dar taro Devel sepak ov na sine sovršeno. Keda sine ko bare problemija ov sikavgja nesave pogrešna stavija. Adaleske dobingja direktno sovet taro Eliju hem taro Jehova. Sar reagiringja o Jov? Ov vakergja: „Kerava sine lafi bizo te haljovav... Adaleske iranava sa so vakergjum, hem kainava man ki prašina hem ko pravo “(Jov 42:3-6, 12-17). Ov sikavgja poniznost adalea so prifatingja o sovet so dengja le o Eliju iako o Eliju sine but poterno lestar (Jov 32:6-7). I poniznost isto agjaar ka pomožinel amenge te primenina o sovet čak keda mislinaja kaj na valjani amenge sovet ili keda okova so dela amen sovet tano poterno amendar. Sarine amen valjani ki pobari mera te razvina o osobine so avena taro sveti duh hem te ova pošukar ki služba (w22.02 11 pas. 8; 12, pas. 12).

Sarinen isi amen odgovornost te kera o sobranie than kote so isi mangipe hem mir hem kote so nikoj na osetinela pe otfrlimo. Adava so keraja hem so vakeraja šaj but te ohrabrinel e javeren! So šaj te kere te šaj te pomožine okolenge soj tane korkori ko čačipe te osetinen pe kaj tane delo taro sobranie? Ker tu o prvo čekori te ove amal adalencar soj neve. Šaj te počmina agjaar so ljubezno ka dodžakera e neven ko sobranie (Rim. 15:7). Ama, mangaja te kera nešto poviše taro adava samo te pozdravina len. Sar so nakhela o vreme, mangaja te ova lencar popaše amala. Adaleske, ov ljubezno hem sikav kaj čače grižinea tut e nevenge. Trudin tut te haljove save problemija isi len bizo te puče len pučiba so ka čhiven len ki nezgodno situacija. Nesavenge šaj tano pharo te vakeren sar osetinena pe, adaleske ma terin len te keren lafi bašo adava. Namesto adava, pomožin lenge te vakeren sar osetinena pe agjaar so ka postavine lenge taktična pučiba hem strplivo šun lengoro odgovor. Na primer, šaj te puče len sar zapoznajngje o čačipe (w21.06 11, pas. 13-​14).

But siem blagodarna so šaj te služina e Jehovaske amare phralencar hem phenjencar sar „jekh stado“ telo „jekh pastiri“. Ko lil Organizirani da ja vršime Jehovinata volja ki 165 strana pišinela: „Adaleske so uživinaja ko jekhipe, sarine amen siem odgovorna te arakha adava jekhipe“. Adaleske valjani te „sikljova te dikha ko amare phralja hem phenja sar o Jehova so dikhela“. E Jehovaske sarine amen siem skapocena „tikne“. Dali tu da dikhea agjaar te phralen hem te phenjen? O Jehova dikhela hem ceninela sa so kerea te šaj te pomožine lenge hem te grižine tut lenge (Mat. 10:42). Amen mangaja amare phralen hem phenjen. Adaleske odlučna siem ma te čhiva bar sopkibaske ili nesavi prečka anglo phral (Rim. 14:13). Amen dikhaja amare phralen hem phenjen sar pobare amendar hem mangaja te prostina lenge taro vilo. Ma te mukha te ova spotaknime taro javera. Namesto adava, te birina te kera o bukja so anena mir hem te izgradina jekh jekhe (Rim. 14:19; w21.06 24, pas. 16-​17).

Ako hor proučinaja hem primeninaja o sovetija so dobinaja len taro e Devleskoro Lafi hem leskiri organizacija, tegani hari po hari ka razvina i hristijansko ličnost. Isto agjaar pošukar ka pendžara e Devle. O Isus koristingja jekh sporedba te šaj te objasninel sar o haberi bašo Carstvo tano slično jekhe tikne semea kova so po hari bajrola ko vilo okolengoro so mangena i pravednost. Ov vakergja: „O seme niknonela hem bajrola, a ov [o sejači] ni na džanela sar. I phuv korkori pestar hari po hari anela plodi — prvo steblo, palo adava klasi hem ko krajo celo zrno ko klasi“ (Mar. 4:27, 28). O Isus manglja te vakerel kaj, isto sar jekh rastenie so bajrovela hari po hari slično, jekh manuš kova so prifatinela o haberi postepeno duhovno napredujnela. Na primer, keda amare interesentija ovena popaše e Jehovaja, počminaja te dikha o but promene so kerena len (Ef. 4:22-24). Ama na smejnaja te bistra kaj, o Jehova tano adava so kerela o tikno seme te bajrol (w21.08 8-9, pas. 4-5).

Šaj te arakha o bahtalipe ako rodaja le ko ispravno than. Okova so uživinela ko bukja so šaj jakhencar te dikhel len zadovolno tano adalea so isi le, hem ple momentalno okolnostencar. A okova so sekogaš mangela bukja so našti te oven le, nikogaš nane te ovel zadovolno. Znači, so sikljovaja amen taro akava? Te šaj te ova bahtale, valjani te koncentririna amen ko bukja so isi amen hem ko celija so šaj te ispolnina len.Dali čače šaj te ove zadovolno adalea so više isi tut? But manuša mislinena kaj našti, soske amen obično mangaja te kera hem te sikljova neve bukja. Ama, ustvari šaj te ova zadovolna hem but poviše taro adava — amen šaj te uživina ko bukja so više isi amen. Sar šaj te kera adava? Te šaj te otkrina, te dikha e Isuseskiri sporedba bašo talantija koja so arakhljovela ko Matej 25:14-30 hem te dikha sar šaj te ova bahtale hem sar šaj čak te bajrara amaro bahtalipe bašo odgovornostija so više isi amen (w21.08 21, pas. 5-6).

O Jehova but grižinela pe okolenge so „osetinena pe phage“. Sarine amen, na samo o starešine, šaj te ohrabrina amare mangle phralen hem phenjen. Jekh način sar šaj te kera adava tano, ako iskreno interesinaja amen lenge. O Jehova preku amende mangela te sikavel plo mangipe ple skapocena bakhrenge (Izr. 19:17). Isto agjaar, šaj te pomožina amare phralenge hem phenjenge agjaar so ka ova ponizna hem skromna. Na mangaja te istaknina amen anglo javera hem agjaar te kera ljubomorna amare phralen. Namesto adava, mangaja te koristina amare sposobnostija te šaj te ohrabrina amen jekh jekhea (1. Pet. 4:10, 11). Šaj but te sikljova bašo adava sar te ponašina amen e javerencar, ako dikhaja sar o Isus ponašingja pe ple sledbenikoncar. Ov sine o najbaro manuš kova so nekogaš živingja ki Phuv. Sepak sine „krotko hem ponizno ko vilo“ (Mat. 11:28-30). O Isus koristinela sine ednostavna lafija hem sporedbe kola so šaj sine lokhe te haljoven pe hem te resen dži ko vilo okolengoro soj ponizna (Luka 10:21; w21.07 23, pas. 11-​12).

Ker tu o prvo čekori te kere lafi e pophurencar. Točno, šaj na dikhena više šukar, šaj pobavno phirena hem šaj našti više šukar te keren lafi, ama ola panda mangena te oven aktivna ki služba bašo Jehova hem kergje peske jekh „šukar anav“ angli leste (Prop. 7:1). Ma bistre soske o Jehova ceninela len. Ponadari da sikav lenge poštovanje. Ov sar o Elisej. Ov sine uporno te ačhol paše uzo Ilija hem adaleske trin puti vakergja leske: „Nane te mukhav tut“ (2. Car. 2:2, 4, 6). Sikav iskreno interes e pophurenge agjaar so ljubezno ka puče len pučiba (Izr. 1:5; 20:5; 1. Tim. 5:1, 2). Na primer, šaj te puče len: „Keda sian sine terno, so uveringja tut kaj arakhljan o čačipe? Sar o bukja so slučingje pe tuke pomožingje tut te ove popaše e Jehovaja? So pomožingja tuke te ačhove bahtalo ki služba e Jehovaske?“ (1. Tim. 6:6-8). Palo adava, šun len šukar džikote raskažinena tuke! (w21.09 5, pas. 14; 7, pas. 15).

Keda dea tutar sa te šune i zapoved te propovedine hem te kere učenikija, tu sikavea kaj mangea e Devle (1. Jov. 5:3). Razmislin bašo akava, tu propovedinea e manušenge soske mangea e Jehova. Dali sine tuke lokho te šune akaja zapoved? Verojatno na. Dali sine tut trema keda prvo puti sian sine ki služba? Sigurno kaj oja. Ama adaleske so džanljan kaj o Isus mangela te propovedine, tu šungjan adaja zapoved. Hem palo nesavo vreme verojatno ulo tuke polokho te dža ki služba. A dali astarela tut trema keda razmislinea bašo adava te vodine biblisko kursi? Ako molinea tut e Jehovaske hem rodea lestar hrabrost te nudine biblisko kursi, ov šaj te pomožinel tuke te mange te kere učenikija (w21.07 3, pas. 7).

O robija taro purano vreme sine obeležime te šaj te džanel pe koj sine lengoro gospodari. Slično, sarinendar avdive ka očekujnel pe te ovel len akava simbolično belego ko pumare vasta, ili ko čekat. O razmisluvanje hem o postapke okolengoro so ka priminen akava belego ka sikavel kaj ola poddržinena akava političko sistem. Dali ka prifatina akava simbolično belego hem ka da amari poddrška akale vladenge? Okola so odbinena te priminen o belego ka oven len pharipa hem ka oven ki opasnost. O lil Otkrovenie vakerela kaj „nikoj našti te kinel ili te bikinel, osven okova so isi le o belego“ (Otk. 13:17). Ama, e Devleskoro narodo džanela so ka kerel o Devel okolencar so isi len o belego soj spomnimo ko Otkrovenie 14:9, 10. Namesto te prifatinen o belego, lenge ko vasta ka ovel pišimo: „Pripadinava e Jehovaske“ (Isa. 44:5). Panda akana valjani te sikava kaj siem verna e Jehovaske. Ako keraja agjaar, tegani o Jehova ka ovel bahtalo te vakerel kaj pripadinaja leske (w21.09 18, pas. 15-​16).

Te šaj te kera amari služba but ka pomožinel amenge e javerengiri pomoš. O apostol Pavle sikavgja e Timotee sar te propovedinel hem te sikavel e manušen hem ohrabringja e Timotee te pomožinel e javerenge ko isto način (1. Kor. 4:17). Sar o Timotej, amen da šaj te sikljova taro iskusna objavitelija ko amaro sobranie. Isto agjaar, valjani te molina amen e Jehovaske te pomožinel amen. Rode o Jehova te pomožinel tuke sekova puti keda sian ki služba. Valjani amenge leskoro sveti duh te pomožinel amenge ko sa so keraja (Ps. 127:1; Luka 11:13). Keda molinea e Jehova te pomožinel tuke, ov konkretno. Na primer, molin tut te vodinel tut ki nekaste kova so mangela te sikljol baši leste hem spremno tano te šunel. Isto agjaar valjani te odvojna amenge vreme lično te proučina. E Devleskoro Lafi vakerela: „Oven uverime so mangela o Devel te keren — bukja soj tane šukar, sovršena hem prifatliva leske“ (Rim. 12:2). Kobor poviše siem uverime kaj džanaja o čačipe bašo Devel, doborom poviše ka ova sigurna keda keraja lafi e manušencar ki služba (w21.05 18, pas. 14-16).

So ako valjani te čhinave te proučine e interesentea, iako dea tutar sa hem molinea tut leske ama ov sepak na napredujnela? Ili, so ako nikogaš na pomožingjan nekaske te krstinel pe? Dali akava značinela kaj na kerea nešto sar so valjani, hem kaj o Jehova na dela tut bereketi ki tli služba? O Jehova dikhela amaro trudo hem i istrajnost. Anglo e Jehovaskere jakhja, amari služba tani uspešno keda keraja la revno hem taro mangipe, bizi razlika sar ka reagirinen o manuša. O Pavle pišingja: „O Devel nane nepravedno pa te bistrel adava so kergjen, hem o mangipe so sikavgjen leskere anaveske agjaar so služingjen okolenge soj sveta hem ponadari da služinena lenge“ (Evr. 6:10). O Jehova na bistrela tlo trudo hem mangipe, iako šaj nane tut šukar rezultatija ki služba. Adaleske, adava so o Pavle vakergja ko avdisutno stiho važinela tuke da (w21.10 25, pas. 4-6).

E Isuseskiri ljubeznost hem mangipe dikhena pe taro adava sar ponašinela pe sine ple učenikoncar. Ov džanlja kaj sine len različna sposobnostija hem okolnostija. Adaleske na očekujnela sine sarine te keren o ista zadače hem te završinen isto buti ki služba. Sepak ov ceninela sine keda sekova jekh lendar ka del plo najšukar. Akava jasno dikhjola pe tari leskiri sporedba bašo talantija. Ki akaja sporedba o gospodari dela sekole roboske buti „sprema leskiri sposobnost“. Iako jekh taro duj vredna robija zarabotingja poviše, o gospodari pofalingja e soldujen e ista lafencar: „Šukar kergjan, mlo šukar hem verno sluga“ (Mat. 25:14-23). O Isus tano ljubezno amencar hem sikavela amenge mangipe. Ov džanela kaj sarinen isi amen različna sposobnostija hem okolnostija. Sepak, ov ceninela keda daja amaro najšukar. Amen da valjani te dža palo leskoro primer (w21.07 23, pas. 12-​14).

O cari o David na sine sekogaš milostivo. Na primer, o Naval kova so sine grubo manuš, vredžingja e Davide hem na manglja te del le hajbaske hem leskere manušenge. Tegani o David but holjangja hem manglja te mudarel le hem sa e muršen taro leskoro kher. Ama e Navaleskiri romni, koja so sine ljubezno hem strplivo, sigate reagiringja hem agjaar o David na mudargja e Navale hem leskere manušen (1. Sam. 25:9-22, 32-35). Primetin kaj keda o David sine holjamo, ov mislingja kaj o Naval hem sa o murša taro leskoro kher zaslužingje te meren. A pokasno, sine spremno te vakerel kaj o barvalo manuš tari e Nataneskiri sporedba valjani te ovel mudardo. Ki akaja dujto situacija šaj pučaja amen, soske o David kova so obično sine ljubezno manuš, osudingja doborom strogo e barvale manuše tari e Nataneskiri sporedba? Razmislin samo so slučinela pe sine e Davideske ko adava periodi. Le but mučinela le sine i sovest. Ako nekas isi strogo hem osuduvačko stavi, adava tano znako kaj nane ki šukar duhovno sostojba (w21.10 12, pas. 17-18; 13, pas. 20).

Taro akala lafija sikljovaja kaj šaj te dža palo e Jehovaskoro primer, o najšukar primer baši svetost. Amen na samo so šaj, nego hem mora te ova sveta ko sa so keraja. Šaj mislinaja amenge kaj našti te kera adava adaleske so siem nesovršena. O Petar da grešingja ama leskoro primer sikavel amenge kaj šaj te ova sveta. Keda kerela pe lafi baši nekaste soj sveto but manuša mislinena ki nekaste so na asala, kova so sekogaš uravela religiozna šeja hem tano but seriozno. Ama, okola soj sveta ni hari nane asavke. I Biblija bašo Jehova, kova soj sveto, vakerela kaj tano „bahtalo Devel“ (1. Tim. 1:11). A okola so obožavinena le tane isto agjaar bahtale (Ps. 144:15). O Isus osudinela sine okolen so uravena sine posebna šeja hem kerena sine šukar bukja te šaj o javera te dikhen len (Mat. 6:1; Mar. 12:38). Sar čačutne hristijanja amen džanaja so značinela te ovel pe sveto taro adava so sikljovaja tari Biblija. Uverime siem kaj o Devel mangela amen hem kaj nikogaš nane te rodel amendar te kera nešto so našti keraja (w21.12 2, pas. 1, 3).

Taro sa o poklonija so dengja amen o Devel, najbaro lendar tani i sposobnost te obožavina le. Amen sikavaja e Jehovaske kaj mangaja le agjaar so ikeraja leskere zapovedija (1. Jov. 5:3). Jekh zapoved so dengja la o Jehova preku o Isus tani, te kera učenikija hem te krstina len (Mat. 28:19). Isto agjaar, dengja amen zapoved te manga amen jekh jekhea (Jovan 13:35). Okola so ikerena e Jehovaskere zapovedija ka oven delo tari leskiri familija taro verna sluge soj ko celo sveto (Ps. 15:1, 2). Sikav mangipe e javerenge. O mangipe tani e Jehovaskiri najvažno osobina (1. Jov. 4:8). Ov sikavgja amenge mangipe panda angleder te pendžara le (1. Jov. 4:9, 10). Šaj te dža palo leskoro primer agjaar so amen da ka sikava mangipe e javerenge (Ef. 5:1). Jekh taro najšukar načinija sar šaj te sikava mangipe e manušenge tano agjaar so ka sikava len bašo Jehova džikote panda isi vreme (Mat. 9:36-38). Agjaar, daja len prilika jekh dive ola da te oven delo tari e Devleskiri familija (w21.08 5-6, pas. 13-14).

E Isuseskoro baro mangipe bašo Jehova pottikningja le te kerel žrtve pe Dadeske hem amenge (Jovan 14:31). O Isus sikavgja kobor but mangela e manušen adalea sar živingja plo životo ki phuv. Ov sekova dive sikavela sine mangipe hem sočuvstvo čak okolenge so protivinena pe sine leske. Jekh but važno način sar sikavgja plo mangipe bašo manuša tano agjaar so sikavgja len bašo e Devleskoro Carstvo (Luka 4:43, 44). O Isus isto agjaar sikavgja plo samopožrtvuvano mangipe sprema o Devel hem sprema o manuša agjaar so sine spremno te ovel mučimo hem mudardo taro grešnikija. Agjaar ov dengja amen prilika te živina večno. Amen dengjem lafi e Jehovaske kaj ka služina leske hem krstingjem amen adaleske so mangaja le. Amen da, sar o Isus šaj te sikava kaj mangaja e Jehova adalea sar ponašinaja amen e manušencar. O apostol Jovan pišingja: „Koj na mangela ple phrale kaste so dikhela, našti te mangel e Devle kaste so na dikhela“ (1. Jov. 4:20; w22.03 10, pas. 8-9).

Iako uživinaja te nakhava vreme e Jehovaja, adava nane sekogaš lokho. Adaleske so siem but zafatime šaj te ovel amenge pharo te arakha vreme bašo duhovna aktivnostija. Amari buti, i familija hem javera bukja so valjani te kera len šaj te len amendar doborom vreme so ka mislina amenge kaj siem but zafatime te molina amen, te proučina hem hor te razmislina. Isi jekh javer da opasnost so šaj te lel amaro vreme. Ako na pazinaja, šaj te dozvolina nesave aktivnostija kola so nane pogrešna te čoren amaro vreme kova so šaj te koristina le te ova popaše e Jehovaja. Na primer, šukar tano te odvojna amenge vreme bašo odmor hem rekreacija. Ama čak i šukar rekreacija šaj te lel amendar doborom but vreme so nane te ačhol amenge vreme bašo duhovna aktivnostija. Na valjani te bistra kaj i rekreacija nane i najvažno buti ko amaro životo (Izr. 25:27; 1. Tim. 4:8; w22.01 26, pas. 2-3).

Keda o Jehova zapovedingja e Izraelconge te mangen pumare pašutnen, ov na mislingja kaj ola valjani te sikaven mangipe samo e javere Izraelconge, nego isto agjaar valjani sine te mangen e jabandžien so živinena maškar lende. Adava sine jasno vakerdo ki 3. Mojseeva 19:33, 34. O Jehova mangela sine o Izraelcija te ponašinen pe e jabandžiencar sar e javere Izraelconcar hem te mangen len sar peste. Na primer, o Zakoni vakerela sine kaj o Izraelcija valjani te mukhen hem e jabandžien hem e čorolen te kheden taro nive (3. Moj. 19:9, 10). O hristijanja avdive valjani te primeninen o načelo bašo mangipe sprema o jabandžie (Luka 10:30-37). Sar šaj te kera adava? Avdive isi milionja manuša ko celo sveto kola so gele te živinen ki javer phuv, hem šaj nesave lendar tane tle komšie. But tano važno te sikava poštovanje sprema asavke murša, džuvlja hem čhave (w21.12 12, pas. 16).

So poviše isi amen doverba ko e Jehovaskoro vodstvo akana, doborom poviše ka ova uverime kaj o Jehova šaj te spasinel amen ki idnina. Valjani te ovel amen vera hem spremno te sikava doverba ko Jehova te šaj te roda slobodno dive tari buti bašo kongres, ili te roda te promena ko amaro rabotno vreme te šaj redovno te dža ko sostanokija hem te šaj te ovel amen poviše vreme službake. Ama so ako amaro gazda na mangela te del amen slobodno vreme hem našavaja amari buti? Dali ka ovel amen vera kaj o Jehova nikogaš nane te mukhel amen hem kaj sekogaš ka del amen adava so valjani amenge? (Evr. 13:5). But džene soj tane ki polnovremeno služba doživingje sar o Jehova pomožingja lenge keda najviše valjangja lenge. O Jehova tano verno. Adaleske so o Jehova tano tari amari strana, nane amen nisavi pričina te dara taro adava so ka slučinel pe ki idnina. Sa džikote čhivaja o Carstvo ko prvo than, amaro Devel nikogaš nane te mukhel amen (w22.01 7, pas. 16-17).

Sar šaj te ovel ispitimi amari doverba ko starešine? Te pretpostavina kaj isklučinena nekas soj amenge paše. Šaj te mislina amenge kaj o starešine na džanena sa o informacie bašo adava slučaj, ili šaj pučaja amen dali akaja odluka so angje la tani isto agjaar e Jehovaskiri da odluka. So šaj te pomožinel amenge te ovel amen o ispravno stavi baši adaja odluka? Na valjani te bistra kaj o isklučibe tano jekh način sar o Jehova vospitinela amen hem kaj adava tano šukar hem e sobranieskoro hem okoleske so grešingja. Ako nekoj so grešingja na kainela pe hem ačhovela ko sobranie, tegani ov šaj lošno te vlijajnel upro javera (Gal. 5:9). Isto agjaar, ov šaj nane te haljovel kobor seriozno grevo kergja hem šaj nane te mislinel kaj valjani te meninel plo stavi hem postapke te šaj o Jehova palem te dikhel ki leste šukar (Prop. 8:11). Šaj te ova sigurna kaj o starešine dikhena but seriozno ki pli odgovornost keda odlučinena dali nekoj valjani te ovel isklučimo ili na (w22.02 5-6, pas. 13-14).

Posebno valjani te sikava strplivost hem ljubeznost keda nekoj ko početok na mangela te prifatinel o biblisko sovet. Jekh starešina na valjani sigate te nervirinel pe ako o phral ili i phen na prifatinela ili na primeninela odma o sovet. Adaleske, jekh starešina ko ple lična molitve šaj te molinel e Jehova te pomožinel e objaviteleske te haljovel soske leske dendo sovet hem te primeninel le. Šaj ka valjani leske vreme te razmislinel bašo adava so sine leske vakerdo. Ako o starešina tano strplivo hem ljubezno, e phraleske ka ovel polokho te prifatinel o sovet. Džangjola pe, o sovet sekogaš valjani te avel taro e Devleskoro Lafi. Amen na mangaja amaro sovet te ovel samo korisno nego hem te radujnkerel o vilo (Izr. 27:9; w22.02 18, pas. 17; 19, pas. 19).

Keda molinaja e Jehova baši sila te istrajna ko problemija hem baši pomoš te nakhava nesavi slabost, šaj mislinaja amenge kaj o Jehova adžikerela but vreme te nakhel te šaj te odgovorinel ko amare molitve. Soske o Jehova na odgovorinela odma ko sa amare molitve? Ko amare iskrena molitve ov dikhela sar dokaz baši amari vera (Evr. 11:6). Ov isto agjaar mangela te dikhel kobor siem odlučna te živina sprema amare molitve hem te kera leskiri volja (1. Jov. 3:22). Adaleske, valjani te ova strpliva hem te da sa amendar te šaj te kera o potrebna promene. O Isus pomožingja amenge te haljova kaj nesave taro amare molitve šaj nane odma te oven odgovorime. Ov vakergja: „Molinen hem ka del pe tumenge, roden hem ka arakhen, khuven hem ka phravel pe tumenge, soske sekoj so molinela ka dobinel, sekoj so rodela ka arakhel hem sekoj so khuvela ka phravel pe leske“ (Mat. 7:7, 8; w21.08 8, pas. 1; 10, pas. 9-10).

Te šaj te bajrare tli vera ko Stvoriteli valjani ponadari da te proučine e Devleskoro Lafi (Is. Nav. 1:8). Razmislin bašo adava sar ispolningje pe o proroštvija soj ki late, hem sar celo Biblija tani ko sklad. Ako keraja agjaar, panda poviše ka uverina amen kaj jekh ljubezno, mudro Stvoriteli kergja amen hem kaj ov dengja amen i Biblija (2. Tim. 3:14; 2. Pet. 1:21). Keda proučinea e Devleskoro Lafi primetin kobor korisna sovetija isi ki leste. Na primer, i Biblija panda but odamna predupredingja kaj o mangipe sprema o pare tano štetno hem anela but dukha (1. Tim. 6:9, 10; Izr. 28:20; Mat. 6:24). Kobor tano korisno o biblisko predupreduvanje kaj na valjani te manga o pare. Šaj li te setine tut ko javera bibliska načelija kola so sine tuke korisna? So poviše ceninaja o biblisko sovet, doborom poviše ka ovel amen doverba kaj amaro Stvoriteli džanela soj amenge najšukar hem sekogaš ka roda lestar sovet (Jak. 1:5). Tegani amaro životo ka ovel pobahtalo (Isa. 48:17, 18; w21.08 17-18, pas. 12-13).

Ako sian jekh taro pophure phralja hem phenja, ov sigurno kaj o Jehova na bistrela adava so kergjan angleder. Sian sine but revno ki služba. Tu istrajngjan keda sine tut problemija — čak phare problemija — sian sine poslušno hem ikergjan tut ko bibliska merilija. Verno grižingjan tut bašo važna zadače ki e Jehovaskiri organizacija hem dengjan obuka e javerenge. Dengjan tlo najšukar te šaj te prilagodine tut ko but promene so kergja e Jehovaskiri organizacija. Poddržingjan hem ohrabringjan okolen soj tane ki polnovremeno služba. O Jehova but mangela tut adaleske so sian verno! Ov vetinela kaj „nane te mukhel okolen soj tane leske verna“ (Ps. 37:28). Hem dengja lafi kaj čak keda ka parnjon tle bala ov ka poddržinel tut (Isa. 46:4). Znači, ma mislin kaj adaleske so phuriljan na sian više važno ki e Jehovaskiri organizacija. Tu sian but skapoceno! (w21.09 3, pas. 4).

O Jehova sikavela milost adaleske so ov tano najmudro. I Biblija vakerela kaj „i mudrost so avela upraldan“, tani „pherdi milost hem šukar bukja“ (Jak. 3:17). Sar jekh dad pherdo mangipaja, o Jehova džanela kaj leskere čhaven ka ovel len korist tari leskiri milost (Isa. 49:15). I milost so avela taro Devel dela len nadež baši idnina iako tane nesovršena. Adaleske, e Jehovaskiri bari mudrost pottikninela le te sikavel milost sekogaš keda dikhela kaj isi pričina te kerel adava. Ama, o Jehova isto agjaar džanela keda ma te sikavel milost. Adaleske soj tano mudro, o Jehova nikogaš na nakhavela i granica tari milost ki popustlivost. Te phena kaj nesavo sluga e Devleskoro namerno odlučinela te živinel nemoralno životo. Sar valjani amen te postapina? O Pavle vodimo taro Devel vakergja: „Čhinaven te družinen tumen lea“ (1. Kor. 5:11). O grešnikija so na kainena pe tane isklučime taro sobranie. Adava mora te kerel pe, te šaj te zaštitinel pe o sobranie hem te ikeren pe e Jehovaskere sveta merilija (w21.10 9-​10, pas. 7-8).

Obožavinaja e Jehova keda amare prilogoncar poddržinaja o aktivnostija bašo Carstvo. Keda o Izraelcija slavinena sine o praznikija ola na smejnena sine te aven anglo Jehova čuče vastencar (5. Moj. 16:16). Valjani sine te anen poklon sprema pumare okolnostija. Agjaar šaj sine te sikaven pumari blagodarnost e Jehovaske. Sar šaj te sikava kaj mangaja e Jehova hem kaj ceninaja sa so kerela baši amenge? Jekh način sar šaj te kera adava tano ako daja prilogija ko amaro sobranie hem bašo amare aktivnostija so kerena pe ko celo sveto. Bašo dejbe prilogija o apostol Pavle vakergja: „Ako nekoj dela taro vilo, adava tano prifatlivo e Devleske. Sekastar adžikerela pe te del adava so isi le, a na adava so nane le“ (2. Kor. 8:4, 12). O Jehova ceninela sekova prilog so daja le taro vilo, čak ako tano but tikno (Mar. 12:42-44; w22.03 24, pas. 13).

O starešine našti te ciden sa o nevolje taro e Jehovaskoro narodo. Sepak o Jehova mangela o starešine te keren sa so šaj te šaj te ohrabrinen hem te zaštitinen leskere bakhren. Sar šaj o starešine soj tane but zafatime te odvojnen vreme te pomožinen e phralenge? Dža palo e Pavleskoro primer. O Pavle sine sekogaš spremno te pofalinel e phralen hem te ohrabrinel len. O starešine da valjani te džan palo leskoro primer hem te oven ljubezna e phralencar hem e phenjencar (1. Sol. 2:7). O Pavle uveringja e phralen hem e phenjen kaj mangela len hem kaj o Jehova da mangela len (2. Kor. 2:4; Ef. 2:4, 5). O Pavle sine sar amal okolencar taro sobranie agjaar so nakhavela sine lencar vreme. Ov sikavgja kaj isi le doverba ki lende agjaar so sine lencar iskreno hem vakerela sine lenge ple sekiracie hem kola tane leskere slabostija (2. Kor. 7:5; 1. Tim. 1:15). Ama adalea na manglja te istakninel ple problemija, nego mangela sine te pomožinel e phralenge (w22.03 28, pas. 9-10).