Avgust

O Isus verojatno mislingja ko rimska vojnikija kola so kovingje leskere vasta hem pre ko stubo. O Isus na dozvolingja i nepravda so doživingja te kerel le te ovel holjamo hem te na mangel te prostinel okolenge so progoningje le (1. Pet. 2:23). Isto sar o Isus, valjani te ova spremna te prostina e javerenge (Kol. 3:13). Nesave, kote soj vklučimi amari familija da, šaj protivinena pe amenge adaleske so na haljovena amare veruvanja hem o način sar živinaja. Ola šaj vakerena hovajba baši amende, ponižinena amen anglo javera, uništinena amari literatura ili čak zakaninena pe amenge kaj fizički ka napadinen amen. Namesto te ikera holi, šaj te molina e Jehova te pomožinel okolenge so protivinena pe amenge te prifatinen o čačipe (Mat. 5:44, 45). Ponekogaš, šaj te ovel amenge pharo te prostina lenge, posebno keda ponašinena pe but lošno amencar. Ama, ako ačhovaja holjame hem na prostinaja keraja šteta korkori amenge (Ps. 37:8). Keda prostinaja e javerenge amen na dozvolinaja o lošna bukja so slučingje pe amenge te keren amen holjame (Ef. 4:31, 32; w21.04 8-9, pas. 3-4).

Dali nekoj taro tle mangle tano isklučimo taro sobranie? Adava šaj but te dukhal! Zamislin samo kobor dukhandilo e Jehova keda nesave taro angelija irangje leske plo dumo! (Juda 6). Hem razmislin kobor but sine razočarimo keda o Izraelcija, kolen so but mangela len sine, but puti buningje pe protiv leste (Ps. 78:41). Šaj te ove sigurno kaj amare nebesno Dade isto agjaar dukhala le keda nekoj taro amare mangle cidela pe lestar. Adaleske so haljovela kobor tuke pharo, ov ka sikavel tuke sočuvstvo agjaar so ka ohrabrinel tut hem ka poddržinel tut. Keda jekh čhavo ili čhaj ka mukhen e Jehova, o roditelija but puti pučena pe, dali šaj te keren sine nešto poviše te šaj te pomožinen e čhaveske te ačhol ko čačipe. Jekh phral priznajnela: „Mislinava sine kaj me sium krivo. Čak sine man lošna sune. Jekh phen kolakoro čhavo isto agjaar sine isklučimo, but puti pučela pe sine: „Kote grešingjum? Mislinava sine kaj na trudingjum man dovolno te sikavav me čhave te mangel e Jehova“ (w21.09 26-27, pas. 1-2, 4).

Nesave manuša mislinena kaj e Jehovaskoro narodo na valjani te sikavel e javeren baši Biblija adaleske so na gele ki nesavi važno teološko škola. Ama ola valjani te trudinen pe te arakhen o točna informacie baši nesavi buti. O biblisko pisateli o Luka trudingja pe te kerel baš adava. Ov trudingja pe vnimatelno te ispitinel sa taro početok. Ov manglja adala manuša so čitinena sine leskoro evangelie te oven sigurna ko adava so šungje bašo Isus (Luka 1:1-4). O manuša tari purani diz Verija sine slična sar o Luka. Keda prvo puti šungje o šukar haberi bašo Isus, vnimatelno istražingje o hebrejska spisija te šaj te dikhen dali tano točno adava so šungje (Dela 17:11). Ko slično način, o manuša da avdive valjani te ispitinen sa o informacie. Ola mora te sporedinen adava so vakerela e Devleskoro narodo adalea so vakerela i Biblija. Isto agjaar, valjani te proučinen so kergja e Devleskoro narodo ko amaro vreme. Ako šukar istražinena o informacie, nane te dozvolinen o predrasude ili adava so vakerena o javera te kojrarel len (w21.05 3, pas. 7-8).

Dali isi nekoj ko tlo sobranie so šaj te sikave leske gostoprimlivost? Ko nesave situacie amare phralja hem phenja posebno ka ceninen ako nakhavaja vreme lencar. Keda slavinena pe praznikija tari hovavni religija, nesavenge šaj pharo tano so našti te oven pumare familiencar. Javerenge šaj tano pharo ko nesave posebna dive taro berš, sar na primer, o dive keda mulo nekoj kas so mangle. Ako nudinaja asavke phralenge hem phenjenge te nakhava lencar vreme, amen sikavaja kaj čače grižinaja amen lenge (Fil. 2:20). Isi but pričine soske jekh hristijani ponekogaš šaj te osetinel pe korkori. Ama, na valjani nikogaš te bistra kaj o Jehova tano svesno bašo asavke čuvstvija. Ov često koristinela amare phralen hem phenjen te šaj te grižinel pe amenge (Mat. 12:48-50). Amen sikavaja kaj siem blagodarna bašo sobranie keda trudinaja amen te pomožina amare phralenge hem phenjenge. Bizi razlika sar ponekogaš osetinaja amen, nikogaš na siem korkori soske o Jehova sekogaš tano amencar! (w21.06 13, pas. 18-20).

O Isus ačhilo pozitivno hem ponadari da propovedingja iako nesave na mangle te šunen leskiri poraka. Soske? Ov džanlja kaj o manuša valjani te džanen o čačipe hem adaleske manglja kobor so šaj poviše manušenge te pomožinel. Isto agjaar, džanlja kaj nesave manuša kola so na mangle te šunen le ko početok, pokasno ka mangen te šunen le. Razmislin so slučingja pe leskere familijaja. Džikote o Isus kergja trin tekvaš berš pli služba, nijekh taro leskere phralja na ulo leskoro učeniko (Jovan 7:5). Ama, otkeda voskresningja, ola ule hristijanja (Dela 1:14). Amen na džanaja točno koj ka ovel e Jehovaskoro sluga. Nesave manušenge valjani poviše vreme te prifatinen o čačipe. Iako nesave na mangena te šunen amen, ola dikhena amaro šukar ponašibe hem amaro pozitivno stavi. Adava šaj te pottikninel len „te slavinen e Devle“ (w21.05 18, pas. 17-18).

Keda sine o Isus ki Phuv, dengja zapoved ple učenikonge koja so vklučinela sine duj bukja. Ov vakergja lenge te propovedinen o šukar haberi bašo Carstvo, hem sikavgja lenge sar te keren adava (Luka 8:1). Na primer, ov vakergja lenge so te keren keda o manuša ka šunen o haberi bašo Carstvo, a so te keren keda nane te šunen (Luka 9:2-5). Ov isto agjaar objasningja kaj leskere učenikija ka propovedinen bute manušenge hem ko but thana keda vakergja kaj ola ka den „svedoštvo sa e narodonge“ (Mat. 24:14; Dela 1:8). Ov vakergja lenge te sikaven e manušen te oven poslušna ko sa leskere zapovedija. O Isus sikavgja kaj akaja važno zadača ka kerel pe ko amaro da vreme „dži ko krajo taro akava sveto“ (Mat. 28:18-20). Hem ki vizija so dengja la e Jovaneske, o Isus jasno sikavgja kaj mangela sa leskere učenikija te pomožinen e javerenge te sikljoven bašo Jehova (Otk. 22:17; w21.07 2-3, pas. 3-4).

But manuša avdive tane sebična hem sikavena natprevaruvačko duho. Na primer, jekh biznismeni šaj te kerel šteta e javerenge samo te šaj te ovel po uspešno e javerendar ko plo biznis. Jekh sportisti šaj čak namerno te povredinel jekhe igrače taro javer timi samo te šaj te pobedinel. Jekh učeniko šaj ka prepišinel ko testi samo te šaj te khuvel ko nesavo poznato fakulteti. Sar hristijanja amen haljovaja kaj asavke bukja tane pogrešna, ola tane delo taro „postapke e grešno teloskere“ (Gal. 5:19-21). Ama, dali šaj nesave phralja ili phenja te sikaven natprevaruvačko duho ko sobranie bizo te oven svesna bašo adava? Važno tano te razmislina bašo akava soske o natprevaruvačko duho šaj te vlijajnel upro jekhipe ko sobranie. Šukar tano te dikha o primer e Jehovaskere verna slugengoro taro purano vreme kola so na dozvolingje ki lende te razvinel pe asavko duho (w21.07 14, pas. 1-2).

O verno mangipe pottikninela amen te pomožina okolenge soj tane tažna hem obeshrabrime. O ljubezna phralja hem phenja avdive spremno ačhovena okolencar taro sobranie kola soj tažna hem razočarime. Ola mangena pumare phralen hem phenjen, hem spremna tane te keren sa so šaj te šaj te pomožinen lenge (Izr. 12:25; 24:10). O apostol Pavle ohrabringja amen te postapina agjaar, keda vakergja: „Utešinen okolen soj razočarime, pomožinen okolenge soj slaba, oven strpliva sarinencar“ (1. Sol. 5:14). But puti, najšukar način sar šaj te pomožina nekaske soj obeshrabrimo tano agjaar so ka šuna le hem ka vakera leske kobor but mangaja le. O Jehova dikhela keda trudinea tut te pomožine leskere skapoceno bakhreske. Ko Izreki 19:17 pišinela: „Koj sikavela šukaripe e čoroleske, dela zaem e Jehovaske hem ov ka platinel leske bašo adava so kerela“ (w21.11 10, pas. 11-12).

So šaj te kera panda avdive te šaj te ova spremna bašo vreme so avela? Amen valjani te ova zadovolna adalea so isi amen hem amaro bahtale valjani te avel taro adava so siem paše amala e Jehovaja. So pošukar pendžaraja amare Devle doborom poviše ka ova uverine kaj ov šaj te zaštitinel amen keda o Gog taro Magog ka napadinel. O lafija taro avdisutno stiho sikavena soske o David sine uverimo kaj o Jehova šaj te poddržinel le. O David but puti sikavgja doverba ko Jehova, hem leskoro Devel nikogaš na razočaringja le. Keda sine terno, ov iklilo te borinel pe protiv o filistejsko džini o Golijat hem vakergja akale mokjno vojnikoske: „Avdive o Jehova ka del tut ko mle vasta“ (1. Sam. 17:46). Pokasno, keda o David služinela sine e careske e Sauleske, o Saul probingja but puti te mudarel le ama o Jehova sine e Davidea (1. Sam. 18:12). Adaleske so angleder dikhlja sar o Jehova pomožingja leske, o David džanlja kaj o Jehova ponadari da ka pomožinel leske (w22.01 6, pas. 14-15).

O Jehova sekogaš strplivo odvojnela peske doborom vreme kobor so valjani te šaj te završinel adava so počmingja. Ov kerela adava te šaj te slavinel plo anav hem te pomožinel e javerenge. Na primer, razmislin bašo adava sar o Jehova postepeno spremingja i Phuv e manušenge. Keda i Biblija opišinela i Phuv, oj vakerela kaj ov „odredingja lakere merke“, „čhivgja lakere temelija“ hem čhivgja „lakoro agolno bar“ (Jov 38:5, 6). Ov čak odvojngja peske vreme te proverinel adava so kergja (1. Moj. 1:10, 12). Šaj li te zamisline tuke sar osetinena pe sine o angelija džikote dikhena sine sar o Jehova postepeno stvorinela o bukja? Ola sine but vooduševime! So šaj te sikljova taro akava? O Jehova odvojngja peske poviše milja berša te šaj te stvorinel i Phuv, o zvezde hem sa javer. Ama keda dikhlja sa adava so ov vnimatelno stvoringja, vakergja kaj tano „but šukar“ (1. Moj. 1:31; w21.08 9-10, pas. 6-7).

Ki sporedba so vakergja la o Isus, jekh manuš spreminela pe sine te džal ko drumo. Ama angleder te džal, ov vikingja ple robon hem sekole jekheske dengja talantija kolencar so valjani sine te keren buti. Adaleske so o manuš džanela sine sekole roboskere sposobnostija, ov dengja e prvo roboske pandž talantija, e dujto roboske duj hem jekh talanti e trito roboske. O prva duj robija kergje but buti te šaj te zarabotinen poviše pare ple gospodareske. Ama o trito robo na kergja ništo e parencar so dobingja len hem adaleske o gospodari brkingja le tari buti. O prvo hem o dujto robo halile kaj i zadača so dengja len lengoro gospodari sine but važno hem adaleske kergje but buti ple gospodareske. Sar rezultati, zarabotingje duplo poviše. O gospodari nagradingja akale robon bašo lengoro baro trudo. Na samo so o gospodari sine bahtalo, nego isto agjaar dengja len poviše odgovornostija (w21.08 21, pas. 7; 22, pas. 9-​10).

O Jehova sikavgja kaj tano but strplivo ko akala posledna dive. Na mangela nikoj te ovel uništimo (2. Pet. 3:9). Ov dengja prilika sarinenge te kainen. Ama leskiri strplivost isi la granice. Okola so na mangena te poddržinen e Devleskoro carstvo, ka doživinen o ista posledice sar o faraoni taro e Mojseeskoro vreme. O Jehova vakergja e faraoneske: „Dži akana šaj sine te pružinav mlo vas hem te mukhav čuma upri tute hem upro tlo narodo, te šaj te brišinav tut tari phuv. Ama mukhljum tut dživdo, te šaj te sikavav mli mokj hem te objavinav mlo anav ki celo phuv“ (2. Moj. 9:15, 16). Ko krajo sa o narodija mora te džanen kaj samo o Jehova tano čačutno Devel (Ezek. 38:23). O tresibe soj spomnimo ko avdisutno stiho kerela lafi kaj okola so sar o faraoni, na mangena te prifatinen e Jehovaskoro pravo te vladinel, ka oven uništime zasekogaš (w21.09 18-​19, pas. 17-​18).

Dali osetinea dukh ko vilo adaleske so nekoj taro tle mangle tano isklučimo? A so šaj te kere ako nekoj taro sobranie vakerela tuke nešto kolea so kerela te osetine tut panda pološno? Našti sarinendar te očekujna sekogaš te vakeren i ispravno buti (Jak. 3:2). Sarine amen siem nesovršena, adaleske ma iznenadin tut ako nekoj na džanela so te vakerel, ili ako vakerela nešto kolea so dukhavela tut, iako šaj na manglja namerno te kerel adava. Na valjani te bistra e Pavleskoro sovet: „Trpinen tumen jekh jekhea hem celo vilea prostinen tumenge, čak keda nekoj ka vredžinel tumen“ (Kol. 3:13). Ponadari da poddržin okolen soj verna tari familija. Posebno akana valjani lenge tlo mangipe hem ohrabruvanje (Evr. 10:24, 25). Ponekogaš i familija okolengiri soj isklučime primetingje kaj nesave taro sobranie na kerena sine više lencar lafi, sar te phene ola da sine isklučime. Ma dozvolin te slučinel pe adava! Posebno valjani te pofalina hem te ohrabrina e ternen kaskere so o roditelija čhinavgje te služinen e Jehovaske (w21.09 29, pas. 13-​14; 30, pas. 16).

Keda jekh poterno hem pophuro kerena lafi, o solduj šaj te ohrabrinen pe (Rim. 1:12). Tumen o poterne ka oven panda posigurna kaj o Jehova grižinela pe ple narodoske, hem o pophure ka osetinen pe mangle. Ola ka oven bahtale te raskažinen tumenge sar o Jehova dengja len bereketija. Obično o fizičko šužipe e beršencar našavgjovela, ama okola soj verna e Jehovaskere, ovena sa pošuže angli leste (1. Sol. 1:2, 3). Soske? Adaleske so beršencar dozvolingje e Devleskoro duho te obučinel len hem te pomožinel len te razvinen but šuže osobine. So poviše zapoznajnaja amare pophuren, poštujnaja len hem sikljovaja lendar, doborom poskapocena ka oven amenge! O sobranie ovela posilno na samo keda o poterne ceninena e pophuren, nego isto agjaar keda o pophure ceninena e poternen (w21.09 7, pas. 15-​18).

Amen mora te pazina amen te na ovel amen strogo osuduvačko stavi hem te trudina amen te ova pherde milost, sar soj amaro Devel (Ef. 2:4). Te ove milostivo na značinela samo te ovel tuke žal e javerenge, nego adava značinela te kere da nešto e javerenge te šaj te pomožine lenge. Adaleske, sarine amen šaj te razmislina save potrebe isi amare familija, ko sobranie hem e manušen soj okolu amende. Sigurno isi but prilike kote so šaj te sikava milost! Dali nekaske valjani uteha? Šaj li praktično te pomožina agjaar so ka ingara hajbaske ili te razmislina so javer šaj te kera? Dali nekaske so irangja pe palem ko sobranie, valjani amal kova so ka ohrabrinel le? Šaj li te kera javerencar lafi bašo šukar haberi kova so dela uteha? (Jov 29:12, 13; Rim. 10:14, 15; Jak. 1:27). Ako siem svesna bašo e javerengere potrebe, ka primetina kaj isi but prilike okolu amende sar šaj te sikava milost. Keda sikavaja milost, keraja amare nebesno Dade bahtalo — o Devel kova soj „barvalo ki milost“! (w21.10 13, pas. 20-22).

Ko 23 Psalm, o David spomninela bukja kola soj tane čače važna — o but duhovna bereketija kolende so uživinela sine soske prifatingja e Jehova sar plo Pastiri. O Jehova vodinela le sine „ko pravedna drumija“ hem verno poddržingja e Davide hem ko šukar dive hem ko lošna. O David sine svesno kaj, iako o Jehova ingarela le sine ko „thana pherde čarjaja“, leskoro životo na sine te ovel lokho. Ov džanlja kaj ponekogaš šaj te obeshrabrinel pe sar te phene phirela taro than kote so isi baro karanluko. Isto agjaar džanlja kaj ka oven le dušmanja. Ama adaleske so o Jehova sine leskoro Pastiri, o David pišingja kaj „nane te daral taro lošnipe“. Taro akava jasno dikhela pe ko savo način e Davideske na falingja nijekh šukaripe. Ko duhovno pogled le sine le sa so valjani leske sine. Leskoro bahtalipe na zavisinela sine taro materijalna bukja. Ov sine zadovolno adalea so dela le sine o Jehova hem najvažno sine leske o bereketi hem i zaštita lestar. Taro e Davideskere lafija šaj te haljova kobor tano važno ispravno te dikha ko materijalna bukja (w22.01 3-4, pas. 5-7).

E Jehovaskere sluge taro purano vreme propovedinena sine manušenge so na mangle te šunen. Na primer, o Noe „propovedinela sine i pravednost“, verojatno 40 ili 50 berš (2. Pet. 2:5). Sigurno ov očekujnela sine o javera te šunen le, ama o Jehova na vakergja leske kaj adava ka slučinel pe. Namesto adava, keda dengja le upatstvija sar te gradinel i arka, o Devel vakergja leske: „Khuv ki arka, tu, tli romni, te čhave hem te čhavengere romnja“ (1. Moj. 6:18). Hem keda vakergja leske kobor bari valjani sine te ovel i arka, o Noe verojatno halilo kaj nane but manuša te šunen le, soske nane te ovel sine bute dženenge than (1. Moj. 6:15). Hem čače sine agjaar, nijekh manuš taro adava nasilno sveto na šungja e Noe (1. Moj. 7:7). Dali o Jehova mislingja kaj o Noe na uspejngja ki pli zadača? Ni hari. Anglo e Devleskere jakhja, o Noe sine uspešno propovedniko, soske ov verno kergja sa adava so rodingja lestar o Jehova te kerel (1. Moj. 6:22; w21.10 26, pas. 10-11).

Zamislin samo sar osetingja pe i Rut keda šungja adala lafija tari Noemina! Oj mukhlja sa pali peste, samo te šaj te ačhol e Noeminaja. Rungja laja, utešingja la hem divencar phirgja laja. Sepak, palo sa akava, i Noemina vakergja: „O Jehova kergja te iranav man čuče vastencar“. Lakere lafija šaj sine te haljon pe sar ka phene oj na ceninela ni hari sa adava so kergja i Rut, koja so tergjola sine uzi late. I Rut verojatno osetingja pe but povredimi! Sepak oj ačhili e Noeminaja (Rut 1:3-18). Nesavi phen soj razočarimi šaj te vakerel nešto so ka povredinel amen, iako šaj but pomožingjem lake. Ama trudinaja amen te na la adala lafija upri amende. Amen ačhovaja uzi amari phen kaske so valjani pomoš, hem molinaja e Jehova te pomožinel amenge te arakha načinija sar te utešina la (Gal. 6:2; w21.11 11, pas. 17-​19).

Ki Biblija o lafija „sveto“ hem „svetost“ obično koristinena pe baši moralno hem religiozno čistota. Akala lafija isto agjaar koristinena pe keda nekoj tano birimo te služinel e Devleske. Javere lafencar, amen siem sveta ako siem moralno čista, ako obožavinaja e Jehova ko ispravno način hem ako isi amen paše amalipe lea. Blagodarna siem soske iako siem nesovršena, a o Jehova tano sveto, sepak ov mangela te ovel paše amal amencar. O Jehova tano sveto hem čisto ko sa. Akava doznajnaja le taro adava so vakergje o serafimija — angelija soj tane paše uzo e Jehovaskoro prestol. Nesave lendar vakergje: „Sveto, sveto, sveto tano o Jehova o zapovedniko e vojskengoro“ (Isa. 6:3). Džangjola pe, te šaj te ovel len paše amalipe e Devlea kova soj tano sveto o angelija da mora te oven sveta hem ola tane sveta (w21.12 3, pas. 4-5).

O terne but puti razmislinena bašo adava kova drumo ka ovel lenge o najšukar ko životo. Tari jekh strana, o učitelija hem i familija kola so nane e Jehovaskere svedokija šaj te ohrabrinen len te džan ko fakulteti te šaj te arakhen šukar buti hem te zarabotinen but pare. Ako birinena asavko drumo, adava šaj te lel lendar but vreme. A tari javer strana, o roditelija hem o phralja šaj ohrabrinena e ternen te posvetinen pumaro životo e Jehovaske ki služba. So šaj te pomožinel jekhe terneske kova so mangela e Jehova, te anel i najšukar odluka? Ka ovel šukar ako čitinela hem razmislinela bašo Efešanite 5:15-17. Otkeda ka čitinel akala stihija šaj te pučel pe: „Koja tani e Jehovaskiri volja? Savi odluka ka kerel le bahtalo? Koja odluka ka pomožinel mange najšukar te koristinav mlo vreme?“ Ma bistre, „o dive tane lošna“ hem o krajo akale svetoskoro kolea so vladinela o Satana tano but paše (w22.01 27, pas. 5).

Keda ulo o Jakov e Isuseskoro verno sledbeniko? Otkeda o Isus voskresningja „pojavingja pe e Jakoveske, a palo adava sa e apostolenge“ (1. Kor. 15:7). Otkeda slučingja pe adava, e Jakoveskoro životo skroz meningja pe. Ov sine zaedno e javere apostolencar ki jekh upruni soba ko Erusalim džikote adžikerena sine te dobinen o sveti duh (Dela 1:13, 14). Palo nesavo vreme, e Jakove sine le bari čest te služinel sar členi ko vodečko telo taro prvo veko (Dela 15:6, 13-22; Gal. 2:9). Hem otprilika angleder 62 berš a.e., o Devel koristingja le te pišinel jekh pismo e pomazime hristijanenge. Akava pismo pomožinela amenge da avdive, bizi razlika dali isi amen nadež te živina večno ko nebo ili ki Phuv (Jak. 1:1). Sprema o istoričari Josif Flavij, o evrejsko prvosvešteniko o Ana (Ananija), naredingja o Jakov te ovel mudardo. O Jakov ačhilo verno e Jehovaske dži ko krajo taro plo životo ki Phuv (w22.01 8, pas. 3; 9, pas. 5).

Jekh pouka so šaj te sikljova taro avdisutno stiho tani kaj na valjani te očekujna e Jehovastar te zaštitinel amen taro iskušenija so ispitinena amari vera. Isto sar o Isus kova so sine iskušimo najviše so šaj, amen da valjani te ova spremna te dokažina amari vernost čak ako valjani te mera (Mat. 16:24, 25). Ama šaj te ova uverime kaj o Jehova nane te mukhel te ova iskušime poviše taro adava so šaj te izdržina (1. Kor. 10:13). Jekh javer pouka so šaj te sikljova tani kaj sar o Isus amen da šaj te cida muke iako na kergjem ništo pogrešno (1. Pet. 2:19, 20). Adala so protivinena pe amenge na kerena adava adaleske so kergjem nešto pogrešno, nego adaleske so na siem delo taro sveto hem adaleske so svedočinaja o čačipe (Jovan 17:14; 1. Pet. 4:15, 16). O Isus halilo soske o Jehova dozvolingja te cidel muke. Ama, javera verna sluge e Devleskere ponekogaš pučle pe soske o Jehova dozvolinela te slučinen pe asavke bukja (Avak. 1:3). Amaro milostivo hem strplivo Devel džanela kaj len isi len vera, ama lenge valjani uteha koja so samo ov šaj te del (2. Kor. 1:3, 4; w21.04 11, pas. 9-10).

O Jehova ka prifatinel amaro obožavibe ako tano sprema leskiri namera hem ako keraja adava adaleske so mangaja hem poštujnaja le. Amen džanaja kaj o Jehova zaslužinela te ovel obožavimo hem adaleske mangaja te kera adava ko najšukar način. Jekh način sar šaj te obožavina e Jehova tano keda molinaja amen leske. I Biblija sporedinela amare molitve temjanea kova so valjani sine šukar te spreminel pe hem te tharel pe ko sveto šatori hem pokasno ko hrami. Adava temjani sine ugodno e Jehovaske, slično amare molitve so avena taro vilo tane „ugodna“ leske čak keda koristinaja ednostavna lafija (Izr. 15:8; 5. Moj. 33:10). O Jehova mangela te šunel amare molitve kolencar so sikavaja kaj mangaja le hem siem blagodarna leske. Ov but mangela te džanel bašo so sekirinaja amen, bašo so nadinaja amen hem amare želbe. Angleder te molina amen e Jehovaske valjani šukar te razmislina bašo adava so mangaja te vakera leske, ako keraja adava ka thara o najšukar temjani amare nebesno Dadeske (w22.03 20, pas. 2; 21, pas. 7).

Ko Armagedon nane amen te odlučina kaske o Jehova ka sikavel milost a kaske na (Mat. 25:34, 41, 46). Dali ka ovel amen doverba ko e Jehovaskere osude, ili ka čhinava te služina leske adaleske so na složinaja amen leskere odlukencar? Jasno tano kaj panda akana valjani te bajrara amari doverba ko Jehova te šaj ki idnina te ovel amen celosno doverba ki leste. Zamislin tuke sar ka osetina amen ko e Devleskoro nevo sveto. Nane više te postojnen i hovavni religija, o alčno trgovsko sistem ni o političko sistem kova so vekoncar maltretiringja e narodon hem mučingja len. O nasvalipe, o phuripe hem o meribe nane više te oven delo taro amaro životo. O Satana hem o demonija ka oven phanle milja berša. O posledice tari lengiri pobuna nane te postojnen više (Otk. 20:2, 3). Kobor ka ova samo blagodarna so sine amen doverba ko e Jehovaskere odluke! (w22.02 6-7, pas. 16-17).

O Isus kerela sine o prvo čekori te šaj te kerel mir hem pottikninela sine e javeren da te rešinen o problemija so sine len e javerencar. Ov sikavgja len kaj ako mangena o Jehova te prifatinel lengoro obožavibe ola mora te oven ko mir pumare phralea (Mat. 5:23, 24). Isto agjaar ov but puti pomožingja e apostolenge te čhinaven te rasprajnen pe bašo adava koj lendar tano najbaro (Luka 9:46-48; 22:24-27). Te šaj te kera mir, nane dovolno samo te na rasprajna amen. Valjani te trudina amen te smirina amen e phralencar hem te ohrabrina amare phralen hem phenjen te rešinen o problemija so isi len e javerencar (Fil. 4:2, 3; Jak. 3:17, 18). Šaj te puča amen: „So sium spremno te žrtvujnav te šaj te smirinav man e javerencar? Dali ikerava holi keda jekh phral ili phen povredinela man? Dali adžikerava o javer te avel ki mande te šaj te smirina amen, ili me kerava o prvo čekori čak keda mislinava kaj ov tano krivo? (w22.03 10, pas. 10-​11).

But vreme angleder, i Biblija prorokujngja kaj e Devleskoro narodo „spremno ka nudinel pe“ te služinel e Jehovaske telo e Isuseskoro vodstvo (Ps. 110:3). Adava proroštvo ispolninela pe baš avdive. Sekova berš e Jehovaskere svedokija nakhavena milionja saatija ko propovedibe. Ola kerena adava dobrovolno ko plo trošako. Isto agjaar odvojnena vreme te šaj te poddržinen pumare phralen ko fizičko, ko emocionalno hem ko duhovno pogled. O imenujme phralja nakhavena but vreme te spreminen pe bašo točke so isi len ko sostanokija hem te posetinena e phralen hem e phenjen te šaj te ohrabrinen len. Soske kerena sa akava? Ola tane pottiknime taro mangipe — mangipe sprema o Jehova hem sprema o pašutne (Mat. 22:37-39). O Isus dengja amen but šužo primer agjaar so čhivgja e javerengere potrebe angleder ple. Amen daja amendar sa te šaj te dža palo leskoro primer (Rim. 15:1-3). Ako postapinaja agjaar ka oven amen bare bereketija (w22.02 20, pas. 1-2).

Ko Izrael pobaro delo taro manuša kerena sine ko nive buti hem o rabotnikija sine platime ko krajo taro dive. Ako na dela pe sine i dnevnica e rabotnikoske ko krajo taro adava dive, šaj nane te ovel le sine pare te šaj te kinel ple familijake hajbaske. O Jehova vakergja: „Ov tano ki nevolja hem leskoro životo zavisinela tari leskiri plata“ (5. Moj. 24:14, 15; Mat. 20:8). Avdive but rabotnikija lena plata jekh puti ili duj puti ko masek, a na sekova dive. Ama, o načelo so arakhljola ki 3. Mojseeva 19:13 panda važinela. Nesave gazdija iskoristinena pumare rabotnikon agjaar so platinena len but pohari nego kobor so valjani. Ola džanena kaj akale rabotnikon nane len javer izbor hem kaj ka ačhon te keren buti iako tane but hari platime. Javere lafencar, asavke gazdija na dena e rabotnikonge lengiri plata. Jekh hristijani kole so isi le rabotnikija mora te ovel fer sprema lende (w21.12 10, pas. 9-10).

Palo sa o muke so cidingja o Isus, ov sigurno sine but žedno. Te šaj te na ovel žedno valjangja leske pomoš. E Isuseske na sine ladžavo te pučel bašo bukja so valjani leske sine. Adaleske amen da na valjani te ladža. Nesave amendar šaj na mangena te roden pomoš e javerendar, ama keda ka valjani amenge pomoš amen na valjani te ladža te roda e javerendar te pomožinen amenge. Na primer, ako siem pophure ili nasvale amen šaj ka valjani te puča jekhe amale te ingarel amen ki dukjana ili ko doktori. Ako siem obeshrabrime šaj valjani te puča jekhe starešina ili zrelo amale taro sobranie te šunel amen ili te vakerel amenge jekh „šukar lafi“ kova so ka ohrabrinel amen (Izr. 12:25). Te na bistra kaj amare phralja hem phenja mangena amen, hem mangena te pomožinen amenge „ko phare dive“ (Izr. 17:17). Ama, ola našti te čitinen amare misle hem te džanen so valjanela amenge ako amen na vakeraja lenge (w21.04 11-12, pas. 11-12).

Bute dženenge amendar tano pharo keda ka meninen pe amare okolnostija. Nesave so but vreme služingje ki nesavi specijalno polnovremeno služba dobingje nevi zadača. Javera mora sine te čhinaven te služinen ki nesavi zadača koja so but mangena la sine adaleske so phurile. Keda doživinaja asavke promene normalno tano te razočarina amen. Polokhe šaj te prilagodina amen ko promene ako dikhaja ko bukja sar o Jehova so dikhela. Ov kerela bare bukja avdive, hem amen isi amen i čest te ova leskere sorabotnikija (1. Kor. 3:9). E Jehovaskoro mangipe sprema amende nane te meninel pe. Znači, ako nesavi promena ki organizacija pogodinela tute lično, ma trošin but vreme ko adava te razmisline taro kola pričine tani andi adaja promena. Namesto te rode o „purane dive“, molin tut te šaj te dikhe o šukar bukja so anela len i promena (Prop. 7:10). Te ovel amen pozitivno stavi. Agjaar ka šaj te ačhova bahtale hem verna čak keda ka meninen pe amare okolnostija (w22.03 17, pas. 11-12).

Kaske sikavela o Jehova verno mangipe? Ki Biblija pišinela kaj amen šaj te manga nesave bukja, sar soj „o zemjodelstvo“, „i mol hem o maslo“, „i pouka“, „o džandipe“ hem „i mudrost“ (2. Let. 26:10; Izr. 12:1; 21:17; 29:3). Ama, o verno mangipe nikogaš na sikavela pe bukjenge, nego samo manušenge. Hem o Jehova na sikavela verno mangipe bilo kaske, nego samo okolenge soj tane paše amala lea. Amaro Devel tano verno ple amalenge. Le isi le but šuži namera lencar, hem nikogaš nane te otkažinel pe lendar. O Jehova sikavgja mangipe sa e manušenge. O Isus vakergja jekhe manušeske so vikinela pe sine Nikodim: „O Devel doborom but manglja e sveto so dengja ple edinstveno bijame Čhave, te šaj sekoj so ka verujnel ki leste te na ovel uništimo nego večno te živinel“ (Jovan 3:1, 16; Mat. 5:44, 45; w21.11 2, pas. 3; 3, pas. 6-7).

O životo ko akava sveto tano pharo, hem sar so ka nakhel o vreme šaj te ovel panda popharo (Mat. 24:21). Edvaj adžikeraja o dive keda sa akala problemija nane više te oven, keda ka bistra len hem nikogaš više nane te slučinen pe! (Isa. 65:16, 17). Znači, ponadari da valjani te istrajna. Soske? Adaleske so o Isus vakergja: „Preku tumari istrajnost ka spasinen tumaro životo“ (Luka 21:19). Ka ovel amenge polokho te istrajna ako razmislinaja bašo adava sar o javera istrajnena keda isi len slična problemija sar amare. Koj tano najšukar primer baši istrajnost? O Jehova. Šaj akava odgovor iznenadinela tut. Ama razmislin bašo akava. Akale svetoja vladinela o Satana, adaleske tano pherdo problemencar. E Jehova isi le mokj odma te čhinavel sa o problemija, sepak ov adžikerela ko dive so odredingja le bašo adava (Rim. 9:22). Ama džikote na avela adava dive, amaro Devel ponadari da istrajnela (w21.07 8, pas. 2-4).