Septemvri

Nesave manuša ko e Isuseskoro vreme na sine zadovolna taro bukja so sikavela len sine ov. Ola mangena sine nešto poviše. Ama, keda odbingja te sikavel lenge o znako so ola rodingje, ola spotakningje pe (Mat. 16:4). So vakerela i Biblija? O proroko o Isaija bašo Mesija vakergja: „Ov nane te vikinel hem nane te vazdel plo glaso, leskoro glaso nane te šungjol ko ulice“ (Isa. 42:1, 2). O Isus kergja pli služba ko jekh skromno način. Ov na gradingja bare hramija hem na uravgja posebna religiozna šeja, a isto agjaar na manglja o manuša te den le važna religiozna titule. Džikote sudinena le sine, o Isus odbingja te vooduševinel e care e Irode adalea so ka kerel čudo iako leskoro životo sine ki opasnost (Luka 23:8-11). O Isus kergja nekobor čudija, ama leskiri glavno cel sine te propovedinel o šukar haberi. Ov vakergja ple učenikonge: „Adaleske aljum“ (Mar. 1:38; w21.05 4, pas. 9-10).

Amen rodaja okolen so „ispravno dikhena ko večno životo“ (Dela 13:48). Te šaj te oven učenikija, mora te pomožina lenge 1) te haljoven, 2) te prifatinen hem 3) te primeninen adava so sikljovena tari Biblija (Kol. 2:6, 7; 1. Sol. 2:13). Sarine ko sobranie šaj te pomožinen e interesentenge agjaar so ka sikaven lenge mangipe hem ljubezno ka dodžakeren len keda ka aven ko sostanok (Jovan 13:35). A o objaviteli so vodinela o kursi šaj ka valjani te trošinel but vreme hem sila te šaj te pomožinel e interesenteske te meninel nesave purane veruvanja hem postapke (2. Kor. 10:4, 5). Šaj ka valjani but masekija te pomožina nekaske te kerel akala promene ko plo životo te šaj te krstinel pe. Ama adava so ka trudina amen nane te ovel džabe (w21.07 3, pas. 6).

Dali lično siem uverime kaj sar e Jehovaskere svedokija sikavaja o čačipe, hem kaj amaro obožavibe tano o edinstveno način so prifatinela le o Jehova? O Pavle sine but uverimo kaj arakhlja o čačipe (1. Sol. 1:5). Leskoro veruvanje na temelinela pe sine ko čuvstvija, nego ov hor proučinela sine e Devleskoro Lafi. Ov verujnela sine kaj „celo lil avela taro Devel“ (2. Tim. 3:16). Hem so doznajngja? Ko spisija o Pavle arakhlja jasna dokazija kaj o Isus sine o vetimo Mesija, dokazija so o evrejska religiozna vodačija otfrlingje. Akala licemerna vodačija vakerena sine kaj sikavena e manušen o čačipe bašo Devel, a ustvari kerena sine bukja so o Devel mrzinela len (Tit 1:16). Različno lendar, o Pavle na birinela sine ko kola delija taro e Devleskoro Lafi ka verujnel. Ov sine spremno te sikavel hem „celosno te kerel e Devleskiri volja“ (Dela 20:27; w21.10 18, pas. 1-2).

Iako amen sadinaja hem čhivaja pani, javere lafencar propovedinaja hem sikavaja, na smejnaja te bistra kaj o Devel dela te bajrol (1. Kor. 3:6, 7). E Jehovaske sa o manuša tane skapocena. Ov dengja amen i prednost zaedno leskere Čhavea te kheda e manušen taro sa o nacie angleder te avel o krajo akale svetoskoro (Agej 2:7). Amaro propovedibe šaj te sporedinel pe jekhe akcijaja spasibaske. Amen siem sar členija taro jekh timi kova soj bičhaldo te spasinel e manušen kola so zaglavingje ko jekh rudniko. Iako šaj samo nekobor rudarija ka oven spasime, i buti taro sa o spasuvačija vredinela. Isto tano amare propovedibaja ki amari služba. Na džanaja kobor džene ka oven spasime taro e Satanaskoro sveto. Ama, o Jehova šaj te koristinel bilo kas amendar te spasinel len. O Andreas, kova so živinela ki Bolivija, vakerela: „Džanava kaj keda jekh manuš ka sikljovel o čačipe hem ka krstinel pe, adava tano adaleske so but džene sorabotingje te pomožinen leske“. Amen da mangaja te ovel amen asavko pozitivno stavi ki amari služba. Ako keraja agjaar, o Jehova ka del amen bereketi hem i služba ka anel amenge bahtalipe (w21.05 19, pas. 19-20).

E lovdžija isi le jekh cel — te astarel ili te mudarel nesave životno. Te šaj te kerel adava, ov koristinela razna zamke ili stapice, sar adala so spomningje e Joveskere hovavne utešitelija (Jov 18:8-10). So kerela jekh lovdžija te šaj te astarel jekhe životno? Ov vnimatelno dikhela e životno. Kote džala? So mangela? Koja tani i najšukar stapice te astarel le? O Satana tano sar adava lovdžija. Ov vnimatelno dikhela amen, kote džaja hem so interesinela amen. Palo adava, ov birinela stapica kolaja so mislinela kaj ka astarel amen keda najhari očekujnaja. Ama, i Biblija vakerela amenge kaj čak ako astardilem ki zamka, sepak šaj te naša latar. Isto agjaar, sikavela amen sar šaj te izbegina sa adala zamke. Duj taro e Satanaskere najuspešna zamke tane i gordost hem i alčnost. Poviše milja berša o Satana uspešno koristinela akala stapice. Ov tano sar okola so astarena čiriklen, agjaar so astarena len ki stapica ili zarobinena len ki mreža (Ps. 91:3). Ama, amen ne mora te ova astarde taro Satana. Soske? Adaleske so o Jehova sikavela amenge save taktike koristinela o Satana te šaj te astarel e manušen (2. Kor. 2:11; w21.06 14, pas. 1-2).

Amare verna phure phralja hem phenja tane but skapocena. E Devleskoro Lafi sporedinela o parne bala jekhe krunaja (Izr. 20:29). Ama, ponekogaš šaj te na primetina len. O terne so haljovena kobor vredinena amare pophure phralja hem phenja ka dobinen nešto soj poskapoceno taro doslovno barvalipe. Amare pophure phralja hem phenja tane skapocena e Jehovaske. O Jehova šukar pendžarela len hem ceninela lengere but šuže osobine. Ov tano bahtalo keda o pophure prenesinena i mudrost e poternenge so ola stekningje la džikote služinena sine e Jehovaske (Jov 12:12; Izr. 1:1-4). O Jehova isto agjaar ceninela lengiri istrajnost (Mal. 3:16). Iako sine len problemija ko životo ola sepak ačhile verna e Jehovaske. Lengiri nadež baši idnina akana tani pozorali nego keda prvo puti šungje bašo čačipe. Hem o Jehova mangela len soske ola čak ko phuripe ponadari vakerena e javerenge bašo leskoro anav (Ps. 92:12-15; w21.09 2, pas. 2-3).

Šukar tano nesavo puti te ispitina amare motivija. Šaj te puča amen: „Dali merinava mli vrednost agjaar so sporedinava man e javerencar? Dali dava mandar sa ko sobranie samo te šaj te ovav o najšukar ili barem pošukar taro nesavo phral ili phen? Ili, adava so kerava mangava te kerav le e Jehovaske?“ I Biblija pottikninela amen te na sporedina amen e javerencar. Soske? Prvo, ako mislinaja kaj siem pošukar amare phralendar, tegani šaj te ova gorda. Hem dujto, ako mislinaja kaj o javera tane pošukar amendar, tegani verojatno ka obeshrabrina amen (Rim. 12:3). Nikogaš na valjani te bistra kaj o Jehova privlečingja amen ki peste na adaleske so siem šuže, so keraja šukar lafi ili soske o javera mangena amen, nego adaleske so siem spremna te manga le hem te šuna leskere Čhave (Jovan 6:44; 1. Kor. 1:26-31; w21.07 14-15, pas. 3-4).

Te šaj te kera adava valjani te molina amen, te proučina e Devleskoro lafi hem te razmislina bašo adava so čitinaja. Ker akala bukja hem rode sila taro Jehova. Leskoro sveti duh ka pomožinel tuke te sikljove te na sporedine tut e javerencar. O Jehova isto agjaar ka pomožinel tuke te dikhe dali uljan zavidlivo ili gordo hem ka pomožinel tuke sigate te kere o promene (2. Let. 6:29, 30). O Jehova džanela sar osetinaja amen. Ov džanela kaj borinaja amen protiv o duho akale svetoskoro hem amari nesovršenost. Keda o Jehova dikhela kobor trudinaja amen te borina amen protiv akala bukja, ov panda poviše mangela amen. Te šaj te sikavel save čuvstvija isi le sprema amende, o Jehova koristinela i vrska so isi maškar i daj hem lakoro bebe (Isa. 49:15). Kobor utešno tano adava so džanaja kaj e Jehova isi le baš asavko mangipe sprema amende keda dikhela kaj borinaja amen sa amare silencar te služina leske! (w21.07 24-​25, pas. 17-​19).

Amen šaj te bajrara amaro bahtalipe ako celo dušaja keraja bilo koja zadača so ka dobinala ki služba bašo Jehova. Ov „celosno zafatimo“ ki služba, hem ko sobraniska aktivnostija (Dela 18:5; Evr. 10:24, 25). Spremin tut šukar bašo sostanokija te šaj te de ohrabruvačka komentarija. Dikh seriozno ki bilo koja zadača so dobinea la ko sostanok Amaro životo hem služba. Ako zamolingje tut te pomožine ki nesavi sobranisko zadača, iker tut ko vreme hem ov odgovorno. Ma mislin kaj i zadača so dengje tut nane važno hem kaj na valjani te trošine tlo vreme ki late. De tutar sa te šaj te ove povešto ki tli zadača (Izr. 22:29). So pozafatimo ka ove ko tle duhovna aktivnostija hem zadače, doborom posigate ka napredujne hem ka ove pobahtalo (Gal. 6:4). Isto agjaar, ka ovel tuke polokho te ove bahtalo keda o javera ka dobinen i zadača koja so tu bi mangea te dobine la (Gal. 5:26; w21.08 23, pas. 11).

Amen mora te cida amendar i gordost hem ponadari da te manga te sikljova. Isto sar jekh nasvalipe so šaj te kerel amaro doslovno vilo te na kerel šukar buti, agjaar i gordost šaj te kerel amaro simbolično vilo te na kerel šukar buti hem agjaar te na ova poslušna ko e Jehovaskere upatstvija. O Fariseija sine doborom but gorda so na mangle te verujnen ko jasna dokazija kaj o Isus sine vodimo taro e Devleskoro duho hem kaj tano e Devleskoro Čhavo (Jovan 12:37-40). Adava sine opasno drumo ko kova so džana sine, soske agjaar našavgje i prilika te dobinen o večno životo (Mat. 23:13, 33). But tano važno ponadari da te dozvolina e Devleskoro Lafi hem leskoro duho te keren promene ki amari ličnost hem te vlijajnen ko amaro razmisluvanje hem ko amare odluke. Adaleske so o Jakov sine ponizno, ov sine spremno te sikljovel taro Jehova. Hem adaleske so ov sine ponizno šaj sine te ovel šukar učiteli (w22.01 10, pas. 7).

Keda istrajnaja ki molitva, šaj te ova sigurna kaj amaro nebesno Dad šunela amare molitve (Kol. 4:2). Iako šaj te mislina amenge kaj o odgovor kasninela, o Jehova vetinela kaj ka odgovorinel amenge „keda valjani amenge pomoš“, a adava ka ovel ko pravo vreme (Evr. 4:16). Adaleske, nikogaš na smejnaja te krivina e Jehova ako na odgovorinela amenge ko vreme keda amen mislinaja kaj valjani. Na primer, but džene beršencar molinena pe te avel e Devleskoro Carstvo hem te anel krajo akale lošno svetoske. O Isus čak vakergja te molina amen bašo akava (Mat. 6:10). Ama ka ovel but glupavo ako našavaja amari vera ko Devel adaleske so o krajo na alo ko vreme keda amen očekujngjem te avel (Avak. 2:3; Mat. 24:44). Ka ova mudra ako ponadari da adžikeraja ko Jehova hem isi amen vera džikote molinaja amen leske. O krajo ka avel ko pravo vreme, soske o Jehova angleder više odredingja o točno „dive hem saati“ keda te avel. Hem adava dive ka odgovorinel sarinenge (Mat. 24:36; 2. Pet. 3:15; w21.08 10, pas. 10-11).

O phure soj ponizna, haljovena kaj sar so phujrovena našti više te keren doborom sar so kerena sine angleder. Na primer, razmislin bašo amare pokrainska nadglednikija. Keda pherena 70 berš, ola tane zamolime te služinen ki javer zadača. Adava šaj te ovel lenge pharo soske sine bahtale ki adaja zadača hem but mangena la sine. Ama, ola haljovena kaj pošukar tano o poterne phralja te keren adaja zadača. Adalea sikavena kaj isi len slično stavi sar o levitija taro purano Izrael, kola so valjani sine te čhinaven e službaja ko sveto šatori keda ka pheren sine 50 berš. Adala pophure levitija sine bahtale bizi razlika savi zadača sine len. Ola revno kerena sine sa so šaj ko ple neve zadače hem pomožinena sine isto agjaar e ternenge (4. Moj. 8:25, 26). Avdive, okola so angleder sine pokrainska nadglednikija, iako čhinavgje te posetinen o sobranija, ola dena pestar sa te pomožinen ko pumaro sobranie (w21.09 8-9, pas. 3-4).

O Isus vakergja jekh ohrabruvačko sporedba bašo jekh buntovno čhavo koja soj pišimi ko Luka 15:11-32. Jekh terno manuš buningja pe protiv po dad hem gelo peske kheraldan ki jekh „dur phuv“. Ov adari počmingja te živinel nemoralno. Ama keda počmingja te ovel leske pharo ko životo, počmingja seriozno te razmislinel bašo adava so kergja. Halilo kobor pošukar sine leske džikote sine ko po dad. O Isus vakergja kaj akava terno manuš halilo pli greška. Ov odlučingja te iranel pe khere hem te molinel ple dade te prostinel leske. O momenti keda akava čhavo halilo kobor grešingja sine but važno. Ov lela te kerel nešto. O buntovno čhavo sikavgja kaj iskreno kainela pe bašo adava so kergja. Akaja sporedba nane samo jekh but šuži paramis. O načelija so isi ki late šaj te pomožinen e starešinenge keda trudinena pe te otkrinen dali nekoj so kergja seriozno grevo čače kainela pe (w21.10 5, pas. 14-​15).

So nane te ovel tresimo, ili cidimo? O apostol Pavle vakerela: „Adaleske so valjani te dobina o carstvo kova so našti te tresinkerel pe, te ačhova dostojna... e Devleske agjaar sar soj leskiri volja, daraja hem hor poštujbaja“ (Evr. 12:28). Otkeda ka završinel akava posledno tresibe, samo e Devleskoro Carstvo ka postojnel (Ps. 110:5, 6; Dan. 2:44). O manuša mora akana te birinen soske na ačhilo panda but vreme! Ako birinena ponadari da te poddržinen akava sveto ola ka oven uništime. Ako birinena te služinen e Jehovaske hem kerena promene ko plo životo te šaj te keren leskiri volja, tegani ka živinen večno (Evr. 12:25). Amare propovedibaja šaj te pomožina e manušenge te anen akaja važno odluka. Hem nikogaš te na bistra o lafija taro amaro gospodari o Isus: „Akava šukar haberi bašo carstvo ka propovedinel pe ko celo sveto bašo svedoštvo sa e narodonge, hem tegani ka avel o krajo“ (Mat. 24:14; w21.09 19, pas. 18-​20).

Tumen o starešine, koristinen sekoja prilika te šaj te ohrabrinen okolen tari familija so ačhile verna. Isi tumen bari odgovornost te utešinen len (1. Sol. 5:14). Spremno ohrabrinen len, keren lencar lafi angleder hem palo sostanokija. Džan ki lende khere hem molinen tumen lenge. Džan lencar ki služba, ili ponekogaš vikinen len ki tumari familijarno rat. O starešine valjani te grižinen pe okolenge so isi len pharipa, hem te sikaven lenge sočuvstvo hem mangipe kova so valjani lenge (1. Sol. 2:7, 8). O Jehova na mangela „nikoj te ovel uništimo nego sarinen te ovel len prilika te kainen pe“ (2. Pet. 3:9). Iako nekoj šaj te kerel seriozno grevo, sepak leskoro životo tano skapoceno e Devleske. Ma bistre kaj o Jehova platingja bari cena bašo životo e grešnikongoro — dengja i otkupno žrtva ple mangle čhaveskiri. O Jehova ljubezno trudinela pe te pomožinel asavkenge te iranen pe ki leste. Le isi le nadež kaj ola ka keren adava, sar so šaj te dikha tari e Isuseskiri sporedba bašo buntovno čhavo (Luka 15:11-32; w21.09 30-31, pas. 17-19).

Šaj našti propovedinea ili kerea učenikija doborom kobor so mangea, soske tlo sastipe nane šukar. Sepak, tu šaj te ove bahtalo bašo tlo delo so dea. Razmislin bašo biblisko izveštaj keda o cari o David hem leskere manuša spasingje pumare familien hem irangje pumaro imot taro Amaličanja. Dujšel taro leskere manuša našti sine te džan lea ki borba soske sine but umorna hem ačhile te arakhen o bukja so sine len. Otkeda pobedingje ki adaja borba, o David naredingja sarinenge te del pe isto delo taro bukja so lele len (1. Sam. 30:21-25). Akava izveštaj sikavela amen nešto baši amari zadača so isi amen te kera učenikija. Sarine so dena plo najšukar šaj isto te oven bahtale keda pomožinela pe nekaske te zapoznajnel e Jehova hem te krstinel pe. O Jehova dikhela kaj trudinaja amen, kaj but mangaja le hem nagradinela amen bašo adava. Isto agjaar, sikavela amen sar te ova bahtale bašo amaro delo so daja le ki služba (Jovan 14:12). Šaj te ova sigurna kaj o Jehova ka ovel zadovolno amendar, sa džikote na otkažinaja amen! (w21.10 28, pas. 15-17).

So pophure ovaja, šaj daraja kaj na siem više korisna e Jehovaske sar so siem sine angleder. Šaj na siem fizički silna sar keda siem sine poterne. Ama, šaj te koristina amari mudrost hem o iskustvo so stekningjem le te šaj te pomožina e poternenge te oven korisna ki e Jehovaskiri organizacija hem te prifatinen poviše odgovornostija. O pophure mora te oven ponizna ako mangena te pomožinen e ternenge. O ponizno manuš dikhela e javeren sar pobare pestar (Fil. 2:3, 4). O pophure kola so sikavena akaja osobina, but puti haljovena kaj isi poviše bibliska načinija sar šaj šukar te završinel pe jekh zadača. Adaleske, ola na očekujnena taro javera te keren o bukja ko isto način sar ola so kerena len sine angleder (Prop. 7:10). Iako isi len baro iskustvo kolea so šaj te sikaven e poternen, sepak ola haljovena kaj i „scena akale svetoskiri meninela pe“ hem šaj ka valjani te prilagodinen pe ko neve okolnostija (1. Kor. 7:31; w21.09 8, pas. 1, 3).

O Jehova nikogaš na bi rodela taro ple sluge te obožavinen le ko način kolea so ka ponižinel len hem ka anel lenge šteta. Lestar avela i svetost! Te šaj o Izraelcija te na bistren akava, o prvosvešteniko phiravela sine jekh zlatno pločka ko turbani kote so sine pišime o lafija: „I svetost pripadinela e Jehovaske“ (2. Moj. 28:36-38). Okolenge so dikhena sine adaja pločka sine jasno kaj o Jehova tano čače sveto. Ama, so ako nesavo Izraelco nikogaš na dikhlja adaja pločka adaleske so našti sine te avel paše uzo prvosvešteniko? Dali ov ponadari da ka džanel sine kaj o Jehova tano sveto? Oja. Sa o Izraelcija šungje akaja poraka keda sine čitimo o zakoni anglo murša, džuvlja hem čhave (5. Moj. 31:9-12). Ako tu bi ovea sine prisutno adathe ka šune sine o lafija: „Me sium o Jehova, tumaro Devel. Oven sveta soske me sium sveto. Mora te oven sveta angli mande soske me, o Jehova, sium sveto!“ (3. Moj. 11:44, 45; 20:7, 26; w21.12 3, pas. 6-7).

Nesave šaj te sekirinen pe bašo ple materijalna potrebe. Ola šaj živinena ki čoroli phuv kote soj pharo te arakhel pe buti. Šaj nane lenge lokho te zarabotinen dovolno pare te šaj te grižinen pe pumare familijake. Ili adava so kerela sine buti ki familija šaj mulo hem akana nane više nekoj so ka grižinel pe finansiski e familijake. Namesto te ova preterano sekirime bašo problemija, valjani te ovel amen doverba ko Jehova. Ma te bistra kaj amaro manglo Dad, o Jehova, vetinela amenge kaj ka grižinel pe bašo amare materijalna potrebe ako čhivaja o duhovna bukja ko prvo than (Mat. 6:32, 33). Ov sekogaš ikerela pe ko plo lafi (5. Moj. 8:14, 15, 16; Ps. 37:25). Ako o Jehova dela adava soj potrebno e čiriklenge hem e lulugjenge, tegani ni hari na valjani te ova sekirime bašo adava so ka ha ili so ka urava (Mat. 6:26-30; Fil. 4:6, 7). Isto sar o roditelija so grižinena pe pumare čhavenge adaleske so mangena len, agjaar amaro nebesno Dad o Jehova ka grižinel pe bašo amare materijalna potrebe adaleske so mangela amen (w21.12 17, pas. 4-5; 18, pas. 8).

Dali nekoj but povredingja tut, šaj čak nesavo phral ili phen? Dikh o primer e Josifeskoro kova so doživingja nepravda taro ple phralja. Leske sine najvažno te služinel e Jehovaske hem adaleske o Jehova nagradingja le baši leskiri strplivost hem istrajnost. Palo nesavo vreme, o Josif šaj sine te prostinel okolenge so povredingje le hem te dikhel sar o Jehova dela le bereketi (1. Moj. 45:5). Isto sar o Josif, amen da šaj te utešina amen keda siem paše e Jehovaja hem keda mukhaja o bukja ko leskere vasta (Ps. 7:17; 73:28). Ako sian povredimo tari nesavi nepravda ili nešto javer, ma bistre kaj o „Jehova tano paše okolencar soj phage vilea“ (Ps. 34:18). O Jehova mangela tut soske sian strplivo hem soske frdea tlo pharipe leske (Ps. 55:22, fus.). Ov tano o Sudija upri celi Phuv hem dikhela sa so slučinela pe (1. Pet. 3:12). Adaleske, keda isi tut nesavo seriozno problemi kova so našti te rešine le, dali sian spremno te adžikere ko Jehova? (w21.08 11, pas. 14; 12, pas. 16).

Ka ovel mudro ako živinaja amaro životo ko način so ka radujnkerel e Jehova. Amen mora te čhiva o považna bukja ko prvo than. Ako mangaja šukar te koristina amaro vreme ponekogaš ka valjani te birina maškar duj bukja kola so nane pogrešna. Akava šaj te dikha le taro izveštaj keda o Isus gelo ki Marija hem ki Marta. Ki adaja prilika, i Marta spremingja but hajbaske soske sine but bahtali so o Isus alo lende ko gosti. Ama i Marija koristingja adaja prilika te bešel uzo Isus hem te šunel adava so vakerela. Iako adava so kergja i Marta na sine pogrešno, ama o Isus vakergja kaj i Marija biringja o pošukar delo (Luka 10:38-42). Palo nesavo vreme, i Marija šaj bistergja so halja adava dive, ama šaj te ova sigurna kaj oj nikogaš na bistergja adava so siklili taro Isus. Isto sar i Marija so ceningja adava kratko vreme e Isusea, amen da ceninaja amaro vreme so isi amen e Jehovaja (w22.01 27, pas. 5-6).

Iako o Ahav halilo pli greška anglo Jehova hem sine leske žal, leskere postapke palo adava sikavgje kaj ov na kaingja pe čače. Na trudingja pe te čistinel plo carstvo taro obožavibe e Vaale hem na pottikningja e javeren te obožavinen e Jehova. Otkeda o Ahav mulo, o Jehova sikavgja so mislinela sine baši leste. E Devleskoro proroko o Juj vakergja kaj ov sine lošno (2. Let. 19:1, 2). Razmislin hari, ako o Ahav čače kainela pe sine sigurno o proroko na bi phenela sine leske kaj tano lošno manuš hem kaj mrzinela e Jehova. Iako o Ahav sikavgja kaj džinegde sine leske žal ov nikogaš čače na kaingja pe. So šaj te sikljova taro e Ahaveskoro primer? Keda o Ilija vakergja leske kaj leskiri familija ka ovel kaznimi, ko početok e Ahaveske pelo žal. Adava sine šukar. Ama leskere postapke palo adava sikavgje kaj ov ko vilo na kaingja pe. Adaleske, te kaine tut značinela kaj mora te kere nešto poviše nego samo te vakere kaj tuke žal bašo adava so kergjan (w21.10 3, pas. 4-5, 7-8).

O Isaija hem leskiri romni čhivgje i služba bašo Jehova ko prvo than ko pumaro životo. Ov sine proroko hem šaj leskiri romni da prorokujnela sine, soske ki Biblija tani spomnimi sar „proročica“ (Isa. 8:1-4). Sar bračno pari ola koncentriringje pe ki služba bašo Jehova. O bračna parija avdive isto agjaar šaj te džan palo primer so dengja le o Isaija hem leskiri romni, agjaar so ka keren sa so šaj ki služba bašo Jehova. Ola šaj te bajraren pumari doverba ko Jehova, agjaar so zaedno ka proučinen o bibliska proroštvija hem ka razmislinen sar sekogaš ispolninena pe (Tit 1:2). Ola šaj te razmislinen bašo adava sar šaj te pomožinen te ispolninen pe nesave bibliska proroštvija. Na primer, šaj te pomožinen te ispolninel pe e Isuseskoro proroštvo kaj o šukar haberi bašo Carstvo ka propovedinel pe ko celo sveto angleder te avel o krajo. So poviše uverinena pe kaj o bibliska proroštvija ispolninena pe, doborom poviše ka mangen te bajraren pumari služba bašo Jehova (w21.11 16, pas. 9-​10).

O Isus manglja te grižinel pe ple dajake, koja verojatno sine udovica. Adaleske so mangela sine e Marija hem grižinela pe sine lake, ov vakergja e Jovaneske te grižinel pe bašo lakere duhovna potrebe. Taro adava dive o Jovan ulo sar čhavo e Marijake hem grižingja pe lake sar te phene tani leskiri daj. O Isus sikavgja baro mangipe ple dajake koja so ljubezno grižingja pe leske otkeda bijandilo hem koja so sine paše uzi leste keda mulo. So šaj te sikljova taro e Isuseskere lafija? Amaro odnos so isi amen amare phralencar hem phenjencar taro sobranie šaj te ovel posilno taro odnos so isi amen amare najpaše familijaja. Amari familija šaj te protivinel pe amenge ili šaj čak te otfrlinel amen. Ama, sar so vetingja o Isus, ako ačhovaja paše uzo Jehova hem leskiri organizacija ka dobina „šel puti poviše“ taro adava so našavgjem. But taro adala phralja hem phenja ka oven amenge sar manglo čhavo, čhaj, daj ili dad (Mar. 10:29, 30). Sar osetinea tut bašo adava so sian delo tari jekh duhovno familija soj tani ko jekhipe adaleske so isi la vera hem mangipe — mangipe sprema o Jehova hem sprema jekh jekheste? (Kol. 3:14; 1. Pet. 2:17; w21.04 9-11, pas. 7-8).

O verno mangipe kerela poviše taro adava so očekujnela pe. Avdive, isto sar ko purano vreme, but phralja hem phenja odlučingje te sikaven verno mangipe pumare phralenge, čak okolenge so nikogaš na zapoznajngje len. Na primer, keda doznajnena kaj slučingja pe nesavi prirodno katastrofa, odma mangena te pomožinen. Keda nekas taro sobranie isi le finansiska problemija, odma dikhena sar šaj te pomožinen leske ko praktična načinija. Slično sar o Makedoncija taro prvo veko, ola kerena poviše taro adava so očekujnela pe lendar. Kerena žrtve agjaar so dena „poviše taro adava so šaj“ te šaj te pomožinen pumare phralenge (2. Kor. 8:3). Avdive da, o starešine pofalinena e phralen hem e phenjen ko sobranie keda primetinena sar ola pomožinena e javerenge. Keda dobinena pe asavke pofalbe ko pravo vreme, tegani o phralja hem o phenja dobinena i sila koja so valjani lenge te šaj te na otkažinen pe (Isa. 32:1, 2; w21.11 11, pas. 14; 12, pas. 21).

Ponekogaš sarinenge amenge valjani sovet. Ko nesave slučaija šaj amen korkori rodaja sovet nekastar kaste so poštujnaja. A ko javera slučaija šaj nesavo phral so sekirinela pe amenge ka vakerel kaj džaja ko pogrešno drumo hem kaj ka kera nešto bašo so pokasno ka kaina amen (Gal. 6:1). Ili, šaj te dobina sovet otkeda kergjem nesavo seriozno grevo. Bizi razlika soske dobinaja sovet, valjani te šuna le. Adava tano bašo amaro šukaripe hem šaj te spasinel amaro životo (Izr. 6:23). E diveskoro stiho ohrabrinela amen te šuna „o lafija e mudra manušengere“. Nijekh manuš na džanela sa. Sekogaš isi nekoj so džanela poviše amendar hem tano poiskusno (Izr. 12:15). Keda šunaja sovet, sikavaja kaj siem ponizna hem kaj siem svesna bašo amare granice. Isto agjaar, adava sikavela kaj haljovaja kaj valjani amenge pomoš te šaj te ispolnina amare celija. O mudro cari o Solomon pišingja: „O planija uspejnena keda isi but sovetnikija“ (Izr. 15:22; w22.02 8, pas. 1-2).

Te šaj nekoj čače te kainel pe mora te kerel poviše nego samo te vakerel kaj leske žal bašo grevo so kergja le. Mora te kerel promene ki pli godi hem ko plo vilo. Adava vklučinela te čhinavel ple pogrešna postapkencar hem palem te počminel te živinel sprema e Jehovaskere merilija (Ezek. 33:14-16). E grešnikoske valjani te ovel najvažno palem te ovel paše e Jehovaja. So valjani te kera ako doznajngjem kaj nesavo amaro paše amal kergja seriozno grevo? Ka kere samo šteta tle amaleske ako garavea leskoro grevo. Džabe ka trudine tut te garave le soske o Jehova sa dikhela (Izr. 5:21, 22). Šaj te pomožine tle amaleske agjaar so ka vakere kaj o starešine mangena te pomožinen leske. Ako tlo amal na mangela te vakerel e starešinenge plo grevo, tegani tu valjani te vakere lenge hem agjaar ka sikave kaj čače mangea te pomožine leske (w21.10 7, pas. 19-​21).

Sarine valjani te ova samopožrtvuvana sar o Isus. I Biblija vakerela kaj ov „ulo sar robo“ (Fil. 2:7). Jekh verno robo ili sluga ka rodel prilike te ugodinel ple gospodareske. Adaleske so siem e Jehovaskere robija hem služinaja amare phralenge sigurno mangaja panda poviše te ova lenge korisna — hem e Jehovaske hem e phralenge. Puč tut: „Kobor sium spremno te žrtvujnav mlo vreme hem mli sila te šaj te pomožinav e javerenge? Dali sium spremno te pomožinav keda isi potreba taro dobrovolcija te čistinel pe jekh kongresno sala ili te održinel pe i dvorana?“ Šaj primetingjan kaj valjani panda poviše te razvine o samopožrtvuvano stavi, ama na sian spremno te kere o potrebna promene. Ako tano agjaar molin tut e Jehovaske taro vilo. Vaker e Jehovaske sar osetinea tut hem rode lestar te del tut hem i „želba hem i sila te kere adava so ov mangela“ (Fil. 2:13; w22.02 22-23, pas. 9-11).

O Isus sikavgja ljubeznost agjaar so sine razumno hem obzirno (Mat. 11:29, 30). Na primer, keda jekh Feničanka molingja le te sasljarel lakere čhaja, ov ko početok na manglja te šunel la. Ama keda oj sikavgja bari vera ov sikavgja ljubeznost agjaar so sasljargja lakere čhaja (Mat. 15:22-28). Iako sine ljubezno, o Isus na izbeginela sine te del sovetija. Ponekogaš sikavela sine ljubeznost agjaar so sine direktno okolencar so mangela len sine. Na primer, keda o Petar probingja te obeshrabrinel e Isuse te kerel e Jehovaskiri volja, o Isus strogo isprajngja le anglo javera učenikija (Mar. 8:32, 33). Ov na manglja te ponižinel e Petare, nego akalea manglja te sikavel le hem e javere apostolen ma te nakhen pumare granice. Sigurno o Petar ladžandilo, ama but koristingja leske akava ukor. Te šaj te ove ljubezno okolencar so mangea len ponekogaš šaj ka valjani direktno te vakere lenge nesave bukja. Isto sar o Isus, tu da temelin tle sovetija ko bibliska načelija (w22.03 11, pas. 12-​13).

Obožavinaja e Jehova keda falinaja le (Ps. 34:1). Amen falinaja e Jehova agjaar so vakeraja e javerenge bašo leskere šuže osobine hem bašo adava so kergja. O pofalbe avena taro jekh blagodarno vilo. Keda razmislinaja bašo sa o bukja so kergja len amenge o Jehova, isi amen but pričine te falina le. Keda propovedinaja, isi amen i prilika te da e Devleske žrtva kolaja so falinaja le, ili javere lafencar „plodi taro amaro muj“. Isto sar so valjani šukar te razmislina so ka vakera angleder te molina amen e Jehovaske, valjani šukar te razmislina so ka vakera okolenge kaske so propovedinaja. Mangaja te da amaro najšukar keda falinaja e Devle. Adaleske, keda propovedinaja, valjani te kera lafi taro vilo (w22.03 21, pas. 8).