Oktomvri

Adava so sikavaja e manušen hem so verujnaja avela tari Biblija. Sepak, but džene avdive spotakninena pe adaleske so mislinena kaj amaro način sar obožavinaja e Devle tano but ednostavno hem adava so sikavaja nane adava so ola mangena te šunen. Sar šaj te na spotaknina amen? O apostol Pavle vakergja e hristijanenge taro Rim: „I vera avela tari poraka so šunaja, a i poraka širinela pe keda kerela pe lafi bašo Hristos“ (Rim. 10:17). Znači, amen gradinaja amari vera adalea so proučinaja i Biblija, a na adalea so učestvujnaja ko religiozna ceremonie so nane bibliska, bizi razlika kobor izgledinena šuže. Amen mora te gradina zorali vera koja so temelinela pe ko točno pendžaribe soske „bizi vera našti te ugodina e Devleske“ (Evr. 11:1, 6). Adaleske, te šaj te ova sigurna kaj arakhlem o čačipe na valjani amenge jekh posebno znako taro nebo. Adava so vnimatelno ka proučina o bibliska sikljojba tano dovolno te uverinel amen kaj isi amen o čačipe hem ka cidel amendar sekoja sumnja (w21.05 4-5, pas. 11-12).

E apostol Pavle sine le but problemija. Leske posebno valjani sine sila keda sine mardo, kamenujmo hem čhivdo ko zatvor (2. Kor. 11:23-25). O Pavle priznajngja kaj ponekogaš borinela pe sine negativna čuvstvoncar (Rim. 7:18, 19, 24). Isto agjaar, le sine le problemija sastipaja kova so sine sar „karo ko telo“, hem but mangela sine o Devel te cidel lestar adava (2. Kor. 12:7, 8). O Jehova dengja e Pavleske sila te šaj ponadari da te kerel pli služba iako sine le but problemija. Te dikha so kergja o Pavle. Na primer, džikote sine ko zatvor ko jekh kher ko Rim, ov revno propovedinela sine o šukar haberi e evrejsko vodačenge hem šaj nesave službenikonge da (Dela 28:17; Fil. 4:21, 22). Ov isto agjaar, propovedinela sine bute stražarenge hem sa okolenge so avena sine te posetinen le (Dela 28:30, 31; Fil. 1:13). Ko isto vreme, o Devel koristingja e Pavle te pišinel pismija so pomožingje e hristijanenge ko adava vreme, a isto agjaar pomožinena amenge avdive da (w21.05 21, pas. 4-5).

Adaleske so o cari o Ozija tari Juda ulo gordo, na šungja o sovet taro javera hem kergja nešto so na sine le pravo ov te kerel. O Ozija sine but uspešno manuš. Pobedingja ko but vojne, gradingja but dizja hem sine le but farme. I Biblija vakerela: „O čačutno Devel pomožinela leske sine“ (2. Let. 26:3-7, 10). Ama, i Biblija isto agjaar vakerela: „Keda ulo silno, leskoro vilo doborom ulo gordo so korkori peske kergja lošnipe“. O Jehova angleder zapovedingja kaj samo e sveštenikonge sine dozvolimo te tharen temjani ko hrami. Ama, o cari o Ozija postapingja drsko agjaar so ov khuvgja ko hrami te tharel temjani. E Jehovaske na svidžingja pe so kergja adava gordo manuš hem adaleske kazningja le lepraja (2. Let. 26:16-21). Šaj li amen da te ova gorda hem te pera ki stapica sar o Ozija? Nikogaš ma te bistra kaj sekoja sposobnost so isi amen hem sekoja zadača so dobinaja la ko sobranie avela taro Jehova (1. Kor. 4:7). Ako siem gorda, o Jehova nane te koristinel amen (w21.06 16, pas. 7-8).

O Isus džanlja kaj leskere učenikija nane sekogaš te nakhen šukar ki služba. Ustvari, amen ni na džanaja kobor džene taro adala manuša so šungje e učenikon ule hristijanja. Ola na valjani sine te oven bahtale samo keda o javera ka šunen len. Nego soj považno, lengoro bahtalipe valjani sine te avel taro adava so džanena kaj o Jehova tano zadovolno taro lengoro trudo so dena le sine. Ako istrajnaja ki amari služba ka dobina večno životo. Džikote sejnaja o seme e čačipaskoro, amen „sejnaja ko duho“. Soske vakeraja agjaar? Keda džaja ki služba, amen dozvolinaja e Devleskoro duho te vodinel amen. Sa džikote na „otkažinaja amen“ ili na „umorinaja amen“, o Jehova vetinela amenge kaj ka del amen večno životo, bizi razlika dali pomožingjem nekaske te krstinel pe ili na (Gal. 6:7-9; w21.10 26, pas. 8-9).

Ki jekh prilika o Isus hem leskere učenikija sine umorna soske but propovedingje. Ola rodena sine than kote so šaj sine te odmorinen pe, ama tegani baro mnoštvo taro manuša arakhle len. E Isuseske pelo žal bašo manuša hem adaleske počmingja te sikavel len bašo „but bukja“. O Isus čhivgja pe lenge ko than. Ov manglja te pomožinel lenge soske dikhlja kaj cidena sine muke hem kaj valjani lenge nadež. O manuša avdive arakhljona ki slično situacija. Iako dikhjona sar te phene tane bahtale hem zadovolna, len da isi len problemija hem valjani lenge nadež. Ola tane sar bakhre so našavdile kolen so nane pastiri te vodinel len. O Pavle vakergja kaj asavke manuša na džanena e Devle hem nane len nadež (Ef. 2:12). Keda razmislinaja ki savi duhovno sostojba tane o manuša ko amaro podračje, o mangipe hem o sočuvstvo pottikninena amen te pomožina lenge. Hem o najšukar način sar šaj te pomožina lenge tano agjaar so ka nudina lenge biblisko kursi (w21.07 5, pas. 8).

Okola soj egiostija tane gorda hem sebična. Okova so zavidinela nekaske, na samo so mangela te ovel le adava so isi e javere nego isto agjaar, mangela te lel lestar adava so isi le. Znači keda jekh manuš zavidinela e javereske, ov ustvari mrzinela le. O egoizam hem i zavist šaj te sporedinen pe melale gorivoja so koristinela pe ko avioni. O avioni šaj te počminel te letinel, ama o melalipe šaj te zapušinel o crevija bašo gorivo, hem agjaar o avioni te perel. Slično, nekoj soj egoisti hem zavidinela, nesavo vreme šaj te služinel e Jehovaske, ama jekh dive ka perel (Izr. 16:18). Ov ka čhinavel te služinel e Jehovaske hem ka kerel šteta peske hem e javerenge. Šaj te borina amen protiv o egoizam agjaar so ka primenina o sovet kova so dengja le o Pavle e Filipjanenge: „Ma keren ništo tari holi ili tari gordost, nego ponizno dikhen e javeren sar pobare tumendar“ (Fil. 2:3; w21.07 15-16, pas. 6-8).

Nesave mislinena kaj i čačutni religija mora te odgovorinel ko sa o pučiba, čak ko adala pučiba kolenge so nane odgovor ki Biblija. Dali šaj te očekujna nešto asavko? Te dikha e apostol Pavleskoro primer. Ov pottikningja e hristijanen te „ispitinen sa“ te šaj te uverinen pe kaj adava tano čače, ama ov isto agjaar priznajngja kaj isi but bukja so ov na haljola len sine (1. Sol. 5:21). Ov vakergja kaj na džanaja sa „soske akana dikhaja liko ki ajna koja so na dela jasno slika“ (1. Kor. 13:9, 12). O Pavle na halilo sa hem amen da na haljovaja sa. Ama ov halilo o osnovna čačipe bašo Jehova. Ov džanela sine dovolno te šaj te ovel uverimo kaj arakhlja o čačipe! Jekh način sar šaj te ova panda pouverime kaj arakhlem o čačipe tano ako sporedinaja e Isuseskoro obožavibe adalea so kerena e Jehovaskere svedokija avdive (w21.10 18-19, pas. 2-4).

Tumen o pophure, bizi razlika dali sien ki polnovremeno služba ili na, šaj but te pomožinen e javerenge. Sar? Prilagodinen tumen ko tumare neve okolnostija, čhiven tumenge neve celija, hem koncentririnen tumen ko adava so šaj te keren, a na ko adava so našti te keren. O cari o David manglja te gradinel kher e Jehovaske. Ama keda o Jehova vakergja leske kaj akaja prednost ka del la e Solomoneske, kova so sine poterno, o David prifatingja akaja odluka hem kergja sa te šaj te poddržinel akava proekti (1. Let. 17:4; 22:5). O David na mislingja kaj ov pošukar ka kerel adaja zadača adaleske so o Solomon sine „terno hem na sine iskusno“ (1. Let. 29:1). Ov džanlja kaj o gradibe e hrameskoro zavisinela taro e Jehovaskoro bereketi, a na taro berša hem o iskustvo adalengoro so ka vodinen i buti. Slično sar o David, o pophure avdive panda tane aktivna, čak keda lengiri zadača meninela pe. Hem džanena kaj o Jehova ka del bereketi e ternenge so kerena o zadače kola so ola kerena sine angleder (w21.09 9, pas. 4; 10, pas. 5, 8).

O duhovna celija dena amen pravco hem smisla ko životo. Ama, mora te čhiva amenge celija sprema amare sposobnostija hem okolnostija, a na sprema e javerengere. Soske ako keraja adava šaj te razočarina amen hem te obeshrabrina amen (Luka 14:28). Adaleske so sian e Jehovaskoro sluga tu sian leske posebno hem but sian cenimo ki leskiri familija. Ov na vikingja tut ki peste adaleske so sian pošukar taro javera manuša, nego adaleske so dikhlja ko tlo vilo hem dikhlja kaj sian ponizno manuš kole so šaj te oblikujnel le. Šaj te ove sigurno kaj ov but ceninela keda dea tutar sa te služine leske. Tli istrajnost hem tli vernost tane dokaz kaj isi tut „čisto hem šukar vilo“ (Luka 8:15). Adaleske, ponadari da de tlo najšukar e Jehovaske. Tegani ka ovel tut šukar pričina te ove bahtalo bašo „bukja so kerea len tu“ (Gal. 6:4; w21.07 24, pas. 15; 25, pas. 20).

But puti ka valjani te ova strpliva džikote anela pe pravda. Na primer, keda o starešine ka šunen kaj nekoj taro sobranie kergja seriozno grevo, ola ki molitva rodena „mudrost upraldan“ te šaj te haljoven sar o Jehova dikhela ki adaja situacija (Jak. 3:17). Lengiri cel tani, ako šaj, te pomožinen okoleske so grešinela te „iranel pe taro plo lošno drumo“ (Jak. 5:19, 20). Isto agjaar mangena te den pestar sa te šaj te zaštitinen o sobranie hem te utešinen okolen so sine povredime (2. Kor. 1:3, 4). Hem keda razgledinena nesavo seriozno grevo, o starešine prvo mora te dikhen sa o dokazija, a bašo adava šaj ka valjani vreme. Palo adava ola molinena pe hem dena biblisko sovet hem ukor „kova so odgovorinela“ (Erem. 30:11). O starešine na mangena te anen sigate odluka. Keda ikerena pe ko upatstvija so dela len o Jehova, tegani celo sobranie ka ovel le korist (w21.08 11, pas. 12-13).

Adaleske so sine baro čorolipe ko Izrael, i Noemina, lakoro rom hem lengere duj čhave selingje pe ko Moav. Džikote sine adari, e Noeminakoro rom mulo. Palo adava lakere duj čhave ženingje pe, ama palo nesavo vreme ola da mule (Rut 1:3-5). Akala tragedie kergje i Noemina te na mangel više te živinel. Lakiri muka sine doborom bari so mislinela peske sine kaj o Jehova tano protiv late. Primetin kole lafencar opišingja ple čuvstvija sprema o Devel: „O Jehova vazdingja plo vas protiv mande... o Semokjno kergja mlo životo but kerko“. Oj ponadari vakergja: „O Jehova irangja pe protiv mande hem o Semokjno angja mange nevolja“ (Rut 1:13, 20, 21). O Jehova haljovela kaj „i muka šaj te kerel jekhe mudro manuše te delingjovel“ (Prop. 7:7). Ov pottikningja e Ruta te sikavel verno mangipe e Noeminake. I Rut spremno hem ljubezno pomožingja ple sasake te na ovel doborom obeshrabrimi hem te dikhel kaj o Jehova panda mangela la (w21.11 9, pas. 9; 10, pas. 10, 13).

Dali adava so siem zadovolna e zadačencar so isi amen akana značinela kaj na valjani te trudina amen te bajrara amari služba bašo Jehova? Ni hari! Amen valjani te čhiva amenge duhovna celija kola so ka pomožinen amenge te ova pošukar ki služba hem te pomožina amare phralenge hem phenjenge. Ka uspejna te ispolnina adala celija ako na koncentririnaja amen ki amende, nego mudro hem skromno trudinaja amen te služina e javerenge (Izr. 11:2; Dela 20:35). Save celija šaj te čhive tuke? Molin e Jehova te pomožinel tuke te haljove kola celija šaj te ispolnine (Izr. 16:3). Šaj li te trudine tut te ispolnine celija sar soj te ove pomošno ili opšto pioneri, te služine ko Betel ili te služine ki izgradba bašo teokratska objektija? Ili šaj te sikljove nevi čhib te šaj te propovedine e manušenge ko javer podračje (w21.08 23, pas. 14-​15).

E Jehovaske tano but važno o verno mangipe (Osi. 6:6). Preku plo proroko o Mihej, amaro Devel pottikninela amen „te manga o verno mangipe“ (Mih. 6:8, fus.). Ama, angleder te kera adava valjani te džana soj tano o verno mangipe.Soj tano o verno mangipe? Okova so isi le asavko mangipe mangela e javere doborom but so nane te čhinavel te mangel le hem ka ačhol verno tari leskiri strana. Akava izraz but puti koristinela pe bašo e Devleskoro mangipe sprema o manuša, ama isto agjaar bašo mangipe so sikavena o manuša maškar peste. O Jehova tano najbaro primer bašo sikajbe verno mangipe. Adaleske na valjani te čudinel amen adava so cari o David sine pottiknimo te vakerel: „O Jehova, tlo verno mangipe resela dži ko nebo. Kobor tano skapoceno tlo verno mangipe, o Devla! (Ps. 36:5, 7). Dali amen da isto sar o David but ceninaja e Devleskoro verno mangipe? (w21.11 2, pas. 1-2; 3, pas. 4).

Ki e Jehovaskiri familija tane vklučime o Isus, ov tano „o prvo bijamo taro sa soj kerdo“, hem o but angelija (Kol. 1:15; Ps. 103:20). Keda sine ki Phuv, o Isus sikavgja e verna manušen kaj šaj te dikhen ko Jehova sar pumaro Dad. Keda kerela sine ple učenikoncar lafi ov bašo Jehova vakergja: „Mo Dad hem tumaro Dad“ (Jovan 20:17). Isto agjaar, keda daja lafi e Jehovaske kaj ka služina leske hem krstinaja amen, ovaja delo tari jekh familija kote so isi phralja hem phenja kola so but mangena pe (Mar. 10:29, 30). O Jehova tano Dad pherdo mangipaja. O Isus mangela te dikha ko Jehova sar ov so dikhela — sar jekh ljubezno roditeli pherdo mangipaja kasaja so lokhe šaj te kerel pe lafi, a na sar nekoj so nane ljubezno hem samo zapovedinela. Pli najpendžardi molitva o Isus počmingja la e lafencar: „Amaro Dad“. Ov šaj sine te vakerel amenge te vikina e Jehova „Semokjno“, „Stvoriteli“, ili „Cari tari večnost“ hem akava nane te ovel sine pogrešno soske i Biblija koristinela akala titule bašo Jehova (1. Moj. 49:25; Isa. 40:28; 1. Tim. 1:17). Namesto adava, o Isus vakergja amenge te vikina le „mo Dad“ (w21.09 20, pas. 1, 3).

O cari o Manasija sine tvrdoglavo hem na mangela sine te šunel e Jehovaskoro sovet preku leskere prorokija. Ko krajo, o Jehova angja e Asirsko careskere zapovednikon protiv i Juda, hem ola astargje e Manasija, phanle le ko duplo bakarna sindžirija hem ingargje le ko Vavilon. Džikote sine ko zatvor ko Vavilon, o Manasija verojatno seriozno počmingja te razmislinel bašo adava so kergja. Ov ponizno halilo pli greška hem sine leske žal bašo adava. Čak kergja nešto poviše. Ov rodela sine taro Jehova milost. Ustvari, o izveštaj vakerela kaj o Manasija molinela pe sine leske, so sikavela kaj kerela sine adava poviše puti (2. Let. 33:10-12). Palo nesavo vreme, o Jehova odgovoringja ko e Manasijaskere molitve. Taro leskere molitve o Jehova dikhlja kaj ov čače promeningja pe. Adaleske ov šungja e Manasija keda rodingja lestar te prostinel leske hem palem dozvolingja leske te ovel cari. O Manasija koristingja sekoja prilika te sikavel kaj čače kainela pe (w21.10 4, pas. 10-​11).

O Akila hem i Priskila mora sine te mukhen o than kova so šukar pendžarena le sine, te arakhen jekh nevo kher hem palem te počminen te keren šatorija ko nevo than. Keda selingje pe ko Korint, o Akila hem i Priskila pomožingje ko adava sobranie hem sorabotingje e Pavlea te šaj te ohrabrinen e phralen hem e phenjen taro adava than. Palo nesavo vreme, ola gele ko javera dizja kote so sine pobari potreba bašo propovedibe (Dela 18:18-21; Rim. 16:3-5). Sigurno sine but zadovolna hem bahtale ko životo. O bračna parija avdive šaj te džan palo primer tari Priskila hem o Akila agjaar so ka čhiven o Carstvo ko prvo than. O najšukar vreme keda valjani te keren lafi bašo pumare celija tano džikote zapoznajnena pe. Keda jekh pari čhivela peske duhovna celija hem trudinela pe te ispolninel len, tegani šaj ko poviše prilike te dikhel sar o Jehova pomožinela len ko lengoro životo (Prop. 4:12; w21.11 17, pas. 11-​12).

Jasno tano, valjani taro vilo te šuna e Jehovaskiri zapoved te poštujna amare roditelen. Na valjani te bistra kaj i zapoved so arakhljola ki 3. Mojseeva 19:3 — te poštujnel pe e daja hem e dade — tani dendi odma pali izjava: „Oven sveta, soske me, o Jehova, tumaro Devel sium sveto“ (3. Moj. 19:2). Keda ka razmislina baši e Jehovaskiri zapoved te poštujna amare roditelen, šaj ka puča amen: „Dali poštujnava me roditelen?“ Ako mislinea kaj angleder na kergjan dovolno, šaj te čhive tuke cel akana te ove pošukar ko adava. Našti te irane o vreme, ama akana šaj te isprajne i situacija agjaar so ka nakhe poviše vreme tle roditelencar hem ka pomožine lenge poviše. Šaj li te grižine tut lenge poviše ko materijalno hem duhovno pogled, ili te ohrabrine len hem te utešine len keda valjani lenge adava? Ako kerea akava, tegani ka ove poslušno ki zapoved so arakhljola ki 3. Mojseeva 19:3 (w21.12 4-5, pas. 10-12).

O cari o David kergja seriozna greške. Na primer, ov kergja preljuba e Vitsaveaja hem čak naredingja lakoro rom te ovel mudardo (2. Sam. 11:2-4, 14, 15, 24). Sar posledica, o David na kergja šteta samo peske nego pe familijake da kote so sine vklučime leskere javera da romnja (2. Sam. 12:10, 11). Ki javer prilika o David na sikavgja celosno doverba ko Jehova keda naredingja te kerel pe popis e Izraelsko vojskake, iako o Jehova na naredingja leske adava. Savo sine o rezultati taro adava? Otprilika 70.000 Izraelcija mule taro zarazno nasvalipa (2. Sam. 24:1-4, 10-15). Dali ka osudine e Davide kaj ov na zaslužinela o Jehova te prostinel leske? Ama o Jehova na razmislingja agjaar. Ov koncentriringja pe ki e Davideskiri vernost koja so sikavgja la celo plo životo hem dikhlja kaj čače kaingja pe. Adaleske, o Jehova prostingja e Davideskere seriozna grevija. O Jehova džanlja kaj o David but mangela le hem kaj mangela te kerel adava soj ispravno. Na sian li blagodarno bašo adava so amaro Devel koncentririnela pe ko amare šukar osobine? (1. Car. 9:4; 1. Let. 29:10, 17; w21.12 19, pas. 11-13).

O Isus sine sočuvstvitelno okolencar so sine fizički ograničime. Setin tut savo haberi bičhalgja e Jovaneske kova so krstingja le: „O korole akana dikhena, o sakatija phirena, o leprozna čistinena pe, o kašuke šunena hem o mule uštena“. Otkeda dikhle e Isuseskere čudija, „sa o manuša počmingje te falinen e Devle“ (Luka 7:20-22). O hristijanja mangena te džan palo e Isuseskoro primer hem te sikaven sočuvstvo okolenge soj fizički ograničime. Adaleske, amen siem šukar hem strpliva lencar. Džangjola pe, o Jehova na dengja amen mokj te kera čudija sar o Isus so kergja. Ama, isi amen čest te vakera hem okolenge so doslovno na dikhena hem okolenge duhovno so na dikhena o šukar haberi bašo raj kote so sarine ka oven fizički hem duhovno saste (Luka 4:18). Akava haberi panda akana pomožinela bute dženenge te falinen e Devle (w21.12 9, pas. 5).

O Jakov koristinela sine e Devleskoro Lafi. Agjaar, ov pomožingja ple publikake te dikhen kaj o Jehova sekogaš nagradinela okolen kola so slično sar o Jov tane leske verna. O Jakov istakningja adaja pouka ednostavna lafencar hem ko logično način. Agjaar sikavgja kaj adaja pouka na avela lestar nego taro Jehova. I pouka amenge: Koristin ednostavna lafija hem sikav taro e Devleskoro Lafi. Amari cel na valjani te ovel te sikava e javerenge kobor but džanaja, nego valjani te sikava lenge kobor but o Jehova džanela hem kobor grižinela pe lenge (Rim. 11:33). Adava šaj te kera le ako adava so vakeraja le sekogaš temelinela pe ki Biblija. Na primer, namesto te vakera amare interesentenge so bi keraja amen ko lengoro than, valjani te pomožina lenge te razmislinen bašo bibliska primerija hem te haljoven savo tano e Jehovaskoro razmisluvanje hem čuvstvija. Tegani, ola ka mangen te primeninen adava so siklile bašo Jehova, a na baši amende (w22.01 11, pas. 9-10).

O Devel očekujnela amendar but poviše nego samo te pazina te na povredina e javere manušen. Mora te manga amare pašutnen sar korkori amen ako mangaja te kera e Devleskiri volja. Primetin sar o Isus istakningja kobor tani važno i zapoved tari 3. Mojseeva 19:18 keda jekh farisei pučlja le: „Koja tani i najbari zapoved ko zakoni?“ O Isus odgovoringja kaj i najbari hem i prvo zapoved tani te manga e Jehova sa amare vilea, sa amare dušaja hem sa amare gogjaja. Palo adava o Isus citiringja o lafija so arakhljovena ki 3. Mojseeva 19:18: „I dujto, slično sar late tani akaja: ’Mang tle pašutne sar korkori tut‘ “ (Mat. 22:35-40). Isi but načinija sar te sikava mangipe e javerenge. Jekh način tano agjaar so ka primenina o sovet so arakhljola ki 3. Mojseeva 19:18. Athe phenela: „Ma odmazdin tut ni ma iker holi“ (w21.12 10-11, pas. 11-​13).

O Isus pružingja plo vas, astargja le hem spasingja le. Ma te bistra kaj o Petar šaj sine te phirel upro pani sa džikote dikhela sine ko Isus. Ama keda irangja pe te dikhel ki bura, darandilo hem počmingja te batinel (Mat. 14:24-31). Amen šaj te sikljova taro e Petareskoro primer. Keda iklilo taro čamco hem počmingja te phirel ko pani, ov na očekujngja kaj i bura ka lel leskoro vnimanie hem kaj ka počminel te batinel. Ov manglja te phirel upro pani hem te džal dži ko Isus. Ama namesto te dikhel ko Isus, ov počmingja te sekirinel pe baši bura. Avdive amen našti te phira upro pani, ama valjani amenge vera te šaj te istrajna ko problemija isto sar e Petareske so valjani sine vera te šaj te phirel upro pani. Ako na dikhaja ko Jehova hem ko leskere vetuvanja amari vera šaj te slabonel hem agjaar duhovno te batina. Adaleske, bizi razlika save simbolična bure ka aven ko amaro životo, mora ponadari da te dikha ko Jehova hem te ovel amen doverba kaj ov šaj te pomožinel amenge (w21.12 17-​18 pas. 6-7).

I molitva, o proučibe hem o hor razmislibe tane delo taro amaro obožavanje. Keda molinaja amen, keraja lafi amare nebesno Dadea kova so but mangela amen. Keda proučinaja i Biblija, sikljovaja taro Devel kastar so avela i celo mudrost (Izr. 2:1-5). A keda hor razmislinaja bašo adava so siklilem, dikhaja e Jehovaskere šuže osobine hem na bistraja i but šuži namera so isi le amencar. Nane pošukar način sar šaj te koristina amaro vreme. Ama sar šaj te ovel amen najbari korist taro vreme so odvojnaja le bašo akala duhovna aktivnostija? Ako šaj, arakh tuke jekh mirno than. Razmislin bašo e Isuseskoro primer. Angleder te počminel ple službaja ki Phuv, ov sine 40 dive ki pustina (Luka 4:1, 2). Ko adava mirno than, o Isus šaj sine te molinel pe e Jehovaske hem te razmislinel savi namera isi leskere Dade lea. Akava spremingja e Isuse bašo ispitija kolencar so panda hari valjani sine te soočinel pe (w22.01 27-​28, pas. 7-8).

Jekh starešina ili javer zrelo phral šaj te vakerel amenge nešto kote so valjani te promenina amen. Ako nekoj taro mangipe dela amen biblisko sovet, valjani te primenina le. Obično popharo amenge te prifatina direktno sovet, šaj čak ka osetina amen povredime. Soske? Iako siem svesna kaj siem nesovršena, šaj te ovel amenge pharo te prifatina sovet keda nekoj ka vakerel amenge baši nesavi amari negativno osobina. (Prop. 7:9) Šaj ka počmina te opravdina amen. Šaj ka vakera kaj taro pogrešna motivija dengja amen o sovet ili te žalina amen bašo način sar dengja amen adava sovet. Šaj čak te kritikujna le hem te vakera: „Kotar lela peske pravo te del man sovet? So na dikhela peste!“ Hem ako na paririnela amenge o sovet, šaj nane ni te šuna le ili ka roda javerestar sovet kova so ka vakerel amenge adava amen so mangaja te šuna (w22.02 8-9 pas. 2-4).

Dali o životo ko nevo sveto šaj te ovel amenge pharo hem agjaar te čhivel ko ispit amari doverba ko e Jehovaskoro način sar kerela o bukja? Na primer, razmislin so slučingja pe kratko otkeda o Izraelcija sine oslobodime taro Egipet. Nesave počmingje te žalinen pe soske falinela lenge sine o hajbe so sine adari, a i mana so dela len sine o Devel na ceningje la. (4. Moj. 11:4-6; 21:5) Šaj li amenge da te pojavinen pe slična misle odkeda ka završinel i bari nevolja? Na džanaja kobor buti adžikerela amen te šaj te čistina i Phuv hem hari po hari te kera la ko raj. Verojatno ka ovel amen but buti hem šaj ko početok o životo nane te ovel lokho. Dali ka žalina amen bašo bukja kola so o Jehova ka del amen tegani? Jekh buti tani sigurno: Ako akana ceninaja o bukja so dela amen o Jehova, pobari tani i verojatnost kaj tegani da ka cenina o bukja kola so ka del amen (w22.02 7, pas. 18-19).

Ko proroštvo taro Zaharija 8:23 o lafija „Evrei“ hem „tumencar“ mislinela pe ki isto grupa — o pomazanikija so ačhile ki Phuv (Rim. 2:28, 29). O „deš manuša taro sa o čhibja so kerena lafi o narodija“ pretstavinena e javere bakhren. Ola ka „astaren taro šej“ e pomazanikon agjaar so verno ka poddržinen len hem zaedno lencar ka služinen e Jehovaske ko ispravno način. Slično, ko proroštvo taro Ezekiel 37:15-19, 24, 25, o Jehova ispolningja akava proroštvo agjaar so kergja o pomazanikija hem o javera bakhre paše te sorabotinen. Ko akava proroštvo spomninena pe duj pračke. Okola so isi len nebesno nadež tane sar i pračka „baši Juda“ (o pleme kotar so birinena pe sine o Carija ko Izrael), a okola so isi len nadež te živinen ki Phuv tane sar i pračka „bašo Efrem“. O Jehova spojngja akale duje grupen hem ola ule „jekh pračka“. Akava značinela kaj ola služinena zaedno jekhe Careske, e Isus Hristoseske. (Jovan 10:16; w22.01 22 pas. 9-10).

O Isus kergja lafi bašo adala manuša so pomožinena sine e čorolenge te šaj o javera te dikhen len. Iako ola kergje šukaripe, anglo e Jehovaskere jakhja adava na vredinela sine (Mat. 6:2-4). Te šaj čače te ova šukar na valjani te kera šukaripe taro sebična pričine. Adaleske šaj te puča amen: „Osven so sium svesno soj šukar hem ispravno, dali postapinava agjaar? Tari koja pričina kerava šukaripe?“ O sveti duh, i sila kolaja so o Devel kerela nešto, pottikninela amen da te kera nešto (1. Moj. 1:2). Znači, sekoja osobina so avela taro sveti duh šaj hem valjani te pottikninel amen te kera nešto. Na primer, o apostol Jakov pišingja: „I vera bizo te sikavel pe ko delo tani muli“ (Jak. 2:26). O isto šaj te vakerel pe bašo sa o osobine so avena taro sveti duh. Sekova puti keda sikavaja len dokažinaja kaj e Devleskoro duho pomožinela amenge (w22.03 11-12, pas. 14-​16).

Šaj siem zafatime ko različna duhovna aktivnostija hem keraja šukaripe javerenge. Ama o apostol Petar istakningja kaj valjani te kera panda nešto soj tano but važno. Angleder te pottikninel amen te ova sveta ko sa so keraja ov vakergja: „Spreminen tumari godi baši naporno buti“ (1. Pet. 1:13). Ki savi buti mislingja? O Petar vakergja kaj e Hristoseskere pomazime phralja ka objavinen o šukar osobine okoleskere so vikingja len (1. Pet. 2:9). Ustvari, avdive sa e hristijanen isi len čest te učestvujnen ki akaja but važno aktivnost kolatar so e manušen šaj te ovel len najbari korist. Sar Devleskoro sveto narodo, isi amen bari čest redovno hem revno te propovedina hem te sikava (Mar. 13:10). Keda daja amendar sa te kera akava, sikavaja kaj mangaja e Devle hem e pašutnen, hem kaj mangaja te ova sveta ko sa so keraja (w21.12 13, pas. 18).

O apostol Pavle sekogaš dikhela sine šukar ko phralja hem ko phenja. O Pavle džanlja kaj ako nekoj grešingja na značinela kaj tano lošno manuš. Ov mangela sine e phralen hem e phenjen hem koncentririnela pe sine ko lengere šukar osobine. Ako na sine lenge lokho te keren adava soj ispravno, o Pavle birinela sine te mislinel kaj isi len šukar motivija hem kaj samo valjani lenge pomoš. Te dikha sar o Pavle postapingja duje phenjencar taro sobranie Filipi (Fil. 4:1-3). Verojatno i Evodija hem i Sintihija na sine više amalinka adaleske so rasprajngje pe. O Pavle na sine lencar strogo hem na kritikujngja len, namesto adava ov koncentriringja pe ko lengere šukar osobine. Ola sine verna phenja kola so but vreme služinena sine e Jehovaske. O Pavle džanlja kaj o Jehova mangela len. Le sine le pozitivno mislenje bašo akala phenja hem adaleske ohrabringja len te smirinen pe. Adaleske so o Pavle koncentririnela pe sine ko šukar osobine e javerengere, ov šaj sine ponadari da te ovel bahtalo hem te ovel paše amal e phralencar taro sobranie (w22.03 30, pas. 16-18).

O mir kova so dela le o Jehova smirinela amen hem pomožinela amenge pojasno te dikha o bukja. Baš akava doživingja jekh phen koja so vikinela pe Luz. Oj vakerela: „But puti osetinava man osameno. Adaleske, ponekogaš mislinava kaj o Jehova na mangela man. Ama keda ka aven mange asavke misle, odma vakerava e Jehovaske sar osetinava man. I molitva pomožinela mange te kontrolirinav mle čuvstvija“. Sar so dikhaja taro e phenjakoro iskustvo, i molitva šaj te pomožinel amenge te arakha mir (Fil. 4:6, 7). Džanaja kaj o Jehova hem o Isus ka pomožinen amen. Pottiknime siem te sikava sočuvstvo džikote propovedinaja hem sikavaja, soske o Jehova hem o Isus Hristos sikavena akaja but šuži osobina. Hem utešno tano adava so džanaja kaj o Jehova hem leskoro manglo Čhavo haljovena kaj isi amen slabostija, hem ola mangena te pomožinen amenge te istrajna. Edvaj adžikeraja o dive keda „ka kosel sekoja asvin taro amare jakhja“! (Otk. 21:4; w22.01 15 pas. 7; 19, pas. 19-20).

O Isus spomningja duj različna drumija, jekh „buvlo“ hem jekh „tesno“ (Mat. 7:14). Nigde na spomninela pe trito drumo. Mora korkori te birina ko kova drumo ka patujna. Akaja tani i najvažno odluka so ka ana la — amaro večno životo zavisinela taro adava. But manuša džana ko „buvlo“ drumo soske ki leste tano lokhe te patujnel pe. Žalno tano adava so but džene birinena te ačhoven ko akava drumo hem te keren o isto sar sa o javera so kerena. Ola na mangena te haljoven kaj o Satana čhivela e manušen te džan ko akava drumo, a leskoro drumo ingarela dži ki propast (1. Kor. 6.9, 10, 1. Jov. 5:19). Tari javer strana, o javer drumo tano „tesno“ hem o Isus vakergja kaj hari džene arakhena le. Soske? Primetin kaj ko sledno stiho o Isus predupredinela ple sledbenikon te arakhen pe taro hovavne prorokija (Mat. 7:15; w21.12 22-​23, pas. 3-5).