Dekemvri

O Isus sporedingja peste jekhe pastirea, a ple sledbenikon bakhrencar, te šaj te sikavel kobor paše tano lengoro odnos (Jovan 10:14). Akaja sporedba baš odgovorinela. O bakhre džanena ple pastire hem adaleske šunena leskoro glaso. Jekh turisti dikhlja baš akava. Ov vakerela: „Manglem te slikina nesave bakhren hem adaleske probingjem te vikina len te aven popaše. Ama ola na ale soske na džanena sine amaro glaso. Tegani, jekh čhavo so sine lengoro pastiri samo so vikingja len gele pali leste“. Adava so dikhlja o turisti setinkerela amen ko e Isuseskere lafija so vakergja len ple bakhrenge, javere lafencar ple sledbenikonge. Ov vakergja: „Ola ka šunen mlo glaso“. Ama o Isus tano ko nebo. Tegani sar šaj te šuna le? Jekh način sar šunaja amare Gospodareskoro glaso tano agjaar so primeninaja ko amaro životo o bukja so sikavgja len (Mat. 7:24, 25; w21.12 16, pas. 1-2).

O apostol Pavle sine tvrdoglavo hem but progoninela sine e hristijanen. Ama pokasno, ov halilo ple greške hem sine spremno te meninel plo stavi hem pli ličnost (1. Tim. 1:12-16). Adaleske so o Jehova pomožingja leske, o Pavle ulo jekh ljubezno, sočuvstvitelno hem ponizno pastiri. Sine le doverba kaj o Jehova ka prostinel leske hem odlučingja te na koncentririnel pe ki lende (Rim. 7:21-25). Ov na očekujnela sine te ovel sovršeno. Nego, ov but trudingja pe panda poviše te razvinel i hristijansko ličnost hem ponizno rodingja pomoš taro Jehova te šaj te ispolninel pli zadača (1. Kor. 9:27; Fil. 4:13). O starešine nane imenujme adaleske soj tane sovršena. Sepak, o Jehova očekujnela lendar te priznajnen pumare greške hem te razvinen i hristijansko ličnost (Ef. 4:23, 24). Džikote proučinela i Biblija o starešina šaj te dikhel kote valjani te podobrinel pe hem te kerel o potrebna promene. Ako kerela adava o Jehova ka pomožinel leske te ovel bahtalo hem te ovel šukar pastiri (Jak. 1:25; w22.03 29-30, pas. 13-15).

So valjani te kera ako primetinaja kaj kritikujnaja nesave phralen? Na valjani te bistra kaj amen mora te manga amare phralen (Jovan 2:8). Isto agjaar, valjani taro vilo te molina e Jehova te pomožinel amenge te čhinava te sudina. Ka postapina sprema amare molitve agjaar so ka trudina amen pošukar te zapoznajna okole so kritikujngjem. Na primer, šaj te dža lea ki služba ili te vikina le te avel amende ko gosti. Džikote pošukar zapoznajnaja amare phrale, te dža palo primer e Jehovaskoro hem e Isuseskoro agjaar so ka koncentririna amen ko leskere šukar osobine. Adalea ka sikava kaj šunaja e šukar pastireskiri zapoved te čhinava te sudina. Isto sar o bakhre so šunena o glaso ple pastireskoro, agjaar e Isuseskere sledbenikija šunena leskoro glaso. Bizi razlika dali siem delo taro „tikno stado“ ili taro „javera bakhre“, ponadari da te šuna o glaso e šukar pastireskoro (Luka 12:32; Jovan 10:11, 14, 16; w21.12 19, pas. 11; 21, pas. 17-18).

Keda o Rovoam ulo cari ko Izrael, o narodo rodingja lestar te lokhjarel o pharipa kova so leskoro dad, o Solomon, čhivgja upro Izraelcija. O Rovoam postapingja šukar adalea so pučlja e pophuren taro Izrael te vakeren leske sar te odgovorinel e manušenge. O pophure sovetingje le kaj o manuša sekogaš ka poddržinen le ako kerela adava so rodena lestar (1. Car. 12:3-7). Izgleda, e Rovoameske na svidžingja pe o sovet so dengje le o pophure adaleske ov pučlja okolen so barile lea zaedno. Vakergje leske te čhivel panda pobaro pharipe e narodoske (1. Car. 12:9-11). O Rovoam šaj sine te pučel e Jehova kova sovet te šunel. Namesto adava, kergja adava so vakergje leske o poterne. Adaleske o posledice sine strašna hem e Rovoameske hem e Izraelconge. Amen da šaj te dobina sovet kova so nane baš te svidžinel pe amenge. Sepak, ako tano biblisko sovet valjani te prifatina le (w22.02 9 pas. 6).

Okova soj ponizno hem skromno, koncentririnela pe ko e ternengere jaka strane, a na ko adava kaj nane iskusna. Ov na dikhela len sar konkurencija, nego sar sorabotnikija. O pophure dikhena ko poterne sar poklonija taro Jehova hem ola tane blagodarna bašo adava so kerena o terne. Keda avena ko pophure berša, ola ceninena e ternen soj tane spremna te koristinen pli sila te završinen o zadače hem te služinen ko sobranie. Ki Biblija, i Noemina tani but šukar primer bašo pophure kola so sikavgje blagodarnost hem prifatingje pomoš taro poterne. Otkeda mulo lakoro čhavo, oj vakergja ple bojrake, e Rutake, te iranel pe ki pli familija. Ama, i Rut sine uporno te džal laja ko Vitleem, hem i Noemina prifatingja adaja pomoš (Rut 1:7, 8, 18). Adaja odluka sine but šukar e soldujenge (Rut 4:13-16). I poniznost ka pottikninel e pophuren te džan palo e Noeminakoro primer (w21.09 10-11, pas. 9-11).

Amaro nebesno Dad haljola kaj našti sekova jekh o isto te kerel. Šaj kerea ki služba poviše nego o javera. Ili palem šaj našti te kere doborom kobor o javera so kerena soske sian pophuro, isi tut problemija sastipaja ili familijarna odgovornostija. Ma obeshrabrin tut (Gal. 6:4). O Jehova nane te bistrel adava so tu kerea. Ov tano bahtalo sa džikote tu dea tlo najšukar hem kerea adava taro ispravna pričine. O Jehova dikhela so isi tut ko vilo hem džanela so bi mangea te kere. Ov mangela te ove bahtalo hem zadovolno adalea so šaj te kere leske. Isto agjaar, isi amen andruno mir soske džanaja kaj o Jehova pomožinela ple slugenge keda isi len problemija (Isa. 41:9, 10). Amen isi amen but pričine te ova bahtale keda obožavinaja amare mangle Dade kova so zaslužinela sarine te slavinen le hem te sikaven leske čest (Otk. 4:11; w22.03 24, pas. 16; 25, pas. 18).

Amen mangaja te dža palo e Isuseskoro primer ama na valjani te obeshrabrina amen ako našti sovršeno te kera adava (Jak. 3:2). Jekh učeniko so sikljovela te crtinel našti te ovel doborom šukar sar plo profesori. Ama ako sikljovela taro ple greške hem trudinela pe te kerel o bukja isto sar so kerela leskoro profesori ov ka podobrinel pe. Slično, ako primeninaja adava so sikljovaja tari Biblija hem trudinaja amen te ova pošukar, tegani ka šaj uspešno te dža palo e Isuseskoro primer (Ps. 119:59). Živinaja ko jekh sveto kote soj tano normalno te ovel pe sebično. Ama e Jehovaskoro narodo razlikujnela pe. E Isuseskoro samopožrtvuvano stavi vlijajngja upri amende hem adaleske siem odlučna te dža palo leskoro primer (1. Pet. 2:21). Ako džaja palo e Isuseskoro primer hem sikavaja sar leskoro samopožrtvuvano stavi, tegani ka ova bahtale soske džanaja kaj keraja e Jehovaskiri volja (w22.02 24 pas. 16; 25 pas. 18).

Jekh način sar o Jehova vodinela ple narodo tano preku plo Lafi, i Biblija. Ako odvojnaja amenge vreme hor te razmislina bašo adava so sikavela amen o Jehova, tegani ka šaj te sledina leskoro vodstvo hem uspešno te kera amari služba (1. Tim. 4:15, 16). Jekh javer način sar o Jehova dela amen vodstvo tano preku o „verno hem razborito robo“ (Mat. 24:45). Ponekogaš, akava robo šaj te del upatstvija kola so nane te oven amenge baš jasna. Na primer, šaj te dobina konkretna upatstvija kola so valjani te spreminen amen baši nesavi prirodno katastrofa baši koja so šaj te mislina amenge kaj nane te slučinel pe ko than kote so amen živinaja. So valjani te kera ako mislinaja kaj o upatstvija so dobinaja len nane baš mudra? Razmislin bašo bibliska izveštaija so čitingjem len. Ponekogaš e Devleskere sluge dobinena sine upatstvija kola so na izgledinena sine baš mudra ama ko krajo adala upatstvija spasingja lengoro životo (Sud. 7:7; 8:10; w22.03 18-19, pas. 15-16).

O Isus celosno doverbaja vakergja o lafija taro avdisutno stiho. O Isus džanlja kaj leskiri idnina zavisinela taro Jehova hem ov sine sigurno kaj leskoro Dad ka setinel pe ki leste. So šaj te sikljova taro e Isuseskere lafija? Ačhov verno e Jehovaske čak keda tlo životo tano ki opasnost. Te šaj te kere adava valjani te „ovel tut doverba ko Jehova celo vilea“ (Izr. 3:5). Te dikha o primer e Jošuaskoro, jekh Svedoko kova so sine le 15 berš hem sine le nasvalipe kolestar merela pe. Ov odbingja te prifatinel medicinska tretmanja kolencar so bi phagela sine e Devleskoro zakoni. Kratko angleder te merel ov vakergja ple dajake: „Mamo, me sium e Jehovaske ko vasta... Me sium but uverimo kaj o Jehova sigurno ka voskresninel man. Ov džanela mlo vilo hem me čače mangava le“. Sekova jekh amendar valjani te pučel pe: „Ako mli vera tani ispitimi agjaar so šaj te merav, dali ka mukhav mlo životo e Jehovaske ko vasta hem dali ka ovel man doverba kaj ov ka setinel pe ki mande?“ (w21.04 12-13, pas. 15-16).

E Jehovaskoro narodo tano zajaknimo preku i služba. Keda propovedinaja e javerenge osetinaja amen šukar, bizi razlika dali o manuša šunena amen ili na. Nesave šaj mislinena kaj našti te keren but ki služba, adaleske so lengere okolnostija na dozvolinena lenge. Ako osetinea tut agjaar, ma bistre kaj o Jehova tano zadovolno ako dea tlo najšukar. O Jehova dikhela hem ceninela amari želba te propovedina, čak keda našti ikljovaja taro kher. Adaleske ov šaj te pomožinel amenge te svedočina okolenge so grižinena pe amenge ili e doktorenge hem e medicinsko sestrenge. Ako sporedinaja adava so keraja akana, adalea so kergjem poangle, ka obeshrabrina amen. Ama, ako haljovaja kaj o Jehova pomožinela amenge akana, ka ovel amen sila koja so valjani amenge te izdržina bilo savi nevolja hem ka ova bahtale. Amen na džanaja kote ka mukhel koreno ili kote ka bajrol o seme e čačipaskoro so sejnaja le (Prop. 11:6; w21.05 24-25, pas. 14-17).

Adaleske so o cari o David ulo alčno, ov bistergja adava so dengja le o Jehova, sar soj o barvalipe, o ugled hem i pobeda upro but dušmanja. Iako o David sine svesno kaj e Devleskere poklonija sine but poviše nego so šaj te gejnel len, sepak ko jekh momenti ov bistergja so dengja le o Jehova (Ps. 40:5). Iako e Davide sine le nekobor romnja, ov počmingja te mangel te ovel jekhe džuvljaja koja so više sine ko brako javerea, nešto so o Jehova vakergja kaj tano pogrešno. Adaja džuvli sine i Vitsavea, a lakoro rom sine o Urija o Hetejco. O David postapingja sebično agjaar so sine le seksualna odnosija e Vitsaveaja hem oj ačhili khamni. Adava so kergja o David sine but lošno, ama palo adava ov kergja nešto so sine panda pološno. Ov kergja te ovel mudardo o Urija! (2. Sam. 11:2-15). So mislingja peske o David? Dali mislingja kaj o Jehova na dikhlja adava? Iako o David služingja e Jehovaske but vreme, ov ulo alčno hem adava angja leske but muke. Palo adava, o David priznajngja plo grevo hem kaingja pe. Sine but blagodarno so o Jehova prostingja leske! (2. Sam. 12:7-13; w21.06 17, pas. 10).

Šaj mislinaja amenge kaj na siem sposobna te vodina biblisko kursi. Šaj mislinea tuke kaj valjani poviše te džane te šaj te proučine nekasaja i Biblija. Ako mislinea agjaar, dikh trin bukja kola so ka pomožinen tuke te ovel tut doverba ki tute. Prvo, o Jehova džanela kaj tu šaj te proučine e javerencar. Dujto, o Isus kole so isi le sekoja vlast ko nebo hem ki Phuv, dengja tut i zapoved te sikave e javeren (Matej 28:18). Hem trito, šaj te pomožinen tuke o Jehova hem o javera objavitelija. O Jehova pomožingja e Isuseske te džanel so te vakerel, hem šaj te pomožinel tuke da (Jovan 8:28; 12:49). Isto agjaar, šaj te rode pomoš taro nadgledniko e grupakoro propovedibaske, ili taro iskusno pioneri ili objaviteli te šaj te počmine hem te vodine biblisko kursi. Jekh način sar šaj te bajrare tli doverba tano ako sian prisutno ko lengere bibliska kursija (w21.07 6, pas. 12).

Sar avaja sa popaše ko krajo akale svetoskoro, valjani te ovel amen doverba ko e Jehovaskoro vodstvo sar nikogaš angleder. Soske? Ki bari nevolja šaj te dobina upatstvija kola so šaj te oven amenge čudna ili nelogična. Džanaja kaj o Jehova nane lično te kerel amencar lafi. Verojatno ka del amen upatstvija preku o phralja kolen so čhivgja te predvodinen. Tegani ni hari na valjani te sumnina amen ko upatstvija ili te puča amen: „Dali akava upatstvo čače avela taro Jehova, ili tano lično mislenje e phralengoro kola so predvodinena?“ Dali ka ovel tut doverba ko Jehova hem ki leskiri organizacija ko adava but važno vreme? O odgovor šaj te doznajne le ako razmislinea sar dikhea akana ko upatstvija so dobinaja len. Ako isi tut doverba ko upatstvija avdive hem spremno prifatinea len, verojatno ka kere o isto ki bari nevolja (w22.02 6, pas. 15).

O Jehova pomožingja e Gedeoneske hem leskere 300 manušenge te pobedinen ki jekh borba hem adaleske ola šaj sine te oven but gorda. O manuša taro pleme Efrem gele ko Gedeon, na te pofalinen le, nego te rasprajnen pe lea soske na vikingja len te džan ki borba lea (Sud. 8:1). O Gedeon setinkergja len ko adava sar o Jehova dengja len bereketi. Keda šungje akala lafija, ola na sine više holjame (Sud. 8:3). O Gedeon sikavgja poniznost te šaj te ikerel o mir maškar e Devleskoro narodo. E manušendar taro Efrem sikljovaja kaj amari čest hem amaro anav na valjani te oven amenge považna taro adava te slavinel pe e Jehovaskoro anav. A sar poglavarija hem starešine, šaj te sikljova nešto važno taro Gedeon. Ako nekoj holjanela bašo nešto so kergjem, valjani te haljova le soske tano holjamo. Šaj isto agjaar te pofalina le bašo o šukar bukja so kergja. Te šaj te kera adava, valjani te ova ponizna. But považno tano te ačhova ko mir amare phralencar, nego te dokažina kaj siem ko pravo (w21.07 16-17, pas. 10-12).

O Jehova sikavgja amenge čest agjaar so kergja amen sprema plo liko. Adaleske, šaj te razvina hem te sikava but taro leskere šuže osobine sar soj mangipe, sočuvstvo, vernost hem pravednost (Ps. 86:15; 145:17). Adalea so razvinaja asavke osobine, slavinaja e Jehova hem sikavaja kaj siem leske blagodarna (1. Pet. 1:14-16). Isto agjaar keda trudinaja amen te postapina sar ov so mangela, tegani amen da siem bahtale. Hem adaleske so isi amen sar e Jehovaskere osobine, amen šaj te ova manuša kola so o Jehova mangela te oven ki leskiri familija. O Jehova spremingja amenge jekh but šužo kher. But vreme angleder te stvorinel e prvo manuše, o Jehova spremingja e manušenge i Phuv (Jov 38:4-6; Erem. 10:12). Adaleske so ov tano ljubezno hem darežlivo, ov stvoringja but šukar bukja te šaj amen te uživina ki lende (Ps. 104:14, 15, 24). Palo nesavo vreme, o Jehova dikhlja sa adava so stvoringja hem „dikhlja kaj adava tano šukar“ (1. Moj. 1:10, 12, 31; w21.08 3, pas. 5-6).

Sarinen amen isi amen zadača te propovedina hem te kera učenikija (Mat. 28:19, 20; Rim. 10:14). Mangea li te ove povešto ki akaja najvažno zadača? Čhiv tuke konkretna celija džikote proučinea hem primeninea adava so sikljovea tari brošura Čitibe hem sikajbe. Na valjani te bistre kaj i najvažno cel koja so šaj te čhive la tuke tani te razvine o hristijanska osobine (Kol. 3:12; 2. Pet. 1:5-8). Sigurno sarine amen mangaja te kera poviše bašo Jehova nego so keraja akana. Ko nevo sveto, ka šaj te služina leske celosno. Ama dži tegani, ako koristinaja sekoja prilika so isi amen panda akana, šaj te ova pobahtale hem te na ova doborom razočarime. Ama soj najvažno, ka ana čest hem slava e Jehovaske, amare bahtale Devleske (1. Tim. 1:11). Adaleske, te ova bahtale bašo bukja so akana šaj te kera len e Jehovaske! (w21.08 25, pas. 18-20).

Ako bariljan sar jekh taro e Jehovaskere svedokija, verojatno taro tiknipe sikliljan bašo Jehova. Sikavgje tut kaj ov tano o Stvoriteli, kaj isi le but šuže osobine hem kaj isi le šuži namera e manušencar (1. Moj. 1:1; Dela 17:24-27). But manuša na verujnena kaj isi Devel, ili kaj ov stvoringja sa o bukja. Namesto adava, ola verujnena kaj o životo ulo slučajno hem kaj pohari razvingja pe ko složena vrste životo. Nesave taro adala manuša tane but školujme. Ola šaj vakerena kaj i nauka dokažingja kaj i Biblija nane točno hem kaj okola so verujnena ko Stvoriteli nane školujme, nane inteligentna hem kaj tane naivna. Bizi razlika kobor vreme siem e Jehovaskere svedokija, sarine amen ponadari da valjani te bajrara amari vera. Ako keraja agjaar, tegani okola so vakerena kaj i Biblija nane točno, ka našti te hovaven amen „filozofijaja hem hovavne hem čuče lafencar“ (Kol. 2:8; w21.08 14, pas. 1-3).

O Avel, o Noe, o Avraam hem o Jov sikavgje kaj poštujnena hem mangena e Jehova agjaar so sine poslušna e Jehovaske, sine len vera hem dengje leske žrtve. Jekh tano sigurno, ola dengje pestar sa te šaj te slavinen e Jehova hem adaleske lengoro obožavibe sine prifatlivo leske. Pokasno o Jehova dengja e Izraelconge e Mojseeskoro zakoni. Ko akava zakoni sine dende upatstvija bašo adava sar te obožavinel pe e Jehova ko prifatlivo način. Palo e Isuseskoro meribe hem voskresenie, o Jehova na rodela sine više taro manuša te ikeren pe ko e Mojseeskoro zakoni (Rim. 10:4). O hristijanja valjani sine te ikeren pe ko nevo zakoni „e Hristoseskoro zakoni“ (Gal. 6:2). Te šaj te sikaven kaj tane poslušna akale zakoneske, ola na valjani sine te ikeren nesavo baro spisako praviloncar, nego valjani sine te džan palo e Isuseskoro primer hem te oven poslušna ko leskere sikljojba. Avdive da, o hristijanja dena pestar sa te džan palo Hristos te šaj te keren e Jehovaskiri volja hem te „dobinen nevi sila“ (Mat. 11:29; w22.03 20-21, pas. 4-5).

O Jehova šunela ple čhaven. Ov šunela sine ple prvo bijame Čhave džikote ov sine ki Phuv. Ov šungja e Isuse džikote molinela pe sine bašo važna odluke, sar na primer keda biringja e 12 apostolen (Luka 6:12, 13). O Jehova isto agjaar šungja leskere molitve keda sine but sekirimo. Kratko angleder te ovel izdajmo, o Isus molingja pe ple Dadeske bašo bukja kola so valjani sine te doživinel len. O Jehova na samo so šungja e Isuseskere molitve, nego isto agjaar bičhalgja jekhe angele te ohrabrinel le (Luka 22:41-44). Avdive da o Jehova šunela ple slugengere molitve, hem ov odgovorinela ki lende ko pravo vreme hem ko najšukar način so šaj (Ps. 116:1, 2). Jekh phen tari Indija lično dikhlja sar o Jehova odgovorinela ko lakere molitve. Oj borinela pe sine phare emocionalna problemencar hem but molinela pe sine baši adaja buti. Oj vakerela: „E masekoskiri emisija taro maj 2019 berš ko JW Broadcasting^® kerela sine lafi bašo adava, so šaj te kera keda siem but sekirime. Baš adava valjani sine mange. Agjaar o Jehova odgovoringja ko mle molitve“ (w21.09 21-22, pas. 6-7).

Šaj li te zamisline tuke kobor sine pharo e hristijanenge taro prvo veko te mukhen sa so sine len hem te počminen taro početok? Valjani sine lenge vera hem doverba kaj o Jehova ka grižinel pe lenge bašo lengere osnovna potrebe. Ama ola na sine mukhle korkori, sine len pomoš. Pandž berš angleder o Rimjanja te opkolinen o Erusalim, o apostol Pavle dengja e Evreenge jekh but važno sovet: „Ko tumaro životo te na ovel tumen mangipe sprema o pare, nego oven zadovolna adalea so isi tumen. Soske ov vakergja: ‘Nikogaš nane te mukhav tut, hem nikogaš nane te iranav tuke mo dumo’. Adaleske hrabro šaj te vakera: ‘O Jehova tano adava so pomožinela man. Nane te darav. So šaj te kerel mange manuš?’ “ (Evr. 13:5, 6). Sigurno okola so šungje e Pavleskoro sovet angleder te aven o Rimjanja sine lenge polokho te prilagodinen pe ko skromno životo ko pumare neve khera. Ola sine sigurna kaj o Jehova ka grižinel pe bašo lengere osnovna potrebe (w22.01 4, pas. 7, 9).

Keda razmislinaja bašo nesavo milostivo manuš, šaj mislinaja nekaste soj ljubezno, sočuvstvitelno hem darežlivo. Isto agjaar šaj avela amenge ki godi e Isuseskiri sporedba bašo milostivo Samarjani. Akava manuš so sine tari javer nacija „sikavgja milost“ e Evreeske so sine napadimo taro čora. E Samarjaneske „pelo žal“ bašo akava Evrei hem ljubezno grižingja pe leske (Luka 10:29-37). Akaja sporedba istakninela jekh but šuži osobina amare Devleskiri — i milost. Oj tani samo jekh delo taro e Devleskoro mangipe, hem ov sikavela la amenge ko but načinija sekova dive. Isi panda jekh način sar šaj te sikavel pe milost. Jekh milostivo manuš šaj te odlučinel te na kazninel nekas so valjani te ovel kaznimo. O Jehova posebno ko akava način sikavgja amenge milost. O psalmisti vakergja: „Na postapinela amencar sprema amare grevija“ (Ps. 103:10). Ama ko javera situacie o Jehova strogo ukorinela okole so grešingja (w21.10 8, pas. 1-2).

Sar so spomningjem angleder, o Jehova sikavela plo verno mangipe samo ple slugenge — okolenge soj tane paše lea. Akava šaj te dikhel pe taro adava so vakergje le o cari o David hem o proroko o Daniel. Na primer, o David vakergja: „Ponadari da sikav tlo verno mangipe okolenge so pendžarena tut“. „E Jehovaskoro verno mangipe tano večno upro okola so darana lestar“. A o Daniel vakergja: „Jehova, tu o čačutno Devel, sikavea verno mangipe okolenge so mangena tut hem so ikerena tle zapovedija“ (Ps. 36:10; 103:17; Dan. 9:4). Sprema akala lafija, o Jehova sikavela verno mangipe ple slugenge soske ola pendžarena le, darana lestar, mangena le hem ikerena leskere zapovedija. O Jehova sikavela plo verno mangipe samo okolenge so služinena leske ko ispravno način. Angleder te počmina te služina e Jehovaske, amen dobingjem o mangipe so o Jehova sikavgja le sa e manušenge (Ps. 104:14). Ama, sar leskere sluge, amen isto agjaar isi amen korist taro leskoro verno mangipe (w21.11 4, pas. 8-9).

Bizi razlika sar ka reagirinen o javera, amen siem odlučna te šuna e Isuseskere lafija. Avdive nesave religiozna vodačija tane poznata ili but vlijatelna, adaleske but manuša mangena te sledinen len. Ola tane doborom vooduševime lendar so dikhena ki lende sar devela. Džana ko lengere crkve, kinena lengere lila, hem dena but pare lenge ili e organizacienge kola so ola poddržinena len. Nesave verujnena ko sekova lafi so ka vakeren. Ola tane doborom vooduševime lendar sar ka phene dikhena e Isuse angli peste. Ama okola so obožavinena e Jehova ko ispravno način na džana palo manuša. Iako poštujnaja okolen so predvodinena, amen prifatinaja adava so o Isus sikavgja amen: „Sarine tumen sien phralja“ (Mat. 23:8-10). Na obožavinaja e manušen, bizi razlika dali tane religiozna vodačija ili politička vladetelija. Hem na poddržinaja lengere aktivnostija hem celija. Namesto adava, amen siem neutralna hem odvojme taro sveto. Ko sa akava amen siem but porazlična taro sa o javera religie so vakerena kaj tane hristijanska (Jovan 18:36; w21.10 20, pas. 6-7).

Sekova hristijani kova so mangela te ovel sveto, mora te ovel sigurno kaj nikoj ili ništo nane te ovel leske považno taro leskoro amalipe e Devlea. Adaleske so phiravaja o anav e Jehovaskere svedokija, mora te ova odlučna te izbegina te kera nešto so šaj te ladžakerel leskoro sveto anav (3. Moj. 19:12; Isa. 57:15). O Izraelcija sikavgje kaj o Jehova tano lengoro Devel agjaar so sine leske poslušna ko zapovedija. Ki 3. Mojseeva 18:4 pišinela: „Postapinen sprema mle zakonija, ikeren tumen ko mle odredbe hem živinen sprema lende. Me sium o Jehova, tumaro Devel“. Ko 19 poglavje isi nesave taro akala odredbe e Izraelconge. Na primer, ko stihija 5-8, 21 hem 22, tane spomnime o životinska žrtve. O Izraelcija valjani sine te den adala žrtve ko način kolea so nane sine te meljaren adava soj sveto e Jehovaske. Akala stihija valjani te pottikninen amen te manga te ugodina e Jehovaske hem te falina le agjaar so ka da žrtve soj leske prifatliva, sar so siem pottiknime ko Evreite 13:15 (w21.12 5-6, pas. 14-15).

O terne bračna parija šaj te sikljoven taro e javerengoro iskustvo kola so siklile te ovel len doverba ko Jehova. Nesave bračna parija šaj beršencar služingje ki polnovremeno služba. Soske na rodena lendar sovet keda razmislinena bašo tumare celija? Akava tano jekh način sar šaj te sikaven doverba ko Jehova (Izr. 22:17, 19). O brako tano poklon taro Jehova (Mat. 19:5, 6). Ov mangela o bračna parija te uživinen ko adava poklon. Tumen o terne bračna parija, dali razmislingjen so šaj te keren tumare životoja? Dali dena tumendar sa te šaj te sikaven e Jehovaske kobor sien blagodarna bašo poklonija so dengja tumen? Keren lafi e Jehovaja ki molitva, proučinen leskoro Lafi te šaj te arakhen načelija so šaj te primeninen len ki tumari situacija. Palo adava, šunen o sovet kova so dela tumen o Jehova. Šaj te oven sigurna kaj ka ovel tumen šužo hem bahtalo životo ako i služba bašo Jehova tumenge ko prvo than! (w21.11 19, pas. 16, 18).

E Jakove sine le ispravno stavi baši peste. Ov na mislinela sine kaj tano považno taro javera hristijanja adaleske so sine e Isuseskoro phral ili adaleske so sine le važna zadače. Ov bašo javera hristijanja vakerela sine kaj tane leskere „mangle phralja“ (Jak. 1:16, 19; 2:5). O Jakov na mangela sine o javera te mislinen kaj tano sovršeno. I pouka amenge: Ma bistre kaj sarine grešinaja. Na smejnaja te mislina kaj siem pošukar taro amare interesentija. Soske na? Ako amare interesenteske daja čuvstvo kaj siem sovršena, ov šaj te obeshrabrinel pe hem te mislinel peske kaj nikogaš našti te kerel adava so rodela lestar o Devel. Ama ako iskreno priznajnaja kaj na sine amenge sekogaš lokho te primenina o bibliska načelija hem ako objasninaja sar o Jehova pomožingja amenge te kera promene ko amaro životo, ka pomožina amare interesenteske te dikhel kaj ov da šaj te služinel e Jehovaske (w22.01 11-12, pas. 13-14).

So poviše razmislinaja sar o Isus, doborom poviše ka postapina sar leste hem ka ova panda pouspešna ko adava te ovel amen sar leskiri ličnost (Evr. 1:3). Šaj mislinaja amenge: „O Isus tano sovršeno me nikogaš nane te ovav sar leste“. Ako tu da osetinea tut agjaar, ma bistre akala bukja. Prvo, tu sian stvorimo te ove sar o Jehova hem o Isus. Znači, tu šaj te birine te dža palo lengoro primer hem dži negde šaj te ove uspešno ko adava (1. Moj. 1:26). Dujto, e Devleskoro sveti duh tani i najmokjno sila ko celo univerzum. Adaja sila šaj te pomožinel tut te kere bukja so na bi šaj sine korkori te kere len. Trito, o Jehova na očekujnela tutar sovršeno te sikave o osobine so avena taro sveti duh. Ustvari, ov odvojngja 1.000 berš te šaj okola so isi len nadež te živinen ki phuv te oven sovršena (Otk. 20:1-3). Adava so o Jehova očekujnela amendar avdive tano te da amaro najšukar hem te ovel amen doverba ki leste kaj ov ka pomožinel amen (w22.03 9, pas. 5-6).

I molitva nane o edinstveno način sar šaj te kera pozoralo amaro amalipe e Jehovaja. Adava so ka proučina e Devleskoro Lafi hem so ka ova prisutna ko sostanokija šaj isto agjaar te pomožinel amenge te ova paše e Devlea. So šaj te kere te šaj te ovel tut pobari korist keda proučinea hem keda sian prisutno ko sostanokija? Puč tut: „So obično lela mlo vnimanie keda sium prisutno ko sostanok ili keda mangava te proučinav?“ Dali keda javinela pe mange nekoj, ili keda dobinava poraka ko mlo telefoni ili ko nesavo javer elektronsko ured? Keda primetinea kaj tle misle počminena te džan negde javerthe džikote proučinea ili sian ko sostanok, molin e Jehova te pomožinel tuke te koncentririne tut. Šaj nane te ovel tuke lokho te cide adala misle ki strana hem te koncentririne tut ko duhovna bukja, ama but tano važno te kere adava. Molin tut bašo mir kova so ka arakhel na samo tlo vilo nego isto agjaar tle misle (Fil. 4:6, 7; w22.01 29-30, pas. 12-14).

O cari Ozija otfrlingja sovet. Ov khuvgja ko jekh delo taro hrami kote so samo o sveštenikija smejnena sine te khuven hem manglja te tharel temjan. E Jehovaskere sveštenikija vakergje leske: „Ozija nane tut pravo te thare temjan e Jehovaske! Samo o sveštenikija smejnena te keren adava“. Sar reagiringja o Ozija? Te prifatinel sine ponizno o sovet hem odma te ikljol sine taro hrami, o Jehova šaj ka prostinel leske sine. Namesto adava, o Ozija holjangja. Soske na prifatingja o sovet? Ov sigurno mislingja peske kaj sine le pravo te kerel sa so mangela adaleske so sine cari. Ama o Jehova na mislingja agjaar. Adaleske so sine arogantno, o Jehova kazningja le lepraja hem „ačhilo leprozno sa džikote na mulo“ (2. Let. 26:16-21). Taro e Ozijaskoro primer sikljovaja kaj bizi razlika koj siem ako na šunaja o biblisko sovet o Jehova nane te prifatinel amen sar ple sluge (w22.02 9, pas. 7).

Okova so dozvolinela te vlijajnel upri leste i purani ličnost obično razmislinela hem postapinela ko telesno način (Kol. 3:9). Ov šaj tano sebično, sigate holjanela, nane blagodarno hem tano gordo. Šaj dikhela pornografija hem filmija kote so isi nemoral hem nasilstvo. Le sigurno isi le šukar osobine hem šaj čak osetinela pe krivo bašo bukja so vakerela hem so kerela. Ama nane le bari želba te kerel promene ko plo razmisluvanje hem postapke (Gal. 5:19-21; 2. Tim. 3:2-5). Adaleske so siem nesovršena, nikoj amendar našti celosno te cidel sa o lošna misle hem želbe taro plo vilo hem tari godi. Ponekogaš ka kera ili ka vakera nešto bašo kova so pokasno ka kaina amen (Erem. 17:9; Jak. 3:2). Ama adalea so huljavaja i purani ličnost, na siem više robija e telesna stavenge hem postapkenge, hem adaleske ulem but pojaver manuša (Isa. 55:7; w22.03 3, pas. 4-5).

Tumen o starešine, dikhen ko šukar osobine so isi e phralen hem e phenjen. Sekova jekh tano nesovršeno, ama sekole amendar isi le osobine kola so šaj te cenina len. Džangjola pe, o starešine ponekogaš ka valjani te sovetinen jekhe phrale ili phenja. Ama isto sar o apostol Pavle, ola trudinena pe te na koncentririnen pe ko lafija hem ko postapke so šaj te nervirinen len. Namesto adava, o starešine dikhena kaj adava phral mangela e Jehova, kaj istrajnela džikote služinela leske hem kaj mangela te kerel šukaripe. O starešine so dikhena pozitivno ko javera kerena o phralja hem o phenja te osetinen pe mangle ko sobranie. Ma bistren kaj o Jehova na rodela tumendar te oven sovršena, namesto adava ov očekujnela tumendar te oven verna (1. Kor. 4:2). Hem šaj te oven sigurna kaj o Devel isto agjaar ceninela adava so tumen kerena ki služba baši leste. O Jehova nikogaš nane „te bistrel adava so kergjen hem o mangipe so sikavgjen leskere anaveske, agjaar so služingjen okolenge soj sveta hem ponadari da služinena lenge“ (Evr. 6:10; w22.03 31, pas. 19, 21).