Januari

Soske o Timotej sine korisno sluga e Jehovaske? Adaleske so sine le but šuže hristijanska osobine (Fil. 2:19-22). Taro adava so o apostol Pavle pišingja bašo Timotej šaj te dikha kaj ov sine ponizno, verno, vredno hem dostojno baši doverba. Ov čače grižinela pe sine e phralenge. Adaleske o Pavle but mangela sine e Timotee hem na darala sine te del le phare zadače. Ako amen da razvinaja šuže osobine, o Jehova ka mangel amen hem ka ova pokorisna e phralenge taro sobranie (Ps. 25:9; 138:6). Adaleske, molin tut hem razmislin sar šaj te ove pošukar ličnost. Birin jekh konkretno osobina kolate so mangea te kere buti. Dali šaj te ove posočuvstvitelno? Šaj li te trudine tut te kere mir e javerencar hem te ove pospremno te prostine? Šaj but te pomožinel tuke ako pučea jekhe paše amale te vakerel tuke sar šaj te ove pošukar (Izr. 27:6; w22.04 23, pas. 4-5).

O Jehova mangela te ova radosna. Amen džanaja akava soske i radost tani jekh taro osobine so avena taro sveti duh (Gal. 5:22). Adaleske so isi poviše radost keda dela pe nego keda lela pe, but siem radosna keda daja sa amendar ki služba hem keda pomožinaja amare phralenge ko različna načinija (Apo. 20:35). Ko avdisutno stiho, o apostol Pavle spomninela duj bukja kola so ka pomožinen amenge te ačhova radosna. Prvo, amari cel valjani te ovel te da e Jehovaske amaro najšukar. Ako daja leske amaro najšukar, ka ova radosna (Mat. 22:36-38). Dujto, na valjani te sporedina amen e javerencar. Šaj isi amen šukar sastipe, nesave sposobnostija ili siklilem te kera nesave bukja but šukar, amen sepak valjani te ova blagodarna e Jehovaske bašo adava so šaj te kera. Tari javer strana, ako o javera ko nesavo način tane pošukar amendar ki služba, valjani te ova radosna, soske koristinena ple sposobnostija te šaj te slavinen e Jehova (w22.04 10, pas. 1-2).

O krajo e hovavne religijakoro ka avel taro jekh puti hem adava ka iznenadinel e celo sveto (Otk. 18:8-10). O uništibe e Bare Vaviloneskoro ka tresinkerel e celo sveto hem adava ka anel baro pharipe. Ama e Devleskere narodo ka ovel le najhari duj pričine soske te ovel radosno. I hovavni religija koja soj tani beršencar dušmani e Jehovaske nane više te postojnel hem panda hari ka ova oslobodime taro akava lošno sveto. O Daniel prorokujngja kaj o „čačutno pendžaribe ka bajrol“. Hem čače barilo! Amen akana haljovaja kaj o proroštvija ispolninena pe ko amaro vreme (Dan. 12:4, 9, 10). Adava so akala proroštvija tane doborom točna kerena te ovel amen panda pobaro poštovanje sprema o Jehova hem leskoro Lafi (Isa. 46:10; 55:11). Adaleske ponadari da bajrar tli vera agjaar so hor ka proučine i Biblija hem ka pomožine e javerenge te oven paše amala e Jehovaja. Ov ka zaštitinel okolen so isi len celosno doverba ki leste hem ka del len „mir so trajnela“ (Isa. 26:3; w22.07 6-7, pas. 16-17).

Ko lil Otkrovenie doznajnaja kaj e Devleskoro Carstvo vladinela hem kaj o Satana sine frdimo taro nebo (Otk. 12:1-9). Adava značingja mir okolenge soj ko nebo, ama angja problemija amenge so siem akate ki phuv. Soske? Adaleske so o Satana tano holjamo hem napadinela e Jehovaskere slugen akate ki phuv (Otk. 12:12, 15, 17). Sar šaj te ačhova verna iako o Satana napadinela amen? (Otk. 13:10). Jekh buti so ka pomožinel amenge tani ako džanaja so ka slučinel pe ki idnina. Na primer, ko Otkrovenie o apostol Jovan opišinela nesave taro blagoslovija kolende so panda hari ka uživina. Jekh taro adala blagoslovija tano kaj e Devleskere dušmanja ka oven uništime. Panda taro prvo stiho o lil Otkrovenie vakerela amenge kaj o informacie so ka čitina len tane dende „ko znakija“, javere lafencar ki simbolično čhib (Otk. 1:1 w22.05 8, pas. 1-3).

O cvrsto stavi so ka ovel e Jehovaskere verna slugen but ka holjankerel okolen so protivinena pe e Jehovaske. Adaleske jekh koalicija taro sa o narodija ka napadinel e Devleskere slugen ki celo phuv. Akava napad ki Biblija tano opišimo sar napad taro Gog taro Magog (Ezek. 38:14, 15). Sar ka reagirinel o Jehova ko akava opasno napad? Ov vakerela amenge: „But ka holjanav “ (Ezek. 38:18, 21-23). Taro Otkrovenie 19 poglavje doznajnaja so slučinela pe ponadari. O Jehova ka bičhalel ple Čhave te zaštitinel ple narodo hem te pobedinel lengere dušmanen. O „nebesna vojske“ kote soj o verna angelija hem o 144.000, ka borinen pe zaedno e Isusea protiv o Gog taro Magog (Otk. 17:14; 19:11-15). Sar ka završinel akaja vojna? Sa o manuša hem o organizacie kola so protivinena pe e Jehovaske ka oven celosno uništime! (Otk. 19:19-21; w22.05 17, pas. 9-10).

Odma otkeda o Adam hem i Eva grešingje, o Jehova dengja nadež lengere potomconge preku jekh važno proroštvo. Adava proroštvo tano pišimo ki 1. Mojseeva 3:15: „Ka čhivav dušmanluko maškar tute hem maškar i džuvli, maškar lakoro potomstvo hem tlo potomstvo. Ov ka zgmečinel tlo šero, a tu ka kicine le ki peta“. Akava proroštvo pojavinela pe ko prvo lil tari Biblija. Ama ov tano posebno adaleske so sa o javera da bibliska lila tane povrzime lea. Isto sar o lepako so spojnela sa o listija ko jekh lil, agjaar o proroštvo tari 1. Mojseeva 3:15 povrzinela i sodržina taro sekova biblisko lil ko jekh haberi, a adava tano kaj o Devel ka bičhalel Spasiteli kova so ka uništinel e Satana hem sa leskere sledbenikon. Adava ka ovel baro blagoslov sarinenge kola so mangena e Jehova! O proučibe i Biblija ka pomožinel amenge te dikha sar ispolninela pe akava proroštvo hem sar šaj te ovel amen korist lestar (w22.07 14, pas. 1-3).

Molin e Jehova te del tut i mudrost koja so valjani tuke te šaj te pomožine tumare čhavenge te zamangen le (Jak. 1:5). Ov tano i najšukar ličnost so šaj te del tut sovet, hem isi poviše pričine soske tano agjaar. Te dikha duj lendar. Prvo, o Jehova tano o najiskusno roditeli (Ps. 36:9). Hem dujto, o mudro sovet so dela le sekogaš anela šukar rezultati (Isa. 48:17). Preku plo Lafi hem pli organizacija, o Jehova dela but duhovno hrana koja so temelinela pe ki Biblija hem koja so šaj te pomožinel e roditelenge te sikaven pumare čhaven te zamangen e Jehova (Mat. 24:45). Na primer, šaj te arakhe but praktična sovetija ki rubrika „Soveti za semejstvata“ koja so nekobor berša ikljola sine ko pečatimo izdanie ko spisanie Razbudete se!, a akana arakhljola ki amari internet-stranica. Isto agjaar, but videoklipija tari amari internet-stranica šaj te pomožinen e roditelenge te primeninen e Jehovaskere sovetija džikote bajrarena pumare čhaven (Izr. 2:4, 5; w22.05 27, pas. 4-5).

Čače, na postojnela nikoj so šaj te prostinel sar o Jehova. Prvo, ov tano sekogaš spremno te prostinel. Dujto, ov džanela amen najšukar. O Jehova džanela sa baši amende hem najšukar šaj te dikhel dali čače kainaja amen. Trito, keda o Jehova prostinela amenge ov celosno kerela adava, sar te phene nikogaš na grešingjem. Adaleske šaj te ovel amen čisto sovest hem te kera le radosno. Džangjola pe, sa džikote siem nesovršena amen ka grešina. Ama o lafija taro lil Uvid ko sveta lila, 2 tom, strana 771 utešinena amen: „O Jehova tano milostivo hem haljola kaj leskere sluge tane slaba, adaleske na valjani celo vreme te osetinen pe kriva bašo greške so kerena len tari pli nesovršenost (Ps. 103:8-14; 130:3). Ako dena pestar sa te šaj te živinen sprema e Devleskoro drumo, ola šaj te oven bahtale (Fil. 4:4-6; 1. Jov. 3:19-22; w22.06 7, pas. 18-19).

I dar taro protivibe e vlastengoro nane i edinstveno buti so koristinela la o Satana. Nesave but poviše darana taro adava sar ka reagirinel lengiri familija bašo čačipe nego te oven maltretirime. But mangena pumare familija hem mangena ola da te zapoznajnen e Jehova hem te zamangen le. Nane lenge sa jekh keda lengiri familija kerela lošno lafi bašo Jehova hem bašo leskere sluge. Ama ko nesave slučaija nesave tari familija so ko početok protivinena pe sine pokasno prifatingje o čačipe. Ama so ako amari familija na mangela te ovel la kontakt amencar adaleske so ulem Svedokija? Sar ka reagirina? O lafija taro Psalm 27:10 šaj but te utešinen amen. Ako na bistraja kobor but o Jehova mangela amen nane te dara taro progonstvo. Hem uverime siem kaj ov ka nagradinel amen baši amari istrajnost. O Jehova but pošukar taro bilo koj javer ka grižinel pe bašo amare fizička, emocionalna hem duhovna potrebe (w22.06 16-17, pas. 11-13).

Džikote kerela sine pli služba, o Isus sine pogrešno obvinimo kaj tano pijanica, kaj tano halano, kaj služinela e Bengeske, kaj na ikerela pe ko sabat, hem čak kaj na poštujnela e Devle (Mat. 11:19; 26:65; Luka 11:15; Jovan 9:16). Sepak, o Isus na irangja lenge lošno lafencar. Sar o Isus, amen da na valjani te irana e javerenge lošnipaja (1. Pet. 2:22, 23). Džangjola pe adava nane lokho (Jak. 3:2). Te dikha so šaj te pomožinel amenge. Ako o manuš kaske so svedočinea kerela tuja grubo lafi, trudin tut te ačhove smirimo. Jekh phral kova so vikinela pe Sem vakerela: „Trudinava man te mislinav ko adava kobor tano važno o manuš te šunel o čačipe hem kaj ov šaj te meninel pe“. Ponekogaš o manuš tano holjamo samo adaleske so alem ko pogrešno vreme. Keda keraja lafi nekasaja soj tano holjamo šaj kratko te molina amen e Jehovaske te pomožinel amenge te na vakera nešto so nane ljubezno hem te ačhova smirime hem te sikava poštovanje (w22.04 6, pas. 8-9).

Jekh važno način sar šaj te pomožinen tumare čhavenge te oven popaše e Jehovaja tano agjaar so ka proučinen lencar i Biblija (2. Tim. 3:14-17). Ama i Biblija otkrinela jekh javer da način sar šaj o terne te sikljoven nešto bašo Jehova. Ko lil Izreki jekh dad pottikninela ple čhave nikogaš te na bistrel e Jehovaskere osobine kola so dikhena pe preku o stvorime bukja (Izr. 3:19-21). Tumen o roditelija sigurno uživinena te oven zaedno tumare čhavencar avri ki priroda. Koristinen adava vreme te pomožinen lenge te dikhen e Jehovaskere but šuže osobine preku o stvorime bukja (Rim. 1:20). Primetin sar o Isus koristingja o stvorime bukja te sikavel e javeren. Ki jekh prilika ov vakergja ple sledbenikonge te dikhen e gavranen hem e lulugjen (Luka 12:24, 27-30). Ov sikavgja ple učenikon jekh važno pouka bašo adava kobor tano darežlivo hem ljubezno lengoro nebesno Dad. Ako o Jehova dela hajbaske e gavranenge hem uravela e lulugjen, ov sigurno ka del hajbaske ple verna slugenge hem ka uravel len (w23.03 20-21, pas. 1-4).

Blagodarna siem e Jehovaske so šaj te molina amen preku leskoro Čhavo. O Jehova šunela hem odgovorinela ko molitve kola soj bičhalde preku e Isuseskoro anav hem prostinela amare grevija preku e Isuseskiri otkupno žrtva. I Biblija opišinela e Isuse sar amaro „prvosvešteniko kova so bešlja ki desno strana taro prestol taro Sevišno ko nebo“ (Evr. 8:1). „Ko amaro Dad isi amen pomošniko, o Isus Hristos“ (1. Jov. 2:1). But siem blagodarna so o Jehova dengja amen Prvosvešteniko so haljola amare slabostija hem kova so kerela bukja „baši amari korist“ (Rim. 8:34; Evr. 4:15). Adaleske bizo e Isuseskiri žrtva na bi šaj sine te molina amen e Devleske. Sigurno složinea tut kaj bizi razlika kobor hem te blagodarina amen e Jehovaske nikogaš nane te ovel dovolno bašo skapoceno poklon so dengja amen — ple mangle Čhave! (w22.07 23, pas. 10-12).

O doverlivo manuš trudinela pe te ačhovel ko plo lafi hem te vakerel o čačipe (Ps. 15:4). O javera džanena kaj šaj te verujnen leske. Amen mangaja o phralja hem o phenja te dikhen agjaar ki amende. Našti te očekujna o javera odma te verujnen amenge. I doverba valjani te zaslužinel pe. Vakerela pe kaj i doverba tani sar o pare, pharo tano te zarabotinel pe ama but lokho šaj te našavel pe. Nekoj so čače zaslužinela amari doverba tano o Jehova. Sekogaš šaj te ovel amen doverba ki leste soske „ov tano verno ko sa so kerela“ (Ps. 33:4). Hem ov očekujnela amen da te ova sar leste (Ef. 5:1). Kobor siem blagodarna so o Jehova kergja te ova delo tari familija kote so sarine tane ljubezna hem doverliva. Sarine amen valjani te trudina amen te zaslužina i doverba amare phralengiri hem phenjengiri. Sa džikote daja amendar sa te sikava mangipe, poniznost, razboritost, iskrenost hem samokontrola keraja te ovel doverba ko sobranie. Adaleske te dža palo e Jehovaskoro primer agjaar so ponadari da ka sikava kaj siem doverliva (w22.09 8, pas. 1-2; 13, pas. 17).

Iako isi amen but phralja hem phenja ponekogaš šaj te osetina amen korkori hem obeshrabrime hem mislinaja kaj valjani korkori te soočina amen asavke čuvstvoncar. O Jehova na mangela te osetina amen agjaar. Te razmislina sar postapingja e prorokoja e Ilijaja. O Jehova pottikningja e Ilija te kerel lea lafi. Ov duj puti pučlja le: „So kerea akate?“ (1. Car. 19:9, 13). Sekova puti o Jehova vnimatelno šungja le džikote phravgja leske plo vilo. Isto agjaar uveringja le kaj isi javera da Izraelcija kola so panda obožavinena e Jehova (1. Car. 19:11, 12, 18). Sigurno o Ilija osetingja pe but pošukar otkeda vakergja e Jehovaske sar osetinela pe hem otkeda o Jehova odgovoringja leske. O Jehova dengja e Ilijaske nekobor važna zadače. Ov vakergja leske te pomazinel e Azaile sar cari upri Sirija, e Juje sar cari upro Izrael hem e Elisee sar proroko (1. Car. 19:15, 16). Agjaar so dengja le akala zadače o Jehova pomožingja leske te koncentririnel pe ko pozitivna bukja. O Devel isto agjaar dengja le paše amal, e Elisee (w22.08 8, pas. 3; 9, pas. 5).

Dali nekogaš tlo sobranie gradingja ili renoviringja jekh dvorana? Ako oja, sigurno setinea tut ko prvo sostanok so ikergjen ki adaja dvorana. Sian sine but blagodarno e Jehovaske, hem šaj sian sine doborom radosno so pherdile te jakhja hem edvaj giljagjan i prvo gili. Amare šukar gradime dvorane anena falba e Jehovaske. Ama amen anaja pobari falba e Jehovaske keda učestvujnaja ki javer gradežno buti. Ki adaja buti tano vklučimo nešto but povredno taro doslovna gradbe, a adava tano te izgradina e manušen so avena ko adala thana obožavibaske. O apostol Pavle mislingja ki asavki simbolično izgradba keda vakergja o lafija taro avdisutno stiho. O apostol Pavle tano but šukar primer amenge soske džanela sine sar te ohrabrinel ple phralen hem phenjen. Ov sine lencar sočuvstvitelno. Amen šaj te dža palo leskoro primer agjaar so ka izgradina e phralen hem e phenjen (1. Kor. 11:1 w22.08 20, pas. 1-2).

Jekh hristijani so mangela te ovel pravedno anglo e Jehovaskere jakhja ka kerel točno sa sar so valjani, javere lafencar ka ovel pošteno ki pli buti. Nekoj so mangela te kerel adava soj pravedno, mrzinela te dikhel sar nekoj tano maltretirimo. Okova soj čače pravedno, razmislinela sar o Jehova dikhela ko odluke so anela len te šaj „celosno te ugodinel e Jehovaske“. I Biblija vakerela kaj i pravednost avela taro Jehova. Isto agjaar vakerela kaj ov tano okova kaste so arakhljola i pravda (Erem. 50:7). Sar Stvoriteli, samo e Jehova isi le pravo te odlučinel soj tano ispravno, a soj pogrešno. Ov but pošukar amendar džanela soj ispravno a soj pogrešno (Izr. 14:12; Isa. 55:8, 9). Sepak, amen šaj te živina sprema leskere pravedna merilija soske siem kerde sprema e Devleskoro liko (1. Moj. 1:27). Hem spremna siem te kera adava soske o mangipe sprema amaro Dad pottikninela amen te da sa amendar te šaj te postapina sar leste (Ef. 5:1; w22.08 27, pas. 5-6).

Keda isi amen problemi ili siem razočarime, šaj mangaja te kera nešto kolea so ka cida amendar adava problemi te šaj te na sekirina amen više. Adava tano normalno, ama mora te pazina te na kera nešto so o Jehova mrzinela (Ef. 5:10-12, 15, 16). Ko plo pismo dži ko Filipjanja o apostol Pavle pottikningja e hristijanen ponadari da te razmislinen bašo sa soj „pravedno... čisto... vredno mangipaske... [hem] sa soj šukar“ (Fil. 4:8). Iako o Pavle akate na pišingja konkretno baši zabava ama akava valjani but te vlijajnel upro adava savi zabava birinaja. Razmislin dali o gilja so šunea, o filmija so dikhea, o lila so čitinea hem o videoigre so khelea tane ko sklad e lafencar so vakergja len o Pavle. Akava ka pomožinel tuke te haljove soj tano prifatlivo e Devleske a so nane (Ps. 119:1-3; w22.10 9, pas. 11-12).

Džikote sine dživde, nesave taro nepravedna kerena sine but lošna bukja. Adaleske ka valjani te sikljoven te živinen sprema e Jehovaskere pravedna merilija. Ama te šaj te keren adava, e Devleskoro Carstvo ka organizirinel te oven sikavde doborom but manuša bašo Devel sar nikogaš dži akana. Koj ka sikavel okolen so nane pravedna? O baro mnoštvo hem o pravedna so ka voskresninen. Te šaj o anava okolengere so nane pravedna te oven pišime ko lil e životoskoro, ka valjani te oven paše e Jehovaja hem te den leske lafi kaj ka služinen leske. O Isus Hristos hem o pomazanikija vnimatelno ka dikhen taro nebo sar napredujnena okola so nane pravedna (Otk. 20:4). Sekova jekh so nane te primeninel adava so sikljovela nane te ačhovel ko životo iako šaj čak ka ovel le šel berš (Isa. 65:20). O Jehova hem o Isus šaj te čitinen o vile hem adaleske nane te dozvolinen te ačhol nekoj ko životo so šaj te kerel šteta ko nevo sveto (Isa. 11:9; 60:18; 65:25; w22.09 17, pas. 11-12).

Ko akava stiho e lafea „vlastija“ mislinela pe ko manušikane vladetelija kolen so isi len mokj hem kontrola upro javera. O hristijanja mora te oven poslušna akale manušikane vlastenge. Ola ikerena o mir, rodena taro manuša te ikeren o zakonija, hem ponekogaš čak braninena e Jehovaskere narodo (Otk. 12:16). Adaleske zapovedimo amenge te da len danokija hem davačke hem te sikava lenge čest (Rim. 13:7). Ama adala svetovna vlastija isi len avtoriteti samo adaleske so o Jehova dozvolingja lenge te ovel len. O Isus jasno vakergja akava keda sine anglo o rimsko upraviteli o Pontij Pilat. Keda o Pilat vakergja leske kaj le isi le avtoriteti te odlučinel dali ka ačhol ko životo ili ka ovel mudardo, tegani o Isus vakergja leske: „Na bi ovela tut sine nisavi vlast upri mande te na ovel tuke sine dendi upraldan“ (Jovan 19:11). O avtoriteti sa e manušikane vlastengoro hem e političarengoro avdive tano ograničimo, isto sar so sine e Pilateskoro avtoriteti (w22.10 14, pas. 6).

O cari o David sine vodimo taro Devel te pišinel bašo adava savo ka ovel o životo ki idnina keda ka vladinel jekh mudro hem verno cari (Ps. 37:10, 11, 29). Keda keraja e javerencar lafi bašo raj but puti čitinaja lenge taro Psalm 37:11. Soske šaj te kera adava? Adaleske so o Isus citiringja o ista lafija ki Propoved ki gora hem adalea sikavgja kaj ka ispolninen pe ki idnina (Mat. 5:5). Ama e Davideskere lafija isto agjaar sikavena savo ka ovel o životo ko e Solomoneskoro vreme. Keda o Solomon vladinela sine ko Izrael, e Devleskoro narodo uživinela sine ko mir hem sine len sa so valjani lenge ki phuv kote so „thavdela thud hem avgin“. O Devel vakergja: „Ako živinena sprema mle zakonija... ka kerav te ovel mir ki phuv, hem keda ka pašljoven nane nikastar te daran“ (3. Moj. 20:24; 26:3, 6). Akala lafija ispolningje pe džikote vladinela sine o Solomon (1. Let. 22:9; 29:26-28). Znači o lafija taro Psalm 37:10, 11, 29 ispolningje pe ko purano vreme hem ka ispolninen pe isto agjaar ki idnina (w22.12 10, pas. 8).

Sar čačutne hristijanja, amen mora te ova poslušna ko upatstvija. I Biblija dela akava korisno sovet: „Vojna vodinela pe mudro vodstvoja, hem uspeh isi kote so isi but sovetnikija“ (Izr. 24:6). Te dikha sar adava so ka primenina akava načelo ka pomožinel amenge te ova pošukar ki služba. Namesto te kera i služba ko amaro način, trudinaja amen te primenina o predlogija soj amenge dende. Ko sostanokija dobinaja mudro vodstvo kote so iskusna phralja preku govorija hem prezentacie obučinena amen baši služba. Isto agjaar, isi amen publikacie hem videoklipija kola so pomožinena e manušenge te haljoven i Biblija. But siem blagodarna bašo šukar sovet so arakhljola ko e Devleskoro Lafi. So bi keraja sine bizo leste? Te ova odlučna sekogaš te postapina sprema i mudrost koja so avela taro Jehova (Izr. 3:13-17; w22.10 23, pas.18-19).

Amen siem ki šukar fizičko sostojba soske haja redovno maro hem amaro telo obrabotinela adava hajbe. Ako mangaja te ova ki šukar duhovno sostojba, tegani valjani redovno te proučina e Devleskoro Lafi hem hor te razmislina bašo adava. O Jehova mangela šukar te haljova i Biblija. Adava šaj te kera le molitvaja, čitibaja hem hor razmislibaja. Ko početok molinaja amen te šaj e Devleskere misle te vlijajnen upro amaro vilo. Palo adava čitinaja jekh biblisko stiho. Tegani hor razmislinaja bašo adava so čitinaja. So ka ovel o rezultati? So poviše razmislinaja, doborom poviše ka haljova e Devleskoro Lafi hem agjaar amari vera ka ovel pozorali. Soske tano but važno te čitina i Biblija hem hor te razmislina bašo adava? Adava šaj te del amen sila te šaj te propovedina o haberi bašo Carstvo akana, hem te objavina i osuda koja so šaj ka valjani panda hari te vakera la. Isto agjaar, keda razmislinaja bašo e Jehovaskere but šuže osobine, adava šaj te kerel te ova panda popaše lea (w22.11 6-7, pas. 16-17).

O Isus manglja te vakerel kaj na samo o hristijanja nego isto agjaar o javera da ka pendžaren leskere sledbenikon palo nesebično mangipe so sikavena jekh jekheske. Hem o mangipe maškar o phralja hem o phenja ko sobranie tano nešto posebno. Džangjola pe e Jehovaskere svedokija nane sovršena (1. Jov. 1:8). Adaleske kobor poviše zapoznajnaja okolen taro sobranie, doborom poviše ka dikha lengere maane (Rim. 3:23). Žalno tano so nesave dozvolingje baš adava te sopkinel len. Sar o Isus sikavgja mangipe ple apostolenge? Hem sar šaj amen avdive te dža palo e Isuseskoro primer? Ka ovel šukar o Svedokija da te razmislinen bašo odgovorija taro akala pučiba. Adava ka pomožinel amen te sikava panda poviše mangipe, posebno keda ka grešina jekh jekheske (Ef. 5:2; w23.03 26-27, pas. 2-4).

Sar so avaja popaše ko krajo akale svetoskoro šaj te očekujna kaj ka oven amen predizvikija ko sobranie. Adala predizvikija šaj te čhiven ko ispit amari vernost sprema o Jehova. Adaleske mora ponadari da te razmislina trezveno. Ako osetinea tut povredimo taro nesavo phral, ma iker holi. Ako dobinea ukor, ma mukh tle čuvstvija te kontrolirinen tut, prifatin o sovet hem ker o potrebna promene. Hem keda e Jehovaskiri organizacija ka anel nesave promene kola so vlijajnena upri tute lično, prifatin len celo vilea hem šun o upatstvija. Ponadari da neka ovel tut doverba ko Jehova hem ki leskiri organizacija keda tli vera tani ispitimi. Ačhov smirimo, jasno razmislin hem dikh ko bukja sar o Jehova so dikhela. Rode pomoš taro Jehova hem nikogaš ma cide tut taro sobranie. Tegani bizi razlika so ka slučinel pe, o Satana ka našti te odvojnel tut taro Jehova hem tari leskiri organizacija (Jak. 4:7; w22.11 24-25, pas. 14-16).

O starešine pomožinena e phralenge te oven spremna angleder te ovel nesavi katastrofa. Ola valjani te oven sigurna ko adava kaj sarine ko sobranie džanena so valjani te keren te šaj te oven bezbedna hem te kontaktirinen e starešinen. Ama so šaj tu lično te kere? Ako slučinela pe prirodno katastrofa paše ko than kote so živinea, puč e starešinen sar šaj te pomožine. Šaj ka valjani te primine ko tlo kher okolen so mukle pumare khera ili okolen so pomožinena keda isi prirodno katastrofa. Šaj te ingare lenge hajbaske hem bukja kola so valjanena lenge. Ako nesavi katastrofa slučinela pe ko podur than, sepak šaj te kere nešto. So? Šaj te moline tut lenge (2. Kor. 1:8-11). Isto agjaar šaj te de prilog bašo aktivnostija so kerena pe ko celo sveto (2. Kor. 8:2-5). Ako šaj te patujne dži ko than kote so isi katastrofa, puč e starešinen so šaj te kere. Ako vikinena tut te pomožine, verojatno ka dobine nesavi obuka te šaj ko najšukar način te pomožine (w22.12 24, pas. 8; 25, pas. 11-12).

Ko jekh javer prevod bašo avdisutno stiho pišinela: „Na sine tumen ni jekh iskušenie kova so nane voobičaeno e manušenge“. Akaja izjava sine pišimi e phralenge hem e phenjenge kola so živinena sine ko Korint. Nesave lendar angleder sine nemoralna, homoseksualcija hem pijanice (1. Kor. 6:9-11). Dali otkeda krstingje pe nikogaš više na sine len pogrešna želbe kolencar so borinena pe sine? Sigurno na sine agjaar. Točno tano adava kaj sarine sine pomazanikija ama ola sepak sine nesovršena manuša. Sigurno ponekogaš mora sine te borinen pe pogrešna želbencar. Akava valjani te ohrabrinel amen. Soske? But phralja više uspejngje te borinen pe protiv o pogrešna želbe. Hem adava sikavela kaj amen da šaj te uspejna ko adava bizi razlika kobor hem te oven silna adala želbe. Adaleske šaj te ačhove cvrsto ki vera soske džanea kaj o ista nevolje trpinena hem amare phralja ko celo sveto (1. Pet. 5:9; w23.01 12, pas. 15).

O Isus molingja e Jehova te arakhel leskere sledbenikon (Jovan 17:11). Soske šaj akava te del amen hrabrost? Adaleske so o Jehova tano but posilno taro bilo savo dušmani (1. Jov. 4:4). O Jehova dikhela sa. Uverime siem kaj ako isi amen doverba ko Jehova šaj te nakhava amari dar hem te sikava hrabrost. Dali ponekogaš ladžaja te vakere kaj sian e Jehovaskoro svedoko? Dali na počminea e službaja ili na krstinea tut adaleske so daraja so ka mislinen o javera tutar? Ma dozvolin asavke čuvstvija te čhinaven tut te kere adava soj ispravno. Molin tut e Jehovaske taro vilo. Rode lestar hrabrost te kere leskiri volja. Keda ka dikhe sar o Jehova odgovorinela ko tle molitve ka ove posilno hem pohrabro (Isa 41:10, 13; w23.01 29, pas. 12; 30, pas. 14).

O Isus pučlja e fariseen „na čitingjen li?“ te šaj te otkrinel kaj sine len pogrešno stavi bašo adava so čitinena sine ko spisija (Mat. 12:1-7). Ki adaja prilika o fariseija vakergje kaj e Isuseskere učenikija na ikergje pe ko sabat. O Isus odgovoringja lenge agjaar so spomningja duj primerija taro spisija hem citiringja jekh stiho taro Osija kova so sikavela kaj o fariseija na halile soske sine dendo o zakoni bašo sabat hem adaleske našti sine te sikaven milost. Soske akala manuša na dozvolingje te oven oblikujme džikote čitinena sine e Devleskoro Lafi? Soske sine len kritizersko hem gordo stavi. Adava stavi na dozvolingja lenge te haljoven i smisla taro adava so čitinena sine (Mat. 23:23; Jovan 5:39, 40). Dikh isto agjaar ko Matej 19:4-6, kote so o Isus pučlja e fariseen o isto pučibe: „Na čitingjen li?“ Iako ola čitingje o izveštaj bašo stvoribe, sepak taro adava izveštaj ola na halile sar o Devel dikhela ko brako. Taro e Isuseskere lafija sikljovaja kaj valjani te ovel amen ispravno stavi džikote čitinaja i Biblija. Na valjani te ova sar o fariseija nego valjani te ova ponizna hem spremna te sikljova (w23.02 12, pas. 12-13).

O Jehova dengja e Izraelconge zakoni bašo adava sar te zaštitinen pe taro opasna situacie khere hem ki buti (2. Moj. 21:28, 29; 5. Moj. 22:8). Ako nekoj nenamerno mudargja nekas tegani le sine le seriozna posledice (5. Moj. 19:4, 5). Ko zakoni pišinela sine kaj čak okola so nenamerno povredingje jekhe bebe so panda na bijandilo valjani sine te oven kaznime (2. Moj. 21:22, 23). I Biblija jasno sikavela kaj o Jehova mangela te da amendar sa te šaj te izbegina opasna situacie. Sikavaja kaj ceninaja o životo agjaar so khere hem ki buti pazinaja ki bezbednost. Ako mangaja te frda oštra predmetija, otrovna hemikalie ili iljačija pazinaja sar hem kote frdaja len, isto agjaar asavke bukja na mukhaja len ko thana kote so šaj o čhave te arakhen len. Isto agjaar, pazinaja keda tharaja jag, keda keravaja nešto ili koristinaja električna aparatija hem keda ikljovaja kheraldan pazinaja te na mukha akala bukja vklučime ki struja. Pazinaja te na vozina ako pilem jaka hapija, ako pilem alkohol ili ako na sukjem dovolno, hem isto agjaar na ikeraja ko vasta telefoni džikote vozinaja (w23.02 21-22, pas. 7-9).

O Jehova tano Učiteli kova soj strplivo, ljubezno hem haljovela amen. Ov rodela o šukar ko ple učenikija (Ps. 130:3). Nikogaš na očekujnela amendar poviše taro adava so šaj te kera. Ma bistre, o Jehova tano adava so stvoringja i godi koja soj but čudesno (Ps. 139:14). Amaro Stvoriteli mangela ki celi večnost te sikljova hem te uživina ko adava. Adaleske mudro tano panda akana te razvina želba bašo bibliska čačipa (1. Pet. 2:2). Čhiv tuke celija so šaj te ispolnine len, hem redovno čitin hem proučin i Biblija (Is. Nav. 1:8). O Jehova ka pomožinel tut sa poviše te uživine ko čitibe hem ko sikljojbe baši leste. Nane dovolno samo te sikljova nešto, nego adava so sikljovaja valjani te pomožinel amen pošukar te pendžara e Jehova hem te razvina osobine sar soj vera hem mangipe sprema leste (1. Kor. 8:1-3). Džikote prodolžinea te sikljove, molin e Jehova te del tut pobari vera (Luka 17:5). Ov spremno ka odgovorinel ko asavke molitve (w23.03 10, pas. 11, 13).

O Isus manglja leskere učenikija te oven zafatime džikote adžikerena sine te avel o krajo. Adaleske dengja len važno zadača. Zapovedingja lenge te propovedinen o šukar haberi „ko Erusalim, ki celo Judeja, ki Samarija hem ko najdur thana ki phuv“ (Apo. 1:6-8). Sine len bari buti te keren. Adalea so sine zafatime te završinen akaja zadača ola koristingje plo vreme najšukar so šaj. Te šaj te pazina so keraja valjani šukar te razmislina sar koristinaja amaro vreme. Sekole jekheske amendar šaj te slučinen pe bukja so na očekujnaja len (Prop. 9:11). Amaro životo šaj taro jekh puti te završinel. Keda keraja e Jehovaskiri volja hem ovaja lea popaše tegani koristinaja amaro vreme najšukar so šaj (Jovan 14:21). Valjani te ova „duhovno zorale, istrajna, sekogaš zafatime ki buti e Gospodareske“ (1. Kor. 15:58). Tegani keda ka avel o krajo, bizi razlika dali o krajo akale svetoskoro ili o krajo amare životoskoro, nane te pera pišmani soske na koristingjem amaro vreme najšukar so šaj (Mat. 24:13; Rim. 14:8; w23.02 18, pas. 12-14).