Mart

Ko plo prvo pismo, o apostol Petar pottikningja e hristijanen te koristinen pumare sposobnostija te šaj te ohrabrinen pumare phralen. Ov pišingja: „Služinen jekh jekheske — sekoj e poklonea so dobingja le — sar šukar upravitelija e Devleskere šukaripaja so na zaslužinaja le“ (1. Pet. 4:10). Valjani te trudina amen celosno te koristina amare sposobnostija hem te na dara kaj bašo adava o javera šaj te oven amenge ljubomorna ili kaj ka obeshrabrinen pe. Ama, na smejnaja te falina amen lencar (1. Kor. 4:6). Ma te bistra kaj o sposobnostija so isi amen tane poklon taro Devel. Adala poklonija valjani te koristina len te šaj te ohrabrina amare phralen hem phenjen, a na te falina amen (Fil. 2:3). Keda koristinaja amari sila hem amare sposobnostija te šaj te kera e Devleskiri volja, ka ovel amen pričina te ova radosna. Soske? Na soske keraja poviše taro javera ili mangaja te ova lendar pošukar, nego adaleske so mangaja te koristina amare sposobnostija te šaj te slavina e Jehova (w22.04 11-12, pas. 7-9).

O Isus mangela sine o sveta spisija, hem o lafija taro Psalm 40:8 sikavgje save čuvstvija ka oven e Isuse bašo e Devleskoro Lafi, athe pišinela: „But mangava te kerav tli volja Devla, hem tlo zakoni tano mange hor ko vilo“. Adaleske so mangela sine o sveta spisija, o Isus sine radosno hem uspešno ki služba bašo Jehova. Amen da šaj te ova radosna hem uspešna ako dozvolinaja e Devleskoro Lafi te vlijajnel upro amaro vilo (Ps. 1:1-3). E Isuseskoro primer hem adava so vakergja valjani te pottikninen amen pohor te čitina i Biblija. Šaj pošukar te haljova i Biblija agjaar so ka molina amen, ka čitina pohari, ka puča pučiba hem ka kera kratka beleške. Šaj te ova pronikliva agjaar so ka koristina amare publikacie te šaj panda pošukar te haljova adava so čitinaja. Hem šaj te dozvolina e Devleskoro Lafi te oblikujnel amen ako ponadari da isi amen o ispravno stavi džikote čitinaja. Ako daja amendar sa te kera akala bukja tegani ka ovel amen pobari korist taro adava so čitinaja ki Biblija hem ka ova popaše e Jehovaja (Ps. 119:17; Jak. 4:8; w23.02 13, pas. 15-16).

Čhiv tuke konkretno cel, palo adava, ker nešto praktično te šaj te postignine adaja cel. Sar šaj te kere adava? Ako mangea te ove povešto ko sikajbe, šaj te proučine i brošura Ov sa pošukar ko čitibe hem sikajbe. Keda ka dobine nesavi zadača ko sostanok Amaro životo hem služba, šaj te puče nesave iskusno phrale te šunel tli zadača angleder te ikere la hem te vakerel tuke nesave predlogija kote so šaj panda te kere buti. Ako spreminea tle zadače dovolno angleder, o javera na samo so ka dikhen kaj sian vešto nego hem ka dikhen kaj sian vredno hem ka ovel len doverba ki tute (2. Kor. 8:22). So ako mangea te ove vešto ki nesavi buti koja so nane tuke lokho te kere la? Ma otkažin tut! Dali o Timotej ulo but šukar govorniko hem učiteli? I Biblija na vakerela amenge. Ama šaj te ova sigurna kaj o Timotej ulo sa pošukar ko keribe ple zadače adaleske so šungja e Pavleskoro sovet (2. Tim. 3:10; w22.04 24-25, pas. 8-11).

Kas pretstavinela o zvero efta šerencar? Akate primetinaja kaj akava zvero ličinela sar leopardi ama isi le sar mečkakere pre, sar laveskoro muj hem isi le deš šinga. O štar zverija soj tane spomnime ko eftato poglavje taro lil Daniel, isto agjaar isi len akala karakteristike. Ama, ko lil Otkrovenie akala karakteristike arakhljona ko jekh zvero, a na ko štar posebna zverija. Akava zvero na pretstavinela samo jekhe vlada ili svetsko sila. Baši leste tano vakerdo kaj vladinela upro „sekova pleme hem narodo hem čhib hem nacija“. Znači ov mora te pretstavinel nešto pobaro tari bilo koja javer posebno vlada (Otk. 13:7). Akava zvero sigurno pretstavinela sa e politička silen kola so vladingje e manušencar ki celo istorija dži akana (Prop. 8:9). Ki Biblija o broj deš but puti koristinela pe te sikavel pe kaj nešto tano celosno (w22.05 9, pas. 6).

Kas ka ovel korist taro akala šuže podgotovke? O prva so ka ovel len korist tano o baro mnoštvo kova so ka preživinel o Armagedon hem sa o čhave so ka bijangjoven ko nevo sveto. Ama ko Otkrovenie 20 poglavje isi isto agjaar vetuvanje kaj ka voskresninen o mule (Otk. 20:11-13). O „pravedna“ kola so ačhile verna dži ko plo meribe ka voskresninen tele ki phuv zaedno okolencar soj „nepravedna“, adala tane okola so na sine len prilika te doznajnen nešto bašo Jehova (Apo. 24:15; Jovan 5:28, 29). Dali adava značinela kaj sarine ka voskresninen? Na. Okola so odbingje te služinen e Jehovaske džikote sine dživde nane te voskresninen. Len sine len više prilika ama ple životoja sikavgje kaj na mangena te živinen ko raj ki phuv (Mat. 25:46; 2. Sol. 1:9; Otk. 17:8; 20:15; w22.05 18, pas. 16-17).

Preku o „verno hem razborito robo“ o Isus kergja jekh organizacija ki phuv koja so širinela o čisto obožavibe (Mat. 24:45). So mislinea baši adaja organizacija? Šaj mislinea isto sar o apostol Petar kova so vakergja e Isuseske o lafija taro avdisutno stiho. Kaj ka ova sine dži akana te na šuna sine baši e Jehovaskiri organizacija? Preku late o Isus kerela sa so šaj te šaj amen te ova čale ko duhovno pogled. Ov isto agjaar obučinela amen te šaj te ova uspešna ki amari služba. Isto agjaar ov pomožinela amenge te urava i „nevi ličnost“ te šaj te kera radosno e Jehova (Ef. 4:24). O Isus isto agjaar dela amen mudra upatstvija ko phare vremija. Keda počmingja i pandemija KOVID–19 dikhlja pe kobor tane korisna adala upatstvija. Džikote but džene ko sveto na džanena sine so te keren, o Isus dengja amen mudro vodstvo te šaj te zaštitinel amen (w22.07 12, pas. 13-14).

O Jehova vakergja e Izraelconge taro purano vreme redovno te sikaven pumare čhaven baši leste (5. Moj. 6:6, 7). Sekova dive akale roditelen sine len but prilike te keren pumare čhavencar lafi hem te pomožinen lenge te zamangen e Jehova. Na primer, jekh terno izraelco šaj saatencar pomožinela sine ple dadeske ko sadibe hem ko khedibe o plodija tari niva. Leskiri phen šaj pobaro delo taro dive pomožinela sine ple dajake te sivel, te pletinel hem okolu javera kherutne bukja. Džikote o roditelija hem o čhave kerena sine zaedno buti šaj sine te keren bašo but važna teme lafi. Na primer, šaj sine te keren lafi bašo adava kobor tano šukar o Jehova hem sar ov pomožinela lengere familijake. Ko but phuvja o roditelija hem o čhave našti te odvojnen vreme te nakhen zaedno. O roditelija tane ki buti, a o čhave tane ki škola. Adaleske o roditelija mora te trudinen pe te arakhen prilike te šaj te keren pumare čhavencar lafi (Ef. 5:15, 16; w22.05 28, pas. 10-11).

Ako kerela pe pharo grevo adalea phagela pe e Devleskoro zakoni. Ako jekh phral kerela asavko grevo tegani ov valjani te molinel e Jehova te prostinel leske hem valjani te kerel e starešinencar lafi (Ps. 32:5; Jak. 5:14). Savi odgovornost isi e starešinen? Samo e Jehova isi le pravo celosno te prostinel amare grevija hem ov kerela adava preku i otkupnina. Ama o Jehova isto agjaar dengja odgovornost e starešinenge te odlučinen dali o grešniko šaj te ačhovel ko sobranie hem ko adava pomožinena len o bibliska načelija (1. Kor. 5:12). Ola isto agjaar razmislinena bašo akala pučiba: Dali o grevo so kergja le sine svesno kerdo? Dali manglja te garavel o grevo e javerendar? Dali poviše vreme kerela adava grevo? A soj najvažno, dali čače kainela pe bašo grevo so kergja? Dali šaj jasno te dikhel pe kaj o Jehova prostingja leske? (Apo. 3:19; w22.06 9, pas. 4).

O Isus pottikningja ple sledbenikon te roden i pravednost (Mat. 5:6). Adava značinela kaj valjani te ovel amen silno želba te kera adava soj ispravno, šukar hem čisto anglo e Devleskere jakhja. Dali mangea o čačipe hem i pravednost? Sigurno kaj oja. Mrzinea hovajbe hem sa adava soj pogrešno hem lošno (Ps. 119:128, 163). Nekoj so hovavela imitirinela e Satana, o vladeteli akale svetoskoro (Jovan 8:44; 12:31). Jekh taro e Satanaskere celija tani te kaljarel e Jehovaskoro sveto anav. Panda taro Eden o Satana širinela hovajba bašo amaro Devel. Ov mangela o manuša te mislinen kaj o Jehova tano sebično hem kaj nane iskreno soske kratinela o šukaripe taro manuša (1. Moj. 3:1, 4, 5). E Satanaskere hovajba bašo Jehova ponadari da otrujnena e manušengere misle hem vile. Keda o manuša birinena te na mangen o čačipe, tegani o Satana šaj te vlijajnel upri lende te postapinen ko nepravedno hem ko lošno način (Rim. 1:25-31; w23.03 2, pas. 3).

Šaj trudinea tut te čhinave nesave lošno navikaja, ama ponekogaš perea ko iskušenie palem te kere adava. Ili šaj sian razočarimo soske našti te ispolnine tli cel. So ka pomožinel tuke te istrajne? Jekh važno osobina — o mangipe sprema o Jehova. Tlo mangipe sprema o Jehova tani jekh but šuži osobina. Adava tano o najšukar so šaj te ovel tut (Izr. 3:3-6). O baro mangipe sprema o Devel ka pomožinel tuke te ikljove ko krajo e problemencar. I Biblija but puti kerela lafi bašo e Jehovaskoro verno mangipe sprema ple sluge. Adava so e Jehova isi le verno mangipe značinela kaj nikogaš nane te mukhel ple slugen ili te čhinavel te mangel len. Tu sian kerdo sprema e Devleskoro liko (1. Moj. 1:26). Sar šaj te sikave asavko mangipe? Prvo ov blagodarno (1. Sol. 5:18). Sekova dive puč tut: „Sar o Jehova sikavgja kaj mangela man?“ Palo adava ma bistre ki molitva te blagodarine tut e Jehovaske hem spomnin konkretna bukja so kergja tuke. Dikh ko bukja so kergja len o Jehova taro mangipe sar nešto so kergja tuke lično (w23.03 12, pas. 17-19).

O Isus sine ljubezno hem šukar sa e dešuduje apostolencar. Koja tani i pouka amenge? Nane važno samo so kerena o javera, nego isto agjaar sar amen reagirinaja ko lengere greške hem maane. Keda siem holjame jekhe phraleske šaj te puča amen: „Soske doborom but smetinela man adava so kergja? Dali adava sikavela kaj isi man nesavi slabost kolate so valjani te kerav buti? Dali adaja ličnost so nervirinela man nakhela taro pharo periodi? Čak ako mislinava kaj man isi man pravo te holjanav, šaj li te sikavav nesebično mangipe hem te prostinav leske?“ Kobor poviše sikavaja mangipe e javerenge, doborom poviše sikavaja kaj siem e Isuseskere čačutne sledbenikija. Taro e Isuseskoro primer isto agjaar sikljovaja kaj valjani te trudina amen te haljova amare phralen (Izr. 20:5). Točno tano kaj o Isus šaj te dikhel so isi e manušen ko vilo, a amen našti, ama šaj te ova lencar strpliva keda nervirinena amen (Ef. 4:1, 2; 1. Pet. 3:8). Ka ovel amenge polokho te kera adava ako zapoznajnaja len pošukar (w23.03 30, pas. 14-16).

O Satana šaj te iskoristinel nesavi itno medicinsko situacija te šaj te čhivel amen te ana nesavi pogrešno odluka. Šaj nesave doktorija ili nekoj tari familija so nane ko čačipe ka keren amenge pritisok te phaga e Devleskoro zakoni adalea so ka primina rat. Ili nekoj šaj ka mangel te ubedinel amen te prifatina nesave terapie kola soj tane protiv o Bibliska načelija. Iako na mangaja te mera amen džanaja kaj o Jehova ponadari da ka mangel amen, čak hem te slučinel pe adava (Rim. 8:37-39). Keda e Jehovaskere amala merena, ov na bistrela len soske leske, sar te phene panda tane dživde (Luka 20:37). Ov edvaj adžikerela te iranel len palem ko životo (Jov 14:15). O Jehova platingja bari cena te šaj te ovel amen večno životo (Jovan 3:16). Amen džanaja kaj o Jehova but mangela amen hem kaj grižinela pe amenge. Adaleske, namesto te cida amen taro Jehova keda siem nasvale ili šaj čak ka mera, amen valjani te roda lestar uteha, mudrost hem sila (Ps. 41:3; w22.06 18 pas. 16-17).

I Biblija vakerela: „I dar taro Jehova tani početok tari mudrost, hem te pendžare okole soj Najsveto anela razboritost“ (Izr. 9:10). Keda valjani te ana nesavi važno odluka, valjani te džana sar o Jehova dikhela ki adaja buti. Adava šaj te kera agjaar so ka proučina i Biblija hem o bibliska publikacie. Samo agjaar ka šaj te sikava čačutni mudrost (Izr. 2:5-7). Samo o Jehova šaj te del amen čačutni mudrost (Rim. 16:27). Soske šaj te vakera adava? Prvo, o Jehova tano amaro Stvoriteli hem ov džanela sa bašo bukja so stvoringja len (Ps. 104:24). Dujto, taro sa e Jehovaskere postapke dikhjola pe leskiri mudrost (Rim. 11:33). Trito, e Jehovaskere sovetija sekogaš tane korisna adalenge so primeninena len (Izr. 2:10-12). Ako mangaja te ova čače mudra mora te prifatina akala osnovna čačipa hem te dozvolina te vodinen amare odluke hem postapke (w22.10 19, pas. 3-4).

O Satana sine pobedimo sar so doznajnaja taro Otkrovenie 12 poglavje. Ov hem leskere demonija sine frdime tele ki phuv. Adaleske o Satana tano but holjamo hem napadinela e manušen, a adava kerela te ovel pharo sarinenge ki phuv (Otk. 12:9-12). Sar koristinena amenge akala proroštvija? O nastanija ko sveto hem i promena ko e manušengoro ponašibe pomožinena amenge te haljova kaj o Isus ulo Cari. Adaleske, namesto te ova voznemirime keda dikhaja kaj o manuša tane sebična hem surova valjani te na bistra kaj adalea ispolninela pe o biblisko proroštvo. E Devleskoro Carstvo više vladinela! (Ps. 37:1). Hem šaj te očekujna pobare nevolje džikote o Armagedon avela sa popaše (Mar. 13:8; 2. Tim. 3:13). Siem but blagodarna so amaro Dad soj ko nebo pomožinela amen te haljova soske isi doborom but problemija ko sveto (w22.07 3-4, pas. 7-8).

Šaj te molina e Jehova te pomožinel amare phralenge hem phenjenge te istrajnen keda tane nasvale, keda doživinena prirodno katastrofa, keda isi vojna, keda tane progonime ili keda doživinena javera pharipa. Šaj isto agjaar te molina amen okole phralenge so pomožinena e javerenge so nakhena taro pharo periodi. Šaj tu lično džanea nekas so nakhela taro pharo periodi. Ka ovel šukar te spomnina le ko amare molitve. Keda molinaja e Jehova bašo amare phralja sikavaja leske kaj čače mangaja len. O phralja so predvodinena ko sobranie tane but blagodarna keda spomninaja len ko amare molitve soske amare molitve pomožinena lenge. O apostol Pavle džanela sine kaj e javerengere molitve sine leske potrebna. Ov pišingja: „Molinen tumen mange da, te šaj o Devel te pomožinel mange, keda ka phravav mo muj, hrabro te propovedinav i sveto tajna bašo šukar haberi“ (Ef. 6:19). Avdive da isi but vredna phralja kola so predvodinena. Amen sikavaja kaj mangaja len agjaar so molinaja e Jehova te nagradinel lengoro trudo (w22.07 23-24, pas. 14-16).

Jekh vojniko phiravela šlemi te šaj te zaštitinel plo šero. Ki amari duhovno vojna amen valjani te zaštitina amari godi taro e Satanaskere napadija. Ov bombardirinela amen bute bukjencar te šaj te iskušinel amen hem te ruminel amaro razmisluvanje. Isto sar o šlemi so zaštitinela jekhe vojnikoskoro šero, agjaar amari nadež zaštitinela amaro razmisluvanje te šaj te ačhova verna e Jehovaske. Ako amari nadež počminela pohari te slabonel hem razmislinaja samo bašo amare želbe, šaj te počmina pohari te bistra amari cel, o večno životo. Te dikha o primer nesave hristijanengoro so živinena sine ko purano Korint. Ola našavgje pumari vera ko jekh but važno vetuvanje taro Devel — i nadež bašo voskresenie (1. Kor. 15:12). O Pavle pišingja kaj o manuša so nane len nadež živinena samo avdiveseske (1. Kor. 15:32). Hem baš avdive bute dženen so nane len nadež ko e Devleskere vetuvanja živinena samo avdiveseske hem kerena sa so šaj samo te zadovolinen pumare želbe. Ama amen isi amen doverba ko e Jehovaskere vetuvanja baši idnina (w22.10 25-26, pas. 8-9).

O Jehova mangela te moline tut leske. Ov dikhela save problemencar soočinea tut hem uverinela tut kaj ka šunel tle molitve ko bilo savo vreme. Ov tano but radosno keda šaj te šunel ple slugen (Izr. 15:8). Bašo so šaj te moline tut keda osetinea tut korkori? Phrav leske tlo vilo (Ps. 62:8). Vaker leske tle muke hem kobor tuke pharo. Molin e Jehova te pomožinel tuke te džane so te kere keda osetinea tut korkori ili tažno hem te del tut hrabrost te kere lafi. Šaj čak te moline e Jehova baši mudrost te šaj taktično te objasnine ko so verujnea (Luka 21:14, 15). Ako sian razočarimo molin e Jehova te pomožinel tuke te kere lafi jekhe zrelo hristijanea. Šaj te moline e Jehova te pomožinel adale phraleske te haljovel tut. Dikh sar odgovorinela ko tle molitve hem prifatin e javerengiri pomoš. Tegani nane više te osetine tut korkori (w22.08 10, pas. 6).

O phralja taro sobranie ko Solun sine but progonime. Jekh grupa protivnikija vlečingje nesave phralen „anglo poglavarija tari diz“ (Apo. 17:6). Zamislin samo kobor darana sine akala neve hristijanja. Šaj sine te čhinaven te oven revna ki služba bašo Jehova, ama o apostol Pavle na manglja adava te slučinel pe. Ov manglja te ovel sigurno kaj nekoj ka grižinel pe bašo akava nevo sobranie. O Pavle vakergja e phralenge taro Solun: „Bičhalgjem tumenge e Timotee, amare phrale... te šaj te zojrakerel tumari vera hem te utešinel tumen, te šaj nikoj tumendar te na perel ko akala nevolje“ (1. Sol. 3:2, 3). O Timotej dikhlja sar o Pavle zajakningja e phralen ki Listra. Adaleske so dikhlja kaj o Jehova poddržingja adale phralen, o Timotej šaj sine te uverinel e neve phralen hem e phenjen kaj o Jehova len da ka poddržinel (Apo. 14:8, 19-22; Evr. 12:2; w22.08 21, pas. 4).

Ko 1870 berš jekh grupa istražuvačija e Biblijakere kolen so vodinela sine o Čarls Tejz Rasel počmingje temelno te istražinen i Biblija. Ola mangle te džanen so čače značinela e Isuseskiri žrtva hem sar valjani te setina amen ko leskoro meribe. Avdive isi amen korist taro bukja so istražingje. Sar? O Jehova pomožingja amenge te haljova so značinela e Isuseskiri žrtva hem so ka kerel amenge hem sa e manušenge (1. Jov. 2:1, 2). Isto agjaar doznajngjem kaj ki Biblija isi nadež bašo duj grupe manuša so kerena e Devleskiri volja — besmrtno životo ko nebo nesavenge hem večno životo ki phuv e manušenge. Ovaja popaše e Jehovaja keda razmislinaja kobor but mangela amen hem kobor but bari korist isi amen lično tari e Isuseskiri žrtva (1. Pet. 3:18). Adaleske slično sar amare phralja angleder, amen da kaninaja e javeren te aven ki Spomen-svečenost hem te ikera la ko način sar o Isus so sikavgja ple sledbenikon te keren adava (w23.01 21, pas. 6-7).

O Isus sikavgja e manušen bašo blagoslovija so ka anel e Devleskoro Carstvo. But siem blagodarna baši otkupnina soske oj ovozmožinela amenge te ovel amen paše amalipe e Jehovaja hem e Isusea. Isto agjaar, okola so sikavena vera ko Isus isi len nadež večno te živinen hem palem te dikhen pumare manglen so mule (Jovan 5:28, 29; Rim. 6:23). Amen na zaslužinaja akala blagoslovija, a ni našti te irana e Devleske hem e Hristoseske adava šukaripe so kergje amenge (Rim. 5:8, 20, 21). Ama šaj te sikava kaj siem but blagodarna. Sar? Agjaar so ka da sa amendar te šaj te poddržina o aktivnostija bašo Carstvo. Na primer, šaj te prijavina amen sar dobrovolcija te pomožina ko gradibe hem ko održibe amare teokratska objektija (w23.01 26, pas. 3; 28, pas. 5).

Okola so ka vladinen ko e Devleskoro Carstvo ka grižinen pe milijarde manušenge tari celi phuv. Isto sar o Isus, o 144.000 ka služinen sar carija hem sveštenikija (Otk. 5:10). Ko e Mojseeskoro zakoni jekh taro najvažna zadače e sveštenikongere sine te zaštitinen e manušengoro sastipe ko fizičko hem duhovno pogled. Ama o Zakoni sine „samo senka bašo šukar bukja so ka aven“, adaleske šaj te vakera kaj okola so ka vladinen zaedno e Isusea ka ovel len jekh posebno zadača te pomožinen e Devleskere narodoske ko fizičko hem duhovno pogled (Evr. 10:1). Amen panda na džanaja sar akala carija hem sveštenikija ka komunicirinen e manušencar akate ki phuv. Amen šaj te ova uverime kaj ko raj okola so ka oven ki phuv ka dobinen o vodstvo so valjani lenge (Otk. 21:3, 4; w22.12 11, pas. 11-13).

Jekh pričina soske kaninaja e javeren te aven ki Spomen-svečenost tani adaja so mangaja okola so avena prvo puti te doznajnen bašo adava so kergja o Jehova hem o Isus sarinenge amenge (Jovan 3:16). Nadinaja amen kaj adava so ka dikhen hem ka šunen ki Spomen-svečenost ka pottikninel len te mangen te sikljoven poviše hem te oven e Jehovaskere sluge. Isto agjaar kaninaja okolen so čhinavgje te služinen e Jehovaske, adava keraja le te šaj te setinkera len kaj o Devel panda mangela len. But džene avena hem amen radujnaja amen so šaj te dikha len. Adava soj tane prisutna ki Spomen-svečenost setinkerela len kobor sine lenge šukar keda angleder služinena sine e Jehovaske (Ps. 103:1-4). Bizi razlika dali o manuša ka prifatinen amari pokana ili na, amen daja amendar sa te kanina e manušen ki Spomen-svečenost soske džanaja kaj e Jehovaske tano važno sekova jekh so avela ki Spomen-svečenost (Luka 15:7; 1. Tim. 2:3, 4; w23.01 20, pas. 1; 22-23, pas. 9-11).

I rat angleder te merel, o Isus rodingja nešto posebno taro plo Dad. Ov molingja le te arakhel leskere sledbenikon (Jovan 17:15, 20). O Jehova sekogaš sikavgja ple narodoske kaj arakhela le, grižinela pe leske hem zaštitinela le. Ama ov molingja e Jehova soske džanlja kaj leskere sledbenikon ka ovel len baro protivibe taro Satana. Ov isto agjaar džanlja kaj te šaj te izdržinen adava protivibe ka valjani lenge e Jehovaskiri pomoš. Akava sveto kolea so vladinela o Satana kerela bare problemija e verna hristijanenge. Doživinaja nevolje kola so šaj te obeshrabrinen amen hem te čhiven ko ispit amari vernost sprema o Jehova. Ama nane soske te dara. O Jehova arakhela amen, dikhela save problemija isi amen hem mangela te pomožinel amenge. Oja, e Jehovaskere jakhja tane upro okola so darana lestar“ (Ps. 33:18-20; w22.08 8, pas. 1-2).

Sekova berš o kurke angleder hem pali Spomen-svečenost sikavaja amari blagodarnost adalea so odvojnaja amenge vreme te molina amen hem te razmislina bašo adava so značinela e Isuseskoro meribe. Isto agjaar kaninaja so poviše manušen te oven prisutna ki akaja posebno prilika. Hem odlučna siem te na dozvolina ništo te čhinavel amen te ova prisutna ki Spomen-svečenost. Ki Spomen-svečenost doznajnaja soske e manušenge valjani otkupnina hem sar o meribe jekhe manušeskoro šaj te platinel o grevija bute dženengere. Ko adava govor šunaja so pretstavinena o maro hem i mol hem koj valjani te lel taro adala simbolija (Luka 22:19, 20). Hem razmislinaja save blagoslovija ka ovel okolen so isi len nadež te živinen ki phuv (Isa. 35:5, 6; 65:17, 21-23). Amen valjani but te cenina akala čačipa (w23.01 20, pas. 2; 21, pas. 4).

O Devel dela amen prilika te dobina večno životo adalea so dengja ple Čhave sar otkupnina te učharel amare grevija (Mat. 20:28). O apostol Pavle pišingja: „Adaleske so o meribe avela preku o manuš, o voskresenie da avela preku o manuš. Soske sar preku o Adam sarine so merena, agjaar preku o Hristos sarine ka oven dživde“ (1. Kor. 15:21, 22). O Isus sikavgja ple sledbenikon te molinen pe te avel o Carstvo hem te kerel pe e Devleskiri volja ki phuv (Mat. 6:9, 10). Jekh delo tari e Devleskiri volja tani o manuša te živinen večno ki phuv. Te šaj te ispolninel adava, o Jehova čhivgja ple Čhave te ovel Cari ko mesijansko Carstvo. O Devel isto agjaar khedela 144.000 manušen tari phuv kola so zaedno e Isusea ka ispolninel leskiri volja (Otk. 5:9, 10; w22.12 5, pas. 11-12).

Keda merela amendar nekoj so mangaja le, ov but falinela amenge. Šaj te osetina bari dukh, posebno ako mučingja pe angleder te merel. Ama palo nesavo vreme šaj te počmina te osetina amen pošukar keda setinaja amen so sikavgja amen ili so kergja ili vakergja te šaj te ohrabrinel amen ili te asakerel amen. Ko slično način, but siem tažna keda čitinaja kaj o Isus mučingja pe hem mulo. Posebno ko periodi keda tani i Spomen odvojnaja amenge vreme te razmislina bašo adava kobor skapoceno tani e Isuseskiri žrtva (1. Kor. 11:24, 25). Ama radujnaja amen keda razmislinaja bašo bukja so kergja hem vakergja o Isus džikote sine ki phuv. Isto agjaar, ohrabrinela amen keda razmislinaja bašo adava so kerela akana hem so ka kerel baši amende ki idnina (w23.01 26, pas. 1-2).

E Isuseskere učenikija sine but tažna keda ov mulo. Ola na samo so našavgje pumare mangle amale, nego isto agjaar mislingje kaj našavgje pumari nadež (Luka 24:17-21). Ama keda pojavingja pe lenge o Isus, pomožingja lenge te haljoven sar ispolninela o biblisko proroštvo. Ov isto agjaar dengja lenge jekh but važno zadača (Luka 24:26, 27, 45-48). Keda o Isus gelo ko nebo, leskere učenikija na sine više tažna, nego radosna. Ola sine radosna soske džanle kaj o Isus tano dživdo hem kaj šaj te pomožinel lenge ki lengiri nevi zadača so dengja len. Lengiri radost pottikningja len te falinen e Jehova bizo te čhinaven (Luka 24:52, 53; Apo. 5:42). Te šaj te dža palo primer e Isuseskere učenikongoro, mora te čhiva e Devleskoro Carstvo ko prvo than. Iako valjani amenge istrajnost te šaj postojano te služina e Jehovaske, sepak ov vetingja amenge kaj but ka nagradinel amen ako keraja adava (Izr. 10:22; w23.01 30-31, pas. 15-16).

Sigurno na mangaja te kera i isto greška so kergje la o Adam hem i Eva. Šaj te uspejna ko adava ako pošukar zapoznajnaja e Jehova, ceninaja leskere osobine hem trudinaja amen te haljova sar ov razmislinela. Ako keraja adava, amaro mangipe sprema leste ka bajrol. Razmislin bašo Avraam. Ov čače mangela sine e Jehova. Čak keda sine leske pharo te haljovel e Jehovaskere odluke, ov na protivingja pe leske. Namesto adava, ov trudinela pe sine te zapoznajnel pošukar e Jehova. Na primer, keda doznajngja kaj o Jehova mangela te uništinel o Sodom hem Gomor, ko početok darandilo kaj o „Sudija e celo phuvjakoro“ ka uništinel e pravedna manušen zaedno e lošna manušencar. O Avraam našti sine te zamislinel peske adava. Adaleske ponizno pučlja e Jehova nekobor pučiba hem o Jehova strplivo odgovoringja leske. Ko krajo, o Avraam halilo kaj o Jehova ispitinela o vilo sekole jekhe manušeskoro hem kaj ov nikogaš na kazninela e pravedna manušen zaedno e lošnoncar (1. Moj. 18:20-32; w22.08 28, pas. 9-10).

Otkeda o upraviteli o Neemija palem gradingja o zidija taro Erusalim ko 455 berš a.a.e., ov rodingja doverliva manuša kola so ka grižinen pe baši adaja diz. Jekh lendar so biringja len sine o Ananija, kova so sine odgovorno baši Tvrdina. I Biblija opišinela e Ananija sar „but doverlivo manuš kova so darala sine taro čačutno Devel poviše taro javera“ (Neem. 7:2). O mangipe sprema o Jehova hem i dar te na razočarinel le, pottikningja e Ananija te dikhel seriozno ki bilo savi zadača so dobingja la. Asavke osobine šaj isto agjaar amenge da te pomožinen te ova doverliva ki amari služba bašo Jehova. Te dikha o primer taro verno amal e apostol Pavleskoro kova so vikinela pe Tihik. O Tihik sine spremno te pomožinel e Pavle hem adaleske o Pavle opišingja le sar „verno sluga“ (Ef. 6:21, 22). O Pavle na samo so dengja le te ingarel o pismija e phralenge ko Efes hem ko Kolosi, nego isto agjaar vakergja leske te ohrabrinel len hem te utešinel len. O Tihik setinkerela amen ko avdisutne verna hem odgovorna phralja kola so grižinena pe bašo amare duhovna potrebe (Kol. 4:7-9; w22.09 9-10, pas. 5-6).

O Josif nakhlja taro but pharo vreme 13 berš. Ov šaj sine te počminel te razmislinel kaj o Jehova na mangela le. Hem šaj sine te mislinel peske kaj o Jehova mukhlja le baš keda najviše valjani sine leske. Ama ov na ikergja holi. Namesto adava, razmislingja trezveno hem ačhilo smirimo. Keda sine le šansa te iranel ple phralenge bašo lošnipe so kergje leske, ov na kergja adava. Namesto adava sikavgja lenge mangipe hem prostingja lenge (1. Moj. 45:4, 5). O Josif šaj sine te postapinel agjaar soske jasno razmislingja. Namesto te koncentririnel pe ko ple problemija, ov dikhlja i celo slika — dikhlja koja tani e Jehovaskiri namera (1. Moj. 50:19-21). So sikljovaja taro akava? Ako sian povredimo ma holjan e Jehovaske ili te misline kaj ov mukhlja tut. Namesto adava, razmislin sar pomožinela tuke te izdržine adava problemi. Osven adava, keda o javera ka povredinen tut, trudin tut mangipaja te učhare lengere maane (w22.11 21, pas. 4).

O proroko o Daniel dikhlja jekh vizija koja so sikavela kaj e Jehova isi le o najbaro avtoriteti. O Daniel prvo dikhlja štar bare zverija kola so pretstavinena štar svetska sile taro purano vreme. Adala tane o Vavilon, i Medo-Persija i Grcija hem o Rim, hem isto agjaar jekh svetsko sila taro amaro vreme i Anglo-Amerika (Dan. 7:1-3, 17). Palo adava o Daniel dikhlja e Jehova sar bešela ko prestol ko nebo (Dan. 7:9, 10). O Devel lela celi vlast taro manušikane vladetelija hem dela la javerenge kola soj pomokjna hem poviše zaslužinena la. Kaske dela la? Nekaske soj „sar manušikano čhavo“, o Isus Hristos hem e „sveta slugenge e Sevišnoskere“ o 144.000 kola so ka vladinen ki celi večnost (Dan. 7:13, 14, 18). Jasno tano kaj o Jehova tano o Sevišno. O bukja so dikhlja o Daniel ki vizija potvrdinena adava so vakergja angleder. Ov vakergja kaj o Devel „cidela caren hem čhivela caren“ (Dan. 2:19-21; w22.10 14-15, pas. 9-11).