So otkringje amenge o pekamberija bašo Devel
Ko purano vreme, o Devel vakerela sine važna porake e manušenge preku o pekamberija. Dali akala porake otkrinena amenge sar šaj te dobina bereketija taro Devel? Oja. Te dikha so šaj te sikljova taro trin verna pekamberija.
IBRAHIM (Avraam)
O Devel nane pristrasno hem mangela te del bereketi sa e manušenge.
O Devel dengja lafi e pekambereske e Ibrahimeske kaj preku leste „ka dobinen bereketi sa o narodija ki phuv“ (1. Mojseeva 12:3).
So sikljovaja taro akava? O Devel but mangela amen hem mangela te del bereketi sarinenge soj leske poslušna.
MUSA (Mojsej)
O Devel tano milostivo hem dela bereketi adalenge so trudinena pe te pendžaren le.
O Semokjno Devel dengja mokj e pekambereske e Musaske te kerel bare čudija. Sepak, o Musa molingja pe: „Vaker mange, molinava tut, baši tle drumija, te šaj te pendžarav tu hem te arakhav milost anglo tle jakhja“ (2. Mojseeva 33:13). O Devel sine bahtalo bašo adava so rodingja lestar o Musa hem dengja le bereketi agjaar so pomožingja leske panda pošukar te haljovel leskere osobine hem o način sar postapinela. Na primer, o Musa halilo kaj o Stvoriteli tano „milostivo hem sočuvstvitelno“ (2. Mojseeva 34:6, 7).
So sikljovaja taro akava? O Devel mangela te del bereketi sarinenge so trudinena pe pošukar te pendžaren le — muršenge, džuvlenge hem čhavenge. Preku plo Lafi ov vakerela amenge sar te služina leske. Osven adava, vakerela kaj mangela te sikavel amenge milost hem te del amen bereketija.
ISA (Isus)
O Isa sine sočuvstvitelno hem sasljargja sa o nasvalipa
Šaj te dobina večna bereketija taro Devel ako sikljovaja bašo Isa, hem bašo adava so kerela sine hem so sikavela sine.
Ko e Devleskoro Lafi isi but detalija bašo e Isaskoro životo hem leskere sikajba. O Devel dengja le mokj te kerel bare čudija sar, na primer, te sasljarel e korolen, e kašuken hem e sakaten. Ov iranela sine čak e mulen ko životo. O čudija so kergja len o Isa sikavena so ka kerel o Devel ki idnina. O Isa objasningja sar sekova jekh amendar šaj te dobinel adala bereketija. Ko Jovan 17:3 pišinela: „Te šaj te ovel len večno životo valjani šukar te pendžaren tut, e jekhe čačutne Devle, hem okole so bičhalgjan le, o Isus Hristos“.
O Isa sine sočuvstvitelno hem ljubezno. But manuša, maškar kolende so sine murša hem džuvlja, terne hem phure, avena sine ki leste adaleske so šungje leskiri ljubezno pokana: „Sikljoven mandar, soske me na holjanava sigate hem sium ponizno ko vilo, hem ka ovel tumen nevi sila!“ (Matej 11:29). Isto agjaar, različno taro manuša ko leskoro vreme kola so ponašinena pe sine lošno e džuvlencar, o Isa sine lencar ljubezno hem poštujnela len sine.
So sikljovaja taro akava? O Isa sikavgja kaj but mangela e manušen hem dengja amen but šužo primer bašo adava sar valjani te ponašina amen jekh jekhea.
O ISA NANE DEVEL
Taro e Devleskoro Lafi doznajnaja kaj „isi samo jekh Devel“ hem kaj o Isa sine jekh ponizno pekamberi so služingja e Devleske (1. Korinkjanite 8:6). O Isa jasno phengja kaj o Devel tano pobaro lestar hem kaj bičhalgja le ki Phuv (Jovan 11:41, 42; 14:28).a