Palem gradin tlo amalipe e Jehovaja

Sekova berš but skapocena bakhre palem iranena pe ko sobranie. Zamislin samo kobor tano baro o „bahtalipe ko nebo“ keda sekova jekh iranela pe (Luka 15:7, 10). Ako palem irangjan tut šaj te ove sigurno kaj o Isus, o angelija hem o Jehova tane but bahtale bašo adava. Ama, džikote palem gradinea tlo amalipe e Jehovaja, šaj te oven tut nesave predizvikija. Kola tane nesave taro adala predizvikija, hem so šaj te pomožinel tuke?

KOLA TANE O PREDIZVIKIJA?

Bute dženen isi len negativna čuvstvija čak otkeda irangje pe ko sobranie. Šaj haljovea sar osetinela pe sine o cari o David. Iako sine prostime leskere grevija, ov vakergja: „Mle grevija lele mli sila“ (Ps. 40:12; 65:3). Otkeda nekoj ka iranel pe ko Jehova, ov šaj ponadari da beršencar te osetinel pe krivo hem te ladžal. I Izabel, sine isklučimi poviše taro 20 berš.a Oj vakerela: „But sine mange pharo te prifatinav kaj o Jehova šaj te prostinel mange“. Ako obeshrabrinea tut šaj palem duhovno te pere (Izr. 24:10). Ma dozvolin adava te slučinel pe tuke.

A javera mislinena kaj našti te keren adava so valjani te šaj palem te oven amala e Jehovaja. Otkeda sine palem iramo, o Anton vakergja: „Mislinava sine kaj bistergjum so značinela te živine sar e Jehovaskoro svedoko“. Adaleske so osetinena pe agjaar, nesave lendar na vklučinena pe ko sa o duhovna aktivnostija.

Na primer, keda nekaskoro kher tano but oštetimo tari jekh bura, ov šaj te obeshrabrinel pe keda ka razmislinel bašo adava kobor buti adžikerela le hem kobor vreme valjani te trošinel te šaj palem te kerel o kher. Slično, ako tlo amalipe e Jehovaja sine oštetimo adaleske so kergjan nesavo seriozno grevo, šaj mislinea kaj valjani te trošine but vreme hem trudo te šaj palem te gradine tli duhovnost. Ama na sian korkori, isi tut pomoš!

O Jehova vakerela: „Aven te rasčistina o bukja maškar amende“ (Isa. 1:18). Tu više but trudingjan tut, te šaj te sredine o bukja. Hem o Jehova but mangela tut bašo adava. Razmislin samo, adaleske so irangjan tut ko Jehova, ov šaj te koristinel tut sar primer te šaj te dokažinel kaj o Satana tano hovavno (Izr. 27:11).

Adalea so irangjan tut, tu više uljan popaše e Jehovaja hem ov vetinela tuke kaj ov da ka ovel tuja paše (Jak. 4:8). Šukar tano adava so javera šaj te dikhen kaj palem irangjan tut ko sobranie. Ama, valjani te kere nešto poviše. Valjani ponadari da te bajrare tlo mangipe bašo tlo Dad hem amal, o Jehova. Sar šaj te kere adava?

ČHIV TUKE CELIJA SO ŠAJ TE ISPOLNINE LEN

Trudin tut te čhive tuke razumna celija. Verojatno tlo duhovno temeli — o osnovna bukja so sikliljan len bašo Jehova hem baši idnina — nane oštetimo. Ama, ka valjani palem te gradine šukar hristijanska navike maškar kola soj, redovno te dža ki služba, ko sostanokija hem te družine tut e phralencar hem e phenjencar. Razmislin bašo akala celija.

Ker redovno lafi e Jehovaja. To Dad haljovela kaj ako poviše vreme osetinea tut krivo, ka ovel tuke pharo te moline tut leske (Rim. 8:26). Sepak, „istrajn ki molitva“ hem vaker e Jehovaske kaj but mangea te ove leskoro amal (Rim. 12:12). O Andrej vakerela: „Osetinava man sine but krivo hem ladžava sine, ama pali sekoja molitva sine mange pošukar hem sine man andruno mir“. Ako na džanea bašo so te moline tut, razmislin bašo molitve so vakergja len o cari o David keda kaingja pe. Ola arakhljovena ko Psalm 51 hem 65.

Proučin redovno i Biblija. Akava ka hraninel tut duhovno hem ka pomožinel tuke te bajrare tlo mangipe sprema o Jehova (Ps. 19:7-11). O Felipe vakerela: „Glavno buti soske peljum duhovno hem razočaringjum e Jehova, sine adaja so na sine man duhovna navike. Na mangljum te kerav i isto greška. Adaleske odlučingjum te arakhav mli duhovnost agjaar so redovno ka proučinav“. Tu da šaj te kere o isto. Ako valjani tuke pomoš baši nesavi tema proučibaske, šaj te puče nesave zrelo amale te pomožinel tuke.

Gradin palem tlo amalipe e phralencar hem e phenjencar. Nesave so iranena pe ko sobranie darana kaj o javera nane te dikhen šukar ki lende. I Larisa priznajnela: „But ladžava sine, osetinava man sine sar te phene povredingjum hem razočaringjum e phralen hem e phenjen. Agjaar osetinava man sine but vreme“. Ov uverimo kaj o starešine hem o javera mangena te pomožinen tuke palem te ove duhovno jako. (Dikh i ramka „So šaj o starešine te keren?“) Lenge tano but milo so irangjan tut hem ola mangena te ove bahtalo (Izr. 17:17).

Sar šaj te ove popaše e sobraniea? Dža ko sa o sostanokija hem redovno učestvujn ki služba. Sar ka pomožinel tuke akava? O Feliks vakergja: „O sobranie sine bahtalo keda irangjum man. Osetinava man sine cenimo. Sarine ola pomožingje mange palem te ovav delo taro sobranie, te dikhav kaj o Jehova prostingja mange hem te dikhav angle“. (Dikh i ramka „So šaj tu te kere?“)

MA OTKAŽIN TUT!

O Satana ponadari da ka kerel tuke bure ko životo te šaj te peljarel tut džikote palem gradinea tlo amalipe e Jehovaja (Luka 4:13). Ov spremno agjaar so panda akana ka kere pozoralo tlo duhovno kher.

Ple bakhrenge o Jehova vetingja: „Ka rodav okolen so našavdile, ka iranav okolen so gele dur, ka phandav o rane okolengere soj povredime hem ka dav sila okolenge soj slaba“ (Ezek. 34:16). O Jehova pomožingja bute dženenge so pele duhovno. Ov sigurno kaj ov tuke da mangela te pomožinel ponadari da te kere sa pozoralo tlo amalipe lea.

So šaj o starešine te keren?

O starešine šaj but te pomožinen e objavitelenge so irangje pe palem te oven amala e Jehovaja. Primetin so šaj te keren okolenge so irangje pe.

Uverinen len. O apostol Pavle džanlja kaj e grešniko so kainela pe šaj te „peravel le i but bari žal“ (2. Kor. 2:7). Ov šaj but puti te osetinel pe krivo hem obeshrabrimo. O Pavle sovetingja e sobranie: „Ljubezno prostinen leske hem utešinen le“. Okola so iranena pe valjani te oven uverime kaj o Jehova hem lengere phralja but mangena len. I redovno pofalba hem i praktično pomoš ka pomožinel lenge te na oven obeshrabrime.

Molinen tumen lencar. „I molitva taro vilo e pravednikoskiri isi la bari sila“ (Jak. 5:16). I Larisa kola so spomningjem la angleder vakerela: „Vakergjum e starešinenge bašo mle sumnje hem sostar darava. Molingje pe mange hem mancar. Tegani haliljum kaj o starešine nane mange holjame. Ola mangle te pomožinen mange te ovav palem amal e Jehovaja“. O Teo vakerela: „E starešinengere molitve uveringje man kaj o Jehova čače mangela man, hem kaj ov dikhela o šukar ki mande, a na samo o lošno“.

Oven lencar amala. Okola so irangje pe valjani lenge amala ko sobranie. Jekh starešina so vikinela pe Džastin, vakerela: „Koristinen sekoja prilika te džan lencar ki služba, ama soj panda považno džan lende ko gostija. But tano važno te oven lenge amala“. Jekh javer starešina, o Henri, vakerela: „Keda o javera taro sobranie ka dikhen sar o starešine ovena amala okolencar so irangje pe, ola da ka mangen te keren o isto“.

Pomožinen lenge te proučinen. Jekh zrelo amal šaj te pomožinel okoleske so irangja pe te ovel le jekh šukar navika proučibaske. Jekh starešina so vikinela pe Darko, vakerela: „Uživinava te vakerav lenge ohrabruvačka misle so arakhljum ki mli lično studija, hem te sikavav lenge kobor but uživinava džikote proučinava i Biblija. Isto agjaar organizirinava te proučina nesavo materijali zaedno“. Jekh javer starešina, o Klejton, vakerela: „Pottikninava len te arakhen bibliska izveštaija taro manuša kola so doživingje nešto slično sar lende te šaj te dikhen so šaj te sikljoven“.

Oven šukar pastirija. Angleder te iranen pe, okola so sine isklučime dikhle e starešinen ki uloga sar sudie. Ama akana tano but važno te dikhen ki lende sar pastirija (Erem. 23:4). Šunen šukar hem spremno pofalinen len. Često komunicirinen lencar. Primetin so kerela ko pastirska posete jekh starešina so vikinela pe Markus: „Zaedno čitinaja jekh biblisko misla, pofalinaja len hem uverinaja len kaj amen hem o Jehova dičinaja amen lencar adaleske so but trudingje pe te iranen pe. Ko krajo tari sekoja poseta, dogovorinaja amen keda ka ava javer puti te posetina len“.

a Nesave anava ki akaja statija tane menime.