STATIJA PROUČIBASKE 7
Izvlečin pobari korist taro čitibe i Biblija
Soj tano pišimo ko Zakoni? So čitinea athe? (LUKA 10:26)
GILI 97 E Devleskoro Lafi dela životo
BAŠO SO KA KERA LAFIa
1. So sikavela kaj o spisija sine važna e Isuseske?
ZAMISLIN sar osetingje pe o manuša so šunena sine e Isuse sar poučinela. Ov but puti napamet citiringja taro sveta spisija. Ustvari, o prva lafija so vakergja len kratko otkeda krstingja pe hem nesave taro leskere posledna lafija kratko angleder te merel, o Isus citiringja taro spisijab (5. Moj. 8:3; Ps. 31:5; Luka 4:4; 23:46). Hem džikote kerela sine pli služba trin tekvaš berš, o Isus but puti javno čitingja, citiringja hem objasningja o spisija (Mat. 5:17, 18, 21, 22, 27, 28; Luka 4:16-20).
Celo plo životo o Isus sikavgja kaj mangela o Spisija hem dozvolingja ola te vlijajnen upro leskere postapke (Dikh ko pasus 2.)
2. So pomožingja e Isuseske šukar te pendžarel o spisija džikote bajrola sine? (Dikh i slika tari naslovno strana.)
2 But berša angleder te počminel ple službaja, o Isus često čitingja hem šungja e Devleskoro Lafi. Khere sigurno šunela sine sar i Marija hem o Josif redovno citirinena sine taro spisija džikote kerena sine lafi sar familijac (5. Moj. 6:6, 7). Šaj te ova sigurna kaj o Isus hem leskiri familija sekova sabat džana sine ki sinagoga (Luka 4:16). Džikote sine athe sigurno vnimatelno šungja keda čitinela pe sine taro spisija. Palo nesavo vreme ov siklilo korkori te čitinel akala sveta spisija. Adaleske o Isus na samo so šukar džanela sine o spisija, nego isto agjaar manglja adava so pišinela sine ki lende hem dozvolingja ola te vlijajnen upro leskere postapke. Na primer, razmislin bašo adava so slučingja pe ko hrami keda e Isuse sine le 12 berš. O učitelija kola so but šukar džanena sine e Mojseeskoro zakoni sine „vooduševime taro [e Isuseskoro] haljojbe hem odgovorija“ (Luka 2:46, 47, 52).
3. So ka dikha ki akaja statija?
3 Amen da šaj pošukar te zapoznajna hem te zamanga e Devleskoro Lafi keda redovno čitinaja i Biblija. Sar šaj te izvlečina pobari korist taro adava so čitinaja? Šaj te sikljova taro adava so vakergja o Isus okolenge so džanena o Zakoni, maškar kolende so sine o knižnikija, o fariseija hem o sadukeija. Akala religiozna vodačija čitinena sine but puti o spisija ama na sine len korist taro adava so čitingje. O Isus istakningja trin bukja kola so akala manuša valjani sine te keren te šaj te ovel len pobari korist taro spisija. Ki akaja statija ka dikha sar adava so vakergja lenge šaj te pomožinel amenge 1) te haljova adava so čitinaja, 2) te arakha skapocena pouke hem 3) te dozvolina e Devleskoro Lafi te oblikujnel amen.
ČITIN TE ŠAJ TE HALJOVE
4. So sikljovaja taro Luka 10:25-29 bašo čitibe e Devleskoro Lafi?
4 Amen mangaja te haljova adava so čitinaja ko e Devleskoro Lafi, inače nane te ovel amen celosno korist taro čitibe. Na primer, te dikha e Isuseskoro razgovor so sine le jekhe manušea so džanela sine šukar o Zakoni. (Čitin Luka 10:25-29.) Keda adava manuš pučlja le so valjani te kerel te šaj te dobinel večno životo, o Isus pomožingja leske te arakhel o odgovor ko e Devleskoro Lafi agjaar so pučlja le: „Soj tano pišimo ko Zakoni? So čitinea athe?“ O manuš šaj sine točno te odgovorinel agjaar so citiringja o spisija bašo adava te mangel pe e Devle hem e pašutne (3. Moj. 19:18; 5. Moj. 6:5). Ama primetin so vakergja palo adava: „Koj tano čače mlo pašutno?“ Akalea sikavgja kaj na halilo so čače značinela adava so čitingja. Adaleske na džanlja sar te primeninel adala stihija ko ispravno način.
Te haljove adava so čitinea tani veština so šaj te sikljove la
5. Sar i molitva hem adava so ka čitine pohari šaj te pomožinel amenge?
5 Amen šaj pošukar te haljova e Devleskoro Lafi ako razvinaja šukar navika čitibaske. Ake nesave predlogija so šaj te pomožinen tuke: Molin tut angleder te počmine e čitibaja. Valjani amenge e Jehovaskiri pomoš te haljova i Biblija, adaleske valjani te molina le bašo leskoro sveti duh te šaj te koncentririna amen. Palo adava ma sigjar nego čitin pohari. Akava šaj te pomožinel tuke te haljove adava so čitinea. Šaj ka ovel tuke korisno te čitine ko glaso ili, ako dostapno ki tli čhib, te pratine i audiosnimka taro čitibe e Biblijakoro. Adava šaj te pomožinel tuke te haljove, te pamtine hem poviše te sikljove (Is. Nav. 1:8). Keda završinea e čitibaja, molin tut panda jekh puti te šaj te blagodarine e Jehovaske baši Biblija, hem te šaj te pomožinel tuke te primenine adava so čitingjan.
Soske adava so kerea kratka beleške ka pomožinel tuke te haljove hem te na bistre adava so čitinea? (Dikh ko pasus 6)
6. Soske adava so ka puče tut pučiba hem ka kere kratka beleške šaj te pomožinel tuke džikote čitinea? (Dikh hem i slika.)
6 Te dikha panda duj predlogija so šaj te pomožinen tuke pošukar te haljove i Biblija. Puč tut pučiba bašo adava so čitinea. Džikote čitinea nesavo izveštaj puč tut: „Baši kaste kerela pe lafi ko akava izveštaj? Koj kerela lafi? Kasaja kerela lafi, hem soske? Kote hem keda slučinela pe adava?“ Asavke pučiba ka pomožinen tuke te razmisline hem te haljove o najvažna pouke taro adava so čitinea. Isto agjaar, ker kratka beleške džikote čitinea. Keda pišinea, tu ustvari prenesinea tle misle ko lafija hem agjaar haljovea len pošukar. O pišibe šaj te pomožinel tuke te pamtine adava so čitinea. Šaj te pišine pučiba so isi tut, te pišine adava so istražingjan, te pišine o glavna misle, šaj te pišine sar te primenine adava so čitingjan ili šaj samo te pišine so mislinea bašo adava so čitingjan. Akala bukja ka pomožinen tuke te dikhe ko e Devleskoro Lafi sar nešto soj tuke lično pišimo.
7. Savi osobina valjani amenge džikote čitinaja hem soske? (Matej 24:15).
7 O Isus istakningja jekh važno osobina so valjani amenge te šaj te haljova adava so čitinaja ko e Devleskoro Lafi — i proniklivost. (Čitin Matej 24:15.) Soj tani i proniklivost? Sposobnost te haljovel pe sar tani povrzimi jekh misla javere mislaja, hem sar ola razlikujnena pe tari nesavi javer misla, hem te haljova adava so na dikhjola pe odma. O Isus isto agjaar sikavgja kaj valjani amenge proniklivost te šaj te otkrina nastanija kola so ispolninena bibliska proroštvija. Valjani amenge isto agjaar akaja osobina te šaj te ovel amen celosno korist taro adava so čitinaja ki Biblija.
8. Sar šaj te ova pronikliva džikote čitinaja?
8 O Jehova dela ple slugenge proniklivost. Adaleske, rode lestar ki molitva pomoš te razvine akaja osobina (Izr. 2:6). Sar šaj te postapine ko sklad tle molitvaja? Vnimatelno razmislin bašo adava so čitinea hem sporedin adava e javere bukjencar so džanea. Na primer, sar pomoš šaj te koristine o Priračniko istražibaske e Jehovaskere svedokongoro. Akava priračniko šaj te pomožinel tuke te haljove o značenje taro jekh biblisko izveštaj hem te dikhe sar šaj te primenine adava ko tlo životo (Evr. 5:14). Ako isi tut proniklivost džikote čitinea, tlo haljojbe ka bajrol.
ČITIN TE ŠAJ TE ARAKHE SKAPOCENA POUKE
9. Kova biblisko čačipe na prifatingje o sadukeija?
9 O sadukeija but šukar pendžarena sine o prva pandž lila taro Hebrejska spisija ama ola na prifatingje nesave važna čačipa soj pišime ko adala lila. Na primer, dikh sar o Isus odgovoringja keda o sadukeija pučle le bašo voskresenie. Ov pučlja len: „Zarem na čitingjen ko e Mojseeskoro lil, ko izveštaj baši grmuška, kaj o Devel vakergja leske: ’Me sium o Devel e Avraameskoro, o Devel e Isakoskoro hem o Devel e Jakoveskoro‘?“ (Mar. 12:18, 26). Iako o sadukeija but puti čitingje akala lafija, sepak e Isuseskoro pučibe sikavgja kaj ola na prifatingje jekh but važno biblisko čačipe — o voskresenie (Mar. 12:27; Luka 20:38).d
10. So valjani te trudina amen te otkrina džikote čitinaja?
10 So sikljovaja taro akava? Keda čitinaja valjani te trudina amen te otkrina sa so šaj te sikljova taro stiho ili taro biblisko izveštaj. Amen na mangaja te haljova samo o osnovna bukja nego isto agjaar o pohor čačipa hem načelija kola so našti lokhe te arakhen pe.
11. Sprema 2. Timotej 3:16, 17, sar šaj te arakhe skapocena pouke ki Biblija?
11 Sar šaj te arakhe skapocena pouke džikote čitinea i Biblija? Razmislin bašo adava so pišinela ko 2. Timotej 3:16, 17. (Čitin.) „Celo Lil... korisno tano“ 1) te del pouke, 2) te sikavel amenge soj tano pogrešno, 3) te isprajnel sa o bukja hem 4) te sikavel sar te živinel pe pravedno. Šaj te ovel tut korist taro akala štar bukja čak taro bibliska lila so na čitinea len često. Proučin o izveštaj te šaj te dikhe save pouke šaj te del tut bašo Jehova, baši leskiri namera ili bašo bibliska načelija. Razmislin sar pomožinela tuke te otkrine kola bukja tane pogrešna. Akava šaj te kere agjaar so ka primetine sar o stihija pomožinena tuke te otkrine hem te otfrline pogrešna želbe ili stavija hem te ačhove verno e Jehovaske. Ispitin sar šaj te koristine o stiho te šaj te isprajne o pogrešna stavija, na primer te isprajne nesavo stavi so šungjan le ki služba. Hem dikh sar o stihija pomožinena tuke te živine pravedno sar so mangela o Jehova. Ako ikerea tut ko akala štar bukja ka arakhe skapocena pouke kola so ka keren tlo čitibe i Biblija panda pokorisno.
DOZVOLIN O ČITIBE TE OBLIKUJNEL TUT
12. Soske pučlja o Isus e fariseen „Na čitingjen li?“
12 O Isus pučlja e fariseen da „Na čitingjen li?“ te šaj te otkrinel kaj sine len pogrešno stavi bašo adava so čitinena sine ko spisija (Mat. 12:1-7).e Ki adaja prilika o fariseija vakergje kaj e Isuseskere učenikija na ikergje pe ko sabat. O Isus odgovoringja lenge agjaar so spomningja duj primerija taro spisija hem citiringja jekh stiho taro Osija kova so sikavela kaj o fariseija na halile soske sine dendo o zakoni bašo sabat hem adaleske našti sine te sikaven milost. Soske akala manuša na dozvolingje te oven oblikujme džikote čitinena sine e Devleskoro Lafi? Soske sine len kritizersko hem gordo stavi. Adava stavi na dozvolingja lenge te haljoven i smisla taro adava so čitinena sine (Mat. 23:23; Jovan 5:39, 40).
13. Savo stavi valjani te ovel amen džikote čitinaja i Biblija hem soske?
13 Taro e Isuseskere lafija sikljovaja kaj valjani te ovel amen ispravno stavi džikote čitinaja i Biblija. Na valjani te ova sar o fariseija nego valjani te ova ponizna hem spremna te sikljova. Mora krotko te prifatina te sadinel pe ki amende e Devleskoro Lafi (Jak. 1:21). Ako siem krotka tegani ka dozvolina e Devleskoro Lafi te mukhel koreno ko amaro vilo. O bibliska pouke baši milost, sočuvstvo hem mangipe šaj te oblikujnen amen samo ako izbeginaja o kritizersko ili o gordo stavi.
Sar šaj te doznajna dali dozvolinaja e Devleskoro Lafi te oblikujnel amen? (Dikh ko pasus 14)f
14. Kotar šaj te džana dali dozvolinaja i Biblija te oblikujnel amen? (Dikh hem o slike.)
14 O način sar ponašinaja amen e javerencar šaj te sikavel dali dozvolinaja e Devleskoro Lafi te oblikujnel amen. O fariseija na dozvolingje e Devleskoro Lafi te vlijajnel upri lende hem adaleske ola sudingje „okolen so na kergje nisavi greška“ (Mat. 12:7). Slično, sar dikhaja ko javera hem sar ponašinaja amen lencar otkrinela dali dozvolinaja e Devleskoro Lafi te oblikujnel amen. Na primer, dali obično spomninaja e javerengere šukar bukja ili poviše keraja lafi bašo lengere maane? Dali siem milostiva hem spremno prostinaja ili kritikujnaja e javeren hem ikeraja lencar holi? O odgovorija ko akala pučiba šaj te otkrinen amenge dali dozvolinaja adava so čitinaja te oblikujnel amare misle, čuvstvija hem postapke (1. Tim. 4:12, 15; Evr. 4:12).
KEDA ČITINAJA E DEVLESKORO LAFI SIEM RADOSNA
15. So mislinela sine o Isus bašo sveta spisija?
15 O Isus mangela sine o sveta spisija hem o lafija taro Psalm 40:8 sikavgje save čuvstvija ka oven e Isuse bašo e Devleskoro Lafi, athe pišinela: „But mangava te kerav tli volja Devla, hem tlo zakoni tano mange hor ko vilo“. Adaleske so mangela sine o sveta spisija, o Isus sine radosno hem uspešno ki služba bašo Jehova. Amen da šaj te ova radosna hem uspešna ako dozvolinaja e Devleskoro Lafi te vlijajnel upro amaro vilo (Ps. 1:1-3).
16. So mangea te kere te šaj te ovel tut pobari korist taro čitibe i Biblija? (Dikh i ramka „E Isuseskere lafija šaj te pomožinen tuke te haljove adava so čitinea“.)
16 E Isuseskoro primer hem adava so vakergja valjani te pottikninen amen pohor te čitina i Biblija. Šaj pošukar te haljova i Biblija agjaar so ka molina amen, ka čitina pohari, ka puča pučiba hem ka kera kratka beleške. Šaj te ova pronikliva agjaar so ka koristina amare publikacie te šaj panda pošukar te haljova adava so čitinaja. Šaj te sikljova pošukar te koristina i Biblija, čak stihija so nane amenge baš poznata, agjaar so ka roda pouke ko asavke izveštaija. Hem šaj te dozvolina e Devleskoro Lafi te oblikujnel amen ako ponadari da isi amen o ispravno stavi džikote čitinaja. Ako daja amendar sa te kera akala bukja tegani ka ovel amen pobari korist taro adava so čitinaja ki Biblija hem ka ova popaše e Jehovaja (Ps. 119:17, 18; Jak. 4:8).
GILI 95 I svetlina ovela sa posilno
a Sarine amen so obožavinaja e Jehova trudinaja amen te čitina i Biblija sekova dive. O javera da čitinena la ama na haljovena baš adava so čitinena. Asavke manuša sine ko e Isuseskoro da vreme. Adalea so ka dikha so vakergja o Isus okolenge so čitingje e Devleskoro Lafi šaj te sikljova sar te izvlečina pobari korist taro čitibe i Biblija.
b Otkeda krstingja pe hem sine pomazimo sveti duhoja, o Isus palem setingja pe ko plo životo so sine le angleder te avel ki phuv (Mat. 3:16).
c I Marija but šukar džanlja o spisija hem citirinela sine lendar (Luka 1:46-55). Verojatno e Josife hem e Marija na sine len dovolno pare te kinen peske kopija taro spisija. Adaleske sigurno ki sinagoga vnimatelno šunena sine keda čitinela pe sine e Devleskoro Lafi te šaj te pamtinen.
d Dikh i statija „Približi mu se na Bog — Toj e Bog na živite“ so arakhljola ki Stražarska kula taro 1 fevruari 2013 berš.
e Dikh isto agjaar ko Matej 19:4-6, kote so o Isus pučlja e fariseen o isto pučibe: „Na čitingjen li?“ Iako ola čitingje o izveštaj bašo stvoribe, sepak taro adava izveštaj ola na halile sar o Devel dikhela ko brako.
f OBJASNIMI SLIKA: Ko sostanok jekh taro phralja so pomožinela ko audio-video kerela poviše greške. Ama otkeda završinela o sostanok o phralja pofalinena le bašo leskoro trudo namesto te koncentririnen pe ko leskere greške.