Ponadari da dža palo e Jehovaskoro vodstvo

1. Soske valjani amenge e Jehovaskoro vodstvo? Vaker primer.

ZAMISLIN tuke kaj našavdiljan ki jekh šuma. Kotar hem te irane tut isi nesavi opasnost — diva životne, opasna insektija, otrovna rastenija, a o drumo nane ramno hem pherdo barencar. Sigurno ka ove but blagodarno ako uzi tute isi jekh iskusno vodači kova so džanela adala opasnostija hem džanela sar te izbeginel len. Akava sveto tano sar adaja šuma. Ki leste isi but opasnostija kola so šaj te ruminen amaro duhovno sastipe. Ama amen isi amen sovršeno vodači — o Jehova. Ov pomožinela amen te izbegina o opasnostija hem te resa dži ki amari cel — o večno životo ko nevo sveto.

2. Sar vodinela amen o Jehova?

² Sar vodinela amen o Jehova? Prvo preku plo lafi i Biblija. Isto agjaar, ov koristinela manušen. Na primer, ov koristinela e „verno hem mudro robo“ te šaj te del amen duhovno hrana koja so pomožinela amen te ana mudra odluke (Mat. 24:45). Isto agjaar, o Jehova koristinela javere da phralen te šaj te del amen vodstvo. Na primer, o pokrainska nadglednikija hem o starešine taro sobranie ohrabrinena amen hem dena amen upatstvija kola so šaj te pomožinen amen te izdržina ko akala phare vremija. Amen siem but blagodarna e Jehovaske so dela amen doborom šukar vodstvo ko akala phare vremija angleder te avel o krajo. Adava pomožinela amenge te ačhova paše e Jehovaja hem te ačhova ko drumo e životoskoro.

3. So ka dikha ki akaja statija?

³ Sepak, ponekogaš šaj te ovel amenge pharo te dža palo e Jehovaskoro vodstvo, posebno keda koristinela nesovršena manušen te vodinen amen. Soske? Šaj nane te svidžinel pe amenge adava so ka vakeren amenge. Ili šaj te mislina kaj o upatstvija so dobinaja len nane logična hem šaj te ava ko zaklučok kaj na avena taro Jehova. Ko asavke situacie, but tano važno te ovel amen doverba kaj o Jehova tano adava so vodinela ple narodo hem ako džaja palo e Jehovaskoro vodstvo adava ka ovel bašo amaro šukaripe. Te šaj te bajrara amari doverba, ki akaja statija ka dikha 1) sar o Jehova vodingja ple narodo ko biblisko vreme, 2) sar vodinela amen avdive hem 3) sar koristinela amenge adava so džaja palo leskoro vodstvo.

SAR O JEHOVA VODINGJA E IZRAELCON

4-5. Sar sikavgja o Jehova kaj koristinela e Mojsee te šaj te vodinel e Izraelcon? (Dikh i slika tari naslovno strana.)

⁴ O Jehova biringja e Mojsee te ikalel e Izraelcon taro Egipet. Osven adava, sine len jasno dokaz kaj o Jehova vodinela len preku o Mojsej. Na primer, mukhlja stubo taro oblako diveske hem stubo tari jag rakjate (2. Moj. 13:21). O Mojsej džala sine palo adava stubo hem agjaar ov hem o Izraelcija resle dži ko Crveno more. Keda arakhlile maškar o more hem i egipetsko vojska so džala sine pali lende, e Izraelcon astargja len panika. Ola mislingje kaj o Mojsej grešingja so angja len dži ko Crveno more. Ama adava na sine greška. O Jehova namerno preku o Mojsej angja ple narodo adathe (2. Moj. 14:2). Palo adava o Jehova spasingja ple narodo ko jekh posebno način (2. Moj. 14:26-28).

⁵ Ko adala 40 berš džikote sine ki pustina, e Mojsee sine le doverba kaj o Jehova koristinela o stubo taro oblako te šaj te vodinel ple narodo.a Nesavo vreme o Jehova čhivgja o stubo upro šatori e Mojseeskoro kote so šaj sine o Izraelcija te dikhen le (2. Moj. 33:7, 9, 10). O Jehova kerela sine lafi e Mojseea taro stubo, a palo adava o Mojsej vakerela sine e narodoske o upatstvija so dobinela len sine taro Jehova (Ps. 99:7). E Izraelcon sine len jasno dokaz kaj o Jehova vodinela len preku o Mojsej.

6. Sar reagiringje o Izraelcija ko vodstvo e Jehovaskoro? (4. Mojseeva 14:2, 10, 11).

⁶ Žalno tano adava so poviše Izraelcija otfrlingje o jasno dokaz kaj o Jehova koristinela e Mojsee sar plo pretstavniko. (Čitin 4. Mojseeva 14:2, 10, 11.) Ola celo vreme odbinena sine te prifatinen i uloga e Mojseeskiri. Adaleske, o Jehova na mukhlja e Izraelcon te khuven ki Vetimi phuv.

7. Vaker primerija bašo nesave so gele palo e Jehovaskoro vodstvo? (4. Mojseeva 14:24; dikh hem i slika.)

⁷ Sepak, nesave Izraelcija džana sine palo vodstvo e Jehovaskoro. Na primer, o Jehova vakergja: „O Halev... šungja man ko sa“. (Čitin 4. Mojseeva 14:24.) O Devel blagoslovingja e Haleve, pa čak mukhlja le te birinel kaj ka živinel ki Vetimi phuv (Is. Nav. 14:12-14). Okola da Izraelcija kolenge so sine dozvolimo te khuven ki Vetimi phuv, dengje šukar primer adalea so gele palo e Jehovaskoro vodstvo. Keda o Isus Navin sine birimo sar vodači e Izraelcongoro ko e Mojseeskoro than, ola hor poštujngje le dži ko krajo taro pumaro životo (Is. Nav. 4:14). Adaleske o Jehova blagoslovingja len hem dengja len i phuv so vetingja lenge (Is. Nav. 21:43, 44).

8. Objasnin sar o Jehova vodingja ple narodo ko vreme e carengoro. (Dikh hem i slika.)

⁸ Beršencar palo adava, o Jehova čhivgja sudie te šaj te vodinen leskere narodo. Pokasno, keda vladingje carija, o Jehova čhivgja prorokija te vodinen leskere narodo. O verna carija šunena sine o sovetija e prorokongere. Na primer, o cari o David ponizno prifatingja o ukor taro proroko o Natan (2. Sam. 12:7, 13; 1. Let. 17:3, 4). E care e Josafate sine le doverba ko vodstvo e prorokoskoro o Jaziel hem ohrabringja e Judejcon e lafencar: „Verujnen ko [e Devleskere] prorokija“ (2. Let. 20:14, 15, 20). Keda sine ki phari situacija o cari o Ezekija rodingja pomoš taro proroko o Isaija (Isa. 37:1-6). Sekogaš keda o carija džana sine palo vodstvo e Jehovaskoro, ov blagoslovinela len sine a o narodo sine zaštitimo (2. Let. 20:29, 30; 32:22). Sarinenge valjani sine te ovel jasno kaj o Jehova koristinela e prorokon te šaj te vodinel ple narodo. Ama poviše carija hem pobaro delo taro narodo otfrlingje e Jehovaskere prorokon (Erem. 35:12-15).

SAR O JEHOVA VODINGJA E PRVA HRISTIJANEN

9. Kas koristingja o Jehova te šaj te vodinel e hristijanen ko prvo veko? (Dikh hem i slika.)

⁹ Ko prvo veko tari a.e., o Jehova kergja o hristijansko sobranie. Sar vodingja e hristijanen ko adava vreme? Ov čhivgja e Isuse sar poglavari ko sobranie (Ef. 5:23). Ama, o Isus na vakergja lično sekole učenikoske so te kerel. Ov koristingja e apostolen hem e starešinen ko Erusalim te šaj te predvodinen (Apo. 15:1, 2). Isto agjaar, sine čhivde hem starešine te vodinen o sobranija (1. Sol. 5:12; Tit 1:5).

10. a) Sar reagiringje o prva hristijanja taro prvo veko ko vodstvo so dobingje le? (Apostolija 15:30, 31). b) Soske nesave taro purano vreme na prifatingje okolen kas so o Jehova koristingja te vodinel len? (Dikh i ramka „Soske nesave otfrlingje o jasna dokazija“.)

¹⁰ Sar reagiringje o prva hristijanja ko vodstvo so dobingje le? Pobaro delo lendar spremno primeningje o upatstvija so dobingje len. Ustvari, ola radujngje pe so šaj sine te oven ohrabrime. (Čitin Apostolija 15:30, 31.) Ama, sar o Jehova vodinela ple narodo ko amaro vreme?

SAR O JEHOVA VODINELA AMEN AVDIVE

11. Vaker primer kova so sikavela sar o Jehova vodingja e Istražuvačen e Biblijakere?

¹¹ O Jehova ponadari da vodinela ple narodo avdive. Ov kerela adava preku plo Lafi hem preku plo Čhavo kova soj tano poglavari ko sobranie. Šaj li te dikha o dokazija kaj o Jehova avdive da koristinela manušen te šaj te vodinel amen? Oja. Na primer, razmislin bašo adava so slučingja pe ko krajo taro 19-to veko. O Čarls Rasel hem leskere sorabotnikija počmingje te haljoven kaj o 1914 berš, ka ovel važno berš bašo e Devleskoro Carstvo (Dan. 4:25, 26). Ola halile akava agjaar so istražingje o bibliska proroštvija. Dali o Jehova vodingja len džikote istražingje i Biblija? Sigurno. O bukja so slučingje pe ko sveto ko 1914 berš, sine dokaz kaj e Devleskoro Carstvo počmingja te vladinel. Počmingja i Prvo svetsko vojna, sine zarazna nasvalipa, zemjotresija hem bokhalipe (Luka 21:10, 11). O Jehova čače koristingja akale iskreno Istražuvačen e Biblijakere te šaj te pomožinel ple narodo.

12-13. So kergje o odgovorna phralja ki Dujto svetsko vojna te šaj te propovedinel pe ki pobari mera?

¹² Razmislin hem bašo adava so slučingja pe ki Dujto svetsko vojna. Otkeda proučingje o Otkrovenie 17:8, o odgovorna phralja taro glavno sedište halile kaj i vojna nane te ingarel dži ko Armagedon, nego kaj palo adava ka ovel relativno mir koleste so e Jehovaskere svedokija ka šaj te propovedinen panda ki pobari mera. Adaleske, iako na izgledinela sine logično ko adava vreme, e Jehovaskiri organizacija počmingja te ikerel i Biblisko škola Gilead te šaj te oven obučime misionerija kola so ka propovedinen hem ka sikaven ko celo sveto. Sine bičhalde misionerija čak džikote trajnela sine i vojna. Osven adava, o verno robo organiziringja kursi baši Teokratsko službab te šaj te pomožinel sa e objavitelenge ko sobranie pošukar te propovedinen hem te sikaven. Sa akava pomožingja e Devleskere narodo te ovel spremno baši propovedničko aktivnost so valjani sine te kerel pe.

¹³ Avdive šaj jasno te dikha kaj o Jehova vodingja ple narodo ko adava pharo periodi. Tari Dujto svetsko vojna sa dži akana, e Jehovaskere sluge slobodno propovedinena ko but phuvja. Ustvari, adaleske šaj sine te doznajnen bašo Jehova but manuša.

14. Soske šaj te ovel amen doverba ko vodstvo so dobinaja le tari e Jehovaskiri organizacija hem taro starešine? (Otkrovenie 2:1; dikh hem i slika.)

¹⁴ Avdive, o členija taro Vodečko telo ponadari da rodena vodstvo taro Hristos. Ola mangena o upatstvija so dena e phralenge hem e phenjenge te oven ko sklad adalea sar o Jehova hem o Isus dikhena ko bukja. Ola isto agjaar dena vodstvo e sobranienge preku o pokrainska nadglednikija hem o starešine.c O starešine soj pomazanikija, a ki pobari smisla hem sa o javera starešine, tane ko e Hristoseskoro „desno vas“. (Čitin Otkrovenie 2:1.) Normalno, sa o starešine tane nesovršena hem kerena greške. O Mojsej hem o Isus Navin ponekogaš kergje greške, a isto hem o apostolija da (4. Moj. 20:12; Is. Nav. 9:14, 15; Rim. 3:23). Sepak, o Hristos šukar vodinela e phralen taro verno robo hem e starešinen hem ponadari da ka kerel adava „ko sa o dive dži ko krajo akale svetoskoro“ (Mat. 28:20). Adaleske, isi amen šukar pričine te ovel amen doverba ko vodstvo so o Isus dela amen preku adala soj čhivde te predvodinen.

KEDA DŽAJA PALO E JEHOVASKORO VODSTVO ADAVA TANO AMARE ŠUKARIPASKE

15-16. So sikljovea taro iskustvija okolengere so gele palo vodstvo e Jehovaskoro?

¹⁵ Adava so džaja palo e Jehovaskoro vodstvo, anela amenge blagoslovija panda avdive. Na primer, o Andi hem i Rouzd prifatingje o pottik te poednostavinen pumaro životo (Mat. 6:22). Adaleske šaj sine te pomožinen ko gradibe teokratska objektija. I Rouz vakerela: „Ponekogaš sine amen but tikno than živibaske, kote so čak na sine kujna. Isto agjaar, mora sine te bikinav baro delo tari oprema so koristinava la sine slikibaske — hobi kova so but mangava le sine. Rungjum bašo adava. Ama o primer e Sarakoro, i romni e Avraameskiri, pomožingja mange te ovav odlučno te dikhav anglal, a na palal“ (Evr. 11:15). Save blagoslovija sine akale bračno pare adaleske so angje asavke odluke? I Rouz vakerela: „But kerela amen radosno adava so džanaja kaj daja e Jehovaske sa so isi amen. Džikote keraja o zadače so dobinaja len tari e Devleskiri organizacija, isi amen jekh tikni pretstava savo ka ovel o životo ko nevo sveto“. O Andi složinela pe laja hem vakerela: „But siem srekjna adaleske so amaro vreme hem sila celosno koristinaja bašo e Devleskoro Carstvo“.

¹⁶ Ko savo javer način koristinela amenge adava so džaja palo e Jehovaskoro vodstvo? Otkeda završingja sredno škola, i Marsija spremno prifatingja o pottik te počminel e polnovremeno službaja (Mat. 6:33; Rim. 12:11). Oj vakerela: „Nudingje mange štar berš stipendija bašo fakulteti. Ama me mangljum te kerav poviše bašo Jehova. Adaleske, namesto te prifatinav i ponuda, biringjum te sikljovav zanati kova so ka pomožinel mange te ovav pioneri. Adaja sine jekh taro mle najšukar odluke so angjum. Akana sium radosno so služinava sar opšto pioneri, a adaleske so isi man fleksibilno rabotno vreme šaj te pomožinav ko Betel hem te kerav panda but javera bukja bašo Jehova“.

17. Kola javera blagoslovija isi amen keda džaja palo e Jehovaskoro vodstvo? (Isaija 48:17, 18).

¹⁷ Ponekogaš tari amari organizacija dobinaja sovetija kola so zaštitinena amen. Na primer, dobinaja sovetija bašo materijalizam hem bašo javera bukja kola so šaj te čhiven amen te phaga e Jehovaskere zakonija. Ako džaja palo vodstvo e Jehovaskoro ko akala da bukja, adava ka ovel bašo amaro šukaripe. Ka ovel amen čisto sovest hem ka izbegina but problemija (1. Tim. 6:9, 10). Adava ka pomožinel amen te služina e Jehovaske celo vilea, nane ništo javer so šaj te anel amenge pobari radost, mir hem zadovolstvo. (Čitin Isaija 48:17, 18.)

18. Soske sian odlučno ponadari da te dža palo e Jehovaskoro vodstvo?

¹⁸ Šaj te ova sigurna kaj o Jehova ponadari da ka koristinel manušen te šaj te vodinel amen ki bari nevolja hem džikote trajnena o milja berša kote so ka vladinel o Isus (Ps. 45:16). Dali ponadari da ka dža palo adava vodstvo čak ako nesave bukja nane tuke logična? Adava but ka zavisinel taro adava sar avdive reagirinaja ko vodstvo so dela amen o Jehova. Adaleske sekogaš te dža palo e Jehovaskoro vodstvo, kote soj vklučimo o vodstvo taro manuša kolen so o Jehova čhivgja len te grižinen pe amenge (Isa. 32:1, 2; Evr. 13:17). Džikote keraja adava, te ovel amen celosno doverba ko amaro vodači o Jehova, kova so pomožinela amen te izbegina sa adava so šaj te ruminel amaro amalipe lea hem kova so ingarela amen ki amari cel — o večno životo ko nevo sveto.