Dža palo primer e verna angelengoro

1-2. a) Ko so razlikujnaja amen taro angelija? b) So isi amen zaedničko e angelencar?

SAR Jehovaskoro narodo, amen siem delo tari jekh familija koja so služinela leske. Ki adaja familija tane amare phralja hem phenja taro celo sveto, ama hem milionja angelija da (Dan. 7:9, 10). Keda razmislinaja bašo angelija, šaj odma mislinaja ko adava kaj tane but različna amendar. Na primer, o angelija sine stvorime but vreme angleder o manuša (Jov 38:4, 7). Ola tane but pomokjna amendar. Isto agjaar, ola tane sveta hem pravedna doborom but so amen sar nesovršena manuša, našti te resa adava (Luka 9:26).

² Iako siem različna lendar, amen sepak isi amen but zaednička bukja e angelencar. Na primer, isto sar o angelija, amen da šaj te sikava o but šuže osobine so isi e Jehova. Amen isi amen slobodno volja isto sar so isi e angelen. Sekova jekh lendar isi le plo anav, različno karakter hem različna zadače ki služba bašo Jehova, o isto tano amencar da. Hem, slično sar o angelija, amen da isi amen potreba te obožavina amare Stvoritele (1. Pet. 1:12).

3. So šaj te sikljova taro verna angelija?

³ Adaleske so isi amen but zaednička bukja e angelencar, taro lengoro šukar primer šaj te ohrabrina amen hem te sikljova but važna bukja. Ki akaja statija ka dikha sar šaj isto sar o verna angelija amen da te ova ponizna, te manga e manušen, te ova istrajna hem te trudina amen o sobranie te ačhovel čisto.

O ANGELIJA TANE PONIZNA

4. a) Sar o angelija sikavena kaj tane ponizna? b) Soske o angelija tane ponizna? (Psalm 89:7).

⁴ O verna angelija tane ponizna. Iako isi len but baro iskustvo hem tane but mokjna hem mudra, ola šunena e Jehovaskere upatstvija (Ps. 103:20). Keda kerena pumare zadače so dela len o Jehova, o angelija nikogaš na falinena pe adalea, a ni palem na koristinena pli mokj te istakninen pe. Ola radosno kerena sa adava so rodela lendar o Jehova, čak ako o javera nikogaš nane te džanen lengere anavaa (1. Moj. 32:24, 29; 2. Car. 19:35). Ola na mangena te sikavel pe lenge bilo savi čest koja so pripadinela samo e Jehovaske. Soske o angelija tane doborom ponizna? Adaleske so mangena e Jehova hem hor poštujnena le. (Čitin Psalm 89:7.)

5. Sar jekh angeli sikavgja poniznost keda isprajngja e Jovane? (Dikh hem i slika.)

⁵ Razmislin baši jekh situacija koja so sikavela kaj o angelija tane ponizna. Okolu 96-to berš a.e., jekh angeli koleskoro anav na džanaja, sikavgja jekh but interesno vizija e apostol Jovaneske (Otk. 1:1). Sar reagiringja o Jovan? Ov pelo angli leste te šaj te pokloninel pe leske. Ama o angeli sigate čhinavgja le, e lafencar: „Ma ker adava! Me da sium samo robo sar tu hem tle phralja... Poklonin tut e Devleske!“ (Otk. 19:10). Kobor sine ponizno akava angeli! Ov na manglja te dobinel čest hem slava, nego odma vakergja e Jovaneske te koncentririnel pe ko Jehova. Ama, isto agjaar, o angeli na mislingja kaj o Jovan tano pohari vredno lestar. Iako o angeli služingja e Jehovaske but poviše vreme hem sine but pomokjno taro Jovan, sepak ponizno vakergja leske kaj ov da tano robo sar leste. Iako valjangja te isprajnel le, o angeli na ponašingja pe lea grubo. Namesto adava, ov kergja lea lafi ljubezno. Ov verojatno halilo kaj o Jovan manglja te pokloninen pe leske adaleske so sine vooduševimo taro adava so dikhlja.

6. Sar šaj te ova ponizna sar o angelija?

⁶ Sar šaj te ova ponizna sar o angelija? Amen da šaj te kera o zadače ki služba bašo Jehova, bizo te falina amen hem bizo te kera nešto te šaj o javera te falinen amen bašo adava so kergjem (1. Kor. 4:7). Osven adava, na valjani te mislina kaj siem pošukar taro javera adaleske so služinaja e Jehovaske poviše vreme lendar ili adaleske so isi amen zadače kola so len nane len. Ustvari, kobor poviše odgovornostija isi amen, doborom poviše valjani te dikha ki amende sar potikne taro javera (Luka 9:48). Isto sar o angelija, amen mangaja te služina e javerenge. Na mangaja te čhiva e javeren te mislinen kaj siem považna lendar.

7. Sar šaj te sikava poniznost keda valjani te isprajna nekas ili te da sovet?

⁷ Poniznost šaj te sikava hem keda valjani te isprajna nekas ili te da sovet, na primer nesave phraleske ili amare čhaveske. Ponekogaš valjani te da direktno sovet. Ama isto sar o angeli kova so ljubezno isprajngja e Jovane, amen da šaj te da direktno sovet, bizo te obeshrabrina e javere. Ako na mislinaja kaj siem pošukar taro javera, adava ka pomožinel amenge te da biblisko sovet ko način so ka sikavel ka poštujnaja e javere hem ka ova ljubezna (Kol. 4:6).

O ANGELIJA MANGENA E MANUŠEN

8. a) Sprema Luka 15:10, sar o angelija sikavena kaj mangena e manušen? b) Savi uloga isi e angelen ko propovedibe? (Dikh hem i slika.)

⁸ O angelija na ignoririnena adava so slučinela pe amenge, a ni na mislinena kaj na siem važna. Ola mangena e manušen. O angelija radujnena pe keda nesavo grešniko ka kainel pe, javere lafencar keda nesavo bakhro so našavdilo, ka iranel pe ko Jehova ili keda nekoj ka meninel o način sar živinela hem ka prifatinel o čačipe. (Čitin Luka 15:10.) Isto agjaar, o angelija aktivno učestvujnena ko propovedibe (Otk. 14:6). Iako na propovedinena direktno e manušenge, ola šaj te vodinen amen dži nekaste so mangela te sikljovel bašo Jehova. Džangjola pe, našti sigurno te vakera kaj o angelija vodingje amen ki sekoja konkretno situacija. O Jehova šaj te koristinel hem javera da načinija — na primer pli sila — te šaj te pomožinel e manušenge te doznajnen baši leste ili te vodinel ple slugen dži lende (Apo. 16:6, 7). Sepak, ov but koristinela ple angelen da. Adaleske, keda propovedinaja o šukar haberi, šaj te ova sigurna kaj o angelija tane akate te pomožinen amenge. (Dikh i ramka „Ola dobingje odgovor ko pumare molitve“.)b

9. Sar šaj te manga e manušen sar o angelija?

⁹ Sar šaj te manga e manušen sar o angelija? Keda ka šuna izvestuvanje kaj nekoj palem tano iramo ko sobranie, šaj te radujna amen isto sar so radujnena pe o angelija. Šaj te vakera okoleske soj iramo kaj mangaja le hem kaj siem radosna so palem služinela e Jehovaske (Luka 15:4-7; 2. Kor. 2:6-8). Panda jekh način sar šaj te dža palo primer e angelengoro tano agjaar so ka da amaro najšukar te šaj te propovedina (Prop. 11:6). Hem, isto sar o angelija so poddržinena amen džikote vakeraja o šukar haberi, amen da šaj te arakha načinija te poddržina amare phralen hem phenjen ki služba. Na primer, šaj te planirina te dža ki služba nesave poneve objavitelea. Ili, šaj te pomožina e phralenge hem e phenjenge soj pophure ili so isi len problemija sastipaja te učestvujnen ki služba.

10. So šaj te sikljova taro e Sarakoro iskustvo?

¹⁰ So ako amare okolnostija na dozvolinena amenge te kera ki služba bašo Jehova doborom kobor so mangaja? Šaj te arakha javera načinija te sorabotina e angelencar ko propovedibe. Razmislin bašo iskustvo e Sarakoro,c jekh phen tari Indija. Otkeda služingja sar pioneri okolu 20 berš, i Sara nasvalili hem poviše našti sine te uštel taro kreveti. Oj sine but razočarimi. Ama, palo nesavo vreme, i Sara palem uli radosno adaleske so pomožinena la sine o phralja hem o phenja taro sobranie hem adaleske so redovno čitinela sine i Biblija. Džangjola pe, oj valjangja te arakhel neve načinija te šaj te kerel pli služba. Adaleske so našti sine ni te bešel te šaj te pišinel pismija, i Sara šaj sine te svedočinel samo preku telefoni. Adaleske, oj javingja pe ko ple povtorna posete, a ola vakergje lake bašo javera kola so šaj bi mangena te proučinen i Biblija. So ulo palo adava? Bašo samo nekobor masekija, e Sara sine la 70 bibliska kursija. Oj našti sine te resel te proučinel sarinencar, adaleske zamolingja nesaven taro sobranie te proučinen nekobore dženencar. But džene taro adala so proučinena akana džana ko amare sostanokija. Sigurno o angelija tane but radosna keda sorabotinena phralencar hem phenjencar sar soj i Sara, kola so kerena sa so šaj te učestvujnen ko propovedibe!

O ANGELIJA TANE ISTRAJNA

11. Sar o verna angelija sikavgje kaj tane istrajna?

¹¹ O verna angelija tane but šukar primer baši istrajnost. Ola više but berša trpinena i nepravda hem o lošnipe. O angelija dikhle sar o Satana hem but javera duhovna suštestvija, kola so angleder služingje e Jehovaske zaedno lencar, buningje pe protiv o Devel (1. Moj. 3:1; 6:1, 2; Juda 6). Tari Biblija džanaja kaj jekh verno angeli mora sine divencar te borinel pe jekhe mokjno demonea (Dan. 10:13). Isto agjaar, taro vreme e Adameskoro hem e Evakoro pa dži avdive, o angelija dikhena kaj samo hari manuša birinena te služinen e Jehovaske. Sepak, akala verna angelija ponadari da služinena e Jehovaske radosno hem revno. Ola džanena kaj o Devel ko pravo vreme ka cidel sa o nepravde.

12. So šaj te pomožinel amen te istrajna?

¹² Sar šaj te ova istrajna sar o angelija? Isto sar lende, amen da šaj ka dikha nepravde ili ka doživina protivibe. Ama, amen da siem sigurna kaj o Devel ko pravo vreme ka cidel sa o lošnipe. Adaleske, isto sar o verna angelija, na otkažinaja amen „te kera šukaripe“ (Gal. 6:9). A o Devel da vetinela amenge kaj ka pomožinel amen te istrajna (1. Kor. 10:13). Šaj te molina e Jehova te del amen pli sila koja so ka pomožinel amenge te ova strpliva hem radosna (Gal. 5:22; Kol. 1:11). So ako isi tut protivibe? Neka ovel tut celosno doverba ko Jehova hem ma dara. O Jehova sekogaš ka pomožinel tuke hem ka del tut sila (Evr. 13:6).

O ANGELIJA POMOŽINENA O SOBRANIE TE AČHOVEL ČISTO

13. Koja posebno zadača isi e angelen džikote trajnena o posledna dive? (Matej 13:47-49).

¹³ Milionja manuša ko celo sveto interesinena pe bašo šukar haberi. Nesave taro akala manuša kerena promene te šaj te oven čačutne hristijanja, a javera na. Džikote trajnena o posledna dive, o Jehova dengja e angelenge jekh posebno zadača — te „odvinen e lošna manušen taro pravedna“. (Čitin Matej 13:47-49.) Znači, e angelen isi len zadača te pomožinen o sobranie te ačhovel čisto. Ama, adava na značinela kaj sekoj so čhinavgja te proučinel hem te družinel pe e Jehovaskere narodoja tari bilo savi pričina, nikogaš ka našti te iranel pe ko sobranie. A ni na značinela kaj ko sobranie nikogaš nane te oven problemija. Sepak, šaj te ova sigurna kaj o angelija but trudinena pe te šaj amare sobranija te ačhoven čista.

14-15. Sar šaj amen da sar o angelija te pomožina o sobranie te ačhovel čisto ko moralno hem duhovno pogled? (Dikh hem o slike.)

¹⁴ Sar šaj amen da sar o angelija te pomožina o sobranie te ačhovel čisto? Agjaar so ka kera amaro delo te šaj o sobranie te ačhovel čisto ko moralno hem duhovno pogled. Adaleske, birinaja amala kola so mangena e Jehova hem cidaja amen taro sa so šaj te ruminel amaro amalipe lea (Ps. 101:3). Isto agjaar, šaj te pomožina amare phralenge te ačhoven verna e Jehovaske. Na primer, so valjani te kera ako doznajnaja kaj nekoj kergja seriozno grevo? Adaleske so mangaja le, ka pottiknina le te kerel lafi e starešinencar. Ako ov na kerela adava, amen valjani te vakera e starešinenge bašo adava so slučingja pe. Amen mangaja so posigate te pomožinel pe amare phraleske kova so rumingja plo amalipe e Jehovaja (Jak. 5:14, 15).

¹⁵ Žalno tano so nesave kola so kergje seriozno grevo valjani te oven cidime taro sobranie. Tegani, amen čhinavaja te družina amen asavkencard (1. Kor. 5:9-13). Akava pomožinela o sobranie te ačhovel čisto. Isto agjaar, adalea so na družinaja amen okolencar soj cidime taro sobranie, amen ustvari sikavaja lenge mangipe. Amaro cvrsto stavi šaj te pomožinel len te haljon kaj valjani te iranen pe ko Jehova. Ako kerena adava, amen ka radujna amen zaedno e Jehovaja hem leskere angelencar (Luka 15:7).

16. Ko save načinija ka trudine tut te dža palo primer e angelengoro?

¹⁶ Amenge tani bari čest adava so o Jehova dozvolinela te doznajna nešto poviše bašo angelija hem te sorabotina lencar! Te dža palo lengoro primer agjaar so amen da sar lende ka trudina amen te ova ponizna, ka manga e manušen, ka ova istrajna hem ka pomožina o sobranie te ačhovel čisto ko moralno hem duhovno pogled. Ako džaja palo primer e verna angelengoro, amen da ka šaj te služina e Jehovaske sar delo tari leskiri familija ki celi večnost.