O Jehova neka ovel tli uteha

1. Savo sine o životo e Evreengoro kola so sine robija ko Vavilon?

ZAMISLIN TUKE sar osetinena pe sine o Evreija kola so sine robija ko Vavilon. Ola ple jakhencar dikhle sar o Vaviloncija uništinena lengiri phuv. Bašo lengere grevija hem o grevija lengere parapapongere, o Evreija sine lende sar robija ko Vavilon (2. Let. 36:15, 16, 20, 21). Točno, dži negde ola šaj sine te živinen normalno životo (Erem. 29:4-7). Sepak, lengoro životo na sine lokho hem ola sigurno korkori na bi birinena sine te živinen agjaar. Sar osetingje pe adaleske so sine ki asavki situacija? Primetin so vakergja jekh lendar: „Uzo vavilonska reke bešaja sine hem rovaja sine keda setinaja amen sine ko Sion“ (Ps. 137:1). E Evreenge čače valjani sine uteha. Ama koj šaj sine te utešinel len?

2-3. a) So kergja o Jehova e Evreenge kola so sine ko ropstvo? b) Bašo so ka kera lafi ki akaja statija?

² O Jehova tano „o Devel sekole utehakoro“ (2. Kor. 1:3). Ov mangela ple slugen hem spremno dela len i uteha so valjani lenge. O Jehova džanlja kaj nesave robija ko Vavilon ka prifatinen leskoro ukor hem kaj ka počminen te služinen leske ko ispravno način (Isa. 59:20). Adaleske, poviše taro 100 berš angleder te oven lende sar robija ko Vavilon, o Jehova ple silaja pottikningja e proroko e Isaija te pišinel o lil kova so phiravela leskoro anav. Soske sine pišimo adava lil? O Isaija pišingja: „’Utešinen, utešinen mle narodo!‘ — vakerela tumaro Devel“ (Isa. 40:1). Preku o lil Isaija, o Jehova dengja i uteha so valjangja e Evreenge kola so sine robija.

³ Isto sar adale Evreenge, amenge da ponekogaš valjani uteha. Ki akaja statija ka dikha trin načinija sar o Jehova utešingja adalen so sine ko ropstvo: 1) vetingja kaj ka prostinel okolenge so ka kainen pe, 2) dengja nadež ple slugenge hem 3) pomožingja lenge te na daran. Džikote keraja lafi bašo akala bukja, primetin sar šaj amen da te ovel amen korist taro e Jehovaskere utešna lafija.

O JEHOVA MILOSTIVO PROSTINELA AMENGE

4. Sar o Jehova sikavgja kaj tano milostivo Devel? (Isaija 55:7).

⁴ O Jehova tano „Dad soj milostivo“ (2. Kor. 1:3). Ov sikavgja akaja osobina keda prostingja e Evreenge so sine ko Vavilon kola so kaingje pe. (Čitin Isaija 55:7.) O Jehova vakergja kaj bašo plo verno mangipe ka ovel milostivo sprema lende (Isa. 54:8, fus.). Sar o Jehova ka sikavel lenge sine milost? Točno, adaleske so o Evreija na sine poslušna sar kazna valjani sine but berša te oven ko Vavilon. Ama, o Jehova vetingja lenge kaj nane te ačhoven adathe zasekogaš (Isa. 40:2). Akava sigurno but utešingja e Evreen kola so kaingje pe hem kola so mangle te radujnen e Jehova!

5. Soske amen šaj te ova panda posigurna taro Evreija so sine robija ko Vavilon kaj o Jehova prostinela amenge?

⁵ So sikljovaja taro akava? O Jehova tano spremno celosno te prostinel ple slugenge. Amen avdive šaj te ova panda posigurna ko akava taro Evreija kola so sine ko Vavilon. Soske? Adaleske so džanaja so kergja o Jehova te šaj te prostinel amenge. Vekoncar otkeda sine pišimo o proroštvo e Isaijaskoro, o Jehova bičhalgja ple mangle Čhave ki phuv te šaj te del otkupnina bašo sa o grešnikija kola so kainena pe. Adaleske so o Isus mulo amenge, o Jehova šaj te „kosel“, javere lafencar celosno te prostinel amare grevija (Apo. 3:19; Isa. 1:18; Ef. 1:7). Kobor milostivo tano o Devel koleske so služinaja!

6. Soske tano utešno te razmislina baši e Jehovaskiri milost? (Dikh hem i slika.)

⁶ O lafija e Jehovaskere soj pišime ko Isaija 55:7 šaj te utešinen amen ako ponadari da osetinaja amen preterano kriva baši nesavi greška so kergjem la angleder, čak hem otkeda kaingjem amen. Akava šaj te slučinel pe posebno ako panda trpinaja o posledice tari amari greška. Ama, ako priznajngjem amare grevija hem ako čhinavgjem te kera adava soj pogrešno, šaj te ova sigurna kaj o Jehova prostingja amenge. A keda o Jehova prostinela ov odlučinela te na setinel pe više ko amaro grevo. (Sporedin Eremija 31:34.) Znači, ako o Jehova na razmislinela više bašo grevija so kergjem len angleder, ni amen na valjani te razmislina baši lende. E Jehovaske tano važno so keraja akana, a na save greške kergjem angleder (Ezek. 33:14-16). Isto agjaar, panda hari amaro milostivo Dad ka oslobodinel amen celosno taro posledice so isi amen adaleske so grešingjem.

7. So šaj te pottikninel amen te roda pomoš ako garavaja kaj kergjem grevo?

⁷ So valjani te kera ako mučinela amen amari sovest adaleske so garavaja kaj kergjem nesavo seriozno grevo? I Biblija pottikninela amen te roda pomoš taro starešine (Jak. 5:14, 15). Sepak, šaj nane te ovel amenge lokho te priznajna amaro grevo. Ama, ako kainaja amen hem na bistraja kaj o Jehova koristinela akale phralen te šaj te pomožinel amenge hem kaj ola ka postapinen amencar milostivo hem mangipaja, adava ka pottikninel amen te kera lencar lafi. Te dikha sar o Jehova koristingja e starešinen te šaj te utešinel jekhe phrale so vikinela pe Artura kole so mučinela le sine but i sovest. Ov vakerela: „Okolu jekh berš dikhljum pornografija. Ama, otkeda šungjum jekh govor baši sovest, priznajngjum mlo grevo me romnjake hem e starešinenge. Otkeda kergjum lencar lafi, konečno lokhiljum, ama ponadari da mučinela man sine mli sovest bašo adava so kergjum. O starešine setinkergje man kaj o Jehova ponadari da mangela te ovav leskoro amal. Ov ukorinela amen adaleske so mangela amen. O ljubezna lafija e starešinengere pogodingje man ko vilo hem pomožingje mange te haljovav kaj o Jehova čače prostingja mange“. Avdive, o Artur služinela sar pioneri hem sluga-pomošniko. But tano utešno te džana kaj o Jehova sekogaš tano spremno te prostinel amenge ako kainaja amen bašo greške so kergjem len!

O JEHOVA DELA AMEN NADEŽ

8. a) Savi nadež dengja o Jehova e Evreenge so sine robija? b) Sprema Isaija 40:29-31, sar šaj sine te vlijajnel i nadež upro Evreija kola so kaingje pe?

⁸ Amenge e manušenge šaj te izgledinel kaj e Evreenge so sine ko Vavilon na sine nisavi nadež. Sar svetsko sila, o Vavilon sine pendžardo palo adava kaj na oslobodinela ple robon (Isa. 14:17). Ama, o Jehova dengja nadež ple slugenge. Ov vetingja kaj ka oslobodinel len hem ništo našti sine te čhinavel le ko adava (Isa. 44:26; 55:12). E Jehovaske o Vavilon sine sar pravo (Isa. 40:15). Valjani samo jekh puti te phude hem o pravo nane više te ovel. Doborom lokho sine e Jehovaske te oslobodinel ple slugen taro Vavilon. Sar šaj sine akaja nadež te vlijajnel upro Evreija? Šaj sine te utešinel len, ama šaj sine isto agjaar te kerel nešto but poviše taro adava. O Isaija pišingja: „Okola so nadinena pe ko Jehova dobinena nevi sila“. (Čitin Isaija 40:29-31.) Asavki nadež ka del len sine nevi sila hem ka oven sine „sar orlija [kola so] vazdena pe ko paka“.

9. Savo dokaz sine e Evreen kaj o vetuvanja e Jehovaskere ka ispolninen pe?

⁹ O Jehova isto agjaar dengja e Evreenge dokaz kaj adava so vetingja ka ispolninel pe. Savo dokaz dengja len? Razmislin bašo proroštvija kolenge so ola džanle kaj više ispolningje pe. Na primer, ola džanle kaj i Asirija osvojngja o Carstvo taro deš plemija Izrael hem ingargja e narodo ko ropstvo (Isa. 8:4). Ola dikhle sar o Vaviloncija uništinena o Erusalim hem ingarena e manušen ko ropstvo (Isa. 39:5-7). Osven adava, sine dživde keda o Vavilonsko cari korjargja e care e Sedekija hem ingargja le ko Vavilon (Erem. 39:7; Ezek. 12:12, 13). Sa so prorokujngja o Jehova ispolningja pe (Isa. 42:9; 46:10). Sa akava sigurno kergja pozorali lengiri vera kaj ka ispolninel pe hem e Jehovaskoro vetuvanje kaj ka oslobodinel len!

10. So ka pomožinel amenge amari nadež te ačhovel silno ko akala posledna dive?

¹⁰ So sikljovaja taro akava? Keda siem razočarime, i nadež baši idnina šaj te utešinel amen hem te del amen sila. O uslovija ko sveto ovena sa pološna, a isto agjaar protivinena pe amenge but mokjna dušmanja. Ama, na smejnaja te ova preterano razočarime. O Jehova dela amen jekh but šuži nadež kaj ka živina ko raj kote so ka ovel čačutno mir hem sigurnost. Mora celo vreme te ikera ki godi akaja nadež. Ako na keraja adava, šaj te slučinel pe amari nadež te zamaglinel hem te ovel sar te phene dikhaja jekh but šuži priroda taro melalo džami. Sar šaj „te čistina o džami“, javere lafencar te ikera amari nadež silno? Šaj redovno te odvojna amenge vreme te šaj te zamislina kobor šužo ka ovel o životo ko nevo sveto. Šaj te čitina statie, te dikha videoklipija hem te šuna gilja so kerena lafi baši amari nadež. Isto agjaar, ki molitva šaj te vakera e Jehovaske save vetuvanja edvaj adžikeraja te ispolninen pe ko raj.

11. So dela sila jekhe phenjake kola so isi la seriozna problemija sastipaja?

¹¹ Razmislin sar i nadež utešinela hem dela sila jekhe phenja so vikinela pe Džoj, kola so poviše vreme isi la problemija sastipaja. Oj vakerela: „Keda osetinava man umorno taro mle problemija, vakerava e Jehovaske mle najhor čuvstvija hem džanava kaj ov haljovela man. Ko asavke momentija, o Jehova dela man ’sila, koja so nakhavela i normalno‘“ (2. Kor. 4:7). I Džoj isto agjaar zamislinela pe ko nevo sveto kote so „nijekh so živinela ki phuv nane te vakerel: ’Nasvalo sium‘“ (Isa. 33:24). Ako amen da vakeraja e Jehovaske amare najhor čuvstvija hem ako koncentririnaja amen ki amari nadež, ka ovel amen sila te istrajna ko nevolje.

12. Soske šaj te ovel amen doverba kaj ka ispolninen pe e Jehovaskere vetuvanja? (Dikh hem i slika.)

¹² Isto sar so sine e Evreencar ko Vavilon, o Jehova dengja amenge da but pričine te ovel amen doverba ko leskere vetuvanja. Razmislin bašo proroštvija kola so dikhaja kaj ispolninena pe. Na primer, dikhaja e anglo-amerikansko svetsko sila kolatar so jekh delo tano zoralo, a o javer delo tano slabo (Dan. 2:42, 43). Isto agjaar, šunaja bašo „zemjotresija ko razna thana“ hem propovedinaja o šukar haberi sa e narodonge (Mat. 24:7, 14). Adava so ispolningje pe akala hem but javera proroštvija, uverinela amen kaj ka ispolninel pe sa adava da so vetingja o Jehova baši idnina.

O JEHOVA POMOŽINELA AMEN TE NA DARA

13. a) Save problemija sine e Evreen ko vreme keda valjani sine te oven oslobodime? b) Sprema Isaija 41:10-13, sar o Jehova utešingja e Evreen kola so sine robija ko Vavilon?

¹³ Iako o Jehova utešingja e Evreen agjaar so dengja len jekh but šuži nadež, ov džanlja kaj ko vreme keda ka oslobodinel len ka oven len problemija. O Jehova prorokujngja kaj kratko angleder o Evreija te oven oslobodime, jekh mokjno cari prvo ka napadinel e narodon okolu o Vavilon, a palo adava ka khuvel hem ko Vavilon (Isa. 41:2-5). Dali o Evreija valjani sine te daran? But berša angleder te slučinel pe akava, o Jehova utešingja ple narodo. Ov vakergja: „Ma dara, soske me sium tuja! Ma ov sekirimo, soske me sium tlo Devel!“ (Čitin Isaija 41:10-13.) So manglja te vakerel o Jehova e lafencar: „Me sium tlo Devel“? Adalea na manglja te setinkerel e Evreen kaj valjani te obožavinen le, soske ola više džanena sine adava. Ustvari, manglja te setinkerel len kaj ov panda tano tari lengiri strana (Ps. 118:6).

14. Ko savo javer način o Jehova pomožingja e Evreenge te na daran?

¹⁴ Isto agjaar, o Jehova pomožingja e Evreenge te na daran agjaar so setinkergja len kaj isi le mokj bizi granica hem kaj džanela sa. Ov vakergja lenge te dikhen ko čerenja. Vakergja lenge kaj na samo so kergja o čerenja nego isto kaj džanela sekole jekhakoro anav (Isa. 40:25-28). Ako o Jehova džanela sekole čerenjakoro anav, tegani šaj te ova uverime kaj džanela sekole jekhe slugaskoro da anav! Osven adava, ako e Jehova sine le mokj te kerel o čerenja, tegani sigurno isi le mokj te pomožinel ple narodoske. Čače, o Evreija so sine robija ko Vavilon na valjani sine taro ništo te daran.

15. Sar o Devel spremingja e Evreen so sine ko Vavilon bašo adava so valjani sine te slučinel pe?

¹⁵ O Jehova isto agjaar, spremingja ple slugen bašo adava so valjani sine te slučinel pe. Preku o lil Isaija, o Devel vakergja ple narodoske: „Khuven ko tumare sobe kote so ka oven ko sigurno hem phanden o udara pali tumende, garaven tumen hari džikote nakhela i holi!“ (Isa. 26:20). Akava stiho šaj prvo puti ispolningja pe keda o cari o Kir osvojngja o Vavilon. O grčko istoričari o Ksenofon pišingja kaj keda o Kir khuvgja ko Vavilon, „zapovedingja [ple vojnikonge] te mudaren sekole jekhe so ka arakhen le avri“. Zamislin tuke kobor sine ki dar o manuša taro Vavilon! Ama, o Evreija so sine adathe verojatno sine zaštitime adaleske so šungje o upatstvija taro Jehova.

16. Soske na valjani te dara taro adava so ka slučinel pe ki bari nevolja? (Dikh hem i slika.)

¹⁶ So sikljovaja taro akava? Panda hari, ka valjani te nakha tari najbari nevolja ki manušikani istorija. Keda oj ka počminel, o manuša ko sveto ka daran hem ka oven bunime. Ama na hem e Jehovaskoro narodo. Amen džanaja kaj o Jehova tano amaro Devel. Ka ova hrabra soske ka džana kaj paše tano o vreme keda o Devel ka spasinel amen (Luka 21:28). Čak keda jekh koalicija taro sa o narodija ka napadinel amen, amen ponadari da ka ovel amen doverba ko Jehova. O Jehova ka zaštitinel amen preku o angelija hem ka del amen upatstvija kola so ka spasinen amaro životo. Sar ka dobina adala upatstvija? Mora te adžikera te šaj te dikha. Ama, asavke upatstvija verojatno ka dobina preku amare sobranija. Šaj ola ka oven amare „sobe“ kote so ka ova ko sigurno. Sar šaj te spremina amen bašo adava so ka slučinel pe? Mora te ova panda popaše amare phralencar hem phenjencar, te ova poslušna ko teokratska upatstvija hem te ova uverime kaj o Jehova vodinela amari organizacija (Evr. 10:24, 25; 13:17).

17. Sar šaj o Jehova te ovel tli uteha?

¹⁷ Iako e Evreengoro životo ko Vavilon na sine lokho, o Jehova dengja len i uteha so valjangja lenge. Ov ka kerel adava amenge da. Adaleske, bizi razlika so ka doživine ki idnina, ponadari da o Jehova neka ovel tli uteha. Neka ovel tut doverba kaj ov čače prostinela ple verna slugenge hem kaj grižinela pe tuke. Iker tli nadež zorali. Hem nikogaš ma bistre kaj nane sostar te dara soske o Jehova tano tlo Devel!