O Jehova pomožingja amenge te bajrova kote hem te ova sine sadime

O Mats hem i An-Katrin Kasholm sine ki Škola Gilead ko 1979 berš hem ko berša so nakhle sine „sadime“, javere lafencar, dobingje zadača te služinen ko Iran, Mavricius, Mjanmar, Tanzanija, Uganda hem Zair. Hem baš ko Gilead, taro instruktori Džek Redford, šungje o sovet „bajrov adathe kote so sian sadimo“. Adava sovet but pomožingja lenge soske but puti sine „sadime“ hem „presadime“. Te dikha so isi te vakeren amenge.

Mats, ka mange li te vakere amenge sar doznajngjan o čačipe?

Mats: Mo dad, kova so živinela sine ki Polska džikote trajnela sine i Dujto svetsko vojna, dikhlja kaj ki katoličko crkva isi but licemerstvo. Sepak, but vakerela sine: „Sigurno isi čačutni religija!“ Pokasno, haliljum kaj sine ko pravo. But puti kinava sine lila ko puranipe. Maškar adala lila sine jekh plavo lil e naslovea Čačipe kova so ingarela ko večno životo. O naslov but privlečingja man hem jekhe rakjake čitingjum celo lil. Keda završingjum čitibaja sabajle, haliljum kaj arakhljum o čačipe!

Počmindor taro april 1972 berš, čitingjum but publikacie e Jehovaskere svedokongere kolende so arakhljum o odgovorija ko mle bibliska pučiba. Osetingjum man sar o trgovco tari e Isuseskiri sporedba kova so otkeda arakhlja jekh skapoceno biseri, bikingja sa te šaj te kinel le. Man sine man planija te završinav fakulteti hem te ovav doktori, ama „bikingjum“ mle planija te šaj te kinav o „biseri“ kova so arakhljum le — o čačipe (Mat. 13:45, 46). Krstingjum man ko 10 dekemvri 1972 berš.

Bašo pohari taro jekh berš, mle roditelija hem mlo potikno phral prifatingje o čačipe hem krstingje pe. Ko juli 1973 berš, počmingjum e polnovremeno službaja. Maškar o revna pionerija ko amaro sobranie sine jekh šuži hem duhovno phen so vikinela pe An-Katrin. Zamanglem amen hem venčingjem amen ko 1975 berš. O sledna štar berš živingjem ki diz Stremsund (Švedska), jekh but šužo than kote so but manuša mangena te sikljoven baši Biblija.

An-Katrin: Mo dad doznajngja o čačipe keda sine ko fakulteti ko Stokholm. Ov lela man sine pea ko sostanokija hem ki služba, iako sine man samo trin masek. Me dajake na svidžingja pe adava hem mangela sine te dokažinel kaj adava so vakerena o Svedokija nane čače. Ama, našti sine te kerel adava hem palo nesavo vreme oj da krstingja pe. Me krstingjum man ko 13 berš, a ko 16 berš uljum pionerka. Jekh vreme služingjum ko Umeo kote so sine pobari potreba taro objavitelija hem palo adava uljum specijalno pionerka.

Otkeda me hem o Mats lelem amen, siem sine radosna so šaj sine te pomožina nekobore manušenge te doznajnen o čačipe. Jekh lendar sine i Majvor, tinejdžerka koja so otkažingja pe tari sportsko kariera hem zaedno mle potikne phenjaja počmingje te služinen sar pionerija. Ko 1984 berš, ola o solduj gele ko Gilead hem akana služinena sar misionerke ko Ekvador.

Služingjen ko but thana. Sar sikavgjen kaj šungjen o sovet „bajrov adathe kote so sian sadimo“?

Mats: But puti siem sine „presadime“ tari jekh ki javer zadača. Ama, trudinaja amen sine amare korenija te ačhon hor ko Isus agjaar so džaja sine palo leskoro primer najšukar so šaj, posebno keda kerela pe lafi baši poniznost (Kol. 2:6, 7). Na primer, namesto te očekujna taro phralja so sine ko adala thana te prilagodinen ki amende, trudinaja amen sine te haljova soske kerena o bukja ko nesavo način. Mangaja sine te haljova lengiri kultura hem lengoro način sar razmislinena. Kaj hem te ova sine, kobor poviše trudinaja amen sine te ova sar o Isus doborom poviše osetinaja amen sine „sar kaš soj sadimo uzo panja so thavdena“ (Ps. 1:2, 3).

An-Katrin: Otkeda jekh kaš ka ovel presadimo, te šaj ponadari da te bajrol valjanena leske tati temperatura hem svetlina. O Jehova sekogaš sine amenge „kham“ (Ps. 84:11). Ov dengja amen but šukar phralipe koleste so isi mangipe. Na primer, ko amaro tikno sobranie ko Teheran (Iran) doživingjem gostoprimlivost sar taro bibliska vremija. Mangaja sine te ačhova ko Iran, ama ko juli 1980 berš, e Jehovaskere svedokija sine oficijalno zabranime hem mora sine 48 saatenge te ikljova tari phuv. Dobingjem zadača te služina ko Zair (avdive pendžardo sar Kongo), ki Afrika.

Keda doznajngjum kaj ka služina ki Afrika, but rungjum. Šungjum kaj ki Afrika isi sapa hem nasvalipa hem adaleske darava sine. Ama, duj amare paše amala kola so but vreme služingje adari, vakergje amenge: „Panda na gelen adari, a tumen više razočaringjen tumen. Probinen! Pa ka dikhen, ka zamangen i Afrika“. Hem čače zamanglem la. O phralja hem o phenja adari tane but šukar hem ljubezna. Ustvari, palo šov berš keda valjani sine te dža amenge taro Zair baši zabrana so sine, asandiljum korkori mange soske haliljum kaj akana molingjum e Jehova te ačhova ki Afrika.

Save blagoslovija doživingjen ko sa adala berša?

Mats: Mora te spomninav o paše amalipa so sine amen e misionerencar taro različna phuvja. Isto agjaar, ko nesave thana ikeraja sine but bibliska kursija, ponekogaš čak po 20 sekova jekh amendar. Adava kerela amen sine but radosna. Nikogaš nane te bistrav o mangipe hem o gostoprimstvo e phralengoro hem e phenjengoro tari Afrika. Keda posetinaja sine o sobranie ki Tanzanija, amen sovaja sine ko amaro kombi kova so parkirinaja le sine uzo phralja hem phenja, a ola grižinena pe sine te ovel amen sa so valjani amenge, iako sine but čorole (2. Kor. 8:3). Nešto so but mangava sine, sine adava so vikinaja le sine vreme raskažibaske. Ko krajo taro sekova dive, i An-Katrin hem me ka kera sine lafi sar nakhlem amenge o dive hem blagodarinaja sine e Jehovaske soj tano amencar.

An-Katrin: Mange bari radost tani adaja so šaj sine te zapoznajnav phralen hem phenjen taro celo sveto, siklilem neve čhibja maškar kolende so sine i Persisko, Francusko, Luganda hem Svahili, a dikhlem hem but interesna kulture. Pomožingjem e manušenge te zapoznajnen e Devle hem kergjem amenge čačutne amala hem zaedno lencar služingjem e Jehovaske složno (Sof. 3:9).

Isto agjaar, sine amen prilika te dikha but bukja so stvoringja o Jehova. Sekova puti keda ka prifatina sine nesavi nevi zadača ki služba bašo Jehova, osetinaja amen sine sar ka phene džaja ko jekh patujbe zaedno e Jehovaja, amaro Vodači. Lestar siklilem bukja kola so nikogaš na bi sikljovaja len sine korkori.

Save problemija sine tumen, hem sar iklilen lencar ko krajo?

Mats: O berša so nakhle astargjem nekobor nasvalipa, sar na primer i malarija. A i An-Katrin mora sine nekobor puti te ovel itno operirimi. Osven adava, siem sine sekirime bašo amare roditelija kola so sine phure. Ama, blagodarna siem amare telesna phralenge hem phenjenge kola so grižingje pe lenge hem adava kerena le sine strplivo, radosno hem mangipaja (1. Tim. 5:4). Sepak, ponekogaš borinaja amen sine negativno čuvstvoncar soske našti sine te pomožina len duraldan.

An-Katrin: Ko 1983 džikote služinaja sine ko Zair, astargjum kolera hem sium sine but nasvali. O doktori vakergja mle romeske: „Sar džanea, panda avdive ikal la tari akaja phuv!“ O sledno dive više siem sine ko drumo te dža ki Švedska, ama ko tovarno avioni soske na sine javer način sar te dža amenge.

Mats: Mislingjem kaj adalea ka završinel amari misionersko služba. But sine amenge pharo hem rungjem. Iako o doktori mislinela sine kaj i An-Katrin nane te sasljol, oj sastili. Palo berš hem nešto irangjem amen ko Zair, akava puti ko jekh tikno sobranie ko svahili ko Lubumbaši.

An-Katrin: Džikote služinaja sine ko Lubumbaši, sine man spontano abortus. Iako na planiringjem te oven amen čhave, sepak adava sine mange but pharo. Ama ko adava pharo vreme, o Jehova blagoslovingja amen ko način so na očekujngjem. Počmingjem poviše kursija taro bilo keda angleder. Bašo pohari taro jekh berš, o sobranie barilo taro 35 ko 70 objavitelija, a prisutnost ko sostanokija taro 40 ko 220. Siem sine but zafatime ki služba hem o blagoslov taro Jehova sine amenge bari uteha. Ama, akana da but puti razmislinaja hem keraja amenge lafi bašo amaro bebe. Edvaj adžikeraja te dikha sar o Jehova celosno ka sasljarel amare vile.

Mats: Jekh vreme i An-Katrin osetinela pe sine but omalaksimi. Ko isto vreme, arakhle mange rako ko debelo crevo so sine ki štarto faza hem valjani sine te kerel pe mange bari operacija. Ama, akana sium šukar, a i An-Katrin dela pestar sa ki služba.

Halilem kaj nane amen samo amen problemija. Otkeda sine o genocid ki Ruanda ko 1994 berš, posetingjem bute phralen hem phenjen ko izbeglička kampija. Lengiri vera, istrajnost hem bari gostoprimlivost amenge sine dokaz kaj e Jehova isi le mokj te pomožinel ple slugenge ki bilo savi nevolja (Ps. 55:22).

An-Katrin: Jekh javer phari situacija kolate so arakhlilem, sine keda siem sine ko svečeno otvoranje e podružnicakoro ki Uganda ko 2007 berš. Pali programa cidingjem te dža ko Najrobi (Kenija) jekhe grupaja kolate so sine okolu 25 misionerija hem betelitija. Negde angleder i granica e Kenijaja, jekh kamioni taro jekh puti khuvgja ki amari lenta hem khuvgja direktno amende. O vozači hem pandž amare amala mule ko than, a jekh phen muli pokasno ki bolnica. Edvaj adžikeraja palem te dikha amare amalen (Jov 14:13-15).

Sar so nakhela sine o vreme o fizička povrede sastile. Ama me rome, man hem nekobor javere phralen hem phenjen, sine amen posttraumatsko stres. Rakjate sine man anksiozna napadija hem uštava sine simptomencar slična sar infarkt. Sine strašno. Ama, but pomožingja amenge i molitva hem i uteha so dobinaja sine taro nesave amare omilena stihija. Rodingjem hem profesionalno pomoš hem adava but pomožingja amen. Akana o simptomija tane polokhe hem molinaja e Jehova te pomožinel e javerenge da so isi len anksioznost.

Keda vakergjen amenge so pomožingja tumenge ko phare situacie, vakergjen amenge kaj o Jehova ingargja tumen „sar dživdo jaro ko vas“. So značinela adava?

Mats: Akaja tani jekh izreka ki čhib svahili. Keda nekas isi dživdo jaro ko vas, but pazinela sar phiravela le. Ko asavko način o Jehova grižingja pe amenge ki sekoja amari zadača. Sekogaš sine amen adava so valjangja amenge, pa čak hem poviše. Jekh način sar sekogaš osetinaja sine e Jehovaskoro mangipe hem poddrška sine keda dikhaja sine kobor but haljovela amen o Vodečko telo.

An-Katrin: Mangava te vakerav tumenge jekh situacija ki koja so o Jehova but pomožingja mange. Jekh dive javingje mange kaj mo dad ki Švedska tano ki intenzivno nega. O Mats samo so sastilo tari malarija. Na sine amen pare te šaj te kina avionska karte te dža amenge khere hem adaleske odlučingjem te bikina o vrda. Ama, tegani dobingjem duj telefonska povikija. Prvo, javingja pe amenge jekh bračno pari so šungja baši amari situacija hem manglja te platinel amenge jekh karta. Palo adava, javingja pe amenge jekh pophuri phen koja so sine la štedime pare ki jekh kutija kolate so sine pišimo: „Nekaske kaske so valjani“. Agjaar, samo bašo nekobor minutija, o Jehova grižingja pe te ovel amen adava so valjangja amenge! (Evr. 13:6).

Ko akala 50 berš so nakhavgjen ki polnovremeno služba, so siklilen?

An-Katrin: Haliljum kaj ka ovel amen sila ako arakhaja amaro mir hem doverba ko Jehova. Keda isi amen doverba ki leste, ov ka borinel pe amenge ko than (Isa. 30:15; 2. Let. 20:15, 17). Ki sekoja amari zadača služingjem e Jehovaske sa amare silencar. Hem adaleske dobingjem blagoslovija kola so na bi dobinaja len sine ko nijekh javer način.

Mats: Mange i glavno lekcija sine adava te ovel man doverba ko Jehova ki sekoja situacija hem te dikhav so ka kerel ov baši mande (Ps. 37:5). Hem sar so vetingja, ov sekogaš sine uzi mande. Hem dži avdive dikhaja adava džikote služinaja ko Betel ko Mjanmar.

Nadinaja amen kaj but terne so mangena te keren poviše ki služba bašo Jehova ka osetinen o isto verno mangipe kova so ov sikavgja le amenge. Uverime siem kaj ka osetinen le ako mukhena o Jehova te pomožinel len te bajron adathe kote soj sadime.