Pučiba taro čitatelija

So ka čhivel o Devel ko vilo e narodongoro te keren panda hari?

Bašo početok tari bari nevolja, ko Otkrovenie 17:16, 17 pišinela: „O 10 šinga so dikhljan hem o zvero ka mrzinen e nemoralno džuvlja, ka len latar sa o bukja so isi la hem ka mukhen la nangi. Ka han lakoro mas hem ka tharen la ki jag. Soske, o Devel čhivgja lenge ko vilo te keren adava so ov mangela, ustvari te ispolninen pumari zaedničko cel, te den plo carstvo e zveroske“. Angleder, ko amare publikacie pišinela sine kaj adava so o Jehova ka čhivel e narodonge ko vilo tano te uništinen i hovavni religija.

Ama, valjani te kera promena ko akava haljojbe. Adava so o Jehova ka čhivel e narodonge ko vilo tano „te den plo carstvo e zveroske“. Te šaj te haljova sar ka ispolninel pe akava, te dikha akala pučiba.

Koj tane spomnime ko akava proroštvo? I „nemoralno džuvli“ isto agjaar isi la o anav „Baro Vavilon“. Oj pretstavinela sa e hovavne religien. O „lolo zvero“ pretstavinela e Obedineta nacien. Akaja organizacija sine kerdi ko 1919 berš te šaj te ikerel o mir ko sveto hem angleder vikinela pe sine Liga e narodongiri (Otk. 17:3-5). „O 10 šinga“ pretstavinena sa e vladen so poddržinena e zvero.

Sar tane povrzime i nemoralno džuvli hem o lolo zvero? I nemoralno džuvli bešela upro lolo zvero, adava značinela kaj poddržinela le hem probinela te vlijajnel upri leste, pa čak hem te kontrolirinel le.

So ka ovel e nemoralno džuvljaja? O zvero hem o 10 šinga kola so poddržinena le, doborom but „ka mrzinen e nemoralno džuvlja“ so ka len latar sa so isi la hem sarinenge ka sikaven kobor tani lošno. Ola ka izvršinen e Jehovaskiri osuda upro late, javere lafencar celosno ka uništinen la (Otk. 17:1; 18:8). Adava ka ovel o krajo bašo hovavne religie. Sepak, angleder te ovel adava, o Jehova ka čhivel e narodon te keren nešto so na slučingja pe nikogaš angleder.

So ka čhivel o Jehova e narodon te keren? Ov ko vile e 10 šingengere ka čhivel „te keren adava so ov mangela“, adava značinela pli mokj hem vlast te den e lole zveroske — e Obedineta nacienge (Otk. 17:13). Razmislin so značinela akava. Dali o manušikane vlade ednostavno korkori ka odlučinen te den i vlast hem i mokj e zveroske? Na! O proroštvo sikavela kaj o Devel ka čhivel len te keren adava (Izr. 21:1; sporedin Isaija 44:28). Akaja promena nane te ovel hari po hari. Jasno tano kaj adava ka ovel taro jekh puti. Palo adava, adaleske so o zvero ka dobinel i mokj ka uništinel e hovavne religien jekh puti zasekogaš.

Tegani so šaj te adžikera kaj ka slučinel pe? Na valjani te adžikera kaj ko vestija ka šuna kaj o vlade hari po hari sa poviše ka poddržinen e Obedineta nacien. Šaj te adžikera akava: Taro jekh puti, o Jehova ka čhivel ko vile e narodongere te den pumari vlast e zveroske. Keda ka ovel adava, ka džana kaj i bari nevolja samo so na počmingja. Džikote na avela adava vreme, „te ačhova džangavde hem te razmislina trezveno“ soske panda hari ka slučinen pe promene taro jekh puti! (1. Sol. 5:6).