Pomoš e džuvlenge soj tane maltretirime

Agjaar počminela i statija ki jw.org e naslovea „I bezbednost e džuvlengiri — so vakerela i Biblija“. Ko krajo tari statija isi jekh link preku kova so šaj te perave la ko PDF formati hem palo adava šaj te printine la hem te pakjarela la sar traktati taro štar strane. Jekh phen tari Amerika, so vikinela pe Stejsi, vakerela: „Printingjum nekobor primerokija, a palo adava zaedno jekhe phenjaja ingargjem len ko jekh centar baši griža džuvlenge so sine maltretirime, kova so arakhljola ko amaro podračje“.

Jekh taro adala so kerela sine buti athe, pučlja dali šaj te dobinel panda primerokija te šaj te del okolenge so živinena adathe. Savo sine o rezultati? Sine dende panda 40 asavke traktatija hem 30 vizit-kartičke baši jw.org. Ki jekh prilika, i upravitelka taro adava centar manglja o Svedokija te sikaven e džuvlenge kola so živinena athe sar šaj te proučinen i Biblija.

I Stejsi hem duj javera phenja doživingje nešto slično ko jekh javer centar, kote so o rabotnikija lele pandž primerokija taro traktati hem rodingje panda. Jekh taro rabotnikija vakergja: „Akava traktati ka pomožinel e džuvlenge akate“. Isto agjaar vakergja: „Akava valjanela amenge“. Keda o phenja palem gele ko adava centar baši griža, nesave taro adala džuvlja mangle te dikhen sar izgledinela jekh biblisko kursi, a duj lendar vakergje kaj o javer vikend mangena te džan ko sostanok ki dvorana e Jehovaskere svedokongiri.

I Stejsi vakerela: „Vooduševime siem taro adava kobor šukar reagiringje o manuša keda dobingje akaja but šuži statija. Keda ka printinel pe hem ka pakjarel pe, adalea ko jekh šukar način šaj te vakerel pe o šukar haberi bašo Carstvo e džuvlenge so sine maltretirime. But pogodingja amen adava so but šukar reagiringje keda čitingje akaja statija. Edvaj adžikeraja te dikha sar o Jehova ka blagoslovinel amaro trudo džikote ponadari da vakeraja o šukar haberi akale džuvlenge“.