Iker „o jekhipe kova so dobinela pe preku e Devleskiri sila“
O APOSTOL Pavle pottikningja e hristijanen ko Efes akale lafencar: „Mangipaja trpinen tumen jekh jekhea hem iskreno trudinen tumen te ikeren o jekhipe kova so dobinela pe preku e Devleskiri sila“ (Ef. 4:2, 3).
O jekhipe so postojnela maškar amende tano plodi so avela tari „e Devleskiri sila“. Akava značinela kaj isi jekhipe adaleske so o Devel dela pli sila. Sepak, sar so vakergja o Pavle amaro jekhipe valjani te ikerel pe. Koj valjani te ikerel le? Ustvari sekova hristijani mora te del plo dela te šaj te ikerel pe „o jekhipe kova so dobinela pe preku e Devleskiri sila“.
Te vakera jekh primer. Zamislin tuke kaj nekoj pokloninela tuke nevo vrda. Koj tano odgovorno bašo vrda te ačhol ki šukar sostojba? O odgovor tano jasno. Našti te vakere kaj tano krivo okova so dengja tut o vrda ako ov rumingjola adaleske so tu na održingjan le.
Slično, iako amaro hristijansko jekhipe tano poklon taro Devel, sekole jekhe amendar isi le odgovornost te arakhel adava jekhipe. Ako na siem ko šukar odnosija nesave phralea ili phenjaja, tegani valjani te puča amen: „Dali dava mlo delo te šaj te ikerel pe o jekhipe ko sobranie?“
„ISKRENO TRUDINEN TUMEN TE IKEREN O JEKHIPE“
Sar so spomningja o apostol Pavle, ponekogaš šaj ka valjani te trudina amen but te šaj te ikera o jekhipe kova so dobinela pe preku e Devleskiri sila. Akava posebno šaj te slučinel pe ako nesavo phral ili phen povredinela amen. Te šaj te ikera o jekhipe dali ka valjani sekova puti te kera lafi bašo problemi adalea so povredingja amen? Na! Puč tut: „Ako kerava adava dali i situacija ka ovel pošukar ili samo ka kerav te ovel pološno?“ Ponekogaš šaj ka ovel pošukar te prostina hem te bistra adava (Izr. 19:11; Mar. 11:25).
Puč tut: „Ako kerava adava dali i situacija ka ovel pošukar ili samo ka kerav te ovel pološno?“
Sar so vakergja o apostol Pavle, valjani mangipaja te trpina amen jekh jekhea (Ef. 4:2). Ko jekh lil pišinela kaj akava šaj te prevedinel pe hem sar „te prifatina e javeren agjaar sar soj tane“. Adava značinela kaj valjani te prifatina kaj amare phralja hem phenja kerena greške isto sar amen. Džangjola pe, amen trudinaja amen te urava „i nevi ličnost“ (Ef. 4:23, 24). Ama, nikoj našti adava te kerel sovršeno (Rim. 3:23). Ako prifatinaja akava ka ovel amenge polokho te trpina amen jekh jekhea, te prostina amenge hem adalea te ikera „o jekhipe kova so dobinela pe preku e Devleskiri sila“.
Ako prostinaja hem bistraja o bukja kolencar so nekoj povredingja amen, ka ikera o mir kova so povrzinela amen ko sobranie. O grčko lafi soj prevedimo sar „oven ko mir jekh jekhea“ ko Efešanja 4:3 doslovno značinela „ligamentija“. O isto grčko lafi ko Kološanja 2:19 ki fusnota tano prevedimo sar „ligamentija“. O ligamentija tane zorale žile ko telo kola so povrzinena o kokala maškar peste. Slično, o mir ama hem o mangipe sprema amare phralja, pomožinena amenge te ačhova paše lencar iako isi razlike maškar amende.
Sprema adava, ako nesavo phral povredinela tut, voznemirinela tut ili nervirinela tut, trudin tut te haljove le, a na te kritikujne le (Kol. 3:12). Adaleske so sa o manuša tane nesovršena, verojatno tu da povredingjan nekas. Ako na bistrea akava, ka ovel tuke polokho te de tlo delo te šaj te ikerel pe „o jekhipe kova so dobinela pe preku e Devleskiri sila“.