AČHOVEN DŽANGAVDE!
I vojna ki Ukraina kerela te ovel pobaro bokhalipe ko sveto
Ko 19 maj 2022 berš, o Sovet baši bezbednost ko Obedineta nacie dobingja izveštaj taro poviše taro 75 funkcionerija soj ki bari položba kaj „i pandemija taro KOVID-19 hem o klimatska promene više kergje te ovel kriza baši hrana, ama i vojna ki Ukraina kergja adaja kriza te ovel panda pobari hem adaleske isi rizik ko nesave thana te ovel bokhalipe“. Kratko palo adava, ko spisanie The Economist pišinela sine kaj ko sveto, kote so više isi but problemija, i vojna ka kerel panda poviše manuša te oven bokhale. I Biblija angleder vakergja kaj ka ovel asavki kriza ko amaro vreme, ama isto agjaar pomožinela amenge te ikljova ko krajo laja.
I Biblija angleder vakergja kaj ka ovel bokhalipe
O Isus vakergja: „Ka uštel narodo protiv narodo, hem carstvo protiv carstvo, hem ka ovel bokhalipe“ (Matej 24:7).
O biblisko lil Otkrovenie kerela lafi bašo štar simbolična javačija ko grasta. Jekh lendar pretstavinela i vojna. Pali leste avela javer javači kova so pretstavinela o bokhalipe — vreme keda nane te ovel dovolno hajbaske hem i hrana ka ovel but skupo. Ko Otkrovenie 6:5, 6 pišinela: „Dikhljum jekh kalo gras hem leskere javače sine le vaga ko vas. Šungjum jekh glaso sar vakerela: ’Pohari taro jekh kilo giv koštinela celo diveskiri plata. Pohari taro trin kile jačmen koštinela celo diveskiri plata‘“.
Adava so vakergja i Biblija bašo bokhalipe ispolninela pe ko amaro vreme kova so i Biblija vikinela le „o posledna dive“ (2. Timotej 3:1). Ako mangea te doznajne poviše bašo „posledna dive“ hem bašo štar javačija taro Otkrovenie, dikh o videoklipi O sveto meningja pe taro 1914 berš hem čitin i statija „Što pretstavuvaat četirite javači?“
Sar šaj i Biblija te pomožinel tuke?
Ki Biblija isi praktična sovetija so šaj te pomožinen amenge te ikljova ko krajo phare situaciencar, sar na primer keda bajrona o cene baši hrana hem keda isi kriza baši hrana. Asavke sovetija šaj te arakhe ki statija „Kako da rakovodiš so parite“.
I Biblija isto agjaar dela nadež kaj o uslovija ki phuv ka oven pošukar. Oj vetinela kaj ka avel vreme keda „ki phuv o giv but ka bijanel“ hem sarinen ka ovel len but hajbaske (Psalm 72:16). Ako mangea te doznajne poviše bašo adava savi nadež dela i Biblija hem soske šaj te verujne ki late, čitin i statija „Patot do srekjata — nadež“.