83 LEKCIJA
O Isus parvargja bute manušen
Kratko angleder i Pasha ko 32 berš a.e., o apostolija irangje pe taro propovedibe. O Isus dikhlja kaj tane umorna, uklilo lencar ko čamco, hem zaedno cidingje ki Vitsaida te šaj te odmorinen pe. Ama, keda ale uzo brego, o Isus dikhlja kaj but manuša ale adathe hem adžikerena le. Iako manglja te ovel korkori e apostolencar, ov sine ljubezno e manušencar. Sasljargja sarinen so sine nasvale hem počmingja te sikavel len. Celo dive vakerela lenge sine bašo e Devleskoro Carstvo. Angleder te rakjol, o apostolija ale ko Isus hem vakergje leske: „O manuša sigurno tane bokhale. Bičhal len te džan te kinen peske nešto hajbaske“.
O Isus vakergja: „Na valjani te džan. Den len nešto akate te han“. O apostolija pučle le: „Mangea te dža hem te kina lenge maro?“ O Filip, jekh taro apostolija, vakergja: „Ama, čak te ovel amen but pare, palem ka našti te kina dovolno maro sarinenge“.
O Isus pučlja len: „Kobor isi tumen hajbaske?“ O Andrej vakergja: „Isi amen pandž mare hem duj tikne mačhe“. Ama, adava nane dovolno bašo sa akala manuša. O Isus vakergja: „Anen mange o mare hem o mačhe“. Palo adava, vakergja e manušenge te bešen ki čar ko grupe po 50 hem po 100 džene. O Isus lelja o mare hem o mačhe, dikhlja ko nebo hem molingja pe. Palo adava, dengja o hajbe e apostolenge, a ola delinena le sine e manušenge. O 5.000 murša, hem sa o džuvlja hem o čhave, hale sa džikote na čalile. Ko krajo, o apostolija khedingje o hajbe so ačhilo te šaj ništo te na frdel pe. Phergje 12 korpe hajbaja. Adava sine čače baro čudo, neli?
O manuša sine doborom vooduševime so mangle te čhiven e Isuse te ovel lengoro cari. Ama, o Isus džanlja kaj panda na alo o vreme so o Jehova odredingja le te ovel cari. Adaleske, vakergja e manušenge te džan peske, a e apostolen bičhalgja len te džan tari javer strana taro Galilejsko More. Otkeda o apostolija uklile ko čamco, o Isus gelo korkori ki planina. Soske? Soske manglja te odvojnel vreme te molinel pe ple Dadeske. Bizi razlika kobor te ovel sine zafatimo, o Isus sekogaš odvojnela sine vreme te molinel pe.
„Ma keren ti bašo hajbe kova so rumingjovela, nego bašo hajbe so na rumingjovela, hem anela večno životo, kova so ka del tumen o manušikano Čhavo“ (Jovan 6:27)