O Isus phirgja upro pani

O Isus šaj sine te sasljarel nasvalen hem te voskresninel e mulen, ama isto agjaar sine le mokj upri balval hem upro bršim. Otkeda molingja pe ki planina, o Isus dikhlja tele ko Galilejsko More hem dikhlja kaj isi nevreme. O apostolija sine ko čamco hem mučinena pe sine e nevremea. O Isus hulilo tele hem počmingja te phirel upro pani te džal ki lende. Keda o apostolija dikhle kaj nekoj phirela upro pani, but darandile. Ama, o Isus vakergja lenge: „Ma daran, me sium!“

O Petar vakergja: „Gospodaru, ako sian čače tu, naredin mange te avav ki tute“. O Isus vakergja leske: „Ava ki mande!“ Agjaar, ko adava nevreme, o Petar iklilo taro čamco hem počmingja te phirel upro pani te džal ko Isus. Ama, keda alo paše uzi leste, dikhlja o bare branija hem darandilo hem počmingja te toninel ko pani. Tegani vikingja: „Gospodaru, spasin ma!“ O Isus astargja le taro vas hem vakergja leske: „Soske darandiljan? Nane tut li vera?“

O Isus hem o Petar uklile ko čamco, hem odma o nevreme ačhilo. Šaj li te zamisline tuke sar osetinena pe sine o apostolija? Ola vakergje e Isuseske: „Tu čače sian e Devleskoro Čhavo“.

Akava na sine prvo puti o Isus te kontrolirinel o vreme. Jekh puti, keda o Isus hem o apostolija džana sine e čamcoja tari javer strana taro more, ov zasukja ko čamco. Taro jekh puti ulo baro nevreme. O branija khuvena sine ko čamco, hem počmingja te phergjol pani. O apostolija vikindor uštargje e Isuse, hem vakergje leske: „Učitele, ka mera! Pomožin amenge!“ O Isus uštilo hem vakergja e moreske: „Smirin tu!“ Ko adava momenti, i balval hem o more smiringje pe. O Isus vakergja e apostolenge: „Kaj tani tumari vera?“ Ola počmingje maškar peste te vakeren: „Čak i balval hem o more šunena le“. O apostolija siklile kaj, ako isi len celosno doverba ko Isus, na valjani te daran taro ništo.