E Isuseskiri posledno Pasha

O Evreija sekova berš slavinena sine i Pasha ko 14 dive taro masek nisan. Adava kerena le sine te šaj te setinen pe kaj o Jehova oslobodingja len taro ropstvo ko Egipet hem ingargja len ki Vetimi phuv. Ko 33 berš a.e., o Isus hem leskere apostolija slavingje i Pasha ki upruni soba ko jekh kher ko Erusalim. Ko krajo tari večera, o Isus vakergja: „Jekh tumendar ka predajnel man“. O apostolija but iznenadingje pe hem pučle le: „A koj ka ovel adava?“ O Isus odgovoringja lenge: „Okova kaske so ka dav akava maro“. Tegani dengja o maro e Juda Iskarioteske. Odma palo adava, o Juda uštilo hem iklilo tari soba.

Palo adava o Isus molingja pe, phaglja o maro hem dengja le ple apostolenge so ačhile lea. Tegani vakergja lenge: „Han taro akava maro. Ov pretstavinela mlo telo, kova so ka dav le baši tumende“. Palo adava lelja mol, molingja pe hem dengja la e apostolenge. O Isus vakergja lenge: „Pien tari akaja mol. Adava pretstavinela mlo rat so ka dav le te šaj te oven prostime o grevija e manušengere. Vetinava tumenge kaj ka oven carija mancar ko nebo. Keren akava sekova berš te šaj te setinen tumen ki mande“. O sledbenikija e Isuseskere kerena akava sekova berš ki isto rat. Adava sostanok akana vikinela pe e Gospodareskiri večera.

Otkeda završingja i večera, o apostolija počmingje te akošen pe koj tano lendar najbaro. Ama, o Isus vakergja: „Najbaro tumendar tano adava so ki peste dikhela sar najtikno, sar najhari važno.

Tumen sien mle amala. Vakerava tumenge sa so mangela mlo Dad te vakerav tumenge. Panda hari ka džav ki leste ko nebo. Tumen ka ačhoven, hem o manuša ka džanen kaj sien mle učenikija keda ka dikhen kaj mangena tumen jekh jekhea. Mangen tumen sar me so mangljum tumen“.

Ko krajo, o Isus molingja pe hem rodingja taro Jehova te arakhel sa leskere učenikon. Molingja e Jehova te pomožinel len te šaj te keren o bukja zaedno hem ko mir. Isto agjaar, molingja pe te slavinel pe e Devleskoro sveto anav. Palo adava, o Isus hem o apostolija giljavgje falbena gilja e Jehovaske hem iklile avri. Pohari avela sine o vreme te astaren e Isuse.