Ponadari da propovedin taro mangipe!

1. So šungjem ko e beršeskoro sostanok bašo 2023 berš?

KO E BERŠESKORO sostanok bašo 2023 berš,a dobingjem važna pojasnuvanja bašo nesave taro amare veruvanja hem šungjem nesave interesna izvestuvanja baši amari služba. Na primer, doznajngjem kaj nesave manušen šaj ka ovel len prilika te oven delo taro e Jehovaskoro narodo čak otkeda ka ovel uništimo o Baro Vavilon. Isto agjaar doznajngjem kaj počmindor taro noemvri 2023 berš, nane više te valjanel te da izveštaj bašo sa adava so keraja ki služba. Dali akala promene sikavena kaj amari služba nane više doborom važno, sar so sine angleder? Sigurno kaj na!

2. Soske amari služba sekova dive ovela sa poitno? (Marko 13:10).

² Sar so nakhela sekova dive, amari služba ovela sa poitno. Soske? Adaleske so ačhilo amen panda hari vreme angleder o krajo. Razmislin so prorokujngja o Isus bašo propovedibe ko posledna dive. (Čitin Marko 13:10.) Sprema o paralelno izveštaj taro Matej, o Isus vakergja kaj o šukar haberi ka propovedinel pe ko celo sveto angleder te avel o „krajo“ (Mat. 24:14). Akale lafea mislinela pe ko celosno krajo e Satanaskere svetoske. O Jehova odredingja „dive hem saati“ bašo bukja so panda hari ka slučinen pe (Mat. 24:36; 25:13; Apo. 1:7). Sekova dive amen siem sa popaše ko adava vreme (Rim. 13:11). Ama dži tegani amen mora ponadari da te propovedina sa džikote na avela o krajo.

3. So pottikninela amen te propovedina?

³ Keda kerela pe lafi baši amari služba, šukar tano te razmislina bašo akava pučibe: Soske propovedinaja o šukar haberi? Adaleske so isi amen mangipe. Keda propovedinaja, amen sikavaja amaro mangipe — mangipe sprema o šukar haberi, sprema o manuša hem najvažno, sprema o Jehova hem leskoro anav. Te dikha akala bukja jekh po jekh.

PROPOVEDINAJA SOSKE MANGAJA O ŠUKAR HABERI

4. So keraja keda šunaja nesavo šukar haberi?

⁴ Setinea li tut sar osetingjan tut keda šungjan nesavo šukar haberi? Šaj nekoj tari tli familija dobingja čhavo ili šaj khuvgjan ki buti baš keda najviše valjangja tuke? Sigurno edvaj adžikergjan te vakere adava šukar haberi te familijake hem te amalenge. Dali nešto slično slučingja pe tuke keda šungjan o najšukar haberi so postojnela — o šukar haberi bašo e Devleskoro Carstvo?

5. Sar osetingjan tut keda prvo puti šungjan o čačipe taro e Devleskoro Lafi? (Dikh hem o slike.)

⁵ Setin tut sar osetingjan tut keda prvo puti šungjan o čačipe taro e Devleskoro Lafi. Doznajngjan kaj tlo nebesno Dad mangela tut, kaj ov mangela te ove delo tari leskiri familija, kaj vetinela životo bizi dukh hem bizo mukhe, kaj šaj te ovel tut nadež kaj ka dikhe palem tle manglen so mule keda ka voskresninen ko nevo sveto hem panda but javera bukja (Mar. 10:29, 30; Jovan 5:28, 29; Rim. 8:38, 39; Otk. 21:3, 4). Akala čačipa kergje tut but radosno (Luka 24:32). Doborom but zamangljan len so našti ikergjan len samo ki tute nego mangljan te vakere len sarinenge! (Sporedin Eremija 20:9.)

6. So sikljovea taro Ernest hem tari Roza?

⁶ Razmislin bašo akava iskustvo. Jekh phral so vikinela pe Ernestb sine le okolu deš berš keda o dad leskoro mulo. O Ernest vakerela: „Pučava man sine, dali tano ko nebo? Dali na postojnela više? Ljubomorno sium sine e čhavenge so sine len dad“. O Ernest beršencar džala sine ko grobija, bešela sine ko kočaka anglo ple dadeskoro grobo hem molinela pe sine: „Devla molinava tut, vaker mange kaj tano mo dad“. Okolu 17 berš otkeda mulo leskoro dad, počmingja te proučinel i Biblija. Ov sine vooduševimo keda doznajngja kaj o mule nane svesna bašo ništo, sar te phene hor sovena hem kaj i Biblija vetinela kaj ka ovel voskresenie (Prop. 9:5, 10; Apo. 24:15). Konečno, ov arakhlja o odgovorija ko pučiba kola so doborom but vreme mučinena le sine! O Ernest sine but srekjno bašo čačipa so doznajnela len sine tari Biblija. Leskiri romni i Roza, isto agjaar počmingja te proučinel i Biblija hem zamanglja o haberi bašo Carstvo. Ola krstingje pe ko 1978 berš. Ola revno propovedinena sine pumare familijake, amalenge hem javerenge bašo skapocena čačipa so siklile len. Adaleske ola šaj sine te pomožinen poviše taro 70 manušenge te zapoznajnen e Jehova hem te krstinen pe.

7. So slučinela pe keda ko amaro vilo ka bajrol mangipe bašo biblisko čačipe? (Luka 6:45).

⁷ Jasno tano kaj keda ko amaro vilo ka bajrol mangipe bašo biblisko čačipe, tegani amen našti te čutina. (Čitin Luka 6:45.) Osetinaja amen isto sar e Isuseskere učenikija taro prvo veko kola so vakergje: „Amen našti te na kera lafi bašo adava so dikhlem hem šungjem“ (Apo. 4:20). Isi amen doborom baro mangipe bašo čačipe so mangaja te vakera le so šaj poviše manušenge.

PROPOVEDINAJA SOSKE MANGAJA E MANUŠEN

8. So pottikninela amen te vakera e javerenge o šukar haberi? (Dikh i ramka „Mang e manušen — ker učenikija“.) (Dikh hem i slika.)

⁸ Isto sar o Jehova hem leskoro Čhavo, amen da mangaja e manušen (Izr. 8:31; Jovan 3:16). Isi amen baro sočuvstvo okolenge soj „bizo Devel“ hem „bizi nadež“ (Ef. 2:12). Ola tasavgjovena ko problemija e životoskere, a amen isi amen o pojas spasibaske so valjani lenge — o šukar haberi bašo e Devleskoro Carstvo. Adaleske so mangaja len hem isi amen sočuvstvo sprema lende, pottiknime siem te da amendar sa te šaj te vakera lenge o šukar haberi. Akava skapoceno haberi šaj te del len nadež, te pomožinel lenge panda avdive te ovel len šužo životo hem te del len prilika te dobinen o „čačutno životo“ — večno životo ko e Devleskoro nevo sveto (1. Tim. 6:19).

9. Bašo so predupredinaja e manušen, hem soske? (Ezekiel 33:7, 8).

⁹ Amaro mangipe bašo manuša isto agjaar pottikninela amen te vakera lenge kaj o krajo akale lošno svetoskoro tano paše. (Čitin Ezekiel 33:7, 8.) Amenge tano žal bašo sa o manuša maškar kolende soj okola tari amari familija kola so na služinena e Jehovaske. But džene živinena pumaro životo bizo te oven svesna bašo adava so adžikerela amen — bari nevolja savi so na sine taro početok e svetoskoro dži akana, a ni nane te ovel više (Mat. 24:21). Amen mangaja ola te džanen so ka slučinel pe ko vreme keda o Jehova ka sudinel. Prvo ka ovel uništimi i hovavni religija, a palo adava ko Armagedon ka ovel uništimo akava lošno sveto (Otk. 16:14, 16; 17:16, 17; 19:11, 19, 20). Amen molinaja amen so šaj poviše manuša te šunen adava so vakeraja lenge hem te odlučinen te služinen e Jehovaske zaedno amencar panda avdive. Ama, sar tano okolencar kola so ko momenti na šunena akava predupreduvanje maškar kolende soj hem amari familija kolen so but mangaja len?

10. Soske tano važno ponadari da te predupredina e manušen?

¹⁰ Sar so sine objasnimo ki angluni statija, o Jehova šaj ka mangel te spasinel nesaven kola so ka počminen te verujnen ki leste keda ka dikhen kaj o Baro Vavilon tano uništimo. Ako tano adava agjaar, tegani tano panda považno ponadari da te vakera lenge akava predupreduvanje akana. Razmislin bašo akava: Adava so vakeraja lenge akana šaj te del len nešto ko so ka setinen pe tegani. (Sporedin Ezekiel 33:33.) Ola šaj ka setinen pe ko predupreduvanja so vakergjem lenge hem šaj ka oven pottiknime zaedno amencar te obožavinen e Jehova angleder te ovel kasno. Isto sar o čuvari taro zatvor ko Filipi kova so počmingja te verujnel ko Jehova čak palo „baro zemjotres“, agjaar šaj nesave kola so akana na šunena o predupreduvanje ka počminen te verujnen otkeda taro jekh puti ka ovel uništimo o Baro Vavilon (Apo. 16:25-34).

PROPOVEDINAJA SOSKE MANGAJA E JEHOVA HEM LESKORO ANAV

11. Sar daja e Jehovaske slava, čest hem mokj? (Otkrovenie 4:11; dikh hem o slike).

¹¹ I najvažno pričina soske propovedinaja o šukar haberi tano adava so mangaja e Jehova hem leskoro anav. Ki amari služba dikhaja sar način kolea so šaj te falina e Devle kole so mangaja le. (Čitin Otkrovenie 4:11.) Celo vilea soglasinaja amen kaj o Jehova zaslužinela te dobinel i slava i čest hem i mokj, taro ple verna sluge. Amen slavinaja hem daja čest e Devleske keda vakeraja e javerenge uverliva dokazija kaj ov stvoringja sa hem kaj amen postojnaja adaleske so ov dengja amen životo. Amen daja le mokj, javere lafencar daja le amari mokj keda koristinaja amaro vreme, sila hem o bukja so isi amen te šaj kobor so šaj poviše te koristina amare okolnostija te dža ki služba (Mat. 6:33; Luka 13:24; Kol. 3:23). Ednostavno, amen uživinaja te kera lafi e javerencar bašo Devel kole so mangaja le. Isto agjaar, amen sien pottiknime te kera lafi e javerencar bašo leskoro anav hem bašo adava savo Devel tano ov. Soske?

12. Sar slavinaja e Jehovaskoro anav ki služba?

¹² O mangipe sprema o Jehova pottikninela amen te slavina leskoro anav (Mat. 6:9). Akava značinela kaj amen mangaja te vakera e javerenge kaj o lošna bukja so vakergja len o Satana bašo Jehova nane točna (1. Moj. 3:1-5; Jov 2:4; Jovan 8:44). Keda propovedinaja, amen isi amen bari želba te vakera sarinenge so šunena amen koj tano o Jehova hem savo čače tano. Mangaja sarine te džanen kaj leskiri najbari osobina tano o mangipe, kaj leskoro način sar vladinela tano pravedno hem ispravno hem kaj leskoro Carstvo panda hari ka anel krajo e mukenge hem kaj ka anel mir hem radost sa e manušenge (Ps. 37:10, 11, 29; 1. Jov. 4:8). Keda vakeraja akala bukja e manušenge bašo Jehova amen slavinaja leskoro anav. Isto agjaar, amen siem radosna adaleske so džanaja kaj keraja adava so valjani te kera sar e Jehovaskere svedokija. Soske vakeraja adava?

13. Soske tani bari čest amenge so siem vikime e Jehovaskere svedokija? (Isaija 43:10-12).

¹³ O Jehova biringja amen te ova leskere „svedokija“. (Čitin Isaija 43:10-12.) Angleder nekobor berša, ko jekh pismo taro Vodečko telo pišinela sine: „Najbari čest so šaj nekas te ovel le tani te ovel vikimo e Jehovaskoro svedoko“.c Soske vakeraja akava? Razmislin baši akaja sporedba. Zamislin tuke kaj vakerena kaj kergjan nešto pogrešno. Adaleske, ka valjani tuke nekoj so ka vakerel e javerenge kaj adava nane točno hem kaj tu sian šukar manuš kova so nikogaš na bi kerela nešto asavko. Kas bi birinea te ovel tuke svedoko? Sigurno, nekas so džanea hem kaste so isi tut doverba hem kas so isi šukar anav anglo javera te šaj te verujnen leske. Adava so o Jehova biringja amen te ova leskere Svedokija, sikavela kaj ov šukar pendžarela amen hem kaj isi le doverba ki amende kaj ka svedočina kaj ov tano o edinstveno čačutno Devel. Amenge tani doborom bari čest te ova leskere Svedokija so koristinaja sekoja prilika te šaj te vakera e javerenge bašo leskoro anav hem te vakera kaj sa o hovajba so sine vakerde baši leste nane točna. Agjaar, živinaja ko sklad e anavea kova so gordo phiravaja le — e Jehovaskere svedokija (Ps. 83:18; Rim. 10:13-15).

PONADARI DA KA PROPOVEDINA SA DŽI KO KRAJO

14. Save interesna nastanija adžikerena amen?

¹⁴ Adžikerena amen but interesna nastanija! Adaleske so o Jehova dela plo blagoslov, nadinaja amen kaj panda but javera manuša ka prifatinen o čačipe angleder te počminel i bari nevolja. Isto agjaar, vooduševinela amen adava so džanaja kaj čak hem ko najpharo periodi tari manušikani istorija — džikote trajnela i bari nevolja — šaj ka dikha sar javera da ikljovena taro sveto e Satanaskoro hem počminena zaedno amencar te slavinen e Jehova (Apo. 13:48).

15-16. So ka kera ponadari da, hem dži keda?

¹⁵ Ama, džikote avela adava vreme amen isi amen jekh važno zadača te kera — zadača koja so nikogaš palem nane te kera la. Isi amen čest te propovedina o šukar haberi bašo e Devleskoro Carstvo ki celi phuv. A ko isto vreme, amen mora ponadari da te predupredina e manušen bašo adava so panda hari ka slučinel pe. O manuša mora te džanen kaj sigate avela o krajo akale svetoskoro. Tegani keda ka avel o vreme bašo sudo, ola ka džanen kaj o haberi so propovedingjem sine taro Devel, o Jehova (Ezek. 38:23).

¹⁶ Adaleske, so siem odlučna te kera? Pottiknime taro mangipe — mangipe sprema o šukar haberi, sprema o manuša hem najvažno, sprema o Jehova hem leskoro anav — amen ponadari da ka propovedina revno hem itno, sa džikote o Jehova na vakerela: „Dovolno tano!“