Ov revno ki služba isto sar o Isus

1. Koja tani jekh buti ki koja so e Jehovaskere sluge razlikujnena pe taro okola so vakerena kaj tane hristijanja?

JEKH buti ki koja so e Jehovaskere sluge razlikujnena pe taro okola so vakerena kaj tane hristijanja tani lengiri revnosta ki služba (Tit 2:14). Ama, ponekogaš šaj na mangea doborom but te dža ki služba. Šaj osetinea tut sar jekh vredno starešina kova so priznajngja: „Nekogaš ednostavno na mangava te propovedinav“.

2. Soske ponekogaš amenge pharo te ačhova revna ki služba?

² Šaj poviše mangaja te učestvujna ko javera vrste sveto služba, nego ko propovedibe. Soske? Keda učestvujnaja ki gradba hem ko održibe o teokratska objektija, pomožinaja keda isi prirodna katastrofe ili ohrabrinaja amare phralen, šaj sigate te dikha o rezultatija hem osetinaja amen kaj uspejngjem nešto. Keda sorabotinaja amare phralencar, osetinaja o mir hem o mangipe so isi maškar amende hem džanaja kaj ola ceninena adava so keraja baši lende. Tari javer strana, šaj beršencar propovedinaja ko isto podračje hem na dikhaja nesave bare rezultatija. Šaj čak arakhaja manušen kola so but lošno reagirinena ko haberi so ingaraja le. Isto agjaar, džanaja kaj sar so avela o krajo popaše, šaj te očekujna panda pobaro protivibe (Mat. 10:22). So šaj te pomožinel amenge te na našava, pa čak te bajrara amari revnost baši služba?

3. So sikljovaja baši revnost tari e Isuseskiri sporedba soj pišimi ko Luka 13:6-9?

³ Taro e Isuseskoro primer šaj te sikljova so ka pomožinel amenge te ova revna ki služba. Džikote kerela sine pli služba, leskiri revnost nikogaš na tiknili. Ustvari, sar so nakhela sine o vreme, ov ovela sine poaktivno. (Čitin Luka 13:6-9.) Isto sar o manuš kole so sine le niva drakhencar hem kova so trin berš grižingja pe e smokvake a na dengja nisavo plodi, o Isus okolu trin berš propovedingja e Evreenge kolendar so poviše džene na ule leskere učenikija. Ama, isto sar adava manuš so na otkažingja pe tari smokva, agjaar o Isus da na otkažingja pe taro manuša hem na čhinavgja te propovedinel. Namesto adava, panda poviše trudingja pe te šaj te resel dži ko lengoro vilo.

4. Kola štar bukja taro e Isuseskoro primer ka dikha?

⁴ Ki akaja statija ka dikha sar o Isus sikavgja revnost, posebno ko posledna šov masek tari leskiri služba. Ako sikljovaja taro adava bašo so ov sikavgja hem taro adava so kergja, amen da ka šaj te ačhova revna. Te dikha akala štar bukja kola so šaj te sikljova len lestar: 1) e Isuseske sine najvažno te kerel e Jehovaskiri volja, 2) sine le ki godi o bibliska proroštvija, 3) sine le doverba kaj o Jehova ka pomožinel le hem 4) ačhilo pozitivno hem nadinela pe sine kaj sepak nesave ka šunen.

NAJVAŽNO SINE LESKE E JEHOVASKIRI VOLJA

5. Sar o Isus sikavgja kaj leske najvažno te kerel pe e Devleskiri volja?

⁵ O Isus revno propovedinela sine „o šukar haberi bašo e Devleskoro Carstvo“ adaleske so džanela sine kaj o Devel mangela te kerel adava (Luka 4:43). E Isuseske o propovedibe o šukar haberi sine i najvažno buti ko životo. Čak hem ko krajo tari leskiri služba, ov „nakhela sine taro dizja hem taro gava hem sikavela sine e manušen“ (Luka 13:22). Isto agjaar, obučinela sine javeren da te propovedinen o šukar haberi (Luka 10:1).

6. Sar o propovedibe tano povrzimo javere zadačencar kola so šaj isi amen? (Dikh hem i slika.)

⁶ Avdive da o propovedibe o šukar haberi tani i najvažno zadača koja so o Jehova hem o Isus mangena te kera la (Mat. 24:14; 28:19, 20). Sekoja zadača so isi amen ki e Jehovaskiri organizacija tani direktno povrzimi e propovedibaja. Na primer, adalea so učestvujnaja ko gradibe teokratska objektija ili služinaja ko Betel, pomožinaja te oven učharde o potrebe ko podračje. Keda isi prirodna katastrofe amen daja amendar sa te šaj amare phralen hem phenjen te oven len o bukja so valjani lenge te šaj te prodolžinen pumare duhovna aktivnostencar, maškar kolende soj o sostanokija hem o propovedibe. Ako haljovaja kobor tano važno o propovedibe hem ako na bistraja kaj adaja tani i najvažno buti koja so o Jehova mangela te kera la, ka ova pottiknime redovno te učestvujna ki služba. O Janoš, jekh starešina ki Ungarija vakerela: „Setinkerava man kaj nijekh teokratsko zadača našti te zameninel o propovedibe, adaja tani amari glavno zadača“.

7. Soske o Jehova mangela ponadari da te propovedina? (1. Timotej 2:3, 4).

⁷ Šaj te ova porevna ki služba ako dikhaja ko manuša agjaar sar so dikhela o Jehova. Ov mangela so šaj poviše manuša te šunen o šukar haberi hem te prifatinen le. (Čitin 1. Timotej 2:3, 4.) Adaleske, o Jehova obučinela amen te šaj pošukar te vakera e javerenge akava haberi so spasinela životija. Na primer, ki brošura Mang e manušen — ker učenikija isi praktična predlogija bašo adava sar te počmina te kera lafi e manušencar te šaj te pomožina lenge te oven e Isuseskere učenikija. Čak hem te na prifatinen o haberi akana, šaj ka ovel len prilika te keren adava angleder te završinel i bari nevolja. Adava so ka vakera lenge panda akana šaj ka pottikninel len te počminen te služinen e Jehovaske ki idnina. Ama, adava šaj te slučinel pe ako samo ponadari da propovedinaja.

SINE LE KI GODI O BIBLISKA PROROŠTVIJA

8. Sar adava so o Isus džanlja o bibliska proroštvija vlijajngja upro adava sar koristingja plo vreme?

⁸ O Isus halilo sar ka ispolninen pe nesave bibliska proroštvija. Ov džanlja kaj leskiri služba ka trajnel samo trin tekvaš berš (Dan. 9:26, 27). Isto agjaar, džanlja so sine prorokujmo bašo adava keda hem sar ka merel (Luka 18:31-34). Adaleske so džanlja sa akava, o Isus koristingja plo vreme najšukar so šaj, agjaar so revno propovedingja te šaj te završinel i buti koja so sine leske dendi.

9. Soske adava so haljovaja o bibliska proroštvija pottikninela amen revno te propovedina?

⁹ Adava so haljovaja o bibliska proroštvija šaj te pottikninen amen revno te propovedina. Džanaja kaj akale svetoske ačhola panda hari vreme. Dikhaja kaj adava so slučinela pe avdive hem o stavija e manušengere sikavena kaj ispolninela pe adava so prorokujngja i Biblija bašo posledna dive. Primetinaja sar o konflikt maškar i anglo-amerikansko svetsko sila hem i Rusija ple sojuznikoncar ispolninela o proroštvo bašo cari taro jug hem o cari taro sever „ko vreme e krajoskoro“ (Dan. 11:40). Isto agjaar, haljovaja kaj i anglo-amerikansko svetsko sila tani pretstavimi e prencar taro kipi kova soj opišimo ko Daniel 2:43-45. Uverime siem kaj, sar so sikavela o proroštvo, panda hari — panda but hari — e Devleskoro Carstvo ka uništinel e manušikane vladen. Sa akala proroštvija sikavena kaj živinaja but paše ko krajo hem adaleske mora te koristina amaro vreme najšukar so šaj te propovedina o šukar haberi.

10. Ko kola javera načinija o bibliska proroštvija šaj te bajraren amari revnost?

¹⁰ Ko bibliska proroštvija isto agjaar isi haberi kova so celo dušaja mangaja te vakera le e javerenge. I Keri, jekh phen koja so služinela ki Dominikansko Republika, vakerela: „E Jehovaskere but šuže vetuvanja kaj ka ovel pošukar idnina pottikninela man te vakerav e javerenge o čačipe“. Oj isto agjaar vakerela: „Keda dikhava save problemija isi e manušen avdive, haljovava kaj ola da valjani te džanen akala vetuvanja“. O bibliska proroštvija pottikninena amen ponadari da te propovedina adaleske so džanaja kaj o Jehova tergjola pali akaja aktivnost. I Lejla, koja so živinela ki Ungarija, vakerela: „O Isaija 11:6-9 pottikninela man te vakerav o šukar haberi čak adalenge kolenge so mislinava kaj nane te prifatinen. Džanava kaj sekova jekh šaj te meninel pe adaleske so o Jehova pomožinela“. A o Kristofer, jekh phral tari Zambija, vakerela: „Sar soj prorokujmo ko Marko 13:10, o šukar haberi širinela pe ko celo sveto hem mange tani bari čest so šaj te pomožinav te ispolninel pe akava proroštvo“. Kola bibliska proroštvija pottikninena tut ponadari da te propovedine?

SINE LE DOVERBA KAJ O JEHOVA KA POMOŽINEL LESKE

11. Soske valjangja e Isuse te ovel le doverba ko Jehova kaj ka pomožinel leske te šaj ponadari da revno te propovedinel? (Luka 12:49, 53).

¹¹ Te šaj ponadari da revno te propovedinel, e Isuse sine le doverba kaj o Jehova ka pomožinel le. Iako sine taktično, o Isus džanlja kaj o šukar haberi bašo Carstvo ka anel bare raspravie hem kaj ka anel dži ko baro protivibe. (Čitin Luka 12:49, 53.) Adaleske so o Isus propovedinela sine, o verska vodačija poviše puti probingje te mudaren le (Jovan 8:59; 10:31, 39). Ama, ov na čhinavgja te propovedinel soske džanlja kaj o Jehova tano lea. O Isus vakergja: „Me na sium korkori, o Dad kova so bičhalgja man tano mancar... Na mukhlja man korkori, soske me sekogaš kerava adava soj sprema leskiri volja“ (Jovan 8:16, 29).

12. Sar o Isus spremingja ple učenikon ponadari da te propovedinen, čak keda ka ovel len protivibe?

¹² O Isus setinkergja ple učenikon kaj šaj te ovel len doverba kaj o Jehova ka pomožinel len. Ov sekogaš uverinela len sine kaj o Jehova ka pomožinel len, čak keda ka ovel len progonstvo (Mat. 10:18-20; Luka 12:11, 12). Adaleske so džanlja kaj ka protivinen pe lenge, ov pottikningja len te pazinen (Mat. 10:16; Luka 10:3). Sikavgja len kaj, ako o manuša na mangena te šunen, ma te čhiven len silaja ko adava (Luka 10:10, 11). Hem vakergja lenge ako ovena progonime te našen ko javer than (Mat. 10:23). Iako sine revno hem sine le doverba ko Jehova, o Isus na čhivgja pe ki opasnost bizi potreba (Jovan 11:53, 54).

13. Soske šaj te ove sigurno kaj o Jehova ka pomožinel tuke?

¹³ Amenge da valjani e Jehovaskiri pomoš te šaj ponadari da revno te propovedina, čak keda ka protivinen pe amenge (Otk. 12:17). Soske šaj te ove sigurno kaj o Jehova ka poddržinel tut? Razmislin baši e Isuseskiri molitva koja soj pišimi ko Jovan 17 poglavje. O Isus rodingja taro Jehova te arakhel e apostolen, a o Jehova odgovoringja ki akaja molitva. Ko lil Apostolija kerela pe lafi bašo adava sar o Jehova pomožingja e apostolenge revno te propovedinen iako sine len progonstvo. Isto agjaar, o Isus molingja e Jehova te arakhel hem okolen kola so ka sikaven sine vera ko haberi kova so o apostolija propovedinena le sine. Tu da sian jekh lendar. O Jehova na čhinavgja te odgovorinel ki e Isuseskiri molitva. Ov ka pomožinel tuke da isto sar so pomožingja e apostolenge (Jovan 17:11, 15, 20).

14. Kotar džanaja kaj šaj te ačhova revna ki služba? (Dikh hem i slika.)

¹⁴ Sar so avela o krajo popaše, šaj te ovel sa popharo te propovedina o šukar haberi. Ama, o Isus uverinela amen kaj ka dobina i pomoš so valjani amenge te šaj ponadari da revno te kera akaja zadača (Luka 21:12-15). Isto sar o Isus hem leskere učenikija amen mukhaja o manuša korkori te odlučinen dali ka šunen amen hem na rasprajnaja amen lencar. Čak keda amare aktivnostija tane ograničime, o phralja hem o phenja ponadari da vakerena o šukar haberi soske isi len doverba ko Jehova, a na ki pli sila. Isto sar so dela sine sila ple slugenge ko prvo veko, o Jehova dela sila amenge da avdive te šaj „celosno te propovedinel pe o šukar haberi“ sa džikote ov na vakerela kaj adava tano završimo (2. Tim. 4:17). Šaj te ove sigurno, kaj ako isi tut doverba ko Jehova, ka šaj ponadari da revno te propovedine.

AČHILO POZITIVNO

15. So sikavela kaj o Isus dikhela sine pozitivno ki služba?

¹⁵ O Isus na našavgja plo pozitivno stavi baši propovedničko aktivnost, sine uverimo kaj ka oven manuša so ka šunen o šukar haberi. Adava pomožingja leske ponadari da radosno hem spremno te propovedinel. Na primer, ko krajo taro 30 berš tari a.e., o Isus dikhlja kaj but džene tane spremna te šunen o šukar haberi hem sporedingja len nivaja koja soj zrelo baši žetva (Jovan 4:35). Otprilika, jekh berš pokasno ov vakergja ple učenikonge: „I žetva ki niva tani bari“ (Mat. 9:37, 38). Hem pokasno, ov palem vakergja: „I žetva ki niva tani bari... Molinen e Gospodare e nivakoro te bičhalel rabotnikija te khedel pe i žetva“ (Luka 10:2). O Isus sine uverimo kaj ka oven manuša kola so ka mangen te šunen o šukar haberi hem radujnela pe sine keda dikhela sine adava (Luka 10:21).

16. Savo pozitivno stavi baši služba šaj te dikha ko sporedbe so vakergja len o Isus? (Luka 13:18-21; dikh hem i slika).

¹⁶ O Isus pomožingja ple učenikonge te ačhoven revna agjaar so sikavgja len kaj o haberi so propovedinena anela bare rezultatija. Na primer, te dikha duj sporedbe kola so vakergja len. (Čitin Luka 13:18-21.) Ki jekh lendar, o Isus sporedingja o haberi bašo Carstvo jekhe tikne zrnoja taro sinap kova so ulo jekh baro kaš. Adava značinela sine kaj but manuša ka prifatinen o šukar haberi hem kaj ništo našti sine te čhinavel te slučinel pe adava. Ki dujto sporedba, ov sporedingja o haberi bašo Carstvo kvasacoja. Adalea sikavgja kaj o haberi bašo Carstvo ka širinel pe segde hem kaj ka kerel promene ko manuša kola so nane odma te dikhjon. Agjaar, o Isus pomožingja e učenikonge te dikhen kaj o haberi so propovedinena le ka pomožinel bute dženenge.

17. Kola pričine isi amen te šaj te na našava amaro pozitivno stavi baši služba?

¹⁷ Keda razmislinaja bašo adava sar i propovedničko aktivnost pomožinela bute manušenge ko celo sveto, pottiknime siem ponadari da revno te propovedina. Sekova berš, milionja manuša so interesinena pe prisustvujnena ki Spomen-svečenost hem počminena te proučinen i Biblija. But džene krstinena pe hem počminena zaedno amencar te propovedinen. Amen na džanaja panda kobor manuša ka prifatinen o šukar haberi, ama džanaja kaj o Jehova khedela jekh baro mnoštvo kova so ka preživinel i bari nevolja so ka avel panda hari (Otk. 7:9, 14). O Jehova tano o Gospodari e žetvakoro hem ov tano sigurno kaj panda but manuša ka prifatinen o šukar haberi. Adaleske, isi amen šukar pričina ponadari da te propovedina.

18. So mangaja o javera te primetinen ki amende?

¹⁸ O čačutne učenikija e Isuseskere sekogaš revno propovedinena sine o šukar haberi. Keda o manuša dikhle kobor o apostolija sine hrabra hem vooduševime džikote propovedinena sine, ola halile kaj ola sine e Isusea (Apo. 4:13). Amen da mangaja te ova hrabra hem vooduševime džikote propovedinaja o šukar haberi hem agjaar o manuša ka šaj te primetinen kaj amen da džaja palo primer e Isuseskoro.