Ov uverimo kaj o Jehova mangela tut

1. Soske odlučingjan te de lafi e Jehovaske kaj ka služine leske celo životo? (Dikh hem i slika.)

DALI setinea tut keda ki molitva dengjan lafi e Jehovaske kaj ka služine leske celo životo? Tu angjan adaja odluka adaleske so zapoznajngjan le hem zamangljan le. Dengjan le lafi kaj ko životo najvažno ka ovel tuke te služine leske hem kaj ponadari da ka mange le celo vilea, dušaja, gogjaja hem celo silaja (Marko 12:30). Ottegani pa dži akana, tlo mangipe sprema leste sa poviše bajrola. Tegani, so ka vakere ako nekoj pučela tut: „Dali sian sigurno kaj mangea e Jehova?“ Sigurno odma ka vakere: „Mangava le poviše taro bilo so javer!“

2-3. Ko so mangela o Jehova te ova uverime, hem so ka dikha ki akaja statija? (Eremija 31:3).

² Ama so ka vakere ako nekoj pučela tut: „Dali sian sigurno kaj o Jehova mangela tut?“ Dali ka ačhove hari angleder te odgovorine adaleske so šaj mislinea kaj na sian dostojno bašo e Jehovaskoro mangipe? Jekh phen koja so barili bizo mangipe, vakergja: „Džanava kaj mangava e Jehova. Ni hari na sumninava man ko adava. Ama but puti sumninava man dali o Jehova mangela man“. So šaj te pomožinel tuke te doznajne so čače osetinela o Jehova baši tuke?

³ O Jehova mangela te ove uverimo kaj ov mangela tut, ni hari te na sumnine tut ko adava. (Čitin Eremija 31:3.) Džanea kaj o Jehova privlečingja tut ki peste. Hem keda dengjan le lafi kaj ka služine leske hem krstingjan tut, dobingjan nešto but skapoceno — leskoro verno mangipe. Adava značinela kaj ov but mangela tut hem kaj nikogaš nane te mukhel tut. Asavko mangipe pottikninela le te dikhel ko ple verna sluge — maškar kolende so sian hem tu — sar pli skapoceno sopstvenost (Mal. 3:17). O Jehova mangela te ove sigurno kaj mangela tut isto sar so sine sigurno o apostol Pavle. Adaleske so sine sigurno kaj o Jehova mangela le, o Pavle pišingja: „Uverimo sium kaj ni o meribe, ni o životo, ni o angelija, ni o vlastija, ni adava soj tano akana, ni adava so ka avel, ni bilo koja sila, ni adava soj tano učo, ni adava soj tano hor ni bilo so javer soj stvorimo našti te odvojnel amen taro e Devleskoro mangipe“ (Rim. 8:38, 39). Ki akaja statija ka dikha soske tano važno te ova sigurna kaj o Jehova mangela amen hem so šaj te kera panda poviše te uverina amen ko adava.

SOSKE TANO VAŽNO TE UVERINA AMEN KAJ O JEHOVA MANGELA AMEN

4. Sar šaj te borina amen protiv jekh taro najuspešna stapice e Satanaskere?

⁴ Ako uverinaja amen kaj o Jehova mangela amen adava šaj te pomožinel amenge te borina amen protiv e Satanaskere stapice (Ef. 6:11). O Satana ka kerel sa so šaj te čhinavel amen te služina e Jehovaske. Jekh taro leskere najuspešna stapice tani te širinel hovajba kaj o Jehova na mangela amen. Ama, adava tano opasno hovajbe. I Biblija sporedinela e Satana lavea (1. Pet. 5:8, 9). O lavija napadinena e životnen keda ola tane slaba hem našti te braninen pe. Slično, o Satana but puti napadinela amen keda siem umorna, slaba ili keda siem tažna bašo nešto so slučingja pe amenge angleder, bašo nesave problemija so isi amen akana ili adaleske so na džanaja so ka ovel ki idnina (Izr. 24:10). O Satana nadinela pe kaj doborom but ka umorinel amen so ka otkažina amen taro Jehova. Ama, amen šaj te borina amen protiv o Beng hem leskere opasna taktike agjaar so ka kera sa so šaj te šaj celosno te uverina amen kaj o Jehova mangela amen (Jak. 4:7).

5. Soske tano važno te osetina kaj o Jehova mangela amen hem but ceninela amen?

⁵ Ako siem uverime kaj o Jehova mangela amen, amaro amalipe lea ka ovel panda pozoralo. Soske šaj te vakera akava? O Jehova stvoringja amen potrebaja te manga hem te ova mangle. Keda nekoj sikavela amenge mangipe, prirodno tano te irana mangipaja. Adaleske, kobor poviše osetinaja kaj o Jehova mangela amen hem ceninela amen, doborom poviše bajrola amaro mangipe sprema leste (1. Jov. 4:19). A kobor pobaro tano amaro mangipe sprema leste, doborom pobaro ka ovel hem leskoro mangipe sprema amende. I Biblija jasno vakerela amenge: „Oven paše e Devlea hem ov ka ovel paše tumencar“ (Jak. 4:8). Ama so ka pomožinel amen te ova panda pouverime kaj o Jehova mangela amen?

SO ŠAJ TE POMOŽINEL AMENGE TE UVERINA AMEN KAJ O JEHOVA MANGELA AMEN?

6. Te šaj te uverine tut kaj o Jehova mangela tut, so šaj te kere?

⁶ Ponadari da molin e Jehova konkretno te šaj te pomožinel tuke te haljove soske mangela tut (Luka 18:1; Rim. 12:12). Molin e Jehova, ako valjani poviše puti ko dive, te pomožinel tuke te dikhe ki tute agjaar sar so dikhela ov. Džangjola pe, ako tlo vilo osudinela tut, šaj nane te ovel lokho te uverine tut kaj o Jehova mangela tut. Ama ma bistre kaj o Jehova tano pobaro taro tlo vilo (1. Jov. 3:19, 20). Ov pendžarela tut pošukar tutar korkori, ov dikhela tle šuže osobine kolenge so šaj tu ni na sian svesno kaj isi tut (1. Sam. 16:7; 2. Let. 6:30). Adaleske, slobodno vaker leske sar osetinea tut hem molin le te pomožinel tuke te uverine tut kaj mangela tut (Ps. 62:8). Palo adava, postapin sprema tle molitve agjaar so ka primenine o sledna predlogija.

7-8. Sar o Psalmija pomožinena amenge te uverina amen kaj o Jehova mangela amen?

⁷ Šaj te ovel tut doverba ko adava so vakerela o Jehova ko plo Lafi. Ov ple silaja vodingja e bibliska pisatelen te opišinen le baš agjaar sar soj čače. Ko jekh psalm o David ko but šužo način opišingja sar o Jehova grižinela pe amenge. Ov pišingja: „O Jehova tano paše uzo adala soj phage vilea hem spasinela adalen soj phage duhoja“ (Ps. 34:18). Keda sian obeshrabrimo šaj mislinea tuke kaj nikoj na haljola tut hem kaj nikoj našti te pomožinel tut. Ama o Jehova vetinela kaj ko asavke momentija tano paše uzi tute adaleske so dikhela kaj valjanela tuke poviše taro bilo keda angleder. Ko jekh javer psalm o David pišingja: „Khede mle asva ko tlo šiši tari koža“ (Ps. 56:8). O Jehova dikhela keda tuke pharo. Ov but grižinela pe tuke hem osetinela tli dukh. Isto sar so sekoja kapka pani ko jekh šiši tari koža tani skapoceno nekaske so patujnela ki pustina, tle asva tane skapocena e Jehovaske hem ov setinela pe ko sekova momenti keda osetingjan dukh hem rungjan. O David vakergja e Jehovaske: „Tu šukar džanea sa mle drumija“ (Ps. 139:3). O Jehova dikhela sa so kerea, ama koncentririnela pe ko šukar bukja (Evr. 6:10). Soske? Adaleske so ov but ceninela adava so trudinea tut te šaj te radujne leskoro vilo.a

⁸ Preku asavke utešna stihija soj pišime ko leskoro Lafi, o Jehova ustvari sar ka phene vakerela: „Mangava te džane kobor but mangava tut hem grižinava man tuke“. Ama sar so dikhlem angleder, e Satanaskiri cel tani te verujne ko hovajbe kaj o Jehova na mangela tut. Adaleske, ako ponekogaš sumninea tut dali o Jehova mangela tut, ačhov hem puč tut: „Kas ka verujnav — e dade e hovajbaskoro ili e Devle e čačipaskoro?“ (Jovan 8:44; Ps. 31:5).

9. So vetinela o Jehova okolenge so mangena le? (2. Mojseeva 20:5, 6).

⁹ Razmislin so osetinela o Jehova bašo okola so mangena le. Te dikha so vakergja o Jehova e Mojseeske hem e Izraelconge. (Čitin 2. Mojseeva 20:5, 6.) O Jehova vetinela kaj ponadari da ka sikavel verno mangipe okolenge so mangena le. Adaleske so o Jehova tano verno šaj te ova sigurna kaj ov sekogaš ka mangel okolen so mangena le (Neem. 1:5, fus.). Adaleske, ako ponekogaš mislinea kaj o Jehova na mangela tut, ačhov hem puč tut: „Dali me mangava e Jehova?“ Palo adava, razmislin bašo akava: Ako tu mangea le hem dea tutar sa te šaj te radujne le, šaj te ove sigurno kaj ov da but mangela tut (Dan. 9:4; 1. Kor. 8:3). Javere lafencar, ako na sumninea tut kaj mangea e Jehova, soske te sumnine tut kaj ov mangela tut? Šaj te ove sigurno kaj ov sekogaš ka mangel tut hem nikogaš nane te mukhel tut.

10-11. Sar mangela o Jehova te dikhe ki otkupnina? (Galatjanja 2:20).

¹⁰ Razmislin baši otkupnina. I otkupno žrtva e Isus Hristoseskiri tani o najbaro poklon so o Jehova dengja e manušenge (Jovan 3:16). Ama dali o Jehova dengja ple Čhave te merel tuke da? Džangjola pe! Te dikha o primer e apostol Pavleskoro. Ov kergja nekobor seriozna grevija angleder te ovel hristijani, a valjani sine ponadari da te borinel pe ple slabostencar (Rim. 7:24, 25; 1. Tim. 1:12-14). Sepak, ov počmingja te dikhel ki otkupnina sar poklon kova so o Jehova dengja leske lično. (Čitin Galatjanja 2:20.) Ma bistre kaj o Jehova ple silaja vodingja e Pavle te pišinel akala lafija. A sa adava soj tano pišimo ki Biblija tano te šaj te sikljova (Rim. 15:4). Taro e Pavleskere lafija dikhjola sar o Jehova mangela tu te dikhe ki otkupnina — sar poklon so dengja le lično tuke. Keda ka počmine ki otkupnina te dikhe agjaar, panda poviše ka uverine tut kaj o Jehova mangela tut.

¹¹ But siem blagodarna e Jehovaske so bičhalgja e Isuse ki phuv te šaj te merel amenge. Ama panda jekh pričina soske o Isus alo ki phuv tani te vakerel e javerenge o čačipe bašo Devel (Jovan 18:37). Ko adava čačipe tano vklučimo hem adava so o Jehova osetinela bašo ple čhave.

SAR O ISUS POMOŽINELA AMENGE TE UVERINA AMEN KAJ O JEHOVA MANGELA AMEN

12. Soske šaj te verujna ko adava so Isus vakergja bašo Jehova?

¹² Džikote sine ki phuv, o Isus uživinela sine te vakerel e javerenge savo tano o Jehova (Luka 10:22). Amen isi amen but pričine te verujna ko adava so o Isus vakergja bašo Jehova. Soske? Adaleske so angleder te avel ki phuv, o Isus sine e Jehovaja ko nebo milijarde berša (Kol. 1:15). Ov lično dikhlja kobor but o Jehova mangela ple verna čhaven hem čhajen. Sar o Isus pomožinela amenge te uverina amen kaj o Devel mangela amen?

13. Sar mangela o Isus te dikha ko Jehova?

¹³ O Isus mangela te dikha ko Jehova isto sar so dikhela ov. Ko evangelija, o Isus bašo Jehova vakergja „Dad“ poviše taro 190 puti. A keda kerela sine lafi ple sledbenikoncar, koristinela sine lafija sar soj „tumaro Dad“ ili „tumaro Dad soj ko nebo“ (Mat. 5:16; 6:26). Angleder o Isus te avel ki phuv, e Devleskere verna sluge bašo Jehova vakerena sine kaj tano „Semokjno Devel“, „o Najbaro Devel“, hem „o Najbaro Stvoriteli“, a koristinena sine hem javera slična titule. Ama o Isus but puti vakergja bašo Jehova „amaro Dad“. Akala lafija sikavena kaj o Jehova mangela leskere sluge te osetinen pe lea paše, isto sar jekh čhavo so osetinela pe paše ple dadea kova so grižinela pe leske. O Isus sikavela amen kaj o Jehova mangela amen, isto sar jekh šukar dad so mangela ple skapocena čhaven. Te dikha duj primerija bašo adava sar o Isus koristingja o lafi „Dad“.

14. Sar o Isus sikavgja kaj sekova jekh amendar tano skapoceno ko jakhja amare nebesno Dadeskere? (Matej 10:29-31; dikh hem i slika.)

¹⁴ Prvo, te dikha e Isuseskere lafija soj pišime ko Matej 10:29-31. (Čitin.) O čiriklja tane tikne hem ola nikogaš nane te mangen e Jehova, a ni palem te služinen leske. Sepak, amare Dadeske sekoja čirikli tani doborom skapoceno so ov džanela keda ka perel ki phuv. Ako e Jehovaske doborom but vredinela jekh čirikli, šaj te ova sigurna kaj ov but poviše ceninela sekole jekhe amendar soske amen mangaja le hem služinaja leske. Isto agjaar, o Isus vakergja kaj amaro Dad džanela kobor bala isi sekole jekhe amendar ko šero. Adaleske so o Jehova džanela čak asavke sitna bukja amenge, šaj te ova sigurna kaj ov but grižinela pe amenge. Jasno tano kaj o Isus mangela te ova uverime kaj sekova jekh amendar tano skapoceno anglo jakhja amare nebesno Dadeskere.

15. So sikavena tuke o lafija e Isuseskere soj pišime ko Jovan 6:44 bašo tlo nebesno Dad?

¹⁵ Te dikha panda jekh primer sar o Isus koristingja o lafi „mlo Dad“. (Čitin Jovan 6:44.) Lično tlo nebesno Dad privlečingja tut ko čačipe. Soske kergja adava? Adaleske so dikhlja kaj ko tlo vilo isi šuže osobine (Apo. 13:48). Keda vakergja o lafija soj pišime ko Jovan 6:44, o Isus šaj mislingja ko lafija e Jehovaskere soj pišime ko Eremija 31:3. Adathe o Jehova vakergja: „Verno mangipaja privlečingjum tut ki mande“ (Erem. 31:3 fus.; sporedin Osija 11:4). Razmislin so značinela akava. Amaro nebesno Dad, soj pherdo mangipaja, ponadari da dikhela tle šukar osobine kola so šaj ni tu korkori na dikhea len.

16. a) So ustvari vakerela amenge o Isus, hem soske valjani te verujna le? b) Sar šaj panda poviše te uverine tut kaj o Jehova tano o najšukar Dad so postojnela? (Dikh i ramka „O najšukar Dad so postojnela“.)

¹⁶ Adalea so o Isus opišingja e Jehova sar amaro Dad, ov ustvari vakerela amenge: „O Jehova nane samo mo Dad, ov tano hem tlo Dad. Hem uverinava tut kaj ov but mangela tut hem grižinela pe tuke lično“. Adaleske, ako nekogaš na sian sigurno dali o Jehova mangela tut, ačhov hem puč tut: „Na valjani li te verujnav ko adava so vakergja o Isus — okova kova so najšukar džanela e Dade hem kova so sekogaš vakerela o čačipe?“ (1. Pet. 2:22).

PONADARI DA KER SA SO ŠAJ PANDA POVIŠE TE UVERINE TUT KAJ O JEHOVA MANGELA TUT

17. Soske mora ponadari da te kera sa so šaj te ova panda pouverime kaj o Jehova mangela amen?

¹⁷ Valjani ponadari da te kera sa so šaj te ova pouverime kaj o Jehova mangela amen. Sar so dikhlem angleder, amaro opasno dušmani o Satana ka kerel sa te šaj te terinel amen te čhinava te služina e Jehovaske. Te šaj te slabonkerel amari odlučnost te služina e Jehovaske, o Satana ponadari da ka probinel te čhivel amen te sumnina amen dali o Devel mangela amen. Na smejnaja te dozvolina e Satanaske te pobedinel! (Jov 27:5).

18. Sar šaj panda poviše te uverine tut kaj o Jehova mangela tut?

¹⁸ Te šaj panda poviše te uverine tut kaj o Jehova mangela tut, ponadari da molin le te pomožinel tuke te dikhe ki tute agjaar sar so dikhela ov. Hor razmislin bašo bibliska stihija kolende soj opišimo e Jehovaskoro verno mangipe. Ma bistre kaj o Jehova sekogaš ka mangel okolen so mangena le. Razmislin soske šaj ki otkupnina te dikhe sar poklon kova so o Jehova dengja le lično tuke hem neka ovel tut doverba ko e Isuseskere lafija kaj o Jehova tano tlo nebesno Dad. Tegani, ako nekoj pučela tut: „Dali sian sigurno kaj o Jehova mangela tut?“, bizo ni hari te misline tut ka vakere: „Oja, sigurno sium ko adava! Hem sekova dive kerava sa so šaj te sikavav leske kaj mangava le“.