Okolen so isi len ispravno stavi bašo večno životo ka prifatinen o čačipe

1. Ko save različna načinija reagirinena o manuša ko šukar haberi? (Apo. 13:47, 48; 16:14, 15).

BUT manuša ko prvo veko odma prifatingje o čačipe samo so šungje o haberi bašo Carstvo. (Čitin Apostolija 13:47, 48; 16:14, 15.) Slično avdive da nesave manuša radujnena pe keda prvo puti ka šunen o šukar haberi. A nesave iako ko početok na sikavgje interes baši poraka bašo Carstvo, pokasno mangle te sikljoven baši leste hem prifatingje le. So valjani te kera keda ki služba ka arakha manušen kolen so isi len ispravno stavi bašo večno životo?

2. Ki koja smisla amaro propovedibe tano slično e bukjaja so kerela la jekh zemjodelco?

² Amaro propovedibe šaj te sporedina le e bukjaja so kerela la jekh zemjodelco. Ako nesave plodija tane zrela o zemjodelco verojatno ka khedel len, ama ka prodolžinel te čhivel pani hem te grižinel pe okolenge so panda nane zrela. Slično keda arakhaja nekas soj spremno te prifatinel amaro haberi, mangaja te pomožina leske te ovel e Hristoseskoro učeniko so šaj posigate. A ko isto vreme na čhinavaja te pomožina okolenge kolenge so valjani poviše vreme te šaj te haljoven kobor vredinela o haberi (Jovan 4:35, 36). Keda ka procenina dali o manuša tane spremna te prifatinen o haberi ili na, tegani ka džana sar najšukar te pomožina lenge. Te dikha so šaj te kera ko prvo razgovor te šaj te pomožina okolenge soj spremna te prifatinen o haberi. A isto agjaar, ka dikha sar šaj te pomožina asavkenge ponadari da te napredujnen.

KEDA O MANUŠA TANE SPREMNA TE PRIFATINEN O ŠUKAR HABERI

3. So šaj te kera keda ki služba ka arakha manušen so interesinena pe? (1. Korinkjanja 9:26).

³ Keda ki služba ka arakha manušen so interesinena pe, mangaja te pomožina lenge te počminen odma te džan ko drumo so ingarela ko životo. Ko asavke situacie šaj panda ko prvo razgovor te nudina lenge biblisko kursi hem te kanina len ko amare sostanokija. (Čitin 1. Korinkjanja 9:26.)

4. Vaker primer nekastar so sine spremno odma te proučinel i Biblija.

⁴ Nudin biblisko kursi. Nesave kolenge so svedočinaja tane spremna odma te proučinen i Biblija. Na primer, jekh četvrtok jekh terni džuvli ki Kanada ali ki količka svedočibaske hem lelja i brošura Ov bahtalo zasekogaš. I phen koja so tergjola sine ki količka objasningja lake kaj e brošuraja šaj te ovel la hem besplatno kursi. I džuvli sikavgja interes hem dengje peske maškar peste pumare telefonska broja. Pokasno ko isto dive, oj pišingja e phenjake hem pučlja la keda šaj te počminen te proučinen. Keda i phen nudingja lake te posetinel la ko vikend i džuvli pučlja la: „A šaj li tajsa? Me sium slobodno“. Agjaar adava petok proučingje. O isto vikend ali ko sostanok hem prodolžingja sigate te napredujnel.

5. So valjani te kera keda dikhaja kaj nekoj nane panda spremno te proučinel i Biblija? (Dikh hem o slike.)

⁵ Džangjola pe, na očekujnaja kaj sarinenge so propovedinaja ka reagirinen isto sar adaja terni džuvli. Nesavenge šaj ka valjani poviše vreme. Asavkencar šaj najangle te kera lafi bašo nešto so len interesinela len. Hem ako isi amen pozitivno stavi hem sikavaja kaj interesinaja amen lenge, bašo kratko vreme šaj te počmina biblisko kursi. So šaj te vakera keda nudinaja biblisko kursi? Te dikha so odgovorinena nesave phralja hem phenja ko akava pučibe kola so uspešno počminena bibliska kursija.

6. So šaj te kera te šaj nekoj so interesinela pe te mangel palem te kerel amencar lafi?

⁶ O objavitelija hem o pionerija kola so uspešno počminena bibliska kursija, objasninena kaj ko nesave phuvja keda nudinena pe bibliska kursija najšukar tano te izbeginen pe o lafija sar soj „biblisko kursi“ ili „proučibe“. Ola primetingje kaj tano pošukar keda koristinena pe o lafija sar soj „te kera lafi“ ili „te doznajne nešto poviše baši Biblija“. Te šaj te pomožina nekaske te mangel palem te kere amencar lafi, šaj te vakera: „Šaj ka iznenadine tut kaj ki Biblija isi odgovorija bašo but važna pučiba“ ili „I Biblija nane samo jekh religiozno lil, oj pomožinela amen ko praktična načinija“. A isto šaj te vakere: „Na valjani but vreme, dovolno tane 10 dži ko 15 minutija te šaj te doznajne nešto so ka pomožinel tuke ko životo“. Adava šaj te vakere le bizo te koristine lafija sar soj „redovno“ ili „sekova kurko“, lafija so šaj te sikaven kaj ka ovel len nesavi obvrska.

7. Keda nesave prvo puti halile kaj arakhle o čačipe? (1. Korinkjanja 14:23-25).

⁷ Kanin len ko sostanok. Izgleda kaj ko vreme e apostol Pavleskoro, nesave halile kaj arakhle o čačipe čak otkeda prvo puti sine ko jekh sostanok. (Čitin 1. Korinkjanja 14:23-25.) Isto tano but puti avdive da. But neve posigate napredujnena otkeda počminena te aven ko amare sostanokija. Keda valjani te kanine len? Bašo adava kerela pe lafi ki lekcija 10 taro lil Ov bahtalo zasekogaš, ama ne mora te adžikeren te resen dži ki adaja tema taro lil. Panda ko prvo razgovor šaj te kanine le ko sostanok kova so ikerela pe ko vikend, šaj agjaar so ka spomnine leske o naslov taro javno govor ili nesavi misla tari statija tari Stražarsko kula bašo adava kurko.

8. So šaj te vakera nekaske keda kaninaja le ko amare sostanokija? (Isaija 54:13).

⁸ Keda kaninea nekas so interesinela pe, objasnin leske kaj amare sostanokija tane porazlična taro adava sar ov tano naviknimo te kheden pe o manuša ki javer religija. Keda jekh interesentka prvo puti prisustvujngja ko proučibe i Stražarsko kula pučlja e phenja kolaja so proučinela sine, dali adava so vodinela džanela sarinengere anava. I phen objasningja lake kaj sarine trudinaja amen te džana o anava okolengere ko amaro sobranie, isto sar so džanaja o anava sekole jekheskere tari amari familija. E interesentkake adava sine but porazlično tari crkva kolate so džala sine. Šaj isto agjaar te objasnina leske panda jekh buti ko so razlikujnena pe amare sostanokija. (Čitin Isaija 54:13.) Amen khedaja amen te šaj te obožavina e Jehova, te sikljova baši leste hem te ohrabrina amen jekh jekhea (Evr. 2:12; 10:24, 25). Adaleske, amare sostanokija tane šukar organizirime hem praktična, a ki lende nane nisave ceremonie (1. Kor. 14:40). Isto agjaar o thana kote so ikeraja amare sostanokija tane ednostavna hem tane kerde ko način te šaj amen polokhe te sikljova. Adaleske so siem neutralna amen nikogaš na širinaja politička idee, a ni palem na khuvaja ko debate ili raspravie. E interesenteske isto agjaar ka koristinel ako angleder dikhela o videoklipi So kerela pe ki e Jehovaskere svedokongiri dvorana? Adava ka pomožinel leske te džanel so adžikerela le.

9-10. Keda kaninaja nekas ko sostanok, so šaj te vakera leske te šaj te na daral? (Dikh hem i slika.)

⁹ Nesave mislinena pe dali te aven ko sostanok soske darana kaj ka rodel pe lendar te oven e Jehovaskere svedokija. Uverin e manuše kaj amenge tano milo keda isi amen gostija ko sostanokija hem kaj na keraja lenge pritisok te oven e Jehovaskere svedokija ili te keren hem te vakeren nešto ki lende. Amen isto agjaar mangaja keda avena familie, pa čak familie pumare tikne čhavencar. Ko amare sostanokija e čhaven na odvinena ko posebna grupe. Nego ola bešena pumare roditelencar hem sikljovena zaedno. Agjaar, o roditelija džanena kote tane lengere čhave hem bašo so tane sikavde (5. Moj. 31:12). Nikastar na rodela pe te del prilog. Namesto adava, ikeraja amen ki e Isuseskiri zapoved: „Dobingjen bizo pare, bizo pare den“ (Mat. 10:8). Šaj isto te vakere leske kaj te šaj te avel ko sostanok na rodela pe lestar te uravel skupo šeja. O Devel dikhela e manušeskoro vilo, a na adava sar izgledinela (1. Sam. 16:7).

¹⁰ Ako manuš avela ko sostanok ker sa so šaj te šaj te osetinel pe šukar. Zapoznajn le e starešinencar hem e javere objavitelencar. Ako osetinela pe šukar poverojatno tano kaj ka mangel te avel palem. Džikote trajnela o sostanok, ako nane le Biblija, sikav leske o stihija tari tli džikote šunena o govor ili o proučibe i Stražarsko kula.

SAR ŠAJ TE POMOŽINE NEKASKE OTKEDA POČMINGJEN BIBLISKO KURSI

11. Sar šaj te sikave kaj poštujnea o vreme hem o plani tle interesenteskoro?

¹¹ So na valjani te bistra keda proučinaja nekasaja? Poštujn o vreme hem o plani e interesenteskoro. Na primer, ako dogovoringjen tumen ko kova vreme ka proučinen, ov točno bizi razlika dali o manuša taro tlo than tane točna ko vreme ili na. Isto agjaar, šaj tano najšukar o prvo puti keda ka proučinen adava te ovel kratko. Nesave iskusna objavitelija vakerena kaj tano šukar te na ačhove but, čak ako o manuš pučela pučiba. Hem ma ker but lafi. Mukh o interesenti te vakerel sar osetinela pe hem so mislinela (Izr. 10:19).

12. Savi cel valjani te ovel amen panda taro početok ko jekh biblisko kursi?

¹² Panda taro početok tli cel valjani te ovel te pomožine tle interesenteske te zapoznajnel e Jehova hem e Isuse hem te zamangel len. Adava šaj te kere agjaar so sekogaš ka sikave leske so vakerela i Biblija, a na adava so tu džanea (Apo. 10:25, 26). O apostol Pavle sine šukar primer bašo akava. Keda sikavela sine e manušen, ov fokusirinela pe sine ko Isus Hristos — okole kas so o Jehova bičhalgja te šaj te pomožinel amenge te zapoznajna le hem te zamanga le (1. Kor. 2:1, 2). O Pavle isto agjaar istakningja kobor tano važno te pomožina e nevenge te stekninen šuže osobine kola so šaj te sporedinen pe zlatoja, srebroja hem skapocena barencar (1. Kor. 3:11-15). Nesave taro adala važna osobine tane i vera, i mudrost, i razboritost hem i dar taro Jehova (Ps. 19:9, 10; Izr. 3:13-15; 1. Pet. 1:7). Dža palo e Pavleskoro primer agjaar so ka pomožine tle interesentenge te ovel len zorali vera hem paše amalipe lengere nebesno Dadea kova soj but šukar (2. Kor. 1:24).

13. Sar šaj džikote pomožinaja e interesentenge te sikava kaj siem strpliva hem kaj haljovaja len (2. Korinkjanja 10:4, 5; dikh hem i slika.)

¹³ Sikav e javeren agjaar sar so sikavela sine o Isus, adalea so ka ove strplivo hem ka haljove e javeren. Izbegin te puče pučiba kolendar so o manuš ka osetinel pe nezgodno. Ako nesavo sikljojbe tano leske pharo te haljovel le hem te prifatinel le, ma ačhov but, nego iran tut ki adaja tema pokasno. Namesto te kere leske pritisok te prifatinel nesavo sikljojbe angleder te ovel spremno bašo adava, mukh vreme te šaj o čačipe te mukhel korenija ko leskoro vilo (Jovan 16:12; Kol. 2:6, 7). I Biblija sporedinela o hovavne sikljojba jekhe cvrsto kulaja, koja so valjani te rušina la. (Čitin 2. Korinkjanja 10:4, 5.) Namesto te rušine e interesenteskiri kula upri leste pomožin leske te gradinel nevi kula, javere lafencar te ovel le doverba ko Jehova (Ps. 91:9).

SAR ŠAJ TE POMOŽINE E NEVENGE SO AVENA KO SOSTANOKIJA

14. Sar valjani te ponašina amen e nevencar so avena ko amare sostanokija?

¹⁴ O Jehova očekujnela te postapina ljubezno sarinencar, bizi razlika kotar avena, tari savi kultura tane ili dali tane barvale ili čorole (Jak. 2:1-4, 9). Sar šaj te sikava mangipe e nevenge so avena ko amare sostanokija?

15-16. Sar šaj te pomožina e nevenge te osetinen pe šukar ko amare sostanokija?

¹⁵ Nesave šaj avena ko amare sostanokija adaleske so mangena te dikhen so slučinela pe ki lende ili adaleske so nekoj taro javer than pottikningja len te aven. Adaleske, keda dikhea nesave neven ko sobranie ker lencar lafi. Šukar dodžaker len ama pazin te na ove napadno. Vikin len te bešen uzi tute. Sikav lenge tari tli Biblija ili taro materijali so razgledinela pe ili de len te ovel len plo primerok. Osven adava, le ko obzir lengere čuvstvija. Jekh manuš so alo ko sostanok vakergja e phraleske so pozdravingja le, kaj osetinela pe nezgodno adaleske so na sine uravdo sar o javera. O phral vakergja leske ma te sekirinel pe hem objasningja leske kaj e Jehovaskere svedokija tane sar sa o javera manuša. Akava manuš pokasno krstingja pe ama nikogaš na bistergja o lafija adale phraleskere. Sepak, te pazina ko akava: Keda keraja lafi e gostoncar angleder hem palo sostanok te sikava kaj interesinaja amen lenge, ama te na puča but lična pučiba (1. Pet. 4:15).

¹⁶ Isto agjaar, šaj te kera o neve te osetinen pe šukar agjaar so ko amare razgovorija, komentarija hem zadača ko sostanok ka sikava poštovanje okolenge so nane Svedokija hem bašo lengere veruvanja. Te na koristina lafija kola so šaj te vredžinen len ili te keren te na mangen palem te aven ko sostanok (Tit 2:8; 3:2). Na primer, nikogaš na bi kritikujnaja o veruvanja okolengere so nane Svedokija (2. Kor. 6:3). Povrzimo akalea o phralja so ikerena javna govorija pazinena but ko akava. Isto agjaar, ola na bistrena kaj ki publika isi nesave so nane Svedokija adaleske objasninena o lafija hem o idee kola so ola na haljovena len.

17. Koja tani amari cel keda ki služba ka arakha manušen kolen so isi len ispravno stavi sprema o večno životo?

¹⁷ Amaro propovedibe sekova dive ovela sa poitno, hem ponadari da arakhaja manušen kolen so isi len „ispravno stavi sprema o večno životo“ (Apo. 13:48). Keda ka arakha asavke manušen na mislinaja amen dali te nudina lenge biblisko kursi ili te kanina len ko amare sostanokija. Agjaar šaj te pomožina lenge te džan ko „drumo so ingarela ko životo“ (Mat. 7:14).