Sar te ačhove radosno ko pophure berša

1-2. Sar dikhela o Jehova ko ple verna sluge kola soj pophure? (Psalm 92:12-14; dikh hem i slika.)

O MANUŠA ko različna thana taro sveto dikhena različno ko phuripe. Na primer, setinea tut li keda ko tlo šero dikhljan tli prvo parni bal? Šaj odma ikalgjan la te šaj o javera te na dikhen la. Ama, haliljan kaj adalea so ka ikale o parne bala nane te čhinave te bajron javera. Akava primer sikavela kaj nekoj kobor hem te trudinel pe našti te čhinavel te phujrol.

² Sepak, amaro nebesno Dad pojaver dikhela ko ple sluge so phujrona (Izr. 16:31). Ov sporedinela len kaštencar so cutonena. (Čitin Psalm 92:12-14.) Soske akaja sporedba odgovorinela? Najčesto, o kašta soj pherde listoncar hem mirisliva lulugjencar postojnena beršencar. Jekh taro najšuže kašta tano i japonsko trešna. Nesave taro asavke šuže kašta postojnena poviše taro milja berša. Slično sar akala kašta so postojnena but berša, o sluge e Jehovaskere soj ko pophure berša tane šuže, javere lafencar but skapocena anglo leskere jakhja. O Jehova na dikhela o parne bala nego dikhela i ličnost. Hem ov ceninela o šuže osobine e pophurengere — lengiri istrajnost hem vernost — hem adava so but berša služingje leske verno.

3. Vaker primer bašo adava sar o Jehova koristingja pophuren te šaj te ispolninel pli namera.

³ Adava so nekoj phurilo na značinela kaj nane više doborom vredno anglo e Jehovaskere jakhja.a Ustvari, o Jehova but puti koristinela e pophuren te šaj te ispolninel pli namera. Na primer, i Sara sine but phuri keda o Jehova vakergja kaj ka ovel daj jekhe mokjno narodoskiri hem kaj latar ka avel o Mesija (1. Moj. 17:15-19). O Mojsej sine ko pophure berša keda o Jehova bičhalgja le te oslobodinel e Izraelcon taro Egipet (2. Moj. 7:6, 7). O apostol Jovan da sine phuro keda o Jehova koristingja le te pišinel pandž bibliska lila.

4. Sprema Izreki 15:15, so šaj te pomožinel e pophurenge te istrajnen ko pharipa? (Dikh hem i slika.)

⁴ Adalenge soj ko berša, o phuripe anela but pharipe. Jekh phen vakergja kaj e phurenge valjani hrabrost soske nane lokho te ovel pe phuro. Ama, adava so ka oven radosnab šaj te pomožinel e pophurenge te istrajnen ko pharipa kola so anela len o phuripe. (Čitin Izreki 15:15.) Ki akaja statija ka dikha nekobor praktična bukja kola so šaj te keren o pophure te šaj te ačhoven radosna. Isto agjaar, ka dikha sar šaj o javera te pomožinen e pophure phralenge hem phenjenge ko sobranie. Prvo, te dikha soske šaj te ovel pharo te ačhova radosna džikote phujrovaja.

SOSKE TANO PHARO TE AČHOVA RADOSNA KEDA PHUJROVAJA

5. So šaj te obeshrabrinel e pophuren?

⁵ So šaj te lel tli radost? Šaj sian obeshrabrimo adaleske so našti te kere adava so kerea sine angleder. Šaj falinela tuke o vreme keda sian sine poterno hem keda sian sine posasto (Prop. 7:10). Na primer, jekh phen so vikinela pe Rubi vakerela: „Pharo mange te uravav man adaleske so isi man dukha hem našti više doborom but te dvižinav man. Phare mange čak hem nesave ednostavna bukja, sar na primer te vazdav mlo pro te šaj te uravav i čorapa. Mle vasta tane kočime hem isi man artritis, adaleske mange pharo čak te kerav nesave sitna bukja“. A o Harold, kova so služingja ko Betel vakerela: „Na pendžarava korkori man hem adava ponekogaš but nervirinela man. Angleder sium sine but silno hem but sportujnava sine. Uživinava sine te khelav bejzbol. O javera vakerena sine: ’De i topka e Haroldeske soske ov nikogaš na utkinela‘. Ama akana mislinava kaj čak našti ni te frdav i topka“.

6. a) Kola javera bukja šaj te obeshrabrinen e pophuren? b) So šaj te pomožinel e pophurenge te odlučinen dali te čhinaven te vozinen? (Dikh i statija e naslovea „Valjani li te čhinavav te vozinav?“, koja so arakhljola ko akava broj.)

⁶ Šaj sian obeshrabrimo adaleske so našti više te kere nesave bukja korkori. Šaj čak javer nekoj valjani te grižinel pe tuke ili palem valjani te živine jekhea taro tle čhave. Ili, šaj sian but razočarimo adaleske so tlo sastipe ulo pološno ili adaleske so više na dikhea šukar so čak našti više korkori te dža ko nesave thana ili te vozine. Akava šaj te kerel te ove čače tažno. Ama nešto so šaj te pomožinel tuke tano adava so nane te bistre kaj amari vrednost anglo e Jehovaskere jakhja hem anglo javera na zavisinela taro adava dali šaj te grižina amen amenge, te živina korkori ili te vozina vrda. Hem šaj te ova sigurna kaj o Jehova haljola sar osetinaja amen. Leske tano važno save siem andral. Ov dikhela kaj but mangaja le taro vilo hem ceninaja leste hem amare phralen hem phenjen (1. Sam. 16:7).

7. So šaj te pomožinel adalenge soj tažna adaleske so mislinena kaj šaj nane te dodžakeren o krajo akale svetoskoro?

⁷ A so ako sian tažno adaleske so mislinea kaj šaj nane te dodžakere o krajo akale svetoskoro? So šaj te pomožinel tuke? Ma bistre kaj o Jehova strplivo adžikerela te čhivel krajo akale lošno svetoske (Isa. 30:18). Isi pričina soske o Jehova tano strplivo. Adalea soj tano strplivo dela vreme hem prilika milionja manušenge te zapoznajnen le hem te počminen te služinen leske (2. Pet. 3:9). Adaleske, keda sian obeshrabrimo setin tut kaj panda but manuša šaj te zapoznajnen e Jehova angleder te avel o krajo hem te spasinen pe. Dali maškar lende šaj te oven hem nesave tari tli familija?

8. Sar o problemija so anela len o phuripe šaj te vlijajnel upro pophure?

⁸ Bizi razlika kobor berš isi amen keda na osetinaja amen šukar, pobari tani i verojatnost te vakera ili te kera nešto koleske so pokasno ka pera pišmani (Prop. 7:7; Jak. 3:2). Na primer, keda cidingja muke, o verno Jov kergja lafi bizo te razmislinel (Jov 6:1-3). Javer pričina soske o pophure šaj te vakeren ili te keren nešto so obično na bi kerena šaj te ovel adaleske so isi len nesavo problemi sastipaja ili šaj koristinena nesave hapija. Džangjola pe, nikoj amendar namerno na bi koristinela o berša ili o sastipe sar izgovor te na ovel ljubezno ili previše te adžikerel e javerendar. Hem ako haljovaja kaj nekaske vakergjem nešto so nane ljubezno, valjani odma te izvinina amen (Mat. 5:23, 24).

SAR TE AČHOVE RADOSNO

9. Soske valjani te prifatine pomoš taro javera? (Dikh hem o slike.)

⁹ Prifatin pomoš taro javera (Gal. 6:2). Ko početok šaj adava te ovel tuke pharo. Jekh phen so vikinela pe Gretl vakerela: „Ponekogaš mange pharo te prifatinav pomoš taro javera adaleske so mislinava kaj ka ovav lenge ko teret. Valjangja mange vreme te šaj te meninav mlo način sar razmislinava hem ponizno te priznajnav kaj valjani mange pomoš“. Keda prifatinea pomoš taro javera dea len prilika te osetinen i radost so avela taro dejbe (Apo. 20:35). A sigurno tu da ka ove radosno keda ka dikhe kaj o javera mangena tut hem grižinena pe tuke.

10. Soske tano važno te na bistre te sikave blagodarnost? (Dikh hem i slika.)

¹⁰ Sikav kaj sian blagodarno (Kol. 3:15; 1. Sol. 5:18). Keda o javera kerena šukar bukja baši amenge, amen siem blagodarna, ama šaj bistraja te sikava adava. Sepak, ako asaja hem vakeraja „fala“ šaj te sikava e javerenge kaj siem blagodarna hem kaj ceninaja adava so kerena amenge. I Lija koja so grižinela pe e pophurenge ko Betel, vakerela: „Jekh phen kolake so grižinava man mukhela kartičke kolencar so sikavela kaj tani blagodarno. Adala tane samo nekobor lafija, ama tane but ljubezna. Osetinava man šukar keda dobinava adala kartičke hem kerela man radosno adava so džanava kaj oj ceninela adava so pomožinava la“.

11. Sar šaj te pomožine e javerenge? (Dikh hem i slika.)

¹¹ Trudin tut te pomožine e javerenge. Ako razmislinea bašo javera hem trudinea tut te pomožine lenge, tegani pohari ka razmisline bašo tle problemija. Jekh afrikansko izreka sporedinela e pophuren bibliotekaja pherdi lilencar kolen so isi len bari mudrost. Ama, ako o manuša na čitinena adala lila ola ka našti te sikljoven lendar. Slično, o terne ka našti te sikljoven tutar važna bukja ako na kerea lencar lafi hem ako na vakerea adava so džanea. Puč len pučiba hem šun len. Spomnin lenge nesave situacie taro tlo životo kola so sikavena soske tano sekogaš najšukar te živinel pe sprema e Jehovaskere merilija hem kaj adava ka kerel len srekjna. Sigurno ka ove radosno ako utešinea hem ohrabrinea tle poterne amalen (Ps. 71:18).

12. Sprema Isaija 46:4, so vetinela o Jehova kaj ka kerel e pophurenge? (Dikh hem i slika.)

¹² Molin e Jehova baši sila. Iako šaj osetinea tut fizički hem emocionalno umorno, o Jehova nikogaš „na umorinela pe hem na čhingjola“ (Isa. 40:28). Sar ov koristinela pli sila kola so nane la krajo? Jekh način tano agjaar so zojrakerela ple verna pophure slugen (Isa. 40:29-31). Ustvari, ov vetinela kaj ka pomožinel lenge. (Čitin Isaija 46:4.) Hem o Jehova sekogaš ispolninela ple vetuvanja (Is. Nav. 23:14; Isa. 55:10, 11). Keda molinea tut e Jehovaske hem palo adava osetine leskoro mangipe hem poddrška, našti te na ove radosno.

13. Sprema 2. Korinkjanja 4:16-18, so na valjani te bistra? (Dikh hem i slika.)

¹³ Sekogaš neka ovel tut ki godi kaj tli situacija tani momentalno. Keda džanaja kaj nesavi phari situacija tani momentalno polokho amenge te istrajna. I Biblija uverinela amen kaj o phuripe hem o nasvalipe tane momentalna (Jov 33:25; Isa. 33:24). Adaleske, šaj te kerel tu radosno adava so džanea kaj o najšukar dive tek ka aven, a na kaj više nakhle. (Čitin 2. Korinkjanja 4:16-18.) Ama sar šaj o javera te pomožinen tuke?

SAR ŠAJ O JAVERA TE POMOŽINEN

14. Soske tano važno te javina amen hem te dža ko pophure?

¹⁴ Redovno dža hem javin tut e pophure phralenge hem phenjenge (Evr. 13:16). O pophure šaj te osetinen pe korkori. Jekh phral so vikinela pe Kami, kova so našti te ikljol kher­aldan, vakerela: „Taro sabajle dži rakjate sium khere hem but mange dosadno. Ponekogaš osetinava man sar phuro lavi ko kafezi. Uštava nervozno hem voznemirimo“. Adalea so ka dža ko pophure uverinaja len kaj amenge važna hem kaj mangaja len. Verojatno sarine amen šaj setinaja amen ki nesavi situacija keda manglem te javina amen nekaske soj pophuro taro amaro sobranie ili te dža ki leste, ama na kergjem adava. Sekoj amendar tano but zafatimo. Adaleske, so šaj te pomožinel amenge te kera adava soj najvažno, kote soj tano hem te dža ko pophure? (Fil. 1:10). Šaj te pomožinel tuke adava so ka pišine tuke ko tlo kalendari te šaj te setinkerel tut te bičhale poraka nekaske soj pophuro taro tlo sobranie ili te javine tut leske. Isto agjaar, šaj te kere tuke raspored te šaj te dža ki lende. Birin jekh dive te šaj te na bistre te dža.

15. So šaj te keren zaedno o poterne hem o pophure?

¹⁵ Ako sian terno šaj pučea tut bašo so šaj te kere lafi e pophurencar ili kola bukja šaj te keren len zaedno. Ama ma razmislin but bašo adava. Samo ov šukar amal (Izr. 17:17). Ker lafi e pophurencar angleder hem palo sostanok. Šaj te puče len kova tano lengoro omileno stiho ili te vakere lenge te raskažinen tuke nesavi smešno situacija keda sine tikne. Isto agjaar, šaj te vikine len zaedno te dikhen e masekoskiri emisija ko JW Broadcasting^®. A šaj hem te pomožine e pophurenge ko praktična načinija. Na primer, šaj te pomožine lenge redovno te apdejtirinen pumare uredija ili te peraven o najneve publikacie proučibaske. Jekh phen so vikinela pe Kerol vakerela: „Nudin e pophurenge te keren bukja so tu da mangea te kere len. Iako sium phuri panda mangava te uživinav ko životo. Mangava te džav ko šoping, te hav avrijal hem te phirav ki priroda“. Jekh phen so vikinela pe Majra vakerela: „Jekha taro mle amalinke isi la 90 berš. Oj tani 57 berš pophuri mandar. Ama but puti bistrava adava adaleske so asaja hem dikhaja filmija zaedno. Hem keda isi amen nesavo problemi rodaja sovet jekh jekhatar“.

16. Soske šaj e pophurenge te pomožinel adava so ka dža lencar ko doktori?

¹⁶ Ov lencar keda džana ko pregledija. Osven so šaj te ingare e pophuren ko doktori, šaj hem te ačhove lencar džikote trajnela o pregled te šaj te ove sigurno kaj o doktorija ka ponašinen pe lencar šukar hem ka den len i pomoš so valjani lenge (Isa. 1:17). Šaj te pomožine e pophurenge agjaar so ka pišine adava so ka vakerel o doktori. Jekh pophuri phen, so vikinela pe Rut vakerela: „But puti keda džava korkori ko pregled o doktori na haljola man seriozno. O doktorija šaj te vakeren: ’Sa i dži ki tli godi‘. Ama keda isi nekoj mancar, o doktorija ponašinena pe skroz javer. But sium blagodarno e phralenge hem e phenjenge so odvojnena vreme te aven mancar“.

17. Ko kola načinija šaj te propovedine e pophurencar?

¹⁷ Sorabotin lencar ki služba. Nesave pophure šaj nane len dovolno sila te šaj te džan ki služba taro kher ko kher. Na primer, šaj te vikine nesave pophure phenja te svedočinen zaedno ko količke. A šaj čak te ane lake stolica te šaj te bešel paše uzi količka. Ili, šaj te vikine nesave pophure phrale ko biblisko kursi, pa čak hem šaj te vodine o kursi leste khere. O starešine šaj te razmislinen dali šaj o sostanokija službake te ikeren pe ko khera nesave pophure phralengere ili phenjengere te šaj te ovel lenge polokho te učestvujnen ki služba. Vredinela sa so keraja te šaj te sikava čest e pophurenge (Izr. 3:27; Rim. 12:10).

18. So ka dikha ki javer statija?

¹⁸ Akaja statija setinkergja amen kaj o Jehova mangela hem ceninela e pophuren. A sarine amen da mangaja len hem ceninaja len. O phuripe tano pharo, ama adaleske so o Jehova ka pomožinel tut šaj te ačhove radosno (Ps. 37:25). But ohrabrinela adava so džanea kaj o najšukar dive tek avena, a na kaj više nakhle. Ama, sar šaj te ačhoven radosna okola so grižinena pe nekaske soj nasvalo, na primer nesave pophureske ki familija, nesave čhaveske ili amaleske? O odgovor ko akava pučibe ka dikha le ki javer statija.