Dali šaj o vlade zaedno te čhinaven te ovel klimatsko katastrofa? — So vakerela i Biblija?

Nedela, 20 noemvri 2022 berš, završingja i konferencija taro Obedineta nacie bašo klimatska promene „COP27“. Iako kergje važno dogovor te obezbedinel pe finansisko pomoš bašo počorole phuvja te šaj te ikljon ko krajo e klimatska katastrofencar, but džene mislinena kaj adava nane te rešinel o problemi.

• „Srekjno sium so šaj te čhiva ki strana pare te šaj te pomožina okolenge soj pogodime taro klimatska promene“, vakergja o Antonio Gutereš, o generalno sekretari ko Obedineta nacie, ko 19 noemvri 2022 berš. „Sepak, džanaja kaj adava nane dovolno... Amare planetake potrebno tani itno pomoš. “

• „Ko sveto panda hari šaj te ovel bari klimatsko katastrofa“ (Meri Robinson, i bivšo pretsedatelka ki Irska hem bivšo zastapnička bašo manušikane pravija ko ON, ko 20 noemvri 2022 berš).

Posebno o terne sekirinena pe so ka ovel amare planetaja. Šaj li o vlade adalea so zaedno sorabotinena te ispolninen pumaro vetuvanje kaj ka rešinen o problemi e klimatsko promenencar? So vakerela i Biblija?

Dali o vlade ka oven zaedno hem ka rešinen o problemi?

Tari Biblija doznajnaja kaj, iako o vlade trudinena pe dži negde te rešinen i klimatsko kriza, sepak ola našti celosno te rešinen o problemi. Te dikha duj pričine soske našti te keren adava:

• „Adava soj tano bango, našti te isprajnel pe“ (Propovednik 1:15).

  So značinela akava: E vladen isi len ograničimi mokj, soske o manuša nane kerde te vladinen jekh upro jekh (Eremija 10:23). Čak o vlade te oven zaedno, ola sepak ka našti te rešinen o problemija e svetoskere, bizi razlika kobor trudinena pe.

• „O manuša ka mangen korkori pes, ka mangen o pare... nane te oven spremna bašo bilo savo dogovor“ (2. Timotej 3:2, 3).

  So značinela akava: I Biblija točno prorokujngja, kaj but džene ko amaro vreme ka mangen korkori pes hem nane te oven spremna te sorabotinen e javerencar te šaj te keren pošukar o životo sarinengoro.

Pričina baši nadež

Ama, so ka ovel amare planetaja, na zavisinela taro adava so vetingje o manušikane vlade. O Devel biringja jekh sposobno Vladeteli, o Isus Hristos, kova so ka vladinel celo phuvjaja. Baši leste i Biblija vakerela:

• „[E Isuseske] ka ovel dendi vlast. O anav leskoro ka ovel Mudro Sovetniko, Mokjno Devel, Večno Dad, Princo e Mireskoro“ (Isaija 9:6).

O Isus tano Cari ko e Devleskoro Carstvo, vlada soj tani ko nebo (Matej 6:10). Le isi le sa so valjani — mokj, mudrost hem želba — te šaj te grižinel pe amare planetake hem sarinenge so živinena ki late (Psalm 72:12, 16). Keda ov ka vladinel, i nebesno vlada ka uništinel „okolen so uništinena i phuv“ hem ka popravinel i šteta so sine kerdi ki phuv (Otkrovenie 11:18; Isaija 35:1, 7).

Te šaj te doznajne poviše kova tano o najšukar rešenie bašo katastrofalna posledice so angje len o klimatska promene, čitin i statija e naslovea „Vo čii race e idninata na Zemjata?“