O Isus sikavela sar te molinen pe

O fariseija kerena sine sa te šaj te vooduševinen e javeren. Ola kerena sine šukar bukja te šaj o javera te dikhen len. Isto agjaar, molinena pe sine ko thana kote so o manuša šaj te dikhen len. O fariseija sikljovena sine bare molitve ki godi, hem povtorinena len sine ko sinagoge hem ko raskrsnice te šaj o javera te šunen len. Adaleske, o manuša čudingje pe keda o Isus vakergja lenge: „Ma molinen tumen sar o fariseija. Ola mislinena kaj ka vooduševinen e Devle adalea so ka vakeren but lafija, ama nane agjaar. I molitva tani maškar tute hem o Jehova. Ma vakeren sa ista lafija. O Jehova mangela te vakeren leske sar osetinena tumen.

Ake sar te molinen tumen: ’Amaro dad, so sian ko nebo, neka slavinel pe tlo sveto anav. Te avel tlo carstvo. Te ovel tli volja, sar ko nebo agjaar ki phuv‘“. Isto agjaar, o Isus vakergja lenge te molinen pe te ovel len maro bašo adava dive hem te oven lenge prostime o grevija, hem bašo javera bukja so valjanena lenge.

O Isus vakergja: „Nikogaš ma čhinaven te molinen tumen. Ponadari da roden taro tumaro Dad, o Jehova, šukar bukja. Sekova roditeli mangela te del šukar bukja ple čhaveske. Ako rodela tutar to čhavo maro, ka de le li bar? Ili ako rodela tutar mačho, ka de le li sap?“

Palo adava, o Isus objasningja savi sine i pouka: „Ako tumen džanena te den šukar bukja tumare čhavenge, kobor poviše tumaro Dad, o Jehova, ka del tumen sveti duh! Samo valjani te roden lestar adava“. Dali kerea adava? Bašo kola bukja molinea tut e Jehovaske?