Sar šaj te ovel tut mir iako isi vojne hem konfliktija
„Angleder te proučinav i Biblija“, vakerela o Geri, kova so angleder sine vojniko, „na haljovava sine soske ko sveto isi doborom lošnipe, nepravde hem nevolje. Ama akana isi man andruno mir. Džanava kaj o Jehova, o Devel, ka kerel o sveto sigurno than živibaske“.
But javera da osetinena pe isto sar o Geri. Doznajn sar i Biblija pomožingja javerenge da.
I BIBLIJA VAKERELA: „Tu, Jehova, sian šukar hem spremno sian te prostine“ (Psalm 86:5).
SAR AKAVA POMOŽINELA: „Akava stiho uverinela man kaj o Jehova tano milostivo. Džanava kaj tano spremno te prostinel mange bašo sa so kergjum angleder keda učestvujnava sine ki vojna“ (Vilmar, Kolumbija).
I BIBLIJA VAKERELA: „Me kerava nevo nebo hem nevi phuv. Ko adava so sine poangle nane te setinen tumen, a ni nane te pojavinel pe tumenge ko vilo“ (Isaija 65:17).
SAR AKAVA POMOŽINELA: „Isi man traume, stres hem depresija taro adava so doživingjum sar vojniko. Akava stiho setinkerela man kaj o Jehova panda hari ka cidel mle nemirna misle hem nane više te oven man košmarija, nane više te aven mange ni ki godi ni ko vilo. Kobor šužo poklon!“ (Zafira, Amerika).
I BIBLIJA VAKERELA: „Ko dive keda ov ka vladinel o pravedniko ka cutinel hem ka ovel baro mir sa džikote postojnela i mesečina“ (Psalm 72:7).
SAR AKAVA POMOŽINELA: „But puti razmislinava bašo akala lafija. Panda hari, i vojna hem sa o lošna bukja so anela oj nane više te oven hem poviše nane te sekirina amen baši bezbednost amare pašutnengiri“ (Aleksandra, Ukraina).
I BIBLIJA VAKERELA: „Tle mule ka ušten... Džangavgjoven hem radujnen tumen, tumen so arakhljovena ko pravo“ (Isaija 26:19).
SAR AKAVA POMOŽINELA: „Skoro sarine tari mli familija sine mudarde keda sine o genocid upro pleme Tutsi. Ama, akava stiho uverinela man kaj palem ka dikhav len. Edvaj adžikerava te šunav lengoro asajbe keda ka voskresninen!“ (Meri, Ruanda).
I BIBLIJA VAKERELA: „Panda hari, o lošno nane te ovel više... A o krotka ka nasledinen i phuv, hem ka uživinen ko baro mir“ (Psalm 37:10, 11).
SAR AKAVA POMOŽINELA: „Iako i vojna završingja, panda isi nepravde hem lošna manuša. Akala stihija but pomožinena man. O Jehova dikhela sa hem haljola mli situacija. Ov vetinela kaj panda hari nane te oven više muke hem ka bistra len“ (Daler, Tadžikistan).
O manuša soj citirime ko akava spisanie tane maškar o milionja Jehovaskere svedokija kolenge so i Biblija pomožingja te arakhen mir. Ola siklile te ciden pestar i omraza koja so isi maškaro rase, o nacie, o plemija hem o poedincija (Efešanja 4:31, 32). E Jehovaskere svedokija na mešinena pe ki politika hem na učestvujnena ko nisavo nasilstvo (Jovan 18:36).
Isto agjaar, e Jehovaskere svedokija poddržinena pe jekh jekhea sar familija koja soj pherdi mangipaja (Jovan 13:35). Na primer, i Aleksandra koja so sine citirimi angleder, mora sine te našel pe phenjaja adaleske so sine vojna. Oj vakerela: „Keda nakhlem i granica, odma dikhlem Svedokon taro adava than kola so sine athe te adžikeren amen. Lengiri poddrška but pomožingja amenge te naviknina amen ki nevi phuv sar izbeglice“.
Kaninaja tut te ave ko amare sostanokija kote so preku i Biblija doznajnaja kaj panda hari ka ovel mir ki phuv hem sikljovaja sar panda avdive te ova ko mir e javerencar. Dža ki jw.org te šaj te doznajne kote najpaše ikerena pe sostanokija ili te šaj te rode besplatno biblisko kursi nekasaja taro e Jehovaskere svedokija, agjaar so ka koristine i publikacija Ov bahtalo zasekogaš.