April

O Makedonco Aristarh, ando Solun hine verno hem šukar amal ando apostol Pavle. Ked o Pavle posetinđa e phralen ko Efes, ko oleso trito misionarsko putovanje, prvo puti šaj te čitina ando Aristarh. Đi služinđa e Pavleja, o nasilna hem holjame manuša astarđe le (Dela 19:29). Ama ked mukhlje le, ov na dikhlja sar te našel odothar te šaj te aćhol đivdo, nego aćhilo verno te služini e Pavleja. Nekobor masekija palo odova, đi hine ki Grčka, o protivnikija palem manglje te mudaren e Pavle, ama o Aristarh pana aćhilo te služini e Pavleja (Dela 20:2-4). Koro 58. berš, ki nevi era, o Pavle hine phanlo hem bićhaldo ko Rim. O Aristarh pođinđa ko odova baro drumo oleja hem đi hine ko drumo doživinđe brodolom (Dela 27:1, 2, 41). Ked reslje ko Rim, izgleda so hem ov hine phanlo e Pavleja disavo vreme (Kol. 4:10). Ov ćaće hine e Pavleso verno amal kova pomožinđa le hem zorjaćerđa le. Sar o Aristarh hem amen šaj te ova verna amala. Odova ka ćera ađahar so ka ova amare phralencar hem e phenjencar na samo ked tano olenđe šukar, nego hem ked avena lenđe „phare dive“ (w20.01 9 ¶4-5).

Te ove pomazimo tani bari čast. Odolese neko koj tano pomazimo šaj mislini so nane dostojno odolese. Ama, ov nane le ni jekh sumnja so o Jehova birinđa le. Ked odija osoba razmislini andi pi nada, oj tani bahtali hem zahvalno e Jehovase (1. Petr. 1:3, 4). Da li odova značini so o pomazanikija mangena so posigate te meren? O apostol Pavle dela odgovor. Ov olengo telo uporedinđa e šatoreja hem phenđa: „Amen kola hijam ko akava šatori isi amen bare pharipa, sose na mangaja te huljava akava, nego te urava aver, te šaj o večno đivdipe te uništini o telo kova propadini“ (2. Kor. 5:4). Akala pomazanikija na našalđe pi volja te živinen hem na mangena so posigate te meren sose tano olenđe dosadno ki phuv. On uživinena ko đivdipe hem koristinena svako dive te služinen e Jehovase pe porodicaja hem pe amalencar. So god te ćeren, on niked na bistrena pi nada (1. Kor. 15:53; 2. Petr. 1:4; 1. Jov. 3:2, 3; w20.01 23 ¶12-13).

Đi sikavi amen, amaro Dad ispravini amen ked valjani. Ov ćerela odova ko nekobor načinija. Na primer, odova so čitinaja ki Biblija ja šunaja ko sastankija šaj te pomožini amen te haljova so valjani te menjina amaro način sar razmislinaja ja odova so ćeraja. Isto ađahar, šaj hem prekalo starešine te dobina pomoć. Ko kova god način te dobina i disciplina ando Jehova, ov uvek ćerela odova odolese so mangela amen (Jer. 30:11). O Jehova pomožini amen te istrajina ko pharipa. Sar so jekh dad pomožini pe ćhavenđe ked isi len pharipa hem amaro nebesko Dad dela amen snaga te izdržina ko pharipa. Ov dela amen poklo sveti duh, a odova duh arakhi amen ando sa so šaj te rumini amaro amalipe oleja (Luka 11:13). Isto ađahar, o Jehova arakhi amen ked hijam obeshrabrime ađahar so dela amen i nada. Odija nada pomožini amen te istrajina ko pharipa. Ama, niked ma te bistre: Save god lošna buća te desinen pe amenđe, amaro Dad ka saćari sa amare rane. Kola god pharipa isi amen akana, na ka trajinen zauvek, ama o blagoslovija kola o Jehova dela amen ka oven večna (2. Kor. 4:16-18; w20.02 5 ¶14-15).

Amen šaj te pobedina i zavist. Te razmislina ando e Josifese phralengo primer. Beršencar palo odova so bikinđe e Josife, reslje le ko Egipat. Angleder so o Josif phenđa pe phralenđe koj tano ov ćaće, ov manglja te dikhel da li on promeninđe pe. Ked bešlje te han maro, o Josif ćhivđa e Venijaminese poviše nego avere phralenđe (Post. 43:33, 34). Ama, olese phralja na mothovđe zavist. Umesto odova, on mothovđe so iskreno brininena pe pekle phralese hem pe dadese (Post. 44:30-34). Sebepi so e Josifese phralja na hine zavidna, on uspinđe te obnovinen o mir ki pi porodica (Post. 45:4, 15). Isto ađahar, ako amen uspinaja korenoja te ikala i zavist ando amaro vilo, amen ka arakha o mir ki amari porodica hem ki amari skupština. O Jehova mangela te borina amen protiv i zavist hem te da sa amendar te ćera mir. Ako pana pobuter trudinaja amen te ova ponizna, zadovoljna hem te manga averen, tegani na ka ova zavidna (w20.02 19 ¶17-18).

Tu šaj te mothove so hijan zahvalno aso e Jehovaso mangipe, ađahar so ka moline tut lese. To mangipe premalo Devel ka ovel pobaro đi vaćereja lese sa so brinini tut hem đi zahvalineja tut lese aso sa so ćerela tuće. Ked dikheja sar o Jehova odgovorini ko te molitve, to amalipe e Jehovaja ka ovel pana pozoralo. Tegani ka ove uverimo so ov haljola tut. Te šaj te ove pana popaše e Jehovaja, valjani te haljove sar ov razmislini. Valjani te đane so ov rodela tutar. Jedino način te đane odova tano ađahar so ka proučine oleso Lafi, i Biblija. Odolese mothov so cenineja la. Jedino ki Biblija arakhi pe o ćaćipe kotar Jehova hem jedino koro late pisini koja tani e Devlesi namera tuvaja. Tu mothoveja so cenineja i Biblija ađahar so čitineja la svako dive, pripremineja tut aso to kurs hem ked primenineja odova so sikljiljan (Ps. 119:97, 99; Jov. 17:17). Da li isi tut raspored aso e biblijako čitibe? Da li ićereja tut ko odova raspored? (w20.03 5 ¶8-9).

Ako našti but te phire, šaj te beše negde kuri ka vaćere e manušencar kola nakhena. Ja šaj te svedočine neformalno, te pisine lila ja te svedočine prekalo telefoni. But objaviteljija kola našti te đan ki služba kotar ćher ko ćher, odolese soj tane naborme ja isi len avera problemija, palem osetinena bari radost sose svedočinena ko avera načinja. Čak hem ako hijam naborme, šaj potpuno te ćera amari služba. O Pavle phenđa: „Sa šaj te ćerav prekalo okoleste kova dela man zoralipe“ (Fil. 4:13). Asavki snaga valjanđa lese ked naborsalo ko jekh ando poklo misionarsko putovanje. Ov e hrišćanenđe ki Galatija pisinđa: „Đanena so o prvo puti iako hijum le nabormo, vaćerđum tumenđe o šukar haberi“ (Gal. 4:13). Isto ađahar, šaj hem tu odolese so hijan nabormo ka ovel tut prilika te vaćere o šukar haberi e doktorenđe, e medicinsko sestrenđe hem averenđe. But olendar nane ćhere ked avera objaviteljija đana koro lende (w19.04 4-5 ¶10-11).

Ko 2018. berš, pobuter ando 223 000 e Jehovase svedokija živinđe ko phuvja kuri amaro delo hine zabranimo, ja disave amare aktivnostija hine ograničime. Odova na iznenadini amen. O prava hrišćanja đanena so ka oven progonime. Bilo kaj te živina, o vlastija šaj iznenada hem bizo upozorenje te zabraninen o aktivnostija ando e Jehovase svedokija. Ako o vlastija zabraninena amare aktivnostija, amen šaj te mislina so o Devel nane zadovoljno amencar. Ama, ma bistre so o progonstvo na mothovi odova. Na primer, razmislin kotar apostol Pavle. O Devel sigurno hine zadovoljno olese službaja. Ov hine le čast te pisini 14 poslanice (knjige) ko grčko deo ki Biblija hem hine apostol bićhaldo avere narodenđe. Iako o Devel hine zadovoljno oleja, ov ipak hine le but baro progonstvo (2. Kor. 11:23-27). Ando oleso primer sikljovaja so o Jehova dozvolini olese verna sluge te oven progonime (w19.07 8 ¶1, 3).

O Jehova brinini pe amenđe ko but načinja. Jekh olendar tano so pomožini amen te borina amen protiv amare dušmanja. Amare najbare dušmanja tane o Beng hem o demonja. O Jehova upozorini amen hem dela amen sa so valjani te šaj te borina amen protiv olende (Ef. 6:10-13). Ako prihvatinaja e Jehovasi pomoć hem oslonina amen potpuno upro leste, tegani ka ovel amen snaga te borina amen protiv o Beng. Sar o apostol Pavle hem amen šaj te phena: „Ako tano o Devel amencar, ko ka ovel protiv amende?“ (Rimlj. 8:31). Sar hrišćanja, amen na obratinaja but pažnja upro Beng hem upro demonja. Amenđe tano ko prvo than te sikljova kotar Jehova hem te služina olese (Ps. 25:5). Ama, amen mora te đana kola metode o Beng koristini. Sose? I Biblija phenela: „Te na hovavi amen o Beng“ (2. Kor. 2:11; w19.04 20 ¶1-2).

Ked vaćeraja nekasa kova tano uznemirimo, da li šunaja šukar? Šaj mislinaja so te šuna šukar značini samo te dikha e manuše bizo te vaćera diso. Šaj te mothova saosećanje hem mangipe đi šunaja amare phrale ja phenja. Dijekhvar, nekobor taktična hem blaga lafija šaj te mothoven sar osetinaja amen. Šaj te vaćere: „Ćaće maje but pharo so desinđa pe odova!“ Šaj te puće disave pućiba te šaj te ove sigurno so ćaće haljiljan odova so vaćerđa tuće. Na primer: „Šaj li, molinava tut, te vaćere maje so odoleja mislinđan?“ ja „Ked odova vaćerđan me odoleja haljiljum so... Da li šukar haljiljum?“ Ađahar i osoba ka osetini so šuneja la šukar hem so mangeja te haljove la (1. Kor. 13:4, 7). Ma ćhinav e osoba te bi deja la savet hem ma ispravin la ako razmislini pogrešno. Pošukar tano te ova saosećajna, nego te trudina amen te vaćera sar šaj te rešinen po problemi (1. Petr. 3:8; w19.05 17-18 ¶15-17).

Ki porodica o rom valjani te mangel pe romnja „sar so o Hrist manglja e skupština“ (Ef. 5:28, 29). Sar o Isus, hem o rom valjani te mothovi samopožrtvovano mangipe ađahar so pe romnjake potrebe ka ćhivel anglo pekle. Disave romenđe tano pharo te mothoven asavko mangipe, sebepi so šaj barilje ki porodica kuri na postupinđa pe pravedno jekh premalo aver hem na mothovđa pe mangipe. Olenđe šaj te ovel but pharo te meninen pekle lošna navike, ama odova valjani te ćeren ako mangena te mothoven so šunena e Hristeso zakon. Ked o rom mothovi samopožrtvovano mangipe, tegani i romni ka mothovi lese poštovanje. O dad kova ćaće mangela pe ćhaven niked na ka povredini len pe lafencar ja odoleja so ćerela (Ef. 4:31). Ov ka mothovi mangipe hem pažnja, ađahar olese ćhave ka osetinen pe sigurno. Asavko dad zaslužini o ćhave te mangen le hem te ovel len poverenje koro leste (w19.05 6 ¶21).

So mislinđa i Marija kotar odola lafija kola vaćerđa olaće o anđeo Gavrilo? Da li šaj alo laće ki godi so o Isus ka ovel kralj ko Izrael ko than e Irodeso, ja ko than olese ćhavengo? Ako bi o Isus ovela kralj, tegani bi i Marija ovela kraljica-daj hem olaki porodica bi živini ki kraljevsko palata. Ama, ki Biblija na pisini so i Marija razmislinđa odolestar, niti pisini so i Marija bilo ked rodinđa dijekh baro položaj ko Kraljevstvo. I Marija hine jekh but ponizno romni. Ma bistri so o glavno cilj đi proučinaja e Devleso Lafi hem amare publikacije tano so pobuter te ova paše e Jehovaja. Isto ađahar, mangaja so pojasno te dikha save hijam andral ko vilo hem so valjani te menina koro amende te šaj te šuna e Devle (Jak. 1:22-25; 4:8). Odolese svako puti angleder so ka počmina te proučina valjani te molina amen e Jehovase te del amen poklo duh. Valjani te molina amen te pomožini amen so pošukar te haljova odova so proučinaja hem te pomožini amen jasno te dikha kola promene valjani te ćera (w19.05 31 ¶18-19).

Disavo puti amen borinaja amen nekobor problemencar ko isto vreme. Te dikha nekobor primerija. Jekh phral kova vićini pe Džon, isi le multipla-skleroza. Olese hine but pharo ked olesi romni aćhavđa le palo 19 berš so hine ko brak. Palo odova, olese duj ćhaja ćhinavđe te služinen e Jehovase. Jekh bračno par, o Bob hem i Linda hine len avera problemija. On aćhilje bizi buti hem palo odova našalđe po ćher. Uzo odova, e Lindaće o doktor phenđa so isi la odobor baro problemi vileja so šaj te merel, a isto ađahar pana jekh nabormipe počminđa te napadini olako organizam. Amen šaj te ova sigurna so amaro Stvoritelj hem manglo Dad, o Jehova, haljola sar o problemija utičinena upro amende. Ov mangela te pomožini amen te ikljova ko krajo amare problemencar (Fil. 4:6, 7). Ko e Devleso Lafi isi but primerija kola mothovena kola problemija e Devlese sluge hine len. Ki Biblija šaj te dikha, sar o Jehova pomožinđa len te borinen pe pekle problemencar (w19.06 14 ¶2-3).

Ked amen ćeraja disave tikne hem šukar buća okolenđe kola aćhilje kokri, tegani amen mothovaja so mangaja len. Akana ked tane kokri, olenđe valjanena šukar amala. Sar šaj te mothove so tu hijan olengo amal? Šaj te vićine len koro tute zajedno te han maro. Šaj te družine tut olencar ja šaj te đa olencar ki služba. Isto ađahar, disavo puti šaj te vićine len ko toklo porodično proučibe. O Jehova ka ovel bahtalo ako ćereja odova, odolese so ov „tano paše okolencar soj tane phage vileja“ hem arakhi okolen kola našalđe pe rome ja pe romnja (Ps. 34:18; 68:5). Pana hari, e Devleso Kraljevstvo ka vladini upri phuv hem tegani ka cidel sa o pharipa. Jedva ađićeraja ked odova so hine anglal na ka avel amenđe ki godi, niti ka pojavini pe ko vilo (Is. 65:16, 17). Đi na avela odova dive, mangaja sarine te pomožina jekh jekhe hem odoleja so vaćeraja hem so ćeraja te mothova so mangaja sa amare phralen hem phenjen (1. Petr. 3:8; w19.06 25 ¶18-19).

Ki Stražarsko kula angleder but berša pisinđa: „Okova kova šukar penđari e Devle ka ovel le baro poverenje koro leste ked ka avel o progonstvo.“ Kobor tano akava ćaće! Te šaj te istrajina ko progonstvo mora te manga e Jehova, potpuno te uzdajina amen koro leste (Mat. 22:36-38; Jak. 5:11). Ćhiv tuće cilj svako dive te čitine i Biblija te šaj te ove popaše e Jehovaja (Jak. 4:8). Đi čitineja i Biblija, razmislin ando e Jehovase šuže osobine. Trudin tut te haljove kozom mangela tut đi čitineja odova so phenđa hem so ćerđa (Izl. 34:6). Disave manušenđe tano pharo te verujinen so o Devel mangela len, sebepi so niked ko po đivdipe na osetinđe sar tano ked neko mangela len. Ako hem tu ađahar osetineja tut, trudin tut svako dive te razmisline odolestar sar o Jehova mothovđa mangipe hem šukaripe premalo tute (Ps. 78:38, 39; Rimlj. 8:32). Đi razmislineja ando tekle iskustvija hem ando odova so čitinđan ko e Devleso Lafi, šaj ka dikhe but buća so o Jehova ćerđa tuće. So poviše hijan zahvalno olese, toklo amalipe oleja ka ovel pana pozoralo (Ps. 116:1, 2; w19.07 2-3 ¶4-5).

O Jehova na dinđa amenđe pravo te ana odluke ko averengo than. Okova kova ćerela nepotrebna pravilija na arakhi e phralen, nego mangela te ovel gospodari andi olengi vera. O Beng, na ka ćhinavi te progonini e Jehovase verno slugen (1. Petr. 5:8; Otkr. 2:10). O Beng hem okola so podržinena le ka pokušinen te zabraninen te služina e Jehovase. Ama, čak iako daraja, amen niked na ka ćhinava te služina e Jehovase (Pon. zak. 7:21). O Jehova tano amencar hem ov ka nastavini te pomožini amenđe, čak iako amare aktivnostija ka oven zabranime (2. Let. 32:7, 8). Mangaja te ova odlučna sar amare phralja ko prvo veko. E manušenđe kola tegani hine ko vlast, on phenđe: „Kokri dikhen da li tano ispravno anglo Devel te šuna tumen, a na e Devle. Amen našti a te na vaćera ando odova so dikhljam hem so šunđam“ (Dela 4:19, 20; w19.07 13 ¶18-20).

Đi propovedinaja, amen valjani te haljova kola buća utičinđe upro manuša. O apostol Pavle barilo maškaro Jevreja. Ama, ov valjanđa te menini po način sar propovedini ked vaćerđa okolencar kola na hine Jevreja. On đanđe hari ja ništa ando Jehova hem andi Biblija. Te šaj pošukar te haljova so o manuša mislinena hem sar osetinena pe, šaj ka valjani te istražina disave teme (1. Kor. 9:20-23). Amaro cilj tano te arakha e „dostojno“ manušen (Mat. 10:11). Te šaj te ćera odova, amen valjani te puća e manušen so mislinena hem palo odova te šuna len. Jekh phral ki Engleska pućela e manušen sar šaj te ovel len bahtalo brak, sar te barjaćeren pekle ćhaven ja sar te istrajinen iako isi nepravda. Palo odova so šunela len, ov phenela: „So mislinena kotar akava savet kova tano pisimo angleder 2 000 berša?“ Tegani, bizo te phenel o lafi Biblija, ov čitini lenđe jekh šukar birimo stiho ko poklo telefoni (w19.07 21-22 ¶7-8).

Kobor amen valjani te manga e Devle? O Isus phenđa jekhe farisejese: „Mang e Jehova, te Devle, sa te vileja, sa te dušaja hem sa te gođaja“ (Mat. 22:36, 37). Amen na mangaja amaro vilo te ovel podelimo, već svako dive te manga le sa pobuter. Te šaj te manga e Devle, amen valjani te penđara le. Ki Biblija pisini: „Ko na mangela, na penđarđa e Devle, sose o Devel tano mangipe“ (1. Jov. 4:8). O apostol Pavle phenđa so amaro mangipe premalo Devel ka ovel pozoralo ked pošukar ka penđara hem ked ka haljova sar ov dikhela ko buća (Fil. 1:9). Ked amen počminđam te proučina i Biblija, amen počminđam te manga e Jehova, iako na đanđam sa olestar. Palo odova, so pobuter sikljiljam olestar amaro mangipe hine sa pozoralo. Odolese tano važno redovno te proučina i Biblija hem hor te razmislina odolestar so čitinaja (Fil. 2:16; w19.08 9 ¶4-5).

Ako akana služineja ko disavo aver vid andi služba, valjani te arakhe neve amalen. Ma bistri, so ako mangeja te ovel tut amala, tu valjani te ove amal. Vaćer tekle šukar iskustvija kola hine tut te šaj hem on te osetinen tikli radost. Ako valjani te mukhe i punovremeno služba sebepi so to bračno drug naborsalo, tegani ma krivin ole. Ama, ako tu hijan nabormo ma krivin kokri tut hem ma mislin so odoleja razočarinđan te rome ja te romnja. Ma bistri, tumen hijen jekh telo, hem ked leljen tumen, obećinđen e Jehovase so ka brininen jekh jekhestar so god te ovel (Mat. 19:5, 6). Ako valjani te mukhen i punovremeno služba sebepi so ka ovel tumen beba, a na planirinđen odova, tegani tumaro ćhavo valjani te đanel so ov tano považno nego i punovremeno služba. Uverinen tumare ćhave so tumen dikhena le sar „nagrada“ ando Devel (Ps. 127:3-5). Isto ađahar, vaćeren lese tumare šukar iskustvija kola hine tumen ki punovremeno služba. Ked ćerena odova šaj te pomožinen tumare ćhavese te služini e Jehovase punovremeno sar so tumen ćerđen (w19.08 22 ¶10-11).

O Baro Vavilon, kova predstavini i hovavni religija, but lađaćerđa e Devleso anav. Ov sikavđa e manušen hovajbe ando Devel. Sar jekh nemoralno đuvli, i hovavni religija na hine verno e Jehovase, sebepi so podržinđa o manušikane vladavine. I hovavni religija koristinđa pi moć hem po uticaj te iskoristini e manušen. Isto ađahar, oj mudarđa bute manušen hem e Devlese slugen (Otkr. 18:24; 19:2). O Jehova ka koristini „deš šinga“ andi „skerletno zver“ te uništini e „[bare] bludnica“. Odija zver predstavini o Ujedinjena nacije. O deš šinga predstavinena sa o politička sile kola podržinena o Ujedinjena nacije. Ko vreme kova o Devel odredinđa odola politička sile ka napadinen o Baro Vavilon. On „ka uništinen la hem ka huljaven la nangi“, ađahar so ka len olako barvalipe hem so ka mothoven averenđe so nane zorali (Otkr. 17:3, 16). Odova uništenje ka ovel odobor sigate so ka dićhol so desinđa pe „jekhe divese“. Odolese, okola so podržinena i hovavni religija ka oven šokirime sebepi so oj but puti phenđa: „O pharipa na ka dikhav“ (Otkr. 18:7, 8; w19.09 10 ¶10-11).

O Isus vićinđa sarinen te aven koro leste hem ov niked na ka odbacini nikas ko iskreno mangela te služini e Devlese (Jov. 6:37, 38). Sa e Hristese učenikija isi len čast zajedno e Isuseja te ćeren o zadatko kova o Jehova dinđa le. Amen šaj te ova sigurna so o Isus uvek ka ovel amencar te pomožini amen te ćera odova zadatko (Mat. 28:18-20). O ponizna manuša manglje te oven paše e Isuseja (Mat. 19:13, 14; Luka 7:37, 38). Sose odova hine ađahar? Te dikha kobor o Isus razlikujinđa pe ando fariseja. Odola e religijake vođe na manglje e manušen hem hine ponosna (Mat. 12:9-14). O Isus manglja e manušen hem hine ponizno. O fariseja manglje te oven but penđarde hem manglje te ćeren pe važna anglo avera. O Isus phenđa so odova nane šukar, hem sikavđa pekle učenikonen te oven ponizna hem te služinen averenđe (Mat. 23:2, 6-11). O fariseja hine len moć upro manuša hem odolese o manuša darandilje so ka ovel olencar ako na šunena len (Jov. 9:13, 22). O Isus ohrabrinđa e manušen ađahar so hine ljubazno hem šukar premalo lende. Da li sikljiljan diso ando Isus? (w19.09 20 ¶1; 21 ¶7-8; 23 ¶9).

O sastankija pomožinena amen te ova popaše e Jehovaja. Amaro stav premalo odova kozom tano važno redovno te ava ko sastankija, šaj te mothovi da li ka istrajina ked ka avel o progonstvo (Jevr. 10:24, 25). Sose šaj te phena odova? Ako već akana sebepi o tikne pharipa na avaja ko sastankija, so ka ovel ako valjani te rizikujina amaro đivdipe te šaj te ćeda amen amare phralencar hem phenjencar? Ki aver strana, ako hor ko amaro vilo odlučinđam redovno te đa ko sastankija, tegani na ka ćhinava ni ked o protivnikija ka zabraninen odova. Akana tano o vreme te manga te đa ko sastankija. Tegani, nisavo protivljenje, čak nisavi zabrana na ka ćhinavi amen te šuna pobuter e Devle, nego e manušen (Dela 5:29). Sikljov napamet o stihija kola najviše mangeja (Mat. 13:52). Iako amaro pamćenje nane savršeno, o Jehova šaj pekle sveto duhoja te pomožini amen te pamtina odola stihija (Jov. 14:26). Odola stihija šaj te pomožinen tut te aćhove verno hem paše e Jehovaja (w19.07 3 ¶5; 4 ¶8-9).

Da li bijandiljan palo 1914. berš? Ako ja, tu živinđan celo to đivdipe ko „poslednja dive“ ando akava sveto. Sare amen šunđam ando buća kola o Isus phenđa so ka oven ko amaro vreme. Ov phenđa so ka oven o mariba, o bokhalipa, o zemljotresija, o nabormipa, so o bezakonje ka barjol, hem so e Jehovaso narodo ka ovel progonimo (Mat. 24:3, 7-9, 12; Luka 21:10-12). Isto ađahar, amen dikhaja so o manuša tane asavke sar so o apostol Pavle prorekninđa. Amen služinaja e Jehovase hem sigurna hijam so živinaja „ko poslednja dive“ (Mih. 4:1). Kotar 1914. berš nakhlja but vreme. Akana hijam ko poslednja dive ando akava sveto. Odolese so o krajo tano odobor paše, valjani te đana o odgovorija ko disave važna pućiba: Kola događaja ka oven ko krajo ando „poslednja dive“? So o Jehova mangela amen te ćera đi ađićeraja sa odola događaja te oven? (w19.10 8 ¶1-2).

Amari istrajnost na zavisini ando šukar okolnostija, nego ando odova kobor osloninaja amen ko Jehova (Rimlj. 12:12). E Isuseso obećanje ko avdisutno citati mothovi so valjani te aćhova verna save god pharipa te ovel amen. Ako amen izdržinaja sa o pharipa kola isi amen akana, amari vera ka ovel pana pozorali angleder so ka počmini i bari nevolja. Sar so valjani te oslonina amen ko Jehova te šaj te ova istrajna, ađahar valjani te oslonina amen ko Jehova te šaj te ova hrabra. Sar šaj te sikljova pobuter te oslonina amen ko Jehova? Valjani svako dive te čitina oleso Lafi hem hor te razmislina sar o Jehova ko purano vreme spasinđa pe narodo (Ps. 68:20; 2. Petr. 2:9). Ked o vladarija ka napadinen amen ki bari nevolja, tegani ka valjani te ova hrabra hem te mothova poverenje ko Jehova sar niked angleder (Ps. 112:7, 8; Jevr. 13:6). Ako osloninaja amen ko Jehova akana, ka ovel amen hrabrost koja ka valjani amenđe ked ka napadini amen o Gog ando Magog. Amen hijam uverime so ka aćhova bezbedna sebepi so zaštitini amen e Jehovaso mangipe (1. Kor. 13:8; w19.10 18 ¶15-16).

Akava sveto tano ko e Bengese vasta. O buća kola tane ko sveto o Beng koristini ađahar te ovel amenđe pharo te cida amendar o lošna želja hem te borina amen amare manencar (Ef. 2:1-3). Oleso cilj tano te na manga e Jehova celone vileja, nego te manga o buća ko sveto. Palo odova so pisinđa ando akale svetoso krajo hem ando nevo sveto kova ka avel, o apostol Petar phenđa: „Me mangle, odolese so sa akava ađićerena, den sa tumendar ov te arakhi tumen čista, bizi mana hem ko mir“ (2. Petr. 3:14). Ked ićeraja amen ko akava savet hem ked daja sa amendar te aćhova moralno hem duhovno čista, amen mothovaja so mangaja te služina samo e Jehovase. O Beng hem oleso sveto hem ponodri ka mangen te ćhiven amen avera buća te ćhiva ko prvo than, a na e Jehova (Luka 4:13). Ama, kola god pharipa te ovel amen, amen na ka mukha niko hem ništa te lel e Jehovaso than. Amen hijam odlučna te služina samo e Jehovase, sose jedino ov odova zaslužini (w19.10 27 ¶4; 31 ¶18-19).

Disave bućenđe tano šukar te brinine tut. Na primer, amen šaj brininaja amen odolestar da li ćeraja o buća kola o Jehova hem o Isus mangena (1. Kor. 7:32). Ja šaj ćerđam disavo baro greh, hem tegani brinina amen so šaj te ćera te šaj te aćhova amala e Devleja. Ja šaj brininaja amen kotar amaro rom ja romni, andi amari porodica ja ando amare phralja hem phenja (1. Kor. 7:33; 2. Kor. 11:28). Ama, šaj but brininaja amen odolestar so ka ha ja so ka urava (Mat. 6:31, 32). Odolese so but brininaja amen, šaj ko prvo than ka ćhiva o materijalna buća. Ako mukhaja odova te ovel, amari vera ko Jehova šaj te slaboni hem amaro amalipe oleja na ka ovel zoralo (Mar. 4:19; 1. Tim. 6:10). Ako but brininaja amen šaj te pera ki pana jekh zamka. Šaj but te brinina amen so avera manuša mislinena amendar. I dar ando odova te na maren amenđe muj ja te na protivinen pe amenđe šaj te ovel pobari, nego i dar te na ćera diso so o Jehova na mangela. Odolese te na pera ki odija zamka, te dara ando manuša, valjani te molina e Jehova te del amen pobari vera hem hrabrost (Posl. 29:25; Luka 17:5; w19.11 15 ¶6-7).

Disave važna odluke niked na ka menjina. Na primer, amen ićeraja amen ki amari odluka te služina e Jehovase hem hijam odlučna te ova verna amare romese ja romnjaće (Mat. 16:24; 19:6). Ama, disave odluke šaj ka valjani te menjina. Sose? Odolese so amare okolnostija menjinena pe. So šaj te pomožini amen te ana šukar odluke? Molin tut asi mudrost. Sarinenđe amenđe ko disave buća „valjani mudrost“. Odolese rode e Jehovastar pomoć ked aneja i odluka, ama hem ked valjani te menjine i odluka koja anđan. Tegani, o Jehova ka pomožini tut te ane mudro odluka. Razmislin šukar hem istražin sa o buća. Rode savet ko e Devleso Lafi, čitin o publikacije andi e Jehovasi organizacija hem vaćer e manušencar kola ka den tut šukar savet (Posl. 20:18). Akala buća tane but važna ked odlučineja te menjine tikli buti, te seline tut ja ked valjani te birine ki koja škola ka đa te šaj kasnije te arakhe buti koja ka pomožini tut te ćere tikli služba (w19.11 27 ¶6-8).

O Jehova arakhlja rešenje sar te oslobodini amen ando greh. Sebepi o Isus, amen šaj te ova oslobodime. Pobuter ando 700 berš angleder te avel o Isus ki phuv, o Isaija prorekninđa so ki budućnost ka ovel pobaro oslobođenje. Odija sloboda ka ovel pobari nego okija koja dobinđe o Izraelcija ko jubilarno berš. O prorok Isaija pisinđa: „O duh ando Suvereno Gospod Jehova tano upro mande, sose o Jehova pomazinđa man te vaćerav o šukar haberi e krotkonenđe. Bićhalđa man te paćarav o rane okolenđe kolengo vilo tano phago, te objavinav i sloboda e zarobime manušenđe hem te phravav o jaćha e zarobime manušenđe“ (Is. 61:1). Upro kaste odnosini pe akava proročanstvo? Akava važno proročanstvo kotar oslobođenje ando ropstvo, počminđa te ispunini pe palo odova so o Isus počminđa pe službaja. Ked hine ki sinagoga, ko than kuri barilo, ko Nazaret, o Isus čitinđa e Isaijase lafija e Judejcenđe kola ćedinđe pe odothe hem primeninđa len upro peste (Luka 4:16-19; w19.12 9-10 ¶6-8).

Te šaj te izdržine o progonstvo tuće valjani hrabrost. Ako osetineja so na hijan hrabro manuš, so šaj te ćere? Ma te bistre so i pravo hrabrost na zavisini odolestar kobor hijan baro, zoralo ja sposobno. Razmislin kotar o terno David ked suočinđa pe e Golijateja. Ked uporedinaja e Davide odole but bare manušeja, ov hine but tikno hem but slabo hem na hine opremimo te borini pe. O David, čak na hine le ni mač. Ama, ov hine but hrabro. Ov hrabro prastandilo te borini pe odole bare hem ponosno manušeja. Sose o David hine odobor hrabro? Ov hine uverimo so o Jehova tano oleja (1. Sam. 17:37, 45-47). O David na dikhlja kobor o Golijat hine pobaro olestar. Ov dikhlja kobor o Golijat tano tikno ked uporedini pe e Jehovaja. So sikljovaja olestar? Hem amen ka ova hrabra ako hijam uverime so o Jehova tano amencar hem so amare protivnikija nane ništa ked uporedinaja len e Najzorale Devleja (2. Let. 20:15; Ps. 16:8; w19.07 5 ¶11-13).

O Tihik hine lojalno hrišćanin upro kaste o apostol Pavle šajinđa te oslonini pe (Dela 20:4). Koro 55. berš, ki nevi era, o Pavle organizujinđa te ćedel pe o prilog e phralenđe ki Judeja. Ov predložinđa hem o Tihik te pomožini ki akija važno buti (2. Kor. 8:18-20). Ked o Pavle prvo puti hine phanlo ko Rim, o Tihik služinđa sar oleso glasnik. Prekalo oleste o Pavle bićhalđa lila e skupštinenđe ki Azija hem ohrabrinđa e phralen ko odola skupštine (Kol. 4:7-9). O Tihik aćhilo e Pavleso pouzdano amal (Titu 3:12). Ko odova vreme, na hine sa o phralja hem o phenja odobor pouzdana sar o Tihik. Koro 65. berš, ki nevi era, ked dujto puti hine phanlo, o Pavle pisinđa so but phralja andi rimsko pokrajina Azija, na manglje te družinen pe oleja sose šaj darandilje ando protivnikija (2. Tim. 1:15). Ki aver strana, o Pavle šajinđa te oslonini pe upro Tihik hem dinđa le aver zadatko (2. Tim. 4:12). O Pavle but ceninđa asavke šukar amale sar so hine o Tihik (w20.01 10 ¶7-8).

Ako na hijan sigurno da li o Jehova pomazinđa tut e sveto duhoja, razmislin kotar akala važna pućiba: Da li isi tut bari želja te ćere e Jehovasi volja? Da li mislineja so hijan but revno ki služba? Da li uživineja ko odova te proučine e Devleso Lafi hem te istražujine e Devlese hor buća? Da li mislineja, so o Jehova ko posebno način blagoslovini tikli služba? Da li osetineja bari odgovornost te pomožine averenđe te sikljon kotar Jehova? Da li dikhljan so o Jehova ćaće pomožinđa tuće ko razna načinija? Ako toklo odgovor tano ja ko sa akala pućiba, da li odova mothovi so hijan vićimo ko nebo? Na. Sose na? Sose sa e Devlese sluge šaj te osetinen pe ađahar. Ama, čim pućeja tut da li hijan pomazimo ja na, odova značini so na hijan. Okola kola tane birime ando Jehova, nane len sumnja. On tane uverime soj tane pomazanikija (w20.01 23 ¶14).