Maj

So šaj te ćeren o roditeljija te šaj te pomožinen pe ćhavenđe te sikljon te mangen e Jehova? Molin e Jehova te pomožini tut, sar o Manoje. Isto ađahar, mothov te ćhavenđe šukar primer. Odova so pheneja te ćhavenđe tano but važno. Ama, odova so ćereja, te ćhave niked na ka bistren. Sigurna hijam so o Josif hem i Marija hine but šukar primer pe ćhavenđe hem e Isusese. O Josif ćerđa phari buti te šaj te brinini pe andi pi porodica. Ama, o Josif ano pe ćhavengo vilo ćhivđa i želja te služinen e Jehovase (Pon. zak. 4:9, 10). Ov igarđa pekle porodica ko Jerusalim te slavinen i Pasha (Luka 2:41, 42). Šaj disave dada tegani bi phenena soj tano pharo, so valjani tuće but pare hem vreme te igare te porodica ko jekh asavko drumo. Ama, o Josif ceninđa o duhovna buća hem isto odova sikavđa hem pe ćhaven. Isto ađahar, i Marija but šukar đanđa e Devleso Lafi. Odoleja so vaćerđa hem so ćerđa, oj sikavđa pe ćhaven te mangen e Devleso Lafi (w19.12 24-25 ¶9-12).

Odova so o Jehova ćerđa ked o Adam grešinđa mothovi amenđe kobor mangela amen. Sebepi so o Adam na šunđa pe nebesko Dade, ni ov, a ni oleso potomstvo na hine više deo andi e Jehovasi porodica (Rimlj. 5:12). Ama, o Jehova ćerđa diso te šaj te pomožini e Adamese ćhavenđe. O Jehova kazninđa e Adame, ama na mukhlja oleso potomstvo bizi nada. Ov odmah dinđa po lafi so o manuša kola ka šunen le palem ka oven deo andi olesi porodica (Post. 3:15; Rimlj. 8:20, 21). Te šaj odova te ćerel, o Jehova dinđa pe Ćhave, e Isuse, sar i otkupno žrtva amenđe. Ko asavko način, o Jehova mothovđa so but mangela amen (Jov. 3:16). Ov tano najšukar Dad. Ov šunela amare molitve, brinini pe ando amare materijalna hem duhovna potrebe. Ov sikavi amen hem pomožini amenđe. Isto ađahar, ki budućnost ađićerena amen but blagoslovija. Odova so o Jehova mangela amen hem brinini pe amendar, ćerela amen te ova but bahtale (w20.02 6 ¶16-17; 7 ¶20).

Da li nekad hijan le but uznemirimo sebepi tekle brige? Šaj odova hine sebepi so neko povredinđa tut lafencar ja ćerđa tuće diso ili hijan uznemirimo sebepi so tu diso phenđan ja ćerđan. Na primer, šaj ćerđan disavo greh hem mislineja so o Jehova niked na ka oprostini tuće. Te ovel pana pogore, šaj ki ti godi mislineja so odova so but brinineja tut značini so nane tut zorali vera hem so hijan lošno manuš. Razmislin kotar nekobor primerija andi Biblija. I Ana, i daj ando prorok Samuilo, hine la zorali vera. Ama, oj hine but uznemirimi sebepi so neko andi olaki porodica povredini la hine lafencar (1. Sam. 1:7). O apostol Pavle, hine le zorali vera, ama mučinđa le „i briga aso sa o skupštine“ (2. Kor. 11:28). O kralj David hine le zorali vera hem odolese o Jehova but manglja le (Dela 13:22). Pa ipak, o David ćerđa greške hem sebepi odova hine but uznemirimo (Ps. 38:4). O Jehova svakone olendar utešinđa hem dinđa len mir (w20.02 20 ¶1-2).

Ked predajineja tut e Jehovase tu ki jekh posebno molitva pheneja e Jehovase so mangeja te služine lese zauvek. Ked predajinena to đivdipe e Jehovase, tu „odreknineja tut“ kokri tutar. Kotar odova trenutko, tu pripadineja e Jehovase, a odova tano bari čast (Rimlj. 14:8). Ki odija molitva, tu pheneja lese so kotar odova dive i najvažno buti ko to đivdipe ka ovel te služine olese, a na te ugodine tuće. To predanje tano zavet, odnosno jekh svečano obećanje kova deja e Devlese. O Jehova na ćhivela tut zorjeja te de jekh asavko zavet. Ama, ked dinđan zavet, ov ađićeri tutar te ispunine le (Ps. 116:12, 14). To predanje tano diso maškaro tute hem o Jehova, a o krštenje tano diso javno. Odova ćerela pe anglo avera manuša, obično ko pokrajinsko sastanko ja ko kongres. To krštenje tano dokaz so već predajinđan to đivdipe e Jehovase. Odolese, ked krstineja tut, tu averenđe mothoveja so mangeja e Jehova, te Devle, celone vileja, dušaja, gođaja hem snagaja hem so hijan odlučno te služine lese zauvek (Mar. 12:30; w20.03 9 ¶4-5).

O Beng mangela o manuša te na dikhen jasno e Jehova. Ked mulje e Isusese apostolija, disave otpadnikija počminđe te sikaven o hovavne sikaviba (Dela 20:29, 30). On počminđe te ruminen o ćaćipe odolestar koj tano o pravo Devel. Na primer, ked prevodinđe i Biblija on na koristinđe e Jehovaso nav, nego meninđe le e lafeja „Gospod“. Odoleja ćerđe te ovel popharo e manušenđe kola čitinđe i Biblija, te dikhen i razlika maškaro o Jehova hem avera „gospodija“ kola pominena pe ki Biblija (1. Kor. 8:5). O lafi „Gospod“ on koristinđe hem e Jehovase hem e Isusese. Odolese hine pharo e manušenđe te haljon so o Jehova hem o Isus nane ista osobe (Jov. 17:3). Sa akava anđa đi odova te širini pe o verovanje ko Trojstvo, o sikavibe kova nane ko e Devleso Lafi. Sebepi odova, but manuša na đanena koj tano o pravo Devel hem verujinena so našti te penđaren e Devle. Savo baro hovajbe! (Dela 17:27; w19.06 5 ¶11).

Jekh način sar te ćera potpuno amari služba tano te ova pošukar ko propovedibe (Posl. 1:5; 1. Tim. 4:13, 15). O Jehova mothovđa amenđe bari čast odoleja so mukhlja te ova olese „saradnikija“ (1. Kor. 3:9). Ked amen prosudinaja „soj tano najvažno“ hem ked ćhivaja i služba ko prvo than, tegani ka služina „e Jehovase bahtalipaja“ (Fil. 1:10; Ps. 100:2). Sar e Devleso sluga, šaj te ove sigurno so ov ka del tut snaga koja valjani tuće te ćere potpuno ti služba iako isi tut problemija (2. Kor. 4:1, 7; 6:4). Bilo te šaj te đa ki služba but ja hari, tu ka ovel tut razlog te ove bahtalo ako odova ćereja celone vileja (Gal. 6:4). Ked potpuno ćereja ti služba, tu tegani mothoveja so mangeja e Jehova hem te pašutnen. „Ked ćereja odova ka spasine hem tut hem okolen so šunena tut“ (1. Tim. 4:16; w19.04 6 ¶15; 7 ¶17).

Jekh but bari zamka so o Beng hem olese demonja koristinena te hovaven e manušen tani spiritizam. Okola so ćerena spiritizam phenena so on đanena hem kotrolišinena o buća kola avera manuša našti. Na primer, nesave phenena so on šaj prekali astrologija ja gatanje te dikhen so ka ovel ki budućnost. Avera šaj te ćeren te dićhol so on šaj te vaćeren e mulencar. A disave ćerena mađije. Kobor o manuša verujinena ko spiritizam? Ko 18 phuvja ki Latinsko Amerika hem ko Karibi hine ćerdi jekh anketa. Oj mothovđa so svako trito manuš verujini ki magija hem ko mađije. A skoro isto odobor manuša verujinena so šaj te vaćeri pe e duhoncar. Jekh aver anketa ćerđa pe ko 18 phuvja ki Afrika. Odothe svako dujto manuš verujini ko mađije (w19.04 20-21 ¶3-4).

O Jehova o Devel mrzini svako lošnipe (Ps. 5:4-6). Šaj samo te zamislina kobor tano odvratno anglo olese jaćha ked seksualno zlostavinena pe o ćhavore! Odolese so hijam e Jehovase sluge, amenđe tano odova odvratno hem odova nane dozvolimo ki skupština (Rimlj. 12:9). Ked seksualno zlostavinena pe o ćhavore, odova tano protiv e Hristeso zakon! (Gal. 6:2). Sa okova so o Isus sikavđa pe lafencar hem pe primereja temeljini pe ko mangipe hem mothovi pravda. O prava hrišćanja šunena akava zakon hem pe ćhavencar ponašinena pe ađahar te šaj o ćhave te osetinen pe sigurna hem soj tane mangle. Ama, seksualno te zlostavinen pe o ćhavore tano sebično hem nepravedno. Sebepi odova o ćhavore osetinena pe nesigurna hem so niko na mangela len. Nažalost, odova so seksualno zlostavinena pe o ćhavore tano ozbiljno problemi kova čak utičinđa hem ko prava hrišćanja. Sose? O lošna hem o hovavne manuša isi kotar na hem disave olendar pokušinena te khuven ki skupština (2. Tim. 3:13). Uzo odova, disave kola tane deo andi skupština dozvolinđe olenge telesna želje te legaren len hem seksualno zlostavinđe e ćhavoren (w19.05 8 ¶1-3).

I osoba koja tani obeshrabrimi šaj nane la snaga te molini pe. Šaj osetini pe so nane vredno o Jehova te šunel olake molitve. Jekh način sar šaj amen te utešina odola osoba tano te molina amen zajedno ola, ađahar so ka pomina lako nav. Ki odija molitva amen šaj te vaćera kobor amen hem avera ki skupština mangaja la. Isto ađahar, šaj te molina e Jehova te smirini hem te utešini pe mangle sluga. Asavke molitve šaj but te značinen odola osobaće kola utešinaja. Razmislin angleder so ka vaćere. O lafija kola vaćeraja bizo te razmislina, šaj te dukhaven averen. A o blaga lafija tane sar jekh leko (Posl. 12:18). Odolese, molin e Jehova te pomožini tut te arakhe blaga hem utešna lafija kola ka smirinen e osoba. Ma bistri so e Jehovase lafija kola tane ki Biblija but tane pozorale kotar sa so šaj amen te vaćera (Jevr. 4:12). Ked utešinaja averen, amen ađahar podsetinaja len ko odova kobor o Jehova olen mangela. Nek ovel amen ki godi so o Jehova tano isto ađahar Devel andi pravda. O Jehova đanela svakona osoba koja hine zlostavimi, iako niko aver na đanela. Ov ka kaznini svakone manuše kova na kajini pe sebepi odova so ćerđa (Br. 14:18; w19.05 18 ¶18; 19 ¶19, 21).

O Beng mangela te irina amaro dumo e Jehovase. Te šaj te ćerel odova, ov pokušini te utičini hem te kontrolišini amaro razmislibe hem ćhivela amen te razmislina sar oleste. Ov mangela te đa palo oleste hem odolese pokušini te prevarini amen, ađahar so koristini amare želje (Kol. 2:4). Da li amen ćaće hijam ki bari opasnost o Beng te hovavi amen? Ja, hijam ki bari opasnost! Setin tut, o Pavle na pisinđa o upozorenje kova tano pisimo ko Kološanima 2:8 e manušenđe kola na verujinđe ko Devel. Ov pisinđa odova e hrišćanenđe kola hine pomazime e sveto duhoja (Kol. 1:2, 5). Ako odola hrišćanja tegani hine ki opasnost, avdije amen hijam ki pana pobari opasnost (1. Kor. 10:12). Sose odova phenaja? O Beng tano fordimo tele ki phuv, hem dela sa pestar te hovavi e Devlese verna slugen (Otkr. 12:9, 12, 17). Uzo odova, živinaja ko vreme ked o lošna hem o hovavne manuša ovena „ando lošna pološna“ (2. Tim. 3:1, 13; w19.06 2 ¶1-2).

O Ilija but darandilo ked i kraljica Jezavelja phenđa so ka mudari le. Odolese, ov našlja ki Virsaveja. Ulo odobor obeshrabrimo, so manglja te merel. Sose osetinđa pe ađahar? O Ilija hine nesavršeno manuš, „obično manuš sar amen“ (Jak. 5:17). Šaj osetinđa pe so o problemija tane but bare hem hine but umorno. Šaj mislinđa so sa so ćerđa te podstaknini e manušen te aćhon uzo Jehova ništa na vredini, so o buća ko Izrael na đana ko pošukar, hem so jedino ov aćhilo te služini e Jehovase (1. Kralj. 18:3, 4, 13; 19:10, 14). O Jehova haljilo e Ilijase osećanja hem na holjanđa upro leste ked phenđa sar osetini pe. Ov pomožinđa e Ilijase palem te ovel le snaga (1. Kralj. 19:5-7). Palo odova, o Jehova dolinđa le šukaripaja hem ispravinđa oleso razmislibe, ađahar so mothovđa lese poklo baro zoralipe. Phenđa lese so isi pana 7 000 manuša ko Izrael kola na služinena e Valese (1. Kralj. 19:11-18). Ko akala načinija o Jehova mothovđa e Ilijase so mangela le (w19.06 15-16 ¶5-6).

Uvek šun o uputstvija. Ako šunaja o uputstvija kola dobinaja kotar pouzdana hem poverljiva phralja, ka izbegnina o problemija. Na primer, ki jekh phuv kuri tane amare aktivnostija zabranime, o odgovorna phralja phenđe e objaviteljenđe te na den i literatura ki služba. Ama, jekh pioniri na šunđa akava uputstvo. So ulo palo odova? Samo so završinđe i služba, ole hem avere phralen astarđa i policija. Izgleda so i policija pratinđa len hem lelja i literatura koja on dinđe e manušenđe. So sikljovaja kotar akava iskustvo? Amen valjani te šuna o uputstvija, čak ked na slažinaja amen olencar. O Jehova uvek ka blagoslovini amen ked ka sarađujina e phralencar kas ov ćhivđa te predvodinen maškaro amende (Jevr. 13:7, 17; w19.07 12 ¶17).

I poslednjo rat ando po đivdipe ki phuv, o Isus mothovđa so o sveto ka mrzini sa okolen kola mangena te oven olese učenikija (Jov. 17:14). Kotar tegani, pa sa đi avdije, okola kola na mangena e Jehova progoninena olese verno slugen. Sar avela popaše o kraj ando akava sveto, šaj te ađićera sa pobare progonstvija (Mat. 24:9).Sar šaj pana akana te pripremina amen aso progonstvo? Na valjani te zamislina sa o lošna buća so šaj te desinen pe amenđe, sose i dar hem i sikiracija šaj te mudaren amen. Ako razmislinaja odolestar, i dar šaj te ovel odobor bari so šaj te ćhinavi amen te služina e Jehovase, čak angleder te ovel amen bilo save problemija (Posl. 12:25; 17:22). I dar tani moćno oružje kova amaro „protivniko, o Beng“ koristini protiv amende (1. Petr. 5:8, 9). Odolese tano but važno akana te zorjaćera amaro amalipe e Jehovaja (w19.07 2 ¶1-3).

O apostolija sigurno hine but bahtale ked ćedinđe pe ki gora. Palo poklo uskrsenje, o Isus organizujinđa palem te ćeden pe ko odova than (Mat. 28:16). Odova možda hine ked o Isus „pojavinđa pe anglo pobuter ando panđšel phralja ko isto vreme“ (1. Kor. 15:6). Sose o Isus vićinđa pe učenikonen ko akava sastanko? Tegani dinđa len jekh posebno zapovest: „Odolese, đan hem ćeren učenikonen ando manuša kotar sa o narodija“ (Mat. 28:18-20). O učenikija kola šunđe e Isusese lafija, palo odova ulje deo andi hrišćansko skupština ko prvo veko. I glavno uloga kotar odija skupština hine te ćeren pe pobuter e Hristese učenikija. Avdije, ki celo phuv isi prekalo deš hiljade skupštine, hem olengi uloga niked na meninđa pe (w19.07 14 ¶1-2).

Jekh pokrajinsko nadgledniko ki Norveška phenela so o manuša kola na mangena te vaćeren kotar o Devel, mangena te vaćeren kotar odova so ovela ko sveto. Ked resela nekas ov pozdravini le hem pućela: „So mislineja, da li šaj te ovel amen pošukar budućnost? Da li šaj te nadina amen so o političarija, o naučnikija ja neko aver ka ćerel odova?“ Ked šukar šunela len, ov čitini ja citirini jekh stih kova vaćeri kotar pošukar budućnost. Disave tane iznenadime so e biblijake proročanstvija phenena so i phuv na ka ovel uništimi hem so o šukar manuša ka živinen večno upro late (Ps. 37:29). Amen valjani te koristina različita načinija đi vaćeraja e manušencar. Sose? Odolese so diso so ka zanimini jekhe manuše, avere šaj ka cidel ando odova te šunel. Disave na mangena te vaćeren ando Devel ja andi Biblija, ama avera pobuter mangena te vaćeren kotar avera buća. Koja god situacija te ovel, amen valjani te vaćera sarinencar (Rimlj. 1:14-16). O Jehova ćerela o ćaćipe te barjol ko vilo okolengo kola mangena odova soj tano ispravno (1. Kor. 3:6, 7; w19.07 22-23 ¶10-11).

E Devleso baro mangipe podstaknini amen te manga amare phralen (1. Jov. 4: 20, 21). Šaj mislinaja so ka ovel lokho te manga amare phralen hem phenjen, sose sare služinaja e Jehovase hem trudinaja amen te ova sar oleste. Amen đaja palo e Isuseso primer, kaso mangipe hine odobor baro so dinđa poklo đivdipe amenđe. Ama, disavo puti šaj te ovel pharo te šuna i zapovest koja phenela te manga jekh jekhe. I Evodija hem i Sintihija hine revna phenja kola služinđe zajedno e Pavleja. Ama, šaj sebepi so averćhane dikhlje ko buća, on dozvolinđe odova te rumini olengo amalipe. Ko lil kova pisinđa e skupštinaće, a ki koja služinđe akala phenja, o Pavle posebno pominđa e Evodija hem e Sintihija hem savetujinđa len „te ovel len ista mislija“ (Fil. 4:2, 3). O Pavle morandilo te del savet celone skupštinaće: „Ćeren sa bizo te žalinen tumen ja te svađinen tumen“ (Fil. 2:14; w19.08 9 ¶6-7).

But skupštine sar hem disave phralja hem phenja ćerena sa so šaj te pomožinen okolenđe kola tane ki punovremeno služba hem ponodri te aćhon ki pi služba. On ćerena odova ađahar so hrabrinena len, pomožinena len materijalno ja pomožinena len te brininen pe nekastar kotar olengi porodica. Ako disave više nane ki punovremeno služba hem akana tane ki tikli skupština, ma mislin so on na ćerđe diso šukar ja so diso pogrešinđe. Nego trudin tut te pomožine len te prilagodinen pe. Mothov lenđe soj tano tuće drago soj tane odothe hem pohvalin len, iako akana sebepi po sastipe našti te ćeren odova so ćerđe angleder. De sa tutar šukar te penđare len. Sikljov olendar hem ando olenge iskustvija. Okolenđe so nane više ki punovremeno služba valjani pomoć te arakhen pese ćher, buti ja te penđaren i diz hem avera buća (w19.08 23-24 ¶12-13).

O Gog ka verujini ko „e manušeso zoralipe“, ki olesi vojno sila (2. Let. 32:8). Amen ka verujina ko Jehova, ko amaro Devel hem sebepi odova ka dićhova sar diline anglo narodija. O Baro Vavilon hine but moćno, ama olese devela na zaštitinđe le andi „skerletno zver“ hem ando olake „deš šinga“ (Otkr. 17:16). O Gog ka mislini so šaj lokheste te uništini amen. Sar „ked o oblakija ućharena i phuv“, ađahar hem ov ka napadini e Jehovase narodo. Ama, o Gog ka haljol so pelo ki zamka. Sar o faraon ko Crveno more, hem ov ka haljol so borini pe protiv o Jehova (Izl. 14:1-4; Jezek. 38:3, 4, 18, 21-23). O Hrist hem olesi nebesko vojska ka braninen e Devlese narodo hem ka uništinen e Goge hem olese vojska (Otkr. 19:11, 14, 15). Ama, ko Armagedon, so ka ovel e Devlese najbare dušmaneja, e Bengeja, kova hovavi e narodon hem ćhivela len te napadinen e Devlese narodo? O Isus ka fordel ole hem olese demonen ko bezdan hem odothe ka oven phanle hiljada berš (Otkr. 20:1-3; w19.09 11-12 ¶14-15).

Amen isi amen nada so sa so o Jehova phenđa ka ovel. Ama, ked dićhola amenđe so o buća kola ađićeraja te oven, na ispuninena pe, tegani šaj te našala amari revnost. Šaj te ova but obeshrabrime (Posl. 13:12). Odova ulo 1914. berš. Tegani, disave pomazime hrišćanija mislinđe so ka đan ko nebo. Ama, ked odova na ulo, sar on borinđe pe? On na odustajinđe kotar olengi trka e đivdipase, odolese so olenđe ko prvo than na hine samo te đan ko nebo, već verno te služinen e Devlese. On hine odlučna istrajno te prastan pikli trka. Verovatno hem tu jedva ađićereja o vreme ked o Jehova ka cidel i lađ kotar poklo anav, ked ka mothovi so oleso način sar vladini tano najšukar hem ked ka ispunini sa odova so phenđa. Ov sigurno so sa odola buća ka oven ko vreme kova o Jehova odredinđa. Đi tegani, hem ponodri služin e Jehovase hem niked ma ov obeshrabrimo odolese so but ađićereja (w19.08 4-5 ¶9-10).

Puć kokri tut: Da li hijum penđardo sar jekh ponizno hem blago manuš? Da li spremno ćerava i buti koja nane odobor važno te šaj te služinav averenđe? Da li hijum ljubazno premalo avera? Đi hine pe učenikonencar, o Isus dinđa sa pestar on te osetinen pe šukar oleja hem uživinđa te sikavi len (Luka 10:1, 19-21). Ov podstakninđa pe učenikonen slobodno te pućen hem manglja te šunel so on mislinena (Mat. 16:13-16). Sar so jekh luludi napredujini ked tani zaštitimi ando šudro, isto hem e Isusese učenikija šukar napredujinđe. On šunđe odova so o Isus sikavđa len hem anđe šukar plod kova dićhilo ko odova so ćerđe. Da li isi tut disavo autoritet upro avera? Ako isi tut, tegani puć kokri tut: „Sar ponašinava man premalo avera ki buti, ja ćhere? Da li dava sa mandar te ovel mir? Da li avera šaj slobodno te pućen man so interesini len? Da li spremno šunava so avera mislinena? Niked na mangaja te ova sar o fariseja. On holjanđe ked o manuša na složinđe pe odoleja so on sikavđe, hem hine gruba premalo manuša kola na mislinđe sar on (Mar. 3:1-6; Jov. 9:29-34; w19.09 20 ¶1; 23 ¶9-11).

Disavo puti, odola lafija o vladarija ko sveto koristinena ked mangena te phenen so o odnosija maškaro disave narodija tane pošukar. Ama, i objava „mir hem sigurnost“ andi koja i Biblija vaćeri ka ovel averćhane. Sose? Odolese so, ked odova ka ovel o manuša ka mislinen so o vladarija ćaće uspinđe te ćeren akava sveto te ovel pošukar hem posigurno than e đivdipase. Ama, tegani i „bari nevolja“ ka počmini hem „iznenada ka resel len o uništenje“ (Mat. 24:21). Na đanaja sose o vladarija odova ka objavinen niti sar ka izgledini odija objava. Na đanaja ni da li ka ovel samo jekh objava ja ka oven nekobor asavke objave. So god te ovel, jekh buti đanaja: O vladarija našti te ćeren te ovel mir ko sveto, hem odolese na valjani te mukha te prevarini amen odija objava. Amenđe odova samo ka ovel znak so „e Jehovaso dive“ samo so na počminđa! (1. Sol. 5:2; w19.10 8-9 ¶3-4).

Ko Armagedon celo e Bengeso sveto ka ovel uništimo. Nane amen sostar te dara, odolese so odova ka ovel e Devleso maribe (Posl. 1:33; Jezek. 38:18-20; Zah. 14:3). Ked o Jehova ka zapovedini, tegani o Isus ka legari e Devlese vojska ko maribe. Oleja ka oven o pomazana hrišćanija hem milijarde anđelija. On zajedno ka maren pe protiv o Beng, olese demonija hem olengi vojska koja tani ki phuv (Otkr. 6:2; 17:14). O Jehova dinđa po lafi: „Nisavo oružje kova tano ćerdo protiv tute na ka ovel uspešno“ (Is. 54:17). O „baro mnoštvo“ ando e Jehovase verna sluge, ka „[aven] andi bari nevolja“ đivde. Palo odova, on ka nastavinen te služinen lese (Otkr. 7:9, 13-17). I Biblija uverini amen so o Devel ka spasini amen. Amen đanaja so „o Jehova arakhi okolen kola tane olese verna“ (Ps. 31:23). Sa okola so mangena hem hvalinena e Jehova ka ovel len prilika te dikhen sar oleso anav ka ovel posvetimo (Jezek. 38:23; w19.10 18-19 ¶17-18).

Sar o krajo ando „poslednja dive“ tano sa popaše, amen ka ovel amen sa pobare problemija (2. Tim. 3:1). Na primer, palo izborija ki jekh phuv, ki zapadno Afrika, hine protestija hem nasilje. Prekalo šov masek, amare phralenđe hem e phenjenđe hine but pharo sebepi i situacija koja hine odothe. So pomožinđa len te izdržinen akala pharipa? Disave phralja hem phenja kola živinđe ko bezbedna thana phravđe pekle udara odole phralenđe hem phenjenđe. Jekh phral phenđa: „Ki asavki situacija, me hijum le bahtalo sose hijum le mekle amalencar. Šajinđam te ohrabrina jekh jekhe.“ Ked i „bari nevolja“ ka počmini, ka ova bahtale ako ka ovel amen šukar amala kola mangena amen (Otkr. 7:14). Odolese, akana tano važno te zorjaćera amaro amalipe amare phralencar (1. Petr. 4:7, 8). Sose? Odolese so amare dušmanija ka probinen te odvojinen amen ađahar so ka koristinen razna hovajba. Olengo cilj ka ovel amen te na verujina amare phralenđe hem te na podržina len. Ama, on na ka uspinen. On našti te ćhinaven amen te manga amare phralen (w19.11 2 ¶1-2; 7 ¶19).

O Beng, kova tano „o dad ando hovajbe“, prekalo manuša kolen ov kontrolišini širini o hovajba ando Jehova hem ando amare phralja hem phenja (Jov. 8:44). Na primer, o otpadnikija prekalo veb-sajtija ja prekalo radio, prekali televizija ja prekalo novine, vaćerena hovajba andi e Jehovasi organizacija. Odola hovajba tane jekh ando „e Lošnosese strele kola thabljona“. So valjani te ćera ako neko počmini te vaćeri amenđe asavke hovajba? Amen na ka šuna len. Sose? Odolese so verujinaja e Jehovase hem isi amen poverenje ko amare phralja. Odolese, nisar na mangaja te ova ko kontakt e otpadnikonencar. Podijekh puti šaj interesini amen te šuna so on phenena, ama nane amen ni jekh razlog te šuna len niti te khuva ki rasprava olencar, niti te oslabinen amari vera. Da li hine tuće pharo te na šune e otpadnikonen hem te na khuve ki rasprava olencar? Pohvalno tano ako cidaja amen olendar. Ama, šukar tano te arakha amen sose o Beng koristini hem avera buća protiv amende (w19.11 15 ¶8; 16 ¶11).

Ked odlučineja diso, puć tut sose mangeja te ane odija odluka. O Jehova mangela amen uvek te ova iskrena. Odolese ked odlučinaja diso, valjani iskreno te priznajina hem amenđe hem averenđe sose ađahar odlučinđam. Ako na hijam iskrena šaj te ovel amenđe pharo te ćera odova so odlučinđam. Na primer, jekh terno phral odlučini te ovel stalno pioniri. Ama palo disavo vreme, olese tano pharo te pherel o satija kola valjani te ovel le sar pioniri hem ov više na uživini ki služba. Ov šaj mislinđa so ulo pioniri sose manglja te ćerel e Jehova bahtalo. Ama, šaj ulo pioniri samo sebepi so manglja te radujini pe roditeljen ja nekas avere. Zamislin jekhe manuše kova proučini i Biblija. Ov odlučini te ćhinavi o cigare. Iako tano olese pharo, ov na pušini jekh ja duj kurće. Ama, ov palem počmini te pušini. Ko krajo, uspini te ćhinavi o cigare! O mangipe premalo Jehova hem olesi želja te ćerel e Jehova bahtalo pomožinđe le te cidel pe andi odija lošno navika (Kol. 1:10; 3:23; w19.11 27 ¶9; 29 ¶10).

O apostol Pavle hine uverimo so ka resel đi ko poklo cilj hem so ka dobini i nagrada. Sar pomazimo hrišćanin, hine le nada so ka dobini i nagrada te ovel ko nebo. Ama, te šaj te lel odija nagrada ov haljilo so valjani but te trudini pe (Fil. 3:14). O Pavle vaćerđa jekh primer e Filipljanenđe te pomožini len te na bistren poklo cilj. O Pavle setinćerđa e phralen ko Filipi so olengo građanstvo tano ko nebo (Fil. 3:20). Sose odova hine važno te phenel? Ko odova vreme, o manuša ćaće manglje te ovel len rimsko građanstvo. Sebepi odova hine len disave prava. Ama, o pomazime hrišćanija, hine len jekh pošukar građanstvo kova ka anel lenđe but pobare blagoslovija. O rimsko hem o nebesko građanstvo naštinđa te uporedini pe. Avdije, o pomazime hrišćanija tane but baro primer amenđe đi dena sa pestar te dobinen pikli nebesko nagrada (w19.08 6 ¶14-15).

Odija sloboda hine pošukar andi sloboda koja o Izraelcija dobinđe ked hine o berš ando oprostibe (Lev. 25:8-12). Na primer, o manuš kova hine oslobodimo ko berš ando oprostibe, šaj hine palo odova palem te ovel robo hem ko krajo te merel. Ama, i sloboda koja o Isus dela amen ka trajini večno. Ki Pedesetnica 33. berš n. e, o Jehova pe sveto duhoja pomazinđa e apostolen hem averen verna muršen hem đuvlen. Ov usvojinđa len te oven olese ćhave, te šaj ked ka avel o vreme te uskrsninen ko nebo te vladinen e Isuseja (Rimlj. 8:2, 15-17). On hine prva kola dobinđe o blagoslovija kola anđa i sloboda kolatar o Isus vaćerđa ki sinagoga (Luka 4:16-19, 21). On hine osobodime ando hovavne sikljoviba hem adetija kola na hine ando e Devleso Lafi, a ando kola o verska vođe sikavđe e manušen. Isto ađahar, anglo e Devlese jaćha on hine oslobodime ando greh kova legari ko meribe. O simbolično berš ando oprostibe ja o jubilarno berš kova počminđa ked e Isusese učenikija hine pomazime ko 33. berš n. e, ka završini pe ko krajo ando e Isusesi hiljadaberšengi vladavina (w19.12 11 ¶11-12).

Tumen o roditeljija, pomožinen tumare ćhavenđe te arakhen hem te birinen šukar amalen. Hem o dad hem i daj valjani te đanen kasa družinena pe tumare ćhave hem so ćerena pekle amalencar. Isto ađahar, o roditeljija valjani te đanen kasa olenge ćhave družinena pe prekalo internet ja prekalo telefoni. Odova tano važno sose o amala šaj te utičinen ko odova sar tumare ćhave ka razmislinen hem sar ka ponašinen pe. But roditeljija trudinena pe olenge ćhave te družinen pe okolencar kola e Devle ćhivena ko prvo than. Na primer, o Endin hem i Bomin, kola živinena ki Obala Slonovače, but putija vićinđe e pokrajinsko nadgledniko te sovel koro lende. O Endin phenela: „Odova so vićinđam e pokrajinsko nadgledniko koro amende, but pomožinđa amare ćhavese. Ov ulo pioniri hem akana služini sar zamenik ando pokrajinsko nadgledniko.“ Najšukar tano ked o roditeljija počminena te sikaven pe ćhaven đi tane pana tikne (Posl. 22:6). Razmislin ando Timotej. E Timotejesi daj, i Evnikija, hem olesi baba, i Loida sikavđe le „pana kotar tiknipe” (2. Tim. 1:5; 3:15; w19.12 25 ¶14; 26 ¶16-17).

Ov amal upro kaste avera šaj te osloninen pe. Na primer, amen na samo so phenaja so ka pomožina amare phralenđe hem e phenjenđe ked valjani, već hem ćeraja sa so šaj te pomožina len (Mat. 5:37; Luka 16:10). Ked amare phralja hem phenja đanena so šaj te osloninen pe upro amende, odova tano olenđe bari pomoć hem uteha. Jekh phen phenela: „Ked đaneja so o phral ja i phen sigurno ka ovel odothe ked valjani, odova dela tut baro mir ko vilo.“ Okola soj tane ko pharipa ja soj tane obeshrabrime, but putija osetinena pe pošukar ked odolestar vaćerena jekhe pouzdano amaleja. Te šaj te ova amala upro kaste avera šaj te osloninen pe hem kase šaj te verujinen, amenđe valjani strpljenje. Ked amare phenja, e Žana, aćhavđa olako rom, olaće hine polokho ked ando pe osećanja vaćerđa pekle amalencar. Oj phenela: „On strpljivo šunđe man, iako but putija vaćerđum ando ista buća.“ Hem tu šaj te ove šukar amal ađahar so strpljivo ka šune averen (w20.01 10-11 ¶9-11).

Ki Biblija isi but manuša kola hine len zorali vera hem kola dobinđe sveti duh. Ama, odola manuša na hine len nada so ka živinen upre ko nebo. Na primer, o kralj David hine le sveti duh (1. Sam. 16:13). Akava duh pomožinđa lese te haljol e Devlese hor buća hem te pisini disave delovija andi Biblija (Mar. 12:36). Ama, o Pavle phenđa so o David na „ukljislo ko nebo“ (Dela 2:34). Isto ađahar, hem o Jovan Krstitelj hine le sveti duh (Luka 1:13-16). O Isus phenđa so nane nijekh manuš kova tano pobaro ando Jovan Krstitelj, ama isto phenđa hem so ov na ka ovel ko nebesko Kraljevstvo (Mat. 11:10, 11). Iako o Jehova dinđa poklo sveti duh odole manušenđe te ćeren bare buća, ipak na koristinđa isto akava duh te birini len te živinen ko nebo. Da li odova značini so on na hine odobor verna? Na. Odova značini so o Jehova ka vazdel len ando meribe te živinen ko raj ki phuv (Jov. 5:28, 29; Dela 24:15; w20.01 25 ¶15).

O Jehova birinđa amen te ova deo andi olesi porodica kuri sare služinena olese. Sare kola tane deo andi amari porodica predajinđe po đivdipe e Devlese hem mothovena vera ki otkupno žrtva koja dinđa oleso Ćhavo. Amen hijam jekh bahtali porodica. Već akana isi amen bahtalo đivdipe hem jedva ađićeraja o vreme ked zauvek ka živina, bilo ko nebo ja ko raj ki phuv. Odolese so but mangela amen, o Jehova arakhlja način te šaj te ova deo andi olesi porodica. Ama te bi ćerela odova, ov morandilo te ćerel jekh bari žrtva (Jov. 3:16). Ki Biblija pisini: „But skupo hijen platime“ (1. Kor. 6:20). Sebepi i otkupno žrtva, amen šaj te ova paše oleja. Amenđe tani bari čast so šaj e najbare osoba ko svemir te vićina, amaro Dad. O Jehova tano najšukar Dad. Sar jekh e biblijako pisco, hem amen šaj pućaja amen: „Sar šaj te irinav e Jehovase sa o šukaripe kova ćerđa maje?“ (Ps. 116:12). Nisar našti te irina lese sa o šukaripe kova ćerđa amenđe. Ama, sebepi so ov but mangela amen hem amen hijam podstaknime te manga le (w20.02 8 ¶1-3).